Kontrollutvalet i Hareid

Hadartun - RAPPORT FRÅ ORIENTERINGSBESØK 18.10.2016

1

Innhald

INNLEIING ......................................................................................................................................... 2

MÅLSETTING .................................................................................................................................... 3

GJENNOMFØRING .......................................................................................................................... 3

OM SEKTOR FOR VELFERD ........................................................................................................ 4

OM HADARTUN ................................................................................................................................ 5

SOMATISK EINING - korttids-og buavdeling ............................................................................... 7

Korttidsavdelinga ........................................................................................................................... 7

Sjukeheimslegen ........................................................................................................................... 8

Buavdelinga ................................................................................................................................... 9

SKJERMA EINING .......................................................................................................................... 10

HEIMETENESTE ............................................................................................................................ 11

KJØKKENET .................................................................................................................................... 12

UTEOMRÅDE .................................................................................................................................. 12

ANNA ................................................................................................................................................ 13

Skilting .......................................................................................................................................... 13

Brannvern ..................................................................................................................................... 13

Bygg/vedlikehald ......................................................................................................................... 13

Luftkvalitet/ventilasjon/romtemperatur ..................................................................................... 14

Orden og reinhald ....................................................................................................................... 14

Vaktmeisterteneste ..................................................................................................................... 14

SLUTTKOMMENTAR ..................................................................................................................... 14

2

INNLEIING

Lov om kommuner og fylkeskommuner (kommunelova) regulerer mellom anna tilsyn, kontroll og revisjon i kommunene. Etter kommunelova har kommunestyret det øverste tilsynet med den kommunale forvaltninga. Kommunestyret vél kontrollutval, som på vegner av kommunestyret har det løpande tilsynet med den kommunale forvaltninga. Dette er hovudoppgåva til kontrollutvalet. Forskrift om kontrollutval (fastsett av Kommunal og regionaldepartementet) presiserer kontrollutvalet sitt virke.

Kontrollutvalet nyttar primært kommunerevisjonen til å utføre prioriterte kontrollhandlingar, men kan i tillegg utøve sjølvstendige tilsynsfunksjonar. Dette kan vere orienteringsbesøk hos tenesteprodusentane i kommunen.

Kontrollutvalet vil understreke at orienteringsbesøket ikkje er å sjå som eit tilsyn då ein ikkje har fagkompetanse på dei områda som er omtala i rapporten. Rapporten omtalar det utvalet har registrert på sitt besøk, - gjennom orientering av kommunalsjef og rådgivar i sektor for velferd, samt ved sjølvsyn og samtale einingsleiarane under omvisninga på Hadartun. Åram 18.01.2017 Jostein Støylen Sigrid Aa. Torbjørnson Dagleg leiar Konsulent

3

MÅLSETTING

Føremålet med orienteringsbesøk er at kontrollutvalet skal få oversikt og kjennskap til det kommunen forvaltar, og som kontrollutvalet skal føre tilsyn med. Dette vil gi kontrollutvalet betre grunnlag for å vurdere om drifta skjer i samsvar med gjeldande reglar, vedtak og intensjonar.

GJENNOMFØRING

Orienteringsbesøket var gjennomført 18. oktober 2016, og følgjande personar var tilstade:

Hareid kommune Berit Aasen, kommunalsjef sektor for velferd Oddrun Alme Mork, rådgivar Hadartun Monica Småge Skeide, leiar korttids- og bueining Nina Ulstein, leiar skjerma eining Christina Aasen-Helvig, leiar heimetenestene Hareid kontrollutval Jarl Helmut Schröder, leiar Berte Holstad Engen, medlem

Kjartan Grimstad, medlem Inga Ishild Hareide, medlem

Vest kontroll (sekretariat) Sigrid Aa. Torbjørnson, konsulent

Orienteringsbesøket starta ved at leiar i kontrollutvalet Jarl Schröder presenterte og orienterte om kontrollutvalet, og kvifor ein ynskjer eit orienteringsbesøk ved Hadartun. Deretter presenterte kommunalsjef Berit Aasen seg, orienterte om sektor for velferd og svara på spørsmål frå kontrollutvalet. Rådgivar Oddrun Alme Mork tok del i orienteringa. Etter orienteringa var det omvisning på Hadartun med tilhøyrande uteområde, der kontrollutvalet fekk orientering frå einingsleiarane. Kontrollutvalet var ikkje innom kjøkkenet, omsorgsbustadane eller dagsenteret. Ein har likevel tatt med informasjon ein fekk om kjøkkenet og omsorgsbustadane.

