Тужгес но синмаськи сайкыт буёлъёслы,Улон кузьмаз ке но куд-ог пеймытъёссэ;Мон оскыны тырши котькуд адямилы,Гажай солэсь яркыт, визьмо верам кылзэ.

Вож нуны йыгаськиз дуннее – Адями луыны куриськиз;

Куронзэ быдэстиз анаез –

Улон öс со азьын

Вордüськи 5 феврале 1957 арын Петухова фамилиен

Вавож районысь Чудзялуд гуртын.

Гурто калыкелы синмаськыса,Яратыны дыши анай кылме.Туннэ, музъем дорозь йыбырттыса,Тодам ваё дуно атай юртме…

Быдэ вуи Выль Бия гуртысь таюртын.

Анае, Петухова Александра Максимовна, зечезлы гинэ дышетыны тыршылüз.

Адями

«Адями!..» -- паймыса вераськом куддыръя.«Адями…», -- серем пыр шуиськом куд-огзэ.«Вот герой!» -- ушъяло одüгзэ пияшез,«Пöрмымтэ…», -- куарето пияшез мукетсэ.

Нош малпад-а бен, кин тон ачид луиськод?Оло юнме гинэ-а кылдэ шериськод?«Калыкез дунъяны, -- шуылоз вал меми, --Мед луод тон нырысь ик ачид Адями…»

Агае, Суворов Валерий Иванович, гурт калыкпöлын туж гажано адями вал (бригадирын ужаз).Кема висемез бере, улонысь 61 аресын кошкиз.Со пичи дырысеным ик воштüз мыным атайме…

Дядя

Малы ке но ваньмыз пичи дыр эшъёсыАтае интыын лыдъяло вал тонэ.«Кинлэн тон луиськод-ай, нылы?» юанлы«Валилэн со нылыз», -- шуыло вал монэ.

Оло чапак соин но öй вала, дыр, мон,Мар сыче со зэмос атайлэсь вожъяськон –Та бадзым улонэ сюресме бырйыкум,Одüгез визь-кенеш сётüсе нош вал тон.

Нуналъёс но аръёс азьпала лобзизы, Семьяме кылдытон вакытъёс вуизы,Вордüськем юртысьтым мукетаз мон потü –Атае интые нош тыныд йыбырттü…

Нырысетü кылбуре гожтэмын 10 арес дыръям, Чудзялуд начальной школаын 4-тü классын дышетскыкум:

Нош ик вуиз толалтэ,Йырад понод изьыдэ,Потод чаляк ульчае,Учкод – кыче тол куазед.

«Чяляк кутча конькидэ, --Эшелы мон шуисько, --Мыном жоггес йö вылэ,Конькиен нискылалом…»

Ыстü «Дась лу!» газетэ. Отысь гожтэт вуиз, кылбуре лябгес на шуыса, поттыны ум быгатüське, пе, но ужано…Монэ редакциысь гожтэт бурдъяз!..

1968- 1972 аръёсы дас иськеме Водзи школае тодон-валан люканы ветлüмы.

Гожъяны бурдъяськем мылкыдме валаз но поэзие нырысь вамышъёс лэсьтыны юрттüз та школаын немец кыллы дышетüсь Ф.Р.Гарейшин (Башкириысь вал со, егит удмурт воргорон, институт бере нырысетü аръёссэ ужась маке). Озьы ик удмурт кыллы но литературалы дышетüсьмы Селиванова С.И. трос дырзэ но кужымзэ сетüз монэ гожъяськон удысэ кыскыны турттыса. Жытъёсы гуртаз но öтьылэ вал (интернатын улыкумы), пöртэм творческой ужъёс сётъя. Улонысь кошкон азяз но, дораз öтьыса, трос книгаоссэ кузьмаз (мон соку нырысетü аръёссэ ужасько вал ини школаын).

Водзи школаын гожтэм кылбуръёсы:

Можга педучилище(1972 – 1976)

Можга педучилищеын дышетскем аръёсы – улонам самой яркытъёсыз но вунэтонтэмъёсыз. Татын монэ дышетüзы улонэз валаны, шуг-секытъёсты вормыны. Татысен ик мон поэзия удысэ но йыгмытгес вамыштü: вöзам нош ик вал оскымон дышетüсьёсы…

Нырысетü курсын дышетскыкум шуд усиз «Ленинской знамя» газетлэн редакцияз кылдытэм литературной кружоке ветлыны, кудüныз кивалтüз Удмуртиысь ваньмызлы тодмо поэт Н.С.Байтеряков.

Д.Л.Лукьянов – творчество удысын самой матысь юрттüсе.

Котькуд аре Ижевскын ортче вал творчество удысысь егитъёслэн республиканской семинарзы. Таче пумиськонъёс бадзым юрттэт сёто вал егитъёслы.

Педучилищеын дышетскыкум ик кылдüз«Кöня меда?» шуыса нимаськись кылбуре,кудüз гожтэмын вал Г.И.Павловлэн чектэмезъя(со крезьгурзэ гожтüз, кырзан калык пöлы вöлмиз).

2004 арын Можга педколледже Г.И.Павловез буре ваён жытэ отьылüзы…

Тодам вайисько…

Та жытэ пумиськи на одüгеныз яратоно дышетüсенымы Р.И.Даниловаен, асьме шаерысьтымы туж тодмо но сüлы адямиен.

Педучилищеын трос выри общественной ужен: вал комсорг, курсысьтымы бюролэн членэз, училищеын потüсь «Путь к школе» шуыса нимаськись газетлэн редакторез, городысь комсомоллэн комитетэзлэн членэз…1975 арын Удмуртиысь устоосыз студентъёсын чош Москваын Вормон Знамя дорын туспуктэмын.

