Giduc Mienh Nyei Leiz-Fingx - WordPress.com · 2011-02-11 · Giduc Mienh Nyei Leiz-Fingx Biux Mengh Waac ... taaih ginx, zipv kaeqv nyei jauv, leiz-fingx jauv, bieqc cuotv, mingh

© Zeuz, Gueix-Zunh 1

Giduc Mienh Nyei Leiz-Fingx Biux Mengh Waac Naaiv buonv sou se gorngv taux Giduc mienh nyei ei-douh caux leiz-fingx jauv. Naaiv buonv sou zoqc daaih weic tengx Giduc mienh hiuv taux hnangv haaix nor baaix zangc Tin-Hungh nyei jauv, caux kauv Giduc njaaux nyei congh mengh leiz. Naaiv buonv sou gorngv taux camv-nyungc zongh zei baaix zangc nyei jauv. Naaiv buonv sou duqv fiev cuotv se weic maaih ziex norm guoqv-jaa nyei Giduc mienh naaic taux Giduc mienh nyei baaix zangc jauv hnangv haaix nor mingh daaih. Fiev sou nyei mienh hnamv taux oix zuqc maaih buonv sou njaaux taux Giduc mienh nyei ei-douh caux leiz-fingx jauv weic tengx hoz baan mienh haih mengh baeqc taux Giduc mienh baaix zangc Tin-Hungh nyei leiz hnangv haaix nor. Naaiv buonv sou njaaux taux Giduc mienh hnangv haaix nor baaix zangc Tin-Hungh, hnangv haaix nor yiem seix zangc nyei jauv, hnangv haaix nor yiem puix Tin-Hungh nyei leiz. Giduc mienh yiem seix zangc oix zuqc hnangv haaix nor zoux cingx daaih haih zoux duqv horpc Tin-Hungh nyei eix. Maaih deix mienh sienx liuz Yesu yaac oix hiuv taux Yesu nyei leiz-fingx jauv mv baac mv maaih haiv nyungc sou tengx ninh mbuo hoqc hiuv taux. Zeiz nyei, yiem naaiv lungh ndiev maaih ziex nyungc kauv hoqc nyei jauv, yaac maaih ziex nyungc kauv hoqc nyei sou tengx kauv hoqc nyei mienh hiuv duqv seix zangc, ziou-dingh nyei jauv. Haaix fingx mienh, haaix nyungc waac yaac maaih kauv hoqc nyei sou. Mv baac mbuo Iu-Mienh mv gaengh maaih haaix nyungc sou tengx mbuo kauv hoqc nyei jauv. Mbuo sienx Yesu nyei mienh se horpc zuqc maaih buonv sou tengx mbuo kauv hoqc Tin-Hungh nyei leiz-fingx jauv. Mbuo Giduc mienh horpc zuqc lorz ziangh hoc, fai longc ziangh hoc hoqc hiuv taux mbuo Giduc mienh nyei leiz-fingx ei-douh jauv hnangv haaix nor mingh daaih. Zorqv nyungc zeiv, se beiv hnangv mbuo yiem seix zaangc se gorngv, mbuo maiv tong hiuv taux doz-leiz jauv nor, mbuo ziouc zoux dorngc leiz, yaac zuqc mingh taux nyangh muonh siemv dingc zuiz.


Yaac fih hnangv nyei nyungc-nyungc zong-zei baaix zangc nyei jauv caux njaaux mbuo nyei jauv, se gorngv mbuo maiv ei fai maiv muangx nor, mbuo ziouc haih zoux dorngc yaac zuqc dingc zuiz. Yesu mienh ganh se benx yietc guanh, maiv gunv gorngv mienh fai janx, yietc zungv se benx yietc fingx mienh. Mbuo Giduc mienh se horpc zuqc hoqc hiuv taux Giduc nyei leiz. Mv baac dongh siang-sienx nyei mienh se aqc duqv mengh baeqc taux Giduc nyei leiz. Weic zuqc yiem Ging-Sou gu’nyuoz yaac maiv duqv fiev daaih benx yietc diuh, yietc diuh leiz mengh nyei mbaih jienv mingh bun mbuo hiuv. Mbuo ganh oix zuqc longc ziangh hoc zaah lorz, hnangv naaiv dongh maiv maaih qangx caux maiv maaih congh mengh nyei mienh ziouc maiv haih duqv hiuv taux Tin-Hungh dunh yunh nyei leiz. Yiem Yaa^gorpc sou gorngv, Tin-Hungh dunh yunh nyei leiz bun mbuo duqv benx bungx nqoi nyei mienh, haiv dauh zaah mangc yaac oix zuqc zanc-zanc zaah jienv, haiz liuz ziouc ei jienv zoux wuov deix ziouc duqv ziangh jienv (Yaa^gorpc 1:25). Hnangv naaiv, hnamv daaih naaiv buonv sou se haih tengx meih hiuv duqv taux dongh meih oix hiuv nyei jauv mv bei. Mv gunv meih benx haiv nyungc mienh yaac hnamv daaih maaih deix dorngx haih tengx duqv meih nyei, se gorngv meih longc noic zoux hnyouv ndaauv deix, longc ziangh hoc doqc nor. Meih sienx Yesu nyei fai?, mv gunv meih sienx fai mv sienx naaiv buonv sou oix bun meih hiuv taux Tin-Hungh nyei zien leiz. Da’yietv Ginc Zong-Zei Leiz-Fingx Jauv Mbuo baamh mienh yiem loz-hnoi jiex gorn wuov zanc se yietc zungv gorngv nduqc nyungc waac, yaac juangc duqc dauh Ziouv baaix zangc hnangv, weic zuqc mbuo kungx maaih nduqc dauh Ziouv Tin-Hungh zeix mbuo cuotv daaih hnangv. Weic laaix mbuo baamh mienh maiv muangx Tin-Hungh nyei waac, mbuo cingx daaih zuqc bun cuotv zoux ziex fingx mienh. Mv daan kungx zuqc bun nqoi hnangv, yaac zuqc bun nzanx doic, bun nqoi waac, gorqc zeic mienh maaih gorqc zeic mienh nyei waac. Taux ih zanc daaih mbuo baamh mienh corc maaih ziex fingx mienh, ziex nyungc zong-zei baaix zangc nyei jauv yiem naaiv lungh ndiev. Fingx-fingx mienh maaih ganh nyei waac, yaac maaih ganh nyei zong-zei buoqc zangc jauv nzipc jienv daaih, mv baac yiem loz-hnoi wuov zanc maiv hnangv naaiv.


Yiem loz-hnoi wuov zanc mbuo yietc zuqc juangc dauh Ziouv Tin-Hungh baaix zangc hnangv. Ih jaax hnoi mienh maanc hiaangx camv daaih yietc dauh ganh hnamv yietc nyungc, ziouc jiex gorn zoux cuotv ziex nyungc zong-zei buoqc zangc jauv daaih. Yietc fingx mienh ganh maaih yietc fingx mienh nyei zong-zei ei-douh jauv zoux, yaac nzipc jienv daaih. Ih jaax hnoi nyei ziangh hoc, yietc fingx caux yietc fingx nyei waac yaac maiv fih hnangv, baaix zangc nyei zong-zei ei-douh jauv yaac maiv fih hnangv aqv. Zorng-zuqv, jaa-dorngx, baaix zangc jauv, taaih ginx, zipv kaeqv nyei jauv, leiz-fingx jauv, bieqc cuotv, mingh daaih, lorz nyanc, lorz hopv nyei jauv, nyungc-nyungc yaac maiv doix, maiv fih hnangv, ganh nyungc nzengc mi’aqv. Hnangv naaiv mbuo cingx daaih gorqc mienh gorngv gorqc mienh nyei waac, gorqc mienh longc gorqc mienh nyei leiz, dongh mbuo longc guenx, zoux guenx nyei jauv hnangv. Weic naaiv ih zanc hnoi cingx daaih bun cuotv maaih ziex nyungc zong-zei buoqc zangc nyei jauv daaih. Maaih deix zangc Tin-Hungh, maaih deix zangc mienv, maaih deix zangc miuc, maaih deix zangc ganh nyungc zienh, mv baac zien se dongh zangc Tin-Hungh wuov jauv. Zien gorn, zien baengx se yietc zungv yiem Tin-Hungh bun njiec daaih, mv baac weic laaix mienh maanc maiv muangx waac zoux hnyouv ngaengc doix dekc Tin-Hungh, ei ninh mbuo ganh nyei hnyouv zoux cuotv ziex nyungc zong-zei mbuoqc zangc nyei jauv daaih fiou. Maaih deix zangc Tin-Hungh maaih deix zangc mienv, maaih deix zangc miuc, mv baac zien gorn zien baengx se mbuo yietc zungv yiem Tin-Hungh cuotv daaih. Tin-Hungh zeix mbuo daaih weic fuh sux ninh, mv baac mbuo lungh ndiev mienh mingh fuh sux mienv div Tin-Hungh dongh zeix mbuo wuov dauh. Hnangv Ging-Sou gorngv nor, weic naaiv Tin-Hungh cingx daaih nouz haic lungh ndiev mienh mangc piex Ninh, mv gunv mienh nyei m’zing mangc mv buatc Tin-Hungh mv baac mengh mengh hiuv duqv nyei, buatc Tin-Hungh zeix daaih nyei ga’naaiv ziouc hiuv duqv maaih Tin-Hungh aqv (Lomaa 1:18-32). Laaix mbuo baamh mienh maiv zieqv Tin-Hungh, maiv tong nimc Ninh, mbuo cingx daaih zuqc kouv, yaac maiv daan mbuoqc naaiv hnangv, se gorngv mbuo maiv sienx kaux Yesu, yaac maiv zipv Yesu zoux Ziouv nor, mbuo corc oix zuqc dingc zuiz ndortv deic-nyuoqc mingh yiem siouc kouv nyei dorngx. Kungx maaih nduqc diuh jauv bun mbuo haih simv duqv cuotv mv zuqc ndortv deic-nyuoqc se oix zuqc goiv hnyouv nzuonx daaih