4

OM SEKTOR FOR VELFERD

Berit Aasen er kommunalsjef for sektor for velferd. Ho opna orienteringsmøtet med å gi kontrollutvalet ei generell orientering om sektor for velferd. Sektor for velferd femnar om desse einingane:

o Somatisk eining (korttids- og buavdeling) o Skjerma eining o Kjøkken o Heimeteneste o Bu og habiliteringstenesta

o Helse og koordinerande stabsstøttefunksjon o Kommuneoverlege

Dei sentrale satsingsområda er etter NoU Omsorg 2020, - regjeringa sin plan for omsorgsfeltet 2015-2020 som omfattar prioriterte område med tiltak for å styrke kvalitet og kompetanse innanfor omsorgstenestene. Kommunalsjefen orienterte om kva Hareid har gjort for å «rigge for framtida». Det er viktig å sørge for at ressursar er på plass. Ho er oppteken av at ein må tenke heilheitleg i samfunnet. Det born ikkje får av tilbod i barnehage/skule kan ein «få i fanget» når dei er 17-18 år med oppfølging og psykiatristøtte som t.d. psykiatrisk sjukepleiar. Rettigheitsfesta rett til hjelp i heimen har styrka seg. Neste generasjon sine åttiåringar vil ikkje vere som åttiåringar av i dag, og det vil kanskje gi andre utfordringar. Kommunalsjefen skisserte nokre utfordringar i høve «yngrebølgja» kontra «eldrebølgja». Denne gir andre og større utfordringar. Utvikling innanfor medisin gir fleire pasientar, og ei ser ei utvikling med auke innanfor psykiatri og rus. Dette kjem inn under bu og rehabilitering (heimetenester). Samstundes sét andre kulturar aukande krav til kompetanse. Ein fekk óg ei kort orientering om korleis ulik velferdsteknologi virkar, og korleis dette kan vere eit hjelpemiddel og gi tryggleik. Ei utfordring er at nokre område i kommunen er utan dekning, og at det kan føre til at folk må flytte mot sentrum. Noko ein har hatt fokus på er uønska deltid, og ein har arbeidd med forhandlingsturnus. Ei kartlegging av turnusar/uønska deltid til den einskilde, førte til at ein del fekk auka stillingane sine slik det berre er nokre få att som går på uønska deltid. Forhandlingsturnus innebér at dei tilsette kan påvirke eigen turnus, og samstundes sikrar ein kompetanse heile døgnet. Dette ser óg att på redusert overtidsbetaling. Størst gevinst har dette gitt innanfor bu og habiliteringseininga.

5

Kompetanseheving er viktig, og ein har fått fagutviklingsdag inn i turnus. Dette vil seie at for sjukeheim og heimetenester er det sju fagutviklingsdagar i året, og fire for kjøkkenet. Ved å nytte fagutviklingsdag får ein auka kompetansen til fleire då ein har den på Hadartun. Ein får ikkje ekstra ressursar til dette, så i tillegg til å «plukke litt tid her og der» på nokre av vaktene for å få til ein full fagdag, så må dei tilsette på ei avdeling hjelpe kollegaene på den avdelinga som skal ha fagdag ved å ta vaktene for dei. Dette er avgjerande for å få det til. Det gir det ho kallar «fagdageffekten»,- ein ekstra gevinst ved at ein i tillegg til auka kompetanse, får auka samarbeid og forståing for kvarandre på tvers av avdelingane. I tillegg sikrar det at alle får informasjon samstundes. Rådgivar Oddrun Alme Mork orienterte om ulike elektroniske system ein nyttar i kommuneorganisasjonen, og korleis desse fungerer opp mot kvarandre. Til dømes skal ein spare manuelt arbeid innanfor fakturering ved at dette vert lagt inn i systemet Gerica (som er eit pasientjournalsystem til bruk i kommunal helse- og omsorg), som «snakkar» med Agresso (økonomisystem). Hadartun nyttar Compilo (tidlegare Kvalitetslosen). Det er eit elektronisk kvalitetsystem der ein har samla alle rutiner og prosedyrer med m.a. oppdaterte retningsliner, planar, lover og føreskrifter. Ikkje minst vert uønska hendingar registrerte i det elektroniske avvikssystemet her. Avvik som blir registrerte, dannar grunnlag for kvalitetsforbetringar m.a. innanfor tenesteproduksjon og HMS-arbeid. Kontrollutvalet tok opp at det har fått tilbakemeldingar om at pårørande finn det det er vanskeleg å nå leiinga pr. telefon. Dette vart forklart med at det ligg i det systemet ein nyttar på rådhuset, at kalenderen stenger for innkomande samtalar. Dette er det gitt beskjed om, og ein håpar at det vert gjort noko med så snart som råd.

