ቺርቤዋ

አኽ ፍንካ እኾሺካ........3 ፃና ዳራት........ 5 አድዋ.......... 6 ኻራላ.......... 7

ዋይሚ 1 ብር

አይሸሽም አባተ

5ንቲ አሜት ቼፍ 10 ይካቲት 30 ጌርክ 2ዐዐ8 ም. አ ዎይሚ 1 ብር

አውጚ ራዲዮንስ

ፌያፌይጛውሳ ኘሮግራሞ ቹኒቲካማ

ካንቴ እይጝስ AR

ቢዲርፂካማጊ 82ዐዐዳ

ዴዴጝ ፁፋሳ /sms/እንፅኼንቶ ታምፃን

ካሳነሽ ተረፈ

ድማ ጋቲታ ቱትጜ ይጉፅጝስ አይማኖቱ ታብልካው ታምብ ኬፍቲኒያኽ

ይቶፒያው ጝናአቑ እግስ እድሚ 18 አሜቶ ዋኼካያስኩ ኹናኪ ያኻ ምሽታሪ ቱትጜ አኹኪ ትዳሮ ሜሴሬትጝስ ካላቲንኩ አኽⶓ

ዴንጌጌ:: ቴግባራዋ ያኻውላስ ይጉጝስ ኩፂ ችግር ውላ ዙራሙርካዳ ካንፅስቴ:: ይቶፒያው ጉዳንቴ ባይሎ ድፅⶓ ማቢሪ 2ዐዐዐ ምሬት አሜትዳ ካስጝፅኹ ፅናትስ አማኻሪ ክልልዳ 15 አሜትዴስ ኩክራ ኽይስታንኩ

ስራስሪው ቼፍ ኬፍ ንኹ አኽⶓ ካንትፄ:: ሊኽዴስ 44 ታፋ ያኻንኩ ስራስሪ ድሚ ክቺክቺስ ታምባውላ

ኽይስታና::

እን ዝርዝሩሳ አብኖኪ ፍን 4ዳ ካንታን

ክርፂ ቺፅጝፂውሳ ችግሮ ኽይጝስ ጄሜርስትኹ ልቕልቕቲ ሲፋታ ኩርፄንት እንፃኽስትጝ ቱስቴ እስትኾ::

ንማቻ ባርዳር ኬቴምዳ አማኻሪ ክልሉ ኩስጚጝናዳ እዝብኩ ዋኬልስታንትካው ኩስጚ ጝናስኩ አባልካሊ ፄውስትኹ ኩስጚዳ ክርፂ ቺፅጝፂውሳ ችግሮ ኽይጝሾስ ካንትስታማጊ ዝኩኽ ክርፂ ልቕልቕቲ ሲፋማ ካሳታ ኽስኹ ኩርፄንትስ እንፃኽስትጝ ውላዴስጊ ማንዲስታው አኽጝ ጌሌፅስታ::

እንጚዳኪላ እዝብ ጐሌላማ ዎኬሉኩ ኩስጚ ጝናስኩ አባልካ ጐሌልስቱኑ ዙራሙሪ ቺፋ ካስጝስ እዝብሊ ኩስጛካማ ጁንኩሳ ችግርካዋ እሚካማ ዙርጝስ ክልሉ አችስ ካንታው አካልሊ ኩስጝጜ ፄውጝስ እዝቡ ችግር ኽይስታታ እንፃኽስትካማጊያኽ::

እን ዝርዝሩሳ አብኖኪ ፍን 4ዳ ካንታን

ክርፂ ቺፅጝፂውሳ ችግሮ ኽይጝስ ኩርፄንት

ፋይፄ

ክርፂ ቺፅጝፂውሳ ችግሮ ፌቴሩንኩ አመራርካስታ ውማይቴንካ ካሲስታንትካ ያኼካማጊ አኽⶓ አማኻሪ ክልሉ ምንግስት ኮምንኬሽን ጉዳይካው ፅ/ጝና አቕፅኾ::

ፅ/ጝናሱ ቹዋ ዳይሬክተር አቶ ንጉሱ ትላሁን ዙሙኑውስታጊ

ፌይንኩ ዋልታ አርፍካዳ ክልልዳ ክርፂ ቺፅጝፂው ልቕልቕቲ ጄሜርስታማ እንፅኺ አኮሜችስታማጊ አግስቴ:: ችግርካ ሺሽስትጝስ ኪላ ችግሮ ፌቶራንትካ ውማይቴንካስታ አመራርካ ካሲስታንታ ያኼካማጊያኽ ንካ::

ዙራሙሪ ቺፋ እምኘልታቕ ጉሻኩ ክርፂ ቺፅጝፂው ችግርካዴስ ብቴ

ቺፅጝፂው ኾት፣ ፍትጝና፣ ሚፂው ኾት፣ ጊፁ ዜርፍስታ አራቴ ጉሽፃንትካ አቑ ችግር ቹዋ ቹዋ ችግርካ ያኼካ::

እን ዝርዝሩሳ አብኖኪ ፍን 4ዳ ካንታን

ችግሮ ፌቴሩንኩ አመራርካስታ ውማይቴንካ ካሲስታንታ

ያኼካማጊያኽአዳሙ ሽባባው

ፍን 2 ቺርቤዋ ይካቲት 30 ጌርክ 2ዐዐ8

ትክምቲ 1 ጌርክ 2ዐዐ3 ም.አ ሜሴሬትስትኾታምፂ ዐ5822ዐ4752 /ዐ5822ዐ333ዐ

ፋክስ ዐ5822ዐ8877 /5881ፖስታ 955 ባህርዳር

ቴቤቤርጝፃንታ፡- ይፍቱስራ ፈንታሁን yiftufenta@yahoo.com (@gmail.com)

አርታኢ ፡- ቦታውላንቺ ተረፈ

terefebota@gmail.com

ኬፍቴንካ ሪፖርተርካ

-ካሳነሽ ተረፈ

terefe kassu 123@gmail.com

- አይሸሽም አባተፐብሊሸር ኦፊሰር፡- አዝመራ የኔው ፎቶ ጉሺ፡- ሰለሞን ሀዲስ - አቕስፂው አገልግሎቲስታ እትሜቱ ሲፍጝጚ - ታምፂ058 2 20 47 52 ባህርዳርኢሜል ፡- C gazeta123@gmail.com አግፅፂ ፍን/ ድረ ገጽhttp:// www.amma.gov.etአቴማንቲ፡- ብርሃንስታ ሰላም አቲምፂው አችት አዲስ አበባ

ቺርቤዋ አማኻሪ ክልሉ ሚንችትካው ታምትጝፂ አችትስ ላጛ ሶኼታዴስ እምኘላኒ ቴርታው ጋዚቲ

ቹዋ እንፅኼንት

ቺርቤዋ

ንባር ውላቱዊ ኪሲስስታ ኽሳንትትስ !

ታምብስ ቺርቤዋስ

ክቺክቺያኽቲኖይን ቺርቤዋ ጋዚቴ ቴርሳንትካ:: ይካቲት

15 ጌርክ 2ዐዐ8 ምሬት አሜትዳ አቴምስትኹ ጋዚቲ ታፍዳ ታምቡታ አንቤፓኒ ውላጊ ፍንካዳ ፉንኩ ፁፍካ ኬሽጛማጊስታ ጉዶ ንባሮ እያንኩ ያኼካማ አግፃ:: ጋያኪ ፍትስታ ክርፂ ቺፅጝፂው ፍንዳ ላጛ ቴግባር ዌና ናው ጛሪስ ፉኽ ፁፍ ማልጜ ክርፄ ንባሮ እሚኹዊያኽ:: እንጚ ኪላ አን ዝኩኽ ዙራሙሪዳ ፌሬስቴንካው ማቢሪ አርፊ ቺፋ ታምትጛማጊ ኹጝስታ ዝቕጝ ይቢቺ ያኻውላ ማቤራዊው፣ ኢኮኖሚውስታ ፖለቲካው ዜርፍስ ሚንችካ ቴግባርካዋ አኮሜቻማጊ አግስቴ:: ጋያኪ ክርፂ ቺፅጝፂው ዙሪዳ ዙራሙሪ ቺፋ እጐስታ ዴንቦ ፍሻማጊ እዝቡሳ ሴላሞ ማንዲፅጝስ ፄዋው ልቕልቕቲ ዴስፃውስታ ካንታኩ አካልካሊ ዴጌፍጝ ፋይፃው ጉዳያኽ::

እንዴስ እሊው ባይላዋ ያኹንኩ እሴትካዋ ማንዲጝሾስ፣ ማቤራዊ ታምትጜ ይስጝፅጝስ አኮሜቻውሻው እንፅኺ ይሳን እፃዊያኽ:: እንጚዳኪላ እንቶጂ ኪላ እንታኮንኩሳ ንባርካዋ ፍሽትካማጊ አንቤብፅጝ፣ ያቓያሱውስ አቕፅጝ ጋሺፃው እንፅኺያኽ:: ጝሺኪላ ዚጋሚ ወረዳዳ አግስታው ፊሪስቲኒው ማቢሪ ዝኩንኩሳ

ችግርካዋጊ ካንታውሳ አካሎ ካሴማጊ ክቼያታ ፄውጝስ ዙራሙሪው ፄትቲው ዙሪዳ ሚንቾ እንፃኽስታንታ ይስጝፃን::

መሰረት ዋኘውዚጋሚዴስ

ኬሽኹ እንፅኺስጊ እሺስ

ቲኖይን ቺርቤዋኩ ቴርሳንትካ:: ይካቲት 15ዳ ፍሽቱኒ ጋዚቲዳ ዲጉንኩ ፁፍካ ውላጊ ክንፅፃንትካኽ:: ፍን 5ዳ ባይልስታ ፍትኽፂዳ ብንካ አቒታ ካሎ ቱትጜካማ ናውጛሪስ ዲግኹ ፁፍ ሚንቾ ታሪኮ አቕፃው ፁፍያኽ:: ቱሪዝሙ ጉስንትካዴስ “ውራው አዊ” እምኘልያኽ:: እን አዊ ኩፂ ጝሺ ኪላ ዳሌ አግልግሎቴ አግፅፃማጊያኽ ንጝስ ካሊስታላ:: አዊ/ውራ/ እሊው አብት ዌናስኪ ያኻ ምንግስትስ እምስታማ እሊኩ ዙራሙርካዳ ፄውስታውስታጊ አሼግስታማ ዋይስቱኒ እንዴስ ኽስኹሳ ትክሞ አግፅፃው አኽጝስ እንቶጂ ኪላ ይስትካማ እንፃኽስትጝስ ኬሽኹ እንፅኺስ እሼታ ፄፓን::

አንተነህ ያዘውቻግኒዴስ

ክፃት ኬፍ ንጝ ቱስቴ !

አማኻሪ ክልልዳ ክርፂ ቺፅጝፂው ችግርካዋ ኽይጝስ እሳን ኩስጝጚ ፄውስታማጊ አግስቴ::

እንዴስ ፍና እዝብ ዲግሳው ክርፂ ቺፅጝፂው ክሬቲስ ምንግስት ክፃቶ ካፃማጊ ጋቲዊያኽ እስታማ

ቲቺስታሺኾ:: ዲጋስ ፄውስታማጊ ዝኩኽ ኩስጝጚዳ ጁዋንኩ ክሬትካዋ ስራ ፄዋማ ካፅስታማጊ

ዝኩኽ ችግሮ ኽያው ክፃት ኩፂ እዝብ ጉሻው እሺኹ ክሬቲስ ዙርፄ እያው ዊያኽ::እንዴስ ፍና ዴስስታያሱ አኺኒስ ክርፂ ቺፅጝፂውሳ ችግሮ ፌቴርጝስ አሴቴፍጙንኩ አቕዳ እሳንስ

ክፃት ካፅስታማጊ አኽጝስ ሙሴንካስታ ክርፂ ቺፅጝፂውሳ ችግሮ ፌቴራንትካ ጛጛርትጛሳ ክቺሳንታ ፄዋው አኽጝስ ኬፄልጝ ቱስቴ:: እዝብ ኪላ ምንግስቶ አምንጝስ ካላው እንታኮንኩ ክሬትካ ጁዋኒ ሼውዴስ ቹኒታማ ፍትኔትስ ክቺሱስ አኽጝስ ኹሉ ቺፋሱ ቴግባር አኽጝ ቱስቴ::

እንዴስ እሊው ሊጊሲሚ ጊዝስ ኩቹስ እጄማ እምኘላኒስ እንታኮውሳ ክፃቶ ካፅⶓ ጄሜርስትጝ “ምንግስት ላምቡ ኺስታ ዋዳ እሺኹዊ?” እፃው አኽጝስ ክርፂ ቺፅጝፄ ፌቴራንትካዋ ክቺስጙ ቴግባር ኹሉቺፋሱ ቴግባር አኽጝ ቱስቴ::

እንዴስ ፌይኹስ እምኘል አላፊ እዝብ ዎኬሉክ ዎኬልስታንትካስ ኩስጚ ጝናሱ ፍንዳ ሜሮ ፄዋማ አላፍቶ ታቕካያን እስታውስታጊ ቱስታቲው ቴግባርስ ሻሪስቱስ ኪላ አቕስቱኒጊ ምንግስቱስታ እዝቡ ክቺዳ ኽስኹስ አምንጜ ፌቴራው አኽጝስስታ እሊውኪላ ዎሴኻቲታ እርዳታው አኽጝስ ታክስስትጝ ቱስቴ::

እን እስቱስ ኩፂ ክልልዳ ውላጊ ሹሜትስታ ሻሪስትጝ ዛራዛርስታማ ዲግስ ንጝ ያኻውላስ እንፁኒ እንፁኒ ቹዋ ቹዋ እስታንኩ አላፍቱ ስፍርካዳ እንጅኩንኩ አመራርካውሳ ጉሽፄስታ ታምብፄ አቕጝ ቱስታው አኽⶓ ቶኬምጝስ አኽⶓ ሼውቲ እምስትጝ ቱስቴ::

ክርፂ ቺፅጝፂው ችግር እምኘል አቒስ አኹኪ ኬችስ ፌፄምስትጝስ ካላው አኽጝስ ኬፍቲኒ አመራሮኺስታ ፌቴሻማ ፋይፃውሳ ክፃቶ ካፅጝ ቱስቴ እኔ:: ጋያኪ እምኘል ምንግስቱ ሜስሪ ጝናዳ ፌቴርስታው እንግርቱኽ እንፃኽስትጚስ ካሲስታንቲ ውማይቲኔ እንቲታኪ ጜዋ ክቺስጝ ቱስታው እሺኹ አመራር ኪላ “እንዳራ ፄውታሺቲኹዋይ?” እስትጝ ቱስቴ::

ክፃት ኪላ ክቻክቺ አመራርዴስ ፌያማ ኬፍቲኔ አመራሮጊ ካንትጝ ቱስቴ:: እን ያኻውላስጊ “ድኹዋሬ ጅፊስታማ ቡዊኔ” ናኑውስታ ዙራማ ችግርሾ ቱጝ ይጉዋላ:: ክልሉ አችስ ክፃት ካፅስታማጊ አግስታንኩ ትፋቴንካ ክቻዴስ አመራርካ ዝኩዋችኹኒውላ ኬፍቲኒስታ ቻኒስቶ ፌቴራንትካ ምንግስቶ ጉሳንትካዳ ትኩቶ ፄውጝ ቱስቴ:: አላፍቶ ቱስቲስ ፊትጛያሱሳ ውማይቲኔኪ ያኻ አመራሮ እምኘል ሜስሪ ጝናዴስ እሊው ሜስሪ ጝናሾ ካፅጝ አኹኪ ዜዌዌርጝፅጝ ክፃትታ ቼፍስትጝ ቱስታላኪ::

