View
124
Download
0
Category
Preview:
Citation preview
1
XXXIII Selmana del Folclor Astur
La Emigración
Índiz de capítulos
I: La emigración:
¿Qué ye la emigración?
¿Qué ye un “emigrante”?
¿Quién emigraba?
¿Por qué?
¿D’aú yeren los emigrantes?
¿A qué países s'emigraba?
Los misioneros
II: La evolución hestórica:
La emigración na Hestoria
Periodu 1882-1930
Periodu 1931-1945
Los neños de la guerra
Periodu 1946-1958
Periodu 1958-1970
Periodu 1970-2008
III: El viaxe y La estancia:
El viaxe en barcu
El recibimientu
El trabayu
Les remeses
El viaxe de vuelta
Los indianos
Les consecuencies
IV: Los destinos:
Arxentina
Brasil
Cuba
Chile
México
Panamá
Uruguai
Venezuela
URSS
Francia
Alemaña
Suiza
Bélxica
Holanda
Reinu Xuníu ya Irlanda
Estaos Xuníos y Canadá
Oceanía
África
V: Los nuesos emigrantes:
La morriña y la señardá
Les sociedaes españoles
Los centros asturianos y les cases
d’Asturies
Los periódicos de los emigrantes
Siero
VI: El sieglu XXI:
Llexislación española y emigración.
La emigración güei
VII: Anexos:
I. Polesos en “Las Yndias”
II. Sierenses en “Las Yndias”
III. Biblioteques, museos y centros de
documentación
IV. Los centros asturianos del mundiu
V. Les artes y la emigración
VI. Bibliografía y webgrafía
2
CAPÍTULU 1: LA EMIGRACIÓN
Migración: Movimientu de población que consiste en dexar temporal o definitivamente’l llugar de residencia pa
establecese o trabayar n’otru país o rexón, mayormente por causes económiques, polítiques o sociales: hai dos tipos de
migración: la emigración y la inmigración.
Emigración: Movimientu de población que consiste na salida de persones del so llugar de residencia pa un país o
rexón distinta pa establecese nelli de forma temporal o definitiva.
Inmigración: Movimientu de población que consiste na llegada de persones a un país o rexón distinta del so llugar
d’orixe pa establecese nelli de forma temporal o definitiva.
La migración ye un fenómenu presente a lo llargo de la Hestoria de la humanidá y en cierta midida una
traza significativa de la nuesa Hestoria local. Les migraciones son un fenómenu con una Hestoria llarga y
complexa; el so orixe remonta cuasimente a la Prehestoria. Dende abenayá Europa foi testigu de fluxos de
población y los europeos de güei somos descendientes d’estos migrantes, obligaos a dexar los sos llares por
razones económiques, relixoses, militares o polítiques pa dir pa tolos puntos del planeta.
Na Hestoria d’Asturies anterior al sieglu XIX podemos estremar dos modalidaes migratories constantes:
la definitiva, que conducía a un númberu pequeñu d’asturianos a América Llatina o bien al interior de la
Península; y la estacional, compuesta por artesanos y comerciantes, que volvíen a pa en casa n’acabando’l
trabayu.
Más tarde, el procesu migratoriu camuda de toes toes y produzse una salida masiva de persones pa
otres tierres, sobre manera dende’l 1853, añu nel que se deroga espresamente la prohibición d’emigrar a les
nueves repúbliques llatinoamericanes (antes namás podía emigrase llibremente a Cuba, Puerto Rico y Filipines).
Dende esti momentu produzse una salida perimportante d’asturianos pa países como Cuba, México, Uruguai,
Arxentina, Chile o la República Dominicana, nun movimientu que va siguir nel sieglu XX a Europa y otros
destinos tan alloñaos como Oceanía.
¿Qué ye la emigración? La emigración defínese xeneralmente como'l treslláu a otru territoriu col enfotu de desenvolver una actividá de
tipu llaboral. Tamién tendríemos d’añader que, mayormente, un emigrante ye una persona apurada por
problemes económicos o circunstancies sociales desfavorables al que nun-y queda más remediu que dexar el
so país en busca de condiciones de vida meyores, o nel so defectu, tranquilidá.
Ente los motivos más recurrentes que faen tomar la decisión d’emigrar destacaríemos:
• Problemes referíos al nivel de vida: el desemplegu, los salarios perbaxos, etc.
• Persecuciones por razones raciales, polítiques y relixoses.
• Guerres civiles o internacionales.
• Razones medioambientales (catástrofes de tipu natural).
¿Qué ye un “emigrante”? Según la Academia de la Llingua Asturiana, emigrante ye “persona [qu’emigra]” y define emigrar como
“marchar a vivir [d’un país pa otru por necesidá]”.
Como datu chocante, nel sieglu XVIII la definición d’emigrante taba rellacionada col tipu de pasaxe col
que se viaxaba. Por eso, na Llei d’Emigración del 1907, considerábense emigrantes a “loa que teníen intención
de dexar España con un pasaxe de tercer clase, yá fuera gratuitu, pagu, o de cualquier clas considerada
equivalente pol Conseyu Superior d’Emigración y con destín a cualquier puntu d’América, Asia o Oceanía”.
Dempués, la Llei de 1924 añadía a los anteriores a les persones que dexaben España con mires
d’establecese n’otru país por motivos llaborales.
3
La Llei d’Ordenación de la Emigración, del 1960, especificaba que yeren emigrantes tamién, los que
dexaben el país pola llamada de residentes nel estranxeru, o los familiares d’emigrantes.
A lo último, la Llei del 1971 suprimía la condición de viaxar con pasaxe de tercer clase o equivalente,
colo que pasaba a considerase emigrante a tou aquel que dexara España pa establecese n’otru país por distintos
motivos.
¿Quién emigraba? En cuantes al perfil del emigrante, polo xeneral –y concasando de toes toes col de la mayoría de los
asturianos que dexaron Asturies– describe una persona moza y soltera, en busca d’oportunidaes de trabayu
nueves. Provién davezu d’un mediu rural atrasáu y probe, magar hai que reseñar qu’esta probitú nun tenía de
ser absoluta, yá que si non diba ser imposible pa ellos asumir los gastos del viaxe (teníen que tener
siquieramente unes tierres qu’empeñar pa poder pagar el viaxe). L’emigrante solía venir d’una familia
numberosa y polo normal yera solteru. Cuasi toos entamaron el viaxe bien mozos, ente los 12 y los 16 años, y
con una preparación escasa o nula. El so destín mayoritariu foi la islla de Cuba, siguida, yá a cierta distancia,
pola República Arxentina. Otros países iberoamericanos como México, Chile o Puerto Rico tamién recibieron
emigrantes.
C. Yánez, nel so llibru La emigración española a América (siglos XIX y XX), 1994 y C. Y. Núñez na so
obra Alfabetización y crecimiento económico en España, 1860-1977 faen una descripción minuciosa del
emigrante tipu nestes dómines. Dambos coinciden en que faciendo un análisis por sexos pue afirmase que
mayoritariamente, a lo menos nos empiezos del sieglu XX, fueron varones una y bones la rellación de
masculinidá, esto ye, el númberu d'homes por cada 100 muyeres, foi especialmente altu ente’l 1882 y el 1930,
llegando a superar nel 1892 los 500 homes por cada 100 muyeres. Esta proporción tan alta ye consecuencia de
les migraciones temporales a Centroamérica lligaes al trabayu estacional nel campu, como vamos describir más
p’alantre. Esti desequilibriu foi amenorgando a lo llargo’l sieglu XX, al aumentar la emigración familiar y la
reunificación de families, favorecida alministrativamente pa llograr l’asentamientu definitivu de los pobladores
nuevos, necesarios nos sectores afectaos pola abolición de la esclavitú, como ye’l casu de Brasil. Esta
proporción alta d’homes tampoco se produxo cola mesma intensidá en tolos países de destín. Cuba algamó los
niveles más altos de masculinidá pola so demanda de mano d’obra pa les zafres1, qu’imponía’l modelu
d’emigración estacional. Otra manera, la emigración a Arxentina ente’l 1888 y el 1889, o la zona de Sao Paulo
en Brasil pa los cultivos cafeteros, demandaba tamién mano d’obra femenino.
Estos datos nun impliquen necesariamente que les muyeres nun conformaren un grupu migratoriu bien
importante a pesar de que la Hestoria nun suela faer fincapié nel so papel. Lo mesmo que los homes, yeren
muyeres moces, na so mayoría solteres, que buscaben un bienestar que nun-yos ufiertaba la so tierra. Polo
xeneral, yeren persones con capacidá llaboral plena, nivel cultural baxu y orixe humilde. Tamién hebo ente les
muyeres emigración clandestina, que burllaba los controles oficiales y llegaba de manera illegal a los países
hispanoamericanos. La participación femenina medró a lo llargo del sieglu, de la mesma manera que los grupos
familiares, nos que se detectaba la presencia de muyeres. Tocantes al so nivel cultural, les muyeres
presentaben un porcentaxe más altu d’analfabetismu que los homes.
Centrándomos con mayor detalle na edá de los emigrantes ye de destacar qu’alredor del 83 % taben
ente los 14 y los 60 años, magar el grupu más numberosu yera’l de los varones de 15 a 19 años. La mocedá de
los emigrantes a principios del sieglu XX yera tala qu’inclusive a la prensa de L’Habana (1916) chocába-y esta
circunstancia, como describe César Yañez Gallardo nel so llibru La emigración española a América (siglos XIX y
XX):
1 Collecha de la caña dulce.
4
“Llamó l’atención de dellos colegues el númberu descomanáu d’inmigrantes
menores d’edá que lleguen a esta islla. Nun vapor namás vinieron, va dellos díes, nada
menos que 400. La edá d’estos inmigrantes abanga ente los catorce y los diez y ocho
años. Dalgunos nun lleguen nin a los dolce. Tenemos entendío qu’hai una llei qu’establez
la edá en que pue almitise a los inmigrantes d’esti país. Polo visto con esta llei asocede
lo que con otres munches: que nun se cumplen cola escrupulosidá debida. ¿Cómo vienen
esos neños emigrantes? Polo xeneral, solos. Con o ensin la correspondiente
autorización de los sos padres o tutores. Recomendaos a dalgún pariente o amigu de la
familia, cuasi siempre comerciantes. ¿A qué vienen? A dedicase al comerciu,
empezando, como ye natural, poles ocupaciones más humildes de la tienda onde caen.”
Choca tamién lleer lo que’l Conseyu Superior d’Emigración afirma nel so Boletín d’Emigrantes del 1916:
“El consuláu nun puede ayudalos eficazmente escontra les tropelíes de dellos patronos
por escarecer d’aición llegal pa ello. Asocede de cutiu qu’un menor allega al consuláu
reclamando escontra un patronu que, dempués d’esplotalu con un trabayu escesivu (y en
Cuba nun hai lleis que protexan a la infancia del trabayu), ñegase a pagar el salariu
alcordáu; el menor, nesti casu, va quedar indefensu, yá que los tribunales de Cuba nin-y
reconocen personalidá pa comparecer en xuiciu, nin acepten la competencia del
consuláu pa representar al menor ensin un poder en regla de los padres o tutores
d’ésti.”
Otru factor definitoriu del emigrante ye’l so estáu civil. Como yá mentemos primeramente, la mayor
parte de los emigrantes fueron homes nuevos y solteros qu’emigraben solos. Anque nun tenemos datos sobre
l’estáu civil de la emigración hasta 1925, constátase qu’a partir d’esa fecha más del 60 % de los pasaxeros
yeren solteros. A lo llargo de la década 1925-1934 la diferencia ente dambos grupos foi compensando,
permediándose a partir de los años cincuenta.
Un datu interesante ye qu’una gran parte de les emigrantes solteres casaben n’América con
compatriotes y poques veces volvíen a la Península pa casase. Otra manera, yera habitual que los homes
tornaren al so llugar d’orixe a contraer matrimoniu.
Nel casu de la vilbedá constátase una gran proporción de muyeres vilbes –6 %– en rellación a los homes
–1 %– que decidieron refaer les sos vides al otru llau del Atlánticu (G. Rueda 2000).
En cuantes al perfil profesional del emigrante hai que destacar que ye bien variáu ente los varones. Ente
1882 y 1930 dos terceres partes de los que declaraben oficiu yeren llabradores, siguíos de lloñe por
trabayadores del comerciu y del tresporte. La composición profesional nun respondía tanto al tipu de demanda
de mano d’obra del país de destín como al perfil de los escedentes de la ufierta na Península naquelles décades.
Si centramos nel nivel de formación de los emigrantes vemos qu’una proporción alta, un 60 %, teníen
baxa o nenguna cualificación, sobre manera los llabradores.
¿Por qué? Les razones que lleven a una persona a emigrar de los sos países son xeneralmente complexes y diverses:
problemes referentes al nivel de vida, razones de tipu políticu, persecuciones internes nel país por razones
raciales, polítiques o relixoses, guerres, lo mesmo internes qu’internacionales, razones medioambientales, etc.
Afondando un poco más nel tema y centrándomos nel casu de los emigrantes asturianos les más frecuentes que
se describieron son:
Por imitación y encamientu
5
Ye bien frecuente que los emigrantes de fines del sieglu XIX y XX emigren pola imitación del vecín del
pueblu que coló y trunfó n’América y que volvió con fortuna. Pero tamién ye bien frecuente que los padres
encamienten a los neños y méten-yos la idea de qu’al llegar a los quince años tienen que marchar p’América,
con dalgún pariente o amigu, pa tener un futuru meyor. Esti fechu refuérzase pola imitación de persones
acomodaes n’Asturies que, cuando la emigración nun yera entá masiva, tamién deciden emigrar inclusive
llevando consigo capitales pequeños y una formación cultural curiosa. Dellos autores afirmen qu’esta última
circunstancia ye propia de les comunidaes del norte de la Península (nun siendo Galicia) que, de mano, nun se
caracterizaben pola falta de trabayu, nin por causa dalguna física o económica, a diferencia de zones del sur y
l’este peninsular, qu’emigraben de resultes de la miseria.
Pola publicidá
Otru de los motivos de la salida de los llabradores asturianos pa la emigración yera la propaganda falsa
de los axentes o armadores per mediación d’anuncios y reclamos notoriamente falsos. Estos axentes de los
armadores, dedicábense a faer publicidá de los viaxes y tamién a iguar los papeles pa la salida de los
llabradores, que poníen toles sos esperances d’una vida meyor nes oportunidaes d’otres tierres. Yá avanzáu’l
sieglu esta especie d’axencies de viaxes pa ultramar pasaron a tar sometíes al control de les inspecciones
d’emigración (la d’Asturies taba en Xixón), y teníen el nome de "Oficines d’Información y Despachu de Pasaxes
pa Emigrantes", condición qu’obligaba a llevar un “llibru de rexistru", colos datos referentes al comprador de
caún de los pasaxes y un "copiador de cartes", cola correspondencia referente al mesmu asuntu; dambos llibros
tenía que revisalos pola inspección correspondiente.
Por safase del allistamientu militar
Otra de les razones qu’obligaba al asturianu a emigrar yera’l serviciu militar. El sistema d’allistamientu,
que se remontaba a tiempos de Carlos III, consistía en garrar a un mozu de cada cinco de reemplazu (d’aende
que se defina cola pallabra “quintos” a los reclutes); quedaba asina venceyáu a la tropa por un periodu d’ocho
años, anque por causes económiques diverses del Estáu español naquellos tiempos, llegaron a concedese
llicencies temporales (preferentemente en tiempu de collecha). Al sistema de “quintos” contestóselu enforma
(motín 1773 Barcelona) y tamién lu refugaron llugares como Madrid, y tamién profesiones como llicenciaos,
clérigos, mayestros d’escuela, etc. El sortéu nun se faía con rigor y al quintu sorteáu sustituyíalu un probe o
vagamundu, si’l médicu nun lu declaraba incapacitáu. Esto llevó a que los más desamparaos o ensin influyencia
dala fueren al serviciu militar. Nel 1717 una Real Cédula provocó que se recoyeren los vagamundos y
folganzanes ya ingresaren nel exércitu. Nel 1775 Carlos III ordenó qu’añalmente se fixera una lleva en Madrid y
en tolos pueblos grandes pa la recoyida de “vagamundos, ociosos y mal entreteníos”. A los trés díes, si nun
podíen xustificar ocupación, teníen ente 17 y 36 años y escarecíen de torga física, quedaben suxetos al serviciu
militar.
Dempués, nel 1837 quedó establecío que podía sustituyise la obligación militar por una cantidá de dineru,
que se concretó nel 1885 en seis mil riales (9 euros) pa los destinos peninsulares y n’ocho mil riales (12 euros)
pa los destinos d’ultramar; estes cantidaes taben bien percima de les posibilidaes de los llabradores asturianos,
y d’aende la decisión d’emigrar.
Hai que destacar que surdieron compañíes de seguros que cubríen esti aspeutu (pagando a partir de la
ñacencia del neñu) pero’l so campu d’aición taba más bien na ciudá, nel ámbitu rural yera escasu.
Nel añu 1885 tamién s’estableció que la duración del serviciu militar yera de dolce años, dende la
entrada na caxa de reclutes hasta l’acabu de la segunda reserva. Tamién se crea la figura del sustitutu, otra de
les posibilidaes de llibrase del serviciu militar. Aquellos quintos destinaos a ultramar podíen buscar un sustitutu,
que tendría de ser de la mesma zona, solteru o vilbu ensin fíos y ensin pasar de los trenta y cinco años. Esto
provocó que los dueños de les caseríes llegaren a amenazar a los sos inquilinos con perder la casería que
teníen en réxime d’arriendu si ún de los sos fíos nun faía’l serviciu militar en sustitución d’un fíu del dueñu de
6
les finques. Estes reglamentaciones siguieron en vigor hasta’l 1912, en que se suprimieron y apaecieron otres
formes de serviciu militar.
Esti inxustu y perllargu sistema de serviciu militar yá yera abondu por si mesmu p’animar a la
emigración, pero a esto añadíense les guerres (Cuba, Filipines, Guerres Carlistes n’España y otres guerres
coloniales, sobre manera Marruecos, que foi la que más altu grau d’emigración provocó). Esta emigración llegó
a ser tan alta que, a manera d’exemplu, citamos un datu: nel sortéu de quintos nel 1892 hebo un 78 %
d’ausentes nel conceyu de Sotu’l Barcu, porcentaxe fácilmente estrapolable a otros puntos de la nuesa tierra.
Nel periodu de 1915 a 1920 n’Asturies algamóse’l segundu mayor númberu de prófugos del Estáu, per tras de
Canaries, llegando a más del doble de la media estatal.
Por razones económiques y de población
Tres la desamortización de Mendizábal2 la situación de los llabradores empeora, al xubir los propietarios
les rentes de les caseríes, obligando a la xente a emigrar, al empar que torgaba tamién el que los colonos
pudieren acometer meyores na esplotación. El periódicu El Carbayón el 13 de xineru del 1881 escribía:
“Den-yos (a los llabradores) tierra fértil pa semar y arriendos ventayosos, más
estimación y menos desdeñu, allívienlos de los impuestos y baxen el preciu del
arriendu; entós la emigración va menguar, porque naide va buscar lloñe lo que pue
atopar nel so llar.”
