Page | 1

Khutba Jummah

HADHRAT MUHYI-UD-DIN AL-KHALIFATULLAH

Munir Ahmad Azim

10 Août 2018 (27 Dhul-Qaddah 1439 AH)

Après ki li fine salué tous so bane disciples (et tous bane Musulmans) entier le monde avec le Salaam - la Salutation de paix dans l’Islam - Hazrat Khalifatullah (atba) fine lire Tashahhud, Ta’uz, Surah Al Fatiha, et ensuite li fine axé so Khutba lor: « L’Héritage ». Selon Quran et Hadith, li obligatoire pou ki ene musulman so dibien distribuer parmi so bane héritiers d’après Shari’at. Donc, li ene devoir ki ene dimoune faire démarche pour ki après so la mort, so dibien distribuer couma Allah ek So Rassool fine dire. Fraction ki ene madame ou bien ene missié ou bien ene maman ou bien ene sœur gagner li ene obligation (Farz) pareil couma Salaat/ Namaz, Sawm/ Roza, Zakaat li Farz. Proportion ki nous distribuer l’héritage, li vine principalement depuis Quran. Le Saint Prophète Muhammad (saws) fine dire : « Empranne bane la loi héritage et enseigne li parski li la moitié l’éducation… » (Mustadrak alas Saheehain). Kan ene dimoune mort, premier, so du bien pou être servi dans démarche pou baigne li, Kafn et enterre li. Bien sûr bizin péna aucaine gaspillage ou bien dépense inutile dans sa bane démarche là. Azordi malheureusement, bane musulmans faire manger en relation avec Mayyat ene dimoune, lors 3ème, 10ème,

Page | 2

et 40ème jour. Sa pratique là li pas Sunnah et donc li pas correcte. Sa bane zaffaires faire la caze Mayyat faire bane dépenses bien lourd et sa famille là li déjà attristé par perte d’ene membre de la famille. C’est ki ena dans Hadith c’est plitôt bane famille proche et bane voisins ki amène ene ti peu manger pour sa famille ki fine affecter par la mort. Nous pas mette fardeau lors bane ki déjà fine affecter avec ene la mort. Pitôt nous aide zot. Et si nous pas pé aller pou aide zot, donc pas alle dans la caze Mayyat là. Si ou ena pour aller, ou alle rende ene visite de sympathie et faire duah pour la famille et défunt là, et ou pas rester longuement là-bas kot bane famille là bizin prépare kitchose pou ou manger et boire. Après bane dépenses ki fine faire lors Kafn et l’enterrement et si sa Mayyat là ena dette alors pour servi so du bien pou paye so dette en premier. Si so dette li dépasse quantité du bien ki li ena, alors tous so du bien pour servi pour paye tous so bane dettes et dans ene tel cas héritier là pas pour gagne nannié.

L’IMPORTANCE WASSIYAT Si cash ou bien du bien fine rester après ki fine fini paye tous so bane dettes, alors depuis céki fine rester, si sa dimoune kine mort là, li ti ena l’idée pou donne bane les autres dimounes ou so Jamaat ene part de so l’héritage, alors li ti bizin fini rédige ene testament (Wassiyat). Et dans le contexte ki dimoune là envie donne dans le chemin d’Allah, alors sa mot Wassiyat là retenir tous so l’importance. Et alors ene maximum 1/3 (ene tière) de céki fine rester de so du bien (après ki fine rembourse tous bane dettes) pour appliquer pour sa Wassiyat là. Wassiyat dans sa contexte là c’est quoi sa ? Wasiyyat c’est ene vœux en écrit ou bien en parole ki après so la mort, donne so du bien dans le chemin d’Allah (e.g., ene Jamaat ki pour servi sa du bien là seulement pour la cause d’Allah, par exemple, si li ena ene la caze ou bâtiment, sa vine pour le Jamaat et li capave faire sa comme ene Ibaadat Khana, ou ene centre de Dawa ou bien même ene l’école islamique etc.) Alors sa déclaration là, c’est-à-dire, Wassiyat là, li valable kan dimoune là ti en bonne santé et ti ena so full conscience. Mo bizin précise ene zaffaire là-dans ki pour donne so du bien à Jamaat (couma oulé dire sa, sipa, donne sa Masjid) et li ena ene héritier, alors sa Wassiyat là pas pour appliquer complètement. Seulement 1/3 et le reste partage avec héritier/s.