ክርፂ ቺፅጝፂውሳ ችግሮ ፌቴራንኩ አካልካዳ ካፅስታማጊ ዝኩኽሳ ክፃቶ ጋሺኑኒኪላ ክፃት ኩፂ ኬፍቲኒ አመራርሾ ኪላ ጉድጛ ቱጝ ቱስቴ:: ሚንችካ ክርፂ ቺፅጝፂው ችግርካ ፌፄምስታኑ ስርኩኒስ አኽጝስ እምትጚው ጌሜድ /ቴርት/ ታንኩንጝ ቱስቴ:: እን ያኹስ አች ቺፋ ዝኩኽ ትፋቲኒጊ አግስትጝስ ካላው አኽጝስ ቼፍጝጝስ አሜቼ::

ፍን 3 ቺርቤዋ ይካቲት 30 ጌርክ 2ዐዐ8 ይኮኖሚስታ ልማት

ካሳነሽ ተረፈ

ዴዴጝ አብንካ

እኾሺካ

እሺኾ...እንሴስካው አብቱ ልማትስ ኬሽኹሳ ቼፎ

እሚጝስ አሌምዴስ 1ዐንቱሳ አፍሪካዴስ ዴሜካ እምኘላንቱሳ አቾ እምቴታ አግስቴት አጌራ ይቶፒያኽ:: ያኼስጉ እኾሺው ምርቱ ዜርፍስ ዜሬቕቲኔ ምርቶ አሜሬታንኩ አጌርካ ክቻዴስ እምኘላኽ:: እን ያኹኽ ኪላ እኾሺው ልማቱ ዜርፍዳ ዲግስጚዳ፣ ፃንኩትዳስታ፣ ጌቤልትጚዳ ዝኩኽሳ ችግሮ ፂኒስጝስ አኮሜችስትኹ እንፅኺ ልቓ አኽⶓ ቶኬሜ::

ፅናቶ ስሬታ ፄውጝስኪላ ይቶፒያው እሺውስታ እኾሺው ኢንዱስትሪ ልማቱ ኢንስቲትዩት ታምብ ዌና አካልካሊ አኽጝስ እኾሺስታ እኾሺኩ ዎይምካው ቴኬምስታንቱ ዙሪዳ ንማቻ ባርዳር ኬቴምዳ ኩስጝጜ ፄዋ::

እኾሺውሳ ምርቶ እንግርግራ ይጉፅካማጊ ዝኩንኩ ፃንኩቱስታ ቴኬምስትጚው ችግርካ አኽጝ ትኩትስ ዙሚስታ:: ፃንኩት ዝኩኽሳ እኾሼ አሜሬታማ ቴኬምስትጙ ሴልስ ሌጌሱንኩ አጌርካዳ እምኘል አቒ ክቻክቺስ ሹኻ ሊኻዴስ ሲዚሊኻ ሊትር እኾሼስታ እኾሺውሳ ምርቶ ቴኬምስታንኩ ያኹስ እን አጌራዳ ኩፂ ክቻክቺስ 19 ሊትርዴስ ኽስኹሳ እኾሼ ቴኬምስታቲው አኽⶓ ዜርፍስ ፄውስቱንኩ ፅናትካ ቶኬማና::

“እኾሺውሳ ችግሮ ኽይጝ ንጚ ይንታው ክምንቱሳ ችግሮ ኽይጝ ንጚያኽ” ኑንኩ ባርዳር ኬቴም አባዊ ዙሪው እኾሼ ዲግሳንትካው ማቢሪው ሊከመንበር አቶ ደረሰ ሙቼኽ:: እኾሺስታ እኾሺኩ ዋይምካዳ ዜርፍስ አኮሜችስታማጊ ዝኩኽ እንፅኺ ፋይስታው አችስ አጌር አቖ ቴኬምስታንታ ፄዋማጊ ጋቲው አኽⶓ ጌሌፅካ:: ጛው ማቢሪ እኾሼ አሜሬትጙስታ ዲግስጙ እንፅኺስ አሴሜርጛማ ዝኮችኹኒውላ እዝብ እኾሼ ጄዋማ ዝቕጙ ዴስ ማልጜ ዜሬቕቲኒ አኽጝስ ማቢሪው አባልካ አግፅካማጊ ዝኩኑ ሚፂ እንፃኽስታኑሳ ላካ ቲካማጊ ጋቲው አኽⶓ ዙሜካ::

አቶ ደረሰው ጊሊፂታ እኾሺውሳ ፃንኩቶስታ ዲግስጜ ክቺስካማ ዲግሳኒ ኪላ ጌቤል እላ አኽጝስ ሲስቲ ሊኻ ሊትሮ እኾሼ ክብፁኑ ጊዝ ዝኩⶓ እንክርፄካ:: ምክንያቲ ዴሜካ ዲጊዳ እኾሼ ቴርስፂው ፋብሪኪ እላ አኽጚያኽ:: ዲጊዳ ቴርስፂው ፋብሪኪ ዝኩኒጊ እምኘልታቕ ጄውምባ ማንዳቲንኩ አኽጝስ ኩታ ፋብሪኪሾ ካሳታ ፄውጝስ አሬሳቻንቲኪ ያኻ ጛጂ ኪሳሪዴስ ፋንኩ አኽⶓ ዙሜካ:: ትክላሊስ ኩፂ ዜርፍስ እይስትኹ ትኩት እንፂⶓ ቶኬምካ::

ወዛሩ አገሬ እንየው ባርዳር ዙሪ ወረዳዳ ትሺ ትሺ አባዊው እኾሺው ልማቱ እምኘልት እንፅኻው ማቢሪው አላፋ ያኻኒስ እዝብ እኾሼ ዝቕጙ ቴርትዳ ዝኩኽ ሼውቲ እንፂጝ እኾሺው ዜርፍዳ አግስታው ሚፂኪ ያኻ ትክም ኔኬታታ ፄውⶓ ዙሜካ::

ዊዛሩ አገሬ ኑኑውስታኪላ እዝብ እኾሼ

ዋኽ እምኔትስ ጄዋማ ዝቓቲታ ፄዋንኩ ሚንችካ ዲብካ ዝኩና:: ሻይ ጝና ቺፋስታ ምግብ ጝና ቺፋ ዋይስታንኩ እኾሺስታ እኾሺኩ ዋይምካ ፃንኩቶ ማንዴካያስኩ አኽጝ ኪላ እምኘል ችግርያኽ:: እኾሺሊ ሊሊትጙንኩ ስንክራንኩ ዲብካ አሌቔትስታና:: ፓውደር /እቲኒ/፣ አኹስታ ሊሊትጙንኩ ኬሚካልካ እኾሼ ዝቓው እዝብስ አሜቹኽ ጋቲዊያኽ:: እንቲታኪ እኾሼ አሜሬታው አሬሳቻንቲስ ዳሊ ስልታኒ እይስታያሱ አኽጝስ እኾሼ ጉዋራኑሳ አክኼ ፃንኩቶ ማንዳኑላ ይጉጝ፣ ቑንዳስቱንኩ እሎ እሎዋ ሻኻ ጋቲታ ጉዋራማ እኾሼ ዋይጝጊ እኾሺው ፃንኩት ማንዲስታማ ጌቤሊዳ ልኺትጛንታ ያኻቲታ ፄዋንኩ ችግርካ ክቻዴስ ቶኬምስታንኩዊያኽ::

እኒጛ ችግርካዋጊ ኽይጝስ እኾሺውሳ ቴርስፄ ፋብሪኬ ምንግስትስታ አብት ዌንካ አብርታ እንፃኽስትጝስ አሬሳቻንትካኪ ያኻ እኾሺው ዲግስጚው ማቤርካዋ ቴኬምስታንታ ፄውጝ ማንዲስታው አኽⶓ ዊዛሩ አገሬ ድኹዌካ::

አማኻሪ ክልሉ ጊፁ ኢንዱስትሪውስታ ጌቤልትጚው ቢሩዳ እንሴስካውስታ እንሴስካው አሊቢ ጌቤልትጚው እንፅኺ ካስቱ ጉሳንቲ አቶ ዘላለም አዲስ ጛሾስ ክልላኻዳ ዝኩንኩ እኾሺኩ እንሴስካ ፋይስታውሳ ላካ እኾሼ እይካማጊ ጋቲዊያኽ:: እስጜ ኬሽጝፅጝስ ጝሺ ኩፂ ይቶፒያው እሺውስታ እኾሺው ኢንዱስትሪ ልማቱ ኢንስትቲዩት እሳኖ እንፅኼ አኮሜቻማጊያኽ:: እንስ ኪላ ጝሺ ጁዌካማጊ ዝኩንኩሳ ችግርካዋ ኽይጝስ አማኻሪ ክልልዳ ባርዳር ኬቴም አዴት ዙሪዳ እምኘል አብት ዌናስ እኾሺው ቴርስፂው ፋብሪኪ ቲሪትጛማ እን አርፊዴስ ፋሌንጋ እንፅኼ ጄሜሬ:: እንፅኺሾ ቱኒዴስ ባርዳር ዙሪዳ ይቢቺ ያኻውላስ እንጃቢሪ፣ ማርኮስ፣ ጐንዴርስታ ዙሪዳ ዝኩኽሳ ችግሮ ኽይጝስ ጌቤሉሳ እንፄውትጜ ፌቴሬ እስታማ አምንስቴ ንካ::

እን ያኹስ ኩፂ እምኘልታቕዳ ኽሳንቴ እንፅኼ አኮሜችጝ ቱስቴ:: ጋያኪ ጌቤሉ እንፄውጚ ፌቴርስታታ፣ እዝብ ፃንኩት ዝኩኽሳ

እኾሼ ዝቓማ ቲን ዌና ያኻታ ፄውጝስ እኾሼ አሜሬታውኪ ያኻ ዲግሳው አካል ሼውቴ እሚጝ ፋይፄ:: እንስኪላ እኾሼ ፃንኩትስ እሜማ ጌቤልስ ዲግስጝስ ባርኾቼውሳ ምንዛሬ /ሚፄ/ አግፅጝስ አጌራውሳኪ ያኻ ጛርቱሳ ሚፄ ሌጌፅጝስ ልቕልቕቴ ፄውጝ ፋይፃው አኽⶓ እርዳትፅካ::

አቶ ታደሰ ጉታ ይቶፒያው እሺውስታ እኾሺው ኢንዱስትሪ ልማት ኢንስቲትዩቱ እኾሺው ዜርፉ ትክትሊ ቹዋ ዳይሬክተርካኽ:: እምኘልታቕ እኾሺውሳ ምርቶ ቴኬምስታውላ ይጉጝስ እኾሺዴስ አግፅⶓ ካላውሳ ትክሞ አታማጊ አኽጝስ እስጜ ችግሮ ኽይጝስ ዙራሙሪ ቺፋ አሜሬትስታውሳ እኾሼ ቴርሳው ፋብሪኪሾ ሚፅጝስ አምኘልታቕስ ታምባታ ፄውጝ ቱስቴ:: እንስኪላ አጌር አቡቑ አችስ እሺንኩ ፋብሪክካዳ እስካውካዋ ዴሜክጝስ እኾሼ ዲግሳንትካዋስታ እኾሼ ቴርስፅካ ፋብሪክካዋ ዲግስጝፅጝስ ኢንስቲትውት እሳኖ እንፅኼ እንፃኽስታማጊ አኽⶓ ዙሜካ::

ድምክናኪላ ሊሊትጙንኩ ኬቴምካዳ አግስትጝስ ወርክ ሾኘ /ኩስጜ/ ፄውጝስ፣ ስልታኔ እይጝስ፣ እኾሺስታ እኾሺኩ ዎይምካዳ ቼፍጝጜ ፄውጝስ ዜርፎ ሌጌፃማጊ አግስቴ:: እኾሺ አቒያስ ማልጜ ፋይፃንቲ ያኹስ እምኘል አቒ ጌርክስ እንፁኒ ኪንዲ ሊትሮ እኾሼ ዝቕጝ ፋይፄ:: አካላቱ ልግስስኪ ያኻ ስራስሪው ውላ ቱዊ ቲንስ ኪላ ስሪያኽ:: እን ያኻማ ኩፂ ጝሺ እኾሼ ቴኬምስታው አቒው ቼፍ ማልጜ ፅሊያኽ:: እስጜ ኪላ ታምብ ዌና አካልካስ ስልታኔ እይጝስ እምኘልታቕ ሼውቴ አግፃንታ ፄውጝስ እንፃኽስትካማጊ አኽⶓ ቶኬምካ::

እንዴስ እሊው እኾሺዳ ካንትስታማጊ ዝኩኽ ፃንኩቱ ዳንጉኒያኽ:: እን ዴሜካ አቒያ 98 ታፋሳ ያኻው ቲኑ ችግርስ ታምባው ዝቓውስታ ኹዋው ዲብ ስንክርስትጙ ምክንያታስ አኽጝስ ትንካኬ ፄውጝ ፋይፄ:: እኾሼ ፃንኩትስ አሜሬትጝስታ ጌቤልስ ዲጋታ ፄውጝ ዴሜካ እምኘል አካል ይቢቺስ ባይስታው ያኻውላስ ውላጊ ዜርፍዳ ትኩቶ እይጝስ እንፃኽስትጝ ቱስታው አኽⶓ አቶ ታደሰ ታክስፅካ::

ኢንቨስትመንቱ

ኘሮጀክትካ እንፅኺሾ

ቱጝ ጌሌፅስትኾ

አማኻሪ ክልልዳ 26 ሻይዴስ ጃላ አቕስ እንፅኺውሳ እድሎ ፌቴሩንኩ 377 ኢንቨስትመንቱ ኘሮጀክትካ እንፅኺሾ ቱጝ ጌሌፅስትኾ::

ፌይንኩ ዋልታ አርፍካዳ እንፅኺሾ ቱንኩ ላጜታ ትኩሚ ላጜታ ቢሊዮን ብርዴስ ጃላ ካፒታሎ ሜዜጌብፁንኩ ኘሮጀክትካኽ::

ግብርኒስ፣ ኢንዱስትሪስ፣ ኮንስትራክሽንስ፣ ማቤራዊ ጉዳይካስ ዴሜካ ትራንስፖርትስ፣ ጊፅስ፣ ሆቴልስስታ እሊኩ ዜርፍካስ እንፅኺሾ ቱንኩ ኘሮጀክትካ ክቻዴስ 26ዐ ኘሮጀክትካ አሜሬትⶓስታ አገልግሎቶ እይⶓ ጄሜርካ::

ይጉዋንትካ ግንባቲዳ አኽⶓ ክልሉ ኢንቨስትመንቱ ኮሚሽንዳ ልማታዊ አብት ዌናዋ ጉስጝስታ እርዳትጙ ዎኬልስታንታ እንፅኺ ካስታው ጉሳንታ ዊዛሩ ትግስት አብርሃም ይቶፒያው አብኑ አገልግሎቲስ እርዳትፅካ::

ምርትሾ ቱንኩስታ ግንባቲዳ ዝኩንኩ ኘሮጀክትካ 27 ሻዮ ዲጋንኩ አቕስ ቲሬንቲስስታ ጊዙሳ እንፅኼ ፌቴርⶓኪላ ዊዛሩ ትግስት ዙሜካ::

ክልልዳ ኪንዲ አሜትስ 14 ትኩሚ ዋልታ ቢሊዮን ብርዴስ ጃላ ካፒታሎ ሜዜጌብፁንኩ እምኘል ሻይ 155 አብት ዌንካኪላ ሊሊትጙንኩ ኢንቨስትመንቱ ዜርፍካዳ አሴሜርጚስ ፍካዶ ካፅⶓ ዜጌቢ ምልኻታ::

ኬሽጝኹሳ ዜሮ ቴኬምስትጝስ ሚፄ

ሌጌፃማጊያኽ

ኬሽጝኹ ቢራው ስምኪውሳ ዜሮ ቴኬምስትጝስ ዜርፍዴስ አግስታው ሚፄ ሌጌፅⶓ ካሉንኩ አኽⶓ አዊ ቤረሰቡ ቺፅጝፂ አንኪሺ ጉዋጉሲ ወረዳዳ ዝኩዋንኩ አሬሳቻንትካ ጌሌፁና::

