Via Transishon - Edishon 3

Via Transishon | Ministerio di Tráfiko, Transporte i Planifikashon Urbano

1

5 pida lèter! Kombinashon di hopi lèter ta forma un palabra. Un palabra masha bunita i importante ta formá pa solamente 5 pida lèter! E palabra aki ta Danki! Risibí gradisimentu ta algu masha dushi! Bo ta sinti bo bon pa por a yuda un otro hende. Bo sa kiko ta mas dushi ainda? Yama un otro danki! Pa medio di e Via Transishon aki, Tim di Maneho ke yama bo danki! Danki pa bo aporte di tur dia! Abo sa kuantu trabou i esfuerso bo ta invertí den bo trabou, den bo organisashon i di e forma aki den nos ministerio. Bo meresé un danki! Pues... Di Kurason: Danki!Di Kurason: Danki!Di Kurason: Danki!Di Kurason: Danki!

Nos ke enkurashá bo pa manda bo preguntanan, remarkenan i ideanan pa nos pa asina nos por informá bo mas mihó via di [email protected]. E via transishon aki lo agregá hopi aspekto great mas na bo konosementu manera: - Meteo ku tremendo training! - Seshon di informashon pa tur ámtenar. - VVRP Spotlight: Sera konosí ku... - Koleganan di VV den un ambiente nobo! - Reunion, reunion i mas reunion!

Edishon #3


2

Meteo ku tremendo training!

Nos koleganan na Servisio Meteorológiko di Kòrsou ta traha masha duru mes tur dia pa duna e mundu di aviashon, e mundu marítimo i públiko en general e informashon nesesario i importante tokante di nos klima. Pa forma un mihó ambiente di trabou i stimulá bon teamwork, Meteo a tene un seshon di training pa tur su empleadonan últimamente riba dia mundial di Meteorologia.

Durante di e atardi aki empleadonan a kome huntu, traha riba tareanan masha kreativo i interesante i tambe relahá un ratu for di e trabounan di tur dia. Den bida nos tin mester di e partinan sosial aki tambe pa nos desaroyá komo un organisashon! Pabien un biaha mas na tur nos koleganan di Meteo i sigui ku e bon trabounan!


3

Seshon di informashon pa tur ámtenar!

Últimamente tin hopi informashon ta sirkulá den tur medio di komunikashon tokante medidanan manera AOV, Seguro Sosial, situashon finansiero di Pais i hopi otro aspekto mas ku por tin influensha riba nos aparato gubernamental i pa ámtenarnan. Kiko abo mes sa di tur e kosnan aki? Bo ke sa mas tokante di seguro sosial i e impakto ku esaki tin pa abo komo ámtenar? Tin medidanan na kaminda pa nos? I kua nan ta? E organisashon konosí komo HRO Human Resource en Organisatie di Ministerio di Gobernashon, Planifikashon i Servisio Públiko (BPD) huntu ku Direktorado di Komunikashon i Informashon ta organisando seshonnan di informashon den mei pa tur ámtenar. Tópikonan ku ta bini dilanti ta entre otro: situashon finansiero, ehersisionan pa redusí gastu i kita “waste”, ehersisio i proyektonan pa

optimalisá aparato, AOV, Penshun, Seguro Básiko, i mas tópiko interesante. Durante e seshon nan aki, Minister Presidènt lo hiba palabra i miembronan di Stuurgroep manera Sekretario General di Ministerio di Finansa i di Ministerio BPD, SOAB, representantenan di SVB, APC i di Ministerio di Salubridat, Medio Ambiente i Naturalesa, lo duna mas informashon i kontestá preguntanan tokante e tópikonan menshoná. Nos ta invitá bo i enkurashá bo pa bo ta presente durante un di e seshonnan menshoná pa asina bo keda bon informá! Despues lo tin mas seshon den gruponan mas chikitu pa kada ministerio i departamentu spesífiko. Sòru pa bo no pèrdè! Mas informashon tokante e dia ku ta toka nos ministerio ta na kaminda! Keda pendiente!


4

VVRP ‘Spotlight’ – Sera konosi ku Nuraica!

E luna aki nos tin un parti speshal den nos edishon! Nos ke laga abo sera konosí ku un kolega di ministerio. VVRP ta un ministerio grandi ku diferente organisashon i kada un ku diferente tareanan. Nos tin un kantidat grandi di koleganan ku diferente konosementu i eksperensia. Den e edishon aki nos ta sera konosí ku Nuraica Meriën! Ken ta Nuraica?

Nuraica a nase na Kòrsou dia 23 di mart 1971 den e bario di Charo. E tin 3 aña ta traha den gobièrnu i e tin un yu muhé masha bunita ku yama Tiarah, kual su mama ta masha orguyoso di dje. Nuraica a finalisá su HAVO na MIL i despues a sigui rumbo pa Hulanda pa hasi su estudio di MEAO. Despues di a finalisá MEAO, el a sigui desaroyá su mes hasiendo un estudio di Middle Management i a traha algun aña na Rijkswaterstaat komo ‘Management Ondersteuner' i despues na Gemeente Den Haag. Na 2007 Nuraica a regresá Kòrsou, laborá dos aña na Fortis Bank i despues a drenta servisio di gobièrnu na AJZ. For di 1 di yanüari 2012 Nuraica ta forma parti di nos ministerio den Staf Ministerial.

