Yeqsur

Daefle‑euq

Garkawv

Fellowship of Akha Christians (FAC)Aqkaq Kalizaq Cawq Cawqtaf-eu Armur

YaerDawq KhawqNymrAkha Outreach Foundation

in association with

© 2012Bibles International®

Baptist Mid‑Missions’ Translation, Publishing, and Literacy Services609 36th ST SE Grand Rapids, Michigan 49548‑2317 USA

© 2012Aqkaq Kalizaq Cawq Cawqtaf-eu ArmurFellowship of Akha Christians (FAC)

ISBN 1-59645-096-7

3

Yeqsur Daefle maelaer Tsafgaq le‑euq

Yeqsur maqdaef le‑euq minav‑aer ghawqmya yarkhof

javngae nae, Miqyaer, aqyawf‑euq gharduq ngaeqdan‑eu

tsawrhaq‑anr ghoe‑awr nae, aqyawf‑euq tsawrhaq‑anr

Kakhof‑eu ghaq bi’oe malaer aertaq‑awr aqjox‑aer daefle

lalaer khawf aertaq‑euq mae.

Irsaqyar 40:1‑11

1 Nawmaf‑euq Miqyaer heulof‑aer aer‑eu mae: “Nawmaf, ngaq‑euq tsawrhaq deuq‑anr nuima lavsar naeq‑awq, nuima lavsar naeq‑awq.

2 Yeqlursaqlaeq‑anr ghaq bif‑eu dawq ngaeqnaeq‑awq. Aqyawf‑anr heulof‑aer gurgaq naeq‑awq, aqyawf guir yadeuv‑eu aryamq‑aq jir‑awr, aqyawf‑euq iqbax aryoeq yurdzae naeqghaq‑euq ma. Aqjeq mirnae aernar‑aq, Aqyawf nae mr‑euq iqbax dawqtawv luf‑euq arpoeq, Miqyaer Ya’we nae nyiqbymr byan’ni khaeqnaeq khavnaeq ghaq‑euq mae.”

3 Tsawrhaq tiqghaq bawrtsanq bawrdanr‑anr jawr‑awr heulof‑aer gur‑eu mae: “Miqyaer Ya’we‑euq gharduq garma dawrcoeni shardanr‑awr, kharshuif dae‑anr aqdui‑euq Miqyaer‑euq garjawq dawrcoeni lavsav‑awq.

4 Ghaqlawq yawqlawq navluf yadzm lar‑awr, gawqjawq hawr‑eu gawqdur dawqtawvluf yadile taef‑a. Garghof deuq yalav dawr‑awr, maqdi‑eu garma deuq yalavdi taef‑a.

5 Miqyaer Ya’we‑euq yawshaef khanqsaer panmaeq le‑awr, tsawrhaqzaq dawqtawvluf tiqkawv lof‑aer ya’mawr taef‑a. Aqjeq mirnae aernar‑aq, heu‑aq Miqyaer Ya’we‑euq khaqmae‑anr nae ngaeqdov lef‑euq dawqmae.”

6 Tsawrhaq tiqghaq‑euq tersar aer‑eu, “Gurgaq naeq‑awq.” Aqyawf narhaq‑eu, “Ngar aqjeq yagur gaqnaeq la?” Heulof‑aer gurgaq naeq‑awq: “Tsawrhaqzaq dawqtawvluf yarmof lof‑aer

4

dur‑awr, aqyawf maf‑euq khanqsaer deuqkhawf bawrtsanq yarmof‑euq aryaev‑anr dur‑eu mae.

7 Miqyaer Ya’we saf bawdav ngae, yarmof nyoeq‑ir‑awr, aryaev kov‑ir‑eu mae. Tsawrhaq zaq‑aq, aqdir ma‑aer yarmof‑anr dur‑eu mae.

8 Yarmof nyoeq‑ir‑awr, aryaev kov‑ir taef‑a. Aerkhawf, aqdui‑euq Miqyaer‑euq dawq‑aq mqmaq maqbyav yarzir zif‑eu mae!”

9 Laqkhaq caer‑eu guiqlanqdawq piluf‑eu Ziroq‑or, nawr gawqjawq yawgor‑anr davler‑awq. Laqkhaq caer‑eu guiqlanqdawq piluf‑eu Yeqlursaqlaeq‑or, nawr tersar yawkhav khav‑aer gur‑awq. Taqguv, gurkhav lef‑awq. Yurdav‑euq meuqdeuq‑anr heulof‑aer aernaeq‑awq, “Hawde‑eq, heu‑aq, nawmaf‑euq Miqyaer mae!”

10 Hawde‑eq, Sanqpaq Miqyaer Ya’we‑aq, ghaq khavdui dui‑eu tiqghaq lof‑aer oe taef‑a. Aqyawf‑euq lafdu nae aqyawf uvlanr taef‑a. Hawde‑eq, aqyawf‑euq lafsawq aqyawf jawrgar jav‑awr, aqyawf janrkhof naeq‑eu jeq aqyawf‑euq maeqshi jav‑eu mae.

11 Aqyawf, aqyawf‑euq yawrmaf‑anr Yawr bo‑eu yawsanr lof‑aer bosavnaeq taef‑a. Aqyawf, yawrzaq deuq‑anr lafdu nae yavuiq laf‑awr, aqyawf‑euq bawrkhanr‑anr nyaefur‑awr, yawr zaqnanq‑euq aqma deuq‑anr arza za‑aer sheuqghae taef‑a.

Yorhaq Daefle maelaer Aernaeq le‑euq

Lurkaf 1:5‑25

5 Heqlor, Yurdav mirkhanq‑anr uvlanr lufngae, Aqbiryav‑euq armaf lafkhoer Zaqkaqlir laer kur‑eu pirma tiqghaq jawr‑eu mae. Aqyawf‑euq nymrdanq‑aq, Aqloq‑euq arjeuq arca‑anr taf‑eu Erlirsaqbaev laer kur‑eu mae. 6 Aqnyaf dzerzaq Miqyaer‑euq maeqshi yawtsaq yawdawr tsawrhaq mae. Sanqpaq Miqyaer‑euq Zanrdawq khofdawq hawr‑eu zanrsanrkhof dawqtawv luf‑euq

5

maeqnan cantae‑awr, tiqjeq‑anr‑iq aerkhar maqza‑eu tsawrhaq mae. 7 Aerkhawf, zaq maqjawr‑a. Aqjeq mirnae aernar‑aq, Erlirsaqbaev‑aq, maqbaw aqma pyeuf‑awr, aqnyaf dzerzaq nyiqghaqluf mawqle‑euq mae.

8 Miqyaer‑euq maeqshi pirma ya’mr‑eu deuq Zaqkaqlir‑euq armaf‑anr darlar‑awr, 9 pirma deuq zanr jav‑eu lof‑aer tsaqhaw ngae aqyawf‑anr darlar‑awr, uqduq tanqnymr nymrma‑euq

lafkhoer urler‑awr, shanqlaeq dofluf‑eu mae.