OM HADARTUN

• Sjukeheimen, kvileheimen og skjerma avd./ bukoll., vart oppført i 1959

• Sjukeheimen, somatisk avd. vart oppført i 1977

• Hadartun vart oppført i 1992

• Sjukeheimen/ nybygg vart oppført i 2001/ 2002

Ved Hadartun vert ein møtt med eit koseleg og innbydande inngangsparti.

6

Hadartun husar Hareid sjukeheim, heimetenesta, omsorgsbustader, dagsenter samt eit eldresenter og varmtvassbasseng som er drive m.a. av Saniteten.

Under sektor for velferd ligg dagsenter-tibodet. Der er eit dagsenter for eldre heimebuande som ligg rett innanfor hovudinngangen i 3.etasje på Hadartun. Dagsenter for psykiatri ligg i bustaddelen som ligg i 1. etasje.

Saniteten driv det ein kallar eldresenteret, som er eit stort lokale til høgre ved hovudinngangen. Det vert mellom anna nytta til møte i Eldrelaget og til eldretreff. Elles vert det nytta til selskap, minnestunder og liknande. Det er Saniteten som ordnar med utleige.

Midt i 3.etasje ligg vinterhagen, som er Hadartun si storstove. Denne dagen var det seniordans i vinterhagen.

For nokre år sidan vart vinterhagen oppgradert som eit resultat av ein stor pengesum dei tilsette ved Ekornes Hareid ga i julegåve til Hadartun. Desse vart nytta til vinterhagen og dagsenteret.

I tillegg til pengegåva, fekk ein åtte sofaer og ti Stressless-stolar som Ekornes har nytta i utstillingar. For at møblane skal vere betre tilpassa dei eldre er dei heva fem centimeter.

Ved Hadartun har dei eldre eigen frisørsalong som ligg i 3. etasje.

7

Sjukeheimen på Hadartun har to einingar: somatisk (korttids- og bueining) og skjerma eining.

SOMATISK EINING - korttids-og buavdeling

Hareid sjukeheim har ei somatisk eining som ligg i 3.etasje på Hadartun. Her er det 31 plassar fordelt på ei korttidsavdeling og ei buavdeling, og ein ØHD-plass (øyeblikkeleg hjelp). Somatisk eining har tilsaman ca. 26 årsverk. Når kontrollutvalet var der på besøk, var det er lite pasientar/bebuarar å sjå då mange var så sjuke at dei var sengeliggjande. Gjennomsnittsalderen på korttids-og bueininga er 93 år.

Einingsleiar Monica Småge Skeide viste kontrollutvalet rundt i somatisk eining som ligg i 3. etasje på Hadartun.

Korttidsavdelinga

Dette er ei avdeling som gir eit tidsavgrensa døgnkontinuerleg pleie- og omsorgstilbod til pasientar som har mellombels behov for vurdering/rehabilitering etter sjukdom og skader. Denne avdelinga har totalt 15 plassar. Stadig aukande behov for sjukeheimsplass, gjer at ein har for lite rom i denne avdelinga. Korttidsavdelinga er delt i to med eigne fellesstover/matsalar.

I nybygget la ein vaktromet inn i arealet til fellesstova/matsalen

medan ein på den andre delen(som ligg i den eldre delen av

bygget) har separat vaktrom

utanfor fellesstove/matsal.

8

Ein har sett opp skjermar ute i avdelinga for å følge med på informasjon om ferdigbehandla pasientar får helseføretaka.

Informasjonen er anonymisert. Dette er for å spare tid slik ein slepp å gå til vaktromet og logge på.

Ved kortidsavdelinga har ein stort fokus på rehabilitering.

I gangarealet mellom korttids og

buavdelinga står det treningsutstyr

ein nyttar til rehabilitering.

Eit uteareale med gangstiar som kunne nyttast til dette er sakna. Hadartun ligg i ei skråning, og har ikkje uteareal som er veleigna til korkje til rehabilitering og/eller rekreasjon.

Sjukeheimslegen har kontor i denne delen av Hadartun.