Page | 3

Astaire, si li pena zenfant et li ena dettes et li fine faire le Wassiyat alors, premièrement bizin paye tous so bane dettes et après 1/3 alle pou Masjid/ Jamaat/ l’Islam. Sa aussi ena kot ena dimoune faire ene Wassiyat après so la mort kot li envie ki donne so dubien à kikaine. Mais après ki fini paye tous so bane dettes, toujours 1/3 alle pour sa kikaine ki li envie donner là. Si li pena dettes et zenfant, lerlà dibien là alle complètement pour Jamaat ou kikaine ki li envie donne so dibien. Mais tout sa là li valable kan li encore en bonne santé avec full conscience, sinon li pas pou valable si sa dimoune là dans ene maladie, kot li pas ena full conscience céki li pé faire ou li près pou mort. Donc l’héritage, c’est ene zaffaire bien sensible et bizin conner couma pour faire sa. Non plus ene dimoune ena dettes partout et li ena héritier, li dire ‘Mo faire Wassiyat pour donne mo dibien Jamaat.’ Bé ki sanlà pou paye so dettes et ki pou arrive so bane zenfants ki li fine mette lors sa la terre là ? Donc, dans sa bane cas là, le responsable du Jamaat bizin guette bien avant accepter sa kalité dibien là. Pas capave li faire dettes partout, li doit et pas paye sa bane dimounes ki li doit là et so héritier pas gagne nannié et li donne sa Masjid ou Jamaat. Li pensé ki li pou échapper avec punition Allah, le jour ki li pour présente devant Allah. Allah (swt) même pas pour accepter sa qualité Wassiyat là, kan pé faire le cœurs dimounes souffert concernant bane dettes ki fine faire avec zot et faire les cœurs so bane héritiers fermal. Kan sa li ene commandement même ki trouve dans Quran Shariff kot Allah (swt) fine explique sa très bien, bien en détail. Le Saint Prophète (saws) pas fine recommandé même pour sa bane qualité dimoune ki ena beaucoup héritiers dans la famille. Hazrat Muhammad (saws) fine dire sa comme sa pour bane ki ena beaucoup héritier ki « 1/3 là… li trop beaucoup sa. » (Bukhari). Dans Maurice, mo trouve sa, ki ena beaucoup Waqf ki bane grand familles fine faire ki reste sans utilité et souvent sa amène discorde dans la famille. Conseil ki mo donne bane musulmans, c’est au lieu faire Waqf terrains, meilleur ki dans so vivant li construire ene bâtiment ki so rente pour bénéficier bane institutions islamique. Donc, après ki fine paye Kafn, l’enterrement, paye sa mort là so dettes, et applique Wassiyat (si ena), c’est ki rester pour distribuer parmi bane héritiers.

Page | 4

BANE TYPES HÉRITIERS

Ena 2 qualités héritiers :

1. Héritier ki so part li fixé par Quran ; sa banlà appelle zot bane Faraa’iz. 2. Ene l’autre bane héritiers ki zot prend le reste du bien après ki bane

Faraa’iz fine fini prend zot parts. Sa bane là appelle zot Asabah. Bane Asabah directes c’est bane personnes masculins ki dans zot liaison (relation) à sa dimoune mort là ; pena aucaine madames ki rentrer là-dans.

Distribution du bien parmi bane héritiers pour commencer par donne bane parts fixe à bane Faraa’iz, après sa le reste pour alle pour bane Asabah. Si pena Faraa’iz, c’est bane Asabah ki prend tous du bien. Si pena Asabah et ena bane Faraa’iz, alors du bien là pour retourne vers bane Faraa’iz d’après zot part ki zot ena. Si pena Faraa’iz et bane Asabah, alors c’est bane Zawil Arhaam ki pour gagne du bien. Zawil Arhaam c’est bane familles proches de sa Mayyat là ki zot pas ni dans Faraa’iz, ni dans Asabah. E.g. Mamoo. Si pena ni Faraa’iz, ni Asabah, ni Zawil Arhaam, si pas ena tous sa bane dimounes ki fine mentionner là, alors si li faire Wassiyat pour entier so du bien pou Jamaat ou Masjid, alors c’est lerlà ki so Wassiyat pou appliquer lors tous so bane dibiens. Si li pas ena Wassiyat ki li fine faire, lors ene parti so dibien et pena tous sa bane héritiers ki mo fine fek cité là, alors sa dibien là pour alle dans possession de Bait-ul-Maal ou bien ene institution islamique ki pou dépense sa l’argent ou dibien là pour le progrès de l’Islam, la religion ki fine parfaire par Allah (swt) Li-même.