sienx kaux Yesu. Ging-Sou gorngv haiv dauh sienx kaux Yesu, wuov dauh ziouc maiv zuqc dingc zuiz, ninh yiem daic biaux cuotv bieqc taux ziangh maengc nyei dorngx mi’aqv, daic nyei qaqv yaac gau maiv zuqc ninh aqv(Yo^han 4:25;Lomaa 8:1-2; Matv^taai 4:12-17). Ging-Sou yaac gorngv, haiv dauh maiv sienx kaux Yesu zungv zuqc dingc jienv zuiz aqv (Yo^han 3:17-18). Da’nyeic Ginc Baamh Mienh Longc Nyei Leiz-Fingx Giduc Mienh nyei leiz-fingx se dongh haaix nyungc, yaac hnangv haaix nor? Giduc Mienh nyei leiz-fingx se yiem Ging-Sou gu’nyuoz, se gorngv taux horpc zuqc zoux fai maiv horpc zuqc zoux nyei jauv, eix-leiz se gorngv taux “longx caux waaic nyei jauv hnangv haaix nor, yaac maaih eix-leiz taux “haaix nyungc mbuo maaih leiz zoux fai maiv maaih leiz zoux nyei jauv. Mbuo Giduc Mienh maaih leiz zoux duqv caux zoux maiv duqv nyei jauv. Weic zuqc mbuo sienx Tin-Hungh, yaac sienx Ninh jiu bun mbuo nyei leiz yiem Ging-Sou gu’nyuoz. Hnangv naaic, haaix dauh sienx Tin-Hungh nyei mienh, haaix nyungc horpc zuqc zoux fai maiv horpc zuqc zoux se oix zuqc ei Ninh jiu bun mbuo nyei leiz, dongh yiem Ging-Sou gu’nyuoz wuov. Mbuo laanh laanh sienx Tin-Hungh nyei mienh oix zuqc muangx yaac ei jienv Ging-Sou njaaux mbuo nyei waac zoux. Se gorngv haaix dauh ngaengc Ging-Sou nyei leiz se doix-dekc Tin-Hungh nyei leiz aqv, wuov dauh ziouc zuqc yiem Tin-Hungh nyei zioux ga’ndiev, haaix dauh yiem Tin-Hungh nyei zioux ga’ndiev nyei mienh, ninh nyei maengc yaac mv maaih baengh orn njien-youz, mv daan mbuoqc naaiv hnangv, taux setv mueiz nyei ziangh hoc corc oix zuqc dingc zuiz ndortv deic nyuoqc, mingh yiem siouc kouv nyei dorngx. Tin-Hungh duqv biux mengh Ninh ganh bun mbuo baamz mienh hiuv duqv Ninh, se yiem Ninh zeix daaih nyei maanc muotc ga’naaiv (Lomaa 1:19-21; 2:12-16). Mbuo laanh laanh mienh yiem naaiv lungh ndiev seix zangc, maiv gunv haaix fingx mienh zungv maaih jienv Tin-Hungh nyei Leiz-Latc nyei, Tin-Hungh zeix mbuo baamh mienh wuov zanc Ninh fiev jienv Ninh nyei Leiz-Latc yiem mbuo baamh mienh nyei mba’nziu gorn gu’nyuoz, biux mengh bun mbuo hiuv duqv longx caux hiuv duqv waaic nyei jauv, caux Ninh ganh bun mbuo hiuv duqv, maiv gunv mbuo nyei m’zing maiv buatc jiex Tin-Hungh, mv baac mbuo nyei fiem-fingx mengh mengh nyei hiuv


duqv maaih Tin-Hungh nyei (Lomaa 1:20-21; Ye^le^mi 31:33; Hipv^lu 8:10-11). Aengx maaih nyungc dongh mbuo zoux dorngc nyei jauv, mbuo nyei fiem-fingx gox mbuo fai biux mengh bun mbuo hiuv duqv mbuo zoux dorngc mi’aqv, mbuo ganh maiv oix muangx ngaengc jienv hnangv, se maiv zeiz gorngv mbuo maiv hiuv duqv mbuo zoux dorngc nyei jauv, weic naaiv mbuo cingx daaih oix zuqc dingc zuiz ndortv deic nyuoqc. Mbuo nyei fiem-fingx biux mengh mbuox mbuo gorngv maaih dauh Ziouv Tin-Hungh, mbuo oix zuqc zangc, oix zuqc baaix ninh. Mv baac maiv hiuv duqv ninh dongh haaix dauh, hnangv naaic, mbuo baamh mienh ziouc jiex gorn zimh lorz, yaac zoux ziex nyungc miuc-fangx daaih baaix zangc. Hnangv naaic, ih jaax hnoi cingx daaih maaih ziex nyungc zong-zei mbuoqc zangc nyei jauv. Mbuo Giduc Mienh se dongh zieqv duqv Tin-Hungh nyei mienh, yaac hiuv duqv ninh zeix mbuo laanh laanh mienh daaih wuov dauh Ziouv. Weic naaiv, mbuo sienx kaux Ninh yaac muangx Ninh nyei waac, ei Ninh nyei leiz zoux. Mbuo sienx gorngv Tin-Hungh zeix mbuo daaih zuangv jienv ninh ganh nyei fangx zeiv, mbuo cingx daaih longc leiz doix Ninh nyei hnyouv, ei Ninh nyei waac zoux, dongh Ninh jiu bun mbuo nyei leiz yiem Ging-Sou gu’nyuoz wuov. Giduc Mienh nyei leiz yiem In Wuonh Dimv Nzangc Sou gorngv, longx caux waaic nyei jauv, hnangv naaiv, mienh camv hnamv daaih mbuo baamh mienh funx haaix nyungc zuqc fai dorngc nyei jauv, haaix nyungc mbuo horpc zuqc zoux fai maiv horpc zuqc zoux nyei jauv, ziouc longc naaiv joux waac porv mengh ninh nyei eix-leiz. Naaiv joux waac se maaih deix ziangh hoc longc maiv fih hnangv, benx pou-tong nyei jauv caux pou-tong mienh longc nyei jauv se caux mbuo Giduc Mienh longc caux dingc zuqc fai dorngc nyei jauv yaac maiv fih hnangv, maiv doix-diuc. Hnangv naaic, fin mbuo oix horqc hiuv taux mbuo Giduc Mienh nyei leiz-fingx caux horpc zoux, maiv horpc zoux nyei jauv, bun mbuo daaih mangc gaax ganh jauv mienh hnangv haaix nor hnamv, caux hnangv haaix nor sienx nyei jauv. A. Loz-Hnoi Mienh Longc Nyei Leiz-Fingx Bun mbuo daaih mangc gaax, loz-hnoi gunv lungh ndiev nyei hungh diex hnangv haaix nor zoux, haaix jauv mienh zoux hlo, henv, maaih hatc maaz gunv, wuov jauv mienh nyei leiz se zuqc(horpc). Baengh fim nyei jauv se yiem naaiv jauv mienh gorngv fai paaiv njiec