Tamién el factor poblacional ye de tener en cuenta, yá que na segunda metá del sieglu XIX les tases de
natalidá altes que s’algamaron nun dexaben ufiertar tierres a los fíos con particiones nueves de caseríes porque
estes teníen una estensión mínima. Esti sistema de propiedá propiu de la nuesa tierra, basáu nel minifundiu,
retrasaba la modernización y yera un factor d’espulsión de población, al xenerar desemplegu agrícola. Por si
esto fuere poco tamién influyeron los nuesos sistemes d’heriedu tradicional, que nunos casos favorecíen
puramente a los primoxénitos, y n’otros faíen inviables les propiedaes poles socesives subdivisiones xeneración
tres xeneración, como yá destaquemos.
A manera d’exemplu gustaríamos reproducir la descripción que fai Blanca Sánchez nel so llibru Las
causas de la emigración española sobre esta causa impulsora d’emigración:
“Los factores d’espulsión que tán detrás de la emigración son diversos: un crecimientu
altu de la población nes décades anteriores que ruempa los equilibrios ente los recursos
y la población, una agricultura atrasada ya incapaz de dar emplegu a esa población,
predominiu de pequeños llabradores y renteros con problemes de dotación de capital
p’ameyorar la so esplotación pero con posibilidaes mínimes pa encarar el costu de la
emigración, un sistema d’heriedu desigual qu’impulse la emigración de los
desfavorecíos, tases d’alfabetización altes abondo como pa permitir l’accesu y
l’espardimientu de la información; niveles salariales baxos nel casu de población
xornalero y con desenvolvimientu urbanu ya industrial escasu como alternativa a la
emigración esterior, y, d’últimes, una tradición migratoria anterior que, per mediación de
les cadenes migratories o del efectu familia - amigos, emburrie y facilite la decisión
d’emigrar.”
2 Consistió en poner nel mercáu, previa espropiación forzosa y con una subasta pública, les tierres y bienes en poder de la Ilesia católica o
les órdenes relixoses acumulaos gracies a donaciones, testamentos y abintestatos. Tamién los ermos y tierres comunales de los conceyos.
7
¿D’aú yeren los emigrantes? La cantidá de persones que deciden dexar el llar y emigrar pa otros llugares foi bien desigual nel
conxuntu del Estáu Español. Ente’l 1885 y el 1930 el norte de la Península foi quien más persones apurre al
movimientu migratoriu. Galicia foi la primer comunidá en cuantes al númberu de migrantes (41,8 % del total),
hasta’l puntu de que’l términu “gallegu” identifícase en munchos países llatinoamericanos col orixe peninsular.
Siguiéronlu Castiella y Llión con 12,4 %, Andalucía con 9,7 % y Asturies con 9,10 %3. Amás de la proporción de
les rexones nel fluxu migratoriu ye bien importante saber cuála foi la tasa d’emigración. Esto ye, el pesu
demográficu de los emigrantes nel conxuntu de la población. Dende esi puntu de vista les comunidaes más
afectaes pola migración fueron ensin dulda Galicia, Asturies y Canaries, siguíes bien de lloñe por Cataluña y
Castiella y Llión.
¿A qué países s’emigraba? Como ye evidente non tolos países recibieron el mesmu númberu d’emigrantes. A partir de datos de S.
Palazón na so obra Capital humano español y desarrollo latinoamericano, ente 1882 y 1930 Cuba y Arxentina
fueron el destín preferíu pa los asturianos, pero ensin escaecer Brasil, Uruguai, México y Chile, que
constituyeron destinos secundarios nesta etapa, anque nellos tamién se formaron bien de colonies. Dempués, na
folada emigratoria del sieglu XX, los asturianos emigraron a Francia, Alemaña, Suiza y los Países Baxos
principalmente, ensin perxuiciu de los emigraos a otros puntos más alloñaos como Oceanía.
A nivel estatal, Arxentina foi’l país de preferencia nel sieglu XIX, absorbiendo la metá del fluxu
migratorio. Daquella yera un país n’espansión con una demanda de mano d’obra fuerte nel sector primariu, que
trataba de satisfaer per aciu d’una política poblacionista. Inclusive abrieron oficines d’información pa captar
emigrantes en Madrid, Barcelona y Pontevedra, tamién n’otros países europeos ya inclusive construyeron un
Hotel d’Inmigrantes en Buenos Aires, onde l’acabante llegar tenía drechu a mantención y agospiu per unos díes,
amás de facilitar el tresporte y la colocación de quien lo precisara.
Sicasí, foi Cuba’l destín preferíu polos asturianos. Recibió más de la tercer parte del fluxu migratorio,
representando’l segundu destín preferente, sobre manera nes décades últimes del sieglu XIX, cuando l’abolición
de la esclavitú na islla dexó a los facendaos ensin mano d’obra abondo pa les xeres agrícoles. Otru factor a
tener en cuenta foi la necesidá de defender y reforzar l’alministración de la tovía colonia española. Dempués de
la independencia, y bien especialmente ente’l 1910 y el 1925 Cuba convirtióse en sitiu preferente pol puxu
económicu de la islla.
Na folada emigratoria del sieglu XX los destinos escoyíos polos asturianos fueron sobre manera Francia,
Alemaña, Suiza, Bélxica y el Reinu Xuníu, ente otros que vamos detallar más p’alantre.
Los misioneros Otru tipu bien significativu d’emigración que merez destacase ye la de tipu relixosu, cola que mos
referimos al conxuntu de persones destinaes a países estranxeros o unviaos en misiones. El so papel ye bien
importante por cuenta de la influyencia social y educativa de les órdenes y comunidaes eclesiales españoles na
sociedá llatinoamericana y al gran númberu de relixosos que la protagonizaron.
La relixón católica foi impuesta n’América Llatina dende’l momentu mesmu de la so colonización, lo que
trexo una gran arribación de relixosos españoles, que teníen la misión d’evanxelizar y ayudar n’asuntos
espirituales y materiales a los emigrantes españoles allá onde éstos s’atopaben.
3 Tases migratories per cada 1.000 habitantes (C. Yáñez, La emigración española a América), 1994.
8
Ente otres merecen atención especial les siguientes organizaciones, misiones y compañíes que
desenvuelven el so llabor en tol mundiu:
• La Misión Católica Española de San Cayetano (Sao Paulo-Brasil), que fundó la Escuela de
Formación Profesional pa fíos d’emigrantes españoles, cola fin de dar a los mozos un oficiu y caltener
nellos l’ambiente cristianu de los sos llares d’orixe.
• La Obra de Cooperación Sacerdotal Hispano Americana (OCSHA), que se creó cola fin d’estremar
la cooperación misionera de la cooperación ordinaria de les diócesis.
• Los Misioneros del Sagráu Corazón de Xesús, que formen una congregación internacional de más
de 2.300 componentes.
• Etc.
Anguaño hai un númberu grande de relixosos que siguen desenvolviendo’l so llabor principalmente
n’América Llatina, onde tienen gran influyencia educativa y social. Xesuites, franciscanos, dominicos, agustinos,
misioneros del Sagráu Corazón de Xesús, siguen ellí presentes y la so obra ye notablemente conocida. Estes
órdenes contribuyeron a la creación d’una rede d’escueles, centros de formación técnica, universidaes y centros
especializaos d’altu nivel, nos que se forxó un bon númberu de talentos y dirixentes llatinoamericanos. El llabor
de munchos d’estos relixosos y relixoses ye bien importante nel desarrollu social de distintos países, dando
apoyu asistencial nes comunidaes más probes.
9
CAPÍTULU 2: LA EVOLUCIÓN HESTÓRICA DE LA EMIGRACIÓN
La emigración na Hestoria: Podríemos dicir ensin mieu a enquivocamos que la Hestoria de la humanidá ye en bona midida la
Hestoria de les emigraciones. Si partimos del supuestu del orixe de la vida n’África, toa espansión posterior ye
en sigo mesma una emigración que mos lleva al traviés de los sieglos y de los distintos territorios hasta los
nuesos díes.
Episodios de la Hestoria de la humanidá como la Fuxida d’Exiptu del pueblu xudíu en busca de la Tierra
Prometío ye emigración; la espulsión de los xudíos sefardinos y de los moriscos del reinu d’España, yá en
dómina moderna, ye emigración; el descubrimientu d’América y el so procesu de colonización ye emigración,
por citar namás dellos casos significativos.
Asturies tampoco s’escapa a esti fenómenu propiu de la naturaleza humana. Na nuesa tierra siempre
hebo y sigue habiendo emigrantes. La nuesa tierra vio la llegada de xente del imperiu romanu, de pueblos
bárbaros y non tan bárbaros, inclusive la nuesa xente emigró a otres tierres nes files romanes. Sicasí, el sieglu
XIX marca un puntu d’inflexón na nuesa Hestoria de manera definitiva y ye’l que vamos tratar d’esplicar con
más detalle nos capítulos siguientes.
La Hestoria de la nuesa emigración hasta’l boom emigratoriu del XIX nun algama cifres significatives,
anque sí ye destacable qu’aquellos qu’abandonaben Asturies buscando una forma de vida nueva diben nun
númberu bien importante pa la capital del reinu d’España. Yá dende entamos del sieglu XVI los asturianos
emigraos en Madrid exercíen oficios duros, como carboneru, aguador o serenu. Esti postreru ye quiciabes el
más llamativu, sobre manera si reparamos que nel añu 1932, un 27 % de los serenos de Madrid yeren
asturianos, de Cangas mayoritariamente, dando’l relevu al oficiu d’aguador, que perduró na capital hasta
mediaos del sieglu XIX.
Juan Jiménez Enllordia, nel so estudiu sobre los coritos4 y basándose nos datos del Archivu Municipal de
Madrid, afirma que “la emigración d’asturianos a Madrid foi especialmente fuerte ente 1694 y 1734, cuando se
llegó a que’l 20 % de los emigrantes a la capital del reinu procedíen d’Asturies. Nel 1850, según el padrón
madrilanu, llegó a haber 17.195 asturianos na villa y corte, el 14,21 % de la población inmigrante, la más
numberosa”.
Cangas, Cabranes, Tinéu y Villaviciosa fueron los conceyos que más emigrantes aportaron nesta dómina.
Llegaron a representar el 94,47 % de los aguadores madrilanos y el 66,33 % de los serenos. Descargadores y
carretadores, criaos, ayudes de cámara, conductores de coche de caballos, carboneros o nodrices fueron otros
de los oficios nos que los asturianos destacaron. Amás, munchos d’ellos, al precisar llicencia del Conceyu,
heredábenlos los fíos, colo que la castra siguió a lo llargo los sieglos.
El númberu d’emigrantes asturianos en Madrid yera talu que nun tardaron en surdir iniciatives comunes
y asociaciones. Asina, en 1743 vía la lluz la Real Congregación de la Nuesa Señora de Cuadonga, y en 1881
fundábase’l Centru Asturianu de Madrid, como segunda organización rexonal del mundiu tres el Centru Gallegu
de L’Habana.
Periodu 1882-1930: La Gran Migración Les grandes tresformaciones demográfiques, económiques y sociales, y tamién los conflictos políticos y
les guerres, qu’asocedieron n’Europa ente’l 1840 y el 1930 afectaron a miles de persones. Homes y muyeres de
4 Por coritos conocíase a los asturianos que taben fuera d’Asturies, y asina mos lo cuenten en La Pícara Justina al referise a los asturianos:
“Otros les llaman coritos, porque en tiempos pasados todo su vestido y gala eran cueros”.
10
tolos requexos del continente protagonizaron un gran movimientu migratoriu pa escontra l’otru llau del Atlánticu
en busca d’oportunidaes nueves. Los primeros europeos n’emigrar p’América, más que nada pa los EE. XX.,
fueron los orixinarios de los países del Noroeste d’Europa, pero a partir del 1880 incorporáronse’l restu de los
europeos.
A lo llargo d’esti periodu, el destín preferente de la nuesa emigración esterior foi Hispanoamérica,
continente qu’absorbió más del 85 % de la emigración esterior española; el 15 % restante tevo como destín
África, fundamentalmente Marruecos, Arxelia y Guinea Ecuatorial; Asia, con Filipines cuasi puramente; y
Oceanía, sobre manera Australia. El restu de países europeos tevo un significáu escasu.
Dende los primeros momentos de la independencia, los gobiernos de les nueves repúbliques
llatinoamericanes entendieron que’l futuru dependía de la inmigración estranxera. La llegada d’inmigrantes
dexába-yos afitar el so sistema económicu y consiguir la base demográfica necesaria pa poblar y modernizar
los sos países. Ye por ello que a lo llargo’l sieglu XIX la mayoría de países llatinoamericanos aprobaron lleis y
midíes pa fomentar la inmigración. Dellos gobiernos instalaron inclusive oficines d’inmigración n’Europa, y faíen
publicidá per aciu guíes y cartiyes sobre les ventayes que los inmigrantes podíen atopar al otru llau del
Atlánticu. La mesma demanda de mano d’obra d’estos países conformó les distintes modalidaes migratories, que
se produxeron na Península con destín a América:
A. Emigrantes permanentes, mayormente trabayadores que diben colonizar tierres nueves, a
sustituyir la mano d’obra esclavo tres l’abolición de la esclavitú, o como trabayadores industriales y del sector
de servicios: comerciu, tresportes o banca.
B. Emigrantes temporales, trabayadores destinaos a la execución de les obres d’infraestructura
necesaries pa les esportaciones, y que namás permanecíen nos países de destín el tiempu que durara la
construcción: la Canal de Panamá, les llinies ferroviaries y redes de carreteres n’Arxentina, Brasil, Colombia,
Cuba o Uruguai, les ampliaciones de los puertos de Buenos Aires, Montevideo, L’Habana, Río de Janeiro...
C. Emigrantes estacionales, trabayadores que collaboraben cola agricultura d’esportación ente los
dos continentes. Ye’l casu de la zafra en Cuba o de la collecha de cebera n’Arxentina. N’acabando’l trabayu en
Llatinoamérica, tornaben pa la Península pa faer llabores agrícoles asemeyaos.
Esti movimientu de millones d’españoles, llamáu por Sánchez-Albornoz “emigración en masa”, rexistrólu
dende’l 1882 l’Institutu Xeográficu y Estadísticu a partir del movimientu añal d’entraes y salíes de pasaxeros de
los puertos españoles. Ellí podemos cifrar en 3 millones y mediu los ciudadanos españoles que partieron
p’América, anque cálculos posteriores asitien la corriente emigratoria ente’l 1882 y el 1935 en tornu a los 4,7
millones de persones. Del total d’estos emigrantes, el 57 % volvieron a España con mayor o menor ésitu.
Esti conxuntu de datos nun incluyía a los emigrantes qu’embarcaben dende puertos como Burdeos,
Xibraltar y Lisboa, nin la emigración clandestina. Les deficiencies pónense de manifiestu sobre manera al
comparar les cifres de salíes coles de llegaes, rexistraes poles autoridaes de los países de destín.
Poro, ye difícil, contabilizar la emigración illegal, anque una montonera de testimonios de la dómina falen
d’esti fenómenu. En 1920 calculábase que, na primer década del sieglu XX, más de 40.000 españoles emigraron
de manera clandestina, de resultes de la política emigratoria restrictiva esistente (S. Argemí, 1920).
“Con midíes restrictives namás se consigue fomentar la emigración (clandestina y
contratada que son les más peligroses), porque’l pasaxeru, por causa les molesties y los
desembolsos pa consiguir un pasaporte, va valise d’otros medios pa salir, y si ye difícil
llogralo equí, nun-y asocederá lo mesmo en Burdeos, onde si-y piden daqué va ser la
cédula de vecindá, porque tolo más qu’esixen ellí ye papel moyao.”
Y. Vincenti, 19085
5 Director d’Alministración y Fomentu nel Ministeriu d’Ultramar.
11
Esti periodu d’emigración en masa viose atayáu pola Primer Guerra Mundial y la crisis económica
xenerada en munchos países, lo qu’enzancó los movimientos tresoceánicos y fixo baxar la corriente migratoria.
Como yá mentemos, nesti llargu periodu una parte considerable de la población española dexó la
península de manera permanente o temporal. Hai datos que falen d’unos trés millones d’españoles (3.253.448)
según les cifres oficiales, anque investigaciones recientes calculen qu’algamaríen cuasi los cuatro millones y
mediu (4.360.387). La diferencia ente dambes cifres ye por causa la emigración clandestina: ente un 20 y un 30
% emigraron de menera clandestina pa nun cumplir el serviciu militar o pa evitar pagar les tases de salida,
como yá espliquemos. Munchos salieron dende puertos fuera d’España o llegaron a los barcos yá n’alta mar cola
ayuda d’intermediarios denominaos “redes d’enganche”.
Periodu 1931-1945 La recesión económica, que siguió al crack del 29, afectó duramente a los países llatinoamericanos y
consiguientemente a la necesidá d’inmigrantes. Arxentina, Cuba, Brasil o Uruguai frenaron la llegada de xente y
recortaron los fondos con que cuntaben los organismos d’ayuda a los refuxaos.
Sicasí, México sí aceptó la llegada d’inmigrantes y sobre too los exiliaos6 de la Guerra Civil, que trexo
consigo les consiguientes consecuencies demográfiques y salíes de refuxaos y exiliaos del bandu perdedor.
Namás en México ente 1939 y 1948 entraron 21.750 persones con estes circunstancies.
En cuantes que la crisis económica va superándose, el movimientu migratoriu sigue progresando, pali
que pali, hasta 1975, añu nel que se restableció la democracia nel Estáu español.
Los neños de la guerra
Dientro del grupu d’emigraos y exiliaos de resultes de la Guerra Civil española nun podemos dexar
escapar el fenómenu de los neños de la guerra, qu’al nuesu paecer amerita la pena un capítulu específicu
d’estudiu.
El gobiernu republicanu per mediación del Ministeriu d’Instrucción Pública, de los sindicatos de
mayestros como FETE-UXT y d’organizaciones humanitaries de diversu tipu na Guerra n’España plantegóse la
necesidá de protexer a los neños de los efectos del conflictu. A munchos sacóselos pal estranxeru,
principalmente a Francia, que recibió alredor de 20.000 neños españoles. Tamién mandaron pa Inglaterra a unos
4.000 neños, pa Bélxica alredor de 5.000, pa la Xunión Soviética 2.900, pa México 455, pa Suiza 800 y pa
Dinamarca 100.
N’acabando la guerra, el gobiernu de Franco creó en xunetu del 1938 una Delegación Estraordinaria de
Repatriación de Menores, dependiente del Ministeriu d’Asuntos Esteriores, pol que se repatriaron 20.266 neños
nel 1949, pero otros munchos quedaron nos países que los recibieron, sobre manera en Bélxica ya Inglaterra,
bien porque los padres morrieren, taben en prisión o en dalgún campu de concentración francés, o bien porque’l
padre taba muertu o prisioneru y la madre nun podía responder a les necesidaes de los fíos.
Per otru llau, Rusia y México ñegáronse a devolver a los neños y bien pocos d’ellos tornaron.
Los periodistes Nacho Orejas y Elena Fernández-Pello espublizaron el 16 d’abril del 2008 en La Nueva
España un reportaxe brillante sobre estos neños de la guerra. Nelli describen cómo más de mil neños salieron
nun cargueru francés dende’l puertu d’El Musel na madrugada del 24 de setiembre del 1936 fuxendo de la
guerra con destín la Xunión Soviética. Una de les sos entrevistaes, Remedios Coviella, ñacida nel barriu de
6 Cuando falamos d’exiliu referímosmos a la emigración forzosa, que se produz cuando una parte de la población tien que dexar el
so país p’asegurar la supervivencia, por causa la persecución a la que lo somete’l gobiernu por razones relixoses o polítiques. N’otros
casos, por desalcuerdu con un sistema políticu que recorta les llibertaes.