10 Shanqlaeq dofler ngae, zaqlanr dawqtawvluf lafnyirpaw jawr‑awr guiqlanq sharluf‑eu mae.

11 Khoerngae, Sanqpaq Miqyaer‑euq mqtav ghaqkhaer tiqghaq dovle‑awr, shanqlaeq dofduq‑euq armarpaw yawfluf‑eu mae. 12 Zaqkaqlir ya’mawr ngae, yawkhav‑aer tsawqguv ir‑euq mae. 13 Khoerngae, Mqtav ghaqkhaer khoerghaq aqyawf‑anr heulof‑aer aernaeq‑euq mae: “Zaqkaqlir‑or, taqguv, Miqyaer, nawq‑euq guiqlanq shardawq gaq‑euq mae. Nawq‑euq nymrdanq Erlirsaqbaev, nawq‑euq gharduq aqli tiqli ciq taef‑a. Nawr, aqyawf‑anr Yorhaq laer myanrnaeq‑awq. 14 Nawr laqkhaqcaer duidui taef‑a. Aqli khoerli daefle‑euq mirnae, tsawrhaq ghawqmya ghaqkhawf laqkhaqcaer taef‑a. 15 Aqyawf,

6

Sanqpaq Miqyaer‑euq maeqshi yawhuiq yawmanrghaq pyeuflar taef‑a. Aqyawf‑aq, aqgaf dzaruir yawbyawq hawr‑eu aqgaf dzaruir yawtav khawf maqdawr‑ar. Aqma‑euq uqmav lafkhoer urngae nae, Yawshawr Saflar tiqbyan’ni byan taef‑a.

16 Irsaqleqlav tsawrhaq ghawqmya ni‑anr aqyawf maf‑euq Sanqpaq Miqyaer jawrpaw aqyawf bighoflar taef‑a. 17 Aqyawf‑aq, Erlirya‑euq nuima hawr‑eu baoq anr‑eu lafkhoer, Miqyaer‑euq maeqshi ir taef‑a. Aqda hawr‑eu zaq tsaqler dzoerlerni maqaer, maqnarhaq geuf‑eu tsawrhaq yawtsaq yawdawr tsawrhaq‑euq zaqsiq tsawrganr‑euq maeqnan cantae larni maqaer, Sanqpaq Miqyaer‑euq gharduq aqyawf nuima tsaq‑eu zaqlanr laeqhmqtaq taef‑a.” 18 Khoerngae, Zaqkaqlir, mqtav ghaqkhaerkhoerghaqs‑anr aernaeq‑eu, “Khoerlof‑aer pyeuflar maelaer ngar aqjox‑aer yasiq la? Ngar mawqle‑euq mir‑a, ngaq‑euq nymrdanq khawf mawqle‑euq mae.”

19 Mqtav ghaqkhaer khoerghaq heulof‑aer aerkhof naeq‑euq mae: “Ngar‑aq, Miqyaer‑euq maeqshi yawfluf‑eu Gaqbeqlar ma, aqyawf, ngaq‑anr khaer‑awr laqkhaq caerlar paq‑aer ghae‑eu garkawv heu nawq‑anr bitsafgaq le‑euq mae.

20 Aryamq tsaqlar ngae, ngaqnae aer‑euq dawq heu byanlar taef‑a. Aerkhawf, nawr maqjan‑eu mirnae, garkawv heu, maqpyeuf lar‑euq khoer keuvni, nawr aqdzawq lof‑aer dawq maqngaeq nya’ni pyeuf‑ir taef‑a.” 21 Zaqlanr deuq Zaqkaqlir‑anr dawqluf‑eu mae. Aqyawf uqduq tanqnymr nymrma lafkhoer ghawqmyanrni jawr‑eu mirnae zanqler‑eu mae. 22 Aqyawf dovle ngae, aqyawf maf‑anr dawq maqngaeq cawqnya‑a. Aqyawf uqduq tanqnymr nymrma lafkhoer mawrle‑eu jeq tiqjeq nav‑anr ya’mawr‑euq ngalaer aqyawfmaf yasiq‑euq mae. Aqyawf dawq maqngaeq nya‑eu mirnae, aqyawf maf‑anr lafdzawr taef‑aer dzawrnaeq‑eu mae. 23 Aqyawf gar ya’mr‑eu arnan aryamq dzeur‑ir‑awr, irkanr ghof‑ir‑euq mae.

24Aryamq uicuiv myanrlar ngae, aqyawf‑euq nymrdanq Erlirsaqbaev, zaq tsaevler‑awr, bala ngaqsiq byan’ni tiqgar‑iq

7

maqdov‑ir ni jawr‑euq mae. 25 Aqyawf aer‑eu, “Sanqpaq Miqyaer, ngaq‑anr haw‑awr guiqlanq biflaf‑euq mae. Nymq‑mr pov‑aq, ngar, tsawrhaq‑euq maeqshi daqga‑eu jeq‑anr aqyawf yurdzae naeqlaf‑euq mae.”

Kali Daefle maelaer Maqliv‑anr Aernaeq‑euq

Erlirsaqbaev zaq tsaevler‑euq bala kofsiq byanlar

ngae, Miqyaer, mqtav ghaqkhaer Gaqbeqlar‑anr gar

yawqjeqyawq parbi mr‑euq mae.

Lurkaf 1:26‑38

26 Bala kofsiq byanlar ngae, Miqyaer, mqtav ghaqkhaer Gaqbeqlar‑anr khaer‑awr, Gaqliqlaer mirkhanq‑anr jav‑eu meuq tiqmeuq‑anr bi’ir‑euq mae. Meuq khoermeuq‑aq, Naqzaqlaer laer kur‑eu mae. 27 Daqbir‑euq arjeuq arca Yorshae laer kur‑eu

ghaq‑anr danqdzaq‑ir malaer dawqtsaev ngaeqtaq‑euq miqdaf dafshawr tiqghaq jawrgar dawqtsaf tsaf‑ir‑euq mae. Miqdaf dafshawr khoerghaq‑euq tsawrmyanr‑aq Maqliv laer kur‑eu mae. 28 Mqtav ghaqkhaer khoerghaq aqyawf jawrgar oe‑awr aer‑eu, “Guiqlanq zawrhuiq‑eu zaqmiq‑or, nawr nuisar ofluf‑ur, Sanqpaq Miqyaer, nawq naeq‑aer jawrluf‑eu mae!”

8

29 Maqliv‑aq, dawq khoerdawq baqda’nae tsawqguv‑ir‑awr, dawq teulof‑aer ngaeqghaenaeq laf‑eu teu, aqjeq aermawf‑eu ngalaer sharnoeq sharsawx luf‑eu mae. 30 Khoerngae, mqtav ghaqkhaer, aqyawf‑anr heulof‑aer aernaeq‑euq mae: “Maqliv‑or, taqguv, aqjeq mirnae aernar‑aq, nawr, Miqyaer‑euq maeqshi guiqlanq za‑euq mae. 31 Nawr, zaq tsaevler‑awr aqli tiqli yaciq taef‑a, aqyawf‑anr Yeqsur laer myanrnaeq‑awq. 32 Aqyawf yawhuiq yawmanrghaq pyeuf‑awr, Gordui dui‑eu ghaq‑euq Zaqyo laer yabi kur taef‑a; Sanqpaq Miqyaer, aqyawf‑anr aqyawf‑euq aqpoeq Daqbir‑euq dzoeqdzaq nuirmanq bif taef‑a. 33 Aqyawf‑aq, mqmaq maqbyav yarzir Yaqkov‑euq nymrkhanq sanqpaq geuf taef‑a, aqyawf‑euq mirkhanq arsaq saq‑eu maqbaw‑a.”

34 Khoerngae, Maqliv, mqtav ghaqkhaer‑anr aernaeq‑eu, “Ngar maqdanq dzaq‑ir‑aq siq, teulof‑aer aqjox‑aer pyeuflar nya‑eu?”

