Upload
fer-te
View
227
Download
1
Embed Size (px)
DESCRIPTION
conto cumpreanos
Citation preview
Tamos nel sieglu XXI dempués de Cristo. Tola Gallaecia ta
ocupada pelos hispanos y pelos lusitanos… ¿Toa? ¡Non! Una
aldea añerada por invencibles galegos aguanta entovía y
siempres a los foriatos invasores. Y la vida nun se puede
dicir que seya fácil pa les guarniciones de lexonarios hispanos
y lusitanos nos menguaos asitiamientos de Pontevedrum,
Ourensium, Carballinum y Sanxenxorum…ye
(Perdón. Taivos quietos. Paezme que tracamundié´l cuentu.
Entamamos de nueu la historia).
Tamos nel añu 2019 y Xian tien ya 10 años. El rapaz
acaba d´empezar quintu de primaria y vive tan contentu en
Vigo colos sos pas, Fernando y Bea. Xian ye perguapu y
agudu como los ratos, como so ma, y espigáu y gayasperu
como so pa, y lo mesmo y da pasar la tarde lleendo un
llibru que xugando a la pelota colos collacios, dir a saliase
colos sos pas que pasar la tarde trebeyando colos mandos de
la consola del so primu, pasiar pela biesca que ver la tele…
Una de les coses que mas-y presta ye perdese pelos montes,
pelos praos,, caminar a la vera los regatos y amirar les
maravíes de la naturaleza de la so tierra. Como los
mayestros nun son enforma partidarios de salir de la clas,
tien que-yos lo pedir a los sos pas y estos a veces tienen mas
ganes de char una siesta que de dir a esparcese, pero otres
vegaes éntra-yos el sentimiento de culpabilidá y dícen-y que
sí marmuriando pelo baxino “¡Quién me mandaría a mí
tener fíos a estes altures cuando yo vivía…!” magar que nun
afechen la fras porque tan percontentos colo que pa ellos
supuso y supón Xian. Asina que, una tarde de primavera,
Fernando y Bea ficieron unos bocatas y colaron con Xian
hasta un llugar dende´l que nun se pudieren columbrar los
edificios de la ciudá, hasta un llugar onde se pudiere
enllenar d´aire puru los polmones ensin mieu a garrar
dalguna enfermedá. Llevaben ya un par d´hores devalando
per caleyes, per praos, ente bardiales, cuando entamó a
orbayar.
“¡Ye lo que me faltaba!”, pensó Fernando ensin atrevese a
dicilo en voz alta porque sabía que Bea lu diba reñer, cola
suerte de qu´a los dos minutos salió l´arcu la vieya y empezó
a escamplar.
- Nel entamu y nel remate del arcu la vieya hai ayalgues
escondíes pelos moros –dixo Xian como si nun viniere a
cuento.
- ¿Quién te cuntó esa babayada? –espetó Fernando daqué
aventáu.
- ¿Quién te cuntó esa historia? –apaciguó Bea que, pa
dalgunos asuntos, sabía contemporiar meyor que´l so
home.
- ¡Eso nun son mas que lleendes fates! –siguió cola so
zuna Fernando.
- ¡Calla y dexa falar al guaje! –cortó pelo sano Bea.
- Díxomelo güelín y güelín nun diz mentires –defendióse´l
rapacín.
Quedaron los tres ensin saber qué facer unos segundinos,
los necesarios pa que Fernando aposentara y tentara de
ve-y el llau positivu al asuntu.
- A lo meyor tienes razón, Xian, y hai dalguna ayalga
escondía polos moros, pero va resultar enforma
enguedeyao rescatalos tando onde tan…
- ¿Por qué? –entró al trapo´l rapacín.
- Porque, si te fixes bien –siguió´l padre- ún de los
estremos ta na metá la biesca y va ser perdifícil
atopar el sitiu esactu.
- ¿Y l´otru estremu? –entrugó Xian.
Fernando fízose´l remolón pa responder, como queriendo
dase importancia y, mentantu, Bea trataba d´aldovinar lo
que Fernando taba tramando.
- L´otru estremu paezme que ta allá arribona, na
picalina d´aquella montaña, ente aquelles piedres.
- ¿Vamos hasta allí? –entrugó pidió Xian.
- Home, yo… -duldó Fernando.
- Ya ye tarde. Ta atapeciendo y tenemos que colar pa
casa –sentenció Bea.
Xian nun gorgutó y los tres colaron pa casa. Como
taben frayaos del garbeo pela naturaleza, bebieron un vasu
llechi y fueron a chase. Pero, enantes de dormir, Fernando
burbusó a Bea:
- Tengo una idea.
- Cuéntamela.
- Espera que la piense con mas calma.
Y dio la vuelta pa ponese a roncar.