12
Pumarín y que tenía 10 años cuando españó la guerra, recuerda’l tracamundiu d’entós. «Nun entendíamos nada»,
cuenta. Remedios tenía ocho hermanos y cinco embarcaron pal exiliu; dos d’ellos morrieron nelli. La so
compaña y la de los otros neños que los acompañaben nel cargueru francés fixeron aquel viaxe más llevaderu.
Otra protagonista, Libertad Rodríguez, qu’entamó la mesma travesía con 9 años, describe una bodega na que
tolos neños diben amoriaos y devolviendo y cómo los recibieron en Leningrado “con orquestes tocando, ramos
de flores...». Ellí repartiéronlos per 16 cases infantiles, inclusive hebo families ruses que s’ofrecieron a
acoyelos nes sos cases. El profesor d’Hestoria de la Universidá d’Uviéu Francisco Erice, qu’intervieno nun
homenaxe a aquellos neños, güei octoxenarios, sorrayó que naquelles residencies infantiles «nun s'intentaron
erradicar los raigaños españoles» y siempres tevo presente «la idea del regresu».
Remedios Coviella tamién describe cómo toos siempre pensaben en volver, y ella fíxolo nel 1956. Nel
2005 volvió a Leningrado, güei San Petersburgu, y pudo atopar la casa onde tevo viviendo, un edificiu del sieglu
XVIII, que tien na fachada un cartel recordando a los neños españoles que s’agospiaron nella y que, cuando la
ocupación alemana, ayudaron a los soviéticos a combatir a los nazis.
Peor suerte corrieron otros 130.000 neños que morrieron por cuenta de los combates y bombardeos de
la guerra y poles males condiciones hixéniques y la escasez d’alimentos, lo que mos podría faer pensar que
“neños de la guerra” son tolos menores que vivieron la guerra y, por una causa o por otra, sufrieron les sos
consecuencies. Pero de manera específica aplícase esti nome al grupu de menores que tuvieron qu’abandonar
España na Guerra Civil o al poco del so desenllaz.
Periodu 1946-1958 Tres el llargu periodu de guerres (Guerra Civil y Segunda Guerra Mundial) empecipió nel 1946 un
periodu migratoriu nuevu, el postreru de los que se dirixeron a ultramar y con unes condiciones distintes.
Ente’l 1946 y el 1959 emigraren unos 30.000 asturianos pa Europa y, sobre manera pa Francia, onde yá
había munchos asturianos de la emigración política d’ente 1936 y 1939. Nos años 60 l’Estáu vuelve permitir la
emigración a Europa, movíu pola necesidá de les divises ingresaes polos obreros españoles.
Los países a los que se dirixó la emigración fueron Suiza, Alemaña, Francia, Bélxica, Holanda y Gran
Bretaña, que demandaben mano d’obra barato y poco cualificao, con un índiz altu de masculinidá. Al contrario de
la emigración americana, onde malapenes tenía importancia, la emigración clandestina o incontrolada pa Europa
foi bien importante. Destaca tamién la salida de munchos mineros asturianos pa Bélxica tres les “fuelgones” del
1962 y 63. A partir de la crisis del 1973 paralízase’l procesu y empiecen los retornos.
Paralelamente los países llatinoamericanos establecen nesos años cupos inmigrantes y niveles de
cualificación profesional pa les esportaciones agropecuaries, contribuyendo con ello nel cambéu de destín
preferente de los emigraos españoles. Los que, con too y con eso, se dirixíen a América procedíen
principalmente de Galicia con cuasi’l 46 % del total; siguía-y en segundu términu otra rexón hestórica nel éxodu
a América: Canaries.
Ente’l 1946 y el 1958 Arxentina siguió siendo’l destín principal. Cuatro de cada diez emigrantes diben pa
esti país y d’elli procedíen más de la tercer parte de los retornaos. Venezuela foi’l segundu sitiu de destín nesta
etapa. El so rápidu espoxigue económicu, gracies a la intensificación de la producción de petroleu, convirtió esti
país nun destín atrayente. En tercer posición Brasil recoyó una parte importante de los emigrantes por cuenta
del so desarrollu industrial.
Periodu 1958-1970 La etapa de la dictadura franquista que duró de 1958 a 1970, conocida como “desarrollismu”, supunxo la
modernización económica del Estáu. Supunxo tamién el momentu d’apoxéu del réxime franquista, dao que nella
hebo un importante desarrollu económicu resultancia de la combinación d’una política económica nueva, con trés
factores esternos, que fueron la llegada d’inversiones estranxeres, los ingresos procedentes d’un turismu que
13
cada vez tenía más pesu na economía española, y les remeses de dineru que mandaben los emigrantes que
siguíen yá en menor midida saliendo pa distintos puntos del mundiu.
Créense zones industriales nueves en distintos puntos del Estáu. Una d’elles alcuéntrase nel Cantábricu,
d’Asturies al País Vascu. Otra zona céntrase nel Mediterraneu, de Girona a Alacant, amás de Madrid y los
llamaos "polos de desarrollu" de Burgos, Valladolid, A Coruña o Huelva. Esti desarrollu marca la fin de la
tendencia emigratoria na nuesa comunidá y un cambéu d’enclín que frena la tradición emigratoria asturiana
reforzáu entá más pola llegada de la democracia y el regresu a casa d’emigraos y exiliaos.
Periodu 1970 - 2008 La emigración española a los países d’Europa occidental algamó ente 1969 y 1973 namás les 100.000
persones añales, lo que mos lleva progresivamente a cifres nada significatives dende’l puntu vista migratoriu.
Como yá indiquemos, la llegada de la democracia tamién contribuyó a la inversión d’esta tendencia que tamién
se vio potenciada primeramente cola crisis económica de 1973, que llevó al desemplegu a más de cuatro
millones de trabayadores de los nueve países de la CEE, (ente ellos taben los principales receptores
d’emigrantes). Les autoridaes d’estos países decidieron rebaxar o inclusive suprimir la emigración, nun siendo
pa los ciudadanos de los países de la CEE. Alemaña bloquió la entrada en payares del 1973, Francia en xunetu
del 1974 y un mes más tarde fíxolo Suiza.
La fin del sieglu XX fai que l’Estáu español dexe de ser un sitiu d’emigrantes pa ser un sitiu
d’inmigración. Tiénense datos de la inmigración de tipu llegal, pero desconozse la inmigración irregular o illegal
na so auténtica dimensión. Nos últimos cuarenta años, los estranxeros residentes llegalmente nel Estáu pasaron
de 65.000 a 400.000. Ente’l 1989 y el 1998, l’aumentu foi bien rápidu, anque apenes representa’l 1 % de la
población total española, porcentaxe inferior al d’otros países de la XE.
Ente los estranxeros que vienen podemos describir dellos grupos:
• Estranxeros nacionalizaos. La evolución de solicitúes de nacionalidá española medró de manera
estraordinaria nos últimos años. Les concesiones tán nes 8.000 añales, aproximao. Esta xuba obedez, per un
llau a la recuperación de la nacionalidá por parte d’antiguos emigrantes españoles y de los sos descendientes;
y, per otru, a los inmigrantes estranxeros que soliciten la nacionalidá. El mayor númberu d’inmigrantes
iberoamericanos ente los estranxeros nacionalizaos esplícase pol tratu preferencial qu’éstos tienen na nuesa
llexislación.
• Trabayadores. Nos años previos a la crisis de 2008 rexístrense alredor de 12.000
incorporaciones añales nueves al mundiu llaboral. La mayoría absórbeles Madrid y Barcelona. Los trabayadores
estranxeros empléguense básicamente nel sector servicios (67 %), na agricultura (13,5 %), y na construcción y
la industria (8 %). Los países d’orixe d’estos inmigraos son el norte d’África, Llatinoamérica, Asia, Europa non
comunitaria y Estaos Xuníos.
• Estudiantes. Los estudiantes estranxeros universitarios formen un coleutivu de cierta
importancia na inmigración internacional, la mayoría correspondió a Madrid, Granada y Salamanca.
• Asilaos y refuxaos. Ente los inmigrantes estranxeros nel Estáu, un coleutivu relevante ye’l de los
refuxaos, asilaos y esllarigaos, n’especial a partir del 1984, añu nel que se promulgó la Llei Reguladora del
Drechu d’Asilu y de la Condición de Refuxáu.
• Inmigrantes illegales. Defínese como inmigrante illegal a tou estranxeru que nun tien en regla la
so situación de residencia n’España. Llegalmente nun puen trabayar, morar o recibir ayudes sociales. El
númberu d’estranxeros en situación irregular ye malo de precisar. Pa llegalizar la so situación y saber el so
númberu realizáronse programes de regularización desque s’aprobó la Llei d’Extranxería nel 1985. Esti
coleutivu ta compuestu por persones nueves, de sexu mayoritariamente masculín, que s’empleguen en trabayos
como l’agricultura, la construcción, el serviciu domésticu, la hostelería y la venta ambulante. Vienen de países
como Marruecos, Arxentina, Perú y Senegal, y asiéntense en Madrid y Barcelona, mayormente.
14
CAPÍTULU 3: EL VIAXE Y LA ESTANCIA
L’aisllamientu propiu d’Asturies y la distancia de los principales destinos de los inmigrantes fixeron que
la forma más lóxica y habitual de salida fuera’l barcu, siguíu a bona distancia pol tren como principal mediu de
tresporte. El viaxe en tren foi’l más habitual na folada migratoria pa Europa, delles veces en condiciones bien
penoses, pero coles ventayes propies de los medios de tresporte del sieglu XX. Otra cuestión fueron les
circunstancies de viaxe de los emigrantes a ultramar del sieglu XIX, que paezmos que tienen que se tratar con
mayor detalle.
Los viaxes en barcu Primero de salir, l’emigrante tien de cumplir una serie de trámites fundamentales, una llista llarga de
requisitos, permisos y burocracia que nun facilitaben un res la salida. Ente otros pudimos llistar los siguientes:
• Cédula personal o pasaporte.
• Autorización énte notariu de padres y tutores pa les muyeres menores de 23 o 25 años, dependiendo
de les dómines.
• Autorización del home pa muyeres casaes.
• Certificáu de bona conducta.
•Certificáu de tar llibre de toa responsabilidá de quintes o de pagar el depósitu correspondiente.
•Certificáu de nun tar procesáu nin cumpliendo conderga.
•Certificáu de conocencia de dalgún oficiu.
Hai que tener en cuenta qu’amás de tolos anteriores y el correspondiente billete, l’emigrante tenía que
disponer de dineru pa pagar los trámites, la ropa y los efectos personales, el treslláu hasta’l puertu d’embarque,
l’agospiu hasta la salida y tenía de reservar una cantidá n’efectivu pa los primeros díes n’América. A última
hora, como yá se dixo, l’emigrante tenía de disponer d’un pequeñu capital. Estes dificultaes, xunto coles salíes
per puertos estranxeros y los embarques d’altura, favorecieron l’apaición d’una rede d’especialistes nel engañu,
falsificadores de documentos ya intermediarios de tou tipu.
El viaxe na primer metá del sieglu XIX realizábase fundamentalmente dende los puertos asturianos y el
tresporte facíalu una amplia rede de veleros locales que con bon tiempu tardaben ente 30 y 40 díes en llegar.
Salíen de los puertos d’Avilés, Ḷḷuarca, Ribesella y Llanes. Por cuenta de la so situación central y de les
relatives ventayes que tenía, en comparanza colos restantes puertos, el de Xixón foi dende onde se realizó’l
mayor númberu d’embarques.
Nos empiezos de sieglu XX el vapor impúnxose nes rutes a América, polo que’l viaxe menguó a unos 20
díes. El problema taba en qu’Asturies nun tenía puertos afayadizos pal atraque asina qu’hasta que nel 1911 nun
s’abra a esti tráficu’l puertu d’El Musel, los asturianos van tener qu’embarcar n’A Coruña, Vigo o Santander. A
partir del 1911 habilitóse’l puertu d’El Musel en Xixón pal embarque d’emigrantes y empecipiaron a canalizase
per elli la mayor parte de les salíes y tornes d’emigrantes asturianos.
Los viaxes de los emigrantes asturianos a América variaben según les condiciones en que se realizaben
y del poder económicu del viaxeru. Trescribímosvos de siguío dos fragmentos de diarios de dos asturianos de
distintu orixe y condición y la forma de viaxe de caún. Trátase de Pedro Fernández de 19 años, embarcáu
illegalmente n’A Coruña (1899) p’Arxentina pa llibrar del serviciu militar y de Modesto Montoto (1927-28), un
home con negocios naquel país:
15
“ [...] dieron a cada viaxeru un platu de lloza y un tarrín tamién de la mesma materia,
xuntamente con un tenedor y una cuyar. Caún diba buscar la so comida nel platu, que yera
bono abondo, consistiendo en carne de güe y de gochu, pataques, garbanzos, arroz,
fabones, bacaláu y dalgunes otres sustancies alimenticies bien tresnaes por un vieyu y
risonderu cocineru español; ¡y qué apertones llevábamos cuando díbamos buscala! con dos
hores d’anticipación yá la mayor parte de nós provistos del serviciu de mesa que mos
dieren arrodiábamos la cocina cuando malapenes principiare a ferver la comida y antes de
ponese a partilo caún emburriaba a los demás pa llegar primero al calderu que contenía'l
ranchu; ¡cuántos col apuru quemaben les manes tienendo por esta causa que tirar platu y
comida! Los que como a mi nun-yos gustaba’l pan comíemos el primer platu a toa priesa
nun faciendo casu, anque la comida de tan caliente como taba llevara consigo cachos de
piel del cielu la boca o del gargüelu pues nada se sentía con tal de llegar al reenganche,
como ellí se dicía cuando se volvía por otru platu de comida. Pela mañana entainábamos a
buscar el café armáu caún cola so tacina, na que mos daben tamién el té al atapacerín.
Cuando a dalgún se-y rompía dalgún de los servicios de mesa robaba a otru lo que
precisaba, esti facía lo propio colos demás, y asina socesivamente toos, de cuenta que too
se volvía robos de platos y taces, viéndose ún obligáu a guardalos con más cudiáu que si
fueren oru si nun quería esponese a tener qu’esperar a que dalgún de los sos amigos
comiera pa dempués sirvise elli de los sos arbíos, y pa que-y los emprestaren yera
menester que l’amistá fuera íntima. Yo tamién fui víctima d’un robu d’esta clase, yá que,
anque tuvi bon cuidu de guardar el platu sol colchón de la mio cama, esto nun evitó que me
lu robaren viéndome por esto obligáu a sirvir la comida y bebida na tacina qu’a lo más
tendría capacidá pa mediu cuartiyu; nesta situación tuvi dos díes pero dempués entendí la
necesidá de faer como los demás y n’efectu, faciendo como que diba a durmir al mio
camarote dende ellí robé un platu d’unes alforxes que teníen encolingaes cerca de min
unos llioneses y con esto salvé la situación. Les cames consistíen nunos caxones paecíos a
la metá d’un ataúde que sirve de postreru reposu al home y munches vegaes al veme echáu
venía a la mio memoria la más murnia de les alcordances humanes ¡la muerte! El colchón
nun yera otra cosa qu’un sacu enllenu d’herba curao, y por almuada teníamos unos cachos
de corchu xuníos ente sigo por unes cintes y cubiertos de lona, a los cualos llamaben
salvavides, amás a cada persona diéron-y una manta o cobertor pa tapase.”
Diariu de Pedro Fernández
“A les nueve de la mañana salimos en coche Faustino y yo pa la estación del Norte. Antes
despidíme de tolos de casa y de la mio fía Carmina, que taba daqué delicada de salú. Na
estación despidíme de Faustino y de Paco Sarandeses y nel tren corréu salí pa Xixón. Yá
en Xixón visité a la familia de Julio Peinado, de la que me despidí. Fui a les oficines de la
Tresatlántica, onde pagué y apurriéronme’l billete del pasaxe; dende ellí, dempués de faer
delles compres, fui al restorán ‘Mercedes’ en compaña de Julio Peinado, el so fíu Juan y el
so cuñáu César y ellí xintemos. A les dos y media salimos los cuatro nel tranvía pa El
Musel: llovía abondo. Nel puertu esperábenme Ángel y Antonio, Alfredo, Angelín, Felicita y
Ulpiano. Abreviamos la despidida y como siguía lloviendo colaron nos coches a les cuatro;
media hora más tarde abandonaben la cubierta del buque Julio, Juan y César; a les cinco
zarpó el Alfonso XIII. Por causa del agua y la borrina consiguiente nun me foi posible
almirar les nueses costes. Col corazón llanzo un adiós a los mios, a la Santina de Cuadonga
y a Asturies. Baxé pal camarote: anochaba.”
16
Diariu de Modesto Montoto
Esti trayeutu marítimu caracterizábase na mayor parte de los casos por condiciones infrahumanes ya
insalubres, tanto nos camarotes como pola comida que recibíen. Nos camarotes, bien pequeños, puercos y tan
fríos que los viaxeros teníen de durmir vistíos, atarraquitábense les families. L’alimentación foi motivu de quexa
permanente, pola mala traza del alimentu y la so escasez. Los principales perxudicaos d’esta situación fueron
los neños, que llegaben na so inmensa mayoría mal nutríos y descalteníos.
Hasta’l 1848 nun hai una llexislación que regule les condiciones llamentables de los barcos. Nel 1848
una Real Orde establez que tolos buques que se dirixan a ultramar con más de 70 viaxeros tienen de llevar un
capellán y un ciruxanu, va controlase que tengan agua abondo y provisiones y nun se va dexar qu’en nengún
buque embarque mayor númberu de pasaxeros de los que pudiera tresportar. Nos barcos había distintes clases
de pasaxe; d’ellos denominábase “emigrante” al d’última categoría. Ésta nun disponía de nenguna comodidá, nin
siquieramente de camarotes. Los pasaxeros teníen de distribuyise en centenares de lliteres dispuestes nes
entecubiertes de les bodegues.
El fluxu d’emigrantes per mar facilitó un espoxigue notable del sector navieru. Nel Estáu español, les
compañíes más importantes yeren la Transatlántica Española, fundada nel 1881 por Antonio López y López,
Marqués de Comillas. Tamién tuvieron relevancia les compañíes anglo-bilbaines, abanderaes pola Ybarra, la
Sota y Aznar. Tamién hebo munches estranxeres: italianes, alemanes, franceses, britániques y holandeses, que
tresportaben la mayor parte de los nuesos emigrantes, (ente un 60 y un 70 %) por cuenta de que les sos flotes
yeren más modernes, les sos rutes meyores y el tiempu d’espera pa los embarques enforma menor. Dalgunes
d’estes compañíes fueron la Hamburg-Amerika Line y Hamburg Sudamerikanische -Les Hamburgueses-, La
Veloce, Lloyd Italiana, Lloyd Austro-Americana, Compagnie Generale de Navigazione Italiana, The Royal Mail
Steam Packet Co (la ‘Mala’ Real Inglesa), Cunard, Compagnie Générale Transatlantique.
