· 伯仔，兩爿做生理的頭家，攏會攢一大堆的炮仔，點予著了後，才掔對土地公的輦轎內底。規街仔路攏是炮仔聲，細漢的我，知綴毋知驚，佇咧輦轎仔後壁硞硞綴，一直到上尾仔。聽阿母

新北市閩南語輔導團字音字形 700 字詞延伸與應用工作坊成果

1

B卷文章寫作模擬試題：

會當自由發揮。150-200字之間，答案紙大約10逝

問題1：

有人愛出國去旅行，有人佮意佇國內耍。您佮意啥物咧？您有去過啥

物所在？敢有難忘的旅行經驗？

旅行作者：王秀容

逐个人想法無啥仝，有人興豆腐，有人興燒酒，就親像，有人愛出國去旅行，有人佮意佇臺灣寶島。基本上我是兩項攏佮意，毋過，因為我毋是好額人，我嘛無加賰錢會當予我冇冇仔開，所以，我會安排佇臺灣四界。其實臺灣有懸山有大海，有跤庄有都市，逐位我嘛攏佮意。而且臺灣有足濟好食物，各地的點心，大碗閣滿墘，逐位的名產做伴手，朋友收著攏嘛會笑咍咍足歡喜！我上愛去臺南市，米糕食煞，食擔仔麵，隔壁閣有浮水花枝，若無，閣行兩步仔，會當食著虱目魚。食飽免驚無地去，附近就有古蹟佮廟寺。佇臺灣，有食，有耍，安全閣趣味，何必出國開大錢！(255 字)


2

問題2：

有人出去旅行足愛買各地的名產，你有啥物看法佮經驗無？

名產作者：王秀容

臺灣是寶島，四界好，風景媠，各地的名產食了會紲喙，有耍有食誠趣味。阮阿母上愛出去耍的時順紲買名產，逐擺出去行李一大包，轉來變兩三包，伊講是欲買予阮食，嘛會當送予厝邊隔壁的伴。老歲仔人出去耍，行路都有困難，買名產著揹甲大項細項，予我想著誠毋甘。名產定定是一寡糖仔餅仔，食來食去攏仝款，實在無必要了錢閣了工，而且這時代欲食啥物都攏有，出去耍就認真仔耍就好，何必加揹加重？我是足少咧買啦！阮阿母講我毋捌，現場買的感覺無仝，轉來厝裡，買的過程會當提出來和阮開講。我看，出去是毋是通買名產，猶原是在人，歡歡喜喜才是頭一層！(262 字)


3

問題3：

這幾年來，全省攏咧痟鹽水的蜂仔炮佮平溪的天燈，除了這兩位，

你敢知影閣有啥物所在嘛有元宵暝的活動無？

內湖弄土地公作者：方文樹

逐年的元宵暝，電視內底，毋是咧報鹽水的蜂仔炮開偌濟錢去做，就是講平溪的天燈有偌濟人去看。其實內湖的元宵暝，嘛有一个鬧熱滾滾的「弄土地公」。

會記得細漢時仔，攏會佇食暗飽，和阿兄行去內湖國小附近的梘頭土地公廟仔，準備看人弄土地公。大概六點捅，第一捾炮仔點著了後，ping-ping-piàng-piàng 的鬧熱活動就正式開始。兩个少年家仔，褪腹裼扛一个輦轎仔，內底坐一仙土地公伯仔，兩爿做生理的頭家，攏會攢一大堆的炮仔，點予著了後，才掔對土地公的輦轎內底。規街仔路攏是炮仔聲，細漢的我，知綴毋知驚，佇咧輦轎仔後壁硞硞綴，一直到上尾仔。聽阿母講，內湖街仔遮的生理人，相信炮仔放愈濟，生理就會愈好。共對未來的希望，攏總寄付佇一箱一箱的炮仔內底。

（303 字）


4

問題4：

醫生攏咧講，捷捷運動，會當予身體較健康。講看覓，予你印象上深

的運動是啥物？

泅水作者：方文樹

運動有真濟款，有人愛走標，有人愛拍球，有人愛跳舞，嘛有人愛山。予我印象上深的運動，就是泅水。其實，我是按怎學會曉泅水的，我嘛袂記得矣！我細漢時仔蹛佇山頂，雖然田邊有溪仔，毋過水傷淺，無法度泅水。後來屘舅仔佇溪仔邊挖一窟水，閣用紅毛塗佮砂石仔鞏起來，當做是游泳池。熱天時仔會招阮去耍水，這就是我第一擺泅水。了後，因為讀冊的關係，嘛無時間閣去學泅水。一直到娶某生囝了後，想講囡仔會驚水，所以就𤆬伊去學泅水。逐擺陪後生去上課，就綴咧罔泅，慢慢仔就泅會振動，嘛愈泅愈緊，毋過，自頭到尾，干焦會曉田蛤仔泅。這馬我已經會當佇水裡自由自在泅來泅去，我想，攏是阮後生的功勞啦！（281 字）