35 Mqtav ghaqkhaer heulof‑aer aerkhof naeq‑euq mae: “Yawshawr Saflar, nawq‑euq khoertav zafka le‑awr, Gordui dui‑eu ghaq‑euq baoq nawq‑anr joeshmrle taef‑a. Khoermirnae, daefle‑eu Yawshawr ghaq‑anr Miqyaer‑euq Zaqyo laer kur taef‑a. 36 Khoeruqtaf, dzeurlaf ngae maqbaw aqma laer bikur‑euq nawq‑euq aqyuif aqnyir Erlirsaqbaev khawf, mawqle‑euq gar aqli tiqli piluf‑awr, nymq‑mr bala kofsiq byanlar‑euq mae. 37 Aqjeq mirnae aernar‑aq, Miqyaer‑anr nae dovle‑euq dawq, baoq maq’anr‑eu tiqdawq‑iq maqjav‑a.” 38 Maqliv aer‑eu, “Ngar‑aq Sanqpaq Miqyaer‑euq aqbur zaqkhav ma, nawr aer‑eu lof‑aer ngaq‑euq khoertav bipyeufle mawfma.” Khoernar‑aq, mqtav ghaqkhaer ghawq‑ir‑euq mae.

Maqliv, Erlirsaqbaev Jawrgar Ghaler‑euq

Lurkaf 1:39‑45

39 Khoerngae, Maqliv dov‑ir‑awr, Yurdav mirkhanq‑euq lafkhoer danrtav jav‑eu meuq tiqmeuq‑anr yawkawr‑aer le‑euq

9

mae. 40 Zaqkaqlir‑euq nymr‑anr urler‑awr, Erlirsaqbaev‑anr dawqcawq puq‑euq mae. 41 Erlirsaqbaev, Maqliv dawqcawq puqlar gar yagaq‑euq naeq‑aer, aqyawf piluf‑eu zaq khoerghaq uqmav lafkhoer luvluv‑aer teuv‑eu mae. Khoeruqtaf, Erlirsaqbaev‑anr Yawshawr Saflar byanle‑awr, 42 tersar yawkhav khav‑aer heulof‑aer aer‑eu mae: “Nawr‑aq, zaqmiq aqbur deuq‑euq lafkhoer nae guiqlanq huiqdzaeq‑eu ghaq ngar‑a, nawq‑euq uqmav lafkhoer piluf‑eu zaqkhawf, guiqlanq huiq‑eu mae! 43 Ngaq‑euq Sanqpaq‑euq aqma, ngar jawrgar lar‑euq heu, ngar aqgeu garnae za‑euq guiqlanq nga? 44 Aqjeq mirnae aernar‑aq, nawr dawqcawq puq‑eu tersar ngaq‑euq naqbawr‑anr gaqlar‑eu naeq‑aer, ngaq‑euq uqmav lafkhoer piluf‑eu zaq laqkhaqcaer lar‑awr luvluv‑aer teuvluf mir‑a. 45 Nawr‑aq jan‑eu zaqmiq mirnae guiqlanqhuiq ngar‑a. Aqjeq mirnae aernar‑aq, Sanqpaq Miqyaer nae aqyawf‑anr kharaer naeq‑euq dawq yawqdawq navluf byanlar taef‑a.”

Maqliv‑euq Cardawq

Lurkaf 1:46‑55

46 Maqliv heulof‑aer aer‑eu mae: “Ngaq‑euq nuima Sanqpaq Miqyaer‑anr ciqhuiq ciqmanr ma,

47 ngaq‑euq saflar, ngaq‑anr Kakhof‑eu ghaq Miqyaer baqda’nae laqkhaq caernya,

10

48 aqjeq mirnae aernar‑aq, teq‑eu nyir‑eu aqyawf‑euq aqbur zaqkhav‑anr aqyawf noeqkeuvnaeq laf‑euq mae. Aqkar nar‑aq, tiqzir sair tiqzir ngaq‑anr guiqlanq huiq‑eu ghaq laer kur taef‑a.

49 Baoq huiq‑eu ghaq, ngaq‑anr huiqdui dui‑eu jeq janrnaeq laf‑euq mae. Aqyawf‑euq tsawrmyanr muiqmae shawrmae.

50 Aqyawf‑anr yawzeu baw‑eu tsawrhaq‑euq khoertav, aqyawf‑euq ghawqshaq gaq‑eu jeq tiqzir sair tiqzir jav‑eu mae.

51 Aqyawf‑euq lafdu nae baoq huiq‑eu deuq mr‑euq mae, yawqha‑euq nuinoeq nuilov geufgeuf‑aer nuima huiq‑eu tsawrhaq‑anr aqyawf taebyav‑euq mae.

52 Aqyawf, baoq jav‑eu deuq‑anr nuirmanq‑anr nae bi’oe ka‑awr, teq‑eu nyir‑eu deuq‑anr bidav ler‑euq mae.

53 Maef‑eu shuf‑eu deuq‑anr dzarkuir dzarmyaer tiqdaev bidzaq‑awr, smrmuiq smrbaw deuq‑anr yawqngaef yawqkuq‑aer bidov‑ir‑euq mae.

54 Aqyawf, aqyawf‑euq zaqkhav Irsaqleqlav‑anr cawba naeq‑awr, maqngaerni ghawqshaqgaq naeq‑euq mae.

55 Khoer‑aq, Aqbyaqhaq hawr‑eu aqyawf‑euq zaqdeuq uvdeuq‑anr mqmaq maqbyav yarzir ghawqshaq gaqma laer aqyawf, aqdui‑euq aqpoeq deuq‑anr aertaq‑euq lof‑aer mae.”

Maqliv, Naqzaqlaer‑anr ghof‑ir‑euq nar‑aq

ghawqmyanr maqghae‑aer, Erlirsaqbaev, zaqyo

tiqghaq ciq‑awr Yorhaq laer myanrnaeq‑euq mae.

Yaefnan byanlar ngae Morseq‑euq Zanrdawq

khofdawq aertaq‑euq lof‑aer, bavkhov maeqdzaq

yaeq‑eu laer aqyuif aqnyir deuq uiqlar‑euq mae.

Heungae‑aq, zaqnanq‑anr zaqmyanr myanr‑eu

11

zanr janr‑eu aryamq khawf pyeuf‑eu mae. Aqyawf‑euq

khaqdzerzaq Zaqkaqlir‑aq, uqduq tanqnymr nymrma‑euq

lafkhoer mqtav ghaqkhaer, aqyawf‑anr ngaeqcawq le‑euq

tafnar‑aq dawq maqngaeq nya’ni pyeuf‑ir‑euq khawf,

zaqmyanr myanr‑eu zanr janrghaq ngae, Miqyaer,

aqyawf‑anr dawq bingaeqnya lar‑awr, Zaqkaqlir,

Miqyaer‑euq gharduq ngaeqdan‑eu lof‑aer, aqyawf‑euq

aqli‑euq garkawv dawqcar car‑euq mae.

Zaqkaqlir‑euq Cardawq

Lurkaf 1:67‑79

67 Khoerngae, Yawshawr Saflar,Yorhaq‑euq aqda Zaqkaqlir‑anr byanle‑awr, Miqyaer gharduq heulof‑aer ngaeqdan‑euq mae:

68 “Irsaqleqlav‑euq Sanqpaq Miqyaer‑anr jaceuq‑eu tsaqmae. Aqjeq mirnae aernar‑aq, aqyawf‑euq zaqlanr‑anr aqyawf hawlanr‑awr, aqyawf maf‑anr kakhof‑euq mae.