Stilling som sjukeheimslege (50%) er kombinert med stillinga som kommuneoverlege (50%). Sjukeheimen får stadig dårlegare pasientar, og tilkalling på kveldstid og i helgar har auka. Det at legen i stor grad har vore tilgjengeleg, har vore gunstig for kontinuitet og har avverga unødige sjukehusinnleggingar. Korttidsavdelinga har eit såkalla ØHD-rom som står klart til disposisjon for lege til både somatisk og psykiatrisk øyeblikkeleg hjelp. ØHD står for omgåande hjelp døgnopphald, og er eit tilbod som kom i 2012. Dette er eit rom som legen disponerar til pasientar som er for sjuke til korttidsavdelinga, men er for friske til sjukehus. Innlegging her skal avgjerast av lege, kan vare opptil tre døgn og er gratis. Det blir opplevd svært nyttig å ha tilgang på slike plassar,- særskilt for eldre med kognitiv svikt. Desse vert ofte svært dårlege av å bli lagt inn på sjukehus der pårørande kanskje ikkje er like tilgjengeleg samt at dei må dele rom med andre. ØHD-romet er mykje i bruk.

9

Buavdelinga

Denne avdelinga gir eit døgnkontinuerleg pleie- og omsorgstilbod, som ikkje er tidsavgrensa. Her bur dei som har fått langtidsopphald på institusjon då dei ikkje lenger kan bu i eigen heim. Tilsaman er det 17 plassar på buavdelinga. Buavdelinga har ein sett seg nøydd til å dele i to då mange av pasientane/bebuarane er demente eller har annan kognitiv svikt. Det kan sjå ut til at dette kan verte ei spesialavdeling for demente. Frå fellesgang buavdelinga i somatisk eining.

Matsal/fellesstove i buavdelinga der vaktromet ligg integrert i fellesstova/matsalen.

I gangen på Hadartun er der eit «sanseområde» med stileben av dukar, vaskeutstyr, klerulle, symaskin, rokk, skrivemaskin og liknande.

10

SKJERMA EINING

Skjerma eining ligg i 2. etasje ved Hadartun, og har 17 plassar. Alle har eige rom. Målgruppa er personar som vert vurdert til å ha behov for å bu ei mindre eining. Denne eininga har eit vedtak for vern som gjer at denne eininga er låst.

Kontrollutvalet var ikkje på omvisning i denne eininga av omsyn til bebuarane, men fekk sjå eit rom med tilhøyrande bad.

Skjerma eining er lagt til rette for personar med ei demensdiagnose som treng mykje tilrettelegging. Ofte er dette pga. at desse har redusert forståing av sosiale normer. Dette sét krav til god kompetanse og personlege eigenskapar hos personalet. Personalet har opparbeidd seg god kompetanse til å handtere pasientar og utfordrande situasjonar som kan oppstå på ein god måte. Det er ca. 13,47 årsverk ved skjerma eining. Mange av personalet har tatt vidareutdanning innan miljøterapi i demensomsorga, og dette er noko ein ynskjer å ha fokus på. Ved hjelp av demensmidlar har personalet pussa opp ei stue som dagleg mellom anna er nytta til andakt, song- og lesestund og til besøk av pårørande.

I stova innanfor den planlagde sansehagen har ein planar om å lage til som ei vinterstove. Einingsleiar Nina Ulstein (t.h.) orienterte og svara på spørsmål. Sansehage er planlagt for den skjerma avdelinga i kropet mellom dei to fløyane lengst aust i Hadartun-komplekset. Området ligg omkransa av veggar slik til at der kanskje vert litt lite sol? Utemøblar er på plass, og er dels demensmidlar og gåve frå Revmatikerforeninga.

No er det støypt betongplate og to krukker med Hortensia, men det er planar om å plante bærbuskar og frukttre slik bebuarane kan plukke bær og frukt, i tillegg til frodige blomsterbed. Ein ser fram til at sansehagen står ferdig.