1976-тü арысен улонме сüзи нылпиосты дышетон удыслы. 40-тü арзэ ужасько школаын: 4 арез герзамын Кионгурт (Большое Волково) школаен, кылемез – Выль Бия школаен. 1983-тü арын йылпумъяй УдГУ-ысь филологической факультетэз.Пионервожатой, удмурт но зуч кылъёсъя дышетüсь, внеклассной ужез радъясь, 24 ар – школалэн директорез, собере нош ик зуч кылъя но литературая дышетüсь. Тüни сыче ужан биографие. Вöзам нош ик – зеч адямиос, творческой коллектив..

Гурт улонлэсь палэнскеме öз поты – тырши пыриськыны общественной уже.1998-2002-тü аръёсы Вавож ёрос Советлэн депутатэз вал. Туж мылкыд карыса ветлü гуртысьтымы «Гербер» калык ансамбле.2002-тü арын удмурт нылкышноослэн V-тü Элькун кенешсылэн делегатэз вал. Пöртэм аръёсы зеч кылъёсын трос зечкыланъёс вуылüзы ёросысьтымы но Элькунысьтымы тодмо но гажано адямиослэсь.

Поэзия удысын быгатонлыкелы оскизы, трос юрттэт но визь-кенеш сётüзы А.Н.Клабуков, Г.А.Ходырев, В.В.Романов, Т.Н.Чернова.

Пöртэм аръёсы гожтэм кылбуръёсы пöлысь куд-огъёсыз печатласькизы ёрос но республиканской изданиосын.

Монэ синйылтüллям…

Куд-ог кылбуръёсме туннэ радъясал тазьыгес…

Шонер-а улüсько?..

Нырысь вамыш лэсьтэм дырысенымОртчиз ни ог жыны даур пала –Шонер-а улüсько дунне вылын?Ваньзэ меда та сюлэмы вала?Оло нош вöзысьтым матысь эшмеЮнме шорысь вöсь карыны шедьтü?Бускель юртэ кожись сюрес вылэКыче меда пытьыосме кельтü?Урод кылын-а пыкылэ калыкЯке зечсэ-а мон сярысь вера?Кыче мертэтъёсын меда мерта:Зечез я уродэз секыт гира?..

* * *Малы таче та улонмы:Я шöг, яке кузьыт?Малы меда нош сюлэмынЯ пöсь, яке кезьыт?..Малы пеймыт уе пиштоЯркыт кизилиос?Малы уг сёто кöлыныПöртэм йыртиянъёс?..Малы шудо адямиос,Нош куд-огез шудтэм?Малы нылпиосыз поннаБöрдэ анай сюлэм?..Малы-о сьöлыктэм нуныПöрме йырвандисьлы?Малы шуныт кылмы уг шедьАртысь бускельёслы?..Озьы ке но, тонэ, улон,Малы яратüсько,Малы чебер дыръёсыдлыСокем шумпотüсько?..

***

Мон оскисько…

Мон оскисько ВселеннойлэнПумтэм луэмезлы,Мукет планетаос вылынУлüсь калыкъёслы…Асьме сямен ик кытын кеСулто, дыр, чукъёсы,Паськыт ульчаоссы вöлмоПöртэм ужгуръёсын.Сыче ик вакчиесь луоШулдыр тулыс жытъёс,Лабрес тöдьы льöмпу улынПуко, дыр, егитъёс.Кык яратüсь адямиосУчко, дыр, вылüе,Пеймыт уе но жог шедьтоШудо кизилиез.Со кизили нош – асьмеос,Асьме вордскем Музъем --Пиштэ, дыр, ас дораз öтеДуно эшсэ выллем…Мон оскисько – вуоз со дыр,Куке пумиськомыМукет планетаос вылынУлüсь калыкъёсын.Соку асьме дуно МузъемЭшшо яркыт пиштоз,Вселеннойысь вань калыкезСо юн эшъяськытоз…

* * *Инмаре-Кылчинэ! Кышномурт луыныТа бадзым дуннее тон монэ ыстэмед,Пиосмурт вормонтэм секытэз жутыны,Трос пöртэм чиданэз чиданы вордэмед…

…Сайкытак ымнырдэ пальпотон югдытэ –Озьыен, шудбуро нылкышно луиськод,Ужамъяд но кырзам куараед жингыртэ --Оло нош куректон-бордöндэ öръяськод?..

Нылпиед ке шудо – тон ачид но бурдо,Кузпалэд ке валась – инмети лобаськод,Куддыръя нош, лобан бурдъёстэ ке чигто,Вöсезлы чидаса, лобзыны тыршиськод…

Тон кужмо луыны вордскемын, кышномурт,Шундыез адзыны пилемо куазь дыре,Семьяме, нылпиме, юртъерме утьыныСёт мыным кышномурт шудбурдэ, Инмаре…

Кипанча

Вуж сямъёслы кылдэм, лэся, озьы:Калык ялан маке выльзэ утча.Котьма ке но, уг тодüськы, кызьыАсьме пöлы кылем на кипанча.

Мунчо пыро сяська веникъёсын:Сяська кадь ик чебер, пе, луомы;Нош мугорзэс зыралозы гондыр куарен:Луоз, пе, гондырлэн кадь кужыммы.

Мон, малызэ но валатэк, ачимКипанчаез сюлмысь яратüсько,Сизьым пöртэм люкам «сьöлыкъёсме»Пöсь из вылэ пöсен чош келясько.

Юрттэ-а, уг-а выль сяська веник –Огез понна пумтэм шумпотüсько:Ужын кыдам удмурт адямиезПöртэм удысъёсысь пумитасько.

Аръёс

Бызё, дырто, кошко аръёс,Шöдылытэк ортчо,Кузесь толъёс но гужемъёсСоос сьöры лобзо.

Бен чöк, ортчо ке аръёсыд –Уд куты соосты.Пересьмыны но асьмелыКылдэм ини, вылды.

Нош со понна ти учке-ай:Улон сяськаяське,Со ноку но уг пересьмы,Со ялан пиналме.

