Gagnon

19 €978-2-84698-382-2

Trè poli principali danu a struttura à sta publicazione : i fundali, l’argumenti nurmativi è i valori chì ci si arremba è ci si nutrisce a vuluntà federale ; e metamorfosi chì

caratterizeghjanu a cundizione federale in cuntestu multinaziunale ; u spuntà di a multinazione cum’è suluzione più bona pè i paesi chì i segna a diversità naziunale.

Si mette in lume quant’ellu hè urgente di agisce è di pensà a multinazione, da chì a ghjente di oghje avessinu l’arnesi adatti per risponde à quella sfi da maiò di a nostra epica : ricunnosce e cumunutà minuritarie naziunale indrentu à insemi pulitichi ampii. Vole si dì chì i Stati di oghje devenu pudè pisulà a diversità chì hè sputica soia è vulè turnà innuvatori in quantu à l’istituzione, in modu chì quesse aiutessinu à rializà in tuttu i prugetti cullettivi porti demucraticamente da e cumunutà naziunale, è saria un bellu aff ollu per assigurà l’azzione quant’elle sò legitime è per stringhje i legami trà e cumunutà.

Alain-G. Gagnon hè titulare di a Catedra di ricerca di u Canada in studii chebeccani è canadiani, direttore di u Centru di ricerca interdisciplinariu nantu à a diversità à u Chebeccu (CRIDAQ,) è prufessore titulare à u Dipartamentu de scienza pulitica di l’università di u Chebeccu à Montréal. I travagli ch’ellu hà portu u prufessore Gagnon in quantu à i partiti, l’identità, a diversità, u federalisimu è a multinazione sò stati tradutti in dodeci lingue è di più. Di lugliu 2009 hà direttu una «università citadina» à l’università di Corti.Trà e so publicazione più recente ci sò Les métropoles au défi de la diversité culturelle (Presses universitaires de Grenoble, 2006) cun Bernard Jouve ; Le fédéralisme canadien contemporain (Presses de l’université de Montréal, 2006) ; De la nation à la multination : les rapports Québec-Canada (Boréal, 2007) cun Raff aele Iacovino ; Canadian Politics, 5a edizione University of Toronto Press 2009 (cun James Bickerton) ; Federal Democracies (Routledge, 2010) cun Michael Burgess.

Al dilà di a nazione unificatrice :

argumenti pèu federalisimumultinaziunale

Traduzzione di Ghjacumu Thiers

ALAIN-G. GAGNON

A.-G

. GA

GN

ON

Al d

ilà d

i a n

azio

ne u

nific

atri

ce :

argu

men

ti p

è u

fede

ralis

imu

mul

tina

ziun

ale

Gagnon_couv.indd 1Gagnon_couv.indd 1 04/11/2010 10:00:3004/11/2010 10:00:30

int-Alain-G. Gagnon-196p-151010.indd 1int-Alain-G. Gagnon-196p-151010.indd 1 05/11/2010 10:44:2805/11/2010 10:44:28

7

Introitu

RINASCITA DI U PRUGETTU FEDERALE È SENSIBILITÀ NOVE VERSU A MULTINAZIONE

Sti pochi anni, in parechji stati, hè stata preferita a via federale per risponde à e sfi de di a mudernità. In u federalisimu l’esperti vedenu prupietà uniche atte à aiutà à ricunnosce i gruppi etnoculturali, à favurizà a raprisentazione di i varii currenti di pensà, à assigurà i diritti di e minurità naziunale, à assestà in modu ghjustu i puderi trà l’ordini di guvernu è, per ammintà solu e dimensione principale, à sparte a ricchezza cun equità.

À i Stati cuntempuranei li ci tocca à assume a sfi da di a diversità naziunale. Di fatti a maiò parte l’anu digià da scunfi nisce è po, da un’altra banda, l’immigrazione caratteristica di l’epica ch’è no campemu oghje à pocu à pocu diventa una realità chì ùn si ne scansa omu ed hè megliu à sapè la valutà1. Tandu u federalisimu ne torna via chì prumette pè e demucrazie liberale avanzate. Ind’è stu libru si viderà cumu u federalisimu multinaziu-nale à pocu à pocu si deveria impone cum’è strada prediletta, trattendu si di gestione di i cunfl itti cumunutarii è di affi rmazione di l’identità cullettive. In isse demucrazie custì, a cultura pulitica porghje una terra ricca pè arradicà ci i valori chì portanu u prugettu federale. T’hà a raghjò u pulitolugu Alfred Stepan quand’ellu ramenta chì « chacune des démocraties de longue durée opérant dans un contexte de polité multilingue et multina-tionale est un État fédéral2. » Dunque ci hà da vulè à scavà più prufondu u signifi catu ed e cunseguenze di issu custattu pè e demucrazie avanzate.