አሬሳቻንቲ አስቻለ አለነ ቢራውሳ ስምኬ አሜሬትጝስ ፅሌ ጊዞ ቼፍፁንኩ ያኹኒውላ ኬሽጙንኩ ዜርካዋ ቴኬምስታኑላ ይጉጝስ ዎይሚስታ እሺካያላኪ::

ሳይንሳዌ እንፃኽስትጜ ሲፍካማ አሜሬትⶓ ጄሜሩኒዴስ ናቴ ኩፂ ኬፍቲኔ ምርቱሳ ድምክኔ አግፁንኩ አኽⶓ ዙሜካ::

ዳሽን ቢራው ፋብሪኪው ቢራው ስምኪው ጌቤልትጚስታ ዲግስጚው ስራአስኪያጅ አቶ በሪሁን ትሩ ፋብሪኪ አሜትስ ላጛ ሊኻ ሻይ ኩንታል ቢራው ስምኪው ዲግስጚ ፋይስታው አኽጝስ አሬሳቻንትካው ምርትስ ሾፌንጝስ እንፃኽስትናናጊያኽ ንካ::

ቢራው ስምኪውሳ ዜሮ አሬሳቻንትካስ እይጝስ 59 ትኩሚ አንኮ ሄክታር ብቲዳ ቢራው ስምኪ ሊሚጝዳ አግስቴ::

ሳሙኤል አማረ ዜጌብኹስታጊ ዎረዳው ቹዋ ቺፅጝፃንቲ አቶ ይርጋ ወሌ አሬሳዎንትካ ፋብሪኪሊ ውሎ ቱጝ ኬሽጙንኩ ምርቱ ዜርካዋ እሳንስ ዴስጝፅጝስስታ ዝቤናዊ አሜሬትጙሳ ሴሎ ቴኬምስትጝስ ዜርፍዴስ አግስታውሳ ሚፄ ሌጌፅጝስ ቴኬማዊያኽ ንካ::

ቦታውላንቺ ተረፈ

ፍን 4 ቺርቤዋ ይካቲት 30 ጌርክ 2ዐዐ8ታናታንስትኹ አቭን

አቶ ንብረት ፈንታሁን ባንጂስታ እንጃቢሪውሳ እዝቦ ዎኬልካማ እዝቡ ዎኬልስታንትካው ኩስጚ ጝናስኩ አባልካኽ:: ንጙዊኒ አሜትዳ ካስጛማጊ ዝኩኽሳ ክርፂ ቺፅጝፂውሳ ችግሮ ኽይጝስ ንማቻ እዝብሊ ፍን ፍና አግስትጝስ ኩስጝጜ ፄውካ:: ባንጂስታ ዙራሙሪዳ ጁንኩ ዳዱ፣ ብቲው፣ አራቲው ጉሺ፣ ሜብራቱ፣ አውጚው ኮንኪ ራዲዮንስ እይስታው ክንቲ ኬውጝጚ ቹዋ ቹዋ ችግርካ አኽⶓ ቶኬምካ:: እኒጛ ችግርካዋ አቶ ንብረት ክልልሾ አግጝስ ክልሉ አችስ ፄውስትኹ ኩኘቲዳ ዙርሜ አግፃታ ታምብ ዌናስ ፌያፌይጝፄካ::

እንዴስ እሊው ሜብራቱ ችግር ኩፂ ዞንካስኪ ያኻ ክልሉ አችስ ኽይስታቲው አኽጝስ ፌዴራልሾ ካሳው አኽⶓ ድኹዌካ:: ብቲሊስታ አራቲው ጉሽሊ ዝኩኽ ችግር ዞንዴስ ፌያቲው አኽጝስ አሜራርካሊ ፄውኑ ኩስጚስ ኽይስታው አኽⶓ ጌሌፅካማ አውጚ ኮንኪው ራድዮኑ ክንቲ ዴሜካ ዲጋስ ሜሳሪ ዋኽትጙታ ጄሜራው አኽⶓ ክልልዴስ አግፁኑሳ ዙርሜ እርዳትፅካ::

እሊኩ ካንቴ እያንትካ ዴሜካ ዊ/ሩ አፀደ ከበደ ዚጋሚ ወረዳው እዝብኩ ዎኬልስታንትካ ኩስጚ ጝናስኩ አባልካኽ:: ዎኬልኹ እዝቡሳ

ችግሮ ኽይጝስስታ ታምፃውሳ ችግሮ ማሊፅጝስ አማኻሪ ክልልዳ ድማ ጋቲታ ቱትጚ ቲሪስ እስትኹ ኾት አኹኪ ኘሮግራምስታ ክልላኻዳ አግስታንኩ አይማኑትኩ ኾትካው ጉባይ ድማ ጋቲታ ቱትጜ ካላካልጚስ እምኘልታ ኩስጜ ካስጝፄካ::

አማኻሪ ክልሉ ድማ ጋቲታ ቱትጚ ቲሪስ ኘሮግራሙ ትክትላ አላፋ ዊዛሮ ቦጋለች አለሙ ጌሌፁኑውስታጊ ምስራክስታ ምራብ ጐጃም ዞንካዳ ኘሮግራም አኮሜቻማጊ አግስታው ልቕልቕቲስ ይስጝፃው ዎይሚ ሜዜጌብስታማጊ አኽⶓ ዙሜካ:: አይማኑትኩ ታብልካሊ፣ አጌር ሹማጌልካሊስታ እድሩጉ ሳንትካሊ እንቲታኪ ኹኑ አቺትጝካሊ እምኘልታ አኽጝስ ካንቴ ኪስጝዳስታ ሼውቴ እምፅጝዳ ትኩትስ እንፃኽስቴካማጊ አኽⶓ ጌሌፅካ:: ውላዴስ ኽስኹስኪ ክንቲ ጝንካዳ ዝኩንኩሳ ኹን

ክንታንትካውሳ አቺትጜ ቴኬምስትጝስ ኬሻንቲ ዎይሚ ሜዜጌብስታማጊ አግስታው አኽⶓ ዊዛሮ ቦጋለች እርዳትፅካ::

አይማኖቱ ታብልካ እምኘልታቕስ እንኩዋኽስትጝስኪ ያኻ ቱትጚቺፋ አግስቴካማ ባሬካንትካ አኽጝስ እምኘልታቕስ ድማ ጋቲታ ቱትጚ ታምፃውሳ ችግሮ ክንፅፅጝስስታ ካንቴ ኪስጝስ ኬፍ ንኹሳ ታምቦ ፊትጛንኩ አኽⶓ ዊዛሩ ቦጋለች ዴሜክካማ ጌሌፅካ::

ይቶፒያ ኦርቶዳክስ ተዋህዱ ብሽታናዳ ባርዳር ሀገረስብኬቱ ቹዋ ስራስኪያጅስታ አማኻሪ ክልሉ አይማኑቱ ኾትካው ጉባዩ ኩኘፃንቲ መላከ ሰላም ኤፍሬም ሙሉአለም ኑኑውስታጊ ብሽታና ድማጋቲታ ቱትጜስታ እሊኩሳ ጉዳንትካ ዴስካዋ ካላካልጚዳ አግስቴት አኽⶓ ዙማካ:: ብሽታና ድማ ጋቲታ ቱትጚስ ይንታውሳ ችግሮ ሊሊትጙንኩ ቴርትካዳ አግስትጝስ አምናንትካስ ክንፅፄታጊ አግስቴት አኽⶓኪላ ጌሌፅካ::

እስልምኒ አይማኑቱ ዜርፍዳኪላ ድማጋቲታ ቱትጜ ካላካልጚስ ሼውቴ እምፅጙ ቴግባር አኮሜችስታማጊ አግስቴ:: ሲፋውስኪላ

ይስጝፅካማ እንፃኽስታንኩ አኽⶓ ጌሌፁንኩ አማኻሪ ክልሉ እስልምኒ ጉዳይካው ኩስጚ ጝናሱ ኘሬዝዳንት ሼህ ሰይድ መሀመድያኽ:: እን አጌራዳ ሊሊትጙንኩ ዙራሙርካዳ ጄርካ ካሜንስቱንታስታ ሼርስቱንታ ጄሜርካማ “ክጃሳ ይራስ” ንጙ ባይል ትክላሊስ ይጉጝ ቱስታው

ድማ ጋቲታ...

ጉዳንቲ ባይል አኽⶓ ዙሜካ:: ድማ ጋቲታ ስራስሪ ኽይስታኒ ቲንዳ ክንቲዳ እንቲታኪ ማይቤራዊ ዝኩዊኒዳ ችግር ታምባው አኽⶓ መስጊድዳኪ ያኻ ታምቡኑዳጊ ኩስጜ እይካማጊ አኽⶓ ቶኬምካ::

አማኻሪ ክልሉ ፍቱ ቢሩዳ አቕቱ ሜብቱ እንፅኺ ካስታው አካቢ እጋ ዊዛሮ አበበች አዳነ ጌሌፁኑውስታ ድማጋቲታ ቱትጚ አቕቱሳ ሜብቶ ጌፊፍጝያኽ:: ፍቱ አካልካኪላ እንሳ እጋፌ ፂዌ ካላካልጚዳ ፉኽሳ እጐ ኬቤርፅጝስ ካላካልጚዳ ትኩቴካማ እንፃኽስትካማጊ አኽⶓ ዙሜካ:: አማኻሪ ክልልዳ ፌይኹ ባጀት አሜትዳ 8ሻይ 175 ቱትጚው ካሲ ዲጋማ 6ሻይ 3ዐዐ ቱትጚ ፌኬድስቱስ 1ሻይ 816 ዴሜካ እድሚ ቱትጚስ ታምብካያስኩ አኽጝስ ፄዴካያ ኑንኩ ዊዛሩ አበበች 18 ዴሜካ ቱትጜካማ አግስትጝስ ክስ ሜሴሬትስትⶓ ዙሜካ::

ኩስጚ ድማ ጋቲታ ቱትጜ ይጉፅጝስስታ ካላካልጚስ ካሊፃንኩ እንፃኽስትጚው ሴልካስ ትኩቶ እይጝስስታ ዳብዜ እንኩርጝስ አሌድስታ::

ችግሮ አሜትስ ላጚኒ አንትጝስ ስር ልማቱ ክርፂ ቺፅጝፂው፣ ማቤራዊስታ ፖለቲካው ጉዳይዳጊ እዝብሊ ይጋሪስ ኩስጛንኩ አኽⶓ ዙሜካ:: ጋያኪ ንጙዊኒ አሜትዳ ምንግስት እንኩርኹ ክርፂ ቺፅጝፂው ልቕልቕቲዳ ኽስኹሳ እንፃኽስትጝስ አኬድካ:: ክርፂ ቺፅጝፂኩ ችግርካ እስታንኩዴስ ዚጋሚ ዙሪዳ ፄትቲው ችግር ቶኬምስታው ያኹስ አኹው፣ ሜብራቱ፣ ዳዱኪላ ቤዴራ ሲፊስ ችግርካ አኽⶓ እዝብ ጉሽⶓ ቶኬምካ:: እስጜ ኪላ ዎኬልስታንትካ ችግሮ ሼውናማ ካንትጝስ ካንታው አካልስ ታምፅጝስ ችግር ኽይስታታ ፄዌካማጊ አግስታና::

ወረዳ፣ ዞንስታ ክልል ኽያኩሳ ችግርካዋ ዳዱ፣ አኹው፣ ፄትቲው ችግርካ አኽⶓ ቶኬምካማ ሚንቾ አሜቶ ኤሌክትሪኩ ጌሜድ ቤቴርስታማ ላንቡሳ አግልግሎቴ እያያሱሳ ሜብራቱሳ ችግሮ ኩፂ ፌዴራልሾ ኻሳማ ካስጝስ ኽይቴ እይፅጝስ ፃሪትጜ ፄዋንኩ አኽⶓ ዙሜካ::

ዚጋሚ ወረዳዳ ፄትቲው ችግር ኽይስታማጊ ያኹኒኪላ ዋኽስ ዋኾ ድሳያሱ አኽጝስ እዝብ ጜዌና ቱትጛማ ኽይጝስ ልማትሾ ፍኖ ዙርፃታ ታክስፅካ::

ክርፂ ቺፅጝፂው ችግር እሌት ቺፋሱ እምልታቑ ታምትጚው ችግር አኽጝስ ውላጊ ታምቦ ፊትጝጝ ቱስቴ ኑንኩ ዴሜካ አንኪሺ ጉዋጉሲ ወረዳኩ እዝብኩ ዎኬልስታንትካ ኩስጚ ጝናኩ አባልካ ዊ/ሩ እምየ ቢተውያኽ::

ጛኪላ ዌኬልስቱኑ እዝብሾ ካስጝስ ችግርካዳ

ኩስጝጜ ፄዌካ:: እዝብ ጉሻኩ ችግርካ ኪላ አዚኒ ወረዳ ያኻይስ፣ ግምጃቤት ኬቴሙ ቺፅጝፂ ቤንስትስ፣ አዩዳ እርሺስ ጁንኩ አቕ ጝኖ ግቢታኑሳ ስፍሬ ካሴኒ ዙርሚ እላ አኽጝ፣ ሜብራቱስታ ዳዱ ችግርካ ቹዋ አኽጝስ ዲግⶓ ዙሜካ:: እንጚዳ ኪላ እዝብኩ ዎኬልስታንትካ አኽጝታጊ ዝኩኽሳ ችግሮ እሚካማ ታምብ ዌና አካልካስ፣ ክልሉ ጉባይ ኽምባ አግስቱኑ ኩስጚዳ ካሴ ዲግስካ:: ችግርካ ኪላ ኽይስታንኩ አኽጝ ጌሌፅስታማ ሚንቾ ጊዞ ካፃንኩ፣ እንቢትካማ ኽይስታንኩ እንቲታኪ እዝብ ኽያኩ ችግርካ ዝኩንኩ አኽⶓ ኪላ ቶኬምካ::

አማኻሪ ክልሉ ኬቴም ልማት ጝኑስታ ግንባቲው ቢሩው አላፋ ዊዛሩ ገነት ገብረ

እግዚያብሄር ኑኑውስታጊ አዚኒው ወረዳ ያኻይሱስታ ግምጃቤቱ ኬቴሙ ቺፅጝፂ ያኻያሱ ካሲ ዙርሜ አግፃው እንኩርስትኹ ሜምሪ ስሬታስ ዝኩኽ እዝቡ ሚንችት፣ ሚፂው አክም፣ ዝኩዋንትካው ቺፅጝፂው እንፅኺ፣ ዝኩኽ ስትራቴጂው ትክም ካንትስታማ ቼሜትጙኒዴስ ፋሌንጋ አኽⶓ ዙርሜ እይካ:: እንጚ ኪላ ሜስፍርቶ ዋኽትጝፅኹስ ሜሜሪ ስሬታስ

ዙርሚ እይስታው አኽⶓ ዊዛሩ ገነት ዴሜክካማ ዙሜካ::

አማኻሪ ክልሉ ቺፅጝፂ ጛራ አቶ ገዱ አንዳርጋቸው ጛሾስ ንጙዊኒ አሜትዳ ክርፂ ቺፅጝፂው እንፅኺ ትኩትስ እንፃኽስስታው ጉዳይ አኽጝስ እዝቡ ካሲስታ ክሬቲ አች ቺፋ እምስታማ ኽይስትጝ ቱስቴ:: እዝብ ካሴው ካሲ ውንስታ ቤዴሎ ካንፅፃው አኽጝስ ክልልዴስ ኬቤሌኺስቴ ልቕልቕቴ ፌቴራማ ኽይስትጝ ቱስታኩሳ ችግርካዋ ኽይጝ ፖለቲካው አሜራርስ ቤዴራሱ እንፅኺ አኽጝ ቱስቴ ንካ:: እዝቡ ካሲስ ቱስታው ዳድስ ዙርሜ እያቲውሳ አመራሮ ኩፂ ዝኩኽ አላፍት ቺፋ ካሲስታንታ ያኻታ ፄውጝ ፋይፃው አኽⶓ ታክስፅካ::

ክርፂ...