5

問題5：

快樂是啥物?為啥物有人總是快快樂樂；有人總是袂快樂？你敢知影

按怎才會快樂？

快樂作者：柯棟山

每一个人攏希望過著快樂的日子，真濟散赤人因為無錢，就感覺無快樂，毋過，有一寡人無偌濟錢嘛是感覺真快樂；對反的情形是，真濟人好額嘛是感覺無快樂，所以，有錢無錢毋是上重要的條件，上重要的是家己的心理。

有一條歌共咱講：幸福佗位來？快樂佗位來？若是你無去走揣，伊袂家己來。到底是欲去佗位揣呢？真正的快樂，愛對家己的內心去走揣。有的人能力佮成就已經誠好矣，閣定定怨天怨地，怨老母怨老爸，因為伊一工到暗去想無快樂的代誌，想一寡予伊受氣的人，閣欣羨人有錢有名牌，所以才會無快樂；伊若珍惜這馬家己已經有的物件佮成就、關心伊的人，莫想欲愛傷濟、傷貴的物件，有通用就好，按呢，知足的人才就會快樂。

閣有一種會當予家己快樂的方法就是定定去幫助別人，有一句話講：助人為快樂之本。共別人感謝的聲音佮眼神記予牢，你就會感覺真快樂喔！ (351 字)


6

問題6：

自細漢到這馬，你敢捌飼過寵物，抑是你捌想欲飼佗一種寵物？你對

飼寵物有怎樣的了解佮想法？

寵物作者：柯棟山

佇我的囡仔時代，對每一種動物攏真佮意，真想欲飼一寡寵物，像狗仔、兔仔，毋過阿母總是講：「袂使！人都食袂飽矣，閣欲飼遐的有的無的。」

這馬換做是我的囡仔講欲飼這飼彼，無論是魚仔、蝦仔抑是龜；蝶仔、田鱉抑鳥鼠，伊攏想欲飼，我真了解伊的心情，毋過，嘛袂使逐項攏飼，佇伊有能力照顧寵物的年紀，我予伊飼蝶仔、魚仔佮黃金鼠。

囡仔誠珍惜這種機會，伊會家己看冊，了解遮的寵物的生活習慣和照顧的方式，而且會照時間囥飼料、洗鳥鼠仔岫和魚缸，心情無好的時陣，用十分鐘看魚仔泅的古錐的動作，抑是黃金鼠食物件的表情，就感覺加真輕鬆，想袂到飼寵物閣有意外的好處。 (266 字)


7

問題7：

你對落雨天有啥物感覺看法咧，請你寫出來。

落雨天作者：林明珊

Tap̍！Tap̍！Tap̍！猶閣是一个澹澹濕濕的雨來天！每一擺若是拄著落雨天，心肝頭就會有一種煩煩的感覺；想著讀冊囡仔愛穿漚翕的雨幔，行甲規身軀澹漉漉；閣想著出外作穡的人，愛當風吹雨淋，衫仔褲毋知是雨水沃澹，抑是汗水流澹的。好佳哉，好佳哉田裡拍拚種作的農民，若是看著雨水，顛倒是歡喜甲呢；歡喜園裡的菜栽、瓜穎，有充沛的水分通好吸收，閣經過作穡人的雙手細膩照顧，掩塗、薅草、沃水、落肥，後日仔毋才有青翠的菜蔬、芳甜的瓜果通好食。平平落雨天，每一个人攏有無仝款的感受，這雨，會使講是天公伯仔的恩賜啊！(240 字)