Di siguru a formula federale ùn hè atta à regulà ogni cosa, ma t’hà e qualità primurose per permette a stabilità di i regimi pulitichi. L’applicazione di e varie formule federale ùn hà micca sempre purtatu i risultati ch’omu pensava, ma quantunque, quandu i gruppi magiuritarii, à nome di u rispettu di a diversità cumunutaria, anu accettatu di trattà in modu ghjustu l’altre cumunutà chì stavanu nantu à u so territoriu, tandu si hè pussutu vede chì l’avanzate demucratiche eranu signifi cative. Hè sigura chì certe tensione ùn si ponu scantà quand’elu si tratta di i raporti cumunutarii, ma u più chì impreme hè a capacità ch’elli anu tutti quanti à pattighjà inseme è à mette in ballu i modi di neguzià da ch’ella ùn si sbrisgiuleghji a vuluntà federale. Dunque hè un’andatura chì permette discussione è neguziati chì, cun quessa, l’avvene di e nazione ùn hè tuppatu.

1. Ricard Zapata-Barrero, Multiculturalidad e inmigracion, Madrid, Editorial Syntesis, 2004.2. Alfred Stepan, « Federalism and Democracy: Beyond the U.S. Model », Journal of Democracy,

vol. 10, no 4, 1999, p. 19.


AL DILÀ DI A NAZIONE UNIFICATRICE : ARGUMENTI PÈ U FEDERALISIMU MULTINAZIUNALE

8

Stu studiu quì si pudia fà à parte si da un inseme tamantu di casi postu chì u prugettu federale, l’anu purtatu cum’è suluzione pulitica in parechje situazione. Ùn ci hè chè da pensà à l’Indunesia, l’Iraccu, u Nigeria è a Russia. In quessi, i paesi, a demucrazia spessu hè scuzzulata è ùn và mancu à pena cun l’alzà di un spiritu federale. Longu à i capituli di stu libru, stringhjeremu a rifl essione sopra à tuttu nantu à l’esempiu canadianu, ma fi ghjeremu dinù e situazione in altri paesi federali (per indettu a Belgica è i Stati Uniti) o in via di federalizazione (per indettu a Spagna o u Regnu Unitu). Da ch’ella picci a formula federale, si viderà ch’ellu ci vole una capacità forte di i Stati naziunali à fi dà si di e pratiche demucratiche avanzate, a vuluntà accertata di campà inseme è di rispettà e varie tradizione chì danu sensu à u vulè campà in cumunu. Rispettendu quesse l’esi-genze, si pò uttene ch’elli sianu fi dati i partenarii in senu à l’inseme federatu, chì ne truverà a so perennità.

FEDERALISIMU È FEDERAZIONE

Di entrata ci vole à distingue trà e nuzione di federalisimu è di federazione3. I spezialisti di u federalisimu spessu anu usatu i dui cuncetti senza distingue li. Or u primu rimanda à tradizione, una cultura, un spiritu, un modu di cumpurtà si, è ancu un’ideulugia invece chì l’altru insegna pè u più a dimensione istituziunale.

Parechji Stati saranu stati appicciati inseme per pudè fà una federa-zione senza ch’ella fussi stata ricunnisciuta in modu furmale a diversità suce-tale in u funziunamentu di l’istituzione : hè cusì in particulare in Alemagna, in Australia è in i Stati Uniti. È puru, per maraviglia, hè statu un Americanu, William Livingston4, à fà ricunnosce a diversità sucetale cum’è fundamentu di u spiritu sucetale. U Canada hè un altru casu : issa federazione, furmata in u 1867, segondu l’epiche hà cercu à cappià certi tratti federali di soiu pè una visione più umugeneizante è tandu sò accadute tensione impurtante, trà a cumunutà anglofuna è quella francofuna5 pè u più. Stanu à fi ancu duie tradizione federale maiò : una tradizione fatta si intornu à a nuzione di u federalisimu territuriale, chì pende versu u squassà di e diferenze etnoculturale incalchendu si nantu à pulitiche guvernamentale unifurmizante. L’altra tradizione, l’im-palca a nuzione di plurinaziunalità innalzata da i Chebeccani è e nazione amerindiane. Dunque u Canada hà lacatu da cantu una situazione favurevule à a rucunniscenza di l’entità autonume sfarenziate è hà stabilitu un cuntestu sempre menu attu ad accumudà a specifi cità chebeccana, è ne venenu e tensione chì opponenu spessu i partisgiani d’isse duie tradizione federale è po l’avanzate di u muvimentu naziunalistu chebeccanu.