11

HEIMETENESTE

Heimetenestene har lokalitet i 2. etasje på Hadartun. Under heimetenestene ligg tenesteyting som heimesjukepleie, heimehjelp, brukarstyrt personleg assistent og omsorgsbustader på Hadartun. Talet på pasientar som mottek hjelp frå heimesjukepleia har auka, og vil vere stadig aukande i åra som kjem. Pasientane har ulike behov, og omfattar både somatisk og psykisk i tillegg til rusproblematikk. I dei seinare åra har det vorte fleire yngre brukarar, og desse har ofte eit langvarig behov pga. kronisk sjukdom/skade. Og blant dei eldre ser ein óg ei endring i sjukdomsbildet som er meir komplekst og samansett. Dette gir eit behov for døgnkontinuerlig fagkompetanse. Personalet ved heimetenestene har opparbeidd seg god fagleg kompetanse slik dei kan møte dei fleste utfordringane. I tillegg har heimetenestene har eit tett samarbeid med dei andre einingane i velferd. For å betre kvalitetssikringa har ein tatt i bruk Gerica Mobil pleie i heimetenestene. Heimetenesta administrerer 35 omsorgsbustadar ved Hadartun til personar som på grunn av funksjonshemming, sjukdom/skade eller alder treng ein tilrettelagt bustad. Her vert det vert ytt omsorgteneste etter same regelverk som ordinær heimebasert omsorg. Kvart husvere er på ca. 54m2 med soverom, bad og opa løysing mellom stove og kjøkken. Alle bustadane har brannvarslings- og sprinkleranlegg. Kontrollutvalet var ikkje innom desse bustadane. Heimetenesta har ca. 24 årsverk. Ein har seks døgnvaktheimetenester som pt.t ligg på omkring 10-15 oppdrag kvar. Nattestid er det kun ei vakt på. Denne kan om naudsynt knyte seg på dei fire nattevaktene som er på Hadartun. Arbeidsmiljøet kan vere krevjande for dei tilsette, både det fysiske og psykososiale, i ein stressande kvardag der ein arbeider mykje åleine. Difor er det viktig med rettleiing og faglig oppfølging.

Christina Aasen-Helvig er einingsleiar for heimetenestene. Ho orienterte om heimetenestene samt svara på spørsmål frå kontrollutvalet.

12

KJØKKENET Det ligg i 3.etasje ved inngangen til Hadartun. Kontrollutvalet var ikkje innom kjøkkenet, men fekk orientering av kommunalsjefen. Ved neste orienteringsbesøk, vil kontrollutvalet gjerne innom denne eininga. Kjøkkenet er felles for alle einingane i velferd, og har ein viktig funksjon. Sidan kjøkkenet har særeigne krav og forskrifter, samt løpande logistikk og innkjøp som skil seg vesentleg frå tenestene i dei fem øvrige einingane i sektoren, er det naturleg at kjøkkensjefen har ansvar for kvalitet, budsjett, rekneskap og innkjøp, samt personalforvaltning. Det er i overkant av 4 årsverk ved kjøkkenet. Kommunalsjefen ser kjøkkenet som ei viktig eining i sektor for velferd der kjøkkensjef Ann Cecilie Garnes Utgård er med i leiargruppa. Ved Hadartun har ein har fokus på måltida. Det er høgdepunktet på dagen, og då er det viktig med fokus på at maten smakar godt og vert servert slik den vekkjer appetitten. Kjøkkenet lagar tradisjonell sesongbasert husmannskost som bebuarane er vande med. Ikkje minst er det viktig med ei god ramme rundt måltidet. Dei som bur i omsorgsbustadar har høve til å kjøpe middag, og ha måltida i matsalen. Ein bringer óg ut middag til heimebuande som har vanskar for å lage middag. Det planlagt omlegging av rutinar og turnus for å kunne servere middag kl. 15. Ein har hatt eit prøveprosjekt på Skjerma eining, der ein har sett at dette gjer at brukarane vert rolegare på kveld og natt. Etter kvart vil ein få alle einingane inn på same tidspunktet. Elles kan nemnast at kjøkkenet driv catering til kommunale møter og arrangement i det omfang som kjøkkenet til kvar tid har høve til ut frå ressursane.

UTEOMRÅDE

Hadartun ligg i eit skrånande terreng. Dette gjer at her er mykje bakkar. Institusjonen har ikkje uteareal som er veleigna til små spaserturar, og skal ein ut med rullestol vert det ofte tungt.

Uteområdet ber preg av asfalt, skrånande plenar og «offentleg samanplanting».

Forutan kråa ved inngangspartiet er der ikkje laga til noko område for rekreasjon. Nokre avdelingar har ein veranda å gå ut på, men der er ingen

hage eller park ein kan gå turar i, setje seg ut i eller nyte utsikta mot.

13

ANNA

Skilting

Det er ikkje særskilt god skilting til og ved Hadartun. Utvendig og innvendig skilting var mangelfull og til dels heilt fråverande eller vanskeleg å få auge på. Oversiktskartet over Hadartun får ein auge på etter ein har

funne fram..sidan det er så tildekka kan ein ikkje danne seg så

god oversikt heller.