Луысал ке…

Луысал ке тол куазенИталмаслэн жужамез,Мон, сое ишкалтыса,Гажанэлы кузьмасал.

Луысал ке сüзьылэзБерыктыны тулысэн,Чуж учылэсь куаразэБыдэс уйбыт кылзысал.

Луысал ке улонынОртчемзэ берыктыны,Вань лэсьтэм янгышъёсмеОдно, дыр, тупатысал…

Тодэ ваён

Выльысь тодам лыктэ пичи дыры:Вало палъёс, мусо вордскем гуртэ,Бакча берысь тöдьы льöмпу дорыАли ке но сюлмы ялан дыртэ.

Кичи-вачи ненег мугорылыАзвесь лысву сётüз, лэся, кужым:Нырысь ик усьтüськем италмаслыБызьылüмы угось гольык пыдын.

Гурто калыкелы синмаськыса,Яратыны дыши анай кылме,Туннэ, музъем дорозь йыбырттыса,Тодам ваё дуно атай юртме.

Небыт турын пöлтü вамышъяса,Васько али тодмо ошмес дурам –Оло, юзмыт вуэн пыласькыса,Пичи дыры выльысь вуоз дорам…

Городэ яке гуртэ…

Тани нош вуи дорад,

Атыкай юртэ,Льöмпуос пöлы ышемВордüськем гуртэ.

Яркытгес,лэся, жужаТон вадьсын шунды,Городэ яке гуртэ –Дуногес кудды?..

Заводлэн дыбыртэмез,Горд гадё трамвай?..Бусыысь трактор куара,Жингрес тюрагай?..

Кыклы оло люкиськизЕгит сюлэмы? –Юртты асме валаны,Атыкай юртмы.

Югытгес, лэся, пиштэТон вадьсын толэзь,Яке со но палэнэКошкыны уг лэзь?..

Кырмо кидэ

Льöмпу сяська зынэнШока быдэс инкуазь,Чукна ик бусые

Потэ музъем ужась. Тюрагайлэсь но вазьСайка со та дыре,Гуртаз ини бертэУчы чалмем бере.Жадем тусо синъёсУчко пальпотыса,Жужась выль чукналыПумтэм шумпотыса.Удыс борсьы удыс –Вырзиз ук ужгуред!Кидыс борсьы кидыс –Узыр луоз нянед !Небыт тылсиоссэПазьгиз шунды-нэнэ,Усто ужед поннаСо чуп кариз тонэ.Юрттоз на шуныт зорТынад будосэдлы,Ас кужымзэ сётозКизем бусыедлы.Ческыт чабей нянезСизьыл оскалтыса,Зорлы но шундылыВазё тау карыса.Азьло нош тынэсьтыдКужмо, ужез гажась,Паськыт, сюрмем кидэКырмо, музъем ужась.

Чукна

Зеч-а, бур-а, чукна !Ульчае потыса,Гадь тырам шокчисько

Тынэсьтыд юзмыттэ.

Бусыын гырисьлыТыр нунал сизьыса,Кытын ке вылиынТюрагай жингыртэ.

Ярдурысь вож бадьпу,Киоссэ шонаса,Чук бусэн шокаса,Шур вуэн шыпыртэ.

Паймымон та чукна !Выль кужым сётыса,Выль вордскем сяськаезЛысвуэн пылатэ.

Вордскем инты

Мусо вордскем гуртэ,Лулы-сюлмы мынам,Оскон атай юртэ,

Кызьпу – укно улам.

Зарни егит дырыИталмасъёс полын,Ини мукет нылъёсПуко Вало дурын.

Ини мукет пиосВасько соос доры,Кырзанъёссы вöлмоАрамаос сьöры.

Улон азьлань дыртэ –Вуо выль тулысъёс,Ужась бусы гуренОртчо гужем жытъёс.

Будо арлыдъёсыд –Куртчид ни кын кортэз,Юрт тыр нылпиосыд,Валад ни улонэз.

Озьы ке но, малыКотькуд чуклы быдэНырысь ик кызьпулыМыкыртиськод йырдэ?..

Биялась мусо нылъёс(8-ти мартлы сизем кырзан)

Сяськаос кадь чебересь,Бубыли кадь шаплыесь,

Визьмолэсь но визьмоесь,Уж дурын но тыршисесь –Сычеесь милям нылъёс,Вожъясько котыр гуртъёсТüледлы, Выль БияласьДуноесь нылкышноос.

припев:Кырзалэ но вералэ ти,Биялась мусо нылъёс, Тüледлы синмаськемын, дыр, Ворекъясь кизилиос, Тыр толэзь но югытсэ, дыр, Тü понна гинэ кисьтэ, Инвожо уйшор дыре нош Тüледлы гинэ пиштэ.

Дуноесь анайёсмес,Чебересь апайёсмес,Мусоесь сузэръёсмес,Яратон кенакъёсмес –Ваньдэсты зечкыласьком, Шуд тüледлы сüзиськом,Биялась нылкышноос,Тüледын данъяськиськом.

Припев.

Бия вальс(кырзан)

Тани нош гурт вадьсын тыр толэзь воректüз но,Гужем уй шыпытак лэзиськиз улосэ.

Кыдекын бусыын машина гуретэ на,Кытын ке кисьтылэ на арган куаразэ.Шур дурысь льöмпуос куспазы шыпырто кадь,Возьмало кадь соос калыклэсь кöлэмзэ.Уйвотам чебересь городъёс öтьыло но,Мон уг шедьты, гуртэ, тынэсьтыд дунозэ.