3. Preston King, Federalism and Federation, Londra, Croom Helm, 1982.4. William Livingston, « A Note on the Nature of Federalism », Political Science Quarterly, vol. 67,

marzu 1952, p. 81-95.5. Da pisulà isse duie tradizione, si pò riferisce omu à i scritti di Marc Chevrier, Dimitrios Karmis

è Guy Laforest in Alain-G. Gagnon, dir., Le fédéralisme canadien contemporain, Monreale, Les Presses de l’Université de Montréal, 2006.


INTROITU

9

In quantu à a Spagna, ùn si pò dì ch’ella sia propiu una federazione. Si tratta piut-tostu di un « Statu di l’autunumie6 », spressione istituziunale oghje unica. Hè un’altra cosa da a parte di a cumpusizione suciale spagnola, chì a diversità suciale segna u paese per via ch’elle ci sò trè nazione storiche – a Catalogna, a Galizia è i Paesi baschi –, è po dinù parechje cumunutà chì ùn stanu tantu à rivendicà u statutu ch’elle si buscanu quesse custì. Issa diversità sucetale diviziosa porta à ricunnosce – è William Livingston a face pè i Stati Uniti – i tratti federali chì impalcanu u Statu di l’autunumie. In issu sensu custì, hè u federalisimu à move a Spagna, puru s’ellu ùn si tratta propiu di una federazione.

Cum’è a Spagna fundata à nantu à anziani regni, a Belgica, quand’ella hè stalvata a cunquista francese, si hè fatta di prima in modu lenu cun picculi Stati è po dopu si hè trasfurmata in regime unitariu7. Ci hè dinù chì u mudellu giacubinu impostu à a Belgica hà pisatu assai nantu à u modu di gestione di l’affari di u Statu. Hè certa dinù ch’ellu hà participatu à fà cresce a malfi denza manifestata da e cumunutà vallona è fi aminga pè a maiò parte di u 20u seculu. Per fà la compia, si hè messu in ballu un pianu largu di riforme custituziunale versu a fi ne di l’anni 1970, cù in senu mudifi che favurevule tutte quante à l’affi rmazione di una Belgica federale sempre di più8.

E sperienze federale, si vede, sò varie è diviziose è po ci amparanu assai. L’esempii belgicu, canadianu è spagnolu confermanu chì quelli chì t’anu u pudere ùn ci l’anu tantu cù a diversità sucetale ; dunque impreme ch’elle participessinu e cumunutà pulitiche à fà vene à palesu isse quistione9, un scopu primurosu s’elle volenu fà ricunnosce e so rivendicazione legitime indrentu à l’insemi pulitichi federati. Issu sforzu di messa à palesu si face in modu diversifi catu è segondu e dinamiche sputiche in e varie politès. À quandu saranu cumissione d’inchiesta, referendi, elezzione generale, à quandu si muveranu assemblee custituante cun fi ne di fà sveglie e cumunutà chì u pattu federativu hè statu fattu à prò soiu.

In senu à a Spagna cuntempuranea hà vintu hè pocu u referendu in quantu à u novu Statutu puliticu ed impreme ch’omu cunnosca u spiritu federale chì deve andà cun l’al-manaccà di istituzione atte à dà retta à a diversità è purtà sinu à accomudi cumunutarii campatoghji.

6. Issa appellazione, a pigliu in u libru publicatu cun direzzione di Francisco Campuzano Carvajal, Les Nationalismes en Espagne. De l’État libéral à l’État des autonomies (1876-1978), Monpellieri, Publications Montpellier 3, 2001.

7. André Leton è André Miroir, « De la nation belge à la Belgique des naziunalités » in Les confl its communautaires en Belgique, Parigi, Les Presses Universitaires de France, 1999, p. 7-71.