8

問題8：

你敢有特別懷念的所在，你對彼个所有啥物特別的感情無？請您寫出

來。

稻埕作者：林明珊

阮舊厝是一間塗墼厝，厝外有一个大大的稻埕；細漢的時陣，阮和阿伯兜一家伙仔，閣有阿公佮阿媽攏蹛佇遮。聽講古早有種田，所以收成的時，稻埕頂就愛曝粟仔；若是平常時，阿母閣阿姆嘛會曝一寡仔菜豆仔、芥菜、番薯簽，抑是生產過量食袂去的匏仔、冬瓜、菜頭，共豉做鹹匏仔、鹹冬瓜、菜脯，等若無菜的時，通好提出來料理。稻埕閣有一个真重要的用途，就是阮遮的囡仔人上讚的迌場。阮佇遐走相逐、扮公伙仔、覕咯雞……，囡仔時代的記持有一大部分，攏發生佇遐。後來阮搬出來外口，稻埕就變做阮轉去看阿公的時，牽阿公出來曝日、吹風、攑頭看雲，活動的好場所。一直到今，逐擺若轉去舊厝，徛佇稻埕，就會想起我的囡仔時代佮我的阿公。 (294 字)


9

問題9：

暗頓通常是規工食上豐沛的一頓，你的暗頓食啥物，會發生啥物代誌

咧，請你共伊寫出來。

暗頓作者：黃震南

有人講：「早頓是金，中晝頓是銀，暗頓是銅」，表示早頓

上重要，晚頓吸收的營養上少。毋過，我的慣勢拄好倒反，早

頓泔糜仔配塗豆就好，暗時仔這頓較重要。

我攏趁下班了後去買菜，這爿猪砧有賣猪舌、猪肺佮煙

腸，彼爿賣菜的咧喝香菇、菜頭、韭菜花，實在是真鬧熱。貨

物買全備，轉來厝就開始入灶跤無閒囉！

我來洗菜、剾皮，切菜、落鼎，佇灶跤的聲勢真正是驚天

動地，袂輸千軍萬馬咧相戰。等厝裡的人轉來，我拄好共飯菜

攢規桌，同齊食晚頓。咧食的時陣，逐家食飯配話，趣味的代

誌講出來予逐家笑，正經的工課提出來佮逐家參詳。暗頓對我

來講是上重要的一頓，因為暗頓是厝裡攢甲上腥臊的一頓，嘛

是阮規家伙仔坐做伙聯絡感情的時陣。

所以逐工若到日頭欲落西，我就會開始期待，今仔日暗頓

的時陣。 (320 字)


10

問題10：

過年是一冬內底上重要的節日，請你共過年的情形寫出來。

過年作者：黃震南

俗語講：「大人煩惱無錢，囡仔歡喜過年。」囡仔上佮意

的過年，往往是大人上無閒的日子，這個道理較早細漢毋知

影，等到這陣才了解。

做囡仔的時，年尾時仔就愛共阿母鬥相共，一時仔去菜市

仔買秫米、買猪肉，連鞭就換去店仔買棕摖、買雪文，轉來閣

愛鬥洗灶跤。若到二九暝的時，阿爸阿母會送我紅包。

這馬我已經是大人矣，無紅包通提，換我包紅包予阿爸阿

母，阮爸母閣包予阮查某囝，我閣共查某囝的紅包收起來，講

是「替伊儉起來」，銀票箍一大輾又閣轉來我手裡，拄好逐家

無輸贏，毋過趁著規家伙仔的感情。

聽著炮仔聲，看著親情朋友平安又閣度過一年，這就是人

生上幸福的代誌矣。(266 字)


11

問題11：

有人一冬換24个頭家，有人認真做工課，請你分享食頭路的趣味佮心

酸

行行出狀元作者：魏俊陽

有人入山趁食，有人落海討掠，每一个人的職業生活，攏

有無仝的感受佮狀況。不而過，佇這馬 22K 當時行的年代，少

年人欲揣一項會當予家己滿意的頭路，是誠困難的代誌。所以

才會定定有「大工無人倩，細工毋願行」的情形發生。

會記得到公司上班的頭一工，拄仔好是風颱過後的日子，

開會開煞，逐家攏做伙咧摒掃、攄塗跤。我彼工穿西裝足飄撇，

規軀滒甲癩爛癆，猶未趁著錢，著愛先開洗西裝的錢，有影是阿婆仔炊粿—倒貼。

人講:第一賣冰，第二做醫生，毋過這馬的醫生嘛定定會

拄著醫療糾紛，而且健保實行了後，趁的錢嘛無比以早較濟。

顛倒是足濟生技美容的病院，生理沖沖滾。行行出狀元，認真

拍拚是頭一層，綴著時勢，仝款的職業，嘛有無仝的出脫，「仝

款無仝師傅」喔！(305 字)