Dette skiltet burde vore flytta slik det er lett synleg ved til

nederste parkeringsplass. I tillegg burde det vore skilting til

Hadartun frå hovudvegen.

Eit oversiktskart ved inngangane samt skilting i gangane hadde vore ynskjeleg for lettare å kunne orientere seg og finne fram.

Det er skilta med etasje, men ikkje kvar ein er eller kva retning ein skal gå for å kome seg dit ein skal.

Brannvern

Hadartun har sin eigen brannplan med varslings- og evakueringsrutiner. Denne er tilgjengeleg i perm ved kvar avdeling.

Einingsleiarar er pålagt å gi opplæring i brannplanen til alle nytilsette og vikarar, samt å gå gjennom rutinane ved brann med alle tilsette kvart halvår.

I dei ulike avdelingane finn ein brannalarmstasjon med orienteringsplan, oversikt over rømingsveg samt slukkeapparat.

Institusjonen gjennomfører øvingar kvart år – haust og vår.

Bygg/vedlikehald

Ein kan sjå at det kan vere nødvendig å oppgradere nokre bad til dagens standard.

Kontrollutvalet får opplyst at det har vore gjort ei vurdering av taket på sjukeheimen som konkluderere med at det berre er eit tidsspørsmål før det må skiftast. Takbelegget til gamledelen av sjukeheimen er så dårleg at det vert vanskeleg å tette ved lekkasjar.

Likeeins har Mattilsynet kome med nokre pålegg om utbetring/oppgradering på kjøkkenet.

Etter det kontrollutvalet såg, får ein inntrykk av at der er eit greit vedlikehald ved institusjonen.

14

Luftkvalitet/ventilasjon/romtemperatur

I delar av buavdelinga er det ikkje godt inneklima. Dette skuldast at dette arealet ikkje er tilkobla ventilasjonsanlegget. Dette bør utbetrast for å sikre betre inneklima.

Ventilasjonsanlegget skulle utbetrast for nokre år sidan, men står framleis på vent.

Kontrollutvalet fekk ingen tilbakemeldingar om manglar ved ventilasjon/luftkvalitet utover dette.

Orden og reinhald

Etter det kontrollutvalet kunne sjå var det god orden og godt reinhald ved alle avdelingane.

Vaktmeisterteneste

Får vaktmeistertenester frå eigedomseininga.

Det er pålegg om sertifisering av alle medisinske varer ein gong i året. I samarbeid med eigedomseininga ynskjer ein å få driftsteknikar med kompetanse i velferdsteknologi til å ta det elektromedisinske tilsynet og føre kontroll med alt medisinsk utstyr som surstoffapparat, heiser, senger, stolar osb. I tillegg til å bistå ergoterapeuten på heimen.

SLUTTKOMMENTAR

Ein ser fram til at sansehagen står ferdig. Sansehagen har vore på agendaen i mange

år, og ein ser fram til at den står ferdig. Kontrollutvalet vil gjerne verte inviterte på synfaring når sansehagen står ferdig. Likeeins kan ein sjå at uteområde generelt ikkje er eigna då det ligg i skrånande terreng slik at ein hage/park for alle brukarane av sjukeheimen kan vere ynskjeleg – både til rekreasjon og rehabilitering.

Kontrollutvalet har fått tilbakemeldingar om at pårørande finn det det er vanskeleg å nå leiinga pr telefon. Dette vart forklart med at det ligg i det systemet ein nyttar på rådhuset som gjer at kalenderen stenger for innkomande samtalar. Dette er det gitt beskjed om, og ein håpar at dette vert gjort noko med så snart som råd.

Skilting til og ved Hadartun kunne vore betre.

Etter det kontrollutvalet såg, får ein inntrykk av at der er eit greit vedlikehald ved institusjonen. Men slik ein forstår det er det nokre prosjekt som står «på vent» som t.d. utbetring av ventilasjon.

Fokus på ernæring og kosthald ved Hadartun, ser kontrollutvaket som positivt.

Kontrollutvalet takkar kommunalsjef sektor for velferd Berit Aasen, rådgivar Oddrun Alme Mork, leiar korttids- og bueining Monica Småge Skeide, leiar skjerma eining Nina Ulstein og leiar heimeteneste Christina Aasen-Helvig for god orientering og omvising.

Kontrollutvalet oppmodar formannskapet, kommunestyret og kommunale politikarar generelt, til å få ei orientering og omvising ved Hadartun.