8. Michel Leroy, De la Belgique unitaire à l’État fédéral, Brussele, Bruylant, 1996.9. Per quessa accennemu à i travagliu di u fi losofu James Tully. Per indettu si pò fi ghjà: « Liberté et

dévoilement dans les sociétés Multinationales », Globe. Revue internationale d’études québécoises, vol. 2, no 2, 1999, p. 13-36.



10

FEDERALISIMU TERRITURIALE È FEDERALISIMU MULTINAZIUNALE

Si hè insignatu più insù ch’elli ci sò dui tipi di federazione è chì l’impalcanu pruspettive pulitiche spiccate. Da una parte e federazione dette territuriale pruponenu di trattà in listessu modu tutti i citadini di un datu paese è po da l’altra parte u federalisimu multinaziunale prevede misure ghjuste chì permettinu listesse pussibilità di spannà si ad ogni membru di ognuna di e cumunutà naziunale accolte in una stessa federazione. E federazione naziunale – si pensa à i Stati Uniti, l’Alemagna è l’Australia – spessu sò state in vista di pettu à i spezialisti di u federalisimu, ma fattu i conti, si vede chì e pulitiche guvernamentale anu chjappu in cunsiderazione pocu è micca i bisogni di e minurità etnoculturale è di e minurità naziunale (per indettu i Neri ind’è i Stati Uniti, i Turchi in Alemagna, l’autoctuni in Australia). Isse minurità si sò ritrove ind’è paesi chì prupunianu un’avanzata per tutti ma si limitavanu à dichjarazione pulitiche pusitive ma chì anu datu, ci vole à dì la, pocu fruttu. Si pò dì ch’elle anu portu bona cuscenza à i pulitichi ma prufi ttu veru ùn ci ne hè propiu statu pè i membri di isse cumunutà minuritarie.

L’anni 1990 è 2000 facenu chjassu pè una manera nova di gestisce a diversità naziunale, masimu chì i Stati Uniti si facenu più interessati da u federalisimu multina-ziunale. In i Stati naziunali caratterizati da una diversità naziunale diviziosa – per indettu Belgica, Canada, Spagna è Regnu Unitu – si rimette in quistione u mudellu americanu di u federalisimu territuriale chì hà supranatu una bella stonda. Spagna è Regnu Unitu ùn sò propiu federazione, ma sò Stati cumplessi per via di i so fundamenti suciali, è u federalisimu ci hà da sbuccà per necessità, à sente dì autori cum’è Livingston.

St’ultimi anni ind’è tutti issi Stati sò sbuttate mubilizazione pulitiche larghe assai. In Belgica si sò viste parechje riforme custituziunale, chì in menu di una generazione anu fattu mutà u paese da Statu unitariu à Statu federale. E scuzzulate di u Canada sò state ancu elle signifi cative chì ùn si hè pussutu sudisfà l’attori di u federalisimu multinaziu-nale in Chebeccu è a situazione hà cagiunatu dui referendi in quantu à a supranità di u Chebeccu. A Spagna hà riesciutu à fà la fi nita cù u so passatu tutalitariu, ma trica sempre ad accettà e formule asimetriche atte à dà capu à ciò ch’elle bramanu e varie cumunutà naziunale chì per altru li porghjenu u fundamentu di a so legitimità. È po ci hè u Regnu Unitu, un paese unitariu cum’è a Spagna, chì hà accettatu di ricunnosce à pocu à pocu e cumunutà naziunale à l’origine di u Statu è di mette in opera un’operazione maiò per decentralizà e cumpetenze10.

Isse mutazione anu cagiunatu tensione forte trà a cumunutà magiuritaria è e minurità naziunale. U successu di e riforme messe in ballu in maiò parte hè ligatu cù a capacità di u gruppu magiuritariu ad accettà chì i canali pulitichi ferminu aperti à i neguziati è à l’at-tualizazione di e dumande mosse da i varii attori. A ramenta u fi losofu James Tully :

10. John Loughlin, « Les Nationalismes britannique et français face aux défi s de l’européanisation et la mondialisation » in Alain-G. Gagnon, André Lecours et Geneviève Nootens, dir., Les Natio-nalismes majoritaires contemporains, Montréal, Québec Amérique, collection «Débats », 2007, p. 193-215.