PARTAGE DE L’HÉRITAGE Nous guette ene coup bane parts fixés par Quran - Faraa’iz :

1. Papa : (a) Papa de sa défunt là pour gagne 1/6 kan ena garçon ou bien garçon de

garçon (ti zenfant) ou bien arrière petit-zenfants (garçon so garçon so garçon).

Page | 5

(b) Papa pour gagne 1/6 plus li vine Asabah avec présence de tifi ou tifi de so garçon ou bien même arrière petit-zenfant tifi par liaison de so garçon.

(c) Papa li vine Asabah kan pena zenfant et kan pena ti zenfant de par liaison de so garçon.

2. Dada (Papa so papa) : Dada pou gagne part héritage si papa de sa dimoune ki fine mort là fini mort à l’heure ki sa dimoune là fine mort. Dans ene tel cas, Dada pou gagne même fraction couma dans sa trois situations (a), (b) & (c) pou papa de défunt là ki mo fine mentionner devant zot là. C’est-à-dire, si papa pas là, alors Dada gagne même part couma papa. Donc, si papa là même, alors Dada de sa dimoune ki fine mort là pas gagne nannié.

3. Frères et sœurs de par liaison maman-utérine (c’est-à-dire, li bane frères et sœurs ki ena ene seul maman mais différents papa).

(a) Kan zot ene seul frère ou bien ene seul sœur, alors zot gagne 1/6. Kan zot deux ou bien plus, alors zot tous gagne 1/3, mais remarquer ki frère sœur, pour partage sa 1/3 là en part égale.

(b) Frère sœur de liaison maman pas pou gagne nannié dans présence de zenfant ou bien ti zenfant de liaison garçon.

(c) Frère sœur de liaison maman pas pour gagne nannié dans présence papa ou bien Dada.

4. Missié : (a) Ene missié li pou hérite ½ du bien so madame kan pena zenfant (garçon

ou tifi avec madame là) ou bien ti zenfant de liaison garçon ou bien arrière petit-zenfant de liaison garçon toujours.

(b) Missié pour hérite ¼ kan ena zenfant (garçon ou tifi) ou bien ti zenfant ou bien arrière petit-zenfant de liaison garçon.

5. Madame/s : (a) Kan ena ene madame ou bien plusieurs madames et pena zenfant et ti

zenfants (garçon so zenfants), alors zot pou gagne ¼ dibien. (b) Kan ena zenfants ou ti-zenfants ou arrière ti-zenfants, bane madames là

pour gagne 1/8. 6. Propre tifi (depuis même maman et papa) :

(a) Ene tifi unique pour gagne ½ (la moitié). (b) Deux ou bien plus tifi pou gagne 2/3. (c) Si ena garçon avec tifi, alors garçon là pour faire bane tifi là vine Asabah,

mais bane tifi pour gagne ½ part ki bane garçon gagner, c’est-à-dire, garçon gagne deux fois part ene tifi (2 : 1).

7. Garçon so tifi (Ti-zenfant) :

Page | 6

(a) Li gagne ½ kan li tout seul. (b) Li gagne 2/3 kan ena deux ou bien pliss en l’absence de propre tifi. (c) Zot gagne 1/6 kan ena ene seul propre tifi. Dans sa cas là, ti-zenfant et tifi là pour complète 2/3 part. (d) Zot pas hérite nanié si ena deux propres tifi ou bien plisse, à moins ki ena ene garçon dans zot génération ou bien pli en bas, alors sa garçon là pour faire zot vine Asabah. Et bien sûr, bane tifi pour gagne ½ (la moitié) part de ene garçon (2 : 1). (e) Si ena ene garçon, alors ti-zenfant pas pour gagne nannié.

