View
216
Download
3
Embed Size (px)
Citation preview
Batang Tundo
Tubong-Tundo ako
Isang lunsod na rin ang mataong Tundo,
lunsod ng dalita at bunton ng kubo,
yuta ng mag-anak-langgam na masinsin sa malaking punso;
narito ang hirap, narito ang buhay, narito ang tao,
Tubong-Tundo ako
“Ang Aking Tundo,”
Amado V. Hernandez
Hanggang nasa hayskul ako, hindi ko kaagad-agad sinasabing
taga-Tundo ako kapag naitatanong kung saan ako lumaki. Lagi kong
isinasagot na taga-Biak na Bato ako, ngayo’y Almeda Extension na,
na nasa boundary ng Santa. Cruz at Tundo, Maynila. “Mas malapit
kami sa Santa Cruz kaysa sa Tundo,” lilinawin ko, para agad mailayo
ang pag-aakalang lumaki ako sa lugar ng mga oxo at sige-sige,
magkakaaway na grupo ng mga maton na laman ng mga balita
tungkol sa sagupaan at patayan sa Maynila. “Mga harang ang
bituka,” sabi ng Nanay ko, kapag hanggang sa aming lugar ay
nagpapang-abot sila. Malayu-layo kami sa pinakapusod ng
magulong Tundo. Isang sakay sa jeep ang layo namin sa Bangkusay,
Velasquez o North Bay Boulevard. Mas gusto kong mailapit sa Santa
Cruz ang lugar na nilakhan ko para mailayo agad ang kuneksiyon ko
sa Tundo. Nahihiya akong malamang taga-Tundo ako at baka isipin
ng iba na dahil “laking Tundo’” ako, eh matapang ako’t palaaway o
lumaki sa lansangan at basagulera. Ang hindi ko alam, kahit naman
pala ang Santa Cruz na dating pueblo noong panahon ng Kastila ay
may dalawang isla na ang isa, ang Isla de Sibacon ay naging taguan
ng masasamang loob, palibhasa ay malapit sa Binondo na maunlad at
sentro ng kalakalan. Kung kailan nagsimulang makilala ang Tundo
na pook ng krimen at karahasan ay hindi ko alam.
Dahil kaya mahilig sa mga pusang sanay na
makipagbasag-ulo sa mga aso, ang mga unang nanirahan sa
Tundo?
Natitiyak kong may kinalaman sa paglaganap ng ganitong
larawan ang mga action movies na dumakila sa mga sangganong
may ginintuang puso, kundi man sa mga sangganong may siyam na
buhay na paris ng isang pusa. Nariyan ang mga sikat na pelikulang
“Asyong Salonga,” “Totoy Golem” at “Boy Tutpik” na nagpasikat din
sa mga action star na katulad ni Joseph Estrada. Mga “inapo” sila
ng mga “sumikat” na “basagulero” noong panahon pa ng Kastila paris
ni Carlos Padilla, 23 na gulang, walang asawa at isang talabartero na
naglabas-masok sa kulungan dahil sa pagnanakaw. Pagnanakaw ang
karaniwang krimen noong mga panahon na iyon sa Maynila at dahil
inakala noong masyadong maluwag ang parusa kung kaya hinigpitan
at ang mga katulad ni Padilla ay ipinatapon sa malayong lugar paris
ng Davao at Balacbac, sang-ayon sa tala ng mananalaysay na si
Camagay. Noong panahon daw ni Padilla, ninanakaw ang limang
pisong metaliko, paynetang gawa sa kartutso at ginto, rosaryong
ginto, camisa de china, at tiket sa loterya. Hindi pa kasama noon sa
listahan ang pagnanakaw ng mga alagang hayop. Sa amin sa Biak na
Bato, lumalalaki akong nasasanay sa mga balitang nagkakanakawan
ng mga alagaing baboy. Mismong ang mga pinsan namin ay
“naisahan,” ng mga matatalinong kawatan dahil kahit na nilagyan pa
nila ng kawad na may kuryente ang palibot ng bahay ng baboy,
nagising sila isang umaga na wala na ang inaasahang inahing baboy
na laang pangmatrikula ng panganay nila.
May maitim at may maputi; may maganda, may walang
hitsura; may walang-wala at may nagtatamasa.
Tayuman sa dulong kaliwa ang daang humahati sa Biak na
Bato. Dito sa Tayuman makikita ang ilang lugar na naging muhon
sa paglaki ko. Bago dumating sa palengke ng Pritil, pagkatawid ng
Jose Abad Santos, sa kaliwa nito ang daang Antonio Rivera.