ጋያኪ ብቴ ቺፅጝፂው ቴርትዳ እሳን ዳንጉኒ ካንትስታ:: ብቲው ይዞቲሊ እምትጝፄካማ ካሴ ጉሻንኩ አቐ ቼፍ ሚንቻማጊ ይንታ:: ክልልዳ 37 ሻይዴስ ኽሳንኩ እምኘልታቕ ክሬቴ ዲግስካ:: ናካሳኺስታ እምኘል ሻይ 25 አቕ ኽዮ አግፄካ:: እንጚዴሜካ ይስጛማ ኬፄላው አኽⶓ ቹዋ ዳይሬክተር ቼሜትጝፄካ::

እሊውሾስ ክልልዳ ክርፂ ቺፅጝፂው ችግር ያኻማ አግስቱኽ ፍቱኾት እያው አግልግሎቱ ዛቢትጚስታ አዴልጚኽ:: ዳኝካውሳ ምግባር ፅንታሳ ኬሽጝፅጝስ ጊዞ ቺፋ ስልታኒ እይስቱኒ ኪላ ውላ ዳኝካ ፋይስታው ዳድስ ክቺካማ አግስቴካያላ:: ቱስታ ጋቲታ አብታምትጝስ ፋይንኩ 89 ዳኝካ እምኘልታቖ ቤዴልካ:: ምንግስትኪላ ካሲስታንታ ያኻንታ ፄዋ:: 38 እግኩ ውማይቴንካዴስታ 19 አካቤእግካዳ ኪላ እርምጂ ካፅስታ::

ፄትቲው አካልካ ኪላ እጎስታ ዴምቦ ሲፍጝስ እንፃኽስቴካማጊ ጋቲዌኽ:: ፖሊስኩ አካልካ ያኼካማ ሙስኔ ቻቤላንኩ አግስቴካ:: ችግሮ ፌቴራንትካ 245 ፖሊሱ አካልካ ኪላ ዲሲኘሊኑ

ችግርስ እምስትካማ ጉዳይ ካንፅስታማጊ አኽⶓ አቶ ንጉሱ ዙሜካ::

እጋዊ ዳድስ ጊፁ ቴርትዳ ልቕልቓንኩ ጌፄንካ ኪላ እምኘልታቕስ ዘይቶስታ ሽኩዋሮ ታምፅጝዳ ችግር ካንፅስታ:: ፌይካ ፌይካማ አግስታንኩ ጌፄን ዴሜካ 53ሻይ ያኻንኩ ጊዝ ፌይኩ ዝቒው አይኔትካዋ ዎያኒስ እምስትካ:: 2ዐ95 ግዱ ስንኪው አይኔትካዳ ኪላ ጊዝ ፌያማ አግስታ:: 1ዐዐዴስ ኽሳንኩ ጌፄንካ ዴሜካ ዎያኑ ምርትዳ እሊውሳ ዲቦ አሌቔትካማ ዋያኒስ ታምብስታ:: እግስ ኪላ ካሲስታንታ ያኼካ::

ሚፂው ኾትዳ አግስታንኩ ውማይቴንካዳስታ አላፍካዳኪላ ሚፄ ቴርስ ኩኘፅጙ ችግር ካንትስታ:: ባንኩ እምኘልታቕዳ ቱስታ ጋቲታ ግብር እታማ፣ ባንኩ ዴሜካ ግብሮ ኬያኑላ ጊፆ ካስጝፄካማጊ አግስቴካ:: እስጜዋኪላ መንግስት ሼውና::

እምኘልታቕ ዙራሙሪዴስ ሴዴድስታንታ ፄዋማጊ አግስታውስታ ምንግስት ታምብኹ

ክርፂ ቺፅጝፂው ችግር አራቴ ጉሽፅጙ ችግሬኽ:: ውማይቴንካ፣ እንፅኺው አላፍካስታ አብታምካ አራቴ ጉሽፅጝዳ አሴሜርጜካ:: መኪናዋ፣ ጝኖስታ ይዞቲውሳ ብቴ እሚካማጊ አራቴ ጉሽፅጝዳ አሴሜርጙንኩ አቕ ካሲስታንታ ያኼካ:: አራቴ ጉሽቱንኩ ኪላ ካሱኑ ስዴትዴስ ዙራንታ ያኻማጌኽ:: ክልልዳ 111 እምኘልታቕ አራቴ ጉሽፃንትካ አኽጝስ እግስ ካሲስቴካ::

ክልልዳ ክርፂ ቺፅጝፂውሳ ችግሮ ኽይጝስ ምስራክ ጐጃም፣ ደቡብ ጎንዴርስታ ዴሴ ኬቴሙ ቺፅጝፂ ይስጝፃውሳ ዎይሜ ሜዜጌብፅጝ ማሊስታ:: እሊኩ ዞንካ ኪላ ይስጝፃንታ ካሲስታ::

ዋልቲ አርፋኻዳ ያኽስቱኽ ክርፂ ቺፅጝፂው ልቕልቕቲስ 7ዐ2 አመራርካዳስታ 666 ውማይቴንካ ካሲስታንትካ አኽⶓ ምንግስት ኮምንኬሽን ጉዳይካው ፅ/ጝና እይኹ ጋዚቲው ጊሊፂዳ ቶኬማ::

ችግሮ...

ፍን 5 ቺርቤዋ ይካቲት 30 ጌርክ 2ዐዐ8 ባይልስታ ፍትኽፂዴዴጝ አብን

አይሸሽም አባተ

ሊሊትጙንኩ ካናኻፅካስ ግዲቴታ፣ካንታን ካንታን እፃንኩ ዝቤናዊ ዳድስ ግቢስቱንኩ ፎክካስታ ፍትኽፂኩሳ ስፍርካዋ እምቴታ፣ ካንትጛ እሊው አጌርዴስ ይንቱንኩስጊ ሼውዳ ድሳቲት ባርዳር ኬቴማ ሜንችካስ ዝኩዋኒስ አሜቻውሳ አይር እግልታሳ ፃታ::

ባርዳር 1922 ምሬት አሜትዴስ ጄሜርጝስ አቕቶ አግፄታጊ ቲንቱት ኬቴማኽ:: ፍትሬቱስታ ታሪኩ እንቲታኪ ባይልካው አብትስ ዙራሙሪ አድርትጝ ታና አይኩ አግስትጝስታ ኪዳነ ምህረት ብሽታና ግቢስትጝ ኪላ ባርዳርስ ሊሊቴ አቕቶ እይንኩ አኽⶓ ታሪክ ጌሌፄ::

14ንቲ ሊኽ ዝቤን ቤናዴስ ጄሜርጝስ ንጉስካ ባርዳሮ እንካናሺካ:: ጋያኪ አክሱሙስታ ዛጉዌው ስሮ መንግስትካ ባርዳሮ እንካኔካማ ይንቴካማጊ ሴኔቤታሺንኩ አኽⶓ ታሪክኩ ፁፍካ እርዳትፃና:: ሰሜን አጌራው ቤንዴስ ክችቲኒ አጌርሾ ጊፃ እንዜጛንኩ ሲራራው ጌፄንካ ባርዳርዳ ቼካማ ካሳሺካ:: ጌፄንካ ባርዳርዳ ቻኒስ አቕስስታ ክምካስ ማልጛ አሜቻው ዙራሙሪ ኪላ እሼ::

1928 ምሬት አሜታሳኺስታ ባርዳር ካህናትካው፣ ባላባትካውስታ እስላምካው ሙሪ እስትጝስ ሹኻ ቤንካስ ቢንስቴሺቲኾ:: ሙሪካስ ቤንስትጙ ታሪክ አሌድስትኹ ዴሜካ ፋሺስት ኢታሊያው ዎሬራንትካሊ እምትጛማኽ:: ታሊያኑ ወሬራንትካ ጛው ቺፅጝፂስ አሜቻታ ፄዌካ:: ታሊያኑ ውራሪው ወክትዳ ባርዳር ሜቻው፣ ይልማናዴንሳው እንቲታኪ አቺፊሪው ማይኬላ አኽጝስ አጌላጌልታ:: አንጚዴስ ድምክና ታሊያንኩ ወሬራንትካ ባርዳሮ ጐጃው ማይኬላ ፄዋካማ ኪላ አጌላጌልስታሺንቲ አኽጝ ዙሚስቴ:: ታሊያን አጌራዋ እሜሺኹ ወርፍዳ ባይልኩሳ ታንኩዋ ዝቤናዊ ጃልባሾ ኪሳማ እንፃኽስታ:: እንጚ ወክትዴስ ጄሜርጝሴኽ ባርዳር ዝቤናዊ ጀልባ አግልግሎቶ እይጜ ጄሜርኹ::

ባርዳር ሙራ አኽጝዴስ ፌታታ ኬቴምሾ ሌጌስታኒ ሊሊትጙንኩ ኾትካ ግቢስቴካማ አግልግሎቶ እይⶓ ጄሜርካ:: 1935 ምሬት አሜትዳ ባርዳር እስካዊ ቺፅጝፂው ኪሲ ፊጝስ ወረዳስታ ኬቴማ ታኻ:: 1937ም.አዳ መዘጋጂ ጝናስ ጉስስቴ:: 1938 ምሬት አሜትዳ ዴሜካ ዙሪው ቹዋ ኬቴማ ኹስታ:: 194ዐ ም.አ ዴሜካ አባላምቲው ማስተር ኘላን ፊጝስ መንግስትኩ

ኾትካ ይስጜካማ ግቢስቴካ:: 1984 ምሬት አሜትዳ ባርዳር አውራጂት ኬቴማ አኽጝስ ካሌ:: 1949 ምሬት አሜትዳ ባርዳር ኬቴማስ ግዶ እይኹ ዝምባባው ትክልቲ አስመራዴስ አንትጝስ አቶ ታደሰ መሸሻስ ቴኬልስትኾ::

1954 ምሬት አሜትዳ ባርዳር ኽሳንቲ ቼርኩ ፋብሪኪ ዌና አኽጝስ ካሌ:: እንጚ ወክትዳ ባርዳሩ ፖሊ ቴክኒክ ኢንስቲትዮት ሶቬት ህብረቱ እርዳቲስ ግቢስትኾ:: ባህርዳሩ ሪፈራል ሆስፒታል ኪላ ጀርመኑ እርዳቲስ ግቢስትጝስ እኒጛ ኾትካ ኬቴማውሳ ልግስኔ ኬፍፅካ:: 1957 ምሬት አሜትዳ ካብስ ማስተር ኘላን ኬሽጛማ ግቢስትኹ ያኹስ:: ግቢቱንኩኪላ ጀርመኑ ካሜንስታንቲ ኘሮፌሰር ማክስ ጉተር እስታና:: ላጛንቲ ማስተር ኘላን ሲዚ ሻይ ውጋቢ ዝኩኽ ያኻማ ማሌፍስታ:: 3ዐዐሻይ አቖ ኪላ እሚጝስ ካላዌኽ:: ማስተር ኘላን ምስራክስ ይባብ እየሱስ፣ ምራብስ አቡነ ሃራ ድንግሎ፣ ሰሜንስ ታና አይኮ እሜታ ያኽስታ::

ባርዳሮ 2ዐ ከንቲብካ ኪስጜካማ ቺፅጝፄካ:: ላጛንቲ ማስተር ኘላን ኬሽጛማ ግቢስቱኽ ወክትዳ ኬቴማው ከንቲባ እሺንኩ ፊትአውራሪ ሃይለ ማሪያም ወልደ ኪዳን እስታና:: ጛ ኬቴምስ ኽሳንቴ እንፅኼ እንፃኽስቴካማ ፌይካ:: ውላዴስ ጃላ ዴሜካ ባርዳር አውራጂውስታ ኬቴም አግሌልጝታታ ፄውኑ ታሪክ ዜኔግስታላ:: አውራጂስታ ኬቴም አግሌልጛኒ ባርዳር ማቤራዊስ፣ ክርፂ ቺፅጝፂስ እንቲታኪ እሊው ዜርፍስ ኽሳንቴ ኪሴ ሚዚጊብፄ:: እንጚታ አኽጝስ ዴሜካ 1985 ምሬት አሜትዳ አማኻሪ ክልሉ ቹዋ ኬቴማ ታኻ:: ቹዋ ኬቴማ ታኹኽ ጊዝዳ ኪላ ሊሊቲ ዞንስ ቺትጝታሺቴ:: ፋሌንጋኩፅኒ ህዝቡ ሚንችት ዴሜክጝ፣ ቺፅጝፂው ዳሊት ዴሜክጝ፣ ጌቤ ኩኘፅጙ አክም ሌጌስጝ፣ እንፅኺውሳ እድሎ ፌቴርጝስ ዝኩኽ አክም እንቲታኪ ይንታውስ ሌጌስጙ ቴስፊ ካንትስትጝስ አዋጅ 19/96ው ስሬትስ ሜትሮ ፖሊታንት /ቹዋ ቹዋ/ ኬቴምካው አችስ አችትጝታ::

ሜትሮ ፖሊታንት ታኹኽ ወክትዳ ሴስታ ኬቴሙ ቺፅጝፅካ፣ አንኩዋ ጌፄርኩ ኬቤልካስታ ሳተላይትኩ ኬቴምካስ ቤንጝታ:: እንጚ ወክትዳ መንግስቱሳ እንፅኼ እምቲት ይቶፒያ አሻግሬዋ ዙሚትጝፅናና ይትኹ ካንቲስ “ባርዳር ኬቴማ ጌርክዴስ ጌርኮ ሌጌስታታጊ አግስቲ:: እንጚ

ልግስኒ ይሳማ ሲፋታ ዴሜካ ወታትካዴስ፣ አጌር አቕዴስስታ አመራርካዴስ ኩርፄንቱ እንፅኺ ማንዲስቴ” ኔ::

ባርዳር ባሩ ዎሌልዴስ ጃላ እምኘል ሻይ 8ዐ1 ሜትሩ ኬፍቲዳ አግስቴት ያኹስ ኬቴማው እሳንት 15 ሻይ 455 ሄክታሪኽ:: ትክላሊ እሳንትዴስ ዴሜካ 17 ትኩሚ ላጛ አኹስ ሾፌንስታ:: ኬቴማው ክቻክቺ እሪው ሜቴን 1ሻይ 224 ሚሊ ሜትሬኽ:: እንኩዊንቱ ማቴን ዴሜካ ኬፍቲኒ 29 ትኩሚ ላጜታ ያኹስ ዜሬቕቲኒ 23 ትኩሚ ሹኻኽ:: እስጜዋ ፄጌራው አይር እግልታ ዴሜካ ቱሪስትካውሳ ጉሳንቶ ዴሜካማጊ ይንታ:: ሚሊዮንስ ቼፍስታንኩ ቱሪስትካ ኪላ ክልልትሳ ቹዋ ኬቴማዋ አሜት ቺፋ እንቓሳና:: ቱሪስትካ አጌራሾ ይንታንታ ፄውንኩ ዲብካዴስ ኬቴማ ታናውስታ አባዊው አግፅፃ አኽጝ ቶኬምስቴ::