Припев:Ой, мусо Бия гуртэ тон,Яратü Вало шурдэ мон,Вож садо урамъёстэ,Бусыостэ, нюлэсъёстэ,Жильыртись ошмесъёстэ но,Жингыртись возь вылъёстэ но,Та тыршись гурт калыктэ ноСюлмысьтым мон ярати…

Данъясько тüледыз, Выль Бия котыръёс но,Та зарни сюлэмо калыкез данъясько.Тани нош шундыё выль нунал вордüське ни,Ужгурен пачылмем куараос кылüсько.Инбамед но тынад вадесад югытгес кадь,Италмас яркытгес пиштытэ возьёстэ –Мон понна тон котьку – пичи дыр кöкые но,Улонэ но, сюлэм висёнэ но, гуртэ.

Припев.

Родной уголок(песня)Умываясь росой, просыпается день, Сквозь туман серебрится река,Манит рощи зеленой прохладная тень

И звенящий поток родника.Над Валою стоит соловьиная трель,Догорает зари уголек,Первый луч пробежал за высокую ель –С добрым утром, родной уголок.Припев:Процветай, несмотря на любые невзгоды.Процветай, красотою своей удивляй.Процветай через два, через три, через годы,Процветай и живи ты, мой сказочный край!

По весне зацветут молодые сады,Зажурчат Седмурча и Подмой,И спешат родниковой напиться водыЖуравли, возвращаясь домой.Всё мне по сердцу здесь:Золотятся поля, и леса зеленеют вокруг,Манит запахом меда гвоздики ковёр,И танцует ромашковый луг.Припев:

Улыбается солнце вавожской земле:Вот рабочий встаёт за станок,И учитель, тетрадки сложив на столе,Начинает свой первый урок;На полях трактора загудели с утра,Колосится высокая рожь…Не найти уголка мне милее тебя,Дорогая сторонка - Вавож.

Тон но мон гинэ

Гужем жытлэсь шыпыртэмзэТон но мон гинэ шöдом,Уйшор вакыт кизилиез

Кыкнамы гинэ адзом.

Дун ошмеслэсь жильыртэмзэТуннэ чошен гинэ кылзом,Сюлмын жужась яратонмесОг-огмылы гинэ усьтом.

Вало дурысь возьёс вылтü Каллен гинэ вамышъяськом,Уй инбамысь кизилиосШуд сüзьыса кырмышъяло.

** *Тон – шундые мынам, мон – сяськаед тынад:Тылсиосыд улын пур-пур сяськаяськи.Сузьтüськыса дорад, жиптüськысал бордад –Бен чöк, гомась тылжу пушкад тылын ке сутüськи.

Улон – бадзым тудву, пумаз-йылаз уд вуМалпаськыса, кытын шудбур но шумпотон.Вия тулыс сурсву, тöлзе гужем лысву –Нош мон понна ваньмыз ыше, вöзам öвöл ке тон.

Эн сüя, шундые. Бездüз ке сяськаед,Тылсиосыд юнгес мед шунтозы сое:Тöллы пумит султоз, мыкыртüськоз, жутскоз –Яратонэд озьы солы бадзым кужым вае.

* * *

Лыз инбамысь чошен шедьтэм кизилимыКытчы меда ышиз?Италмасъёс пöлын жужам яратонмыМалы меда кысüз?..

Жингыраса гурлась тури уллёЛымшор пала лобиз, лэся, вазьгес.Ог-огмылы мусо, чебер кылъёсШат вераны шедьтüм дыртысагес?

Толэзь но вылüын огназ кынме:Шурысь уг адзы ни шудо пыжмес.Тöлзем льöмпу но асьметэк мöзме:Выльысь возьма, шöдске, тулыс куазез…

Тыныд

Сёт куарадэ,Жожтüськон кылъёсме кылüд ке.Вай киостэ,

Усисько шуыса адзид ке.Пуксьы вöзам,Мöзмылэс луэмме шöдüд ке.Учкы шорам,Синъёсме пыдлогес ватü ке.Лык уйвотам,Жытъёсы адскеммы öжыт ке.Пыр сюлэмам,Яратон тылжуэд тырмыт ке…

* * *

Кошкись туриосты берлань уд берыкты –Сüзьыл куазьлэн огез со тодметэз.Кысüсь яратонэз выльысь уд кенжыты –

Пеньлы пöрмоз солэн зырдыт жуэз.

Зарнивуам чебер кызьпу куаръёс пöлыМалы меда кылем одüг вожез?Шат сüзьыллэн уг кельшы буёлэз солы,Яке тодаз возе на тулысэз ?

Укно улысь баблес палэзьпуэд тüниЯратонэн шузимыса гомзем,Асьме куспын ваньмыз шат ыштэмын ини –Яркыт кизилимы малы кысэм?..

* * *

Мон кужымтэм – тон лу кужмо.Мон шузимо – тон лу визьмо.Янгышало – тон шонерты.

Усё – паськыт кидэ пукты.Бöрдо – тон буйгаты монэ:Буйгатüсен кайгу вунэ.Тон тыршы, вала мылкыдме,Тылын эн чушка сюлэмме…Тросгес луиз кадь куронэ,Котьма ке но, тон уть монэ –Озьы косэм ачиз улон:Юнме-а шат тон – воргорон…

* * *

Кулэ öвöл мултэс кылъёс туннэ,Учкемедъя мон валасько тонэ:Ортчиз ке но зарни егит дырмы,Вунэтэмын öвöл на тулысмы.

Ой, кыче мусоесь тодмо синъёс,Оло зэмзэ но бурдъяло соос…Выльысь егит дырам шат вуисько –Пöртэм малпанъёсам мон выйисько…

Быдэс дунне сяськаяськем, лэся,Я инвожо тылсиоссэ пазя?Кикы шудо часъёс лыдъя-чота –Яке ваньмыз уйвöт гинэ-а та?..

Чöк, куспетü эн кары уйвöтме,Усьто тыныд сюлэм висёнъёсме…Огпол ке но тон учкы на шорам,Шудтэм шудо яратонэ мынам…

Тодüськод-а?(кырзан)Тодüськод-а? Мон азьло кадь чик öвöл ни, чик öвöл ни…Тодüськод-а? Йырсиме но пужмера ини сüзьыл…Нош малы егит дыръям кадь сюлэмы лопыръяське на,Син азям на сяськаё тулыс возь выл?