Nuraica ta un hende muhé ku ta stima su Dios i tin n'E na promé lugá den su bida. Den palabranan di Nuraica: "Un sonrisa, un aktitut positivo i integridat semper ta habri portanan den bida pa nos progresá!"

Unda Nuraica ta traha?

Nuraica ta forma parti di e Staf Ministerial. Staf ta responsabel pa sostené henter e ministerio riba tereno Finansiero, Rekurso Humano, Komunikashon i ‘ICT’ i tambe ta konsistí di ’Management Ondersteuners’ pa e tim di maneho di e ministerio. Kiko tur Nuraica ta hasi?

Nuraica ta 'Management Ondersteuner' di Sekretario General di nos ministerio i mènedjer di ofisina na Seru di Arrarat. Den su trabou diario Nuraica ta atendé ku tur korespondensia ku ta drenta i sali pa sekretario general i ta atendé tambe ku tur asuntu di ofisina. Nuraica tambe ta den e 'adviescommissie bezwaarschriften' kual ta un komishon temporal di nos ministerio ku ta atendé ku tur opheshon ku drenta relashoná ku e ministerio. Nuraica ta forma parti tambe di 'werkgroep gerechtelijke procedures' kual ta e grupo ku ta kordiná redukshon di gastunan ku tin di haber ku kasonan den korte. E trabounan aki sigur ta unu ku ta tene Nuraica sumamente okupá i tur dia tin kosnan nobo ta presentá! E ta hasi su trabou ku hopi dedikashon i konosí komo un kolega trahadó i super dinámiko! "Mi gusta challenge", ta lokual ku Nuraica mes a indiká!


5

Koleganan di VV den un ambiente nobo! Aya na Parera awor tin mas kolega di nos! Abo tabata sa? Servisio pa Tráfiko i Transporte a muda pa un edifisio renobá aya na Parera. Awor nan tur ta bisiña di nos koleganan na Servisio pa Obra Públiko. 10-10-10 a duna bida na diferente organisashon! Servisio pa Tráfiko i Transporte ta un di nan, un di e yunan di Pais Kòrsou. E ta un servisio ku ta kombiná algun di e tareanan di departamentu di Transporte Públiko di ántes ku algun di esnan di Servisio pa Obra Públiko.

E servisio ta forma parti di nos Sektor di Tráfiko i Transporte i ta enkabesá pa Sr. Melvin Doran. Servisio pa Tráfiko i Transporte ta un organisashon di ehekushon ku ta duna konseho relashoná ku otorgá pèrmit pa transporte públiko. Banda di otorgá pèrmit e organisashon di ehekushon ta enkargá ku kùrmentu di vehíkulonan motorisá. Ku e pakete di tarea aki, Servisio pa Tráfiko i Transporte ta, pa un parti, responsabel pa garantisá seguridat den tráfiko riba kaminda den Pais Kòrsou.


6

Reunion, reunion i mas reunion! Reuní ta un método importante den komunikashon. Nos ta bini huntu pa elaborá, palabra i disidí riba tur aspekto den bida. Esaki ta tantu den nos bida personal komo na trabou. Den gobièrnu i den nos ministerio tambe e aspekto di reuní pa kompartí informashon i tuma desishon huntu ta un aspekto masha importante! Den e kuadro aki nos ke kompartí ku bo algun di e reunionnan importante ku ta tuma lugá regularmente den gobièrnu i tambe den nos ministerio. Konseho di Ministerio

Tur siman riba djarason mainta Konseho di Minister ta bini huntu pa trata tur tópiko ku ta biba den gobièrnu.

Sekretarionan General

Kada ministerio di Gobièrnu tin un Sekretario General ku ta responsabel pa manehá e ministerio. E Sekretarionan General di tur ministerio ta bini huntu kada 2 siman riba djamars mainta pa trata aspektonan importante ku ta toka tur ministerio.

Tim di Maneho

Kada 2 siman riba djamars atardi tim di maneho di nos ministerio konsistiendo di Sekretario General Sr. Dwigno Puriel, Direktor di Infrastruktura i Planifikashon Urbano Sra. Caroline Gonzalez-Manuel, Direktor di Sektor di Tráfiko i Transporte Sra. Giselle Hollander i Direktor interino di Organisashon di Maneho Sr. Myron Eustatius, ta bini huntu pa diskutí riba diferente aspekto. Tópikonan ku ta trata durante e reunionnan aki ta partisipashonnan importante, asuntunan

general ku ta konta pa henter gobièrnu òf henter e ministerio i desaroyonan den kada sektor di nos ministerio. Direktornan VVRP

Kada 2 luna, direktornan di tur servisio di nos ministerio ta bini huntu pa diskutí riba diferente punto di relevansia pa henter e ministerio. Esaki ta djis algun di e reunionnan ku ta tuma lugá regularmente.

Teps pa reunion!

Abo tambe ta reuní frekuentemente? Wèl, ata aki algun teps pa bo ta aktivo durante kualke reunion:

• Yega semper na ora. Di e forma aki, bo no ta pèrdè niun detaye.

• Prepará bo kontribushon, a base di e agènda, for di trempan.

• Paga bon atenshon na kada persona ku ta papia.

• Partisipá aktivamente dunando bo opinion a base di puntonan spesífiko.

• Sea respetuoso. Lo bo no ta di akuerdo ku tur hende tur ora, pero respetá e otro su opinion.

Documents

Via Transishon - Edishon 3