ታናው አይክ ባርዳር ኬቴም ቻፊዳ ሹኻ ሻይ 673 ስኩዌር ሜትሩ እሳንትዳ አግስቴ:: ሰሜን ዴቡብስ 75 ሜትሩ እቺትዳስታ ምስራክ ምእራብስ ዴሜካ 6ዐኪ.ሜትሩ እቺትዳ አግስቴ:: ታና አይኩ ኻልት ዴሜካ ሴስታ ሜትሬኽ:: እሳንትስ ዴሜካ አጌርዳ አግስታንኩ አይክካዴስ አባላምቲ ያኹስ አፍሪካዴስ ዴሜካ ሹኻንቲ አችዳ እንጅኩዋ:: ታና አይክ 2ዐዐ7 ምሬት አሜትዳ “ሜንች እንኪው አይኔት አግስታው አይክ” እስትጝስ ዩኒስኮው ሜዝጌብዳ ሜዜጌብስታ:: ታናዋ ፓኽፃማ ሊጊሲሜ ዳዶ እንዜጛው አባዊው ብን ኪላ ባርዳርስ ሊሊቴ ግዶ እያ:: እሊው ኬቴማው ዲጊ እቺትዳ አግስታው ባርዳሩ ፍትሬቱ አብት ትሺ አባዊው ፉዋፉዋቴኽ:: ቱሪስትካዋ ጉስጝስ አግስታው ሚፄ ዴሜካታ ፄዋ::

ትሺ አባዊው ፉዋፉዋቲ 4ዐዴስ 5ዐ ሜትር ኬፍቲዴስ ጚስጜዋ እምትጛማ ጌማው አኹኽ:: ፌቴራው ትሺስ ኪላ ዙራሙሬ ትሼ ፄጌርስ እንጚ ፍትሬቱ አብት ፌቴራው ማሪያም ዱንጋው ጉንጊትጚሊ እንቲታኪ ፉዋፉዋቲው ድምፅሊ እምትጛማ ፌቴራው ድምፅስ ማልጛ ፍትኽፃውሳ ሜንፌሶ ፌቴሬ:: ናካሱ ጊዝዳ አጌራኻስኩስታ ባርኾቼዴስ ይንቱንኩሳ ጎቤናንትካ ዙራሙሪዴስ አግፅጝ ዴስስታማጊ ይንታ:: ዙራሙሪዳ ኪላ ሜንች እንፅኺው እድል ፌቴርስታ:: ባይላዊ ዳድስ ግቢስቱንኩሳ አኽካዋ ዲግስጝስ ቺትጛንኩ አቕ ኪላ ልቓ ጋቲንኩዌኽ::

እንጚሳ ፍትሬቱሳ አግስቴ ሲፍጝስ ባርዳር ዳዱ፣ ሜብራቱ፣ ስልኪው/ ክርፂ ቺፅጝፂው እንፅኼ እንቲታኪ ትክላሊስ ኬቴማው አች ዴሜካማጊ ይንታ::

ሹኻ ሻይ 7ዐዐዴስ ኽሳንኩ እምኘልቱ ዝኩፂ ጝንካ ግቢስቴካ:: ጛርቱ አብት ዌንካስ ግቢስቱንኩ ኢንቨስትመንትኩ እንፅኽካኪላ ዴሜክካማጊ ይንቴካ:: ኽሳንትካ ኢንቨስትመንትኩ እንፅኽካው አቢቢው እርሺ፣ ትክልቴስታ እሼ አሌቔትጝፃማ ግቢትጝስ እርዳታው ፋብሪኪ፣ ሞባይሉ ጌቴምፂ /ግቢፂ/ስታ ፄጌርጛንኩ ልማትኩ እንፅኽካ ግቢስቴካማጌኽ::

ባርዳር ኬቴም ቺፅጝፂው ምንግስት ኮሙኒኬሽን ፅ/ጝናው አላፊ አቶ አቢዬ ሃይሉ እስታና:: ባርዳር ኬቴም ውላ ዜርፍስ ልግስኔ ሚዚጊብፄታጊ አኽⶓ ድኹዌካ:: እምኘል ኬቴምስ ግዶ እያው፣ ልማቶ ያጋው፣ ክርፂ ቺፅጝፂስታ እሊውሳ እንፅኼ አኮሜቻው ልማቶ ፃንቑንትኹ ህዝብ ዝኩት አጌራ አኽⶓ ኪላ አላፊ ዙሜካ:: 2ዐዐ3 ምሬት አሜትዳ ኪላ ህዝቡ ሚንችት 257ሻይ 537ዋ ታምባ:: አሊዲዳ አቶ አቢ ኬቴማው ልግስስ እምኘልታ አሬባሬብጝ ቱስታው አኽⶓ እንፅኼንቶ እይካ::

ንባር፡- አግስቱኽ ባርዳር ኬቴሙ ቺፅጝፂ ግቢቱኽ ዶክመንተሪዴስ፣ ባርዳር ኬቴሙ ኮሙኒኬሽን ፅ/ጝና ፍሽኹ ፐብሊሸርዴስስታ ኬቴሙ ዝኩዋንትካዴስያኽ::

ፃና ዳራት ፂኻ ግዙ ኮንኪ ድሳቲታካንታው አካልካው ታምብ ፋይፃንቲያኽ

አዊ ቤረሰቡ ቺፅጝፂዳ ዳንግሊ ኬቴም ቺፅጝፂው ባይሉ ቱሪዝሙስታ ስፖርቱ ፅ/ጝና ዳንግሊ ወረዳው ማህበረ ክዱሳን ማይኬልሊ ቲቢቢሪጚስ ግዙ ኮንኪ ድሳቲታ ላጛንቲ ጊዝስ ክኒውሳ ክምፄ ካስጝፅጝ ጌሌፅስትኾ::

ቴርትዳ አማኻሪ ክልሉ ባይሉስታ ቱሪዝሙ ቢሩዳ ባይሉ ኾትካው ልማቱ እንፅኺካስታ ዌና አቶ ደርበው ትላሁን ክኒው ክምፂ ቴርትጝ ምንግስት አብነቱ ክንቲው /ኪስጚስ/ እይኹሳ ትኩቶ ሼውንጝስ ክንቲስ እይስታው ጁትጜ ሌጌሳታ እርዳቴ:: ሲፋውስኪላ ኮንኪ ማንዲስታማስታ ሌጌሳማ አግልግሎቲዳ እሼታ እንፃኽስትጝ ፋይፃው አኽⶓ ቶኬምካማ ሲፋው ክምንትስ ፌያፌይጛታ አሜቻውሳ ዳዶ ቤቴርጝስ ካሊፄ ንካ:: ቢሩ ካንታኩ አካልካሊ እምኘልታ ያኻማ ኮንኬ ሌጌፅጝስ እንፃኽስታው አኽⶓኪላ ዙሜካ::

ዳንግሊ ኬቴም ቺፅጝፂው ባይሉ ቱሪዝሙስታ ስፖርት ፅ/ጝናሱ አላፊ አቶ ሀይማኖት በሪሁን ጛሾስ እን አጌራውሳ ባይሎ፣ ወጐስታ ኮንኬ ሌጌፅጝስ ድሳማጊ ዝኩኽሳ ግዙሳ ኮንኬስታ ክኔ ሲፋታ ፄውጝዴስ ድምክና ማኼትካዋ ማንዲጝ ፋይፃንቲ አኽⶓ ዙሜካ::

ክኒ ክምፂው አሴቴፍጛንትካ ክቻዴስ መሪጌታ ዮሴፍ ዳኛውስታ አቶ ዘሪሁን መልኬ ክኒ ክምፂው ቴርት ግዙ ክንቲስ ጁትጜ ፌቴራው አኽⶓስታ አጌራው እምኘል አብት አኽጝስ ካንታው አካልኪላ ትኩቶ እያማ እሊኩ ሚዲቢኒ ክንቲው አይኔትካታጊ ክንቲ ቴርትዳ እይስታታ ፄውጝ ፋይፄ ናውሳ ካንቴ እይⶓ ሳሙኤል አማረ ዜጌባ::

ሰሜን ቤራዊ ፓርክዴስ አግስታው

ሚፂ ዴሜካማጊያኽባጀት አሜቱ አባላምቲ ኪንዲ አሜትዳ

ሰሜን ቤራዊ ፓርክዴስ ሴስታ ሚሊዮን ብርዴስ ጃላ ሚፂ አግስትጝ ጌሌፅስትኾ::

ይቶፒያው ኽሳንቲ ካን ራስዳሽን ፌይኹ ባጀቱ አሜትዳ 22ሻይ አጌራኻስኩስታ ባርኾቼው ጐቤናንትካስ ጐቤንስታ:: እንጚስኪላ ላጜታስታ ሶኼታ አሜትካዴስ ፍኖ እሺኹ ጐቤናንትካው ቼፍሊ ካንትጛኒ ፅካ ታፍዴስ ጃላ ልግስኔ ካንፅፃ::

ሰሜን ፓርክ ሎጅው ስራስኪያጅ አቶ ሰይፉ ደሳለኝ ቤዴር ኑስ ሰሜን ቤራዊ ፓርኮ ጐቤናንትካው ቼፍ እንፂጝዴስ ድምክና ፍሼ ፍሽጝስ ካላቲንኩስታ ዴዴጝ ጊዞ እጄንኩ ቱሪስትካ ጐቤናሺካ:: ናካሱ ወክትዳ ሊሊትጙንኩ እድሚው አችዳ አግስታንኩ ቱሪስትካ ጐቤንካማጊስታ ኬፍ ንኹሳ ፍሼ ኬይጝስ ካላንኩ ጐቤናንትካ ፓርኮ ጐቤንካማጊ አግስታና::

ደባርክ ወረዳው ባይሉስታ ቱሪዝሙ አላፊ አቶ ታረከኝ በላይነህ ኑውስታጊ ፌይኹ ባጀት አሜትዳ 13 ሚሊዮን ብር ሚፂ ፓርኮ ጐቤናንትካዴስ አግስትⶓስታ ንጙዊኒ አባላምቲ ኪንዲ ባጀት አሜትዳኪላ 12 ሻይዴስ ጃላ ጐቤናንትካዴስ ሴስታ ሚሊዮን ብርዴስ ጃላ ሚፂ አግስትⶓ ዙሜካ::ዜጌቢ ፋሲካው መንበሩዌኽ::

አዳሙ ሽባባው

አይሸሽም አባተ

ፍን 6 ቺርቤዋ ይካቲት 30 ጌርክ 2ዐዐ8ፍትስታ ክርፂቺፅጝፂዴዴጝካ አብንካ

አድዋ

ግልፄንትስታ ካሲስታንት ዝኩኽ

ቴርት ግቢስትጝ ቱስቴግልፄንትስታ ካሲስታንት ዝኩኽ ፋይናንሱ

ቴርት ግቢስትጝ ቱስታው አኽⶓ አማኻሪ ክልሉ ጌንዝብስታ ኢኮኖሚ ቲቢቢርጚው ቢሩ ታክስፅኾ::

ቢሩ ዋልቲ አርፋሱ እክዱ ፌፄምጚውሳ ግምጋሜ ስርዳ አግስታንኩ ዞንካስታ ቹዋ ቹዋ ኬቴምካሊ ፄዋ:: ክልልዳ አግስታንኩ 1ዐ ዞንካስታ ሹኻ ቹዋ ቹዋ ኬቴምካ አሴቴፍጙኑ ኪንዲ አሜቱ እክዱ ግምጋሚ ደብረብራን ኬቴምዳ ካስጝጛ::

ክልሉ ጌንዜብስታ ይኮኖማ ልማቱ ቲቢቢርጚው ቢሩው አላፊ አቶ አየነው በላይ ክልልዳ ፋይናንሱስታ ጄውጚው ቴርትዳ ዝኩንኩ ችግርካዋ ሺሽናና ካንትንኹ ግምጋሚው ሜንድሬኼኽ ንካ:: ቢሩ ሊሊትጙንኩ ሴክተር ሜስሪ ጝንካስ ሜዴብስታይኹሳ ባጀቶ አኬድስትኹ አላሚስ ይቢቺ ቱስቲስ እሽፅⶓ ቼሜትጝፅጝስ አችትጙንኩ ሴኔድካዋ ቴርስጝ ፋይፃው አኽⶓ ቶኬምካ::

እክዱ ግምጋሚዳ አሴቴፍጛንትካ እዩኑ ካንቲስ ዞንዳ ካንትስታንኩ ፌፄምጚው ዳንጉንካዋ ዋኽፅጝስ ግባታ ያኻ ንካ::

አጌራው ዴክት ዴፌርስታቲታ ባርኾቼኩ ወሬራንትካዋ ሴሜርፅጝስ እምኘልቶ ማንዴታ ዝኩጝስ ናካ ዝኩኽ ክምንቱ አቫላምቲት አጌራ ይቶፒያኽ:: እዝብ ሴላምስ ፋማ ሴላምስ ቱዋታ፣ ጊፅሳማ ፊቲሳታ፣ ክንታማ ጉድ አችዳ ታምባታስታ ትክላሊስ አይቱ ሜብት ኬቤርስታማ እጄታ እንታሊስታሊስታ ቤዴራስኩ ቹዋ ታብል ኽሳንቴ ጌድሎ እንፃኽስትካማ ፌይካ::

ዋሺኒኪ አጌሩ አጌር አቕ ጚ አጌራ እሊውስ ዊፂስቲስ ካንትጝ፣ ንብሬት ዜሬፍስቱስ፣ ወጌን ጉዲስቱስስታ ጚው እልውኒ አዲጊዳ እቱስ ችግማማ ካንታው እላ:: ይቶፒያው እዝብ ኪላ አሌምዴስ አቕስታው ቹዋ ጉዳይ አቫላምቲው ስልታኒው ቾራ ካንትስትኹስታ ፅላቱ ታፍዳ እታያሱ ጀግኒ አኽጝሲያኽ::

ጀግንካስታ ኒክፄንኪ ናንትካ አኽጝስ ፅላት ይንታኒ ፍን ፍና ጌታምጝስ አጌራስ ቤርታ ይስኹ እፃ አኽጝስ ፄውስታማጊ ዝኩኽ ፃሪትጚ ፅላትካ ይጉዋኑላ ኮራኮርስታንታ ፄውኹ ጌድልያኽ::

እንታኮው ይስትስ ታሊያው ዎሬሙ ኩስጝፃንቲስታ አምባሳደር እሽኹ ዶክተር ኔራዚኒ ጌሌፁስ “ይቶፒያኩ እዝብካ አጌራዳ ፅላት ጁዋው ወክትዳ ጛርትስ ዝኩኽሳ ክራኔ ኬምኘሾ ባይጝስ ይጋሪውሳ ፅላቶ ዊፅጙሳ ባይሬ ፃይንኩዊያኽ::” ኑስ እምኘል ወክትዳ ዙማ::

ይቶፒያኩ ኹናኹን፣ ቹትካ ዎሬሙ ጊዝዳ ላሜ ዎሬሙሳ ሜሳሬ ቻቤልፅጙ ቴግባርስ ይቢቺ ያኻውላ ሜሳሬ ቡዋካማ፣ ክቻ ዶንጌትካማ ውታኺ ውታኻዳ አርቴን ንጝስ ሴብትጜካ:: ዎሬሞ ጉስጝስስታ ምግቡሳ /ኬሌቡሳ/ እንፅኼ አኮሜችጝስ ኪላ ኽሳንቴ ፍሼ ፄዌካ:: እንስኪላ እቴጌ ታይቱስታ ጜዋ ኮንኩ ኹናኹና ቶኬምስታና::

አድዋው ዎሬሙ ጊዝዳ መከሌዳ ሜሼጋማ ሚንቾ ቤዴሎ ታምፃሺኹሳ “ጋልያኖ”ውሳ ዎሬሞ እቴጌ ታይቱ ፍልቕፁኑ አሳብስ ታሊያንካው ውታድርካ ዝቓኑ አሊ እምስትጝስ ዎሬምዳ ዝኩኽ ታሊያኑ ኬችጊ ታፎ እያታ ያኻ:: ይቶፒያው እዝብ እምኘልታ ፄውኹ ፃሪትጚስ ጋያኪ 1927ዴስ 1933 ምሬት አሜትዳ ፄውስትኹ አንኩዋ አሜቱ አርቤንቱ ቡንክትጚዳ ኹና ጝርጂ ሴልፍስ ፋማ ፄውኹ ሴብትጚስ ዌሬራንቲ ታሊያውሳ ዎሬሞ ፍንጅካማ አጌራዋ እጅፁንኩ ቹዋ ታብል ላንቡሳ ኺስቴ ሴማይታትካ አኽጝስ ታክስስታና::