8. Propre sœur (même maman et papa) : (a) Kan ena ene seul sœur, alors li pour gagne ½. (b) Kan ena 2 ou bien plisse, alors zot pou gagne 2/3. (c) Kan ena frère ensam avec sœur, alors zot pour vine Asabah et bane sœurs là pour gagne ½ part de bane frères là (2 : 1). (d) Kan ena tifi et ti-zenfant tifi (garçon so tifi), alors zot pour vine Asabah ensam avec sa bane là. (e) Bane propre sœurs pas pour gagne nannié si ena garçon ti zenfant (garçon so garçon) ou bien arrière ti zenfant (garçon so garçon so garçon).

9. Sœur de même papa, mais, pas même maman (Consanguin) : (a) Li gagne ½ kan li tout seul. (b) Kan ena 2 ou bien pliss, alors zot pour gagne 2/3 kan pena propre sœur. (c) Li gagne 1/6 kan ena ene seul propre sœur pour complète 2/3. (d) Normalement zot pas pou hériter kan ena 2 propre sœurs à moins ki ena ene frère consanguin avec zot, alors zot pou vine Asabah et bane sœurs pour gagne ½ part bane frères (2 :1). (e) Zot vine Asabah si ena bane tifi ou bien ti zenfants (garçon so tifi) pareil couma mo fine mentionner dans numéro 8 (d). (f) Bane propre frères sœurs, ou bien bane frères sœurs consanguin pas pour gagne nannié si ena garçon, ti zenfant (garçon so garçon) ou bien arrière ti-zenfants (garçon so garçon so garçon), papa et Dada (Papa so papa). (g) Bane frères sœurs consanguin pas gagne nannié si ena ene propre frère vivant et propre sœur kan zot vine Asabah.

10. Maman : (a) Maman pour gagne 1/6 kan ena zenfant ou bien ti zenfant, ou bien kan ena 2 frères ou bien 2 sœurs de n’importe ki liaison (garçon ou tifi). (b) Li pour gagne 1/3 de dibien kan pena sa bane ki mo fine fek dire là.

Page | 7

(c) Li pou gagne 1/3 de les reste dibien après ki fine fini donne (défunt là so) missié ou bien (si défunt là ene missié so) madame, et sa li pour arriver kan ena maman papa avec missié, ou bien maman papa avec madame. Et si pena papa, mais ena Dada, alors maman pour gagne 1/3 de entier dibien. (Li malheureux ki azordi ki bane partages pas prend maman et papa en considération).

11. Dadi (Papa so maman) et Nani (Maman so maman): (a) Dadi et Nani dans même génération, zot tous pour gagne 1/6. (b) Dadi et Nani pas pou gagne nannié si maman vivant. (c) Dadi pas pour gagne nannié si papa vivant et si Dada vivant, excepter dans le cas de Dadi ou bien so maman ou bien so arrière maman (Dadi so Dadi) ki li pour hériter même si Dada li vivant. Note : Bane liaison ki pli près li empêche bane loin gagner.

SI L’HÉRITAGE PAS FINE DISTRIBUER D’APRES SHARI’AT DANS LE PASSÉ

Si nous bane grands parents pas fine distribuer héritage dans le passé d’après Shari’at, alors li nous devoir pour nous corrige sa et redistribuer du bien là d’après Shari’at. Si pas fine corrige sa erreur ki fine faire auparavant là, alors nous pou coupable devant Allah Ta’ala et malheureusement nous capave pé mange du bien ki pas pour nous. Par exemple : Si tifi fine gagne même part avec garçon dans le passé, alors bizin corrige sa, sinon bane tifi, zot pou vive dans ene du bien ki ene parti pas pou zot et donc zot pé vivre dans Haraam partiellement. Si maman ti vivant l’heure ki so garçon fine mort, mais li pas fine gagne nannié dans héritage, alors bizin donne li so droit avant ki le Jour du Jugement li réclame so droit.

ZENFANT/S DE PRÉCÉDENT MARIAGE D’ENE CONJOINT Si ene madame ti ena zenfants avant avec ene l’autre missié, et après so divorce, so Talaq li faire Nikah avec ene missié, sa madame là so bane zenfants pas rentre dans l’héritage de sa missié ki li fine faire Nikah là après so divorce.