Fernando pasó 10 díes boriando como un idiáticu ensin
dar explicaciones nin a Bea nin a nadie. Metíase en
cuartu col pretestu de preparar les clases, cuando enantes
nunca enxamás nun les preparara y, nuna d´estes, soltó
de sutrucu, a lo foíno:
- ¿Qué vos paez si´l domingu vamos a ver si atopamos
l´ayalga del arcu la vieya?
Y mientres Xian glayaba “¡Bien! ¡Bravo!”, daba blincos
pel salón, nel sofá del salón y abrazaba a so pa, Bea cho-y
una güeyada amosquiada y entrugadora que tuvo un
ceguñu como única rimpuesta por parte de Fernando.
El sábadu, Fernando esapaició misteriosamente ensin
desplicase y nun volvió hasta la hora xintar. Llegó fechu
un guiñapu, duchóse, comió cuatro caxigalines pa matar
la fame y coló pa la cama. Bea entrugó-y de ónde venía
pero él dio-y la callada por respuesta.
El domingu tempranín salieron de casa preparaos como
si fueren a una expedición al Amazonas ficieron
bocadiellos metieron también unes botelles d´agua mercaron
una empanada na panadería y colaron percontentos a la
gueta l´ayalga. Bea ya taba enterada de “la idea” de
Fernando. Xian nun sabía res del chanchullu de so pa.
Llegaron hasta´l final de la carretera, al pie de la
montaña, descargaron la comida, arrecostinaron col picu y
la pala y, pali pali, sudando como condergaos a galeres,
aportaron al cumal. Descansaron una migayina y
punxéronse a cavar.
- Cava equí –dicía Fernando a Xian con afán de
despistalu.
- Cava equí, que tien bona pinta –como pa da-y
suspense.
- Déxame a mi descansa un poquiñín –ayudó Bea al
probe guaje.
- ¿Por qué nun escarbes ehí, ente eses piedres? –dixo
Fernando como si nun fuere con él la cosa.
Y Xian miró ente aquelles piedres, apartó unes, separtó
otres y, de sutrucu, glayó al alto la lleva:
- ¡Equí ta… equí ta l´ayalga!
Los pas ficiéronse los sosprendíos y corrieron pa col
rapaz como si-yos fuere la vida nello. Sacaron una caxa,
llevantaron la tapa y… nun había nin xoyes nin monedes
nin collares nin colgantes como los que salen nes películes
de pirates, solo había munches fueyes escrites y con
debuxos, y unos cacharrinos que punxeron cara póker na
cara de Xian. Fernando, el de la idea, tomó la palabra:
- Mira Xian: estos cacharrinos que nun aparenten
gran cosa son xuguetes colos que xugaben los tos
güelos, y son tan tesoros como les xoyes o les monedes
d´oro. Esto nómase pionza, esto ye un gomeru, esto
una pirindola, esto una carraca, ya t´aprenderé a
xugar con ellos.
- Y estes fueyes –metió baza Bea- son les instrucciones
de xuegos a los qu´abenayá xugaben tolos rapacinos y
rapacines y que tán esapaiciendo, y ye una pena…
- Ye una pena –confirmó Fernando, solidariu cola
causa.
- Ye una pena: alza la maya, cascayu, les cuatro
esquines, l´engruñu, l´esconderite, lica, el pinchu, pica
la mula, pío campo, tres marinos a la mar, roma…,
y que yo tamién te voi deprender a xugar.
- ¡Y qué debuxos tan guapos! –soltó a lo roncha
Fernando, al que nun-y prestaba nada que lu
aponderaren.
- Sí, niñín, tán perpreciosos –respondió Bea pillando
como siempre´l deseyu de Fernando. Esta vez tenía
bien ganaes les alabancies pol so trabayu de munchos
díes.
Xian taba colos güeyos chando chiribites polo rares que
resultaben les ayalgues de los moros, pero calló porque
caltrió nun tris l´envís de los sos pas y, de dalguna
manera, agradecía-yos lo que ficieren por él. Mas que
nada, poles molesties. Yeren unos bonos pas y él, que
tamién yera un bon fíu, fizo como si hubieren alcontrao la
mayor ayalga del mundiu: la del pirata Robert, o como
demoños se nomase.
De la que baxaben pela lladera tornando pa casa col
tesoro, Xian, como de revisgu, soltó:
- Cuando yo tenga un fíu, voi llevalu a un estremu
del arcu la vieya a descubrir una ayalga y, a lo
meyor, atopamos pionces, carraques o instrucciones de
xuegos tradicionales, a lo meyor, pero lo que de xuru
vamos alcontrar va ser una consola meyor que la del
mio primu.
Fernando y Bea tragaron escupía y pensaron al empar:
“¡Esti fíu nuestru va acabar cola nuestra salú! ¡Vaya
salides que tien el canalla! ¿A quién se paez?”. Pero, no
fondero, prestó-yos el comentariu.
Autor: José Horacio Serrano Fernández
Debuxos: Xián Telle Troncoso
30 de abril de 2010