ይቶፒያው እዝብ አጌራ እንካኒስታ ጉሳንቲስ አዜዝስታንቲ አኽⶓ አድዋው ዎሬሙ ጊዝዴስ ጄሜራማ ሼው ንጝ ካሊስቴ::

አድዋው ዎሬሙ ጊዝዳ አፄ ምኒሊክ ውላ አቑዌ አዌጁኑ ወክትዳ አጌራዋ ፅላትዴስ ይጉፅጝስ ውላጊ ዎሬምሾ ፊጝስ ድል ዌና

አኽጝስ ቢኪስታ:: / ንባሮ አግፅንኹ ይቶፒያው ጀግንካው ውሌቲ ናው ሜፃፍዴስ ካፅስትኹ/

አቶ አለማየሁ እርክይሁን ወሉ ዩኒቨርስቲዳ ማኼትካው ቺፅጝፃንቲ ክንቲ ቤናው ክንፅፃንቲ ያኻኒስ አድዋው ባል ይቶፒያስ ኽሳንቴ ክብሮ አግፅፅኹ ጌርኪያኽ:: ምክንያትኪ 19ንቲ አሊዲው ዝቤንዳ ዋኽስ ዋኾ አፍሪካዋ አውሮፓኩ ወሬራንትካ ካያ ክምጚስ እሚጝስ ማልጜ ፅሬቶ ፄዋሽኑ ወክቲያኽ:: እንሱ ወክትዳ ኪላ ይቶፒያዊያንካ አጌራውሳ ሉአላውቶ ማንዴካማ ፍችካዋ ዊፅካማ ፃርክካውሳ ክብሮ ይፋስ አዌጁኑ ወክት አኽⶓ እንክርፄካ::

ይቶፒያው እዝብ አድዋው ዎሬሙ ጊዝስ ይቤቺ ያኻውላ አፄ አይለ ስላሴው ዝቤንዳ ማይቸውዳ ታሊያው ዎሬምስ ውላ ቤየርቤረሰብካው ካሜንስታንትካ ቦንብስስታ ሜርዝስ ኩስታኒ ስሩሳ ልቕልቕቴ ፄውጝስ ታሊያኑሳ ዎሬሞ ጌቴማማ ዊፃንቲ አኽጝስ ታሪኩ ሜዝጌብዳ ስሞ ሴፌርፃ::

እን ይቤቺ ያኻውላ ኘሪዝዳንት መንግስቱ አይለ ማሪያም ጊዝዳ ላ እሽኹ ሶሻሊዝሙ ቴርታኻዳ እዝብ ችግርሊ ያኻማ ኪላ ያኹኒ ዌሬራንቲ ሶማሊያው ዎሬምሊ ፄውስትኹ ሴብትጚስ ሹኻሊኻ ሻይ ዎሬም አጌር ቺፋዴስ ፊትጛማ ሴሌፍስታማ ዎሬምሾ ካስጝስ አጌራው ክብርስኑስ ሜስዋታ ያኹኽ እዝብ ታክስስታኒ ይቶፒያኩ ጄርካ ዜርስ፣ አይማኖትስ፣ ታለቲካስ ቤንጜካማ ዝኩዋችኹኒውላ አጌራዋ ፅላትስ ፋይፃማ እያቲው ጀግኒ አኽⶓ ሊሊትጙንኩ ንባርካ ቶኬማና:: እሳንስታ ሚንች ጌድል ፌፄምስትኹሳ አድዋውሳ ታሪኮ ካንትናኒ ኪላ ይካቲት 22 ጌርክ 1888 ምሬት አሜትዳ /ጉሳንቲ/ ያኻማ አጌራዋ ማንዲፅጙ አላፍት ራስ ሜንጌሻው /ዮሀንስ/ እሽኾ:: ኻርዴስ 11 ሳትዴስ ቤዴርናማ ታሊያው ዎሬሞ ድንጌቶ ይቶፒያዳ ዜሜትጝስ ወሬም ጉሽፅኾ:: 5ዐዐ ያኻንኩ ራስ ሜንጌሻኩ /ዮሀንስኩ/ ውታድርካሊ ጌቴምⶓ ጄሜሩና::

አቶ አለማየሁ ጊሊፂታኪላ ይካቲት 23 ጌርክ 1888 ምሬት አሜት ቺሪሾስ አጌራውሳ ኔፃኔቶ፣ ክብሮ ኔክፃላ ናው ወጌን እምኘላሾስ እሊውሾስ ዴሜካ ዝቤናዌ ሜሳሬ ዶንጌትኹ፣ አችትጝኹ ታሊያኑ ዎሬም ይቶፒያዋ ዎሬርጝስ ብርኹ ዎሬም ጄሜርስትኾ::

አፄ ምኒሊክ ታሊያንካ ዶንጌትካማስታ ቴርትካማ ዎሬሞ ጄሜርጝስ አንትⶓ እንፅኼንቶ እንፃኽካማ ቼሜትጝፁኒዴስ ፋሌንጋ ብቕላስ ያኼካማ ውላጊ ዎሬሞ እሜማ ካሳው ዎሬሙ ስፍሪሾ አብራ ዜሜቱና:: እንጚ እሌትስኪላ ኪሲ ሹማጊሊ፣ ኹና ጝርጂ አጉሌልስታውላ ውላጊ ፍኖ ዎሬምሾ ዙርፅጝስ አጌራውሳ ሉአላውቶ ማንዲጝስ ፍንሾ ጋሳጋሱና ንካ:: ሜፃፍዴስ አግፅንኹ ንባር ናውስታኪ አይኪ አቒ ታሊያው ብብራንቲ ትይት ታሳዊያኽ ናማ ጅፊስታውላ ኩርፄንትስ ጁኹዋ:: ዎሬሙ ስፍሪዳኪላ እምኘል እምኘሎ ጉሻቲው አኺኒዳ ታምቡና:: ቤዴራ ካሎ ቱትጛኒስ “አጌራዋ ኔፃ ፍሽጉ አን ክቱኒ ዙርቱሲያኽ ጉሽታ ችግሜታ ፌት” ትጜካ:: እን ካልስ ኪላ ትይቶ ዊድኹ ሴብትጛንቲ ላኼንታማ እቱኹ ዝሆንዴስ ትይቶ

ኽያማ ሴብትጜ:: ዴሬታማ እታኒ ኪላ ይት አጌራስ ውሌቲ እንጚማ? ንጝስ እንግራ ቡንክትጜ ወኒስ ጄሜሬ:: እንታ ያኹስኪላ ካናትካ ማሪያሙሳ ታብቶ እሚካማ እንግርዳ ሲፋና:: እቴጌ ታይቱ ኪላ ዜቤንካሊስታ ዴጌፋንትካሊ ያኼካማ አቡነ ማቲወሱስታ ማሪያሙ ታቡቱላዳ እሺና:: ሲፋማኪላ ማሪያሙሳ ስሎስታ ባንዲራዋ እሚካማ እቴጌ ታይቱሊ ኩስጛ እሺና:: እንጚሱ ወክትዳ ኪላ ቺሪዴስ 11 ሳትዴስ ጄሜራማ ጌርክዴስ ሲዚ ሳቶኺስቴ ቶኬስጚ ኬውጝፃውላ ላንጊሱ ዎጌንዳጊ ብርኹ ሴብትጚ እሽኾ:: እንጚ ጌርክዳ አድዋዳ እልስ ካንትስታውሳ ፃፊጝስ ይዝኩዊ እሽኾ:: ያኻኑሳ አታኒ እቴጌ ታይቱ ክሳርዳ ካርⶓ ቡዋካማ፣ ግርብስ እንግልብስትካማ እዝኑ ፆሌትስ ድባንሾ ፄሌያሽና:: ውታድሪስ አጄብስቱንኩ ንጉሰ ኔጌስትካዳ ሜድፍስታ ዎሬሙ ትይት እሪታ ጌሙስ ካንታኒ ጀግንቱሳ ወኔ እቴጌ ታይቱ ኪላ ዴሬትኹሳ ውታድሬ ፃርኬ ድጋጐ እሚጝስ ክችሾ ቱዋካማጊ “አርቴን እንዳራ ታኻካ ድል ንኾሱዊያኽ” ንጝስ ዙሜካማጊ ኹና ጝርጄ ይስጝፃኒ ውላጊ እስካዊ ሜንፌስስ ዎሬምሾ ትንክፋንታ ፄውና:: ጛ ኪላ ኹንቱሳ ባይሎ ባይካማ ውታድርካዋ ሌዋ ፃንጋኻ ሴሌፍፅጝስ ኩታ ዎሬምሾ ቱና:: ሜድፍካዋ ሌዋሾ ፄሜድካማ ቶኬስጝስ ሴብትጛማጊ ዝኩኽሳ ታሊያውሳ ዎሬሞ ታስⶓ ጄሜሩና::

ንጉስ ኪላ ቤፍትካማጊስታ ድስካማጊ ካሳንኩሳ ታሊያኩሳ ውታድርካዋ ሲፍካማጊ ሴብትጛንኩሳ ውታድርካዋ ጉስካማጊ ታሳንታ ፄዋኒስ ታሊያኩ ውታድካ ኻፂታ አንጌፍስቱና:: ይጉንኩ ኪላ ድስካማጊ አጌርሾ ዙሩና:: እንሱ ድልስ እምቲስ ዙሙንኩ ራስ መኮንን ኪላ እንታ ንካ::

ይቶፒያ ዝኬታ ክብር ኔክስታውላ ውላጊ ሴብትጜ ኹና ጝርጂ ናውላ አጌራዋ ፂካው ፅላት ጁኒዴሲ ማቔቻማ ጁዋዊያኽ አይኪ ይጉዋውላሲ ይቶፒያኩ ጀግንካ አጌሮ እንካናና ዎሬዳኑዴሲ ክርⶓ ጐሌላና:: አንሱ ጌርክስ ኪላ ሚንችካ ሞሌቔስካ

እንኩቲውሳ ኩቦ ኬምቤብካማ፣ ምሾ ካቤ ዴሬብካማ አዩሳ ኪቢሶ ሴይካማ ኪንዲኪ ንጉሱ ዙሪዳ ኪንዲኪ እቴጌ ታይቱላ ይጉንኩኪ ሴብትጛንቲ መኳንትስታ ውታድሪውላ ያኼካማ ኽቴ ናቴ ሴብትጛውሳ ኔዜዝፅጝስ ዎሬምዴስ እንግርግራ ናውላ ይስጝፅጝስ ድል ዌና ያኻንታ ፄዌካ:: ኪቢሪስቲንኻ አንቤባንትካ አድዋው ታሪክ ይቶፒያው እዝብ አጌራው ሉዋላውትስ ዋሳ ላካ ኩርፂኒ አኽⶓስታ ዜርፍ ቺፋ ዝኩኽ እምኘልታቕ ዋሳ ላካ ፍሼ ፄውኹ አኽⶓ ካንትፃው ታሪኪያኽ:: “ይቶፒያው ጀግንካው ውሌቲ” ናው ሜፃፍዴስ አግስትኹ ንባሪያኽ::

ክርፂ ቺፅጝፂው ችግርካ አች ቺፋ ኽይስትጝ ቱስቴ

ክርፂ ቺፅጝፂው ችግርካዋ አች ቺፋ አግስታው ታምብ ዌና ኽይጝ ቱስታው አኽⶓ አዊ ቤረሰቡ ቺፅጝፂው እዝቡ ዎኬልስታንትካው ኩስጚ ጝናው አባልካ ታክስፁና::

እዝቡ ዎኬልስታንትካው ኩስጚ ጝናስኩ አባልካ ጐሌልኹ እዝቡላ ይንቴካማ ወረዳዴስ ኬቤሌኺስታ ዝኩንኩ ክርፂ ቺፅጝፂው ችግርካዋ ካንትኹስ ኩስጜካ:: ዚጋሚ ወረዳው ዎኬልስታንታ ዊዛሩ አፀደ ከበደ ዙሙኑውስታጊ ቤረሰቡ ቺፅጝፂዳ አግስታንኩ ወረድካዴስ እዝቦ ዎኬልካማ ኩስጚ ጝናስኩ አባላ ያኹንኩ እዝብ ዝኮ ናማ ጉሽኹሳ ችግሮ ኬቤሊዴስ ቻቤልካማ ወረዳው አመራርካስ ዲግስጝስ ወረዳው አችስ ኽይስታውሳ አሬኽትስ ኽያንታ ጝን እንፅኻሳ እይካ::

ዞንስታ ክልሉ አችስ ኽይስታንኩሳ ዴሜካ አች ቺፋ እይጝስ ጃላሾ ካሳውሳ ካሴ ሺሼካማ እሚጝስ ክርፂ ቺፅጝፂው ችግርካ እስቱንኩስ ዙርሜ እይፃንኩ አኽⶓ ጌሌፅካ::

ቤረሰብ ቺፅጝፂው ቹዋ ቺፅጝፃንቲ አቶ አየን ብርሃን ጛሾስ ቲሬንቲ ኮሚቴ ኩክሬኺስታ ጌምጝስ ጐሌልኹ እዝብ ክርፂ ቺፅጝፂው ችግርካኽ ንኩ ካስካ ዙርፄ አግፃንታ እንፃኽስትጝ ክርፂ አኽⶓ ዙሜካ:: ክርፂ ቺፅጝፂ ይንታታ ዙሚጝ ይቢቺ ያኻውላ ኽይስትኹስታ ኽይስታያሱሳ ጊዝ ቺፋ ጋማጋምጝስ እንፃኽስታንኩ አኽⶓስታ ችግሮ ፌቴራንኩ አመራርካ ዝኩኒ ኩፅኒ ካሲስታንታ ፄዋንኩ አኽⶓ እርዳትፅካ::

አለሚቱ የኔት

ፍን 7 ቺርቤዋ ይካቲት 30 ጌርክ 2ዐዐ8 ማይበራዊዴዴጝካ አብንካ

አይሸሽም አባተ

ቴግባርዳ ትኩትኹ ጐልማስካው ክንቲ እይስታኩ ዙራሙርካዳ ውላቱዊ ኪሲ ሜዜጌብስታማጊ አግስቴ:: 2ዐዐ5 ም/አሜትዴስ ጄሜርካማ ክንቴ ሲፍጛንኩ አዊ ቤረሰቡ ቺፅጝፂዳ አግስታንኩ ወረድካዴስ ባንጂ ወረዳ እምኘልያኽ:: ዚቕ ጐመርቲ ኬቤሊው ዝኩዋንትካኪላ ሶኼትዴስ እምኘሎ ጌርኮ አድጉዌስታ ባል ጌርክካስ ድምክና ክንቴ ሲፍጛና:: ኬቤሊዳ ሜዴብስቱንኩ ቲን ኤክስቴንሽኑ፣ ግብርኒውስታ ሚዲቢኒ ክንቲው ክንፅፃንትካ ጌርኮ ቤንጜካማ ቴግባርስ እርዳትፅካማጊ ክንትፃና:: ዙራሙሪው ጐልማስካ እድሚስ ጌዴብስታኑላ እይስታውሳ ክንቴ ፋይስ ሲፍጛንኩ አኽⶓ ክንቲ ጝናዳ አግስትናና ቼሜትጝፅና::

ክንቴ ሲፍጛንኩ ጐልማስካ ክንፅፄ ሜፃፎስታ ዴብቴሮ እሚካማ ሳትስ ክንቲ ጝናዳ አግስቴካ:: ባኒዌና ክንፅፃንቲ ይንቴምቡ ኩኘንካማ ሜፃፎ አንቤብጛና:: ግምትስ 2ዐ አሜትዴስ 5ዐ አሜቶ ኺስታ ድሚ ዝኩክ ኹንስታ ምሽታር ዝኩና:: ኬቤሊዳ እይስታው ቴግባርዳ ትኩትኹ ጐልማስካው ክንቲ አባላምቲ አችስስታ አች ላጛስ ቤንጛማ እይስቴ:: ፌይኹ ክንቲው ዝቤንዳ እን ኬቤሊዳ 42 ያኻንኩ ጐልማስካ አች ሹኻዋኺስቴ ክንቴካማ ቤንስ እይስታውሳ ፍታኔጊ ካፅካማ ፌይⶓስታ አሌድⶓጊ ኬቤሊዴስ አግፅንኹ ንባር ካንፅፄ::