Page | 8

HÉRITAGE D’ENE ZENFANT LÉGITIME

D’après Shari’at, ene zenfant ki né dans Nikah, li ene zenfant légitime et donc li pou hérite sa maman papa là. Shari’at reconnaite ene grossesse légitime de ene zenfant ki né biologiquement entre 6 mois et 2 ans. Explication : Si ene zenfant fine né dans 5 mois depuis date Nikah ou bien depuis ki papa là fine mort fine gagne plisse ki 2 ans, alors sa zenfant là li pas légitime pou papa là et donc li pas pou hérite li. [Mais Allah conne mieux. Il se peut aussi ki Allah montrer bane exceptions et bane miracles extraordinaire. Ena ene anecdote d’ene jugement légale ki fine passer au temps Khilafat de Hazrat Umar ibn Al-Khattab (ra) kot fine amène ene madame pou jugement devant li parski li fine mette au monde ene zenfant après six mois. Alors Hazrat Umar (ra) fine ordonner ki envoye coup de roches lors madame là [à cause sa pensée là ki sa madame là fine bizin commette l’adultère]. Alors, bane là fine amène madame là pou recevoir so punition. Entre-temps, sa cas là fine arrive dans z’oreille de Hazrat Ali ibn Abu Talib (ra) et alors li fine guette Hazrat Umar (ra) et fine dire li : « Li (sa madame là) pas mérite sa. Eski Allah pas fine dire dans Quran : « So grossesse et sevrage prend 30 mois » (Al-Ahqaf 46 : 16) et « Bane mamans va donne boire zot zenfants pendant deux l’années entiers, si zot oulé donne du lait zot zenfants pou ene période complète. » (Al-Baqara 2 : 234)? Alors grossesse capave prend 6 mois, et alors sa madame là pas mérite coup de roche. » (Muwatta Imam Malik). – Kan li fine entende sa, Hazrat Umar (ra) fine reconnaite erreur dans so jugement. Donc, à travers sa anecdote là et déduction de Hazrat Ali ibn Abu Talib (ra) et verset Quran à so l’appui, li claire ki minimum période de grossesse li de 6 mois. Ena bane les autres l’opinions tels que Hazrat Aisha (2 ans), entre autres, et l’opinion des 4 Imams : d’après Imam Abu Hanifa de Kufa (2 ans), Imam Malik bin Anas de Madina (4-5 ans), Imam Muhammad Al-Shafi de Madina (4 ans) et Imam Ahmad ibn Hanbal de Bagdad (4 ans) avec zot l’écoles de pensées dans l’Islam qui démontrer donc ki grossesse ene madame capave varié de six mois – minimum grossesse couma fine indiquer dans Quran (Al-Baqara 2 : 234, Luqman 31 : 14 & Al-Ahqaf 46 : 16) – et 2 à 6 ans (comme limite d’ene grossesse pour raison légale). Entre d’autres mots 6 mois à 6 ans, pareil couma Allah fine créer les ciels et la

Page | 9

terre et la création de l’homme en six jours, d’après façon compter Allah. D’ailleurs, nous trouver ki Allah mentionner dans Quran : « Allah conner ki zenfant sak femme porter, et combien létemps zenfant là pou reste dans matrice, plus courte ou plus longue ki ordinaire. Tout kitchose ena so mesure avec Li » (Ar-Raad 13 : 9). Mais couma mo fine dire zot, tous sa c’est bane exceptions, hors de nombre de 9-10 mois ki normale, et aussi principalement pour cause légale. Et Allah englobe tout dans So connaissance]. Ene zenfant ki né dans Nikah d’ene missié et ene madame, li légitime et li pou hérite so parent, à moins ki papa là li dénié ki sa so zenfant à l’heure so naissance ou bien bane premier fois li trouve sa zenfant là. Si li fine dire ki sa zenfant là pas pou li (et li ena bane preuves à so l’appui couma bane témoins ki zenfant là li pou ex-mari ou mari décédé de madame là avant li marier avec li ou ki zenfant là li produit d’ene adultère, et couma de nos jours ena, à travers ene teste ADN), alors sa zenfant là pas pou hérite li et pou hérite seulement de so maman.