Ginagaygay namin ang daang ito tuwing Disyembre, para mamasko sa
mayayamang pinsang buo ng Nanay ko. Natatandaan ko na uunahin
namin ang malaking bahay doon ng Tiyong Peles, kilalang doktor
Nehal, na gustung-gustong umampon kay Ate Poy, noong nasa
elementarya pa siya at pinakamaganda sa mga kapatid kong babae,
Sa lahat ng pinupuntahan naming malalaking bahay, dito kami hindi
naliligaw dahil maraming beses na kaming paroo’t parito. Libre ang
patingin kay Tiyong Peles at sakit sa baga ang espesyalisasyon niya.
Maraming beses din niyang tiningnan ang Tatay.
Bago dumating sa simbahan makikita ang isang maliit na
tindahan ng lutong ulam na pag-aari ng kabise, kung tawagin ng
Nanay. Nagpupunta kami rito, kung araw ng Sabado ng hapon,
pagdating ng Tatay ko mula sa trabaho. Espesyal na araw ito dahil
suweldo (noong hindi pa nagwewelga sa pabrika) at makakatikim
kami ng dinuguan at ng paborito kong ginisang sitaw sa tokwa. Liban
sa araw na ito, pangat na isda at gulay ang araw-araw na alok ng
mga plato sa hapag-kainan. Sabi nga ng Tiya Uba, tuwing Sabado at
kung araw ng Pasko’t Bagong Taon lang namamantikaan ang mga
nguso namin.
Sa kaliwa, bago dumating sa Dagupan, makikita ang simbahan
ng Katedral. Kapangalan lang nito ang Katedral ng Maynila sa
Intramuros. Maliit lang ang simbahang ito na isa sa dalawang
sinisimbahan namin kung araw ng Linggo. Ang isa pa ay ang
simbahan ng Espiritu Santo sa may Avenida Rizal. Walang palya ang
pagsisimba namin, sa umpisa hanggang matapos ang misa. Kahit
noong nag-aaral na ako sa UP, dadaan at dadaan ako sa simbahan ng
Quiapo o di kaya ay sa simbahan ng Sta Cruz para magdasal, bago
umuwi. Hindi lamang pook ng pagsamba ang simbahan ng Katedral
para sa akin; ito , lalong higit ang pook na nagpapaalala sa akin ng
kahirapan, kahihiyan, ngunit sa kabila nito, ng kabutihan ng tao.
Patapos na ako ng elementarya nang maranasan kong pumila,
kasama ng maraming iba pang pamilyang mahihirap, para sa rasyon
ng madre. Isa kami sa pinalad na pamilyang karapat-dapat na
tumanggap ng tulong ng mga madre’t pare sa simbahan, dahil
walang trabaho ang Tatay ko at maysakit pa. Walang trabaho ang
Tatay dahil nagwewelga ang unyon nila sa pinapasakung Bataan Cigar
& Cigarette Factory sa San Francisco del Monte. Minarapat pa rin
kami sa tulong ng mga madre dahil siyam kaming mga anak na
pakainin. Tuwing Sabado ng umaga, pagkatapos ng misa, tumutuloy
kami sa bahay ng pari sa gawing kaliwa ng simbahan. Pipila na kami
para sa rasyon ng bigas, trigo, gatas, dinurog na mais, at harina.
Kung magpapasko, mayroon pang malaking tipak na keso. Sa haba
ng pila, lumiligwak ito sa kalsada sa labas ng simbahan. Kapag ako
ang natotokang pumila, deretso ang tingin kong malayo sa kalsada
dahil baka may makakita sa aking kakilala. Ang rasyon ng mga
madre ang nagsalba sa amin sa tiyak na pagkagutom kaya bata pa ako
ay namulat na sa kabutihan ng iba. Hindi lamang kami natulungan
ng rasyong ito na hindi sumala sa oras; may panahong binigyan pa
kami nito ng pagkakataong kumita. Maparaan kasi ang Nanay,
nakapagtitinda kami ng hotcake at pulburon mula sa harina’t gatas,
na pinagkukunan naman ng pambili ng bigas at pang-ulam.
Kung mayamang Tsino kaya ang nanalo sa puso ng
Nanay?
Sa kanto ng Abad Santos at Tayuman na kinatatayuan ngayon
ng isang gasolinahan dating nakalugar ang pabrikang La Grandeza.