nyei waac. Naaiv nyungv jauv se maaih i nyungc jauv haih benx duqv, se maiv zeiz nyungc-nyungc haih horpc nzengc fai zuqc nzengc. Bun mbuo daaih beiv mangc yaac hnamv gaax mienh zoux nyei sic, caux dingc nyei jauv hnangv haaix nor, ninh mbuo mau nyei dorngx dongh haaix nyungc: (1) maaih hatc maaz, fai maaih lingc nyei mienh, yaac maiv dauh dauh longx nzengc fai waaic nzengc; (2) loz-hnoi nyei hungh diex Nero hungh, Stalin, caux Hitler, se orqv haic yaac zoux waaic hnangv, ninh mbuo gunv jienv baeqc fingx yaac nduov baeqc fingx caux jienv zoux waaic. Mv baac mv maaih haaix dauh haih norqc duqv ninh mbuo, yaac oix zuqc caux jienv ninh mbuo zoux waaic sic. B. Horpc Leiz Fai Maiv Horpc Leiz Se Yiem Mienh Dingc Haaix nyungc horpc fai maiv horpc se yiem wuov jauv mienh ganh liepc daaih, yaac juangc jienv longc. Se gorngv wuov jauv mienh fai wuov fingx mienh gorngv horpc fai zuqc nor, se weic ninh mbuo. Hnangv naaic, wuov jauv mienh sienx maiv maaih haaix nyungc leiz puix duqv nzengc yietc zungv lungh ndiev mienh. Hnangv naaic, cingx daaih maaih camv nyungc mienh yiem naaiv lungh ndiev, ziouc maaih camv nyungc leiz. Gorqc mienh longc gorqc mienh dingc daaih nyei leiz, maiv zei aeqv, yie buatc horpc, meih youc maiv nyunc, mau nyei dorngx: (1) se gorngv naaiv jauv mienh buatc naaiv nyungc horpc, wuov jauv mienh buatc ganh nyungc horpc hnangv naaic, hnangv haaix nor, haih bun camv jauv mienh juangc jienv yiem?; (2) maaih New Guinea Mienh taaih mbienv hnyouv bun doic, Baeqc Miuh wuov fingx mienh yoc taaih cangv sieqv fai nimc sieqv daaih zoux auv. Eskimo Janx taaih dorh auv caux kaeqv mienh bueix nyei leiz, Jim Jones wuov jauv mienh nyunc nyanc ndie laengc daic, sienx duqv mingh Tin-dorngh nyei, Islam wuov jauv mienh, nyunc dorh ganh nyei maengc mingh hoic ganh nyungc sienx nyei mienh daic aengx caux jienv daic, yaac sienx gorngv naaiv se Tin-Hungh nyei za’eix weic bun ninh mbuo zoux. Mbuo benx Giduc mienh, meih hnangv haaix nor hnamv?; (3) maaih haaix nyungc leiz haih bun jauv jauv mienh buatc horpc nzengc nyei fai? Meih benx Giduc Mienh, meih hnamv daaih oix zuqc hnangv haaix nor zoux gauh horpc jiex? Weic zuqc maiv maaih haaix nyungc leiz haih bun jauv-jauv mienh buatc zuqc nzengc.


C. Zuqc Fai Dorngc Se Yiem Mienh Nyei Hnyouv Dingc Loz-hnoi maaih dauh Janx Gikc congh mengh fin-saeng, ninh nyei mbuox heuc Protagoras, ninh duqv hoqc taux seix zangc nyei jauv, dongh baamh mienh hnamv nyei caux zoux nyei jauv hnangv haaix nor. Ninh gorngv, “horpc fai dorngc se yiem wuov laanh mienh ganh nyei hnyouv ndorqc” ninh haiz ninh ganh zoux daaih horpc nyei nor m’daaih horpc aqv, mv zei nor yie haiz horpc nyei, meih yaac gorngv maiv horpc, meih buatc horpc nyei, yie yoc haiz maiv nyunc duqv. Weic naaiv, maaih ziex dauh mienh zoux maiv horpc, se laaix ei ganh nyei hnyouv hnamv, caux ganh nyei hnyouv nyunc nyei jauv zoux, ziouc maiv doix mienh camv nyei eix aqv, mau nyei dorngx caux waaic nyei jauv se maaih hnangv naaiv: (1) maaih ziex dauh ei ninh mbuo nyei hnyouv zoux puix ninh mbuo nyei eix, ziouc ziang naaic benx maiv horpc leiz aqv, se hnangv daix mienh, jaauv win, longc auv-dorn, pienx mienh nyei zinh nyaanh, douh ganh duqv longx, kiv mienh, mangc piux mienh, ceng ganh, zoux orqv nyei sic; (2) ei ganh nyei hnyouv zoux, caux doic maiv njiec, nyungc-nyungc funx benx ganh nyei sic jeiv jauv hnangv, funx ganh benx lengc jeiv nyei mienh. D. Baamh Mienh Horpc Leiz Jauv Naaiv jauv mienh sienx gorngv “haaix nyungc horpc zoux caux maiv horpc zoux nyei jauv se yiem yietc doic, yietc doic mienh nyei lungh ndiev, mienh ganh hlau ndorqc” wuov doic mienh ganh maaih wuov doic mienh nyei bouc ndorqc zuqc fai dorngc, se beiv hnangv zoux nouh nyei jauv, buov ziec guh nguaaz bun zienh nyei jauv, zinh ndaangc wuov gitv lungh ndiev nyei mienh taaih, mv baac ih zanc funx maiv horpc. Hnangv naaiv mbuo Giduc Mienh oix zuqc hnangv haaix nor zoux? se gorngv mbuo oix zuqc ginv yietc nyungc zoux gan baamh gen goiv yenc nyei jauv mingh nor: (1) nqa’haav hingv wuov gitv lungh ndiev nyei mienh waaic jienv njiec, mbuo yaac oix zuqc laengz nyungc zoux puix jienv mingh; (2) loz-hnoi mienh zoux nyei sic dorh ganh nyei fu’jueiv mingh buov ziec bun mienv; (3) ih zanc mbuo nyei lungh ndiev nyei mienh youc daix ganh nyei fu’jueiv, ganh nyei diex maac, ganh nyei auv, ganh nyei nqox, m’juangc longc m’juangc, m’sieqv longc m’sieqv.


E. Mbu’ndongx Wuov Gitv Mienh Longc Nyei Leiz Zinh ndaangc maaih dauh Janx nyei mbuo heuc Aristotle, ninh sienx gorngv baamh gen goiv yenc nyei ziangh hoc, mienh maanc waaic jienv njiec mingh zaaix, mingh mbiaauc, mbuo yaac oix zuqc zunc jienv mingh fai gan jienv baamh gen goiv yenc nye jauv mingh, hnangv wuom torngx nor, mv baac mbuo ganh oix zuqc dingc hnyouv mangc gaax, oix zuqc hnangv haaix nor zoux cingx horpc. Ninh gorngv, “mbuo oix zuqc yiem mbu’ndongx-wuonc nyei dorngx cingx horpc, maiv dungx zoux longx jiex ndaangc, yaac maiv dungx zoux waaic jiex ndaangc, maiv dungx jienv jiex ndaangc, yaac maiv dungx fong jiex ndaangc, se gorngv mbuo hnangv naaiv nor zoux ziouc horpc aqv.” Hnangv naaic, mbuo Yesu mienh, yiem meih nyei hnyouv, meih hnamv daaih mbuo horpc zuqc hnangv haaix nor zoux cingx horpc? Nyungc zeiv se hnangv: (1) se gorngv maaih nyungc hiaang-hienv nyei sic cuotv daaih, mv maaih haaix dauh hiuv duqv, kungx meih ganh hiuv hnangv, meih oix zuqc mbuox mienh. Meih yaac oix zuqc zoux yiem mbu’ndongx-wuonc hnangv, wuov nyungc meih oix zuqc hnangv haaix nor zoux? Yiem naaiv nyungc jauv, nyungc zeiv se hnangv, maaih deix mienh gorngv, hopv diuv se duqv nyei, maiv dungx hopv nquin hnangv. Yaac hnangv Janx Taiv nyei gouv gorngv nor, zoux zaqc se zoux duqv nyei, danh fanh maiv dungx bun mienh buatc hnangv. (Eix-leiz se mienh maiv buatc se maiv funx dorngc); (2) se gorngv mbuo hiuv duqv haaix nyungc longx jiex mbuo oix zuqc zoux, mv baac oix zuqc zaanv jienv zoux yiem mbu’ndongx-wuonc hnangv. Se hnangv mienh daaih hoic mbuo nyei maengc, mborqv mbuo, mbuo oix zuqc njoux mbuo nyei maengc, mv baac oix zuqc zoux yiem mbu’ndongx-wuonc hnangv. Aengx maaih nyungc, yiem naaiv lungh ndiev, maaih haaix dauh haih lorz duqv hnamv nyei jauv yiem mbu’ndongx-wuonc nyei fai? Nyungc zeiv se hnangv maaih dauh dorn gorngv mbuox dauh sieqv, yie gengh hnamv meih camv haic, ih muonz yie oix mingh buangh meih, se gorngv lungh maiv duih mbiungc nor. Meih hnamv daaih hnangv haaix nor? F. Horpc Leiz Fai Mv Horpc Se Yiem Mienh Nyei Fiem-Fingx Dingc Haaix nyungc mbuo zoux liuz bun mbuo ganh haiz buangv hnyouv buangv eix fai longx hnyouv nor, wuov nyungc se horpc aqv. Mv baac, se gorngv haaix nyungc mbuo zoux liuz haiz maiv buangv hnyouv, fai