MARIAGE CIVIL SELON CODE NAPOLÉON Selon code Napoléon, ena 2 types de mariage civil.

1. Mariage de la communauté de bien. 2. Régime de la séparation de bien.

Mariage de la communauté de bien veut dire ki tous du bien ki missié là pou acquérir pendant so mariage (excepter l’héritage), alors sa du bien là li pou missié là et madame là également (50 : 50). Sa li complique la vie d’ene musulman en terme de Shari’at. D’après Shari’at ene dimoune so dibien ki li ena pas capave alle automatiquement dans propriété ene l’autre dimoune sans so permission ou bien so consentement. Mariage de la communauté de bien complique héritage après la mort de sa missié là ou bien sa madame là. Li empêche distribution héritage selon Quran et Hadith. Même dans mariage de régime de séparation de bien, héritage pas vine d’après l’ordre Shari’at. Mais pendant la vie sous régime de séparation de bien, du bien missié là reste pour missié là et du bien madame là reste pour madame là.

Page | 10

Vue sa bane complications ki ena dans distribution héritage kan marier civil, la loi d’Allah li différent ki la loi mondaine pour bane croyants. Surtout nous, bane musulmans nous bizin obéir Allah et So Rassool (saws) céki fine dire nous faire, c’est sa ki nous bizin faire. Donc, si ene dimoune fine marier civil, alors li bizin prépare ene testament kot notaire pour distribuer so dibien. Distribution héritage ena beaucoup détails et li bien vaste, mais mo fine donne l’essentiel ki pli important.

CADEAU KI FINE DONNER PENDANT LA VIE Ene part du bien ki fine donner à ene dimoune ki ou estimer et conne li depuis bien longtemps, li ene cadeau et non pas ene part héritage. Si fine donne ene part dibien en cadeau à ene zenfant pendant so la vie, alors bizin donne tous bane zenfants part égales et corrige sa injustice là. Dans sa distribution cadeau là, pena différence entre garçon et tifi. Tous bizin donne part égale. Si fine donne ene zenfant pliss du bien par finance so l’étude ou bien fine aranze so la caze, alors bizin compense sa quantité là pou bane les autres zenfants avant la mort. Mais si fine fini mort, alors héritiers pas capave exiger astaire. Maintenant pas pou prend compte ki li fine faire pendant so la vie, mais bizin applique l’ordre d’Allah pour distribuer héritage selon bane fractions ki Quran fine ordonner. Ena ene seul exception kot là ene parent vivant capave privilège ene zenfant à ene l’autre par donne li ene cadeau ki li pas donne les autres : C’est kan sa zenfant là fine consacrer so létemps pliss à Deen ou dans l’enseignement de Deen-e-Islam. Hazrat Abu Bakr (ra) ti offert à so tifi Aisha (ra) ene cadeau ki li pas fine offert so bane les autres zenfants. (Muwatta de Imam Malik). BANE MALHONNETE KI ENE HÉRITIER FAIRE CONTRE SO PROPRE SŒUR OU VICE-VERSA Bien souvent kot ene parent pauvre ena ene ti morceau terrain, mais pas conner couma pour distribuer sa entre so bane héritiers, parski héritier pli beaucoup ki dibien ki ena. Erreur ki parent faire, alors si ena pliss ki ene ou deux garçons et li ena pliss ki ene ou deux tifi, alors zot essaye convaincre bane tifi là sans aucaine testament en écrit, et dire bane filles signé et donne zot part à zot bane frères, et ki après plitard bane frères là pour donne zot en forme de l’argent, parski zot pou