Dito raw nagtrabaho ang Nanay noong dalaga pa siya. Dito rin sila
nagkakilala ng Tatay. Nag-aanilyo ang Nanay at nagpapaandar
naman ng makinang pamutol ng tabako ang Tatay. Maganda ang
Nanay, hanggang ngayon, kahit 88 na siya kaya may nagsasabi sa
aking “siguro maraming lumigaw sa Nanay mo noong bata pa siya.”
Marami nga raw, kuwento ng tiya ko. Katunayan ay may isang Tsino
na negosyanteng lumigaw sa kanya pero tumibok ang puso ng Nanay
ko sa kapuwa niya manggagawa at sa idad na disisyete ay
nakipagtaling - puso sa magandang lalaking tubong San Miguel
Bulacan na galing sa pamilya ng mga magsasaka. Taun-taon ay
nanganganak ang Nanay hanggang maging siyam kami, puwera pa
ang panganay na namatay noong bata pa. Pero huminto na ang
Nanay sa pagpasok sa pabrika nang magkasunud-sunod ang anak
niya, kaya ang Tatay na lang ang kumakayod para sa malaking
pamilya. Nagpalipat-lipat siya sa mga pabrika ng sigarilyo hanggang
mapirmi sa pabrika ng Bataan. Palibhasa’y may dugong rebelde ang
nuno niya, kamag-anak yata nila si Pantaleon Torres na naging kasapi
ng Konsehong Supremo ni Bonifacio, kaya sumapi kaagad siya sa
unyon ng mga manggagawa sa pabrika at hindi nga nagtagal ay
nagwelga sila na taon ang binilang. Dito naman magsisimula ang
mga taon ng aming kalbaryo.
Zacate sa kabayo, matsakaw sa tao.
Dito rin sa Tayuman, sa kaliwa nito, kung galing sa Biak na
Bato, papunta sa direksyon ng Avenida Rizal (may LRT na ngayon),
makikita ang Bonifacio Elementary School. Dito ako at mga kapatid
ko.nag-aral. Nilalakad lang namin ito mula sa bahay namin. Sa
kuwento ng Nanay, ito raw kinatitirikan ng aming eskuwelahan at
mga paligid ay dating pag-aari ng Lolo Pedro ko. May tanim daw
itong zacate na damong pinakakain sa mga kabayong nagpapasada ng
mga kalesa nila, samantalang ang iba namang damo’y ibinebenta,
kasama ng darak at pulot. Ang laki-laki naman ng lugar na ito at hindi
ko maisilid sa imahinasyon ko na bukirin ang lugar na ito noon.
Siguro nga, hanggang sa manirahan na rito ang lolo ko’t mga kamag-
anakan niya ay taniman pa ang malaking bahagi ng Tundo. Sang-
ayon pa rin kay Camagay, may pagsasaka sa ilang bahagi ng Santa
Cruz, Sampaloc at Tondo noong panahon ng Kastila. Binansagan nga
raw na “ Hardin ng Maynila,” ang Tondo dahil sa mga prutas na
nagpakilala rito tulad ng mangga, dalandan, mandarin at saging.
Naging bantog din daw ang Tondo dahil sa kanyang mantekilya at
keso. Kahit pala ang Bangkusay ay naging gawaan ng apog na
importante sa pagtatayo ng mga gusali at bahay, bukod pa sa gamit
ito sa pagnganganga. Ibig sabihin, noong mga panahong iyon ay hindi
pa pook ng kahirapan ang Tundo. May kabuhayan at ikinabubuhay
rito. Hindi ko maubos-maisip na nag-umpisang may kabuhayan ang
pamilya ng Nanay ko na nauwi sa paghihirap nang mamatay ang lolo.
Hindi raw kasi maalam ang mga babae noon sa paghahanapbuhay,
sabi ng Nanay ko, kaya hindi napatakbo ng Nanay niya ang kanilang
negosyong kalesa’t pagbebenta ng damo. Hindi man lamang siguro
naisip ng lolo na itatawid sa gutom ng matsakaw ang kanyang mga
apo.
Nag-aaral ang wala, may baon o wala.