maiv longx hnyouv, zoux bun mbuo haiz hnyouv mun fai zuqc hoic nyei jauv nor, wuov nyungc se maiv benx fai dorngc mi’aqv. Zien leiz nyei jauv se yiem mbuo nyei fiem-fingx gu’nyuoz, mbuo laanh laanh mienh zungv maaih jienv Tin-Hungh nyei zien leiz yiem mbuo nyei mba’nziu gorn, nyungc-nyungc sic, fingx mbuo oix zoux nyei jauv, zuqc fai dorngc, yiem mbuo hnamv taux nyei ziangh hoc, mbuo nyei fiem-fingx bun mbuo hiuv ndaangc mi’aqv. Dongh mienh zoux waaic nyei jauv wuov deix se maiv muangx mbuo nyei fiem-fingx paaiv bun mbuo nyei leiz, mbuo ngaengc jienv zoux cingx daaih zoux dorngc sic. Ging-Sou gorngv, Tin-Hungh fiev jienv Tin-Hungh nyei zien leiz fai Leiz-Latc yiem mbuo baamh mienh nyei mba’nziu gu’nyuoz (Hipv^lu 8:10; 2 Ko^lin^to 3:3; Ye^le^mi 31:33; Gorngv Seix Zangc 3:11). Maiv gunv hnangv haaix yaac, corc aengx maaih mau nyei dorngx caux mau nyei jauv nyei: (1) maiv nyungc-nyungc jauv longx nzengc, yaac maiv nyungc-nyungc jauv waaic nzengc. Maaih ziex nyungc zoux bun mbuo ganh duqv longx, mv baac hoic zuqc ganh dauh. Maaih ziex nyungc zoux daaih bun mbuo ganh zuqc kouv, hoic zuqc mbuo ganh, zoux bun mbuo mun hnyouv, mv baac tengx duqv mienh, yaac maaih lamh longc bun ganh dauh; (2) dorh haaix norm dorngx nyei a’hneiv daaih ndorqc? Sin zangc oix nyei jauv fai? Hnyouv nyei a’hneiv fai? Lingh wuonh nyei a’hneiv fai? Minc zinh nyei a’hneiv? Douh nqa’haav hingv nyei a’hneiv fai? Naaiv seix mienh duqv longx nyei jauv fai dieh seix nyei maengc? Mbuo ganh a’hneiv hnangv fai? Bun ganh dauh fai ganh fingx mienh a’hneiv? G. Longx Caux Longx Jiex Nyei Leiz Naaiv jauv mienh sienx gorngv “haaix nyungc zoux cuotv daaih longx jiex yaac tengx duqv mienh camv, wuov nyungc se zuqc aqv, yaac horpc zuqc zoux, maiv gunv longx fai waaic, danh fanh mienh camv buatc horpc hnangv. Maiv gunv hnangv naaiv, mv baac maiv zeiz nyungc-nyungc jauv longx nzengc fai zuqc nzengc, mau nyei dorngx se hnangv naaiv: (1) zoux bun gauh camv nyei mienh ki zuqc zoqc wuov bung, fai zoux bun baengh fim nyei jauv mau; (2) bun maiv nqoi camv fai zoqc, longx fai waaic nyei jauv.


H. Longx Nyei Jauv Se Ei Jienv Tin-Hungh Nyei Eix Zoux Naaiv jauv mienh sienx gorngv longx nyei jauv se dongh ei jienv Tin-Hungh nyei eix zoux wuov deix, haaix nyungc dongh mbuo zoux ei jienv Tin-Hungh nyei za’eix nor wuov nyungc se horpc fai zuqc aqv. Se gorngv Tin-Hungh maiv a’hneiv fai Tin-Hungh funx benx waaic nyei jauv, naaic se waaic aqv. Naaiv jauv mienh se dongh mbuo Giduc Mienh wuov jauv aqv, naaiv se dongh mbuo sienx Tin-Hungh nyei sienx fim aqv. I. Giduc Mienh Buatc Nyei Jauv Jiex daaih mbuo duqv gorngv taux camv jauv mienh zoux nyei sic, longc nyei leiz; hnamv nyei jauv; caux funx gorngv haaix nyungc longx fai waaic nyei jauv mi’aqv. Mbuo Giduc Mienh se duqv yiem zuqc longx jiex nyei dorngx, haih duqv bieqc hnyouv taux haaix nyungc longx fai waaic nyei jauv, haaix nyungc horpc zuqc zoux fai maiv horpc zuqc zoux. Mv daan mbuoqc naaiv, mbuo corc aengx maaih Tin-Hungh nyei zien leiz dorh mbuo, bun mbuo hiuv taux haaix nyungc longx, haaix nyungc waaic, haaix nyungc horpc zoux, haaix nyungc maiv horpc zoux nyei jauv. J. Giduc Mienh Nyei Leiz-Fingx Caux Leiz Giduc Mienh nyei leiz-fingx caux leiz se ei jienv Tin-Hungh paaiv bun njiec mbuo nyei waac, haaix nyungc mbuo horpc zuqc zoux, haaix nyungc mbuo maiv horpc zuqc zoux se yiem Ging-Sou gu’nyuoz, horpc zoux nyei jauv se dongh Tin-Hungh paaiv bun mbuo zoux nyei jauv. Naaiv deix leiz se yiem ninh yietc liuz maiv goiv yienc nyei waac, naaiv se dongh Tin-Hungh nyei eix, dongh ninh oix mbuo zoux nyei jauv. Tin-Hungh nyei eix se dongh ninh oix ninh nyei naamh nyuoz zoux cing-nzengc nyei jauv wuov, se hnangv Ging-Sou gorngv nor, “Meih mbuo zoux muangx Tin-Hungh nyei waac nyei naamh nyouz. Maiv dungx ei jienv meih mbuo nyei hnyouv hanc zoux hnangv zinh ndaangc meih mbuo maiv gaengh hiuv wuov zanc zoux nyei nor. Heuc meih mbuo daaih wuov dauh se cing-nzengc nyei. Yiem meih mbuo zoux nyei nyungc-nyungc sic meih mbuo yaac oix zuqc hnangv ninh nor, cing-nzengc. Weic zuqc Ging-Sou gorngv,“Meih mbuo oix zuqc cing-nzengc weic zuqc yie se cing-nzengc nyei.” (1 Bide 1:14-16; Lewi 11:45). “Tin-Hungh nyei eix se hnangv naaiv. Ninh