Na dómina emigratoria central había quince puertos autorizaos pal embarque d’emigrantes: Almería,
Barcelona, Bilbao, Cádiz, Coruña, Xixón, Les Palmes, Málaga, Palma de Mallorca, Santa Cruz de la Palma, Santa
Cruz de Tenerife (principalmente a Cuba), Santander, Valencia, Vigo y Vilagarcía, amás de los vecinos puertos
de Lisboa, Porto, Burdeos y Xibraltar (principalmente a Brasil).
Yá entraos nel sieglu XX los pasaxes encareciéronse, algamando precios bien prohibitivos y
equivalentes a munchos meses de trabayu, por ello ye que se fixeron bien populares les migraciones gratuites,
financiaes por Brasil, Arxentina y Chile ya incentivaes por axentes reclutadores ensin escrupulos, que recibíen
una cantidá por emigrante consiguíu. Tampoco faltaben los viaxeros posesores d’un billete pagu por familiares
o amigos yá emigraos n’América. José Ferrera Jimé, nel so llibru Historia de la emigración clandestina a
Venezuela describe esta situación de manera gráfica enforma:
“Los abusos xeneralícense... estafes de más de mediu millón de pesetes realizaes por
una axencia clandestina d’embarques nel Cantábricu, embarques clandestinos nes
Canaries, axencies defraudadores d’emigrantes n’A Coruña, o bien fazañes de báramos
de ganchos, falsificadores y axentes clandestinos d’emigración nel puertu de Vigo.”
Lo mesmo nel sieglu XIX que nel XX, les condiciones de la travesía yeren dures, polo que producíense
davezu enfermedaes, epidemies, cuarentenes y fallecimientos. Delles veces tamién se produxeron naufraxos,
ente los que destaca’l del vapor Valbanera, bautizáu como’l ‘Titanic de los probes’, que fundió provocando la
muerte de 488 persones nel camín a L’Habana ente’l 9 y el 12 de setiembre del 1919, por causa d’un potente
ciclón tropical. Otru casu foi’l del barcu Príncipe d’Asturies, arguyu de la flota y el más lluxosu d’España, que
17
topetó con un petón somorguiáu en Punta Pirabura (Brasil). En malapenes 10 minutos el barcu naufragó,
dexando más de 500 muertos.
Otres veces los barcos nun naufragaben pero llegaben al so destín con conscuencies igualmente
dramátiques. Esti foi’l casu del vapor francés Italie, qu’a la llegada al puertu de Santos (Brasil) informó que
delles decenes d’españoles morrieren nel trayeutu y otros doscientos desembarcaren enfermos. Nesti buque
viaxaben 1.566 emigrantes españoles dende Xibraltar apetiguñaos dafechu y ensin condiciones sanitaries. Nun
se trató d’un casu aislláu porque estos fechos volvieron repetise al añu siguiente n’espediciones ‘gratuites’ a
Río de Janeiro y Santos7.
La hestoria de los barcos d’emigrantes llega inclusive a finales de los años trenta del sieglu pasáu,
acabada la Guerra Civil, yá que dende distintos puertos franceses zarparon barcos atarraquitaos d’españoles,
obligaos a empecipiar una vida nueva como esterraos al otru llau del Atlánticu. A México dirixéronse más de
venti mil exiliaos, munchos d’ellos xente bien preparao del mundiu de la educación, la ciencia y les artes
españoles.
Fixéronse tristemente famosos centenares de pequeños y esmanganiaos motoveleros que salíen de les
islles Canaries ente finales de los cuarenta y principios de los cincuenta:
“En noviembre del 1948, nos puertos venezolanos atopábense venti barcos,
atestaos d’emigrantes canarios a la espera d’una decisión favoratible por parte de
les autoridaes d’aquel país. Nos mesmos díes d’avientu del 1949 contabilizáronse
ventitrés. Calcúlase que d’esta manera clandestina emigraron nesta década alredor
de 4.000 canarios. Pue dicise que la emigración canaria, sumando la de los años 40
y 50 (la oficial y la illegal), foi como un ríu pero nun hai un ríu en toles Islles, el ríu
fixímoslu los canarios, con calce hasta Venezuela.”
Carlos Llorca Baus, Los barcos de la emigración 1880-1950
Los viaxes siguieron hasta principios de los años sesenta del sieglu XX, pero en muncha menor midida.
Les tresformaciones económiques, los aumentos del preciu del pasaxe, los requisitos de los países receptores y
el surdimientu de l’aviación comercial, ente otros factores, contribuyeron a modificar pasu ente pasu la imaxe
tradicional de los nuesos puertos y mares y la forma de salida de los nuesos emigrantes.
El recibimientu En términos xenerales les descripciones que se fixeron de la llegada y el recibimientu de los emigrantes
resulten abondo positives dexando a un llau los sentimientos individuales de murnia y mieu a un mundiu y una
vida nuevos. Perllama l’atención el fechu de que dellos países americanos como Arxentina hasta daben agospiu
gratuitu a los acabante llegar nos llamaos hoteles d’inmigrantes. Con too y con ello, n’otros países el tratu a los
nuesos emigraos foi tarrecible. Brasil y Chile faen por distribuyilos pel país cuantes primero y trátenlos d’una
manera penosa daveres:
“Al llegar a Talcahuano, apúrrese-yos nel actu o lo más aína posible’l pasaxe pal
ferrocarril y que cada cual ‘busque la so madre gallega’... En Valparaíso nun hai albergue nin
7 Carlos Llorca Baus, Los barcos de la emigración, 1880-1950.
18
hospedería pa inmigrantes, faise por establecer ún na población de Vergara, que ta a dolce
kilómetros de Valparaíso, mentanto l’inmigrante atópase tiráu peles cais ensin tener qué
comer pola falta absoluta de recursos, les autoridaes nun s’esmolecen nin un rispiu d’esti
asuntu.”
Carta del cónsul d’España en Valparaíso al ministru plenipotenciariu d’España en Santiago,
26-5-1907
Dacuando la situación y el mal tratu a los emigrantes llama inclusive l’atención de la prensa local:
“A los españoles trátaselos nes obres con menos consideranza qu’a los negros; castígaselos
ensin piedá y, siendo de por sigo los trabayos penosísimos, oblígaselos a faer más de lo que
razonablemente puen. Aliméntaselos con productos estropiaos de calidá ínfima”.
Periódicu El Liberal, 17 de mayu del 1907
El trabayu En términos xenerales, n’América los asturianos nun trabayen nel campu, una y bones la mayoría
dedícase al comerciu. Los empiezos nel negociu son un periodu de formación; viven y trabayen en condiciones
difíciles. Pero tamién hai emigrantes ocupaos en sectores industriales como’l testil, el siderúrxicu, nos negocios
cubanos del tabacu o l’azucre o n’esplotaciones mineres d’Uruguai y Perú.
D’esta miente, l’antiguu llabrador conviértese en trabayador por cuenta ayena, empezando a trabayar
dende lo más baxo. Por eso’l fechu d’emigrar mozu yera una característica fundamental, los rapazos cuantes
primero empecipiaren diben tener más posibilidaes d’ésitu y los dueños preferíen trabayadores nuevos a los
qu’adomar más fácilmente.
El deprendizaxe de los emigraos completábase dacuando cola ayuda y la formación ufiertada pelos
Centros Asturianos, anque yá nos empiezos del sieglu XX esti sistema foi desapaeciendo una y bones los países
d’acoyida esixíen emigrantes con una instrucción profesional.
Con too y con ello, ye bien importante señalar qu’en realidá los trunfadores fueron bien pocos, que la
gran mayoría trabayó enforma pa poder aforrar daqué y volver a Asturies. Y un porcentaxe importante fracasó
na so aventura de la emigración, Son los “americanos del pote”. La situación d’estos fixo apaecer les sociedaes
de beneficencia, ya inclusive, n’ocasiones, el gobiernu español viose obligáu a repartir los llamaos medios
pasaxes pa que dellos emigrantes tornaren.
Nel casu de la gran emigración a Europa, los trabayos desenvueltos polos nuesos emigrantes tán cuasi
siempre rellacionaos cola industria y l’agricultura, anque nesti segundu casu trátase d’una forma peculiar
d’emigración llamada ‘emigración andarina’ (una emigración añal de dir y volver) con destín a les esplotaciones
agrícoles de Francia (habitual ente 1830 y la Primer Guerra Mundial de 1914), y que vuelve producise a finales
del sieglu XX, sobre manera pa la vendimia.
Les remeses Ún de los rasgos característicos de los procesos migratorios, sobre too los que tienen motivos
económicos, ye’l mandar los emigrantes remeses de dineru a los países d’orixe. La emigración asturiana nun foi
una esceición. Les remeses constituyeron una fonte de riqueza qu’ameyoró les condiciones de vida de los
familiares y contribuyó al procesu d’industrialización y modernización del país, especialmente a partir del sieglu
XIX.
Na denominación de “remeses” inclúyense tou tipu d’operaciones económiques non comerciales,
realizaes polos emigrantes dende’l país d’acoyida. Hebo munchos tipos de remeses, ente ellos los aforros, les
donaciones o les entregues pa fines o fundaciones d’utilidá pública y los unvíos de cuantía pequena, los más
habituales.
19
El treslláu de dineru siempre tevo rellacionáu cola idea del regresu, sobre too cuando ésti venía
precedíu del ésitu económicu y social. Ye’l casu de figures como l’indianu; esto ye, l’individuu que, en pasando
una gran parte de la so vida emigráu, volvía arriquecíu al so llugar d’orixe.
Cuando la cantidá de dineru yera importante lo que se mandaba diversificábase en banques europees
como Londres y París, o americanes, principalmente Nueva York, o en cases de comerciu de Madrid y
Barcelona. En tando treslladáu, el dineru invertíase na compra de finques rústiques o urbanes, empréstamos
hipotecarios y actividaes comerciales. Estes tresferencies podíen realizase de forma periódica per mediación de
xiros y lletres de cambéu o per aciu de tresllaos n’especie d’artículos comercializables.
Dende’l puntu vista industrial tendríamos de destacar el papel de los indianos n’empreses de vidru y
minería del carbón n’Asturies y tamién les inversiones nel comerciu marítimu, la construcción y la compra de
barcos, en medianes y pequenes industries y bancos.
Ente los años 1880 y 1910 los bancos y les cases de banca esperimentaron un espoxigue espectacular.
Nesti periodu los xiros procedentes d’América vivieron un crecimientu importante, al poder realizase y pagase
per mediación de cualquier establecimientu comercial. Dalgunes de les primeres cases de banca tresformáronse
en bancos. Este foi’l casu de Pedro Masaveu y Cía, Herrero y Cía. (Bancu Herrero), Francisco Zaldivar,
Gregorio Vigil Escalera, (Bancu de Siero), Florencio Rodríguez, (Bancu de Xixón y promotor y primer conseyeru
del Bancu Hispanoamericanu). A partir de 1910 la presencia de los bancos aumentó enforma. Los xiros
empezaron a estendese usando principalmente les llibres esterlines y los dólares. Los países que más
contribuyeron a mandar remeses fueron Cuba, EE. XX. y México. Los beneficiarios yeren los familiares nel casu
de los pequeños importes y los mesmos emigrantes retornaos nos más sustanciosos.
Ente’l fin del sieglu XIX y l’entamu del XX n’Asturies destacaron delles iniciatives importantes. Quiciabes
por ser vecín de Siero prestaríamos destacar la d’un conocíu indianu, Florencio Rodríguez, que retornó nel 1885
y participó en numberosos proyectos empresariales, como ferrocarriles, construcción ya igua de buques,
refineríes de petroleu, compañíes metalúrxiques y cerveceres. La so trayeutoria remató nel 1894 cola apertura
d’una casa de banca, el Bancu de Xixón y la so participación na creación del Bancu Hispanoamericanu.
Ente los años 1931 y 1960 los negocios pasen per una de les etapes más complicaes, lo mesmo pa los
países americanos que pa España. Esta travesó una importante crisis económica y social nos años trenta, asistió
a la proclamación de la IIª República, sufrió la Guerra Civil y la implantación del réxime franquista. Too ello
influyó nel fluxu migratorio. Como yá tenemos dicho, a partir de la segunda metá de la década de los trenta
prodúxose una cayida importante de la emigración española. Un menor númberu d’emigraos xeneró menores
remeses, situación agravada poles condiciones económiques de los países de destín lo qu’enzancó
escomanadamente’l regresu de los españoles ellí instalaos. El mayor volume económicu encabezáronlu
Arxentina, Cuba, EE. XX. y México.
Les autoridaes franquistes crearon instituciones, como l’Institutu Español de Moneda Estranxero, que
desglosaron les remeses según distintos conceptos: auxilios familiares, rentes de trabayu, donativos
particulares, rentes y ventes de finques nel estranxeru y turismu, anque dacuando resultó difícil estremar unes
d’otres, sobre manera nel casu de los primeros conceptos.
La media de les remeses que llegaben na década de los cuarenta yera de 69 dólares per mandáu. Estes
cantidaes modestes nun sacaríen a les families españoles de la probitú, pero sí ameyoraron sensiblemente les
sos condiciones de vida, yá qu’en munchos casos equivalíen al salariu de dellos meses. Les remeses sirvieron
tamién pa financiar proyectos, como la modernización de l’agricultura nes zones más probes d’Asturies. Un
simple exemplu d’esto ye que les remeses mandaes polos emigrantes gallegos y asturianos sirvieron pa
financiar y fundar más de 400 escueles.
En 1959 produxéronse na economía española midíes lliberalizadoras importantes. El númberu de
remeses baxó, y namás a partir de los años sesenta cola llegada de los trabayadores emigraos a Alemaña
20
empezó a recuperase esta fonte importante d’ingresos. La entrada d’esti tipu de divises constituyó un elementu
nivelador de la balanza de pagos8, en mayor midida inclusive que les xeneraes pol turismu.
A última hora, les remeses de los emigrantes, en cualesquier de les sos modalidaes, contribuyeron a la
meyora de la economía de les sos families n’Asturies y a la creación de riqueza, influyendo positivamente nel
procesu d’industrialización y modernización que podríamos esquematizar de la siguiente manera:
• Fines sociales: Fundaron asilos, hospitales y escueles de primera enseñanza en llugares
pequenos. En 1922 Asturies cuntaba con 350 escueles construyíes polos emigrantes y calteníes coles
sos remeses. Nes mesmes había llavaos y baños (inesistentes nes cases particulares) y amás apurríen-
yos de baldre el material escolar, bocaos y lleche.
• Meyores urbanes: Creáronse infraestructures urbanes como llavaderos, mercaos cubiertos,
camposantos, parques con quioscos de música, etc.
• Desarrollu industrial: N’Asturies una mesma familia de La Pola Siero emplegó la fortuna llograda
en Cuba pa fundar empreses como la refinería de petroleu de Santa Bárbara, la Compañía popular de Gas
y Lletricidá, y Cerveces La Estrella.
• Desenvolvimientu financieru: fundáronse bancos como l’Hispanoamericanu y el de Xixón, etc.
El viaxe de vuelta Tres una estancia más o menos esitosa nos países de destín, munchos asturianos plantéguense la vuelta
a casa. Llega un momentu en qu’América o Centroeuropa dexaron de ser tierra d’oportunidaes y volvíen a una
casa presente n’alcordanza per llargu tiempu.
Al analizar les estadístiques de retornos9 vese que’l fluxu d’entrada n’España ye altu especialmente, en
proporción a les salíes, en cuatro periodos bien claros de la hestoria: antes de 1880, cuando Cuba yera’l
principal destín de los emigrantes; na Primer Guerra Mundial; nos años 30 del sieglu XX, cuando la depresión
económica internacional afectó a los países americanos receptores d’emigración; d’últimes a partir de los años
60, fecha en qu’empecipia’l definitivu fluxu de torna.
El regresu siempre ta presente na mente de los qu’emigren. Les ganes de volver al país d’orixe son una
característica básica de la emigración, especialmente nos sos entamos. Trátase del “mitu del regresu”. Sicasí, a
midida que l’emigrante va integrándose na sociedá d’acoyida, el deséu de volver amengua y, en dellos casos,
acaba refugándose de forma definitiva.
La decisión de tornar nun ye fácil, cuanto si más dempués de bien de tiempu y en tando establecida ellí
una familia y asumíos vezos nuevos. Los motivos qu’impulsen a los emigrantes a tornar son bien variaos, magar
polo xeneral puen establecese tres grupos de factores:
1. Los factores rellacionaos col refugu nel llugar de destín, con problemes nel país d’acoyida. En
munchos casos la decisión de tornar tómase al averase la edá de xubilación o cuando hai problemes de
salú, que puen tar influyíos pol clima, dificultaes d’adaptación, distintes costumes, dificultaes
económiques, etc.
2. Los factores de tipu personal, rellacionaos cola familia nel llugar d’orixe.
8 Trátase de la rellación que s’establez ente’l dineru qu’un país en concreto gasta n’otros países y la cantidá qu’otros países gasten nesi
país.
9 Sallé Alonso, Mª Ángeles y otros, La emigración española en América: historias y lecciones para el futuro, Fundación Directa, Ministeriu
de Trabayu ya Inmigración, 2009.
21
3. El tercer grupu de factores fai referencia a la falta de venceyos col llugar de destín y les
alcordances positives de les esperiencies vivíes en pasáu nel llugar de procedencia.
Los indianos Los emigrantes que llograron ciertu ésitu económicu son conocíos popularmente col nome d’ndianos.
Yera habitual que, tres una estancia más o menos llarga n’América y en trunfando nel comerciu, la industria o
l’agricultura volvieren a la ciudá o’l pueblu del qu’un día salieron en busca de la fortuna. Por eso, una vegada
algamáu l’ésitu, trataben de compartir los sos bienes colos habitantes del so llugar d’orixe. Nestes aiciones
combinaben les ganes de contribuyir al desenvolvimientu de la tierra que los vio ñacer, col deséu de demostrar
a los paisanos sos lo qu’algamaron col so esfuerciu.
La so buelga ta bien presente en Cantabria, Galicia y Asturies, onde construyeron casones, crearon
escueles, hospitales o patronatos benéficos, y onde acometieron o sufragaron importantes obres civiles yá
mentaes enantes.
Hasta finales del sieglu XIX, l’emigrante que volvía con dineru invertía en terrenos, construyía la so
casona nel pueblu y vivía tranquilamente de les sos rentes, pero a finales del sieglu XIX y principios del XX la
situación camudó dafechu. L’indianu ricu pasó a formar parte de les clases actives del país y usar na creación
d’empreses y proyectos nuevos, de tala miente qu’esi capital aumentaba y contribuyía al bienestar xeneral.
Fixéronse donaciones pa la creación de premios escolares, la igua o ampliación de centros, l’adquisición de
material y moblame escolar o’l financiamientu d’actividaes y viaxes estraescolares. D’América llegaron llibros,
máquines de coser, d’escribir, museos escolares, llaboratorios de física y química, colecciones de minerales,
etc.
Nel otru llau del regresu tán los emigraos que nun llograron faer una gran fortuna. En fracasando nel
país de destín, l’emigrante plantégase dos alternatives: probar fortuna n’otru país, o tornar a España. En
munchos casos la primera foi la opción escoyida. Güei día munchos volvieron y reciben la pensión asistencial
d’emigración. Otros reciben el subsidiu d’emigrante retornáu o pensiones de los sos países d’acoyida.