Malaki at malinis ang eskuwelahan namin, at sabi ng mga
titser dito, ito raw ang pinakamagaling na eskuwela sa mababang
paaralan. Masaya ang mga alaala ko sa eskuwelahang ito, lalo na ang
mga araw ng field day na lahat ng klase mula greyd wan hanggang
greyd six ay nagpapalabas, madalas ng mga sayaw na katutubo. Kahit
mahirap kami, nagagawan ng Nanay ng paraan na maipatahi ako ng
baro’t saya. Gustung-gusto ko rin ang pagtitinda sa aming kantina,
kasama ito sa aming sabjek na Home Economics dahil kapag may
natitirang nilagang saging o puto, ipinauuwi sa akin ng titser ko.
Gusto ko rin ang pagtao sa aming bangko. Minsan sa isang linggo,
nagiging teller kami sa bangko. Nagdedeposito ang mga mag-aaral
na ang libreto nila ay dinidikitan namin ng selyo hanggang sa
mapuno. Nakakapagdedeposito naman ako dahil tinitipid ko ang baon
ko, kapag may baon ako, at kung naaabutan kami ng pera ng Tiyo
Efren, asawa ng pinsan ng Nanay. Hindi aalis ‘yon ng bahay nang
hindi kaming mga bata naabutan ng pera. Suwerteng-suwerte kapag
nag-abot siya ng singkuwenta pesos na paghahati-hatian naming mga
bata. Sa Meralco nagtatrabaho si Kuya Efren at malaki ang suweldo
niya kaya malaki ang bahay nila sa Pasig at nag-aaral lahat ang mga
anak niya. May panahong pumupunta kami ni Ate Tangge sa kanila
para mamalantsa at nang makapag-uwi ng kuwarenta pesos na upa
sa serbisyo. Ayaw kasi ng Nanay na nanghihingi lang kami sa kamag-
anak, kailangang magpatulo kami ng pawis para hindi raw kami
kasawaan.
Hindi araw-araw ay umuulan.
Hindi ko rin makalimutan noong una akong makasama sa isang
palabas ng klase sa greyd tri. Meron kaming mga suot na kostyum,
mga iba’t ibang hayop at kinanta namin ang “ Old Mcdonald Has a
Farm.” Tuwang -tuwa ang Nanay sa panonood sa amin at kami ang
nanalo sa mga nagpalabas sa greyd tri. Ni sa hinagap hindi ko naisip
noon na balang araw, magkakaroon pala kami ng sariling farm at
mga hayop dito, sa pag-aasawa ko ng mahilig sa bukid. Naalala ko
rin ang masasayang araw ng aming pag-aani ng mga tanim. Pag
ganitong panahon, lahat ng mga nag-aaral sa Bonifacio, naglalakad
sa kahabaan ng Tayuman, o sa Biak na Bato na may bitbit na petsay
o kaya’y labanos. Kaya alam ng mga taga-amin na nag-ani na ang
mga eskuwela. Kasama sa pinag-aaralan namin noon ang pagtatanim
at may sari-sarili kaming plot ng mga tanim na gulay. Dito rin siguro
nagsimula ang pagkahilig ko sa paghahalaman, bukod sa bata pa ako
ay naliligid na ako ng mga halaman sa aming bahay dahil mahilig sa
paghahalaman ang Tiya Uba.
May anghel nga ba ang bawat bata?
Dito rin sa Tayuman makikita ang isang maliit na bakery.
Importante sa buhay namin at sa akin ang panaderyang ito na ari ng
Tsino. Intsik pa noon ang tawag namin, pati sa mga naglalako ng
taho, puto’t kutsinta, at lumpiang sariwa. Dito kami sa bakery na
ito bumibili ng pyanono at matsakaw na pinakamura sa mga mabibili
rito. Kung araw na walang-wala, malutong na matsakaw at kapeng
walang gatas ang panawid namin sa tanghalian. Mga tirang tinapay
ang matsakaw na niluluto uli at ibinebenta nang mura. Toasted
breadang tawag ngayon dito. Importante rin ang bakery na ito dahil
dito sa tapat nito nangyari ang isang aksidenteng hinding- hindi ko na
malilimutan at dahilan kung bakit takut na takot ako sa baha. Nasa
greyd 5 na ako noon, tag-ulan at may baha. Inutusan ako ng Nanay
na bumili ng matsakaw sa bakery sa Tayuman. Hanggang binte ko
lang naman ang tubig at sanay na sanay kong binagtas ang
kabisadong daan. Malapit na ako sa bakery nang mahulog ako sa
imburnal na walang takip. Mabuti na lamang at mabilis akong
nakakapit sa bunganga nito at habang sigaw nang sigaw sa
matinding takot ay anuba’t inangat ako ng isang mamang kasunod
ko palang naglalakad. Kung nagkataon at nahigop ako ng malakas na
agos sa ilalim ng imburnal, nasirang rosario na ako noon. Hindi na
ako tumuloy sa panaderya dahil wala na akong pambili! Nabitiwan ko
ang diyes sentimos na hawak ko sa kamay. Umuwi akong walang
dalang matsakaw, takut na takot at ikinuwento ko ang pagkahulog sa
imburnal. Salamat sa aking anghel, hindi ako pinagalitan at sa halip
ay inutusang maligo’t magbanlaw.