oix meih mbuo zoux cing-nzengc, simv nqoi nziaauc sieqv nziaauc dorn nyei sic. Dauh dauh mienh oix zuqc hiuv duqv cing-nzengc nyei za'eix longc auv, taaih auv. Maiv dungx sueih ganh nyei hnyouv hanc zoux, hnangv maiv sienx Tin-Hungh wuov deix mienh zoux nor.”(1 Te^saa^lo^ni^gaa 4:3-4). “Meih mbuo oix zuqc dunh yunh hnangv meih mbuo nyei Tin-dorngh Diex nor dunh yunh” (Matv^taai 5:48). Mbuo Giduc Mienh nyei leiz se Tin-Hungh nyei eix, Tin-Hungh nyei eix fai Tin-Hungh oix nyei jauv se dongh cing-nzengc nyei jauv, Tin-Hungh oix mbuo zoux cing-nzengc nyei jauv hnangv ninh nor, haaix nyungc maiv cing-nzengc, maiv benx, haaix nyungc waaic, se maiv zeiz Tin-Hungh oix nyei jauv. Tin-Hungh se dongh hnamv, cing-nzengc; dunh yunh; maiv goiv yienc wuov dauh (Lewi 11:45; 1 Yo^han 4:16; Maa^laa^ki 3:6). Mbuo Giduc Mienh nyei leiz se yiem ninh cing-nzengc nyei waac jiu njiec bun mbuo; yaac maiv haih goiv yienc; dingc nyei; maiv gunv yiem haaix longc; longc caux haaix dauh mienh; fai haaix fingx mienh; haaix nyungc waac yaac fih hnangv nyei. Nyungc zeiv se hnangv maiv dungx daix mienh (Tin-Deic Douh 9:6). Yiem Mose nyei lungh ndiev, haaix dauh daix mienh yaac dorngc, zuqc dingc zuiz taux daic (Cuotv I^yipv 20:13); yiem Siang-Ngaengc Waac yaac gorngv maiv dungx daix mienh (Lomaa 13:9), hnangv naaic, dongh maiv kuv daix mienh nyei leiz se yiem Tin-Hungh zeix lungh zeix ndau nyei ziangh hoc daaih taux ih zanc, maiv gunv yiem haaix fingx mienh, haaix nyungc waac, yaac maaih naaiv diuh leiz. Weic zuqc mbuo baamh mienh Tin-Hungh ei Ninh ganh nyei fangx zeiv zeix mbuo daaih (Tin-Deic Douh 1:26-28), naaiv yaac maaih eix-leiz, liemh jienv zuangv ninh nyei cing-nzengc nyei fangx zeiv (Ko^lo^si 3:9-10), Ging-Sou yaac aengx gorngv, “Zangc Diex zeix mienh daaih zuangv ninh ganh yaac hnangv ninh ganh,” (Yaagorpc 3:9), weic naaiv haaix dauh daix mienh, ninh yaac zuqc mienh aengx daix ninh(Tin-Deic Douh 9:6). Haaix nyungc yaac zeiz, dongh doix Tin-Hungh nyei eix se dongh, cing-nzengc nyei fangx zeiv se dingc mi’aqv, maiv goiv aqv. Nyungc zeiv se hnangv: cing-nzengc nyei jauv; baengh fim nyei jauv; hnamv mienh nyei jauv; zien nyei jauv; caux korh lienh mienh nyei jauv, naaiv deix yietc zungv se yiem Tin-Hungh daaih, yaac dongh Tin-Hungh nyei eix fai Ninh oix nyei jauv.


Mbuo Giduc Mienh nyei leiz se benx cing-nzengc nyei leiz, weic zuqc mbuo nyei leiz se yiem cing-nzengc nyei Tin-Hungh daaih, se gorngv maiv maaih cing-nzengc wuov dauh Ziouv jiu bun mbuo nor, mbuo yaac maiv haih maaih cing-nzengc nyei leiz. Mbuo Giduc Mienh mv ganh aengx maaih nyungc leiz aqv, mbuo nyei leiz se dongh yiem Ging-Sou gu’nyuoz nyei waac, dongh Tin-Hungh jiu njiec bun mbuo wuov, Ging-Sou se mbuo Giduc Mienh nyei sienx fim nyei wuonv zaangx. K. Jiemx-Gec Nyei Jauv Yiem naaiv lungh ndiev maaih ziex nyungc zong-zei buoqc zangc jauv, yaac maaih ziex nyungc jiemx-jec nyei jauv. Yiem naaiv lungh ndiev mienh maanc buoqc zangc nyei zong-zei, nyungc-nyungc yaac maaih jiemx-gec. Mv baac jiemx-gec nyei jauv yaac maiv fih hnangv. Yietc nyungc ganh maaih yietc nyungc nyei jauv jiemx-gec. Mbuo Giduc Mienh yaac maaih mbuo nyei jiemx-gec jauv, mv baac mbuo nyei jiemx-gec jauv caux maiv sienx Tin-Hungh nyei mienh se maiv fih hnangv. Mbuo Giduc Mienh nyei jiemx-gec jauv se oix zuqc zoux ei Ging-Sou njaaux nyei waac, yiem naaiv buonv sou gu’nyuoz oix gorngv taux Ging-Sou njaaux nyei leiz. Yiem naaiv lungh ndiev mbuo yiem haiv norm guoqv ziouc oix zuqc muangx wuov norm guoqv nyei hungh leiz gunv mbuo, yiem haiv dauh ziouv nyei buoz-ndiev ziouc a’zuqc muangx wuov dauh ziouv gunv mbuo goux mbuo, mbuo yietc zungv sienx kaux Tin-Hungh fai Yesu nye mienh, se a’zuqc zoux ei Ging-Sou njaaux nyei leiz. Haiv dauh maiv zoux ei Ging-Sou gorngv nyei waac wuov dauh ziouc zoux baamz Tin-Hungh aqv. Weic zuqc Ging-Sou nyei joux-joux waac se benx Tin-Hungh nyei waac. “Douc-douc Ging-Sou Tin-Hungh dorh mienh fiev daaih yaac maaih lamh longc weic njaaux mienh” (2 Ti^mo^tai 3:16-17).Se gorngv haiv dauh maiv muangx maiv ei se zoux bun ninh ganh zuqc kouv hnangv, weic zuqc Ging-Sou mv zeiz baamh mienh nyei waac, se Tin-Hungh nyei waac. Haiv dauh nqemh se nqemh Tin-Hungh mv zeiz nqemh baamh mienh (1 Te^saa^lo^ni^gaa 4:7-8). Ging-Sou gorngv nyei nyungc-nyungc sic, nqa’haav oix ei jienv cuotv nzengc daaih, maiv pioux yietc deix, hnangv naaic Ging-Sou hatc nyei waac, haaix dauh maiv ei jienv zoux nor, wuov dauh ziouc zoux baamz Tin-Hungh aqv, se gorngv haiv dauh doix-dekc Tin-Hungh nor, dongh


Ging-Sou gorngv nyei nyungc-nyungc heiv sic ninh ziouc oix zuqc ndaam-dorng. Hnangv naaic mbuo sienx Yesu nyei mienh mbuo fiou nyei leiz se oix zuqc ei nzengc Ging-Sou njaaux nyei waac zoux, se gorngv haiv dauh zoux gauh cou Ging-Sou njaaux nyei jauv wuov dauh zungv zuqc dingc zuiz, haiv dauh zoux gauh muonc Ging-Sou se zoux hoic ninh ganh hnangv. Maaih mienh gorngv, sienx liuz Yesu hopv mv duqv diuv, maaih mienh gorngv hopv duqv nyei, maaih mienh gorngv, sienx liuz Yesu nyanc mv duqv sipv jiex mienv nyei ga’naaiv, maaih mienh youc gorngv nyanc duqv nyei. Maaih mienh youc gorngv sienx liuz Yesu mv haih ceux mv duqv buang-liouh nyei sic hiienx auv, hienx nqox, nziaauc sieqv, nziaauc dorn mv duqv, maaih mienh youc gorngv zoux duqv nyei. Hnangv naaic, bun mbuo lomh nzoih daaih mangc gaax Ging-Sou hnangv haaix nor gorngv taux naaiv deix jauv, mangc gaax Ging-Sou njaaux taux haaix nyungc jauv mbuo, mangc gaax haaix nyungc mbuo haih zoux duqv haaix nyungc mbuo yoc mv haih zoux maiv duqv, mbuo sienx Tin-Hungh nyei mienh, mbuo zoux nyei jauv se ei Ging-Sou njaaux mbuo nyei waac hnangv, mbuo maiv zeiz muangx mienh gorngv zoux duqv fai zoux maiv duqv. Se gorngv mbuo muangx mienh gorngv nor, mienh njaaux dorngc fai gorngv dorngc, mbuo yaac caux jienv mienh zoux dorngc aqv, gauh longx jiex se bun mbuo zaah mangc Ging-Sou njaaux nyei waac, mangc gaax haaix nyungc mbuo horpc zoux nyei jauv, haaix nyungc mbuo maiv horpc zoux nyei jauv, gauh longx jiex muangx mienh gorngv. Hnangv naaic, bun mbuo daaih mangc gaax, Ging-Sou gorngv taux hopv diuv caux nyanc sipv jiex mienv nyei ga’naaiv, se hnangv haaix nor.