Кылüськод-а? Одüг пол мон шур дуре вамыштысал на…Кылüськод-а? Учыен чош кырзасал но бöрдысал…Юг тöдьы льöмпуосты но одüг пол зыгыртысал на,Тонэныд чош шудбурен пыласькысал.

Бус пöлы ышем возьёс но, чужектэм кызьпу куаръёс но,Чыжектэм палэзьпуос но валало кадь мылкыдме,Оло нош тури уллё но, малы ке кепыраса кадь,Бурд вылаз нуэ ортчись егит дырме?..

Тодüськод-а? Мон азьло кадь чик öвöл ни, чик öвöл ни…Тодüськод-а? Йырсиме но пужмера ини сüзьыл…Нош малы егит дыръям кадь сюлэмы лопыръяське на,Син азям на сяськаё тулыс возь выл?

Инвожо толэзь(кырзан)

Инвожо толэзь, инвожо сяська,Тон мынам вöзам, мон тынад вöзад,

Кыкнамы туннэ шур дуре васькам,Киосыд тынад мынам киосам.

Припев:Ой, учы гуръёс, чыдонтэм уйёс,Мусоесь кылъёс, яратüсь синъёс…Инвожо сяська, инвожо толэзь –Дорысьтым тонэ кошкыны уг лэзь…

Та уе тыныд сюлэмме кузьмай,Яратон кылъёс трос гинэ верай.Шудмылы оло вожъяськиз учы,Арама пушкысь кошкыны уд чыд.

Припев:

Но ортчиз, кошкиз инвожо толэзь,Чыжектэм ини шур дурысь палэзь, Инвожо сяська, я малы тöлзид?Шудбуре мынам, палэнтü ортчид? Припев.

Кöня меда?(кырзан, крезьгурез Г. Павловлэн)

Кöня меда, кöня меда, кöня медаЛыз инмын кизилиез?Кöня меда, кöня меда, кöня меда

Ныл сюлэмын малпанэз?

Жыт шудонэ, жыт шудонэ потüсько ке,Тонэ гинэ утчасько.Жыт шудонысь, жыт шудонысь бертüсько но,Тон мукетсэ келяськод.

Возь вылэ но, возь вылэ но васькисько но,Возь вылтü тон ветлüськод.Кинлы меда, кинлы меда кинлы медаЛемлет сяська бичаськод?

Адзисько ук, адзисько ук, адзисько ук –Мур гажаса учкиськод.Тодüсько ук, тодüсько ук, тодüсько ук –Тон монэ яратüськод.

(Сüзем кылбуръёс)

Г.С.Зайцевалы, школалэн азьвыл директорезлы,дышетüселы – 55 арес тырмонэзлы

Сяськаё возь вылтü пичи ныл бызьылэ,Гольык пыд кариськем, бубыли уйылэ –Ну, лоба ке лоба ик вылэм бубыли,Эн кыль, эн кыльы, кут-ай сое тон, Гали!

Пичи ныл шумпотэ пальпотись шундылы,Кырзаса вазиське жильыртись ошмеслы,Вань дунне эшъёсын тырмемын кадь солэн,Тüни учке али – со шудэ ни зорен…

Чебер вöт кадь кылё асьмелэн сюлмамыВозь вылын бубыли уйылон дыръёсмы;Улонлэн питранэз бергамъя будиськом,Дуннеез но зечгес валаны кутскиськом.

…Вордüськиз нылпиед, со адзиз дуннеез,Со бызе ни дорад, со шедьтэ сяськаез –Шудбуро пичи дыр кузьмалод тон солы,Шундыез, ошмесэз возьматод пиедлы…

Дыр ортче, йырсимы но тани пужмера,Сüзьыллэсь вуэмзэ шат озьы со вера?Бен, озьы ик лыктэ, дыр, уймон-пересьмон –Уг, уг сётскы солы, ведь егит али мон!

Нош лыкто дорады, мусоесь эшъёсы,Тüледын чош васько Вало пал возьёсы;Жингырась крезьгурен азьланьске на улон –Бен, егит али мон, бен, егит али мон…

Н.А.Родионовалы, егит дыр эшелы –50 арес тырмонэзлы

Тодэ ваём, эше, егит дырмес,Шудэн пачыломем тулысъёсмес –Шат вунэтод куке со жытъёсты,Тылскем дурын жужась чукнаосты?

Азьланезлы оскон но яратон,Эшъёс пöлын шудон но серектон,Ваньмыз кырза, сяськаяське котыр –Малы меда жоггес ортче со дыр?..

Тани ортчиз ини жыны даур –Улон тырмыт сётüз меда шудбур?..Синмаськымон нылпиосыд вöзад,Пинал куара мед жингыртоз коркад.

Шудбур но тазалык тыныд сüзё,Вай, дэмен кырзаса туннэ лэзём –Ум жалялэ ортчись арлыдъёсмес,Пумиталом-ай выль тулысъёсмес…

М.П.Дягелевалы, туж тунсыко, визьмо нылкышнолы –40 арес тырмонэзлы

Бен, улон – со адзымтэ уйвöт кадь –Мар выльзэ сётоз вордскись нунал:Шумпотон тыныд со кузьмалоз-а,Синвуэн я пылатоз жыт пал?..

Пумиськоз зечез но, уродэз но,Кузьытсэ, шöгзэ но веръялод –Потыса пöртэм шуг-секытъёс пыр,Улонлэсь шöмзэ ,дыр, валалод.

Котырад оскымонэсь эшъёс ке,Озьыен, кулэ тон соослы;Сüзисько зечсэ гинэ туннэ монТа чылкыт сюлмо нылкышнолы.