69Aqyawf‑euq zaqkhav Daqbir‑euq nymrkhanq lafkhoer, aqdui‑euq gharduq huiqdui dui‑eu Kakhof‑eu ghaq bitur lar‑euq mae.

12

70 Sanqpaq Miqyaer khoerlof‑aer janr‑eu‑aq, arhu ba’nae muiq‑eu shawr‑eu Miqyaer gharduq ngaeqdan‑eu tsawrhaq deuq‑anr ghoe‑awr aertaq‑euq lof‑aer janr‑euq mae.

71 Aqyawf, aqdui‑anr muir‑eu tsawrhaq deuq hawr‑eu aqdui‑anr byae‑eu tsawrhaq deuq‑euq aqlaf lafkhoer nae aqdui‑anr kakhofnaeq laf‑euq mae.

72 Aqyawf, aqdui‑euq aqpoeq deuq‑anr ghawqshaq gaqgaq‑aer janrnaeq‑awr, aqyawf‑euq muiq‑eu shawr‑eu dawqma sarjax‑anr noeqkeuv‑euq mae.

73 Khoer‑aq, aqyawf nae aqdui‑euq aqda yawdzanr Aqbyaqhaq‑anr kamqtaq‑euq dawqmae.

74 Dawq khoerdawq baqda’nae aqdui‑anr muir‑eu tsawrhaq deuq‑euq aqlaf lafkhoer nae kakhofdov laf‑awr,

75 yawmuiq yawshawr hawr‑eu tsaq‑awr dawr‑eu lafkhoer, zir jirngae keuvni guv‑eu nuima maqanr‑aer, aqyawf‑euq maeqshi aqyawf‑euq gar mrnya‑eu mae.

76 Aqli‑or, nawq‑anr Gordui dui‑eu ghaq‑euq gharduq ngaeqdan‑eu ghaq laer kur taef‑a. Aqjeq mirnae aernar‑aq, nawr‑aq Sanqpaq‑euq maeqshi yale‑awr, aqyawf‑euq garma yashardanr taef‑a.

77 Khoerlof‑aer janr‑awr, aqyawf‑euq zaqlanr deuq‑euq iqbax pyaeqnaeq‑euq mirnae, kakhof‑eu jeq‑anr siqnyalar taef‑a.

78 Aqdui‑euq Miqyaer ghawqshaq gaq‑eu nuima anr‑eu mirnae, kakhof‑eu jeq uqshawq paw‑euq yawshaef mqtav nae aqdui‑euq khoertav bibya le‑awr,

79 yawzanr lafkhoer shir‑eu narshmr‑euq uqmov jawr‑eu tsawrhaq‑anr yawshaef bya’naeq‑awr, aqdui‑euq aqkuir‑anr nuisar of‑eu garma‑anr sheuqmaeqlaf taef‑a.”

13

Mqtav Ghaqkhaer Ngaeqcawq le‑euq

Maqliv, Naqzaqlaer‑anr ghofkeuv lerngae, aqyawf

danqdzaq‑ir malaer aertsaev taq‑euq Yorshae‑aq, Maqliv, zaq tsaevler‑euq ngalaer siqnya‑euq mae. Morseq‑euq

Zanrdawq khofdawq aertaq‑euq lof‑aer nar‑aq, Maqliv‑aq

khaqlo nae yabi biqsaef‑eu mae. Aerkhawf, Yorshae,

Maqliv‑anr khoerlof‑aer maqbi pyeuflar mawf‑a.

Maqtaeq 1:18‑23

18 Yeqsur Kali daefle‑euq garkawv‑aq heulof‑aer mae: Aqyawf‑euq aqma Maqliv‑aq, Yorshae‑anr danqdzaq‑ir malaer aertsaev taq‑euq mae. Aqyawfnyaf maqsheuq danqdzaq‑euq minav‑aer, Maqliv, Yawshawr Saflar baqda’nae zaq tsaevler‑euq gar yasiq‑euq mae. 19 Aqyawf‑euq khaqdzerzaq Yorshae‑aq, tsaq‑awr dawr‑eu tsawrhaq mae. Aqyawf, Maqliv‑anr aqcawq‑euq maeqshi myavpyawq narmaer maqbi cawv‑ir mawf‑eu mirnae, aqcawq‑anr maqbi siqni ghawqma laer noeqtaq‑euq mae. 20 Khoerlof‑aer noeqluf ngae, aqyawf yufmav mav‑eu lafkhoer, Sanqpaq Miqyaer‑euq mqtav ghaqkhaer dovle‑awr heulof‑aer aer‑eu mae: “Daqbir‑euq aqli Yorshae‑or, nawqnae

14

aertsaev taq‑euq Maqliv‑anr sheuqdanq dzaq‑eu taqnoeqshaq. Aqjeq mirnae aernar‑aq, aqyawf piluf‑eu zaq‑aq, Yawshawr Saflar baqda’nae tsaevler‑euq mae. 21 Aqyawf aqli tiqli ciq taef‑a. Nawr, aqyawf‑anr Yeqsur laer ya’myanrnaeq mae. Aqjeq mirnae aernar‑aq, aqyawf, aqyawf‑euq tsawrjeuq tsawrca‑anr iqbax lafkhoer nae kakhofdov taef‑a.”

22 Khoerdeuq dawqtawvluf pyeuflar‑euq‑aq, Sanqpaq Miqyaer, aqyawf‑euq gharduq ngaeqdan‑eu tsawrhaq‑anr ghoe‑awr aertaq‑euq dawq heudawq byanlar‑euq mae,

23 “Miqdaf dafshawr tiqghaq zaq tsaevler‑awr, aqli tiqli ciq taef‑a. Aqcawq, aqyawf‑anr Ermaqnoeqlar laer kur taef‑a.” “Ermaqnoeqlar” laer aer‑eu‑aq, “Miqyaer, aqdui naeq‑aer jawrmae” laer aermawf‑eu mae.

Irsaqyar 7:14

14 Khoermirnae, Sanqpaq Miqyaer aqyawf, nawmaf‑anr bisiq bi’mawr‑eu tiqjeq mrnaeqlaf taef‑a. Hawde‑eq, miqdaf dafshawr tiqghaq zaq tsaevler‑awr, aqli tiqli ciq taef‑a, aqyawf‑anr Ermaqnoeqlar laer ya’myanrnaeq taef‑a.

Maqtaeq 1:24‑25

24 Yorshae noeqlar‑awr tur‑euq nar‑aq, Sanqpaq Miqyaer‑euq mqtav ghaqkhaer nae aqyawf‑anr aernaeq‑euq lof‑aer Maqliv‑anr sheuqdav‑euq mae. 25 Aerkhawf, zaq khoerghaq maqciq‑euq khoer keuvni, Maqliv naeq‑aer maqyuf taf‑aq. Aqli khoerli daefle‑awr, aqyawf‑anr Yeqsur laer myanrnaeq‑euq mae.