L. Diuv Caux Sipv Jiex Mienv Nyei Ga’naaiv Congh Mengh Sou 20:1 “Diuv se ga’naaiv-doqc, mbie se ga’naaiv-ciouv, se gorngv haaix dauh nitv zuqc yaac bun naaiv deix ga’naaiv dorh ninh mingh dorngc jauv se mv guai.” Congh Mengh Sou 23:20-21 “ Maiv dungx caux hopv diuv camv fai naqv orv camv nyei mienh zoux doic, weic zuqc diuv nquin mienh caux mauv nyanc nyei mienh se haih jomc, mongh longh mienh zuqv nyei lui-houx se buh-nyuaaic-gorng.”


Congh Mengh Sou 23:31-35 “Maiv dungx mangc diuv douh ninh siqv nyei ziangh hoc. Ciev njiec zaanv nyei ziangh hoc yuonh nye! Taux setv mueiz ninh hnangv naang nor nyorqv, doc mienh hnangv naang-doqc nyei ndie nor. Meih nyei m’zing oix buatc hieh fangx, meih nyei hnyouv hnamv maiv cing-cov. Meih oix hnangv dauh mienh bueix m’njormh yiem koiv-menc, yaac bueix yiem corng nzangv nyei hlang gu’guaaic nor. Mienh mborqv meih, meih yaac gorngv yie mv haiz, mienh fitv meih, meih yaac gorngv yie mv mun! yie corc aengx oix lorz deix hopv. Diuv hoic mienh nyei jauv se hnangv naaiv, diuv zoux bun mienh mv hiuv duqv haaix nyungc jauv aqv. Lomaa 14:20-21 “Maiv dungx laaix nyanc hopv zoux waaic Tin-Hungh nyei gong. Haaix nyungc nyanc nyei ga'naaiv maiv maaih uix. Mv baac haaix nyungc haih nduov mienh baamz zuiz maiv horpc zuqc nyanc. Gauh longx se maiv dungx nyanc orv, hopv diuv fai zoux haaix nyungc nduov meih mbuo nyei gorx-youz baamz zuiz. E^fe^so 5:18 “Maiv dungx hopv diuv nquin. Diuv se bun mienh zoux waaic sic. Daaux nzuonx oix zuqc bun Singx Lingh yiem buangv hnyouv.” Gong-Zoh 15:20 “Mv baac mbuo oix zuqc fiev fienx mbuox ninh mbuo gec maiv dungx nyanc ziec jiex miuc-mienv ziouc maaih uix nyei ga'naaiv, maiv dungx zoux maiv luonx horngc nyei sic, maiv dungx nyanc naeqc jaang daic nyei saeng-kuv orv, yaac maiv dungx nyanc nziaamv.” Gong-Zoh 21:25 “Sienx Yesu wuov deix Janx, zinh ndaangc mbuo fiev fienx ei mbuo dingc daaih nyei waac mbuox ninh mbuo. Fienx gorngv, ‘Oix zuqc gec maiv dungx nyanc ziec jiex miuc-mienv nyei haaix nyungc ga'naaiv, maiv dungx nyanc nziaamv, maiv dungx nyanc naeqc jaang daic nyei saeng-kuv orv, yaac maiv dungx zoux maiv luonx horngc nyei sic.’’ Laauc Yaangh 2:14-16 ‘Mv baac maaih ziex diuc yie oix gorngv meih. Yiem naaic maaih deix mienh gan Mbaa^laam njaaux nyei leiz. Loz-hnoi Mbaa^laam njaaux Mbaa^laakv dorh I^saa^laaên Mienh baamz zuiz nduov ninh mbuo nyanc ziec jiex bun miuc-mienv nyei ga'naaiv yaac nduov ninh mbuo nziaauc sieqv nziaauc dorn. Yiem meih naaic yaac maaih deix gan Ni^ko^lau^ni^yom wuov jauv mienh njaaux nyei leiz. Hnangv


naaic, oix zuqc goiv hnyouv guangc zuiz. Maiv zei aeqv, yie siepv-siepv nyei mingh meih naaic longc yiem yie nyei nzuih baengx cuotv wuov zung nzuqc ndaauv caux wuov deix mienh mborqv jaax.1 Ko^lin^to 6:12-13 “Maaih mienh oix gorngv, “Haaix nyungc yie maaih leiz zoux duqv nyei.” Zeiz nyei, mv baac maiv zeiz nyungc-nyungc haih tengx meih. Yie haih gorngv, “Haaix nyungc yie maaih leiz zoux duqv nyei,” mv baac yie maiv bun haaix nyungc gunv yie, hoic yie zoux nouh. Aengx maaih mienh oix gorngv, “Nyanc hopv se weic ga’sie, ga’sie se weic nyanc hopv.” Zeiz nyei, mv baac i nyungc zungv Tin-Hungh oix mietc nzengc. Mienh nyei sin se maiv zeiz weic nziaauc sieqv nziaauc dorn, se weic fuh sux Ziouv. Ziouv yaac goux mbuo nyei sin. 1 Ko^lin^to 3:17 “Se gorngv haaix dauh zoux waaic Tin-Hungh nyei singx dinc, Tin-Hungh oix mietc wuov dauh, weic zuqc Tin-Hungh nyei dinc se cing-nzengc nyei. Meih mbuo yaac zoux ninh nyei singx dinc.” 1 Ko^lin^to 5:9-11 “Yie fiev fienx mbuox jiex meih mbuo nyei, maiv dungx caux maiv luonx horngc nyei mienh zoux doic. Yie nyei eix-leiz se maiv zeiz gorngv naaiv norm baamh gen nyei mienh, dongh zoux maiv luonx horngc nyei sic, mauv ga’naaiv, zoux zaqc, baaix miuc-fangx wuov deix. Se gorngv yie gorngv naaiv deix nor, meih mbuo zungv oix zuqc cuotv baamh gen. Yie fiev nyei se gorngv ndaam mengh zoux sienx Yesu nyei gorx-youz mv baac zoux maiv luonx horngc nyei sic, mauv ga’naaiv, baaix miuc-fangx, gorngv doqc mienh, hopv diuv nquin, zoux zaqc wuov deix. Liemh maiv dungx caux ninh mbuo juangc dieh nyanc hnaangx. 1 Ko^lin^to 8:8-13 “Nyanc hopv nyei ga’naaiv maiv haih bun Tin-Hungh gauh a’hneiv mbuo. Maiv nyanc, mbuo maiv zeiz gauh waaic. Nyanc liuz, mbuo yaac maiv zeiz gauh longx. Mv baac, oix zuqc faix fim oc. Meih mbuo hiuv duqv sueih binc nyanc haaix nyungc yaac duqv, mv baac maiv dungx laaix naaiv diuc jauv bun sienx maiv henv nyei mienh baamz zuiz. Se gorngv maaih dauh hnyouv faix nyei mienh buatc meih, dongh maaih wuonh zaangc nyei mienh, yiem miuc-biauv nyanc nor, naaiv maiv zeiz nduov ninh oix caux jienv nyanc ziec bun miuc-fangx nyei nyanc hopv fai? Giduc weic naaiv dauh sienx maiv henv nyei gorx-youz daic,