Л.Г.Зориналы, пиелэн классэн кивалтüсезлы,вордüськем нуналэзлы сüзем кырзан(1996-тü арын та нуналэ со дышетэм пиналъёссэ бадзым улонэ келяз)

Инбаме чук шунды жужаку,Та бадзым улонэ вамыштом,Гурт сьöрысь кызьпуо бамалынМи тонэн кемалы люкиськом.Шумпотон но мöзмон синвуосБам вылтüд питырско, питырско…Вордüськем нуналад келяськон

Валантэм мылкыдэн бугырске.

Припев:Трос öвöл на арлыдыд,Быгыльскем емыш дырыд.Сüзиськом шудо аръёс,Шундыё выль чукнаос.Ворекъясь кизилиос,Толэзё тулыс уйёсМед котьку буйгатозы,Мылкыддэ бурдъялозы.

Чингыли гырлыед сüзьыл палНош öтёз эшъёссэ школае.Шедьтыны тыршыса тусбуймес,Лушкемак учкылод укное.Ми тонэ сюлмамы возёмы –Мед ваёз ваньмылы выль осконИнвожо толэзе котькуд арВордüськем нуналад пумиськон.

Припев.

Выпускникам 1983-го года Большеволковской школы

Последний школьный день,Последний школьный вальс...Но как похоже это На самый первый раз:

Когда впервые с мамойПришли сюда вдвоём,И мой сосед по партеШёл рядышком с отцом;

Когда впервые словоЯ по слогам прочлаИ в дневнике с «пятёркой»Домой я гордо шла;

Когда «письмо Татьяны»Учитель задавал,Мне первую записку Сосед мой написал…

Как в дом родной ходилиМы в школу десять лет,Теперь за все поступкиДержать пред ней ответ…

Такой же школьный день,Такой же школьный вальс –Но только мамы больше Тревожатся за нас…

1993-ти арын Выль Бия школаез йылпумъям пиналъёслы

Урамын жальыр зоре…«Анай, пот-ай азбаре! Учкы, ма быдза буди:Лумбыт зор улын шуди…

«Я бен,нылы, сыл-ай, сыл –Школае мынод сизьыл,Быдэс висьлы будэмед –Шудэмед ке шудэмед… »

…Лачмытак парта сьöрынПукиськод укно дорын,Дышетüсь кыла-бура,Улонмы сярысь вера…

Дышетскон мынэ азьлань,Нош будэм потэ ялан:Тямысэз вал быдтоно,Жоггес дасэ вуоно…

«…Мар таче та, тамаша,--Чылкак паймемын Маша. –Чингыли гырлы куараМон понна шат жингыра?

Дас одüг аред лобзиз?Кытчы пичи дыр кылиз:Оло льöмпу саюлэ,Яке шуныт зор улэ?

Мон понна шат сяськаосБичаллям пичи нылъёс?Кузьмалом, пе, чеберзэ,Сüзём сюрес шудозэ…»

…Оло нош, лэся, зоре –Пыроно жоггес доре:Уг поты ни будэме,Зоре, вай пичи дырме…

Эх, берпум гырлы куараМар меда кыла-бура?

Ортчизы бурдо аръёс, Монэ витё сюресъёс…

«Колос» колхозын ужасьёслы, профессиональной праздниксылы сüзьыса

Чалмытскизы бусы гуръёс,Лобзо, кошко ни туриос;Нош огазе пукиськоды,Йылпумъянъёс лэсьтиськоды.

Гурто калыкелы туннэМон сüзисько зечсэ гинэ:Зыл-зыл бызись йöло шуръёс,Нянен тырмем ю кеносъёс.

Семьяяды -- бадзым шудбур,Сюлэмады – ялан крезьгур.Мед нылпиос вордüськозы,Сюан гуръёс чузъяськозы.

Мед кельтозы палэнэгесПöртэм кырсез но уродэзДуно Бия котыръёсмес –Сюлмысь ик праздникен ваньдэс!

Гожтэт (Можга педучилищеын дышетскыкум анаелы сüзьыса гожтэмын)

«Я бен, мар ини, нылы,Кызьы мыно ужъёсыд?Кыче улон интыед? Умоесь-а эшъёсыд?

Кемалась бертылэмед –Мöзмиськод ини луоз.Бен ачим но мöзмисько,

Малпасько: тани вуоз…»

Та выллем гожтэтъёсыдЧемысь гинэ вуыло,Сюлмысь потэм чуръёсыдМыным кужым сётыло.

Тон палась вуэм гожтэтКотькудüз ик кузь луэ,Мон палась нош тон дорыНьыль-вить кыл гинэ вуэ…

Нош туннэ мон гожтысал,Ыстысал бадзым гожтэт…Уг, уг шедьтüськы кылъёс –Мед луоз ,анай, шудэд.

Дядя(Пичи дырысеным атайме воштэм агаелы 60 аресэзлы сüземын. Улонысь со кошкиз 61 аресын)

Малы ке но ваньмыз пичи дыр эшъёсыАтае интыын лыдъяло вал тонэ.«Кинлэн тон луиськод-ай, нылы?» юанлы«Валилэн со нылыз», -- шуыло вал монэ.

Оло чапак соин но ой вала, дыр, мон,Мар сыче со зэмос атайлэсь вожъяськон –Та бадзым улонэ сюресме бырйыкум,

Одüгез визь-кенеш сётüсе нош вал тон.

Нуналъёс но аръёс азьпала лобзизы, Семьяме кылдытон вакытъёс вуизы,Вордüськем юртысьтым мукетаз мон потü –Атае интые нош тыныд йыбырттü…

Пиосыд будüзы, кенъёсыд кылдüзы,Семьяед бадзымаз: нылпиос вордскизы –Соосыз вешаса гадь бордад жиптылид,Табере ваньмылы ик дядя тон луид.