Sa dulong kanan ng Biak na Bato naman ang daang Quiricada
(ito pa rin ang pangalan nito hanggang ngayon) na papunta sa San
Lazaro Hospital at sa Bambang. Dito sa kahabaan ng Quiricada kami
nag-aabang ng madaling araw, kapag Linggo ng Pagkabuhay dahil sa
“Salubong”. Pinapanood namin ang pagtatagpo ng Mahal na Birhen
at ni Jesus na hihinto sa malapit sa Rey Bakery, pag-aari naman ng
isang Tagalog. Lalapit ang isang batang anghel na nakabitin na
siyang mag-aalis ng belo ng Mahal na Birhen at pagkatapos ay
magpapakawala ng kalapati. Susunod na kami sa prusisyon hanggang
sa simbahan. Bago ang Salubong, sa tapat ng Balagtas Elementary
School naman kami gabi-gabi nanonood ng sinakulo. At kung araw
ng piyesta, Hunyo 12 ang piyesta sa amin, Araw ng Kalayaan, bitbit
ang sari-sariling bangko, ginagabi-gabi kami sa panonood ng palabas
sa entablado. Kasama na rito ang panonood ng pelikula mula sa trak
ng Pepsi Cola.
Namamana nga kaya ang huwisyo sa negosyo?
Dito naman sa palengke ng Bambang kami namimili. Toka-toka
kaming magkakapatid sa pamimili, kapag hindi pwede ang Nanay.
Sinanay kaming mga anak na babae sa mga gawain sa bahay:
paglalaba, pamamalantsa, paglilinis ng bahay, pagluluto. Naglilinis
din ng bahay ang mga kapatid kong lalaki, bukod sa mga trabahong
lalaki katulad ng pagsisibak ng kahoy at pag-iigib ng tubig. Dito sa
Bambang ko nakilala ang mga isdang paborito ng mga mahihirap:
ayungin, bisugo, galunggong, bangus, biya, hasa-hasa, sapsap.
Tumpukan ang bili ng isda noon, hindi kinikilo, liban sa bangus na
por piraso. Ngayon, pagkain na ng mayayaman ang ilan dito tulad ng
ayungin. Gourmet food na kung tawagin. Tinulaan pa nga ni Pete
Lacaba ang ayunging paborito kong ipaksiw sa sampalok sa tula
niyang “ Paksiw na Ayungin.” Alam na alam ko ang lasa ng sinisipsip
na ulo ng ayungin, habang binabasa ko ang tulang ito na hindi
maintindihan ng kaklaseng mayaman.
Ito ring palengke ng Bambang ang dakilang palengke ng
aming pagtawid sa kahirapan. Sa konting halaga, makakabili na
kami ng gulay, yung gulay na pinagpilian o kaya ay ‘yung mga dahong
lagas na inaalis ng tindera, kung repolyo o petsay, na pwede nang
mahingi. Ang tawag ng Nanay ko rito, gulay sa “pitong henero” o iba-
ibang gulay na tinabas ang mga parteng malapit nang mabulok.
At dito rin sa palengke ng Bambang ako namimili ng mga
paninda kong mani, tsokolate at kendi na itinitinda ko sa mga kaklase
ko noong nasa hayskul na ako. Natutuhan ko sa aking Tiya Uba na
kinagisnan ko nang nagtitinda ng prutas sa harap ng bahay namin,
ang “pagnenegosyo.” Tuwing hapon, naglalakad akong pauwi mula sa
Arellano Public High School sa Doroteo Jose, ang daan na binanggit
ni Edgar Reyes sa kanyang nobelang Maynila, Sa Kuko ng Liwanag.
Dadaan ako sa suki kong bilihan ng isang salop na maning hilaw.