Desgraciadamente hai otros que nun tienen drechu a nengún tipu de pensión nin subsidiu.
Consecuencies de la emigración: • Consecuencies sociales:
Los emigrantes yeren oxetu d’almiración por tener valor abondo pa colar y consiguir la fortuna
necesaria pa volver a casa fechos unos trunfadores. Amás, como bien recueye Alfonso Camín nel so llibru
Entre palmeras, n’Asturies nunca se debíen cuntar les penuries, sinón tolo bono:
‹‹Les penes de los qu’emigremos han quedar ente nós (...). Equí trunfemos toos. ¿Entiendes?››
Los indianos favorecen tamién la culturización de los parientes yá que podíen ser de gran utilidá pa los
sos negocios nel estranxeru. Precisen persones con preparación que puedan dirixir. Acuden asina a los
sos familiares o conocíos de los pueblos d’orixe, a los que paguen los estudios n’escueles y universidaes
privaes d’España pa dempués llevalos a América.
• Consecuencies polítiques:
Paralelamente a los sos llabores sociales, los emigraos empezaron a participar na política.
Considerábase que, por cuenta de la so esperiencia, yeren los más aptos pa ocupar puestos importantes
dientro del pueblu. A manera d’exemplu llistamos una serie d’alcaldes de Ribesella que vivieren n’América
primero d’ocupar esti puestu y el so periodu de mandatu:
Hermenegildo Blanco (1854 y 1869-71), Narciso Suárez (1857-58), Francisco de Fuentes Río
(1859-60), Juan Suárez González (1867-68), Salvador Blanco Junco (1894-99), Darío María de
Labra y Valle (1904-09 y 1910-14), José Blanco Junco (1909-10), Ramón Cifuentes Llano
(1914-18), Manuel Quesada Soto (1919-20), José Suardíaz Pérez (1920-23 y 1924-25), Luis
22
Piñán Malvar (1928-29) y Ramón Fernández Ruisánchez (1931-36). Manuel Martínez Pérez,
Manuel Suárez Valle o Pedro Piñán Malvar (conceyales).
• Consecuencies na arquitectura:
L’arquitectura indiana ye la traza más notable y visible que la emigración dexó n’Asturies. Supón una
revolución estética. Namás en Llanes, construyéronse 189 viviendes con característiques indianes. En toa
Asturies calcúlase que’l númberu de cases con sellu indianu supera les 2.000 y pueblos enteros como
Somao en Pravia son verdaderes xoyes arquitectóniques que merecen una visita.
Tamién merecen una mención especial les casones asitiaes a lo llargo de les mariñes del occidente
d’Asturies, que pretendíen ser una amuesa del ésitu collecháu n’América por parte de los indianos. Nada
teníen que ver coles típiques y humildes cases asturianes qu’había primero, lo que provoca un cambéu
fuerte nel paisaxe de la zona.
Ente los rasgos distintivos más frecuentes que s’atopen na mayoría d’esti tipu de cases destacaríemos
los techos y parés recubiertos con pintures al frescu, grandes y lluxosos cuartos de bañu, estensos
xardinos qu’arrodiaben les viviendes con palmeres y especies vexetales exótiques, les corralaes con
rexes de forxa y piedra. Pa mayor gloria del propietariu importábase d’América la madera usao pa
construyir la casa, y pa construyir ventanalones en toles plantes.
Inclusive aquellos indianos que nun llograron faese ricos introducíen rasgos americanos nes meyores
que pudieren llevar a cabu nes sos cases. Amás de les característiques estétiques d’estes cases, cuntaben
con novedaes que’l restu del pueblu nun tenía: calefacción, bañu, agua corriente...
Un casu que merez una atención especial ye la casona indiana bautizada como Quinta Guadalupe, que
se construyó nel 1906 por orde del poderosu Íñigo Noriega Laso, lo que provocó una auténtica conmoción
nel pueblu de Colombres con baños turcos o piscina por solo mentar dalgunos.
• La filantropía:
El llabor de los emigraos foi de gran ayuda p’ameyorar les condiciones de munches zones. Los
emigrantes más ricos realizaben actos caritativos o grandes obres nos pueblos col oxetivu de demostrar
públicamente’l so poder, pero estos actos fueron bien positivos pa llugares nos que, de nun ser pol puxu
d’esos homes poderosos, diba perpetuase per más tiempu la precariedá cola que se vivía.
• Consecuencies económiques:
La economía asturiana, centrada sobre manera nel sector primariu, diversifícase notablemente:
ábrense chigres, comercios, empieza l’interés inmobiliariu y aumenta l’actividá industrial. El dineru de les
remeses contribúi a una meyora de la economía. D’otres partes del mundiu impórtense técniques nueves
emplegaes nes actividaes agraries, como los abonos, granes o preseos nuevos de llabranza.
• Consecuencies demográfiques:
Los indianos que viaxen a América son mocedá n’edá fértil, polo que, al quedase Asturies con menos
proporción d’adultos n’edá de tener descendencia, pue apreciase nel periodu de mayor emigración un
descensu nel crecimientu de población asturiano: ente’l 1857 y el 1860 el crecimientu añal ye del 1 %,
ente’l 1860 y el 1877 del 0,4 %. Baxa entá más hasta finales de sieglu, dende’l 1877 hasta’l 1897, el
crecimientu añal mediu de población ye del 0,3 %.
23
CAPÍTULU 4: LOS DESTINOS
Arxentina Na última década del sieglu XIX prodúxose n’Arxentina un desembarcu masivu d’emigrantes que se
distribuyeron per tolos requexos del país. Ye destacable’l gran númberu d’asturianos que s’instalaron nes
provincies andines, nel noroeste.
Arxentina yera un país n’espansión con muncha demanda de mano d’obra del sector primariu dende los
años 80 del sieglu XIX hasta les primeres décades del sieglu XX. Desarrollaron una política poblacionista bien
intensa, polo qu’abrieron n’España oficines d’información pa captar emigrantes. Les primeres en Madrid y
Barcelona, y más tarde una en Pontevedra, pola xigantesca folada migratoria gallega.
Les condiciones salariales de los trabayadores fueron bien favoratibles nesi periodu, lo mesmo nel
ámbitu urbanu que nel rural, lo que-yos permitió espolletar en bien pocos años. Ente 1880 y 1914 daqué más de
4.200.000 persones llegaron a Arxentina10
, 1.400.000 d’ellos españoles, pa la construcción d’infraestructures,
dende puertos hasta ferrocarriles, y na edificación urbana. Tamién el comerciu, l’artesanáu y les industries
brindaron oportunidaes de tou tipu a inmigrantes europeos.
Pero la Primer Guerra Mundial interrumpió esti movimientu migratoriu y la posterior crisis económica
del 30 y los conflictos bélicos español y mundial rompió esti enclín d’una manera cuasi definitiva; produzse
puntualmente una nueva fola d’emigración por cuenta de la Guerra Civil y posterior dictadura franquista, que
faen que la migración española pase de 7.000 a 60.000 emigrantes añales ente 1946 y 1950, pa dir menguando
dende entós pasu ente pasu.
Brasil La emigración española a Brasil nun ye mui conocida porque prodúxose nun periodu de tiempu curtiu, na
segunda metá del sieglu XIX. Los españoles viaxaron atrayíos por promeses de tierres y grandes fortunes y
atoparon una situación desaxeradamente dura.
Brasil presentóse como una gran oportunidá, por cuenta de les grandes estensiones de tierra fértil pal
cultivu, la escasa población del país y les enormes posibilidaes qu’ufiertaba pa l’agricultura, la minería y les
industries. Foi una emigración subvencionada pol gobiernu brasileñu pa compensar la perda de mano d’obra que
supunxo l’abolición de la esclavitú. Amás xusto nesi momentu les bones comunicaciones favorecieren el
comerciu del café colos países europeos. La Sociedade Promotora de Inmigraçāo, financiada pol Estáu de Sāo
Paulo, encargóse de promocionar esti tipu d’inmigración per mediación de les axendes de propaganda,
qu’ufiertaben de baldre’l pasaxe, un contratu per un añu nun plantíu de café y agospiu gratuitu.
Los españoles que viaxaben al Brasil yeren davezu families enteres, al ser ésta una de les condiciones
esixíes pa la subvención de la travesía. Esa subvención consistía na gratuidá del viaxe pa dir, l’agospiu na ciudá
brasileña a la que llegaren hasta atopar trabayu y un seguru de repatriación en casu de fallecimientu. Con esta
midida’l gobiernu brasileñu garantizó la continuidá de la mano d’obra agrícola, nel momentu en que la corona
portuguesa abolió la esclavitú (1888).
Nos cafetales de São Paulo asitiáronse una gran mayoría d’inmigrantes. Calcúlase qu’hasta los años venti
del sieglu pasáu, trés cuartos de millón d’españoles llegaron a esa rexón. Cuando la enorme espansión de la
industria cafetalera, a principios de la década del 1920, los inmigrantes estranxeros llograron adquirir tierres y
convertise en productores de café importantes.
10 VV. AA., Argentina, Un país de inmigrantes, Buenos Aires (Arxentina), 1998.
24
El treslláu a Brasil realizábase xeneralmente dende’l puertu de Xibraltar, onde s’atopaben tou tipu de
sorpreses. Vicente Borrejón Rives, nel so llibru La emigración española a América, del 1952, describiólo de
manera bien gráfica:
“A pesar de los bonos deseos y calter tutelar de la llexislación, pocos emigrantes
llibraben de toles trampes tendíes polos indeseables parásitos portuarios. Nel meyor de
los casos, en tolos puertos d’embarque cobren pensión de cuantía peralta si se compara
coles condiciones de la comida sirvío y del agospiu, que se facilita davezu en cuartos de
delles cames ensin condiciones morales nin, dacuando, hixéniques.”
Yá en tierres brasileñes podíen agospiase na ‘Hospedería dos Inmigrantes’ de la principal ciudá
d’acoyida, São Paulo. Ellí, los ciudadanos europeos podíen tar unos díesde baldre hasta atopar trabayu y los
alministradores de les finques brasileñes intentaben buscar un puntu d’alcuentru cola futura mano d’obra.
En tando nos cafetales los inmigrantes alcontraben una situación precaria y bien esixente. Les
condiciones nes faciendes yeren perdures, con xornaes de dolce hores y un salariu que malapenes cubría los
gastos d’alimentación. La práctica habitual yera dixebrar a esclavos de trabayadores llibres dientro de los
plantíos, anque esta diferencia nun se vía reflexada nel tratu qu’unos y otros recibíen de los fazendeiros. Les
males condiciones reflexábense nel númberu d’españoles obligaos a fuxir de les faciendes, nun movimientu de
fuga que dio orixe a la proliferación de los conocíos ‘capangas’, “especie de matones que los alministradores
dediquen a esti serviciu de vixilancia. Cuando teníen noticia de que dalgún proyecta marchar tórguen-ylo pola
fuercia”.
De los españoles que viaxaron hasta Brasil munchos morrieron ellí poles graves condiciones de vida y
trabayu. Nun principiu sustituyeron a los africanos usaos como esclavos hasta entós y como ellos, sufrieron pa
salir alantre o inclusive pa sobrevivir. El trabayu nel campu tevo mal pagu y deshumanizáu.
El consuláu en Brasil, encargáu d’asegurar el cumplimientu de los drechos de los ciudadanos españoles,
nun daba solución dala. Nes rexones selvátiques munchos perdieron la vida, otros na construcción del
ferrocarril Madeira - Mamoré (1878-1912), nel corazón del Matto Grosso, o nes construcciones de les canales
nos llagos y ensenaes de Pará.
Yá nos años cincuenta del sieglu XX prodúxose otra gran espansión de la industria brasileña, camudó la
demanda de trabayadores y los emigrantes tresformáronse en mano d’obra cualificao a lo que se sumó la yá
mentada emigración política y económica derivada de la dictadura de Franco n’España. Exiliaos y obreros más
especializaos y con mayor esperiencia constituyeron una nueva folada. Dende entós hasta l’actualidá, el
movimientu d’españoles pa esi país foi menguando pasu ente pasu, hasta cuasi desapaecer.
Cuba Los asturianos escoyeron preferentemente Cuba como sitiu de destín y ellí conformaron ún de los
grupos más numberosos ya influyentes de la economía de la islla; llegaron al 23,7 % de los españoles emigraos.
La escoyeta de Cuba obedez a la so independencia tardía y a les sos abondoses fontes de riqueza.
Dempués del 1989 la llegada d’emigrantes sigue creciendo por cuenta de la estabilidá política y de la
prosperidá económica, anque va producise una frenada nos años 20.
Los asturianos asiéntense mayoritariamente nes ciudaes y dedíquense al pequeñu y medianu comerciu.
Son una comunidá mui variopinta na que podemos atopar dende persones bien acomodaes y adineraes hasta
trabayadores modestos, como los dependientes y obreros de la industria tabaquera. Los llazos ente asturianos
calteníense gracies a les asociaciones asturianes; les primeres d’elles fueron les dedicaes a la beneficencia. A
iniciativa de los obreros y los dependientes surdió la idea de crear otru tipu d’asociación y asina ñació’l Centru
Asturianu.
Cuba convirtióse nun destín preferente pal emigrante español del sieglu XIX, cuanto si más a partir de
que se suprimieron n’España les lleis qu’emparamentaben la emigración llibre. Según estadístiques apurríes por
25
Gutiérrez Roldán, ente’l 1882 y el 1908 llegó a Cuba’l 48,19 % de los emigrantes hispanos. Namás ente 1895 y
1896 Cuba recibió’l 76 % del total d’emigrantes hispanos a América y esta tendencia siguió n’acabando la
dominación colonial nel 1898 y la intervención militar norteamericana. Ello ye que la islla caribeña foi la más
importante receptora d’inmigración hispana hasta la primer metá del sieglu XX.
A fines de los años cincuenta del sieglu XIX, los emigrantes en Cuba apoderaben el comerciu en toles
rexones, controlaben el creitu y constituyíen la mayoría del funcionariáu y oficiales del exércitu regular. A
partir d’esta década, y como resultáu del aumentu demográficu n’España y la incapacidá del Estáu p’absorbelo,
la inmigración a Cuba esperimentó un aumentu significativu, que se caltuvo con altibaxos hasta 1930.
Cuasi tolos estudios establecen trés etapes migratories cubanes bien estremaes:
• La primera, ente 1789 y 1837, provocada pola economía esportadora d’azucre que precisaba
inmigrantes pa suplir la producción de los esclavos. La corriente d’españoles nesta etapa pue estremase
pela so parte en dos fluxos migratorios formaos por llabradores canarios y comerciantes de les mariñes
cantábrica y catalana.
• La segunda, trescurrida ente’l 1837 y el 1868, prodúxose cuando Cuba rexistró una gran
espansión de la economía de plantíu, apoyada nes innovaciones tecnolóxiques de la revolución industrial
y el desarrollu del tresporte terrestre y marítimu. Nella alvirtióse un descensu de la trata de negros y la
so sustitución por inmigrantes chinos, que nun afectó al crecimientu de la española.
• La tercera, ente’l 1868 y el 1899, marcada pola llegada d’un númberu pequenu d’obreros
industriales españoles, colos que se pretendió acabar colos problemes del ruin desarrollu industrial nun
país predominantemente importador de manufactures. Munchos d’ellos lleguen a la islla atrayíos pola
demanda d’artesanos y personal necesario p’atender los inxenios azucreros o les esplotaciones mineres.
Tres la perda de Cuba como colonia, la inmigración hispana nun aparó, yá que nesti periodu la llegada de
trabayadores compensó’l númberu de funcionarios y soldaos repatriaos. La presencia española nel país siguió
siendo bultable pero, como afirma Sánchez Albornoz, en condiciones distintes, esto ye, menos venceyada al
aparatu alministrativu y más al productivu.
La llexislación cubana sobre inmigración xugó tamién un papel importante, que favorecía a los nuesos
emigrantes yá que prohibía la entrada al país de persones d’orixe afroantillanu o oriental. Los españoles, al
contrario, podíen entrar llibremente, siempre y cuando tuvieren nel so poder una cantidá mínima de dineru o si
una persona yá instalada na islla respondía por ellos.
Chile Lo mesmo qu’en tolos países americanos la emigración española remonta al periodu de conquista y
colonización que garró munchu puxu a lo llargo’l sieglu XVII y en tol XVIII y el XIX.
Nel casu de Chile ye destacable la llegada d’emigrantes procedente del País Vascu, qu’ocuparon
munchos puestos alministrativos, fundamentalmente funcionarios y comerciantes, y constituyeron la que se
llamó ‘aristocracia castellano-vasca’, qu’asoció tamién los sos apellíos a les etiquetes de los meyores vinos
chilenos.
Pasáu’l periodu de la independencia de Chile y tres dictase la Llei de Colonización de 1845, Chile
abrióse a la inmigración europea. Alemanes, ingleses y, a partir del 1895, munchos asturianos llegaron a esti
país.
Nos años trescurríos ente’l 1883 y el 1910 que marquen el cambéu de sieglu, lleguen 50.000 españoles,
un terciu de la inmigración total nesi periodu, una cifra que nun paez mui alta pero sí ye bien importante
considerando que falamos d’un país con una población nel entamu del sieglu XX que nun superaba los cuatro
millones d’habitantes y con unes tierres de calidá ruina.
26
Nos primeros años del sieglu nuevu la xestión de la inmigración dependió directamente de
l’alministración, qu’incentivó la llegada d’inmigrantes con ayudes como anticipos del 75 % del preciu del pasaxe,
empréstamos pa faer frente a los gastos de la llegada, agospiu gratuitu nos puertos de desembarque y cesiones
de 560 díes de gües (70 hectárees) de tierra per familia, amás de 240 díes de gües (30 hectárees) más por cada
fíu varón, mayor d’edá. Esto último demuestra que’l gobiernu chilenu pretendía faer producibles les enormes
estensiones de tierra ermo.
Pero les tierres, les condiciones y les promeses de les alministraciones locales non siempre yeren mui
d’enfotase y munchos emigrantes decidieron poner camín d’otres tierres o de vuelta a España. La única
inmigración con traza d’ésitu siguió siendo la tradicional “emigración de llamada”, ye dicir la yá preparada por
familiares o amigos que primeramente yá s’asitiaren con ésitu nuna folada anterior.
México A México lleguen pocos asturianos en comparanza con Arxentina y Cuba pero tienen gran relevancia
económica. Ye equí onde se cumple l’esquema de la emigración en cadena, que dende la segunda metá del
sieglu XVIII xune, per aciu de rellaciones familiares y vecinales a pequenos grupos con actividaes económiques.
Los sectores predominantes son el testil y el financieru. Ún de los casos más representativos ye’l
d’Íñigo Noriega Laso, que ñaciera en Colombres nel 1853. Partió pa México a los 14 años cola protección d’un
tíu. Convirtióse nun gran terrateniente col so propiu exércitu y entabló amistá con Porfirio Díaz, pero los
revolucionarios mexicanos convirtiéronlu n’enemigu a bater y acabaron col so imperiu económicu.
La emigración asturiana a México vien de toles zones d’Asturies, anque foi predominante na zona
oriental.