Куддыръя сюлэмме öръяны бертüсько:Ти дорын мон аслым выль кужым шедьтüсько.Атыкай юртъерлэсь дуноез вань меда?—Трос аръёс улыны сüзисько на, дядя.

Игорь пиелы – 20 арес тырмонэзлы

Кызь арес луэменыд туннэМи ваньмы зечкыласьком тонэ:Мед шедьтод улонысьтыд шуддэ,Нош озьы ик – оскымон эштэ.

Мед тодод бадзым яратонэз –Кысонтэм, яркыт кизилиез;Тыршы валаны та улонэз,Гажаны зэмос Адямиез.

Куректон мед палэнтü ортчоз,Котькуд нуналэд шудо луоз.Ваньмы ик тонэ яратüськом, Умойзэ гинэ ми сüзиськом.

Дима пиелы – школаез йылпумъямезлы сüзьыса

Пусть каждый день приносит счастье и удачу,А счастье заключается в одном: Люби весь мир – он истинно прекрасен,Прекрасное воспитывай в самом.

Будь другом настоящим и надёжным,Учись ценить и уважать людей,А также различать, где ложь, где правда,Не ошибаться в выборе друзей.

Запомни: никогда не устареетТакая истина, как доброта,Быть чистым пред людьми, перед собою –Вот в этом Человека красота.

Конечно, встретятся в пути невзгоды, Но будь уверен ты всегда в одном:Что в скромном уголке большой РоссииЕсть пристань под названьем «Отчий дом».

Гуртысьтымы война пыр ортчемъёслы сüзьыса гожтэм поэма

Кылем уе чук зардытозьМатысь нюлэс кушынДружинаысь одüг отрядПукиз тылскем дурын.

Та тылскемез уз вунэтэГуртысь пионеръёс…Соку тöлэн öз шыпыртэКызъёс но пужымъёс.

Котыр чалмыт вал со уе.

Толэзь югыт пиштиз…Горд галстукен эшъёсызлыВожатой вазиськиз:

«Ти юады вал мынэсьтым:Кыче адямиезТужгес но юн гажа калык,Малы оске солы?

Кызьы бен подвиг лэсьтоноТа войнатэм дыре?Зэмос эшед луоз-а соКудüз кыле бере?

Юанъёслы валэктыныУг дырты мон туннэ:Ондрей агай зечгес вала,Кызьы берга дунне.

Соин ик кыл сётом солы,Дуно куномылы,Секыт ожын но уж дурынКыдам ветеранлы…»

Нырысь лулскиз Ондрей агай(Малпаз, дыр, азьлозэ),Нош собере каллен гинэКутскиз со мадёссэ:

«…Ческыт беризь сяська зынэнШоказ соку музъем,Куке шунды пуксён паласьВуиз кышкыт пилем.Вуиз, возъяз быдэс инэзАсьме страна вадьсысь,

Солы пумит жутскиз калыкГуртысь но городысь.

Мыным соку вал дас тямыс,Кошки секыт оже…Землянкаос но окопъёс –Озьы ортчиз гужем.

Жоген вуиз зоро сизьыл,Огаз кужмо бойынКылим на ми чошен гинэ,Пуким кот окопын.

Малпам, асьмелэнъёс дорыПеймыт уин вутском,Чукна фашистъёслы пумитАтакае жутском.

Чапак соку йыр вадьсамы,Оло, чашйиз, лэся, --Окоп дорын ик, вылиын,Кылим: «Рус, сдавайся!»

…Кык ар мон вал концлагерьын,Со ньыль арен чошаз.Кытчы эшъёс ыбылэмын,Ини музъем чошказ…

Коня калык быриз отчы:Кудüз секыт ужын,Троссэ ом валалэ – кытчы,Кудüз жуаз гурын.

Огпол малпам ми пегзыны –Тыршим юнме гинэ.

Кыкетüяз пегзем поннамЫштü одиг синме.

Озьы ке но, куинетüяз,Чалмыт луэм бере,Часовоез ожалтыса,Кошким уйшор дыре.

Кöня чидам – уг ни вера –Сотэк но валамон.Кузь сюресэз но жог ортчод,Эшед ке оскымон.

öжыт-а, трос-а ортчимы,Вуим одüг нуналПичи гинэ гуртэ, кытынФашист кузе на вал.

Кык тü кадесь ик пияшъёсМилем ивортüзы,Татын, пе, интыяськемынТушмонъёслэн штабзы.

Малпаськыны ой вал ни дыр –Пеймыт луэм бере,Пуштэм укно пиялаосЗуркатüзы кырез…

Тылын гомаз немецкой штаб,Фрицъёс пазьгиськизы –«Жоггес, жоггес! Партизанъёс!» --Шимес кесяськизы.

Со пияшъёс ик милемлыВозьматüзы сюрес,

Озьы соос ик юрттüзыМозмытыны гуртсэс.

…Асьме частез шедьтон сярысьМалпаськонэз ой вал,Татысь партизанъёс дорыВуим ми уйшор пал.

Командирлы валэктимы,Кытысь но кинъёс ми,Верам кылмес юнматüзыПокчи юлтошъёсмы.

Озьы кылим та отрядэ,Ужъёс öжыт ой вал.Маза öм сётэ тушмонлы –Тыршим котькуд нунал.

Вуиз ньыльдон ньылетü ар…Одüг гужем жытэШтабмы мыным но эшелыЗадание сётэ:

Кулэ чугун сюрес вылысьВыжез пуштытыны,Оже кошкись составъёсызВуэ зымытыны.

Задание капчи ой валУжам чакласькыса –Кужмо пуштüз но, выж куашказ,Шори пилиськыса…

öм вуэ жогак пегзыны:

Фашист артэ ни вал…Кыкетüзэ гижыосазШедим ми та нунал.

Эшме секыт сöсыртизы,Быдэс лызэктэмын,Со пыраклы синзэ кынизШунды жужан азьын.