12

問題 12：

人講:自古文章、風水、茶，真捌的無幾个，不而過信風水佮相命的

嘛是濟濟濟，請你發表對相命的看法。

相命作者：魏俊陽

彼一日綴阿母去恩主公遐拜拜，經過地下道，有足濟擔算

命擔，看範嘛予人看甲目睭花花。有一个阿桑，面憂憂，目頭

結結，問相命仙講:「仙的，拜託咧，最近我有夠衰，啉水會

嗾著，行路會跋倒，睏攏睏袂去，毋知欲按怎才好!」

干焦看彼个算命的，凊彩佇一張符仔頂頭烏白撇兩筆，就提

予阿桑，講:「轉去共這張符仔燒燒咧，化佇滾水裡，啉三喙

就會好矣!」阿桑提一千箍，那講多謝那歡喜甲喙笑目笑，佮

頭拄仔面漚面臭，天差咧地。

我想講:啉水的時，沓沓仔啉；行路的時，寬寬仔行，睏

有照時陣，按呢阿桑的問題就攏解決矣!閣加了一千箍，有影

是算命無褒，食水都無。其實，有時陣攏是家己驚家己，煩惱

是家己揣來的。心肝若好，風水免討，毋免怨天怨地，只要跤

踏實地，成功自然會來相揣。(315 字)


13

問題13：

你會期待歇睏的日子無？佇歇睏的時陣，你會想欲創啥？你是按怎利

用歇睏的時陣？

佇我歇睏的時陣作者：澎瑞宏

毋管是大人抑是囡仔攏期待歇睏的日子會當趕緊來。大人會當趁歇睏的時陣補眠、踅街，做一寡予家己放輕鬆的代誌。毋過囡仔人較向望的是上網、拍電動、佮同學出去𨑨迌。人咧講：「一人講一項，無人講相。」若我佇歇睏的時，較愛四界拋拋走，逐位去。講是四界，較輸講是四界食。早起、中晝頓食飽，就連鞭咧計畫暗頓欲食啥。若欲去佗位耍，就愛看欲食的物件佇佗位，紲落來，就沿路行沿路耍，沿路耍沿路食，按呢感覺生活會較快活。毋過四界行四界食的結果就是一圈腹肚湳湳湳！所以，這馬我按算欲蹋跤踏車去，按呢就會使勻仔蹋勻仔食勻仔消化，按呢才是「好食閣袂肥」！(268 字)


14

問題 14：

你敢愛看鬧熱？你上愛看啥物款的陣頭表演？看鬧熱的心情是啥

款？

割香看鬧熱作者：澎瑞宏

看鬧熱是咱在地文化誠重要的一部分，尤其是對我這款草地囡仔來講。自細漢我就真愛去廟埕看鬧熱，尤其是拄著三年一科麻豆咧割香的時！

日時，有王爺轎、王爺馬佮蜈蚣陣會踅鎮內每一个庄頭，踅庄的時，逐家攏愛佇門跤口排香案、準備馬草水，來迎接王爺轎。踅庄的陣頭若閣加上麻豆二十九庄逐个庄頭出的陣頭佮神明轎，就有百外陣，鬧熱陣頭躼躼長，等到全部的陣頭對門跤口踅過，上無嘛愛半點外鐘。欲暗仔，大人、囡仔攏會相爭去廟埕看陣頭、看入廟。我上愛看的就是跳宋江、跳八家將佮五府千歲的乩身咧操五寶。

若到暗時仔，廟埕攏會搬歌仔戲。彼暗，暗頓會食甲特別緊，若聽著開始咧挨絃仔，逐家攏會攑椅頭仔去廟埕坐。大人佇遐看歌仔戲，順紲落下頦；囡仔是扲錢去買菝仔櫼佮燒酒螺。四秀仔若食煞，就開始走相逐、覕相揣。看鬧熱會當予讀冊囡仔感覺足心適，看鬧熱嘛會當予作穡的大人好好仔歇喘，彼款畫面到今閣予我真數念。 (379 字)


15

問題15：

風颱會造成農產品的損失，你有啥物看法佮經驗無？請你寫出來。

弓蕉變貴矣作者：楊麗娟

今年九月中秋節進前，佇短短三工內，風力就對輕度轉為強度，予 CNN氣象主播形容做怪獸的天兔風颱，雨水若親像是對天頂用倒的仝款，台灣南部煞來做大水，農作物攏浸佇水內，幾偌工水攏無法度消退，重害南台灣的農業，連一欉一年才生產一擺，平民價的弓蕉，嘛受著天兔風颱的摧殘，遭受著嚴重的損斷，農民損失慘重，弓蕉大量減產，所致價數就一路飆懸。