INTROITU

11

A cundizione di libertà di una sucetà plurinaziunale posa nantu à u fattu chì i so membri sianu liberi di anticipà discussione è neguziazione in quantu à l’amendamenti pussibuli nantu à a struttura di ricunniscenza in usu è, inseme à quessa, chì l’altri membri avessinu un duvere di risponde à e dumande lecite. Un membru chì si vole fà ricunnosce cum’è nazione (in una forma ella stessa atta à u cuntrastu) hè liberu per quantu e pussibilità di discussione, neguziazione è amendamenti ùn si trovanu bluccate, in pratica, da custrizzione arbitrarie. A custituzione di una sucetà chì pate un blucchime simule deve esse cunsiderata una camisgia di forza o una struttura di duminazione. Issa situazione chì ci manca a libertà si pò illustrà, in Canada, o per mezu à u casu di u Chebeccu o per quellu di e Nazione primere11.

A transizione da u federalisimu territuriale à u federalisimu multinaziunale rapre-senta un passu qualitativu maiò pè e nazione minuritarie, per via chì quessu, u prugressu, rapresenta a più cundizione di libertà maiò in senu à i Stati di avale.

A CUNDIZIONE FEDERALE IND’È U CANADA È IN SPAGNA

I studii di Donald Smiley, unu trà i più spezialisti maiò di u federalisimu canadianu, anu permessu di suttulineà i vantaghji di u prugettu federale pè e sucetà demucratiche ma fendu vede chì u federalisimu ùn porghje ogni suluzione per qualsiasi prublema di raprisentazione. In u so libru The Federal Condition in Canada, Smiley scandalieghja e qualità federale essenziale da ch’ellu funziunessi bè u Statu canadianu. Spiccanu pare-chji aspetti da issa analisi è trà quessi a dualità canadiana chì stà in basa à u mudellu federativu, e relazione trà centru è periferia – per quantu palesanu i cunfl itti territuriali di natura ecunomica – è dinù l’autunumia reale di u guvernu centrale è di i Stati membri di a federazione in quantu à a capacità ch’elli t’anu di pisà nantu à u fi lu di a storia12. Longu à sta discussione emu da vede dinù cumu hè chì e sucetà liberale cumplesse si acconcianu cusì bè cù a via federale. L’argumentu maiò chì sarà prupostu hè ligatu cù u fattu chì u federalisimu mette in causa a cuncezzione munista13 chì piglia a suprana da ch’ella hè principiata l’epica di a mudernità.

Quattru chjassi di analisi si imponenu subitu s’omu intende capisce u federalisimu cum’ellu pò aiutà à gestisce i cunfl itti. Di prima, ci vole à adimette chì rispettà u principiu federale impone ch’elli ùn fussinu micca accatasti unu sopra à l’altru i puderi : l’ordini di guvernu ci buscanu una libertà di azzione maiò in l’azzione di a supranità scumpar-tuta. Dopu, ci vole à curà ch’ella ci sia l’autunumia di l’entità pulitiche, ma favurizendu l’iniziative ch’elle ponu piglià inseme per sviluppà lochi di barattu è di cullaburazione. Dopu dinù, è s’omu hà pussutu cuncretizà isse cundizione custì, si pò pensà chì trà l’at-tori pulitichi si hà da pudè tene più faciule, è ancu stringhje di più a fi ducia chì l’unisce.

11. James Tully, « Liberté et dévoilement dans les sociétés Multinationales », p. 30.12. Donald Smiley, The Federal Condition in Canada, Toronto, McGraw-Hill, 1987, p. 9.13. Si veca Dimitrios Karmis et Wayne Norman, « The Revival of Federalism in Normative Political

Theory » in Dimitrios Karmis et Wayne Norman, dir., Theories of Federalism: A Reader, New York, Palgrave Macmillan, 2005, p. 3-21.



12

Tandu si puderà anticipà qualchì iniziativa per avvicinà e cumunutà. Issi principii messi in pratica aiuteranu à fà nasce una lealtà federale, creendu e cundizione prime per fà ch’elle cullaburessinu e varie cumunutà è ch’ellu ci possa esse a sulidarità in i strati suciali è ad ogni livellu di u Statu.

Pierre Elliott Trudeau, primaministru federale canadianu da u 1968 à u 1979 è da u 1980 à u 1984, si era resu contu chì, cumu « a demucrazia hè in sè un valore è ch’ella ùn si pò sacrifi cà à cunsiderazione opportuniste, in listessa manera, in certi paesi è à certe epiche, u federalisimu affacca cum’è valore di fundalizia14. » È si hè pussuta verifi cà parechje volte, per indettu in quantu à a Spagna.