…Кузь офицер нуиз допрос:«Кытын партизанъёс?Кöня кузя отрядады?Кöня коммунистъёс?..»

Пуки пал кыл но вератэкКаргам тушмон азьын.«Быри ке, чок, -- малпай поннам, --Ужмы быдэстэмын!»

…Чап со вакыт асьме частьёсОтчы матэктüллям,Со станциысь но фрицъёстыВаньзэс туздыриллям.

Кык нылашъёс-санитаръёсМонэ синйылтüллям,Жегатскытэк госпиталеСоос ик вуттüллям…

Синме усьтэм бере, валай:Огез пыды öвöл –Вань бадзымесь малпанъёсмеНуиз кадь лек сильтöл…

…Шудо тулыс нунал монэ

Вордэм, лэся, анай,Италмасо Вало возьмеАдзо вылэм на ай.

Бен, фронт сярысь малпаськонэзОй вал ни табере –Вуи мон ас вордскем гуртамЧапак аран дыре.

Ужась киос уг тырмо валСоку колхоз лудын –Ваньмыз сямен воргоронъёсОжмаськизы фронтын.

Мынам трактор куремелыНырысь чабкиськизы:Кызьы, пöй, тон пал пыдыныд? –Берло буйгатскизы.

Угось чидам егит сюлэмКосüз соку озьы:Гуртысь кышномуртъёс азьынМедаз луы возьыт.

…Паськыт колхоз бусы шорынВормон сярысь тодü.Кытын уен-нунал тырши,Фронтлы нянь будэтü.

Тюрагаен вожмаськысаКырзай мон со нунал.Эх, жаль, огез пыды öвöл –Кыче мон эктысал!..

Фронтысь пиос оген-кыкен

Берытскизы гуртэ,Куд-ог коркан бöрдон но валШумпотонэн артэ.

Воргоронъёс берытскемен,Кылü таче чектон:Ужед, пе, ачидъя öвöл,Капчизэгес шедьтом.

öвöл, шуи, бускельёсы,Уг яра чектонды:Быриз ке шат ОндрейдылыОскон тылгизьыды?

Андан валэн люкиськыныУг лэзьы на сюлэм,Коркан кызьы бен чидалодТаче шудо гужем?

Со дырысен люкиськытэкУжай мон тракторен…Ваньзэ: зечсэ но уродзэ –Ми чидамы чошен.

Шудо-а мон, пал син, пал пыд,Мугор гинэ быдэс?Бен, туж шудо! Ужын ыштüАръёсылэсь лыдзэс.

Кöня мыным: ньыльдон, витьтон?Куатьтон, я сизьымдон?..Калык пöлын, зырдыт ужынОртчиз быдэс улон.

…Луоз-а подвиг лэсьтыны?Луоз, но тод нырысь:Подвиг лэсьтись – зэмос герой –Уг малпа со сярысь.

Зэмос герой выись муртэОдно адзоз нырысь,Зэмос герой жуась муртэАзьло поттоз тылысь.

Нош быгатüд ке классысьтыдЮн ашкынэм эштэЗеч сямо мурт карыны,--Ушъялозы уждэ.

Озьы бере, тон – оскымон:Дано горд галстуктэУд нуллüськы юнме щорысь –Сэзь лёг ас сюрестэ!

Тини озьы, мусоосы,Дышетсконын, ужынЗэмос кивоштисьёс ветлоНырысетü радын…»

Шыпыт пуко пионеръёс,öвöл тыл кысэмын –Ини шунды жужан паланИнбам льöльмаськемын…

Таиз кылбуре «Элькуновидение 2014» вожвылъяськонын 18 ёросъёс пöлысь устоез шуыса лыдъямын.

Кошкись егит дырОй, зарни сüзьылэ, Зарнизэ буёлдэ жаляса-а,Тон мынам садысьтымБерпумзэ сяськаме пужмерад?Ой, бурдо егит дыр,Мынэсьтым шыпытак ватскыса-а,Бурд вылад тон нуид

Шудоесь аръёсме ас сьорад?

Припев: Лобзозы, кошкозы нуналъёс но аръёс, Вордскозы выльёсыз шундыё чукнаос, Гурласа-гурласа бертозы туриос, Сяськаен пушъёзы жингырес тулысъёс.

Егит дыр мылкыдмеМон туннэ но кыре поттысал на,Толэзё уйёсыВож льöмпу саюлын пукысал.Тынэсьтыд лыктэмдэ Сюлэмы чидатэк витьысал ноПальпотüсь синъёсадЯратüсь синъёсын учкысал.

Припев:Шур дурысь бадьпуос,Мае ке тодазы вайыса кадь,Шыпытак ныруло:Тулыслэсь, дыр, мöзмо ни соос.Егит дыр аръёсмеКинлэсь ке ватыны тыршыса кадь,Утьыса кадь возёГуртысьтым чалмытэсь ульчаос.

«Инвожо толэзь» шуыса нимаськись кылбурелы Геннадий Бекманов сокем кемалась öвöл крезьгур гожтüз. Берло дыре со чузъяське удмурт радио пыр.

Инвожо толэзь, инвожо сяська, Тон мынам вöзам, мон тынад вöзад, Кыкнамы туннэ шур дуре васькам, Киосыд тынад мынам киосам.

Припев: Ой, учы гуръёс, чыдонтэм уйёс,

Мусоесь кылъёс, яратüсь синъёс… Инвожо сяська, инвожо толэзь –

Дорысьтым тонэ кошкыны уг лэзь…

Та уе тыныд сюлэмме кузьмай, Яратон кылъёс трос гинэ верай. Шудмылы оло вожъяськиз учы, Арама пушкысь кошкыны уд чыд.

Припев:

Но ортчиз, кошкиз инвожо толэзь, Чыжектэм ини шур дурысь палэзь, Инвожо сяська, я малы тöлзид? Шудбуре мынам, палэнтü ортчид?..