果菜的價數往往會起起落落，毋過根據臺北果菜市場的紀錄，今年 12 月，弓蕉的批發價是十年來的新懸價，每公斤飆到 48 元，比較十年前仝時陣，弓蕉每公斤的批發價大約 28 箍來看，今年起欲重倍，予人實在是買袂落去，可見弓蕉的價數受著氣候佮產量的影響是偌爾仔大，莫怪咱會每年共天公伯仔祈求風調雨順，國泰民安。（319 字）


16

問題 16：

你有知影啥物特別的海洋生物無？請你寫出來予逐家知影。

海洋之翼─蝠魟作者：楊麗娟

根據研究，被稱做海洋之翼的蝠魟，大量聚集，數量上濟的所在，是佇咧馬爾地夫，大概有六七千隻。主要食浮游生物，一隻一工平均的食量，大約二、三十公斤，可見馬爾地夫嘛是大量浮游生物聚集的所在。

蝠魟大面積的體盤，是寄生蟲寄宿的溫床，所以著有一大陣清潔魚會定期綴佇伊的身軀邊幫伊清除寄生蟲佮死皮。一大陣的蝠魟佇海裡若親像𤆬家己的化妝師咧梳妝打扮。自按呢，自然就形成一个「海中清潔站」，予海洋內底呈現一幅壯觀奧妙的畫面。

蝠魟佮海翁仝款，是胎生，一擺生一胎，是大自然珍貴的資產，已經立法保育。便若有人有傷害蝠魟的行為，就算犯法，會〔予人〕判半年的徒刑，抑是三萬箍的罰金。

人類愛放棄將蝠魟做成魚翅抑是中藥材的貪念，予好好仔佇海洋巡遊，做一个優雅飄逸的「海洋旅行者」，為海洋妝點出上媠的美景。(338 字)


17

問題 17：

大部份的人攏有家己的好朋友，甚至是知己，你敢有好朋友？敢有啥

物難忘的記持？

知己作者：蔡宛蓉

俗語講：「佇厝靠爸母，出外靠朋友。」人的一生中，一定會熟識誠濟人，和別人做朋友。毋過，遐濟朋友內底，會真心對待，會互相當做知己的，可能干焦兩三个爾爾。

我有一个親像姊妹仔伴的知己，她叫做旻娟。阮對大學熟識到今，已經有七冬矣。無論是拄著歡喜的代誌，抑是心情的時陣，阮攏會互相鼓勵，做伙陪伴。

有一擺，下課欲轉去厝的時，發覺袂記得紮鎖匙，上慘是阮兜閣無人，只好佇街仔路賴賴趖。行甲無所在通去，雄雄有人拍我的尻脊骿，彼个人就是旻娟。伊𤆬我去兜食點心、開講、講心事。自彼陣開始，我就將伊當做是知己。

一直到今，阮的感情猶是誠好，希望阮會當做一世人的好朋友。(272 字)


18

問題18：

自細漢到大漢，你敢有佮意的物件？將你佮意的物件描寫出來。

我上佮意的物件作者：蔡宛蓉

佇囡仔時代，逐家攏有屬於家己上佮意的尪仔抑是𨑨迌物仔。彼个物件是每一个人囡仔時陣的記持，嘛是彼个年代的代表。

我細漢的時陣，上佮意一隻貓仔形的尪仔，伊的身軀攏是白色的，鼻仔是黃色的，伊上特別的，就是倒爿耳仔有結一个紅色的 tsiű-tsiú，而且伊無喙，看起來予人有一種古錐又閣溫暖幸福的感覺—伊叫做『Hello Kitty』。

自細漢到大漢，我身軀邊有逐種 Kitty 的物件陪伴我，到今我的房間內底，嘛有 Kitty 的形影，逐擺若看到Kitty，毋管歡喜抑是悲傷，我攏會有誠媠的心情。我欲予 Kitty 陪伴我到老，予我一世人攏有溫暖幸福的感覺。 (234 字)


19

問題19：

逐年的生日你是按怎過？是厝裡的人共你過生日，抑是你的朋友共你

過生日？生日的時陣，你敢有收著啥物禮物？過生日的時，你的心情

是按怎？

過生日作者：盧美毓

生日，就是接受祝福的日子。逐冬過生日的時，阮朋友攏會替我做生日，雞卵糕、卡片、禮物，一項攏無減；感謝朋友對我遮好，予我彼工實在誠歡喜。

生日，嘛是感謝阿母的日子。一直到阮阿母破病了後，我才知影無阿母就無我，感謝阿母忍受生囝的苦痛，一粒紅紅共阮飼甲大人，感謝阿母共阮晟，感謝阿母共阮惜命命。

俗語講「大人生日食肉，囡仔生日食拍」；父母的恩情較大天，咱做序細一定愛記蹛心肝穎仔。這馬過生日，會換我共阿母說多謝，按呢的生日我過了閣較有意義。(213 字)


