Urdhri i Farmacistit ka përgatitur certifikatat e ushtrimit të profesionit për të gjithë profesionistët që kanë përmbushur kriterin e ricertifikimit. Gazeta publikon emrat e personave, të cilët kanë përmbushur kriterin e ricertifikimit dhe kanë aplikuar pranë Urdhrit të Farmacistit për t’u pajisur me lejen e re të ushtrimit të profesionit, në pozicionin e farmacistit të punësuar në të gjithë vendin. Të gjithë punonjësit, të cilët e gjejnë emrin në listën e mëposhtme, duhet të paraqiten, të pajisur me mjet identifikimi dhe certifikatën e vjetër që të tërheqin personalisht certifikatën e re , pranë zyrës qendrore në Tiranë, ditën e sotme. Këta farmacistë pas marrjes së lejes kanë të drejtën e ushtrimit të profesionit pasi kanë plotësuar një sërë kriteresh të kërkuara për këtë qëllim. Kështu, këta profesionistë, jo vetëm që marrin licencën e ushtrimit profesional, por edhe anëtarësohen pranë Urdhrit Profesional. Çdo aplikant u nënshtrohet disa tarifave, me qëllim marrjen e së drejtës së ushtrimit të profesionit. Regjistrimet Ndërkohë, bëhet e ditur për farmacistët e rinj se regjistrimet për kryerjen e praktikës profesionale për sezonin Korrik-Tetor 2015 fillojnë me datë 10 korrik dhe vazhdojnë deri në datën 20 të muajit. Praktika profesionale kryhet vetëm në farmacitë e rrjetit të hapur ose spitalore, nën drejtimin e një farmacisti me jo më pak se tre vjet përvojë pune. Kandidati praktikant për t’u regjistruar për kryerjen e praktikës profesionale duhet të paraqesë në Zyrën e UFSH-së, një sërë dokumentesh, të tilla si kërkesa (gjendet në faqen online të UFSH), vetëdeklarimi, kontrata tip për kryerjen e praktikës profesionale, fotokopja e certifikatës së anëtarësimit në Urdhër të drejtuesit të praktikës, fotokopje të noterizuar të diplomës dhe listës së notave; fotokopje e kartës së identitetit, tre fotografi dhe mandat pagesën në shumën 10 mijë lekë.