Page | 11

marier et zot pour alle kot zot missié. C’est ene l’arrangement ki ti faire verbalement et kan bane frères là ti bizin signatures zot bane sœurs pour gagne dibiens là vine lors zot noms, zot ti pé passe beaucoup dibeurre et mantègue. Kan signature fini metté et contrat fini gagner kot notaire lors (bane garçons là) zot noms et zot fine vine propriétaire là, zot jouer sourd d’oreille avec bane sœurs là, et sa li capave vice-versa aussi (c’est-à-dire, bane sœurs capave faire sourd d’oreille avec zot frère/s ki fine signe zot part fine donne zot) à condition ki zot expecte en retour ki zot bane frères pou donne zot l’argent. Mais malheureusement kan sœur ou bane sœurs là demande zot Haqq, zot l’argent ki sa bane frères là doit zot lors question l’héritage, alors la situation tourne au vinaigre, et sa bane frères là insulter zot sœur/s. Zot conne zis pou zot. C’est zis zot ki bizin gagner et faire l’avenir zot bane zenfants et sa qualité l’héritage là pas durer sa ! Li pou fanna-finna et zot pou ena ene grand compte pou render devant Allah (swt). Sa c’est ene grand malhonnête ki ene frère faire avec so sœur ou vice-versa (si arriver frère signer pou donne sœur). Sa appelle sa du vole ; vole droit de zot bane sœurs ki aussi héritiers. Sa bane sœurs là aussi zot zenfants zot maman-papa. Dans sa cas là, bizin faire ene testament et papier légale ki zot pou rembourse zot bane sœurs si arriver zot pena l’argent tout de suite pour donner, et zot donne ene délai finale pour rembourse zot sœur/s. Sinon, si zot ena l’argent là, bane les autres héritiers bizin pas signe aucaine documents kot notaire si pas mette zot l’argent là (sur table). Ena beaucoup cas ki pé dérouler dans Maurice et aussi dans bane les autres pays aussi, mais conséquence sa bane dimounes ki fine cokain droit zot bane sœurs ou vice-versa (bane droits ki bane sœurs cokain pour zot bane frères) pour bien grave devant Allah (swt). Mo pou mette devant zot ene Hadith ki trouve dans Bukhari Shareef : Muhammad bin Ibrahim bin Al-Harith (ra) fine rapporter dépi Abu Salama bin Abdur Rahman (ra) ki fine gagne ene dispute avec quelques dimounes lors ene morceau la terre. Alors, li fine alle kot Hazrat Aisha (ra) et li fine dire li concernant sa. Li (Aisha) fine dire : « Ô Abu Salama, évite (reste loin) avec (sa) la terre là, parski le Messager d’Allah (saws) fine dire : « N’importe ki dimoune ki prend même ene morceau [ene tiguitte – même ki ene pas] la terre injustement, li pour être encercler de sept la terre. »

*** *** ***

Page | 12

[Tout céki mo pé dire dans sa Khutba Jummah là azordi, tous sa là c’est bane questions ki bien souvent mo recevoir par emails, lors mo messages portable ou par téléphone. À cause sa même par la grâce d’Allah, azordi à travers le Khutba Jummah mo pé réponne sa bane questions là et pour ki toute l’humanité en générale, en particulier, bane musulmans, zot capave conner couma pour distribuer l’héritage si zot pas ti conner ou si arriver zot pas ti pé prend sa compte, ou zot fine faire beaucoup erreurs etc. Alors sa Khutba Jummah là capave aide zot pour conne mieux et attire l’amour d’Allah, pas la colère d’Allah, kot ene jour nous tous ena pour alle réponne devant Celui ki fine créer tous sa là et tous appartenir à Li (Allah) seul ; nannié pas pour nous ici-bas. Lors sa la terre là, nous temporaire. Demain tous sa là pou bizin quitter pour aller. Seulement quelques mètres la toile blanc ki pour enveloppe nous là-dans ; nannié pas pou vine avec nous de céki nous ti pé jouir lors sa la terre là. C’est seulement nous bane bons et mauvais actions ki pou accompagne nous. Lé reste pou reste ici. Bé ki malhonnête ou bizin faire alors, ki la guerre bizin la guerre ? C’est inutile kot pé attire la colère d’Allah lors nous ici-bas et Aakhérat.]