20

問題20：

生活中道理滿滿是。自細漢到大漢，恁厝裡的人有教過你啥物道理？

敢有特殊的經驗？

阿爸教我的道理作者：盧美毓

小學六年仔的時陣，我是學校的路隊長。個性條直的我，絕對會叫逐家排甲齊齊齊。有一工，有人插隊，我叫伊排對後壁去，伊起毛䆀，面懊嘟嘟，行到上煞尾。

行出學校了後，彼个同學行來我後壁，用跤蹔我的冊包，害我的冊包有一个大跤印。伊閣提石頭仔共我掔，好佳哉無掔著。轉到厝，我就共阿爸講這件代誌，阿爸叫我隔轉工家己去共主任投。彼當時，我氣怫怫，氣阿爸攏無愛替我出頭。

隔轉工，我真正去共主任講，主任隨替我處理，彼个同學予伊罵甲臭頭，閣予伊警告，講袂使接近我。原來，阿爸是希望我拄著代誌，愛學會曉家己去處理。這就是阿爸教我的道理。(255 字)


21

問題21：

畢業了後你敢有參加過同窗會，有人足愛參加同窗會。有人對同窗會

無啥物興趣？您敢有去過參加過同窗會？您敢有難忘的同窗會？

同窗會作者：田美瑜

三不五時，會聽著同事朋友去參加同窗會，誠欣羨。毋過逐擺阮班長敲電話，相招欲參加同窗會的時陣，我攏講錢歹趁囝細漢，我行袂開跤。就按呢，二十五冬就過矣。今年歇熱班長閣問講，有一个同學會對美國轉來，想欲開同窗會。地點佇臺中的高鐵站，彼个所在會使予蹛佇臺北的我，真緊就會使轉去厝，嘛會使予我轉去臺中後頭厝看阮阿母。這擺我想想咧就頕頭答應矣。

這改我上早到位，看著同學一个仔一个出現，佮以早阮讀冊的時陣，無啥物改變。逐家開講嗤舞嗤呲袂厭𤺪，班長閣買咱臺北上出名的王梨酥，予逐家做伴手。蹛臺中的嘛買太陽餅予逐家，上尾，一个開公司的同窗，閣規氣請逐家食這頓飯，阮就滾耍笑，攏叫伊頭家娘。就按呢，時間一目𥍉仔就過去矣，這擺的同窗會真正是有食閣有掠！ (315 字)


22

問題22：

逐年攏有風颱會來，佇你的記持中你印象最深的是佗幾擺？您敢有難

忘的風颱經驗?

風颱作者：田美瑜

逐擺新聞報講有風颱欲來的時陣，阿母就會共阮講，阮細漢的時，捌拄著一擺足恐怖的風颱。

彼年的熱天，三兄欲讀國校仔的前一工，看伊歡歡喜喜共鉛筆觳仔、冊包、新 tshat-tshat 的學生衫攢好勢才去睏。想袂到半暝阮當好睏的時，耳空邊煞聽著厝邊喝甲大聲細聲: 「水來矣! 緊走!」阿爸佮阿母緊對眠床趒起來，一人偝一个，閣搝一个，準備欲走。阿母足緊張，兇兇狂狂就對大門傱出去，路裡烏趖趖，阿母看袂清楚，無細膩煞跋落路邊的大水溝。好佳哉，隔壁的 oo-jí-sáng 有聽著阿兄咧大聲喝救人，才共阿母對溝仔底搝起來。阿爸偝我對後爿山路一直走，我覆佇阿爸的尻脊骿，雨沃佇阮的身軀頂，天頂烏烏暗暗，阮心內茫茫渺渺。

隔轉工我目睭擘金的時，發覺阮規家伙仔已經安全佇廟裡，就按呢，阮佇廟遐蹛幾若工。因為厝裡的傢俱攏浸著水袂用得矣，連阿兄新點點的冊包，嘛毋知流對佗位去!