Lachemu corre tutta a storia di a Spagna è incalchemu solu l’epiche impurtante chì anu fattu cresce l’idea federale in a penisula iberica. Subitu à a metà di u 19u seculu si hè mossu qualcusella à favore di u federalisimu. A prima stonda hè di l’anni 1840, quandu chì a Spagna anticipava una riforma pulitica di estru liberale. Hè dinù tandu ch’elli anu scumbattutu inseme republicani è demucrati è aderitu à a formula liberale. Ispirata trà altri da Proudhon, Tocqueville è u fi losofu Krausista, u pensà federale in Spagna insi-gnava tandu dui elementi centrali : ch’ellu fussi ricunnisciutu u caratteru eterogeneu di u Statu spagnolu è decentralizatu u pudere15.

Per tuttu u 19u seculu u federalisimu hà rapresentatu un locu di uppusizione à e pulitiche centralizatrice chì purtavanu u liberalisimu spagnolu. Fora di u carlisimu16, a sola suluzione per rimpiazzà l’idee di centralizazione tandu era diventata u federa-lisimu. Issu federalisimu prupostu tandu si spiccava da u carlisimu in u sensu ch’ellu era arradicatu in e cità ed era di caratteru prugressistu à livellu suciale. Un’altra epica si distingue cù l’apportu di Francisco Pi Y Margall à a sparghjera di l’idee federaliste. Di fatti si vede chì issu Catalanu t’avia una bella cunniscenza di e custituzione federale americana, squizzera è alemana è po di l’infl uenza marcata di Proudhon. Pensemu à u so libru maestru Las Nacionalidades, publicatu in u 1877, duv’ellu spone trè idee maiò : 1. u principiu di l’autunumia pè l’affari interni di u Statu è u principiu di eterunumia per l’affari esterni ; 2. a supranità inalienevule di l’individui ; è 3. a sustituzione di a nuzione di l’accunsentu à quella di pudere17. Digià tandu Y Margall pensa quantu ellu hè centrale a quistione di u pattu trà i custituenti. Si face vede dinù prumutore di u prin-cipiu di l’unità in a diversità, chì hà da turnà formula usuale pè i federalisti. Cum’ellu

14. Pierre Elliott Trudeau, le fédéralisme et la société canadienne-française, Monreale, Hurtubise HMH, 1967 [1961], p. 158. Hè vera chì u so sugiornu longu à u cumandu guvernamentale à volte hè statu prublematicu in quantu à u rispettu di i diritti di e nazione amerindiane o di a nazione chebeccana, ma quantunque hà messu a so parte à sensibilizà a classa pulitica in quantu à e pussibilità di u federalisimu da principiu di fundamentu pè a gestione di i cunfl itti.

15. Si veca Gurmensindo Trujillo, Introduccion al federalismo espanol: Ideologica y formas consti-tucionales, Madrid, Editorial Cuadernos para el Dialogu, 1967, p. 136-137.

16. Cù carlisimu vulemu parlà di a vuluntà di rimette in sella l’Anzianu regime è l’autunumia di e regione basche è di Navarra.

17. Gurmensindo Trujillo, Introduccion al federalismo espanol, p. 127, è dinù Isidre Molas, Ideario de Francisco Pi Y Margall, Madrid, Ediciones Peninsula, 1966, p. 21-24.


INTROITU

13

a nota Isidre Molas18, Y Margall incalca u fattu chì l’unità pulitica di a Spagna pè una bella parte dipende da a so unità ecunomica, puru s’ellu accunsente cù a Spagna cum’è patria cumuna. Pi Y Margall mette dinù in avanti l’idea ch’ellu ci vole à fà la fi nita cun quellu principiu unitariu in Spagna, postu chì pensa ellu – ed hè propiu quì ch’ellu t’hà una teuria uriginale – chì hè issu principiu à mette in periculu u paese. Pensa ellu chì l’unità di a Spagna dipende da l’accunsentu, u rispettu è a prumuzione di e diferenze fundamentale chì sò sputiche soie. À l’epica eranu idee rivuluziunarie assai è fermanu cusì oghje chì ghjè oghje.