15

Yeqsur Kali Daefle‑euq

Yorshae hawr‑eu Maqliv‑aq, Gaqliqlaer mirkhanq

Naqzaqlaer‑anr jawr‑eu mae. Aerkhawf, Yaerbof

lafkhoer Kakhof‑eu ghaq‑aq, Yurdav mirkhanq

Baeqlaeqhaeq meuq‑anr daefle maelaer byacaevni

aertaq‑euq mae. Miqyaer aqyawf nae aertaq‑euq lof‑aer

bipyeuf lar‑eu laer laeqhmq taq‑euq bawqtov jav‑eu

mae. Yeqsur daefle‑euq

garkawv jataq‑euq

ghawqmya’ni jav‑eu

mae. Aerkhawf, khoerjeq

heujeq‑euq kuv‑anr

laer teunav nav‑aer

maqaerkeuv taq‑aq.

Yaerbof lafkhoer‑aq,

zaqnanq Yeqsur

daefle‑awr jeqdzar

khawrlawq‑anr ciqyuf

taq‑euq maelaer

aertaq‑euq taefmae.

Lurkaf 2:1‑7

1 Khoerngae yamq‑anr, mirkhanqzaq dawqtawvluf tsawrmyanr yadawv maelaer Sanqpaq Gaersaq Awrgurtuv dawq bif‑euq mae. 2 Heupov‑aq, Surliv mirkhanq‑anr Gurleqnir meuqsanr geufluf ngae, tsawrmyanr dawvbae bae‑euq povmae. 3 Tsawrhaq dawqtawvluf tsawrmyanr dawv‑eu laer yawqha‑euq meuq‑anr ir‑euq mae.

4 Yorshae khawf, Daqbir‑euq arjeuq arca hawr‑eu dovof pyeuf‑eu mirnae, Gaqliqlaer mirkhanq‑anr jav‑eu Naqzaqlaer‑anr nae Yurdav mirkhanq‑anr jav‑eu Baeqlaeqhaeq meuq laer kur‑eu

16

Daqbir‑euq meuq‑anr, 5 aqyawf sheuqma laer aertsaev taq‑euq Maqliv naeq‑aer tsawrmyanr dawv‑ir‑euq mae. Khoerngae, Maqliv zaq ciqder le‑euq mae. 6 Aqyawfnyaf khoergar jawrngae, Maqliv zaq ciq‑eu aryamq tsaqlar‑awr, 7 huqbaw aqli‑anr baw‑awr, builoq loq‑awr nae, jeqdzar khawrlawq lafkhoer ciqyuf taq‑euq mae. Aqjeq mirnae aernar‑aq, daqyan yafduq‑anr yafkhar maqza‑a.

Yawr Bozaq‑anr Tsafgaq le‑euq

Lurkaf 2:8‑14

8 Baeqlaeqhaeq meuq‑euq yarpeuq‑anr yawr bo‑eu tsawrhaq, uqcifpaw yawrdeuq‑anr lofluf‑eu mae. 9 Sanqpaq Miqyaer‑euq mqtav ghaqkhaer, aqyawf maf‑euq dawqpae yawfluf‑eu mae. Sanqpaq Miqyaer‑euq yawshaef khanqsaer aqyawf maf‑euq

tiqjawq byale‑awr, yawr bo‑eu deuq guvdui dui‑ir‑euq mae.

10 Mqtav ghaqkhaer khoerghaq aqyawf maf‑anr heulof‑aer aernaeq‑euq mae: “Taqguv! Aqjeq mirnae aernar‑aq, tsawrhaq dawqtawv luf‑anr taf‑eu laqkhaq caerdui duilar paq‑aer ghae‑eu garkawv, ngar, nawmaf‑anr tsafgaq le‑euq ma. 11 Iqnan, Daqbir‑euq meuq lafkhoer, nawmaf‑anr Kakhof‑eu ghaq Sanqpaq Kali daefle‑euq mae. 12 Nawmaf tsaq tsovnya paq‑aer zaqnanq tiqghaq‑anr builoq loq‑awr jeqdzar khawrlawq lafkhoer ciqyuf taq‑euq gar ya’mawr taef‑a.”

17

13 Mqtav guirzaq baqmaf purjeq‑aer japyuqni dovle‑awr, mqtav ghaqkhaer khoerghaq naeq‑aer Miqyaer‑anr jaceuq‑eu,

14 Gordui duigar jawr‑eu Miqyaer, yawshaef khanqsaer huiqluf‑ur! Mirtsaq khoertav aqyawf nuikhanr shir‑eu tsawrhaq deuq nuisar ofluf‑ur!

Yawr Bozaq Gha’mawr le‑euq

Lurkaf 2:15‑20

15 Mqtav ghaqkhaer khoerdeuq aqyawf maf‑anr ghawq‑ir‑awr, mqtav ghofdav lerghaq ngae, yawr bo‑eu deuq tiqghaq tirghaq cawq‑eu, “Aqduimaf Baeqlaeqhaeq meuq‑anr ir‑awr, Sanqpaq Miqyaer nae aqdui‑anr aernaeq laf‑euq lof‑aer pyeuflar‑euq garkawv khoer‑anr haw‑ir kar‑eur!”

16 Khoernar‑aq, aqyawfmaf yawkawr‑aer ir‑awr, Maqliv hawr‑eu Yorshae‑anr maqaer, jeqdzar khawrlawq lafkhoer ciqyuf taq‑euq zaqnanq‑anr maqaer povmawr‑euq mae. 17 Aqyawfmaf ya’mawr‑awr, zaqnanq khoerghaq‑euq garkawv mqtav ghaqkhaer aer‑eu lof‑aer jabyan ghae‑euq mae. 18 Kharya gaq‑euq tsawrhaq dawqtawvluf yawr bo‑eu deuqnae aqyawf maf‑anr ja’naeq‑euq dawq‑anr zanqduidui ler‑eu mae. 19 Aerkhawf, Maqliv‑aq, garkawv khoerdeuq dawqtawvluf nuima lafkhoer noeqanr taq‑awr sharnoeq sharsawx luf‑eu mae. 20 Mqtav ghaqkhaer nae aqyawf maf‑anr ja’naeq‑euq lof‑aer, dawqtawvluf yagaq ya’mawr‑euq mirnae, yawr bo‑eu deuq Miqyaer‑anr jaceuq‑eu cardawq carcar‑aer ghof‑ir‑euq mae.

18

Yeqsur Bavkhov Maeqdzaq Yaeq‑euq

Morseq‑euq Zanrdawq khofdawq mrbyan‑eu gharduq

Maqliv hawr‑eu Yorshae, Baeqlaeqhaeq meuq‑anr

heumyavjaw byan’ni jawr‑euq mae. Ardanq bae‑eu

zanr‑aq, Yeqsur daefle‑euq yaefnan byanlar nar‑aq

bavkhov maeqdzaq yayaeq‑eu mae. Heungae yamq‑anr

zaqyo deuq‑anr zaqmyanr myanr‑eu zanrkhawf

yajanr‑eu mae.

Lurkaf 2:21

21 Yaefnan dzeur‑awr, aqyawfmaf, zaqnanq‑anr bavkhov maeqdzaq yaeqnaeq ngae, aqyawf‑anr Yeqsur laer myanrnaeq‑euq mae. Tsawrmyanr khoermyanr‑aq, aqma‑euq uqmav lafkhoer maqtsaev ler‑euq minav‑aer mqtav ghaqkhaer nae myanrtaq‑euq mae.

Miqyaer‑anr Zaqnanq Yeqsur A’naeq ler‑euq

Nyiqzanr tiqzanr‑aq, daefle‑euq huqbaw zaqyo Yeqsur

kofjaw byanlar ngae, Miqyaer‑anr ya’a naeq‑awr,

lawr‑eu jeqkhawf yalawr naeq‑eu mae.