Dadaan ako sa bilihan ng mantika at supot. Pagdating sa bahay,
pagkahapunan, at bago mag-aral, ibubusa ko na sa kawaleng bakal na
may kumukulong mantika ang dinurog na bawang, isusunod ang
mani, palalamigin habang pinatutulo ang sobrang mantika, at
isusupot. Araw-araw, habang nagkaklase sa history, ipapasa ko na
ang supot sa mga kaklaseng suki ko na. Hindi ko alam hanggang
ngayon kung bakit nga ba sa klaseng ito nagkakabentahan ng
mani. Mabait si Ma’m Vicencio, kahit nakikita niya, hindi niya ako
kinagagalitan. Noong fourth year na ako, hindi ko na ginawa ito.
Kapag oras ng P.E. na lang ako nagbebenta. Mahirap naman kasing
magpasa ng suha, singkamas at binalatang manggang hilaw.
“Hinahango” ko ito sa Tiya Uba, mula sa paninda niya at pag-uwi ko
sa hapon, ineentraga ko na ang napagbilhan ko, labas na ang kinita
kong patong na singko hanggang diyes sa presyo niya. Naalala ko
pa noong minsang magreunyon kami at nagkakabidahan na. Biniro
ako ng kaklaseng si Isidro, suki kong pamangkin ng isang konsehal
sa Maynila at pari na ngayon, ng “ Rosario, pabili nga ng mani mo,”
na madalas naman niyang sabihin sa akin kapag bumibili siya noon at
tigas ng hagalpakan. Minana naman ni Boy, sumunod sa akin, ang
hilig sa pagtitinda noong nasa hayskul na siya. Kaya, hindi namin
problema noon kung wala kaming baon, dahil “naghahanapbuhay,”
na kami para may pambili ng mga kailangan sa mga prajek sa
eskuwela sa tulong ng palengke ng Bambang.
Hindi lang pala kaming mga mahihirap ang naitawid ng
Bambang, noong “peace time” na. Kahit pala noong panahon ng
giyera, sumikat na ang Bambang dahil hindi lang ito ang orihinal na
ukay-ukay, naging sentro pa ito ng di-karaniwang negosyo. Noong
panahon ng Hapon, mabibili raw ang mga segunda manong mga polo
shirt. modernong bestida at mga pantalon dito sa Bambang at sa
daan ng Anak ng Bayan. Sa ibenebenta pa nga raw na mga damit
na ito ay kasama ang mga ninakaw sa mga patay na nakalibing sa
sementeryo ng La Loma o ng Norte, ayon kay Agoncillo.
Pagkagiyera, mga donasyong damit na ang makikitang ibenebenta sa
isang seksiyon ng palengke, na kung tawagin ay relief goods.
Nakabili rin kami ng ilang mga damit dito. Naalala ko pa noong
isang beses na umuwi ang Nanay mula sa Bambang, dala-dala ang
ilang pirasong pantulog para sa aming mga babae. Yari sa seda at
may mga lace ang mga kolyar ng night gownna mga puting-puti at
amoy naptalina o moth ball. Isang araw matapos na malabhan at
maplantsa., suot- suot na namin nina Ate Tangge at Ate Poy na
lumabas sa daan para ipakita sa mga kalaro ang mga bago naming
pantulog. Nagulat sila’t namalikmata sa akalang mga diwatang
naligaw sa kalsada.
Mula sa Biak na Bato, nilalakad ko ang kahabaan ng Quiricada,
bitbit ang bag at paninda, dadaan sa Bambang, liliko sa mga
iskinitang short cut papuntang Lope de Vega at Doroteo Jose.
Hanggang second year ako sa Annex ng Arellano Publih High School,
at sa ikatlo at panghuling taon naman sa main building sa kalapit na
Doroteo Jose. Kahit sa public ako nag-aaral noon ay dama ko naman
ang “swerte” na sa isang mahusay na eskuwelahan ako nag-aaral.
Salamat na lang at noon, ang pampublikong paaralan ang mas
mahusay ang estandard.
Tinging nagwawating-wating, tumutuwid din.
Noong nasa kolehiyo na ako sa U.P. at saka lamang nagbago
ang pakiramdam ko tungkol sa Tundo. Ipinabasa sa amin ni Mrs.