（354 字）


23

問題23：

地名有伊的來源，恁敢知影一寡仔地名按怎來？你敢捌聽過關係地名的故事，請您將故事寫出來。

開講講「鶯歌」作者：蔡寶蓮

講著貯物件的瓷仔，大部分是鶯歌出產的，毋過恁敢知影鶯歌鎮的地名按怎來？

在地人，外地人講法無相仝；我佇鶯歌鎮食頭路十外冬，我知的就有四款，提出來和大家罔開講。

有人講山仔跤落南有一粒石仔，形體親像一隻「鶯哥」鳥，就共叫做「鶯哥」。

「北投出火炭，鶯歌出碗盤」；因為燒瓷仔工廠真濟，煙筒衝煙霧霧「坱坱」，落雨塗跤□□「膏膏」，地名才號「坱膏」。

鴟鴞精來作怪，鄭成功的大炮磅予伊無命摔落來，化做一粒「鷹仔」的石頭，地名「鷹哥」按呢來。

祖先渡海來臺灣，拍拚討食，毋管漳抑是泉，逐家鬥陣來開墾，遮風避雨起破厝，一間兩間……到十一間，鶯歌舊街仔叫做「十一間」。

臺灣各地地名藏著先民的鄉土情。改來改去，到底啥人講的才是真，值得咱研究。 (308 字)


24

問題 24：

俗語講：「一个囡仔較鬧熱三个大人」，毋知你的看法是按怎？

囡仔的笑聲作者：蔡寶蓮

學校六年的大漢阿姊和大漢阿兄真𠢕跳索仔，連鞭按呢跳，連鞭閣按呢跳。一年仔的小弟小妹佇邊仔看甲喙仔開開開，閣一直那拍噗仔那喝：「真厲害！真厲害！」。

囡仔的笑聲予我想起以早。我翻頭一下想，我頭仔來這間國小教臺語，遮的囡仔才讀一年仔爾爾，[啥人] (siáng) 知影一下仔就讀甲六年矣！時間確實過了真緊。我這馬教一年仔的體育課，定定聽著的笑聲，看著的笑容，看著一直咧學大漢阿姊、大漢阿兄的撇步。人講「有樣看樣，無樣家己想。」掠準跳索仔遐簡單是無？「食無三把蕹菜就欲上西天」。

毋過學物件的動機是遐爾仔天真，嘛真有學習的精神。看古錐的模樣，我感覺有囡仔的所在就有笑聲佮快樂，囡仔的笑聲就是性命的源泉；莫怪俗語咧講「一个囡仔較鬧熱三个大人」。(317 字)


25

問題25：

暗時仔聽大人佇遮膨風，叔公講伊日本時代上蓋勇，你有啥物上勇閣

趣味的代誌？

上蓋勇作者：李宜芳

逐家攏有聽過聖誕老阿伯駛公車，毋過你敢有看過聖誕妖

嬌老師佇學校教冊咧？會記得十冬前的聖誕節，我騎我彼臺五

十仔去學校，身軀穿一軀聖誕洋裝，裙紩糖仔，沿路攏有一寡

人佇遐看，到學校雄雄有一陣囡仔綴前綴後，袂輸干若明星仝

款，人氣足旺的，一个仔一个攏等待我分糖仔予，無糖仔的時，我就走予逐，袂輸家己閣十七八歲，比囡仔耍甲閣較歡喜，上課的時，看著學生囡仔歡喜的表情，閣一直問講明年敢會使閣予我教，規節課認真的形，我知影佇的心肝底，我是拄著上勇的老師，這就是我家己感覺上蓋勇閣趣味的代誌。(242 字)


26

問題26：

有人蹛臺灣頭，有人蹛臺灣尾，逐家攏是為著理想來臺北拍拚，你會

使用上臺灣味的方式，紹介你的故鄉？

故鄉作者：李宜芳

「有幾間厝，用磚仔鞏……」，逐擺若聽著這條歌，就想著離開二十偌冬的故鄉：高雄。細漢的時，阮兜四箍輾轉攏是田園，定定鼻著草仔的芳味，早起會聽著蟋蟀仔咧叫，厝邊頭尾的囡仔嘛定定相招去灌肚伯仔，掠四跤仔。對我來講，高雄毋是干焦一个地名，伊是充滿記持的所在。細漢的時，阿爸定定𤆬阮去西仔灣看日頭落山，看了會去中山大學的邊仔食海產，食煞閣去看夜景搧海風，順紲看大學生佇遐談情說愛。雖然海風有淡薄仔冷，毋過會當佮厝裡的人做伙，心內感覺誠溫暖。若講著愛河，二十冬前是臭 konn-konn，經過整治，才有這馬遮爾媠的真愛碼頭，會當佇遐啉咖啡，閣會使坐船去旗津。若是想欲半暝食宵夜，就去六合夜市，遐有食閣有掠，閣有物件通𨑨迌。高雄土地真闊，好耍的所在一大攤，若欲講煞一山坪，有閒才來高雄行踏，我這个免費的導遊就佇遮，包你歡喜閣滿意。 (349 字)