Lurkaf 2:22‑24

22 Morseq‑euq Zanrdawq khofdawq lafkhoer boftaq‑euq lof‑aer, muiq‑eu shawr‑eu zanr janr‑eu arnan byanlar ngae, aqnyaf dzerzaq zaqnanq euq‑awr, Yeqlursaqlaeq meuq‑anr le‑awr nae, Sanqpaq Miqyaer‑anr a’naeq‑euq mae. 23 Sanqpaq Miqyaer‑euq Zanrdawq khofdawq lafkhoer boftaq‑euq, “Daefbaebae le‑euq aqli yawqghaq navluf‑anr Sanqpaq Miqyaer‑euq gharduq yawmuiq yawshawr laer yasawx‑eu mae.” 24 Khoeruqtaf, Sanqpaq Miqyaer‑euq Zanrdawq khofdawq

19

lafkhoer aertaq‑euq lof‑aer, khaqkhoeq tiqgu maqngeur nar‑aq, yarmir khaqkhoeqzaq tiqgu yalawr naeq‑eu mae.

Yaerbof yawoer lafkhoer Miqyaer, Kakhof‑eu ghaq

aqmyan daefle lalaer toeqmaeq taq‑euq mae. Tsawrhaq

tiqdeuq nav‑aq Miqyaer gharduq ngaeqdan taq‑euq dawq

heudeuq‑anr jan‑eu lafkhoer bym‑awr nya‑eu zaqnanq

heughaq daefle gar dawqluf‑eu mae. Miqyaer, tsawrhaq

tiqghaq nav‑anr Yeqsur daefle maelaer panmaeq

naeq‑awr bi’mawr‑euq mae.

Surmoq Kakhof‑eu jeq Ya’mawr‑euq

Lurkaf 2:25‑35

25 Khoerngae, Yeqlursaqlaeq meuq‑anr Surmoq laer kur‑eu tiqghaq jawr‑eu mae. Aqyawf‑aq, yawtsaq yawdawr tsawrhaq pyeuf‑awr, Miqyaer‑anr yawzeu baw‑eu tiqghaq mae. Aqmyanluf Irsaqleqlav tsawrhaq‑anr nuima bisar lar‑eu ghaq oekeuv gar

noeqtmq luf‑eu mae. Khoeruqtaf, Yawshawr Saflar, aqyawf‑euq lafkhoer jawrluf‑eu mae. 26 Aqyawf maqshir‑euq minav‑aer Sanqpaq Miqyaer‑euq Kali‑anr ya’mawr taef‑ar laer Yawshawr Saflar, aqyawf‑anr panmaeqnaeq taq‑euq mae. 27 Yawshawr Saflar nae aqyawf‑anr binoeqdov lar‑euq mirnae, aqyawf uqduq tanqnymr nymrma lafkhoer urler‑euq mae. Khoerngae nyiqpav‑aer, Zanrdawq khofdawq jav‑eu lof‑aer janrnaeq‑eu laer Yeqsur‑euq aqma aqda, zaqnanq ciq‑awr urlar lufgar tanqpuq‑euq mae. 28 Khoerngae, Surmoq, zaqnanq ciq‑awr, Miqyaer‑anr jaceuq jaceuq‑aer heulof‑aer aer‑eu mae:

20

29 “Sanqpaq Miqyaer‑or, nymq‑mr nawr, nawq‑euq zaqkhav‑anr nuisar of‑eu lafkhoer zir jirnya’ni pyaeqnaeq laf‑euq mir‑a.

30 Aqjeq mirnae aernar‑aq, ngaq‑euq myavnuiv nae nawq‑euq kakhof‑eu jeq‑anr ya’mawr ghaq‑euq ma. 31 Tsawrjeuq tsawrca dawqtawv luf‑euq maeqshi, kakhof‑eu heujeq nawr lavsav taq‑euq mae. 32 Kakhof‑eu jeq heu‑aq, aqcawq tsawrjeuq tsawrca‑anr bya’naeq‑eu yawshaef pyeuf‑awr, nawq‑euq tsawrjeuq tsawrca Irsaqleqlav tsawrhaq‑euq yawshaef khanqsaer mae.”

33 Yeqsur‑euq garkawv khoerlof‑aer aer‑eu mirnae, zaqnanq‑euq aqma aqda zanqduidui ler‑euq mae. 34 Surmoq, aqnyaf dzerzaq‑anr dawq ngaeqghae naeq‑awr, zaqnanq‑euq aqma Maqliv‑anr heulof‑aer aernaeq‑euq mae: “Zaqnanq heughaq baqda’nae Irsaqleqlav tsawrhaq ghawqmyaghaq coqdzae‑ir‑awr, ghawqmyaghaq turlar taef‑a. Aqyawf‑aq, aqcawq yaeqbawq saerlu‑aer aerduq pyeuf taef‑a. 35 Tsawrhaq ghawqmya ghaq‑euq nuima lafkhoer noeqluf‑eu deuq pandovlaf taef‑a. Nawq‑euq nuima‑anr micaer tsawvbyoe laf‑eu lof‑aer ghaelar taef‑a.”

Aqna Sarkir Kamq‑eu

Lurkaf 2:36‑38

36 Aqsaq‑euq arjeuq arca Paqnoeqlar‑euq aqbur Aqna laer kur‑eu, Miqyaer gharduq ngaeqdan‑eu zaqmiq aqbur tiqghaq jawr‑eu mae. Aqyawf‑aq, mawqduidui le‑euq mae. Aqyawf miqdaf dafshawr pyeufngae danqdzaq‑ir‑awr, aqyawf‑euq khaqdzerzaq naeq‑aer shifkhof taef‑aer yajawr‑awr nae, miqcoeq miqma pyeuf‑ir‑euq mae.

21

37 Nymq‑mr aqyawf 84 khof khawvlar‑euq mae. Aqyawf uqduq tanqnymr nymrma‑anr taef‑aer jawrjawr‑aer uqcif nanghanr maqaer, dzardzaq sheuqsheuq‑aer guiqlanq shar‑awr, Miqyaer‑anr uqduq tanqluf‑eu mae. 38 Khoerngae nyiqpav‑aer aqyawf lar‑awr, Miqyaer‑anr jaceuq‑eu mae. Yeqlursaqlaeq meuq‑anr kakhof lafni noeqtmq luf‑eu tsawrhaq dawqtawv luf‑anr aqyawf, zaqnanq khoerghaq‑euq garkawv ja’maeq naeq‑euq mae.

Naqzaqlaer‑anr Ghofler‑euq

Lurkaf 2:39

39 Yorshae hawr‑eu Maqliv, Sanqpaq Miqyaer‑euq Zanrdawq khofdawq jav‑eu lof‑aer dawqtawvluf mrluiv jir‑awr, Gaqliqlaer mirkhanq‑anr jav‑eu, aqyawf nyaf‑euq meuq Naqzaqlaer‑anr ghof‑ir‑euq mae.

Yeqsur bala nyiqsiq byanlar‑awr Naqzaqlaer‑anr

ghofler‑euq nar‑aq, nyiqkhof khawvlar ngae keuvni‑euq

garkawv deuq‑aq, Yaerbof lafkhoer tiqjeq‑iq maqaerkeuv

taq‑aq. Yaerbof lafkhoer Yeqsur‑anr paraerkeuv ngae‑aq,

aqyawf nyiqkhof khawvlar ngae aqyawf daefle‑euq

Baeqlaeqhaeq meuq‑anr jav‑eu nymr‑anr jawrluf‑eu laer

mawrlar‑eu mae. Yorshae khoerlof‑aer noeqtsaev‑awr

nae, paeqzaq mazaq‑aer aqyawf‑euq aqpoeq aqbawr‑euq

meuq‑anr jawrkhof‑ir‑euq khoer‑aq, Maqliv‑anr

yawmuiq‑aer hawpir nya’ni jawr‑ir‑euq ngeurdur.