አሬሳቻንቲ አየነው ሙሉነህ ዚቕ ጐመርቲ ኬቤሊ ድራንቑዊ ጐትዳ ዝኩዋንትካኽ:: ኬቤሊዳ እይስው ቴግባርዳ ትኩትኹሳ ክንቴ ሲፍጝጚ ዋታኮውሳ ትክም እያማጊ አኽⶓ ካንትኹስ ዲግስንኹ ካሲስ “ክንቲ እይስትⶓ ጄሜሩኒዴስ ናቴ ፃፊⶓስታ አንቤብⶓ ካሊና፤ ቼፎስታ ይሳቦ አሴልⶓኪላ ክንትና” ንካ:: ታፍዳ ሳቶ ሚፅካማ ጊዞ ኪላ ቱስቲስ ቴኬምስትካማጊ አኽⶓ ዙሜካ:: ቴግባርዳ ትኩትኹሳ ጐልማስካውሳ ክንቴ ሲፍጛኑላ ጌቤልዳ ቼፎ ዴብዴብ ናሺⶓ እንክርፁንኩ አሬሳቻንቲ አየነው ቼፎ ሼው ንጝስ

ታፉሳስታ ልኩሳ ላጜቶ ቴኬምስትካማ ቼፋሺⶓ ጌሌፅካ:: ናካኩፂ እንጚጊ እላቲውስታ ማሽንስ አሴልⶓኽ ድኹኑ::

ኬቤሊው ጐልማስካ ዱኪስ ፌሬምጝዴስ ፌካ:: ሞባይሎ ቴኬምስትጝስ ካላና:: ጌቤላ ካስካማ ቱስቲ ዳድስ ጌቤልትጛና:: ፌደሎስታ ቼፎ ክንቱንኩ አኽጝስ ሚንዛኖ ሺሼካ:: ቲኑ ዜርፍዳ ጛርቱሳስታ ዙራሙሪውሳ ፃንኩቶ ማንዲጝስ ቢኬካ:: ቲን ኤክስቴንሽንኩሳ ፓኬጅካዋ ዋኽፅጝስ ኬሻንቴ ዝኩዊኔ ጉስጝዳ አግስታና:: ግብርኒ ዜርፍዳኪላ ምርቶስታ ምርታምቶ ዴሜክጝስ ካሊፃንኩ ቴክኖሎጅካዋ ቴግባራዋ ፄውጝስ ቤዴራ ፍና አኽⶓኽ ጌሌፁኑ:: እንዴስ ፍና ጌንዜቦ ክቺክቺስ ቴኬምስትጙ ችግር እሺⶓ ቶኬምካማ ናካ ኩፂ ጌንዜቦ ክብስⶓኺስታ ታምብⶓኽ ክንቴ ሲፍጛንኩ ጐልማስካ እርዳትፃኑ::

ዊዛሩ ህብስቴ እንዳለውኪላ 5ዐሾ ናቔው እድሚዳ አግስታና:: ድሚ ክንቴ ክንትጝዴስ ይጉፃቲው አኽⶓ እርዳትስትጝስ እድሚስ ጛዴስ እንፃንኩ ጐልማስካሊ ፌደሎ ቼፍካማጊያኽ አግፅንኹ:: ቴግባርዳ ትኩትኹ ክንቲ ፍኖ እሺኹ እንግራ ይጉዊ ካንቲዴስ ፋንታ ፄውጝስ ቲንዌና ያኹኽሳ ዝኩዊኔ ጉሳንታ እርዳትኹ አኽⶓ ዙሙንኩ ዊዛሮ ህብስቴ ቹትካ ቲኑ ኾትካዳ ካሜናንታ ሼውቴ እምፃው አኽⶓኪላ ቶኬምካ:: እይስታው ቴግባርዳ ትኩትኹ ክንቲ ሚዲቢኒ ክንቲው ክንፅፃንትካዴስ ድምክና ኬቤሊው ቲኑ ኤክስቴንሽኑስታ ግብርኒው ውማይቴንካ እይስታው አኽጝስ ዝኩዊኒዳ ውላቱዊ ኪሲስታ ልግስኒ ይንታታ እርዳታማጊ አኽⶓኪላ ዙሜካ::

ዚቕ ጐመርቲ ኬቤሊዳ እሊው ቴግባርዳ ትኩትኹሳ ክንቴ ሲፍጛንቲ ወታት ሙላት ሰለሞን እስቴ:: እንዴስ ፍና ሚዲቢኔ ክንቴ ጄሜራማ ኬውጝፃ:: ናካሱ ወክትዳ እይስታው ክንቲ ቴግባርዳ ትኩትኹ አኽጝስ ፋይስ ክንታማጊ አኽⶓ እንክርፃ:: እንዴስፍና “አዴር አንቤብታይፅ፣ አዴር ስልኬ ታስታይፅ” ናማ ክንትኹሳ አቔ ይማሺⶓ ታክስኹ ወታት ሙላት

ክንቲ ቴኬማንቲ አኽጝስ “ኻራኪላ ክንትኑኒ” ናውሳ አሳቦ ዙሚትጜካማጊ አኽⶓ ጌሌፃ::

ቴግባርዳ ትኩትኹ ጐልማስካው ክንቲ ሜንችካውሳ እንፃኺቱ ክንትጙሳ እንጐ ሳኪትጝፁኽያኽ:: እንፃኺታስ ክንቲውሳ እድሎ አግፄካያስኩ አሬሳቻንትካ ግብርኒው እንፅኺሊ ኬምኘስ ኬምፓ ጐሌሉኑ ጌርክስ እንጉስታኑሳ ክንቴ ክንታንታ እርዳቴ:: አጌራ እምትጝትኹሳ ድኽቶ ድፅጙሳ እክዶ ሳኪትጝፅጝስ ክንትኹ አቒ ፋይፃንቲ አኽጝስ እንጚስኪላ ኬፍ ንኹሳ ታምቦ ፊትጛማጊያኽ::

ዊዛሮ አስረሳች ትላሁን እንፃኺታስ አግፄካያሱሳ ክንቴ ናካ ዙራሙሪዳ ሴፍጜካማጊ አግስታና:: ጄርካዋኪላ ክንፅካማጊያኽ:: እንዴስ ፍና ቴኬማውሳኪ ያኻ ቴኬማቲውሳ ስራስሪውሳ ወሬኬቶ ፅራጊሊ አኹኪ ጊጊሲሊ ፍሽካማ ክብፃሺካ:: ናካ ኩፂ እይስታው ክንቲስ አንቤብጝስ ሼሽካማጊ አኽⶓ ዙሜካ:: ክንቲዴስኪላ ይጉዋኑላ ኽሉቺፋ ሲፍጛካማጊ አግስታና:: እንዴስ ጌናኪላ ይስጝፄካማ ሲፋንኩ አኽⶓ እንክርፄካ::

ወታት ይግዛው የኔአለም ዚቕ ጐመርቲ ኬቤሊዳ እንሴስካው አብቱ ልማቱ ውማይቲኒያኽ:: ኬቤሊዳ እሊኩ ሴብሉስታ ፍትሬት አብቱ ዜርፍኩ ውማይቴንካሊ ኘሮግራሞ እሚጝስ ኬቤላኻዳ አግስታንኩ ጐልማስካስ ክንቴ እያና:: ክምካዋ ቡዚስጝዳ፣ ግብርኒውሳ ግብአቶ ቴኬምስትጚዳ፣ ፍትሬት አብታሳ ማንዲጝዳስታ አኾቲው እንፅኽካዋ ካንትኹስ ክንቲ እይስታማጊ አግስቴ:: ክንታንትካው ዝኩዊኒዳኪላ ኪሲ ሜዜጌብስታማጊ አኽⶓ ጌሌፅካ::

ዚቕ ጐመርቲ ትክላሊ እምኘላንቲ አቹ ክንቲ ጝናዳ ቴግባርዳ ትኩትኹሳ ጐልማስካውሳ ክንቴ ሲፍጛንኩ 37ዐ ክንታንትካ አግስታና:: ሹኻ ጐትካዳ ክንታንትካስ አሜችኹ ስፍሪዳ ክንቲ እይስታማጊ ያኹስ አሜት ቺፋ ዝኩዋንትካው ክንትጙ ፋይ ዴሜካማጊያኽ:: ክንፅፃንቲ ስሜነህ አላምረው ክንቲ ጝናሱ ክንቲ ጛራ ያኻኒስ ክንታንትካው ቴሳትፉ አሜት ቺፋ ዴሜካማጊ ይንትጝዴስ ድምክና ሚዲቢኒ ክንቴ ሲፍጛንትካ ክንቴ ኬውጝፃቲንታ ኬፍ ንኹሳ ታምቦ ፊትጜካማጊ አኽⶓ ቶኬምካ:: ዙራሙሪዳ እድሚ ትንክፋ፤ እንዴስጌና ክንታታ ዋሳይ ታምፔ? ናው ኬርትኹ ካንቲ ይጉዋማጊ ይንትⶓኪላ ጌሌፅካ:: ዋሺኒዳኪ ኩኘቲዳ እምኘልታቑ አሳቦ እይⶓ ካንቲኪላ ሌጌስⶓኽ አቕፁኑ::

ባንጂ ወረዳው ክንቲው ፅ/ጝናዳ ጐልማስካው ክንቲው ፌፄማንቲ አቶ መብራቴ ጌታሁን 2ዐዐ5 ም/አሜትዴስ ጄሜራማ ወረዳዳ ክንቲ እይስትⶓ ጄሜራችኹኒ ፍኖ ፋይስታው ዎይሚ ሜዜጌብስታማጊ እሺያሱ አኽⶓ ዙሜካ:: ዲጊ አሜትዴስ ናቴ ኩፂ እምኘልታቕስ ሼውቴ እምፅጙ ቴግባር ካንታኩ አካልካሊ እምኘልታ እይስትጝስ ክንታንትካው ቼፍ ዴሜካማጊ ይንትⶓ ጌሌፅካ:: ያኼስጉ ናካኪላ ያኹኒ ወረዳኻዳ ፌያፌያማ “ዋሳ ታምናኻይ እንዴስጌና” ናው ካንቲ ዝኩⶓ ጌሌፅካማ እንሳ ካንቴ ዋኽስ ዋኾ ድፅጝስ እንዴስ ኽስኹስ ሼውቴ እምፅጙ ቴግባር ይስጛማ ሲፍጝ ፋይፃው አኽⶓ ዙሜካ::

ባንጂ ወረዳኻዳ 26 ኬቤልካዳ 45 ቴግባርዳ ትኩትኹ ጐልማስካውሳ ክንቴ አሜቼችጝፃንትካስ 157 ጉትኘካዳ ክንቲ እይስታማጊ አግስታው ያኹስ እምንኹ አሜትዳ ኪላ 19ሻይዴስ ጃላ ጐልማስካ ክንቲው ማንድዳ አግስታንኩ አኽⶓ ወረዳው ክንቲው ፅ/ጝና ጌሌፃ::

“ ኻራላ ክንትኑኒ...”

/ጐልማስካ/

እንፅኼ ፌቴርጙ

ዜርፍካዳ ዳንጉኒ ካንትስታማጊያኽ

እንፅኺው እድል ፌቴርፅካ ዜርፍካዋ ሺሻማ አሴሜርጝፅጝሾስ ካንትስታውሳ ዳንጉኔ ክችስጝስ ትኩትስ እንፃኽስታው አኽⶓ አማኻሪ ክልሉ ቴክኒክ ውማዩስታ ኢንተርኘራይዝካው ልማት ቢሩ አቕፁኻ::

ባርዳር ኬቴምዳ ካስጙኽ ዋልታ አርፋው እክድ ፌፄምጚው ግምጋሚዳ ቢሩ አላፊ አቶ ጌታቸው ጀንበር ይቶፒያው አብኑ አገልግሎቲስ ጌሌፁኑውስታጊ ዙራሙሪ ቺፋ አግስታንኩ እንፅኺው ድል ፌቴርፅካ ዜርፍካዋ ሺሻማ አሴሜርጝፅጝሾስ ዳንጉዊኒ ዝኮ ንካ::

ዋልታ አርፍካዳ ጌፄርዳስታ ኬቴምዳ 24ዐ ሻይ 5ዐዐ አጌር አቕስ እንፅኺው ድል ፌቴርስትⶓ ቶኬምካማ እንጚኪላ ኪንዲ አሜትዳ እንፅኺዳ አሴሜርጝፅጝ አኬድስቱኽዴስ 64 ታፍ ይቢቺ አኮሜችስትⶓ ቶኬምካ::

እንፅኺሾ ቱንኩ ልቕልቕፃንትካ ዋይሚስትካ ያኻንታ ፄውስቱኽ እርዳቲ እንፁኽ አኽⶓ ኪላ ዴሜክካማ አቶ ጌታቸው ኽትጝፄካ::

እንፅኺውሳ ድሎ ፋያንትካ አጌር አቖ ሺሻማ ሜዜጌብጝስስታ እንፅኺሾ አሴሜርጛንታ ፄውጝስ እንቲታኪ ዎይፂ ስፍሬስታ ጉሺውሳ ዲግስጜ አሜቼችጝፅጝ ኽይስትካያስኩ ችግርካ አኽⶓ ቶኬምካ::

ይንታውስ ችግርካዋ ክችስጝስ ዙራሙሬ ስራ ፄውንኩ እንፅኺው ፌቴርፅካ ዜርፍካ ሺሽስቴካማ ዞንካውላ እንፃኽስትⶓኪላ አቶ ጌታቸው ዙሜካ::

ኽምባ ኽይፂ ኮንኪስ ክንትጝ ክንቴ

ሳሴርፃው አኽጝ ቶኬምስትኾ

ኽምባ ኽይፂ ኮንኪስ ክንትጝ ክንቴ ሳሴርስ እርዳትስትጝስ ካሊፅኹ አኽⶓ ባንጂ ወረዳው አስቑኒ ትክላሊ እምኘላንቲ አች ክንቲጝናስኩ ክንታንትካ ዙሙና፡፡

ክንታንትካ ክቻዴስ ክንታንታ የኔነሽ ታከለስታ ክንታንቲ ትላዬ እያሱ ኽምባ ኽይፂ ኮንኪስ ክንትጝስ ክንቴ ሳሳርስ እርዳትስትጝስ ካሊⶓስታ ኬሻንቴ ዎይሜ ሜዜጌብፅጝስ ካሊⶓ ዙሜካ፡፡ ፍንሾስኪላ ኮንኬ ሌጌፅጝስ ሊሊትጙንኩ ትቤብፅንታኩ እንፅኽካዋ ቴርስጝስ እምኘልታቕስ ሼውቴ ፌቴርጝስ ጛውሳ ታምቦ ፊትጛንኩ አኽⶓ ጌሌፅካ፡፡

ክንቲ ጝናዳ እምኘልታቕስ ኮንኬ ካንትኹስ ኽስኹስ ሼውቴ ፌቴርጝስ ክንፅፃንትካ፣ ክንታንትካው ካሜናንትካስታ ዙራሙሪው እምኘልታቕ አግስቱኑዳ ፓናሉ ኩስጚ ካስጛ፡፡ ኮንኪውሳ ጌርኮኪላ እምኘልታ ኬቤርፅካ፡፡

ወረዳው ባይሉስታ ቱሪዝሙ ፅ/ጝናሱ ባይል ልማቱ ውማይቲኒ አቶ እሱባለው ክንዴ እምኘል ቤረሰቡ ኮንኪ ማንዲስታኒ እምኘልታቑ ታሪክ፣ ወግስታ ባይል አብርታ ሌጌሳው አኽጝስ ፍንሾስ ምስሌ ቴርቶ ቴርስጝስ እንፃኽስታንኩ አኽⶓ ዙሜካ፡፡