Puru s’elle strazieghjanu à durà cù u tempu chì passa, l’idee federaliste ed autu-numiste ripiglianu forza è sbuccia in Spagna da l’anni 193019 a nuzione di federalisimu integrale. U federalisimu integrale di a prima metà di l’anni 1930, u caratterizeghja di più a so vuluntà di decentralizà chè di apre si à e specifi cità regiunale : hè per quessa ch’ellu piccia pocu in e regione catalana, galiziana è basca, chì quesse ci vedenu pocu fruttu pè singhjune e cumunutà. Sottu à issu federalisimu integrale ci hè l’idea d’inghjotte si in modu demucraticu e nazione storiche, di lacà corre i diritti furagni per fundà una Spagna muderna, prugressista, integratrice è aperta à tutte e diversità (è trà quesse i particulari-simi regiunali). Cù u novu Statu spagnolu integrale si scontranu naziunalisti periferichi di urientazione pluralista è republicani spagnoli di urientazione unitarista.

U Statu di l’autunumie di u 1978 sfi da in listessa manera l’attori pulitichi : ma cumu fà stà inseme da una banda e persone chì volenu di prima ch’ella fussi stabilita una citadinanza universalizante è chì ricunniscessi dritti pari per tutti, – puru s’è a capacità di fà li rispettà in modu ghjustu è paru cambia assai segondu s’omu hè di a nazione titulare spagnola o micca – è da l’altra banda, e persone native di e regione storiche è chì volenu aderisce à u Statu nazione per mezu d’issa identità cumunutaria ?

Oghje chì ghjè oghje hè sempre quessa a sfi da ch’ellu deve affruntà u Statu di l’autunumie, postu chì l’alzà di i naziunalisimi minuritarii in Spagna, ind’è u Canada, in u Regnu Unitu è aldilà, vole dì ch’ellu hè incapace u Statu naziunale à inghjennà l’adesione di tutti i citadini à un prugettu cumunu attu à accumudà a diversità in senu à i Stati federali è i Stati in via di federalizazione. Cun stu libru quì si vole sopra à tuttu mette in lume issa realità custì.

PRISENTAZIONE DI I CAPITULI

Trè poli principali danu a struttura à sta publicazione : i fundali, l’argumenti nurmativi è i valori chì ci si arremba è ci si nutrisce a vuluntà federale ; e metamorfosi chì caratterizeghjanu a cundizione federale in cuntestu multinaziunale ; u spuntà di a multinazione cum’è suluzione più bona pè i paesi chì i segna a diversità naziunale.

18. Isidre Molas, Ideario de Francisco Pi Y Margall, p. 144-153.19. José Luis Cascajo Castro, « Notas sobre el ordenamiento constitucional de a Segunda Republica:

a distribucion de competencias en el estado integral », Revista Vasca de Administracion Publica, no 36, 1993, p. 17-20. Sò cuntrarii i parè in quantu à e caratteristiche reale d’issu federalisimu integrale ; da scavà più prufondu, si pò vede in st’autori quì : F. Thomas Y Valiente, P. Gonzalez Casanova, Sanchez Albornoz, M.B. Garcia Alvarez et Fernandez Sesgado.



14

In u primu capitulu, vultemu à nantu à cum’ella entre a mimoria in a custruzzione di e nazione muderne, scandaliendu à penuccia l’identità catalana è chebeccana. Si sà chì a Catalogna è u Canada sò crisciuti in cuntesti pulitichi è storichi diferenti, ma sò stati tremindui sposti à l’idee federale è di quesse spessu ne anu fattu a prumuzione. Issa andatura purghjerà materiali di primura per l’analisi chì ci hà da permette di intruduce u cuntestu duv’ella si trova ognuna di isse nazione.

In u capitulu dui, discutimu a quistione federale in quantu à i valori nurmativi è stabilimu chì u federalisimu asimetricu permette di dà forza à l’eserciziu demucraticu chì face una distribuzione rinnuvata di i puderi, incuragisce a participazione di i citadini, porghje una legitimità maiò à u sistema puliticu è cuntribuisce à accumudà e nazione minuritarie indrentu à l’istituzione. Cusì, arradicà u federalisimu cuntribuisce à fà più fi ne u liberalisimu di prucedura mettendu in lume quant’elle portanu e cumunutà, senza ammintà solu i citadini.

