Click here to load reader
Upload
fundacion-carlos-casares
View
227
Download
2
Embed Size (px)
DESCRIPTION
A LEDICIA DE LER é unha sección que Carlos Casares publicou en La Voz de Galicia a partir de 1975, onde trataba temas literarios e lingüísticos, ademais de dar conta das novidades editoriais da época. O texto está adaptado á normativa galega actual.
Citation preview
A LEDICIA DE LER é unha sección que Carlos Casares publicou en La Voz de Galicia a partir de 1975, onde trataba temas literarios e lingüísticos, ademais de dar conta das novidades editoriais da época. O texto está adaptado á normativa galega actual. Queremos agradecerlle a La Voz de Galicia a cortesía manifestada en todo momento e as facilidades para achegar este material ao público.
A LEDICIA DE LER
“Problemas da crítica literaria”
CARLOS CASARES
La Voz de Galicia. 12 de febreiro de 1978
DOCUMENTOS DA FUNDACIÓN CARLOS CASARES
1
A LEDICIA DE LER. “Problemas da crítica literaria”
La Voz de Galicia 12 de febreiro de 1978
PPPProblemas da crroblemas da crroblemas da crroblemas da crítica literariaítica literariaítica literariaítica literaria
CARLOS CASARES – LA VOZ DE GALICIA. 12 DE FEBREIRO DE 1978
Hai moi poucos días aínda, na sección de cartas ao director, publicábase neste
mesmo periódico un comunicado subscrito por catro ou cinco asociacións culturais,
que puña en cuestión a honestidade e a competencia da crítica literaria galega. Aínda
que o tal comunicado non expresa máis que unha queixa lexítima e comprensible
(que os críticos ignoraramos a determinado poeta) e que tira unha conclusión ilóxica
e falsa (xa que os críticos non falan do tal libro, logo manipulan a realidade ao seu
antollo), ten o valor de expoñer un problema cultural nun momento en que case que
soamente se presentan problemas políticos, por máis que no fondo da cuestión o tal
comunicado encerra unha intención -eu diría que esa é a súa verdadeira intención-
clarisimamente política: defender, e tamén promover, pois estas cousas non se fan
nunca en balde, a un poeta dunha concreta militancia e significación ideolóxica, e ao
mesmo tempo aproveitar para meterse coa crítica independente (independente dos
partidos, quero dicir, pois non ignoro que unha independencia aséptica e absoluta
resulta imposible, dado que despois de todo cada quen depende de algo: dos seus
gustos, dos seus prexuízos, das súas ideas, das súas teimas, etc.). De todos os xeitos,
benvido sexa o comunicado, aínda que teña máis interese como pretexto que como
texto.
E digo que sexa benvido porque nos permite recordarlle aos partidos políticos
un pasado que lles afecta a case que todos eles e que debe ser utilizado xa como
lección. Nese pasado a política cultural da maioría dos grupos e partidos políticos
estivo simplemente ao servizo dos seus intereses partidarios e foi empregada con fins
colaterais, marxinais ou como queiramos chamarlle: promover nomes politicamente
2
A LEDICIA DE LER. “Problemas da crítica literaria”
La Voz de Galicia 12 de febreiro de 1978
rendibles, defender opcións e programas conxunturais e encubrir actividades que
doutro xeito serían prohibidas. Respecto disto último, ninguén terá peito nin valor
para acusar a ninguén, o que non nos debe impedir en cambio expoñer as
consecuencias negativas dun tal proceder por moi dispostos que esteamos a
comprender os motivos que o sostiveron. Obrigados e condicionados por unha
realidade hostil, que vale como atenuante, descoidaron a formación teórica de cadros
e militantes, mesturaron política e cultura nun todo revolto e sen fronteiras,
fomentaron o acriticismo literario e impuxeron credos estéticos sen relación
ningunha coa nosa realidade inmediata. O resultado, e aquí entramos xa no presente,
témolo diante dos ollos: nin un texto teórico que mereza a pena, a ignorancia dos
métodos e resultados da moderna crítica literaria (incluídas as achegas marxistas), a
desorientación do lector, a supervivencia do tópico...
Pero na actualidade xa non se poden seguir manexando conceptos tan pobres e
pouco afortunados como os do «compromiso» e «escribir para o pobo», para falar
soamente dos máis escandalosos e insolentes de todos, porque esa incrustación do
pasado no presente non é outra cousa que o rabo dun monstro que hai que matar.
Para iso cómpre un esforzo teórico por parte de todos, unha eliminación do
analfabetismo literario e un tratamento libre da realidade. Persoalmente penso que os
partidos teñen a obriga de contribuír a unha tarefa de clarificación tan necesaria, pois
agora xa desapareceron as circunstancias que nalgún momento puideron aconsellar
unha política cultural tan mecanicista como acrítica e irracional.
Como se ve, as cuestións que aquí presentamos transcenden a anécdota do
comunicado que nos serviu de pretexto. Reducir os problemas da critica literaria
galega a un asunto tan trivial como o de que fale ou non fale de determinado libro,
someténdoa ademais a un proceso de intencións, non é senón a proba de que os
métodos do pasado seguen aínda vivos.