Dempués de la independencia de México, el procesu d’emigración d’Asturies a esi país tien el so primer
momentu importante hacia’l 1880. Más tarde, tres del conflictu bélicu en Cuba del 1898, preséntase una nueva
emigración intensiva nos primeros años del sieglu XX. La crisis económica de los años venti va marcar otru
momentu importante na emigración. El final de la Guerra Civil española va provocar tamién l’exiliu y con elli la
llegada de munchos españoles a México. L’últimu periodu d’emigración masiva va producise ente’l 1946 y el
1954.
Los asturianos salíen del puertu d’El Musel en Xixón o bien dende A Coruña y faíen escala en L’Habana
primero de llegar a México. Los barcos que tresportaron a los emigrantes a México fueron munchos, pero hai
dellos nomes qu’a lo llargo del sieglu son referencia obligada: Alfonso XII, María Cristina, Lafayette, Habana,
Magallanes, Marqués de Comillas, Guadalupe y Cuadonga.
En tando en México los emigrantes establecíense mayoritariamente en Veracruz, Tampico, Córdoba,
Puebla, la ciudá de México, San Luis y Torreón. Munchos casáronse y formaron una familia, dacuando llograben
tornar por temporaes, otros tardaben munchos años en volver y dalgunos nunca lo consiguíen. La única
protección real que tenía l’emigrante na nueva tierra yeren les asociaciones benéfiques o rexonales creaes por
ellos mesmos. Nestes asociaciones calteníase’l venceyu cola tierra natal y conservábense les tradiciones y
costumes.
Na hestoria d’esta emigración podemos atopar delles diferencies significatives, tanto nos sos
componentes como nos períodos en que se produxo. La emigración tradicional, la más común, foi de calter
voluntariu y xenerada por razones económiques. Empecipió yá poco dempués de la conquista d’América y
permaneció constante per años, nun siendo’l periodu posterior a la Guerra Civil, de 1939 a 1946, nel que
prevalecieron los exiliaos por motivos políticos. Calcúlase que más de 30.000 españoles llegaron a México
buscando asilu políticu. Ye, poro, una migración que se caracterizó por ser masiva y plural territorialmente, yá
que se recibieron españoles provenientes de toles provincies. Munchos d’ellos llograron llegar a México gracies
a l’ayuda d’organismos creaos pa tala fin, como foi la Xunta d’Auxiliu a Refuxaos Españoles, el Comité Técnicu
27
d’Ayuda a Refuxaos Españoles, el Serviciu d’Evacuación de Refuxaos Españoles y otros; pero sobre manera,
pola ayuda de munchos compatriotes establecíos primeramente en México.
Esta llegada tien una rellación directa cola política establecida pol presidente Lázaro Cárdenas, que
decidió abrir les puertes a los republicanos y, polo xeneral, a los españoles, obligaos a dexar España por
motivos políticos. Asina, académicos, filósofos, intelectuales, artistes y destacaos españoles llegaron a México
y ellí ayudaron notablemente al desarrollu del país.
A partir del 1946, anque en menor númberu que nel restu d’América Llatina, la emigración por motivos
económicos reactivó. España nesta dómina taba emprobecida, sufría les consecuencies de la so propia guerra y
de la Segunda Guerra Mundial, dambes devastadores, y México foi una vegada más un destín interesante pal
emigrante, apoyáu agora por más conocíos, más familiares meyor establecíos.
Panamá Esti país convirtióse, a partir del 1850, nun focu d’atracción d’inmigrantes bien importante pola
construcción del ferrocarril, pernecesariu pal tránsitu de mercancíes y persones metanes una zona de pasu
fundamental d’empresarios, aventureros y buscadores d’oru, que se dirixíen a California. Trabayadores de toles
partes del mundiu, más que nada chinos, llegaron a Panamá a construyir el ferrocarril, porque’l país cuntaba con
bien poca mano d’obra (138.108 habitantes nel 1851, esto ye 1,8 habitantes/km2). Panamá siguió siendo ún de
los países del mundiu más pequenos y con mayor proporción d’inmigrantes en rellación a la so población,
situación que nun camuda hasta la segunda metá del sieglu XX.
La llegada de trabayadores siguió más tarde al empecipiar les obres de construcción de la canal
interoceánica. A lo primero colos franceses de la Compagnie Nouvelle de Ferdinand de Lesseps y más p’alantre
col gobiernu norteamericanu, que peracabó la construcción.
La inmigración española hasta los primeros años del sieglu XX tevo motivaciones económiques na mayor
parte de los casos, pero foi tamién importante la inmigración por motivos sociopolíticos, quiciabes non
comparable al éxodu de 1939, pero significativa cualitativamente. Anarquistes, anarcosindicalistes, socialistes y
sindicalistes, mozos qu’escapaben de la llamada del exércitu, llegaron tamién a Panamá. Grupos d’obreros
anarquistes y socialistes organizáronse y espardieron les sos idees, espublizando cartafueyos y revistes, polo
que se los considera precursores del movimientu obreru panameñu.
Los españoles en Panamá non solo s’organizaron sindical y políticamente, sinón que tamién fundaron nel
1885 la Sociedad Española de Beneficencia de Panamá, primer organización creada por esti colectivu, col
mesmu espíritu que les que se crearon n’otros países d’América. Esi espíritu solidariu llevólos a ocupase de los
obreros españoles na Canal. Tamién crearon otres sociedaes, como’l Centro Español y l’Aplec Catalá.
Nes dos primeres décades del sieglu XX la educación nacional tevo en gran parte en manes de los
Hermanos de les Escueles Cristianes, Hermanos de La Salle, a los que’l gobiernu encargó la dirección y
organización de dellos centros educativos del país.
Los inmigrantes españoles nun tuvieron en nengún momentu restricciones na so entrada, nun formaben
parte de les llamaes “races d’inmigración restrinxida”. Nel 1904, la primer llei migratoria panameña prohibió “la
inmigración de chinos, turcos y sirios al territoriu de la República” y torgóse la inmigración de les races
mongóliques y semítiques, por considerase que yeren perxudiciales dende’l puntu vista económicu y de
salubridá pública, non convenientes pal bien del país, les sos costumes y condiciones etnolóxiques”.
El gran éxodu d’españoles, consecuencia de la Guerra Civil de 1936 a 1939, llegó tamién a Panamá.
Probablemente nun fueron munchos, pero la so influyencia foi importante, sobre manera nel mundiu de la
cultura y les ciencies, anque tamién nel aspeutu económicu. Dalgunos d’estos exiliaos convirtiéronse
n’empresarios, y fundaron empreses importantes.
El fluxu migratorio español volvió crecer ente los años 1946 y 1950, n’acabando la Segunda Guerra
Mundial. Sicasí, la mayor movilidá prodúxose a partir de 1958, por causa de la grave recesión española.
28
La emigración española qu’anguaño llega al país tien un carácter radicalmente distintu, yá que ta
compuesta por empresarios y profesionales que trabayen n’empreses españoles afincaes nel país.
Uruguai La inmigración que llega a esti país tien una peculiaridá bien llamativa: son principalmente persones na
so segunda emigración, nel so segundu intentu de trunfu, bien dende Arxentina, o dende Brasil.
L’Uruguai del 1830 tien un vacíu demográficu enorme, que foi rellenándose por socesives folaes
inmigratories. Trátase d’un país de curtia y precipitada hestoria que s’abrió a la llegada d’europeos
principalmente.
Nel 1830, Uruguai tenía namás que 74.000 habitantes, nun territoriu de 187.000 km2, esto ye 0,4
habitantes per km2; cuasi'l 20 % vivía en Montevideo y la población indíxena yera prácticamente inesistente.
Cien años dempués el númberu d’habitantes allega a 1.900.000. Suelen identificase cinco grandes folaes
migratories11
a esti país:
1. Ente 1866 y 1868: 43.600 inmigrantes, de los que’l 18,1 % yeren españoles.
2. Ente 1883 y 1892: 57.312 inmigrantes, el 35,8 % yeren españoles.
3. Ente 1907 y 1912: 75.851 inmigrantes, el porcentaxe d’españoles ye del 25,8 %.
4. Ente 1919 y 1931:155.951 inmigrantes, el 21,2 % yeren españoles.
5. Ente 1948 y 1956: 55.144 inmigrantes, y más de la metá (el 53,2 %) yeren españoles.
Nun primer momentu, la inmigración taba concentrada, en términos xeográficos, fundamentalmente en
Montevideo, dada la so situación de puertu. Sicasí, nel Uruguai de los años 80 y 90 nun hebo a cencielles
inmigración, sinón una simple importación de trabayadores pal capital naciente. Nesti periodu la llamada del
familiar o amigu residente foi una de les causes mayoritaries que motivaron el treslláu. L’Uruguai de principios
del sieglu XX yera yá un país en plenu desenvolvimientu. Consolidara les sos fronteres, sentara les bases de la
so organización alministrativa, ameyorara les sos comunicaciones y modernizara la so producción agropecuaria.
Cuntaba con más de 2.000 establecimientos industriales que daben sustentu a una puxante clase empresarial. La
población total del país superaba yá’l millón d’habitantes y la de la capital los 300.000, de los que cuasi la metá
yeren estranxeros de ñacencia.
Desgraciadamente, la hestoria del Uruguai de la segunda metá del sieglu XX supón el pasu del dinamismu
al estancamientu económicu, y de la instalación d’una dictadura militar que fai que dexe de ser un país receptor
pa convertise nún espulsor.
Venezuela Esti país foi ún de los principales destinos de los nuesos emigrantes yá dende l’añu 1499 nel que’l
navegante español Alonso de Ojeda y l’italianu Américo Vespuccio-y dieron el nome de Pequena Venecia o
Venezuela. Tres la conquista, la colonización y la so independencia nel 1823 les rellaciones ente los naturales
d’España y Venezuela nun cesaron nunca, una y bones el gobiernu venezolanu daba permisos y facilidaes pa
trayer al país inmigrantes españoles qu’ayudaren a desarrollar les tierres y les industries nun desarrollu y una
hestoria asemeyaos a los de los otros países americanos descritos enantes.
Tres la Segunda Guerra Mundial prodúxose una gran folada d’emigrantes. Calcúlase qu’ente’l 1951 y el
1958 entraron al país más de 60.000 persones. D’elles, 45.000 proveníen principalmente d’España, Portugal,
Italia, países del Mediu Oriente y Colombia. Ye importante solliñar que nesa dómina Venezuela tenía 6,5
millones d’habitantes y la población económicamente activo nun superaba los 2,5 millones, esto ye, qu’esti fluxu
inmigratorio representó una importante fuercia de trabayu, qu’influyó nun cambéu de la estructura económica y
11
Resume de Hacer la América, obra de C. Zubillaga, Editorial Fin de Siglo, 1993.
29
social del país. Yá nel 1971 la cifra menguara a 149.587, 1,4 % de la población, y nel 1990, 104.037 españoles
vivíen en Venezuela, el 0,6 % de la población.
URSS Cuando la Guerra Civil Española, la Xunión Soviética recibió y acoyó un coleutivu d’emigrantes
españoles bien especial, cercanu a los cinco mil neños -los “neños de la guerra”-. Calcúlase que’l 84 % de los
neños de la guerra na URSS ñaciera nel Norte d’España y el 36 % n’Asturies. El 74 % tenía ente 6 y 13 años
cuando lo evacuaron y el 58 % viaxó acompañáu por familiares (hermanos davezu). El 8 % morrió antes del
1953, sobre manera de tuberculosis y nos años de la II Guerra Mundial.
La mayor parte d’ellos vivieron na URSS per 20 años y otros, munchos más. Nesti periodu, estos neños
tuvieron en contautu estrenchu cola sociedá soviética per aciu de distintes instituciones y organismos y en bien
distintes circunstancies hestóriques. Conocieron les guarderíes, les cases de neños, (escueles en réxime
d’internáu), los centros de formación profesional, les universidaes, les fábriques y les empreses agrícoles
cooperatives, primero como sitios de práctiques escolares o estudiantiles, dempués como centros de trabayu.
Cuando se fixeron adultos trabayaron en tou tipu de centros de trabayu, dende hospitales a fábriques d’aviones.
Los exiliaos españoles conocieron les distintes situaciones estraordinaries nes que s’atopó la sociedá
soviética. Conocieron la terrible Guerra Mundial, los tiempos del socialismu movilizáu, el periodu de los grandes
esfuercios de la reconstrucción de posguerra, el desarrollu estable de los años 60-70 y, pa cabu, los tiempos de
la perestroika de Gorbachov.
Francia La emigración llaboral a Francia nel sieglu XX nun ye un fechu nuevu, yá que per años allegaren a esi
país munchos llabradores españoles a lo llargo del sieglu XIX. Sicasí, la guerra de 1914-1918, cola consiguiente
penuria y muerte de miles de trabayadores fixo que s’intensificara, pasando la colonia d’unos 80.000 emigrantes
nel 1900 a más de 300.000 nel periodu de entreguerres. Cola llegada de la República a España, la emigración
llaboral algama el so récor, con 352.000 emigrantes, siguíu por un descensu nel 1936 por causa de la Guerra
Civil.
La emigración a Francia volvió con fuercia años dempués, nel quinqueniu 1956-1960 hasta xenerar el
grupu estranxeru más numberosu nel 1968: más de 600.000 persones.
Lo nuevo de la segunda metá del sieglu XX ye lo masivo de la emigración a la Europa industrializao,
cuando s’anula l’atractivu americanu y s’acelera l’atracción europea. El «boom» de la emigración española nos
años sesenta coincide col desarrollu de los países vecinos ansiosos de mano d’obra dempués de los años de
reconstrucción que siguieron a la Segunda Guerra Mundial.
El perfil tipu del emigrante a Francia, y por estensión a otros países europeos ye una persona d’ente 15
y 55 años con una estancia media de trés años.
Ente 1960 y 1973, la emigración llega a afectar, finalmente, a más de dos millones de persones, cifra
bien importante teniendo en cuenta que nel 1970 la población activo yera de 12 millones de persones.
Alemaña Tres la Guerra Civil española y la Segunda Guerra Mundial, llega’l momentu de la reconstrucción y la
vuelta a empezar pa munchos países. Destaca ente ellos Alemaña, cola qu’España, como otros países del sur
d’Europa, robló en 1960 un conveniu pal fomentu de contratos de trabayu xestionaos pol Institutu Español de la
Emigración (anque tamién hebo españoles qu’emigraron a Alemaña por cuenta propia), lo que dexó emigrar a
más de mediu millón d’españoles hasta’l 1973. Estos yeren años d’una espansión económica fuerte n’Alemaña,
que se llamaríen dempués “milagru económicu”, nos que, al revés que n’España, había falta de mano d’obra
masculino como resultáu de la guerra. Ello traducíase nuna población activo insuficiente pa cubrir tolos puestos
30
de trabayu que precisaba l’aumentu de la producción industrial d’esos años y que demandaba mano d’obra
d’otros países pa cubrir les necesidaes llaborales. Según Eva María Arens nel so llibru La emigración española
en Alemania, los emigrantes yeren xeneralmente mozos d’ente 20 y 40 años, mayoritariamente homes casaos,
anque polo xeneral, los españoles vivíen coles sos families (el 63 %). Los sectores d’ocupación preferíos yeren
nes industries metalúrxiques, nel sector servicios, nes industries de química, papel y testil y na construcción.
Tres una estancia non muncho llarga, a diferencia de la emigración americana, tornó a España alredor
del 80 % de los emigrantes, yá que nel 1973 Alemaña dexó de solicitar mano d’obra a España por causa del
llamáu «Anwerbestopp» (suspensión de contratación de personal estranxero). La colonia española, que nesos
momentos llegaba a unes 300.000 persones, foi amenorgando pasu ente pasu dende los años 80 hasta l’añu
2008. El 20 % restante permaneció n’Alemaña y la segunda xeneración d’aquellos emigrantes españoles
integróse cuasi dafechu na cultura alemana.
Güei día, tres la crisis económica del 2008, la emigración a Alemaña paez volver resurdir. Según
l’axencia EFE citando cifres del departamentu federal d’estadística alemán, la medría de ciudadanos españoles
llegaos a Alemaña foi, respectu al mesmu periodu del añu 2010, d’un 49 % con un total de 2.400 persones. El
númberu total d’inmigrantes a Alemaña nel últimu semestre del 2011 foi de 435.000 persones, lo que supón un
aumentu del 19 % en rellación col mesmu periodu del añu anterior. Un 62 % venía d’otru Estáu de la XE,
mayoritariamente d’España y Grecia, mentanto qu’un 11 % llegó dende otros países non comunitarios europeos,
d’Asia o d’América.
Suiza Los españoles fueron ún de los primeros grupos d’inmigrantes que llegaron a Suiza. Anguaño, la
comunidá española representa una de les poblaciones estranxeres más numberoses d’esti país. Como yá
indiquemos, nos años 60, dos millones d’españoles salen del país, emburriaos pola necesidá y pol aisllamientu
de la dictadura. Suiza ye ún de los destinos preferíos de los españoles hasta’l puntu de que ye, con un 38,5 %
del total, el territoriu que recibe mayor volume d’inmigrantes españoles ente’l 1962 y el 1977. Chocantemente,
el réxime de Franco mira pa otru llau y trata d’esconder esta emigración masiva porque les remeses de los
emigraos son una fonte d’ingresos fundamental pa la economía del país.
En Suiza los españoles dedíquense a la construcción, la industria y el turismu. Munchos deciden dir pa
unos meses y otros quedaron.
Suiza, lo mesmo que Francia, Alemaña, Reinu Xuníu, Bélxica y Holanda apautaron colos países del sur
d’Europa contratos de trabayu pa cubrir les sos necesidaes llaborales no que se llamó emigración asistida. Les
autoridaes españoles xestionaron la emigración per mediación del Institutu Español d’Emigración (IEE), creáu a
finales de los 50, con convenios billaterales como’l robláu con Suiza en marzu del 1961.
En suiza precisaben trabayadores pa poder caltener la maquinaria activo tol día. Les empreses teníen
máquines que funcionaben a plenu rendimientu y presionaben a los gobiernos pa qu’axilizaren les llistes
d’espera y-yos mandaren más persones dispuestes a trabayar darréu.
Como obreros ensin cualificación profesional, trabayaben en condiciones pésimes, viviendo en sitios
insalubres, en barracones, con salarios menores que los nacionales y bien lloñe d’una posibilidá d’integración na
sociedá que los recibió. Suiza daba a los emigrantes españoles los trabayos más duros, ensin drechu a cobrar el
paru nin los beneficios de los trabayadores autóctonos.
Con too y con eso, la mayoría de los que salieron consiguieron l’oxetivu: aforraron y mandaron divises a
España, fundamentales pal desenvolvimientu económicu español.
Bélxica La inmigración española en Bélxica ye relativamente recién si se tien en cuenta que, oficialmente,
empecipió nel 1958. Otra manera, no que fai a la presencia española nesti país ye muncho más antigua y non
siempre tevo motivada por problemes económicos.
31
Fundamentalmente puen considerase trés grandes periodos na inmigración española en Bélxica12
:
• El primer terciu del sieglu XX caracterízase por una inmigración marxinal dafechu. Según cifres del
Institutu Nacional d’Estadística, 1.218 españoles instalárense en territoriu belga antes del 1925. Nun se
sabe con seguridá si yeren españoles provinientes de Francia tres l’armisticiu de la Primer Guerra
Mundial o se trataba d’españoles, y concretamente catalanes, comerciantes.