In u terzu capitulu, dopu fattu u custattu ch’ellu cresce u fenomenu di a multinazione in parechji paesi di demucrazia liberale avanzata, spiichemu cumu u campu di l’idee si hè spartu in duie idee chì si intuppanu. A tendenza maiò caratteristica d’issi paesi hè stata di mette in ballu e pulitiche publiche senza fi ghjulà a diversità suciale è vulendu le per altru gestisce in modu unifurmizatu per tutti l’individui. Daretu à issu trattamentu paru spuntanu l’inghjustizie grave postu chì i membri di e varie cumunutà naziunale ùn anu listessu accessu à u pudere nè listesse pussibilità di avanzà in a sucetà. Per capì megliu i dibattiti di oghje prupunimu un’analisi di u prugettu puliticu di natura pruceduralista di Pierre Elliott Trudeau è di a so contraparte fi lusofi ca di natura cumunarista avanzata da Charles Taylor. Cunfruntatu à u fenomenu emergente di a multinazione in parechji Stati cuntempuranei, l’argumentariu di Taylor si vede cum’è quellu chì ti hà a capacità più maiò d’accomudu pè e minurità naziunale chì sò indrentu à Stati di demucrazia liberale avanzata.

In u quartu capitulu prupunimu di dà una vita nova à u federalisimu di cuncer-tazione in modu chì i portaparolla di e varie cumunutà naziunale pudessinu stabilisce raporti ghjusti è pari cun l’auturità pulitiche ligate cù u pudere centrale. Prupone dinù stu capitulu l’analisi di cum’ellu hè andatu u federalisimu canadianu da a fundazione di u paese in u 1867, tira e lezziò di i varii episodii chì anu purtatu à pruduce tensione forte trà Chebeccu è Canada durante i scorsi 130 anni. Cum’ellu ùn si pò mette in opera à cortu andà un federalisimu multinaziunale chì permettissi di cuntrà si cun ciò ch’elli aspettanu i Chebeccani in a federazione canadiana, è dinù di sminuisce a crisa custituziu-nale chì pare ch’ella ùn vulessi stancià, prupunimu di incuragisce e relazione bilaterale trà Chebeccu è guvernu centrale per mezu di u federalisimu di cuncertazione. À parè nostru permetteria di apre vie di cumunicazione trà e duie più impurtante cumunutà pulitiche di u Canada.

In u quintu capitulu dimu cumu l’alzà di u naziunalisimu canadianu hà impuveritu direttamente l’idee federale in u paese da una parte, è po dinù cum’ellu hà favuritu una mubilizazione di a nazione chebeccana in giru à u Statu di Chebeccu cum’è mai ùn si ne era vistu. Da capisce bè issa dinamica, scandaliemu più à fondu trè campi di pulitica


INTROITU

publica : l’impiantu di l’unione suciale canadiana, e relazione internaziunale è l’impu-sizione di a Carta canadiana di i diritti è libertà da u 1982.

In u sestu capitulu si face un sforzu teoricu per pudè stimà propiu ciò ch’ella hè a lascita chì infl uenza a manera chì a classa pulitica pensa e relazione di pudere è spessu l’impedisce di vede per sopra à e strategie à cortu andà messe in avanti. Fighjulemu trè insemi chì anu u so bellu pesu in quantu à a gestione di i cunfl itti cumunutarii. Unu à pressu à l’altru l’idee di John Rawls, di Daniel Elazar è di Ernest Renan sò sposte è si ne caccia lezziò da applicà in l’esempiu canadianu è dinù i paesi europei è, di prima, a Spagna. L’arradicà di u federalisimu multinaziunale pè issi paesi, l’adupremu cum’è quella via chì prumette assai in quantu à a ricunciliazione di e cumunutà naziunale indrentu à insemi più larghi.

In cunclusione si mette in lume quant’ellu hè urgente di agisce è di pensà a multi-nazione, da chì a ghjente di oghje avessinu l’arnesi adatti per risponde à quella sfi da maiò di a nostra epica : ricunnosce e cumunutà minuritarie naziunale indrentu à insemi pulitichi ampii. Vole si dì chì i Stati di oghje devenu pudè pisulà a diversità chì hè sputica soia è vulè turnà innuvatori in quantu à l’istituzione, in modu chì quesse aiutessinu à rializà in tuttu i prugetti cullettivi porti demucraticamente da e cumunutà naziunale, è saria un bellu affollu per assigurà l’azzione quant’elle sò legitime è per stringhje i legami trà e cumunutà.


Documents

Gagnon