22

Siqzaq Ganryo deuq Lar‑euq

Maqtaeq 2:1‑12

1 Sanqpaq Heqlor uvlanr lufngae, Yeqsur Yurdav mirkhanq Baeqlaeqhaeq meuq‑anr daefle‑euq mae. Khoerngae, siqzaq ganryo heumyavghaq nanrma dovkhaeq

pawnae Yeqlursaqlaeq meuq‑anr larkeuv‑awr narhaq‑eu, 2 “Yurdav tsawrhaq‑euq Sanqpaq geuf‑eu laer daefle‑euq ghaq aqgar jawrla? Nanrma dovkhaeqpaw nga’maf, aqyawf‑euq aqguir‑anr ya’mawr‑awr, aqyawf‑anr uqduq tanq‑eu gharduq lar‑euq ma.”

3 Sanqpaq Heqlor yagaq ngae, nuima tiqpawf‑iq maqsar‑a, Yeqlursaqlaeq meuq meuqlan’ni jawr‑eu tsawrhaq dawqtawv lufkhawf nuima maqsar‑a. 4 Khoerngae, aqyawf, pirma aqyuif deuq hawr‑eu Zanr maeq‑eu tsawrhaq dawqtawv luf‑anr kuruiq‑awr, Kali aqgar yadaef lela laer aqyawf maf‑anr narhaq‑euq mae. 5 Aqyawfmaf heulof‑aer aerkhof naeq‑euq mae: “Yurdav mirkhanq Baeqlaeqhaeq meuq‑anr daefle taef‑a. Aqjeq mirnae aernar‑aq, Miqyaer gharduq ngaeqdan‑eu tsawrhaq heulof‑aer boftaq‑euq mae:

6 ‘Yurdav mirkhanq‑anr jav‑eu Baeqlaeqhaeq meuq‑or,

23

nawr‑aq, Yurdav‑euq meuqdeuq lafkhoer teqdzaeq‑eu meuq maqngeur‑a. Aqjeq mirnae aernar‑aq, aqkar, ngaq‑euq Irsaqleqlav tsawrjeuq tsawrca‑anr bosav‑eu Sanqpaq tiqghaq, nawq‑euq lafkhoer nae dovlar taef‑a.’ ” 7 Khoerngae, Heqlor, aqcawq‑anr maqbi siqni siqzaq ganryo khoerdeuq‑anr kur‑awr, aqguir khoersiq dovlar‑euq aryamq‑anr narhaq tser‑euq mae. 8 Khoernar‑aq, “Nawmaf zaq khoerghaq‑anr yawduq duq‑aer pov‑ir‑awq. Povmawr nar‑aq, ngarkhawf aqyawf‑anr uqduq yatanq‑ir ni, ngaq‑anr tsafgaqlar de‑eq” laer aernaeq‑awr Baeqlaeqhaeq meuq‑anr bi’ir‑euq mae.

9 Aqyawfmaf, sanqpaq‑euq dawq yagaq‑awr dov‑ir‑euq mae. Nanrma dovkhaeqpaw ya’mawr‑euq aqguir khoersiq japyuqni dovle‑awr, aqyawf maf‑euq maeqhuq maeqhuq‑aer ir‑awr, zaq khoerghaq jawrgar irkeuv ngae, khoertav naqler taq‑euq mae. 10 Aqyawfmaf, aqguir khoersiq‑anr ya’mawr ngae, laqkhaq caerdui dui‑eu mae. 11 Irkanr urler ngae, aqlizaq hawr‑eu aqyawf‑euq aqma Maqliv‑anr ya’mawr‑awr, pawqtsuif pawqdmq dmq‑awr, aqli zaq‑anr uqduq tanq‑euq mae. Khoernar‑aq, aqyawfmaf nae yurlaf‑euq arpoeq zawrkhav‑eu lafsawq deuq beuqdov‑awr, aqyawf‑anr damqnaeq‑euq mae. Lafsawq khoerdeuq‑aq, shuir, lawrbaoq hawr‑eu murlaq mae. 12 Heqlor jawrgar taqghof mawrler laer yufmav mav‑eu lafkhoer Sanqpaq Miqyaer, aqyawf maf‑anr maeqnaeq‑euq mirnae, aqyawfmaf yawqpaw yawqnae aqyawf maf‑euq mirkhanq‑anr ghof‑ir‑euq mae.

24

Irjirtuv‑anr Caevjawr‑ir‑euq

Maqtaeq 2:13‑14

13 Aqyawfmaf ghof‑ir dzeur‑euq nar‑aq, Sanqpaq Miqyaer‑euq mqtav ghaqkhaer tiqghaq Yorshae yufmav mav‑eu lafkhoer dovle‑awr aer‑eu, “Tur‑awr, aqlizaq hawr‑eu aqyawf‑euq aqma sheuq‑awr, Irjirtuv mirkhanq‑anr caev‑ir‑awq, ngar, nawq‑anr aernaeq lafngae keuvni khoergar jawr‑awq. Aqjeq mirnae aernar‑aq, Heqlor, aqli zaq‑anr lavsaef‑eu laer pov taef‑a.”

14 Khoerngae, Yorshae tur‑awr, uqcif saerghanr ma‑aer aqlizaq hawr‑eu aqyawf‑euq aqma sheuq‑awr Irjirtuv mirkhanq‑anr caev‑ir‑euq mae.

25

Aqli Yawzaq deuq‑anr Saef‑euq

Maqtaeq 2:16‑18

16 Khoernar‑aq, aqyawf‑aq siqzaq ganryo deuq nae jaqmyawf bi’myawf‑euq ngalaer Heqlor yasiq ngae, nuima paerdui dui‑eu mae. Aqyawf nae siqzaq ganryo‑anr narhaqduq taq‑euq aryamq‑anr sharsawx‑awr, tsawrhaq khaerghae‑awr Baeqlaeqhaeq meuq hawr‑eu tanqghof tanqjawr‑anr kharjawr‑eu nyiqkhof lafov paw‑euq aqli dawqtawv luf‑anr bisaef jir‑euq mae. 17 Khoer‑aq, Miqyaer gharduq ngaeqdan‑eu Yeqlaqmir nae aertaq‑euq dawq heudawq byanlar‑euq mae,

18 “Laqmar meuq‑anr noeqdui noeqduir‑awr tsawrngoer ngoer‑eu tersar yagaq‑eu mae. Khoer‑aq, Laqkeqlar, aqyawf‑euq zaqdeuq baqda’nae ngoerluf‑eu mae. Aqyawf‑euq zaqdeuq maqpar jawr‑eu mirnae, aqcawq, aqyawf‑anr nuima maqbi sarlar nya‑a”

26

Naqzaqlaer‑anr Ghofjawr ler‑euq

Maqtaeq 2:19‑23

19 Heqlor shirdzeur‑awr, Yorshae, Irjirtuv mirkhanq‑anr jawrluf ngae, Sanqpaq Miqyaer‑euq mqtav ghaqkhaer tiqghaq Yorshae yufmav mav‑eu lafkhoer dovle‑awr heulof‑aer aernaeq‑euq mae: 20 “Tur‑awr aqlizaq hawr‑eu aqyawf‑euq aqma sheuq‑awr Irsaqleqlav mirkhanq‑anr ghofler‑awq. Aqjeq mirnae aernar‑aq, aqli zaq‑anr saef‑eu laer povluf‑eu ghaq shir‑euq mae.”