• El segundu periodu correspuende al exiliu republicanu de la Guerra Civil española: 793 persones lleguen
a Bélxica ente 1935 y 1939 (según datos del INE) a los qu’habría qu’añader l’acoyida de 3.000 neños
evacuaos d’España por causa de la guerra. Esti periodu caracterízase por ser el de la construcción de les
bases de la organización política de la comunidá española.
• La tercer etapa ye la de la emigración económica. Al rematar la Segunda Guerra Mundial produzse la
llegada de trabayadores españoles pa trabayar nes mines del país. Esta emigración, sicasí, fíxose oficial
nel 1958, fecha na que se ratificó’l primer alcuerdu billateral belgo-español d’esportación de mano d’obra.
Nel 1961 moraben en Bélxica 15.787 españoles, de los que 2.763 ñacieren nesti país.
Güei día tenemos de tener en consideranza una nueva forma d’emigración española a Bélxica: los
funcionarios europeos que tres la nuesa entrada na Xunión Europea incorporáronse a les instituciones
comunitaries.
Bélxica destaca tamién pol so papel na recepción de los neños de la guerra. Mandáronse ellí 5.130 neños,
de los que 1.280 nun volvieron enxamás y estableciéronse de forma definitiva. Poco primero de la invasión
alemana, en mayu del 1940, les autoridaes belgues presionaron pa qu’entainara la so repatriación. Cuasi toles
families d’acoyida actuaron prudentemente, poniendo la condición de tener noticies fidedignes de los padres de
los neños pela Cruz Bermeya o de les instituciones que-yos los confiaren.
Holanda La hestoria de la emigración a Holanda ye asemeyada a la d’otros países europeos. Ye la hestoria d’un
país con una gran falta de mano d’obra y que fixo venir un gran númberu d’obreros españoles a les sos ciudaes,
sobre too a Eindhoven, sé de la empresa Philips.
Frits Philips en persona, l’herederu de la gran Philips, qu’unos años más tarde diba llegar a ser una de
les multinacionales más poderoses del mundiu, decidióse por España, y l’alministración española nun duldó en
facilita-y la xera.
Les condiciones de recepción de los emigrantes yeren bien paecíes a les llevaes a cabu’l sieglu XIX en
dellos países d’América. Construyéronse campamentos estatales, como’l de Someren y otres localidaes paecíes
cerca d’Eindhoven. Ellí los trabayadores compartíen cuartu y comedor. Diariamente, los españoles diben y
veníen al trabayu n’Eindhoven, nunos autobuses que Philips tenía pa mover a los obreros, yá que la empresa,
daba trabayu a tolos pueblos d’alredor.
El númberu de trabayadores españoles siguía aumentando y la Philips tomó la decisión de construyir dos
campamentos más: ‘El Pinar’, na localidá de Maarheeze, que s’inauguró nel 1964, y ‘El Prado’, inauguráu nel
1966 n’Eindhoven. Estos campamentos taben dotaos de mayores comodidaes, pero inda en condiciones abondo
penoses.
Pasáu un tiempu, les contrataciones yá se realizaben directamente dende Madrid, non solamente pa
Philips, sinón pa tou tipu d’empreses n’Holanda y otros países vecinos. Quien quería trabayar nel estranxeru
12 Datos sociológicos de la emigración española, www.mtin.es.
32
debía de presentase en Madrid. La ciudá taba enllena de cartelonos onde s’anunciaben los países: Holanda,
Suiza, Alemaña, etc.
Reinu Xuníu ya Irlanda La emigración española nel Reinu Xuníu o Irlanda ye un fenómenu difícil de cuantificar, por cuanto nin el
rexistru consular ye obligatoriu nin les autoridaes d’inmigración britániques atropen datos. Según se recueye
nel Informe sobre la Emigración Española (febreru 2004) realizáu pol doctor Tony Morgan, de l’Anglia
Polytechnic University de Cambridge, la población español nel Reinu Xuníu taría ente 70 y 80 mil ciudadanos.
Hestóricamente la emigración española al Reinu Xuníu pue estremase en trés grupos con
característiques bien distintes:
El primer grupu ye’l compuestu polos exiliaos políticos llegaos cuando la Guerra Civil española de 1936-
39 o acabante pasar esta.
El segundu grupu ta formáu polos emigrantes económicos llegaos en númberu considerable dende finales
de los años cincuenta hasta mediaos de los años setenta.
A lo último, los miles de profesionales que van a trabayar n’empreses españoles o anglo-españoles y de
mozos que compaxinen nun periodu curtiu de tiempu’l trabayu col deprendizaxe o perfeccionamientu del idioma
inglés.
Por ámbitu d’actividaes, fueron tradicionalmente la hostelería y los servicios rellacionaos cola mesma
les árees nes que más notable resultó la presencia de la emigración española. Esta característica sigue dándose,
en bona midida, na actualidá, yá que, anque ye verdá que la emigración española ta cada día más cualificao, nun
lo ye menos qu’un grupu importante de los mozos qu’alleguen con mires de compaxinar el trabayu col
deprendizaxe del inglés tienden a buscar y atopar emplegu temporal nel sector de la hostelería de l’área
metropolitana de Londres.
Estaos Xuníos y Canadá Dende la guerra de los Diez Años
13, munchos trabayadores del tabacu emigraron dende Cuba a Florida y
ye asina como surde la primer colonia formal d’emigrantes española en Tampa, la más nutrida d’EE. XX. Pero la
presencia d’emigrantes algama munches otres zones d’esti país, como Nueva York, Filadelfia, Chicago, San
Luis, etc. En Pittsburg hai un topónimu interesante qu’obedez a fundación asturiana: Boalsburg.
Primero, na dómina colonial hebo una serie de poblaciones hispanes no que güei conocemos como los
Estaos Xuníos, daquella los sos gobiernos correspondíen al reinu d’España. El primer asentamientu foi en San
Agustín, Florida, siguíu por otros d’esploradores hispanos en Nuevu México, Alta California, Texas, y Louisiana.
La inmigración a Estaos Xuníos proviniente d’España foi mínima pero constante hasta la primer metá del
sieglu XIX, pero medró nel primer cuartu del sieglu XX hasta 27.000 na primer década y 68.000 na segunda.
Pero nel 1921 el gobiernu de los EE. XX. aprobó un sistema de cuotes que favorecía a los europeos del norte y
que restrinxía’l númberu d'españoles que podíen entrar a 912 per añu.
La presencia española nos Estaos Xuníos siguió menguando notablemente ente’l 1930 y el 1940, d’un
total de 110.000 a 85.000, optábase por otros países del sur d’América muncho más allegaos en costumes.
A partir del 1946 los fluxos migratorios d’España a Estaos Xuníos revivieron y dende entós prosigue la
emigración d’españoles a esti país. Según los datos proporcionaos polos consulaos d’España n’Estaos Xuníos,
los españoles rexistraos nesos consulaos sumaben cerca de 100.000 nel 2010. Pero la realidá ye que munchos
d’ellos nun se rexistren nos consulaos y otros tienen tamién la nacionalidá norteamericana. Ello ye que’l censu
13
La Guerra de los Diez Años, tamién conocida como Guerra de Cuba (n’España) o Guerra Grande (1868-1878), foi la primer guerra
d’independencia cubana escontra les fuercies reales españoles.
33
del 2010, ellaboráu pol gobiernu norteamericanu, identifica como “Spaniards” a 635.000 persones, un
crecimientu bien curiosu en comparanza coles 82.858 censaes nel añu 2000.
Oceanía La inmigración española a esti continente y más en concreto a Australia empezó nel 1882. Los españoles
llograron llegar navegando hasta’l país llonxanu nel sur del planeta baxo polítiques de repoblamientu nel destín
y tamién por causa l’exiliu de la Guerra Civil española, yá mentáu.
Hai aproximao 78.271 australianos d’ascendencia española, la mayoría d’ellos viven nes principales
ciudaes de Sydney y Melbourne, y en menor númberu en Brisbane y Perth. D’estos, según el censu del 2006
n’Australia, 12.276 ñacieron n’España.
La rellación d’asturianos con Australia ye relativamente recién yá que data de los años cincuenta del
sieglu XX y foi minoritaria. Les autoridaes australianes afalaben daquella, por razones obvies, l’establecimientu
d’europeos. Ente ellos, el nuesu amigu Joaquín Lloris, más tarde alcalde de Cabranes y collaborador constante
d’El Ventolín, que, n’alcordanza d’Australia, bautizó col nome de William al so fíu mayor, ñacíu ellí.
Dempués de la Segunda Guerra Mundial Australia precisaba mano d’obra pa los plantíos de caña
d’azucre, de tabacu, fruta y cebera y tamién pa la industria. Ente’l 1958 y el 1963, no que se conoció como
«operación Canguro», llegaron tamién unos pocos miles d’españoles con pasaxes subsidiaos y programes de
reunificación familiar. Ellí, por ser morenos y non muncho altos comparaos col estándar anglosaxón, llamábenlos
despreciativamente «wogs», que venía ser, pa entendemos, un poco l’equivalente australianu al despreciu que
per esos mesmos años espertaben ente los asturianos los trabayadores llegaos dende otros puntos de la
xeografía española atrayíos por Ensidesa, a los que se-yos llamaba despectivamente «coreanos».
El periodista Alfonso López, nun reportaxe pal diariu La Nueva España en xunu del 201214
rellátamos les
vivencies de dalgunos d’estos asturianos, como Engracia Villar, “que nun tenía l’oyíu avezáu al enguedeyu
estrañu que yera para ella l’inglés, asina que pa poder trabayar nun restorán de la ciudá de Corryong, nel Estáu
de Victoria, al sureste del país, deprendió de memoria los menús y a la so manera, tamién de memoria, porque
la gramática ye un lluxu que bien de veces nun puen permitise los que viven pa trabayar, deprendió a anotar
aquello qu’oyía na so llibreta de camarera p’apurrilo na cocina. Yera una camarera curtia en pallabres, pero bien
eficiente”.
Lo mesmo qu’otros munchos asturianos, Engracia Villar y el so home, Alberto Lago partieron p’Australia
en febreru del 1963 movíos pola necesidá y la enganía d’ameyorar.
África La presencia d’emigrantes asturianos nel Magreb y en dellos otros puntos del continente africanu ta
rellacionada cola colonización entamada nel sieglu XIX. Surde nel 1839, de la qu’emprima la colonización
francesa d’Arxelia, cuntando con unos 10.000 residentes españoles nel 1841, que pasen a 115.000 nel 1881, y a
unos 160.000 nel 1900. Nel 1930 había unos 300.000, y a partir d’esa fecha’l númberu baxa. El so orixe
xeográficu yeren zones del Mediterraneu (provincies d’Almería, Murcia, Alacant y les islles Baleares) con
mayoría de varones llabradores que se dirixíen a Orán y Arxel. Esta emigración débese a la crisis de la minería
y la probitú nos campos d’esos territorios. N’Arxelia ocupábense principalmente de l’agricultura; pero namás
unos pocos llograron a la propiedá de la tierra.
Dos casos son destacables especialmente dende la perspectiva hestórica española.
Per un llau, Guinea Ecuatorial, que foi una colonia española conocida como Guinea Española y dempués
foi una provincia española que llogró la so independencia’l 12 d’ochobre del 1968. Anguaño, Guinea Ecuatorial
ye l’únicu país d’África que tien al español como idioma oficial na so constitución; domínalu un 87,7 % de la
14
http://www.lne.es/nueva-quintana/2010/06/02/cinco-anos-australia/923326.html
34
población. Los funcionarios y residentes españoles fueron tornando a España tres les distintes dictadures y
rexímenes totalitarios que gobernaron el país. Güei día los nativos guineanos representen el 99 % de la
población y los emigrantes son prácticamente inesistentes.
El segundu casu ye’l del Sáḥara Occidental, un territoriu d’África asitiáu nel estremu occidental del
desiertu del Sáḥara, a orielles del océanu Atlánticu. Foi colonia española pero singularmente’l so procesu de
descolonización cortóse nel 1976, cuando España la abandonó en manes de Marruecos y Mauritania. L’idioma
oficial ye l’árabe, anque se falen dialectos y tamién se fala l’español, que s’estudia como llingua cooficial y
fálase como segundu idioma polos saharagüis que crecieron baxo la ocupación española, y con xiros y
modismos de Canaries y n’ocasiones arcaísmos de los años 1950, lo que lu fai bien interesante y dacuando
difícil d’entender.
35
CAPÍTULU 5: LOS NUESOS EMIGRANTES
Señardá: Sentimientu de tristura [que se tien pola falta o ausencia de daqué o de daquién].
Tengo señardá de cuando neñu.
Morrina: Dim. de morra. 2 Enfermedá [qu’infesta a muncha xente, a munchos animales y
causa mortandá]. 3 Animal muertu o restos d’animal muertu [que tán ensin enterrar]. 4
Tristura, murnia. || Cera de morrina, cera d’un caxellu abandonáu. || Mala morrina te lleve,
*espresión cola que se maldiz a daquién, cola que se desea un mal a daquién. || Mala morrina
te mate, *espresión cola que se maldiz a daquién, cola que se desea un mal a daquién.
Diccionariu de l’Academia de la Llingua Asturiana
Hestóricamente emigraron asturianos de cuasi tolos conceyos. Non toos lo fixeron cola mesma suerte,
nin na mesma dómina nin tampoco se dirixeron a los mesmos países. Pero toos ellos compartieron la señardá de
la tierra y el deséu de caltener la so identidá, nacional o rexonal, percima de cualesquier otra.
La mayoría caracterizóse por un enclín a asitiase xuntos, nes mesmes zones, y por venir de llugares
bien cercanos ente sigo. Esti fechu pon de relieve la importancia de les sos asociaciones, iniciatives, clubes y el
caltenimientu de la nuesa cultura llevándola a los sitios más insospechaos del planeta.
Los emigrantes crearon asociaciones y sociedaes d’alcuentru nos países onde s’allugaron y en distintes
etapes de la emigración, toes elles desempeñaron un papel fundamental na so vida personal, familiar y
coleutiva. Estes asociaciones contribuyeron a caltener les distintes identidaes: gallegos, asturianos, cántabros,
vascos, canarios, valencianos, andaluces... y resultaron fundamentales pa dar a conocer y caltener nel país
d’acoyida les comíes, costumes, festividaes, bailles, llectures y músiques característicos de caúna d’elles. Son
principalmente agrupaciones de reunión y convivencia, pero delles veces les diferencies polítiques marcaron la
evolución de dalgunes. Asina n’Arxentina, por casu, frente al Rincón Familiar Andaluz, de simpatíes
republicanes, creóse’l Centro Andaluz, y al Laurak-Bat opúnxose’l nuevu Club Vasco. N’Uruguai la situación
vivióse con intensidá especial ente la comunidá asturiana. Nel 1939, una parte de los componentes del Centru
Asturianu, fundáu nel 1910, creo la Casa d’Asturies, que se convirtió nun rival seriu. La situación caltúvose
hasta l’añu 2001, en que se llogró la reunificación. Esta división reflexábase nes publicaciones, periódicos y
revistes ellaboraes polos inmigrantes en tolos países, sobre too nos años de la Guerra Civil y la postguerra, de
la que tomaron partíu polos sublevaos y otres polos republicanos.
Dexando a un llau estes engarradielles, tenemos de destacar que los emigrantes usaron la cultura como
elementu de cohesión y coles mires de consiguir apoyos de toa clas, inclusive ye bien importante destacar que
munchos intelectuales y científicos españoles desenvolvieron llabores de docencia ya investigación en distintes
universidaes llatinoamericanes y crearon o promovieron instituciones d’enseñanza, nes que desarrollar el llabor
docente y educar a los mesmos emigrantes.
Les sociedaes españoles N’América entamáronse munches iniciatives enfocaes a intentar afitar l’asociacionismu ente los
emigrantes que más tarde diben a esportase a tolos continentes. A iniciativa de les autoridaes mexicanes
fundóse la Casa de España, que dempués tresformóse nel Colegio de México. Siguiéron-y l’Academia Hispano-
Mexicana, l’Instituto Luis Vives, el Colegio Ruiz de Alarcón o’l Colegio Madrid. Dende’l 1940 instalóse nesti país
la Junta de Cultura Española. En Cuba desenvolveríen de manera asemeyada, anque con un radiu d’actuación
más modestu, n’entidaes como la Casa de la Cultura y Asistencia Social, o la Escuela Libre de L’Habana. En
Chile proyectóse establecer una Universidad de Estudios Hispánicos, que tevo en Pablo Neruda el so promotor
más destacáu.
36
Toes estes sociedaes tuvieron un oxetivu común: favorecer les rellaciones personales ente los
emigraos. Como apuntó Consuelo Naranjo, una especialista nel tema:
“Estes asociaciones actuaron d’amortiguador del choque cultural a la llegada del individuu al faer posible
la so incorporación-adaptación al país nuevu. Elles diéron-y al acabante llegar la seguridá énte un mediu
desconocíu, cubríen-y les necesidaes actives, económiques y culturales nun primer momentu.”
Les primeres asociaciones d’inmigrantes tuvieron una función asistencial, cola que se trató d’amenorgar
pa los acabante llegar la falta d’infraestructures sociales nos países d’acoyida. Les primeres surdieron en
México, entamaes pol cónsul Francisco Prieto Neto. Nel 1840, la Sociedad de Beneficencia de Tampico y nel
1942, la Sociedad de Beneficencia Española de México, D.F. ayudaben a los necesitaos, daben sepultura a los
probes y facilitaben trabayu a los recién llegaos. La primer asociación de Cuba data del 1841 y foi la Sociedad
de Beneficencia Naturales de Cataluña en L’Habana, entamada por emigrantes ricos. N’Arxentina creáronse la
Sociedad Española de Beneficencia y l’Asociación Patriótica Española, dambes en Buenos Aires nel 1852, más
p’alantre les sociedaes de beneficencia de Cañuelas, Córdoba, Porteña (Córdoba), Mendoza, Rosario, etc. En
Perú, nel 1883 fundóse la Sociedad de Beneficencia El Callao y la Beneficencia Española de Lima. Más tarde en
Brasil les sociedaes españoles de beneficencia de Río de Janeiro y Bahía, el Refugio del Español Desvalido de
Río de Janeiro, la Caja de Socorros Mutuos de las Damas de Sao Paulo, etc. N’EE. XX. y Costa Rica creáronse
tamién sociedaes. En Cuba foi bastante tardía la so creación; concretamente a partir de la década de los años
70, organizándose por coleutivos rexonales, modelu que más tarde garraríen les cases y centros rexonales.
Munches d’elles dedicábense a les obres de caridá. Dalgunes fueron ampliando les sos funciones, construyendo
panteones, hospitales, asilos, tresformándose en sociedaes de tipu mutual, dando asistencia médica, hospitalaria
y farmacéutica, pensiones, entierros, repatriaciones, protección a muyeres españoles, a los fíos y a los
güérfanos.
Les sociedaes de socorros mutuos
El mutualismu qu’acabamos de mentar foi la forma d’organización y autoxestión predominante nes
distintes coleutividaes nacionales d’inmigrantes y, polo xeneral, ente los obreros. Primero apaecieron como
organizaciones de compatriotes, nun siendo en Cuba, onde la falta d’asistencia sanitaria resolvióse cola creación
de los centros rexonales. N’Arxentina constituyéronse 418 agrupaciones, pero namás cuatro de calter gremial.