mv baac wuov dauh gorx-youz laaix meih “maaih wuonh zaang” zuqc mietc. Meih hnangv naaic zoux, meih zoux dorngc meih nyei gorx-youz, weic zuqc ninh hnyouv faix, meih yaac hoic ninh zoux dorngc. Naaiv yaac zoux dorngc Giduc. Wuov nyungc, se gorngv nyanc hopv haih nduov yie nyei gorx-youz baamz zuiz, yie ziouc yietc liuz maiv nyanc orv aqv. Nzauh heix nduov yie nyei gorx-youz baamz zuiz. Matv^taai 18:6 “Se gorngv haaix dauh nduov yietc dauh naaiv deix sienx yie nyei fu'jueiv-faix baamz zuiz, oix zuqc zorqv domh morc ndiux jienv wuov dauh nyei jaang bungx njiec koiv, ndo nyei dorngx, ziemx daic gauh longx.” 1 Ko^lin^to 10:6-10 “Naaiv deix sic yietc zungv zoux nyungc zeiv donv mbuo, maiv bun mbuo maaih hnyouv oix zoux waaic sic hnangv ninh mbuo zoux nor. Yaac donv mbuo maiv dungx baaix miuc-fangx hnangv ninh mbuo maaih deix mienh baaix nor. Ging-Sou fiev jienv gorngv, “Ninh mbuo zueiz jienv nyanc zueiz jienv hopv, yiem wuov saanx.” Mbuo maiv dungx zoux maiv luonx horngc nyei sic hnangv ninh mbuo maaih deix mienh zoux nor, cingx daaih yietc hnoi hnangv maaih i waanc buo cin dauh mienh zuqc daic. Mbuo maiv dungx seix Ziouv hnangv ninh mbuo maaih deix mienh seix nor, cingx daaih zuqc naang hoic daic. Mbuo maiv dungx la'ngopv hnangv ninh mbuo maaih deix mienh la'ngopv ziouc zuqc mietc maengc wuov dauh fin-mienh mietc mi'aqv. 2 Ko^lin^to 6:14-7:1 “Sienx nyei mienh caux maiv sienx nyei mienh maiv dungx jiu doic. Kuv sic caux waaic sic, hnangv haaix nor haih jiu tong? Njang caux hmuangx hnangv haaix nor haih juangc yiem? Giduc caux Mbe^liân hnangv haaix nor haih da'goih? Sienx nyei mienh caux maiv sienx nyei mienh maaih haaix nyungc juangc jienv nyei buonc? Tin-Hungh nyei singx dinc caux miuc-mienv hnangv haaix nor haih doix dongh? Weic zuqc yie mbuo zoux ziangh jienv nyei Tin-Hungh nyei singx dinc. Hnangv Tin-Hungh gorngv nor, “Yie oix caux yie nyei baeqc fingx yiem, oix yiem ninh mbuo mbu'ndongx. Yie oix zoux ninh mbuo nyei Tin-Hungh, ninh mbuo yaac oix zoux yie nyei baeqc fingx.” Weic naaiv Ziouv gorngv, “Meih mbuo yiem ninh mbuo mbu'ndongx, oix zuqc cuotv daaih.


Oix zuqc caux ninh mbuo bun nqoi. Maiv dungx muoqv maaih uix nyei ga'naaiv, yie ziouc zipv meih mbuo aqv.” “Yie oix zoux meih mbuo nyei Die, meih mbuo ziouc benx yie nyei naamh nyouz. Nernh jiex nyei Tin-Hungh hnangv naaiv nor gorngv.” Hnamv nyei gorx-youz aac, Tin-Hungh laengz naaiv deix waac bun mbuo, mbuo ziouc oix zuqc zoux cing-nzengc nyei. Haaix nyungc bun mbuo nyei sin, mbuo nyei hnyouv maiv cing-nzengc oix zuqc simv nqoi. Oix zuqc gamh nziex Tin-Hungh ziouc zoux cing-nzengc taux daauh. 1 Yo^han 5:21 “Hnamv nyei fu’jueiv aac, meih mbuo oix zuqc faix fim beu jienv ganh, maiv dungx mingh coiv miuc-mienv aqv.” Gong-Zoh 15:20 “Mv baac mbuo oix zuqc fiev fienx mbuox ninh mbuo gec maiv dungx nyanc ziec jiex miuc-mienv ziouc maaih uix nyei ga'naaiv, maiv dungx zoux maiv luonx horngc nyei sic, maiv dungx nyanc naeqc jaang daic nyei saeng-kuv orv, yaac maiv dungx nyanc nziaamv.” Gaa^laa^tie 6:7-10 “Maiv dungx nduov ganh. Maiv maaih haaix dauh haih nduov duqv Tin-Hungh. Mienh zuangx haaix nyungc ziouc siou duqv wuov nyungc. Se gorngv mienh sueih ganh nyei hnyouv hanc zoux se hnangv zuangx nyim njiec ndau nor, siou daaih nyei se bun ninh zuqc daic. Mv baac mienh ei Singx Lingh zuangx, Singx Lingh ziouc bun ninh siou daaih nyei se yietc liuz nyei maengc. Zoux kuv sic maiv dungx hnyouv namx. Se gorngv mbuo maiv tuix nor, taux ziangh hoc mbuo ziouc maaih siou-sengh. Hnangv naaic, haaix zanc maaih qangx, mbuo oix zuqc zoux kuv sic tengx zuangx mienh. Lengc jeiv nyei oix zuqc tengx weic sienx Yesu benx yietc biauv mienh wuov deix.” M. Zaah Mangc Ging-Sou Nyei Waac Lomaa 14:20-21 gorngv, “Maiv dungx laaix nyanc hopv zoux waaic Tin-Hungh nyei gong. Yaac gorngv, “Haaix nyungc nyanc hopv ga’naaiv maiv maaih uix mv baac haih nduov mienh baamz zuiz maiv horpc zuqc nyanc.” Gong-Zoh 15:20 yaac gorngv, “Maiv dungx nyanc ziec jiex miuc-mienv ziouc maaih uix nyei ga’naaiv.” Hnangv naaiv bun cing nyanc hopv nyei ga’naaiv, maaih deix maaih uix, maaih deix mv maaih uix. Mv maaih uix nyei ga’naaiv,


mv baac corc haih nduov mienh baamz zuiz nyei, hnangv naaic haaix nyungc ga’naaiv dongh haih nduov mienh baamz zuiz nyei wuov deix maiv horpc zuqc nyanc. Weic zuqc yiem 1 Ko^lin^to 8:13 wuov mengh-mengh nyei gorngv, “Wuov nyungc, se gorngv nyanc hopv haih nduov yie nyei gorx-youz baamz zuiz, yie ziouc yietc liuz maiv nyanc orv aqv. Nzauh heix nduov yie nyei gorx-youz baamz zuiz” Ninh nyei eix-leiz se gorngv, maiv gunv orv fai haaix nyungc ga’naaiv dongh haih nduov mienh zoux dorngc Tin-Hungh nyei jauv, mbuo maiv horpc zuqc zoux. Mbuo sienx gorngv, kungx orv ganh hnangv nor, maiv haih bun mbuo baamz zuiz, fai nduov mbuo baamz zuiz fai zoux dorngc Tin-Hungh. Mbuo zoux dorngc Tin-Hungh fai baamz zuiz nyei jauv weic mbuo zoux nyei sic. Se hnangv mbuo mingh nyanc sipv jiex mienv nyei orv fai mingh nyanc orv hopv diuv nyei jauv, laaix mbuo zoux bun dieh dauh zuotc jienv zoux waaic, zoux dorngc Tin-Hungh. Se maiv zeiz gorngv orv haih nduov mienh baamz zuiz, se mienh ganh zoux cuotv. N. Maaih Uix Nyei Nyanc Hopv Ga’naaiv Ei Gong-Zoh Sou gorngv nor, se dongh sipv jiex mienv nyei ga’naaiv, Gong-Zoh Sou gorngv mengh nyei, “ziec jiex miuc-mienv nyei ga’naaiv ziouc maaih uix aqv,” maaih uix nyei eix-leiz se benx laih hlopv nyei jauv, yiem Ging-Sou nyei waac gorngv maiv cing-nzengc nyei sic. Haih laih hlopv nyei sic se benx maiv cing-nzengc nyei jauv, yaac benx maaih uix nyei ga’naaiv. Mbuo baamh mienh gorngv laih hlopv nyei jauv fai laih hlopv nyei sic, mv baac Tin-Hungh nyei waac gorngv maiv cing-nzengc nyei jauv fai maaih uix nyei sic. Weic naaiv maaih deix dorngx Ging-Sou gorngv maiv cing-nzengc, maaih deix gorngv maaih uix, eix-leiz se laih hlopv nyei ga’naaiv fai laih hlopv nyei sic. Mienv se benx laih hlopv nyei ga’naaiv, weic naaiv Tin-Hungh cingx daaih gorngv, haaix dauh benx Tin-Hungh nyei mienh oix zuqc maiv dungx muoqv mienv nyei ga’naaiv, Tin-Hungh cingx daaih zipv wuov dauh. Tin-Hungh gorngv mbuox Tin-Hungh nyei baeqc fingx I^saa^laaên Mienh wuov zanc, Ninh hnangv naaiv nor gorngv, “Sienx nyei mienh caux maiv sienx nyei mienh maiv dungx jiu doic. Kuv sic caux waaic sic, hnangv haaix nor haih jiu tong? Njang caux hmuangx hnangv haaix nor haih juangc yiem? Giduc caux Mbe^liân hnangv haaix nor haih da'goih? Sienx nyei