21 Khoerngae, Yorshae tur‑awr, aqlizaq hawr‑eu aqyawf‑euq aqma sheuq‑awr, Irsaqleqlav mirkhanq‑anr ghofler‑euq mae. 22 Aerkhawf, Aqgeqlar, aqyawf‑euq aqda Heqlor‑euq dzoeqdzaq za‑awr, Yurdav mirkhanq‑anr uvlanr luf‑eu garkawv Yorshae yagaq‑euq mirnae, khoergar maqghofler peuq‑a. Yufmav mav‑eu lafkhoer, Miqyaer, aqyawf‑anr parmaeq naeq‑awr, Gaqliqlaer mirkhanq‑anr jawr‑ir‑euq mae. 23 Naqzaqlaer laer kur‑eu meuq tiqmeuq‑anr irkeuv‑awr khoergar jawr‑euq mae. Khoer‑aq, Miqyaer gharduq ngaeqdan‑eu tsawrhaq nae aertaq‑euq dawq heudawq byanlar‑euq mae: “Aqyawf‑anr Naqzaqlaer tsawrhaq laer kur taef‑a.”

27

Yeqsur Daefle‑euq Nawq‑anr Tafmae

Yeqsur daefle‑euq garkawv aerkeuv taq‑euq Yaerbof

ardeuv heudeuq‑aq, Miqyaer mirtsaq zaq‑anr huiqdui

dui‑eu lafsawq, aqyawf‑euq Zaqyo, Yeqsur Kali lafkhoer

anr‑eu, mqmaq maqbyav yarzir daef‑eu jeq bifnaeq

laf‑euq maelaer toeqmaeqnaeq laf‑euq mae. Kalizaq,

Yeqsur daefle‑euq aryamq‑anr laqkhaq caertavni yawbui

bui‑eu mae. Aerkhawf, khoernav maqtser Yeqsur Kali

baqda’nae kakhof‑eu jeq hawr‑eu mqmaq maqbyav yarzir

daef‑eu jeq za‑euq mirnae, lafsawq heudeuq‑euq gharduq

Miqyaer‑anr jaceuq‑eu aryamq mae.

Mqmaq Maqbyav Yarzir Daef‑eu Lafsawq

1 Yorhaq 5:11

11 Sarkir kamq‑eu khoer‑aq heulof‑aer mae: Miqyaer, aqdui‑anr mqmaq maqbyav yarzir daef‑eu jeq bif‑euq mae, daef‑eu jeq khoer‑aq, aqyawf‑euq Zaqyo lafkhoer anr‑eu mae.

Lormav 6:23

23 Aqjeq mirnae aernar‑aq, iqbax mr‑euq arpoeq‑aq yashir mae. Aerkhawf, Miqyaer nae yawqngaef‑aer bifnaeq laf‑euq lafsawq‑aq, aqdui‑euq Sanqpaq Yeqsur Kali lafkhoer mqmaq maqbyav yarzir yadaef‑eu mae.Yorhaq 3:16

16 Miqyaer mirtsaq zaq‑anr gaqdui dui‑eu mirnae, aqyawf‑euq Zaqyo tiqghaq taefkhawf bifnaeq lef‑euq mae. Zaqyo‑anr kharjan‑eu tsawrhaq maqya cawv‑ir‑eu uqtaf, mqmaq maqbyav yarzir yadaef‑eu mae.Tirtuv 3:4‑7

4 Aerkhawf, aqdui‑euq Kakhof‑eu ghaq pyeuf‑eu Miqyaer, tsawrhaq zaq‑anr ghawqshaq gaq‑eu jeq hawr‑eu aqyawf gaq‑eu jeq bi’mawr naeqlaf ngae, 5 aqyawf, aqdui‑anr kakhofnaeq

28

laf‑euq khoer‑aq, aqdui tsaq‑awr dawr‑eu jeq mr‑euq baqda’nae maqngeur‑a. Aerkhawf, aqyawf, aqdui‑anr ghawqshaq gaq‑eu mirnae Yawshawr Saflar lafkhoer lavshuif‑eu jeq hawr‑eu daefpov daefpar‑eu jeq‑anr taf‑eu tsiqshawr‑eu jeq baqda’nae aqyawf, aqdui‑anr bibuq‑ir laf‑euq mae. 6 Aqdui‑euq Kakhof‑eu ghaq pyeuf‑eu Yeqsur Kali‑anr ghoe‑awr, Miqyaer, aqdui‑euq khoertav Yawshawr Saflar tiqbyan’ni shaevdavnaeq laf‑euq mae. 7 Aqyawf‑euq guiqlanq yawdzanr baqda’nae aqdui yawtsaq yawdawr tsawrhaq pyeuflar‑awr, mqmaq maqbyav yarzir daef‑eu jeq‑anr noeqtmq khar za‑eu, aqyawf‑euq jeqbir of‑eu tsawrhaq ma.Yorhaq 10:27‑28

27 Ngaq‑euq yawr deuq‑aq, ngaq‑euq tersar‑anr narhaq‑eu mae. Ngar, aqyawf maf‑anr siqnya‑awr, aqyawfmaf khawf ngaq‑euq maeqnan cantae‑eu mae. 28 Khoeruqtaf, ngar, aqyawf maf‑anr mqmaq maqbyav yarzir daef‑eu jeq bif‑awr, aqyawfmaf tiqjawr‑iq maqya cawv‑ir‑ar. Ngaq‑euq aqlaf‑anr nae yawr khoerdeuq‑anr tiqghaq‑iq maqludov nya‑ar.

1 Tivmorseq 1:15‑17

15 “Iqbax zaq‑anr kakhof‑eu laer Yeqsur Kali mirtsaq khoertav oe‑euq mae” laer aertaq‑euq dawq khoerdawq‑aq jancoer paq‑aer ghae‑awr, tiqbyan tiqlof hageufcoer paq‑aer ghae‑eu mae. Ngar‑aq, iqbax zaq‑euq lafkhoer nae aqcawq navmaqtser iqbax huiqdzaeq‑eu ghaqma. 16 Aerkhawf, Yeqsur Kali arnavni orcoer‑eu ngalaer aqyawf panmaeqnaeq mawf‑eu mirnae, ngar, aqcawq navmaqtser iqbax huiq‑eu khawf, aqyawf, ngaq‑anr ghawqshaqgaq naeqlaf‑euq mae. Khoer‑aq, aqkar aqyawf‑anr jan‑eu baqda’nae mqmaq maqbyav yarzir daef‑eu jeq za‑eu tsawrhaq deuq bidzaw geuf‑eu gharduq pyeuf‑eu mae. 17 Tsawrhaq zaq‑anr maqmawr lar‑aer, maqshir nya‑eu, mqmaq maqbyav yarzir Sanqpaq pyeuf‑awr, aqyawf tiqghaq taef‑aer zaqsiq tsawrganr byan‑eu Miqyaer‑anr li‑eu maqbawni yawzeu baw‑awr, aqyawf‑euq yawshaef khanqsaer‑anr jaceuq kar‑eur. Aqmeq.