27

問題27：

你敢有看過大愛劇場無？每一个主角，攏有一段感動人的故事佮奮鬥

的過程，你敢有難忘的故事抑是奮鬥的過程？寫看覓咧。

感動的故事作者：李宜芳自細漢阮爸母就共我惜命命，阿母不時就共人講我是一

个搭心閣乖巧的查某囝，逐家嘛足欣羨阮阿母有我這个查某囝。毋過佇我二十歲彼年的歇熱，阮爸母坐仝車出車禍，阿母的跤鞏石膏托柺仔，愛靜養一段時間；我佇厝顧，煮飯洗衫攏總來，爸母講飼著我足感心。開學了後，阿母閣托柺仔陪我去學校註冊，我竟然為著面子，毋佮阿母行做伙。

一直到我二十三歲彼冬，我駛車予公車直直撞著，玻璃鑿入去頭、面佮手，真嚴重，我的爸母毋但無棄嫌我，閣安慰我，講若是恢復了無好，咱才來整容。我才了解家己進前有偌不孝，嘛了解「爸母疼囝長流水，囝想爸母樹尾風」，爸母永遠袂嫌家己的囡仔䆀。我感謝天公伯仔予我有機會改過，對彼陣開始到這馬，逐冬的母親節，我攏會共學生講這个故事，誠心向望逐个囡仔毋通佮我犯仝款的錯，愛好好珍惜爸母予咱的幸福。(341 字)


28

問題28：

細漢做囡仔讀冊的時陣，您敢有足趣味的代誌發生？假使欲描述以早讀冊的時，恁上難忘的是啥物？

做囡仔時代作者：田美瑜

我細漢的時陣，讀冊愛步輦差不多三十捅分。毋過，有時陣因為阿爸佇電力公司食頭路，會使順紲坐交通車。唯一毋好的所在就是愛較早起床。有一擺我青磅白磅傱去坐車，阿母煞對後壁逐過來，原來是我干焦趕欲坐車，煞袂記得愛揹冊包，這馬想起來真見笑。閣有一擺是中晝才去讀冊，因為以早一年仔的人傷濟，上課愛分早起抑是下晡，同學佮我行做伙。到位的時陣，感覺時間猶閣冗剩，阮就去溪仔邊掠魚耍水，等時間袂赴矣，才緊對小路傱去，無拄好，拄咧創路，小路煞變做兩枝長長的竹篙，徛佇咧竹篙面頂，若跋落下跤...…後果是不堪設想。我規个人愣佇遐，真正是叫天天袂應，叫地地無靈。我那行那掣，心內想講我那會舞甲這款地步咧? 這馬想想嘛真趣味，這就是我做囡仔時代的笑詼，實在予我足懷念！ (318 字)


29

問題29：

你對現代的交通有啥物看法？請你寫看覓你看著的交通現象。

交通作者：黃震南

這馬強欲會當講家家戶戶攏有車，毋過車傷濟，嘛造成交通佮空氣的大問題。本來買車是為著欲利便，結果買車了

後，嘛愛煩惱油錢起價，嘛愛煩惱窒車，嘛愛煩惱揣無停車

位，顛倒定定誠無利便。所以逐家咧講，盡量相招朋友做伙

坐車，路頭仝款駛遐爾遠，會使加載幾仔个，按呢敢毋是省

油閣較袂窒車咧？較捷坐捷運抑是公車嘛是好辦法，若逐个

人較莫駛車出門，騎機車的人莫烏白軁、烏白傱，行路的人

攏會當遵守交通規則，公車一定會使行閣較順，準時到位，

咱的交通絕對不止仔利便，閣會當予這片土地閣較清氣的環

境。 (234 字)

Documents

· 伯仔，兩爿做生理的頭家，攏會攢一大堆的炮仔，點予著了後， 才掔對土地公的輦轎內底。規街仔路攏是炮仔聲，細漢的我， 知綴毋知驚，佇咧輦轎仔後壁硞硞綴，一直到上尾仔。聽阿母

· 伯仔，兩爿做生理的頭家，攏會攢一大堆的炮仔，點予著了後，才掔對土地公的輦轎內底。規街仔路攏是炮仔聲，細漢的我，知綴毋知驚，佇咧輦轎仔後壁硞硞綴，一直到上尾仔。聽阿母