ዜጌቢ ሳሙኤል አማረዊያኽ፡፡

ፍን 8 ቺርቤዋ ይካቲት 30 ጌርክ 2ዐዐ8ስፖርት

አሌሙ ዙራሙሪዴስ

ካሳነሽ ተረፈ

አይሸሽም አባተ

ግንባቲ እንግርትኹ አትሌቲክሱ ሙሪ

ጉዋግሲ ሽኩዳድ ወረዳ ዙራሙሪ አትሌቲክሱ ስልታኒስ አሜችኹ አይር እግልታዌና አኽጝስ ሚንችካ አትሌትካስ ጐሌሌስታንቲያኽ:: ሚንችካ አቕስቱንኩስታ አጌራውሳ ስሞ አሌምሊ አቕትጝፁንኩ አትሌትካው አግፂ አኽጝስኪላ ማሊስቴ:: እንሳጜ አሜችኹሳ አኺኔ እርዳትስትጝስ ወረዳኻዳ 2ዐዐ2 ም/አሜትዳ እምኘሎ አትሌትካውሳ ሙሬ ግቢትጝስ ልቕልቕቲ ጄሜርስትኾ:: ያኼስጉ ሙሪስ ያኻውሳ ብቴ ጐሌልጝስ እፂ /ዚሊሲስ/ ዙሬ ኬሌልጝዴስስታ እምኘሎ አዳራሼ ግቢትጝዴስ ፌይኹ እንፅኺ አኮሜችስታያ:: ባስስ ናማ ናካ ዙራሙሪዳ እፂ /ዚሊሲ/ ፌሬሳማ እንሴስካው ፉሪፂ ያኻማኽ ካንትኹ:: እንሳ ችግሮስታ ግንባቲ ግቢስታማ ዳሬ ታምባውላ ይጉⶓ ዜጌብኑስ ላጛንቲ ጊዝስ አኽⶓ አንቤባንትካ ሼው ንጝ ፋይፄ::

ጉዋግሲ ሽኩዳድ ወረዳ ቲሊሊ ኬቴምዳ አዊ ልማቱ ማቢሪስ እርዳትስታንኩ 3ዐ አትሌትካ አግስታና:: 15 ኹንስታ 15 ምሽታር ዴዴጝ እቺትዴስ ሊጊሲሚ እቺቱ ጊጜ ኺስታ ላጛ አትሌቲክሱ ሴሌቴንፃንትካስ ስልታኔ ካፅካማጊ አግስታና:: እኒ አትሌትካኪላ ዞንዴስስታ ክልልዴስ ፌይካማ አጌርአቡቑ አችስ አቕስቱንኩ የኔው አላምረውጂስታ አቕስትጝስስታ አጌራውሳ ሰንደክላማዋ እሚካማ ካንትስትጝስ ጁትጜ ፌቴርካማጊ አኽⶓ ዙሜካ::

ያኼስጉ እኒ አትሌትካ አዊ ልማቱ ማቢሪዴስ አግፃኑሳ ስስቒውሳ ቲኪፄ /ልቓ

ጌንዜቦ/ ጝን ክራያስስታ ኬሌቡ ፍሺስ እሽፅጝ ፋያኑ አችዳ ታምብጝስ ይዝኩዊ ያኻታ ፄውⶓ ዙሜካ:: ኬሻንቴ ዎይማ ሜዜጌብስትጝስ እምኘሎ ፋንቲቴ እንዜጝፃዊያኽ እስትኹስታ ቴስፋ ፄዋሺኑ አትሌቲክሱ ሙሪው ግንባቲ አሌድስታውላ ይጉጝ ፅንጋኻ ያኽⶓኽ አትሌትካስታ ሴሌቴንፃንትካ ጌሌፁኑ::

አትሌት አስማረ ቸኮል አዊ ልማት ማቢሪው አትሌት ያኹስ 4ዐዐ ሜትርስስታ 8ዐዐ ሜትርስ እይስታውሳ ስልታኔ ካፃማጊ አግስቴ:: አትሌቲክስ ሚንቾ ግርቦስታ ጉድጛ ሴኔቴልⶓ ካሴው አኽⶓ ጌሌፃማ ናካሱ ወክትዳ ቱስቴ ስልታኔ ካፃማጊ አኽⶓስታ 2ዐዐ6 ም/አሜትዳስታ ፌይኹ

አሜትዳ ክልልስስታ ዞንስ ኬሻንቴ ዋይሜ ሜዜጌብፅጝስ ቢካ:: ፍንሾስኪላ ያኹኒ ኬሻንቴ ዎይሜ ሜዜጌብፅጝስ እክዶ እሜ::

ያኼስጉ አሜት ቺፋ ንⶓ አሌድስታውያኽ እስትጝዴስ ፌይኹስ አኒያኽ እስትኹሳ አግልግሎቴ እያቲው ቲሊሊ ኬቴምዳ ግቢስታው አትሌትካው ሙሪው ግንባቲ አሌድስታውላ ይጉጝ ያኼስጉ ታክስኹሳ እክዶ ሳኪትጝፅጝስ እምኘል ችግር ዝኩⶓ ዙማ:: እን ሙሪ ግቢስታማ አሌድስታማ አግልግሎቴ እያስኩኒጊ እንዴስ ኽስኹሳ ዎይሜ ሜዜጌብፅጝስ ካሊፃው እሺⶓኽ አትሌት ጌሌፅኹ::

ካብስ ዙራሙሪ አግስታውሳ አቾ እልስ ጐቤንጛ እንዝጜ ፄውንኹ ወክትዳ ካንትንኹስታጊ እንዳርማኪ ሊሊቲ ልቕልቕቲ እላቲው አኽⶓኽ ሼው እንኹ:: ዲጊስ ቴርትኹስታ ፓኽንኹ ካርጝ ይቢቺ ዳሪስታማ ካንትና:: እሊው አዊ ልማቱ ማቢሪው አትሌት ያኹኽ ለይኩን አየነውኪላ አንኮ ሻይ ሜትሩ ጊጚው ሴሌቴናንቲ አኽⶓ ዙማ:: ያኼስጉ እሊኩስታ አትሌትካታጊ ዝኩኽ ችግር አግፃንትሳ ልቓ ጌንዜባዋ ዶርምስስታ ኬሌብስ ፍሽጝ ሜዜጌብፃኑ ዋይሚዳ ቻኒስቶ ፌቴራማጊ አኽⶓኽ እንክርፁኹ:: አትሌትካስ ጝን ግቢስታማ ኬሌቡሳ አግልግሎቴ አግፃንኩ እስታማ አኬድስትኹ ቴግባር ፌፄምስታውላ ይጉጝ ካፃኑስታ እይስታው ስልታኒዳኪላ ችግሮ ታምፃው አኽⶓ ጌሌፃ::

አዊ ልማት ማቢሪው አትሌቲክስ ክሌቡ ቹዋ ሴሌቴንፃንቲ ለአለም ሽመልስኪላ ዙራሙሪዴስ ሜንችካ አትሌትካ ፍልቓንኩ አኽⶓስታ አይር እግልታኪላ አትሌቲክሱ ስልታኒስ አሜቻው አኽⶓ ዙማማ ወረዳኻሱ እምኘልታቕኪላ አትሌቲክስስ ኬሻንቲ ካንቲ ዝኩኽ አኽⶓ እንክርፃ:: እንሳ ካንፅፃው እዝብ ዝኩኽ ብቲዴስ አትሌቲክስስ ሲሊቴንፂ ያኻውሳ ቤናማ እይጝ ቶኬምስታው አኽⶓ ጌሌፃ:: እንሳ ሼውንጝስ ሚንች ችግር ዝኮስኩስ ኪላ ኬሻንትካ ዞኖ፣ ክልሎስታ አጌር አቡቓዋ ዎኬላንኩ ኬሻንትካ አትሌትካዋ ፍሽካማጊ አግስታንኩ አኽⶓ

እንክርፃ::እንሳ ዎይሚስታ አኽⶓ ዳሬ ታምፃቲንታ

ፄዋማጊ ዝኩኽ አትሌትካው ፉሪፂ ግቢስታውላ ይጉጝ ብቲ ብታዳ አትሌትካ ጝን ክራያስ ቼጌርስታንታ ፄዋማጊስታ ፋይስታው ዳድስ ቱስቴ ስልታኔ እይጝስ ችግሮ ታምፃማጊ አኽⶓ አቕፃ:: ፋይስታያሱ ፍሽስ ታምብካማጊ አኽጝስ ፍንሾስኪላ እን ችግር ኺይስታኒ ናውሳ አሳቦ ዙማ::

ጉዋግሲ ሽኩዳድ ወረዳው ቹዋ ቺፅጝፃንቲስታ ስፖርቱ ኩስጚ ጝናሱ ኩኘፃንቲ አቶ ብርሃኑ ይዘንጋው ጁኽ ካሲስታ ክሬቲ ክችክቺ አኽⶓስታ ባጄቱ ችግርሊስታ እንፅኼ ካስጝፃው ኮሚቴው ዎሴኽጝሊ እምትጙኽስ ፌቴርስትኹያኽ ንካማ ፍንሾስ ዝኩኽሳ ችግሮ ኽይጝስ ዝኩኽ ባጄትስ እንፅኼ ጄሜርጝስስስታ ዳንጉኹዳ እሊኩ ካንታው አካልካሊ ቲቢቢሪጚስ ዋኽትጛታ እንፃኽስታንኩ አኽⶓ ዙሜካ:: ስፖርቱ ኩስጚ ጝናኪላ ሊሊቴ ትኩቶ እያ ንካ::

አዊ ቤረሰቡ ቺፅጝፂው ወታትካውስታ ስፖርቱ ሜምሪው አላፊ አቶ ጌታዬ ሁነኛው ጛሾስ ግንባቲውሳ እንግርትⶓ አምኔካማ እንግርቱኽሳ ምክናያቴ ሼው ንጝስ ሲፋውስ እንፃኽስትጝስ አኬድⶓ ዙሜካ:: ጄሜርስትኹ አሜትዴስ ላንቡሳ ሚንቾ ቴግባሮ እንፃኽስትጝስ ካሊፃው እሺⶓ ጌሌፁንኩ አላፊ እሊኩ ልማትካስ እይስታውሳ ትኩቶ እይጝስ አትሌትካውሳስታ ሴሌቴንፃንትካውሳ ችግሮ ኽይጝስ እን አሜትዳ ካስጙኽ ቤረሰቡ ቺፅጝፂው ስፖርቱ ኩስጚ ጝናዳ ትኩትስ ኩስጚ ፄውስትⶓ እርዳትፅካ::

ስልታኒው ማይኬል አዊ ቤረሰቡ ቺፅጝፂስ ይቢቺ ያኻውላ እሊኩ ዋልቴን ወረድካስጊ አጌሌጌላው አኽጝስ ኩስጚጝናዳ እሳንስ ኩስጚ ፄውስታማ ግንባቲስ እሊኩ ወረድካው እርዳቲ ፋይፃንቲ አኽⶓ ኩስጚ ጝና ዎሴንⶓ አቶ ጌታዬ እርዳትፅካ:: ክልልኪላ ዝኩኽሳ አክም ቴኬምስትጝስ ግንባቲ ዳሬ ታምባታ እርዳቴ ፄውጝስ ካሎ ቱⶓ ጌሌፅካ::

አሌም አቡቑ አችስ አቒ እንዝርፃውላ ድባን አምፓስ ቤሬርታት አባላምታ ታክሳ ድሮን ካንቲስ ዲግታ::

ቤሬራንታ ድሮን ታክሳ /እንዝርናንታ አሜርላስ ቬጋስዳ ቴርትኹ ኤሌክትሮኒክሱ ምርትካው አውደ ርእይዳ ካንቲስ ዲግታ:: አሴቴፍጛንትካ ኪላ እና ታክሳስ እንዜጝጝስ ፋያኒ ፄውጝ ማንዲስታው ታክሳዳ ማቼካማ እንጅኩጝ ይቤቺ ያኹስ፣ ታክሳ እንዳርኪ ትራፊኩ ቼኔኔክስትጝ ዝኩዋውላ ፋይስትኹ ስፍሪሾ ታምፅⶓ ካሌቲያኽ ናኒስ ሜሴኬርካ::

እንያኻማ ታክሳ አይርዳ ቤሬርታው ወክትዳ እሊኩ ቤሬራንትካ ዲብካሊስታ ግንባትካሊ ጋችትጜ ካንትኹስ እንዳርኪ ስጋት ፌቴርስታቲው አኽⶓ ውማይቴንካ ጌሌፅካ::

እን ታክስፅጝ ቱስታላኽ ኑንኩ ፌቴራንትካ፣ ዋሺኔኪ ታክሳዳ ታምባውሳ ችግሮ ቼፍጝጛው ቴክኖሎጄ ጌቴምስታይት /ዝኩት/ አኽⶓ ዙሜካ::

እና እስካዋ ታክሳ /እንዝርናንታ/ “ኢሃንግ” ናው አቑፂ ስም እይስቱት ያኹስ እንዝርንጝስ /ቤሬርጝስ/ አጌዛውሳ ሶኼታ ምኮ ፄጌራንኩ ዲብካ ዝኩንቲ አኽጝኪላ አቕስቴ::

ኢሃንግ አውሮፓው ቼፍታ 2ዐ14ዳ ቲሪትጝኹ ያኹስ እስጜ ኘሮጀክቶ ውና ፄውጝስ 5ዐ ሚሊዮን አሜሪካውሳ ዶላሮ ዊዲት /ፍሼ ፍሽፂት/ አኽጝ ጌሌፅስታ::

ብርናንታ ታክሳኩባንያው እንፅኼ ፌፄምፃንቲ ኢሃንግ

ይንታውስ እንዜጛንትካ አቕስ ኬሽኹሳ ጐሌልስታንታ እንዝርናንታ ታኻታ ዲግስጝስ እንፃኽስትናናጊያኽ ናኒስ ታክሲት ፌቴራንትካ እርዳትፅካ::

ቤሬራንታ ድሮን ታክሳ ጝሺሱ ጊዝዳ እምኘሎ እንዜጛንቴ እምቴታ 23 ደኪካዋ ቤሬርጝስ ካሌት ታኹስ፣ ሳትስ 9ዐ ኪሎ ሜትሮ እንዜጝⶓ ካሌቴያኽ ንካ::

ቤዴራንታ ድሮን ታክሳ ኤሌክትሪኩ አይልስ እንዜጝታት ታኹስ፣ ላጛ ሳታኻዳ እምኘላኒስ ቤሬርታውሳ አይሎ ዋኽፅጝስ ካሌት አኽⶓ እንፅኼ ፌፄምፃንትካ ዙሜካ::

እንዜጛንቲ ኪላ ታክሳዋ እሜማ እንዜጝጝስ ፋያኒ ጚ ታምባውሳ ስፍሬ ይቢቼ ቶኬምጝ ጃጊ እሊው ኔክፃው ዲብ እላቲዊያኽ ኑንኩ እንፅኼ ፌፄምፃንትካ እሊኩሳ አክኽካዋ ኔክፅጝስ ፌቴርስታንኩሳ ችግርካዋ ኔኬትጝ ካሊስታውስታ አቕፅካ::

ቤሬራንታ ድሮን ታክሳ ዋኽስ ዋኾ አሜሬታማ እዝብስ ታምፅጝስ አይሩ ዴክቱ ስልታን ዌናዴስ ፍካድ አግስቱታ ምርቶ ዴዴጝ ጊዝስ እሳንጝፅጝስ ውላ ቴኬምስታንትካስ ዲግስጝስ እንፃኽስትናኻኽ ንጝስ እንፅኼ ፌፄምፃንቲ ኽይትጝፄካ::

ንባር አግስትኹ፡-News.sky.com