HÉRITAGE D’ENE BUSINESS KI PÉ ROULER Le moment ki ene dimoune li mort, alors so bane héritiers vine propriétaire de so bane dibiens. Veut dire ki dans sak kitchose ki li fine quitter, bane héritiers ena bane parts défini dans sa bane dibiens là (par exemple, 12.5% de so la caze, business etc.). Mais selon l’accord de bane héritiers, zot gagne droit partage sa bane dibiens là avec consentement. Mais li important ki faire zot vine propriétaire de zot part. Li ene injustice pou garde ene dibien sans distribuer alors ki bane héritiers pé demande zot part. C’est pour sa ki dibien bizin distribuer à tous bane ki mériter et faire zot vine propriétaire réel. Si pena accord, alors bizin évaluer bane dibiens là et partage zot d’après zot part ki zot ena. Si li ene dibien indivisible (ki pas capave concrètement divisé), alors bizin vende du bien là et partage l’argent ki fine gagner.

Page | 13

Kan ene propriétaire d’ene business fine mort, alors bizin faire ene inventaire de valeur stock, roulement business et bane valeur de bâtiment business. À sa moment là, capave mette ene représentant héritier pour roule business et garde ene compte de bane transactions. Mais après ene réunion de famille, bizin donne sakaine so droit sans abus. Sa business là capave vine ene compagnie kot là, sak héritier prend so part là-dans. Celui ki pou travail pour prend ene la paye là-dans (plus so dividend ou profit) et celui ki pas travail là-dans pour gagne so part de profit ou dividend là-dans la fin sak mois ou sak l’année. Insha-Allah.

HÉRITAGE D’ENE ORPHELIN

Si ene zenfant li orphelin, alors ene grand ki deendar bizin garde sa dibien là ziska ki li gagne maturité (environ 21 ans). Si du bien là li en liquide, alors meilleur acheter ene terrain lors nom zenfant là afin ki dépréciation pas affecter dibien là. Ler li vine assez mature kot li capave gère so l’argent, alors bizin donne li du bien là. Capave prend depuis sa casse là pour zenfant là so bane dépenses. Péna Zakaat lors sa l’argent là jusqu’à li vine baaligh (mature).

HÉRITAGE D’ENE ZENFANT ADOPTIF

Ene zenfant adoptif, li pas héritier ene parent adoptif d’après le Shari’at. Donc, ene zenfant adoptif pena aucaine droit lors du bien de so famille adoptive. Mais bane parents adoptif capave donne li cadeau dans zot vivant ou bien faire ene testament de maximum 1/3 du bien pour sa zenfant adoptif là. D’après le Shari’at, kan adopter ene zenfant, li meilleur adopter li kan li ene ti bébé. Coumsa sa zenfant là li pour ene Mahram dans la caze. Si ou adopter ene zenfant kan li fine grandi, li pour ene étranger dans la caze.

L’IMPORTANCE DE FAIRE ENE TESTAMENT AVANT KI LI TROP TARD Dans ene Hadith de Tirmidhi Shareef, Hazrat Abdullah ibn Umar (ra) rapporter ki Rassoollullah (saws) fine dire : « Ene musulman pas gagne droit dormi deux nuits alors ki li ena de quoi pour distribuer après la mort mais ki li bizin ena ene testament en écrit. »

Page | 14

Certains Muhaddicines fine applique sa l’emphase là kan ena danger de discussion lors so dibien après so la mort. D’autres fine prend sa comme recommandation et précaution. Si ou conner ki pour ena discussion, alors li important mette tous en écrit pour ki évite ou bien diminuer discussion. Et ou pou acquitte ou part de responsabilité. Et li obligatoire pour faire testament d’après part ki Quran fine décrire. Donc, li important ki mette bane distribution héritage en écrit pour évite discorde dans la famille après la mort. Si nous guetter, bien beaucoup familles fine casse relation à cause ene mauvais distribution héritage. Insha-Allah, mo espérer avec sa Khutba Jummah lors distribution l’héritage, tous bane frères et sœurs fine gagne ene l’idée lors façon distribution l’héritage. Donc, li pas aussi facile pour alle trop en détail dans sa Khutba Jummah là. Ene sujet très sensible, pas aussi facile pour traiter sans aide Allah (swt) et li bien vaste aussi. Donc, Insha-Allah, li obligatoire pour sak musulman ki li distribuer so bane dibiens parmi so bane héritiers d’après Quran Shareef et Hadiths. Insha-Allah, ki Allah aide nous pou acquitte de nous bane devoirs avec honnêteté et avec Taqwa. Insha-Allah, Ameen.