Patricia Melendrez-Cruz, titser ko sa maikling kuwento at sa nobela,
ang nobelangSa Tundo Man May Langit Din ni Andres Cristobal
Cruz. Pagkatapos kong basahin ito at pag-usapan sa klase, doon
nagsimula ang naiiba kong pagtingin sa Tundo. Dahil, bukod sa
humanga ako sa manunulat na si Cruz na laking Tundo, naisaisip
kong may kadakilaan sa pook na kinalakhan ko at hindi ko ito dapat
ikahiya. Noon, ang dating sa akin ng nobela ay pagbubukas ng isip
sa maraming tapyas ng buhay ng mga taga-Tundo. Ang sa akin ay
isa lamang manipis na hibla ng habi ng pagtunggali sa kahirapan
upang mangibabaw rito at magkapuwang ang pangarap. Pinangarap
kong hinding-hindi ako tutuntong sa pabrika ng sigarlyo, kaparis ng
mga kapatid kong nauna sa akin at sa halip ay magiging guro ako.
Kung paano, hindi ko inisip, basta nag-aral ako nang nag-aral at
umasang mangyayari ito.
At habang pumapalaot ako sa pag-aaral ng panitikang
Tagalog, (pinili kong maging mejor ko, katuwang ng pag-aaral ng
kasaysayan na siya ko namang maynor sa kursong Bachelor of
Education sa UP, sa tulong ng isang iskolarsyip ng samahan ng
alumnay ng Arellano Public High School, na ang Presidente noon ay
si Attorney Teodoro, tatay ng magkapatid na propesor sa UP na sina
Luis at Noel), at saka unti-unting nagbago ang tingin ko sa Tundong
sinilangan ko. Nahahalinhan na ang dating “pagkahiya” ng unti-
unting “pagmamalaki,” nang isa-isa ko nang makilala ang iba pang
manunulat na mga “anak ng Tundo,” na ipinagmamalaki nito.
Isa na rito si Amado V. Hernandez na taga- Gagalangin, Tundo.
Naging titser ko sa klase sa panulaan at iba pa noong nasa kolehiyo
ako. Naikuwento ko na sa isa pang sanaysay ang tungkol sa unang
impresyon ko sa kanya nang una kaming magkilala na nagbigay sa
akin ng pambihirang suwerteng maging guro ko siya. Dito at sa iba
pang klase ko sa kanya ko naman nakikilala si Ricky Lee at ilang
kilalang lider ng kilusang aktibista sa hanay ng mga kabataan.
Noong mga panahong iyon ay wala akong kamuwang-muwang sa
politika, palibhasa’y katulad ako ng karaniwang mag-aaral ng
Kolehiyo ng Edukasyon na walang inaatupag kundi mag-aral, sa takot
ko ngang mawala sa akin ang pambihirang pagkakatong
makapagtapos sa kagandahang loob ng ibang tao, idagdag pa ang
pangyayaring may tradisyon ng pagiging konserbatibo ang aming
kolehyo. Dito sa mga klase ni Ka Amado, at iba ko pang magiging
gurong makabayang katulad nina Teodoro Agoncillo, Aida Lava-
Dizon, Samuel Tan, Jaime Veneracion, Temario Rivera at Patricia
Melendrez-Cruz, mamumulat ako sa kahalagahan ng nasyunalismo
bilang isang diwaing may lakas na magwasak at magbuo.
Pag-aaral pa rin ng kasaysayan ang magpapakilala sa akin sa
galing ng mga anak ng Tundo. Hindi man tubong Tundo, si Francisco
Balagtas ay sinasabing nakapag-aral sa Maynila nang manilbihan
siya at itaguyod ng isang nagngangalang Trinidad na nakaririwasa
sa Tundo. At sa pagtira niya sa Tundo ay napanday ang hilig niyang
pagtula nang makasama niya ang mga bantog na manunulat na
taga-Tundo, lalo na ang tanyag na matandang makatang
si Joseng Sisiw. Sang-ayon pa rin sa kasaysayan, lalampasan ni
Balagtas ang husay ng kanyang guro sa pagtula.
Aling pag-ibig pa ang hihigit kaya?
Bukod sa mga manunulat na anak ng Tundo, ay lalo ko pang
matutuklasan sa pag-aaral ng kasaysayan ang lingid sa akin na
kasaysayan nito at naging ambag sa pagpapalaya lalo na iyong
tumatanaw sa sambayanan na tunay na lumilikha nito.
Ang estasyon ng Tutuban noon ay pinupuntahan ko para
hatiran ng pagkain si Kuyang na limpya bota doon o taga-shine ng
sapatos, pagkatapos niyang magrasyon ng dyaryo sa madaling araw.