Una de les más importantes foi l’Asociación Española de Socorros Mutuos de Buenos Aires, considerada como
la más poderosa d’Arxentina. En Brasil hebo quince d’estes sociedaes, once d’elles asitiaes en Sao Paulo. La
más importante foi la Sociedad de Socorros Mutuos de Sao Paulo, el restu tevo escasu sofitu social.
Sociedaes d’instrucción y recréu
Non toles sociedaes creaes s’enfocaron a temes llaborales y sanitarios. Tamién surdieron sociedaes con
un claru calter lúdicu, recreativu y cultural. En Cuba denomináronse sociedaes d’instrucción y recréu y
asociaciones recreatives y culturales n’Arxentina y otros países suramericanos. Nes de calter recreativu
participaron persones con ganes de falar el mesmu idioma y de compartir alcordances y tradiciones de les sos
tierres.
D’esta miente fundáronse casinos, clubes, círculos o centros españoles y asturianos, onde faíen
reuniones, celebraciones, actos sociales, etc. Esti modelu, que se desenvolvió en Cuba y Arxentina, foi l’orixe
de tola rede mundial de centros asturianos que se desarrolló de manera bien intensa a partir de les primeres
décades del sieglu XX.
Tamién se crearon sociedaes deportives, profesionales, culturales y confesionales. Les primeres, de
mano, formaron parte de les sociedaes recreatives. Dalgunes de les más importantes fueron la Sociedá
Deportiva Cuadonga de L’Habana o’l Club Hispano Argentino de Buenos Aires.
37
Nun podíen faltar tampoco les sociedaes confesionales, de calter relixosu y políticu. N’Arxentina creóse
l’Asociación Española de la Virgen del Pilar o l’Asociación Española de Santiago Apóstol. Venceyaes a los
partíos políticos creáronse’l Centro Republicano Español, la Liga Republicana Española, el Centro Nacionalista
Vasco y la Sociedad Galicia Nueva en Buenos Aires o l’Asociación Cultural Republicana Española en Lima.
Los centros asturianos y les cases d’Asturies Como yá mencionemos los asturianos tamién funden sociedaes de tou tipu cola fin d’ayudar al acabante
llegar a integrase. Son fundamentales a la de caltener l’alcordanza del llugar d’orixe y refuercen los llazos ente
los componentes de la colonia, ofreciendo educación, asistencia benéfica y sanitaria y ratos de fuelgu. Nesti
sentíu l’exemplu más afitáu ye’l centru asturianu, ente los qu’ensin dulda destaca l’emblemáticu Centru
Asturianu de L’Habana asitiáu na “Quinta Cuadonga”, fundáu nos años 80 del sieglu XIX, un modelu que va
esportase ya imitase nos posteriores centros asturianos, como los de Montevideo, Buenos Aires, Mar del Plata,
Mendoza, Santa Fe, etc.
N’ocasiones el volume d’asociaos yera talu que s’organizaben delegaciones d’un mesmu centru
asturianu. Éstes agrupen a los que viven fuera del sitiu onde s’atopa la sé, pero intégrénse nella pa beneficiase
de dalgún de los sos servicios. El Centru Asturianu de L’Habana cuntaba nel 1926 con 117 sucursales, como les
de Tampa, Key West y Nueva York, inclusive había una en Xixón, especializada na tramitación de la salida
d’emigrantes.
Amás de centros asturianos y sociedaes de beneficencia hai tamién entidaes qu’axunten a los asturianos
según el so orixe comarcal pa favorecer el contautu. Ello ye que surden asociaciones como la Sociedá
d’Instrucción Naturales d’Eilao, El Porvenir Asturianu de Taramundi, Club Ḷḷuarqués, Círculu Salense, Centru
Taramundés, Centro Asturiano del Conceyo de Villayón, La Sociedá Benéfica Protectora de Boalenses Xuníos,
el Centru de Mocedá Siero-Noreña, etc. Merez que destaquemos ente toes la Sociedá de Naturales del Conceyo
de Bual, que va ser un modelu copiáu por otres munches a la d’ameyorar les condiciones de la educación nos
sos llugares de ñacencia. Estes sociedaes d’instrucción diben algamar un gran espardimientu ente’l coleutivu
d’emigrantes asturianos nel primer terciu del sieglu XX; la más antigua d’elles ye la Sociedá del Progresu de
Lliberdón, fundada nel 1899.
Tocantes a la financiación destacaríamos dellos modelos: les cuotes de los socios, los empréstamos o
donativos de los componentes más pudientes, suscripciones pa casos concretos, emisión de bonos y
recaldaciones llograes en fiestes. Inclusive los centros llegaron a federase ente sigo p’algamar oxetivos
comunes. Esti ye’l casu de la Federación Nacional Cubana de Sociedaes Asturianes, que ye la qu’entama la
construcción d’un sanatoriu nel Monte Naranco d’Uviéu, p’allugar a los que tornaben de Cuba afectaos pola
tuberculosis.
Los periódicos de los emigrantes Les asociaciones d’emigrantes desarrollaron otros munchos llabores, más allá de l’asistencia básica, y
asina apaecen un gran númberu de publicaciones periódiques. Les primeres ñacieron como espresión escrita de
la mesma identidá, costumes y cultura.
Ente 1869 y 1885 surdieron en L’Habana los primeros periódicos y ente 1875 y 1880 vieron la lluz un
gran númberu de revistes impulsaes pola emigración. Toes elles contribuyeron a caltener el raigón cultural de
los inmigrantes espardíos peles grandes urbes, al empar que s’espublizaben les formes de vida y costumes de
les sos rexones de procedencia. Pero, sobre manera, fomentaron, caltuvieron y reproduxeron les cadenes y
redes migratories. Güei día cuasi toes estes publicaciones tresformáronse en portales y páxines web bien
interesantes y accesibles dende cualesquier parte del mundiu. Dalgunes de les más populares van llistaes na
Webgrafía final d'esti trabayu.
38
Siero Siero nun ye esceición a la hora de describir la Hestoria de la emigración asturiana. Vecinos de toles
nueses parroquies emigraron a otres partes d’España, América, Europa o Australia en busca d’una vida meyor.
Dalgunos tuvieron un ésitu notable y otros non tanto, les sos hestories paécense a les descrites nos capítulos
anteriores pero dalgunes, poles sos implicaciones nel nuesu conceyu merecen ocupar unes lliniuques nesti
trabayu de divulgación.
Mª Dolores Alonso Cabeza, nel so llibru Páginas de la Historia del Concejo de Siero, fai un curtiu
percorríu pela emigración sierense bien interesante. Nelli rellátamos cómo hasta’l sieglu XIX los vecinos que
dexaben Siero facíenlo de manera temporal a Castiella como braceros, cómo los nuesos zapateros viaxaben per
España colos sos productos y cómo munchos de los nuesos vecinos decidieron faer les Amériques nel periodu
de les grandes migraciones.
Nesta dómina temprana empiecen les donaciones de los emigrantes sierenses, que collaboraron de
manera definitiva nel desarrollu del nuesu conceyu. Yá nel 1677 hai constancia de donaciones pa la fundación
de capiyes como la de San Antonio de Padua y San Bartolomé n’Aramil gracies a los donativos de D. Antonio
Rodríguez, vecín d’esa parroquia que nunca volvió de “Les Indies”.
Años más tarde, munchos d’esos emigrantes sierenses fueron parte fundamental de los centros
asturianos y fundadores d’entidaes singulares, como’l Centru de Mocedá Siero-Noreña, qu’entá pervive
n’Arxentina. Dos mozos asturianos, Amador García Díaz y Benjamín García Junquera, crearon esti centru’l 21 de
xunetu de 1918 xunto con un grupu de 45 mozos emigrantes de distintos pueblos de Siero y Noreña y empiecen
a axuntase nos salones de l’Asociación Patriótica Española de la capital federal arxentina. Ellí escueyen al
primer presidente; don Amador García Díaz y nomen como secretariu a don Benjamin García Junquera. Queríen,
lloñe de la so patria y del so llugar de ñacencia y según consta na acta constitucional, "fomentar la cultura, la
educación, el progresu y recréu, incluyendo’l típicu deporte de los bolos. Entamar les romeríes y bailles. Y
tamién representaciones d’obres teatrales asturianes". La fiesta d’inauguración realizóse’l 29 de setiembre del
mesmu añu y ente otros munchos llogros hai que destacar que son los responsables de la donación cola que se
construyó la escuela pública d’Artes y Oficios La Pola, inaugurada’l 1 de setiembre de 1930.
Otros munchos sierenses emigraos convirtiéronse en verdaderos benefactores pal nuesu conceyu. Un
exemplu claru son les escueles de Cualloto, construyíes nel 1910 gracies a la donación de Pepín Rodríguez, un
indianu qu’emigró a Cuba y fixo fortuna na industria del tabacu, na que fabricó los famosos habanos Romeo y
Julieta. Llamábase José Rodríguez Fernández, y xunto col so tíu Antonio Roces, que donara’l terrén de la
mentada escuela, foi ún de los grandes benefactores d’Asturies. Foi un industrial ya importante mecenes
asturianu, que ñació nel pueblu de Santolaya de Cualloto nel añu 1886 y estudió n’EE. XX. y Cuba. Tamién pagó
en 1911 la primer carretera que xunió Roces cola xeneral de Cualloto amás d’otres obres de caridá en
L’Habana. Llogró la Gran Cruz de la Orde d’Alfonso XII en 1913. Morrió en L’Habana nel añu 1954.
Otru emigrante nomáu del nuesu conceyu foi Florencio Rodríguez, fundador del Bancu Hispanoamericanu
y principal financiador del asilu de La Pola Siero. Esti indianu, ñacíu en La Pola Siero nel 1840, emigró de mozu
a Sevilla y d’ehí a Cuba, dende onde mandó les 450.000 pesetes necesaries pa la construcción y puesta en
marcha d’esti serviciu. Inauguróse’l 10 de febreru del 1886. Dempués tamién diba pagar la so ampliación y la
vivienda del capellán nel 1889.
Otros indianos tamién crearon y ayudaron a fomentar otres escueles per distintos pueblos. Esti ye’l casu
de D. Martín Malgor, fináu en México, que donó 250 pesos pa la escuela de La Pola Siero y D. Juan Camino, que
favoreció coles sos aportaciones económiques a la parroquia de Granda.
Nel 1901 D. Francisco González-Cortina y Moro donó tamién 1.000 pesos a la escuela de La Collá, en
1906. D. Cesáreo Vigil Cortina, establecíu en Cuba, apurrió una cantidá de dineru importante pa la escuela de
Muñó, qu’incluyía la vivienda pal mayestru.
39
CAPÍTULU 6: EL SIEGLU XXI
Llexislación española y emigración La Constitución Española, nel so artículu 42, declara que “L'Estáu va velar especialmente pola
salvaguardia de los drechos económicos y sociales de los trabayadores españoles nel estranxeru, y va
empobinar la so política pa que tornen”. Por tanto, ún de los cometíos del Estáu ye ayudar a los emigrantes que
deciden retornar nesti difícil procesu.
¿Quién ye emigrante retornáu?
L’alministración considera retornáu al emigrante, o los sos fíos, anque ñacieren fuera d’España, que
torna a España pa instalase dafechu nesti país. La condición d’emigrante retornáu caltiénse nos dos años
posteriores inmediatamente a la fecha de la torna y acredítase col Certificáu de Retornáu, emitíu pol área o
dependencia provincial de trabayu y asuntos sociales, o direición insular, de la delegación o subdelegación del
gobiernu, del sitiu onde se presente la solicitú d’ayuda, respectivamente.
¿Qué ye’l certificáu d’emigrante retornáu?
Trátase d’un documentu imprescindible p’acreditar esta condición a efectos de solicitar les ayudes
xestionaes pola alministración pa esti coleutivu. Nelli consta la fecha de la última salida d’España, la del retornu,
el tiempu trabayáu nel país estranxeru, el periodu d’ocupación cotizáu, nel so casu, y tamién que’l trabayador
nun tien drechu a ayuda por desemplegu nesi país.
¿Por qué se torna?
Ente los que tomen la decisión de volver podemos apreciar trés grandes grupos:
Unos, los más numberosos, sedríen los que nun llograron los oxetivos y mires plantegaos nel so procesu
d’emigración, polo que se vieron obligaos a tornar.
Otros, nun porcentaxe tamién importante, sedríen los pertenecientes a lo que los estudiosos llamen
“emigración andarina”15
.
Pa cabu, los menos, sedríen los qu’algamaron l’ésitu, los “indianos” que llograron una bona situación
económica y que vuelven a la so tierra, temporal o definitivamente, pa realcontrase cola so familia y los sos
paisanos, amosar la so bona situación y, en munchos casos, invertir parte de les sos ganancies en meyores nos
sos llugares d’orixe.
La emigración güei. Dellos datos estadísticos: Según datos de CC.OO., ente 2001 y 2002 emigraron 18.000 mozos asturianos. Acordies con un estudiu
del INEM, ente 2000 y 2004 Asturies foi una de les comunidaes autónomes que más trabayadores esportaron, y
non yá titulaos universitarios, como suel pensase, sinón tamién persones con estudios de bachilleratu y
formación profesional. Nel 2004 los asturianos firmaron más de 34.000 contratos fuera de la so comunidá. Datos
bien significativos a los qu’hai qu’añader el fechu de qu’Asturies ye una de les comunidaes que menos
trabayadores foranos recibe.
Según un estudiu fechu públicu por Europa Press el 27 d’abril de 2011 el númberu d’españoles
qu’emigraron a otros países en 2010 xube a 128.655 persones; Arxentina ye’l país qu’acueye a más emigrantes,
cola cifra espectacular de 345.866, siguida a distancia por Francia (189.909), Venezuela (173.456) y Alemaña
(108.469).
15
Emigración andarina ye la emigración temporal y repetitiva de carácter añal ensin establecer arraigu nin integración na comunidá nueva,
xeneralmente por motivos llaborales.
40
El númberu de persones con nacionalidá española que vive nel estranxeru aumentó un 8,2 per cientu
(128.655 persones) nel últimu añu hasta algamar los 1.702.778, según los datos del Padrón d’Españoles nel
Estranxeru (PERE) con fecha 1 de xineru del 2011.
Per continentes, el 61,6 per cientu (1.049.465) de los residentes nel estranxeru tien afitada la so
residencia n’América, el 35 per cientu (602.178) n’Europa y el 3 per cientu nel restu del mundiu (14.917
n’África, 19.310 n’Asia y 16.908 n’Oceanía). Coles mesmes, la mayor medría d’inscritos nel PERE nel últimu añu
prodúxóse n’América, con 102.764 persones más, y en términos relativos, esti aumentu protagonizólu Asia y
América, con un aumentu del 10,9 per cientu en dambos casos.
Les muyeres representen al 51,1 per cientu d’estos españoles, mientres que’l 48,9 per cientu son
varones; unos datos asemeyaos a los de va un añu. Per sitiu de ñacencia, la mayoría (56,8 per cientu) ñació nel
país nel que vive, mentanto que’l 37,6 per cientu fíxolo n’España y el 4,8 per cientu n’otros países.
Na tabla siguiente refléxase’l númberu de residentes españoles nel estranxeru per países de residencia
nel añu 2010.
1. Arxentina: 2.322.002
2. Francia: 2.183.277
3. Venezuela: 1.167.311
4. Alemaña: 905.916
5. Suiza: 390.142
6. Brasil: 82.189
7. México: 77.069
8. EE. XX.: 72.730
9. Reinu Xuníu: 60.368
10. Uruguai: 54.544
11. Cuba: 52.638
12. Bélxica: 43.397
13. Chile: 23.296
14. Andorra: 23.296
15. Países Baxos: 18.724
16. Italia: 17.421
17. Australia: 15.323
18. R. Dominicana: 13.880
19. Perú: 14.660
20. Colombia: 13.241
21. Canadá: 10.817
22. Portugal: < 10.000
23. Panamá: < 10.000
24. Suecia: < 10.000
25. Marruecos: < 10.000
Toos estos trabayadores que migren faenlo por una clara necesidá: el trabayu. Ente ellos podemos
atopar:
A. Trabayadores: principalmente marineros (56,36 %), siguío de la emigración de temporada a
Europa (38,52 %), d’estos un 99,7 % llabradores.
B. Profesionales: Principalmente técnicos y profesionales científicos (73,28 % nel 2001), siguío de
los técnicos y profesionales d’apoyu (10,11 % nel 2001) y los de dirección d'empreses (5,58 % nel
2001). El principal destín ye Hispanoamérica, lo que nun ye sorprendente dao que nel 1999 más del
60 % de les inversiones españoles nel esterior concentráronse n’América Llatina, frente al 18 % nel
1993.
C. Investigadores: Nun hai datos de nengún organismu sobre’l númberu d’investigadores españoles
que dexen el nuesu país pero resulten bien significatives les conclusiones del últimu informe del
External Advisory Group (EAG) -un comité d’espertos de la Xunión Europea creáu pa la evaluación de
polítiques d'I+D- qu’indica que “España namás recupera 1 de cada 1.188 investigadores fugaos en
busca d’un desarrollu meyor de la so carrera investigadora”. Esti coleutivu ye claramente
representativu de la tresformación esperimentada pola emigración española. Si na primer metá del
sieglu XX emigraben persones con un nivel baxu de formación o inclusive carentes d’escolarización,
agora faenlo integrantes d’un coleutivu altamente formáu y preparáu.
D. Cooperantes: L’Asociación Profesional de Cooperantes (APC), que tien como oxetivos la defensa,
protección, promoción social y valoración de les y los profesionales cooperantes, ellaboró nel 2005
un recuentu de los cooperantes españoles nel esterior, cifrándolos en polo menos 1.400; entiende por
cooperante profesional a toa persona de nacionalidá española que trabaya en xeres de cooperación al
desarrollu o ayuda humanitaria en países receptores d’ayuda, sía cuala sía la naturaleza contractual
41
col so emplegador. Ente ellos nun s’inclúin los voluntarios, becarios, llectores, brigadistes y otres
figures non remuneraes o ensin contratu de trabayu. América Llatina foi tradicionalmente’l principal
destín: llega a suponer el 58 % de los profesionales de la cooperación. L’África Subsaḥariana ocupa la
segunda posición, col 20 %, siguida d’Oriente Estremu (11 %), Magreb y Oriente Mediu (7 %).
E. Estudiantes: Incluyimos equí lo mesmo a los estudiantes universitarios que viaxen pa deprender o
ameyorar otra llingua qu’a los que viaxen pa realizar estudios universitarios o, en tando titulaos
n’España, realicen posgraos, doctoraos y postdoctoraos n’otru país.
Ta claro qu’esta emigración nun pue comparase cola que se desarrolló a finales del sieglu XIX y na
primer metá del XX, cuando munchos fueron a América del sur o, más tarde, a países de la Europa próspera, col
enfotu de faer fortuna o, a cencielles, de buscase la vida. Tamién hai quien dulda que la emigración asturiana
actual pueda denominase siquier emigración. Los emigrantes actuales, que formen parte de les capes medies o
medies-altes de la sociedá, nun desempeñen trabayos manuales penosos, polo que la so forma de vida folgada
nun-yos daría drechu al sentimientu d’esllarigamientu, tan típicu del emigráu. Amás, dao que la mayor parte
d’ellos treslladáronse a otres rexones españoles, nun son emigrantes en sentíu estrictu.
Isaac Vallina Arboleya
Pascua de 2012
Recommended