Dahil panganay, nasabak na siya sa paghahanapbuhay at hindi na
nakabalik sa eskuwelahan) Dito sa harap ng Tutuban Mall ngayon
makikita ang estatuwa ni Andres Bonifacio. Pagmumuhon ito ng isang
lugar sa may Daang Azcaraga, na ngayo’y Claro M. Recto na
pinagpupulungan ng grupo nina Andres Bonifacio, kasama sina
Ladislao Diwa, Deodato Arellano, Valentin Diaz, Teodoro Plata, at Jose
Dizon at nagbuo sa Kataas-taasan Kagalanggalang na Katipunan nang
mga Anak ng Bayan. Dito pala sinindihan ang mitsa ng
Himagsikang magsisilang sa diwa ng Inang Bayan. Ang Biak na Bato
kayang pangalan ng kalye namin ay isinunod din sa makasaysayang
pook ng Biyaknabato sa San Miguel de Mayumo, Bulakan na
pinaglunggaan nina Aguinaldo? Marahil.
Nanalaytay nga sa mga lugar ng Tundo ang diwa’t salaysay ng
paghihimagsik. Buhay palibhasa ang espiritu ni Rahang Soliman na
nakipaglaban sa puwersa ni Martin de Goiti noong subukan niyang
sakupin ang Maynila. Dito sa Tundo naganap ang isang
pangyayaring ipinapalagay na kauna-unahang sagupaan sa pagitan
ng mga Kastila at ng mga katutubo. Sang-ayon sa tala, alas dos ng
hapon nang walang kaabug-abog na sinugod ng mga rebolusyunaryo
ang kwartel na malapit sa Aduana. May mga namatay sa kanila
ngunit napasok nila at nalimas ang mga armas at balang natagpuan sa
loob. Anim na oras raw tumagal ang labanan nang dumating ang
mga kawal ng hukbong Kastila. Ito na nga raw ang nagpatunay sa
kumakalat na balitang may napipintong pag-aalsa na kasangkot ang
mga taga-Tundo. Karahasang bugso ng dakilang pag-ibig sa bayan
ang ipinunla sa pook na aking sinilangan.
Aakitin pa rin ng Tundo ang panghihimagsik ng mga manunulat
ng samahang Panitikan noong panahon ng mga Amerikano. Sa
salaysay ni Agoncillo, “ Sa gitna ng mainit na talumpati nina Gregorio
N. Garcia, Aljandro G. Abadilla at Venancio R. Aznar, ang gloryeta sa
Moriones ay nakita ng bayang umuusok at naglalagablab.
Nagkulumpunan ang mga taong nagdaraan, ngunit napagsiya nilang
hindi nasusunog ang gloryeta kundi may sinusunog doong mga
akdang sa palagay ng kabataan ay hindi na dapt ipamana sa lahinh
iluluwal.” Dito na nga arw nagsilbing apdo sa labi ng matatandang
manunulat ang pangalang Panitikan. Nagsunog ang mga batang
manunulat ng mga akda ng matatandang manunulat para tutulan
ang monopolyo ng mga establisado nang manunulat sa mga
pahayagan noon. Binasagan ng kritikongVirgilio Almario ang klase ng
panulaang sinunog ng kabataan noon na panulaang Balagtasista sa
kanyang pag-aaral. Naulit naman itong pagsusunog bilang protesta
noong 1970 nang sunugin din ng militanteng samahang PAKSA ang
ilang akda para tutulan ang konserbatismo ng mga gawad
pampanitikan at itanghal ang panitikang “mula sa masa, tungo sa
masa.”
Paraiso ang Tundo?
Hindi ako nagagawi dito sa tulay ng Moriones noong bata pa
ako. Ang Simbahan ng Tundo ang minsan isang taon ay
pinupuntahan namin. Dinadayo ang simbahan kapag araw ng piyesta
rito, dahil dumarating ang Arsobispo ng Maynila at binabasbasan
ang lahat kasama ng mga kinumpilan. Naalala ko ring isa ito sa mga
panahong naliligalig ang Nanay at mahigpit na binabantayan ang isa
kong kapatid na lalaking mahilig bumarkada para hindi makidayo sa
piyesta. Taun-taon raw, walang mintis na magkakagulo dahil sa
lasingang bahagi na ng selebrasyon at may magbubuwis ng buhay sa
piyesta ng Tundo.
Nakaratay pa rin sa kahirapan ang Tundo. Sa kabila nito, uuwi
at uuwi ako para dalawin ang Nanay kong pinaparaiso ang lumang
bahay namin sa Biak na Bato.