mienh caux maiv sienx nyei mienh maaih haaix nyungc juangc jienv nyei buonc? Tin-Hungh nyei singx dinc caux miuc-mienv hnangv haaix nor haih doix dongh? Weic zuqc yie mbuo zoux ziangh jienv nyei Tin-Hungh nyei singx dinc. Hnangv Tin-Hungh gorngv nor, “Yie oix caux yie nyei baeqc fingx yiem, oix yiem ninh mbuo mbu'ndongx. Yie oix zoux ninh mbuo nyei Tin-Hungh, ninh mbuo yaac oix zoux yie nyei baeqc fingx.” Weic naaiv Ziouv gorngv, “Meih mbuo yiem ninh mbuo mbu'ndongx, oix zuqc cuotv daaih. Oix zuqc caux ninh mbuo bun nqoi. Maiv dungx muoqv maaih uix nyei ga'naaiv, yie ziouc zipv meih mbuo aqv.” “Yie oix zoux meih mbuo nyei Die, meih mbuo ziouc benx yie nyei naamh nyouz. Nernh jiex nyei Tin-Hungh hnangv naaiv nor gorngv.” Hnamv nyei gorx-youz aac, Tin-Hungh laengz naaiv deix waac bun mbuo, mbuo ziouc oix zuqc zoux cing-nzengc nyei. Haaix nyungc bun mbuo nyei sin, mbuo nyei hnyouv maiv cing-nzengc oix zuqc simv nqoi. Oix zuqc gamh nziex Tin-Hungh ziouc zoux cing-nzengc taux daauh. (2 Ko^lin^to 6:14-7:1). Ei naaiv douc Ging-Sou nyei waac nor, haiv dauh maiv guangc mienv nyei jauv fai muoqv sipv jiex mienv nyei ga’naaiv, fai nyanc sipv jiex mienv nyei ga’naaiv nyei mienh, mv haih duqv Tin-Hungh zoux Ziouv gunv ninh mbuo. Ei Tin-Hungh mangc se benx laih hlopv nyei mienh. Weic zuqc mienv se laih hlopv haic, Tin-Hungh funx mienv laih hlopv haic, se hnangv mbuo funx juv, caux ziex nyungc laih hlopv nyei saeng-kuv nor. Se gorngv mbuo mingh nyanc sipv jiex mienv nyei ga’naaiv nor, Tin-Hungh buatc mbuo hnangv mbuo buatc mbuo nyei fu’jueiv mingh nyanc juv nyanc jiex nyei ga’naaiv nor. Ging-Sou mengh-mengh nyei gorngv, haaix dauh sienx liuz Yesu aengx mingh nyanc sipv mienv nyei ga’naaiv, fai mingh zoux zinh ndaangc ninh maiv gaengh sienx Tin-Hungh nyei ziangh hoc, ninh zoux nyei sic, se hnangv juv nyanc ninh lov cuotv daaih nyei ga’naaiv nor (2 Bide 2:20-22). Weic naaiv mbuo sienx Yesu nyei mienh maiv horpc zuqc nyanc sipv jiex mienv nyei ga’naaiv. Gong-Zoh 15:20, 21:25 mengh-mengh nyei gorngv, “Mv dungx nyanc ziec jiex miuc-mienv ziouc maaih uix nyei ga’naaiv.” Hnangv naaiv mbuo za’gengh maiv horpc zuqc nyanc sipv mienv nyei ga’naaiv, se gorngv haiv dauh nyanc nor, wuov dauh baac-baac zoux baamz Tin-Hungh.


Mbuo yiem mienv nyei buoz-ndiev wuov zanc se mbuo benx laih hlopv nyei mienh, mv baac ih zanc mbuo yiem mienv nyei buoz-ndiev cuotv daaih aqv, mbuo benx Ziouv nyei mienh mi’aqv, Yesu nyei nziaamv yaac nzaaux mbuo benx cing-nzengc nyei mienh mi’aqv. Se gorngv mbuo aengx mingh nyanc sipv jiex mienv nyei ga’naaiv nor, se hnangv Bide Sou gorngv nor, “Juv aengx daaux nqaang nyanc ninh lov cuotv nyei ga’naaiv. Tengx dungz nzaaux liuz sin, dungz aengx daaux nqaang mingh guoqv njaangh.” ( 2 Bide 2:22). Zoux bun mienh maaih uix fai laih hlopv nyei ga’naaiv se maaih ziex nyungc ga’naaiv. Nyungc zeiv se hnangv, sipv jiex mienv nyei ga’naaiv, diuv, yaangh in, in-mbiaatc, nziaauc sieqv, nziaauc dorn, hienx auv, hienx nqox, zoux zaqv, mauv ga’naaiv, gorngv doqc mengh, gorngv waac-zaanc, nyanc nziaamv, yiem hnyouv hnamv cuotv waaic nyei jauv, naaiv deix yietc zungv se zoux bun mienh maaih uix nyei ga’naaiv. Mbuo Sienx Yesu Nyei Mienh Haih Nyanc Duqv Sipv Jiex Mienv Nyei Ga’naaiv Nyei Fai Mv Duqv? (Gong-Zoh 15:20, 21:25). Gorngv mengh nyei heuc, “Mv dungx nyanc ziec jiex miuc-mienv ziouc maaih uix nyei ga’naaiv.” Hnangv naaiv, mbuo za’gengh maiv horpc zuqc nyanc, se gorngv haiv dauh aengx nyanc se wuov dauh baac-baac zoux baamz Tin-Hungh hnangv. Se gorngv mbuo ngaengc Tin-Hungh nyei waac, maiv muangx nor, mbuo mv haih duqv bieqc Tin-Hungh nyei guoqv (1 Ko^lin^to 6:9-10). E^fe^so 5:18a gorngv, “Maiv dungx hopv diuv nquin. Diuv se bun mienh zoux waaic sic.” Nyungc-nyungc zoux waaic sic nyei jauv se laaix hopv diuv nyei jauv, naaiv yaac dorngc Tin-Hungh nyei leiz, mbuo maiv horpc zuqc zoux. Weic zuqc mienh hopv diuv nquin daaih nyei ziangh hoc, ziouc maiv haih gunv ganh nyei buonh sin aqv, yaac gorngv cuotv maiv benx nyei waac, yaac zoux maiv cing-nzengc nyei sic, gorngv waac-zaanc, caux ziex nyungc maiv lamh longc nyei jauv. Dongh Tin-Hungh nyei waac gorngv heuc benx Tin-Hungh nyei naamh nyuoz maiv horpc zuqc zoux nyei jauv. Ging-Sou gorngv, mbuo se benx yiem njang nyei mienh, weic naaiv mbuo maiv horpc zuqc zoux hnangv maiv sienx nyei mienh zoux nyei jauv (E^fe^so 5:1-20). Se gorngv mbuo zoux se hoic zuqc mbuo ganh, yaac bun mbuo ganh maiv haih duqv zipv Tin-Hungh nyei fuqv, 1 Ko^lin^to 6:9-10 gorngv, dongh diuv nquin nyei mienh caux zoux maiv luonx horngc nyei mienh maiv haih duqv bieqc Tin-Hungh nyei guoqv.


Aengx maaih nyungc Ging-Sou gorngv, “Meih mbuo hopv Ziouv Yesu nyei zaanv, maiv haih hopv mienv nyei zaanv,” (1 Ko^lin^to 10:21). Weic zuqc diuv se benx gengx mienv nyei ga’naaiv, maiv zeiz gengx Tin-Hungh nyei ga’naaiv, yiem Ging-Sou maaih camv-norm dorngx gorngv taux “hopv a’ngunc diuv nyei jauv,” mienh laaix duqv gorngv hopv duqv diuv nyei, dongh oix hopv diuv nyei mienh ziouc mbienv Ging-Sou nyei waac daaih gorngv hopv diuv se duqv nyei, daanh faanh mbuo maiv hopv nquin hnangv. O. Porv Mengh Taux Diuv Nyei Jauv Diuv yiem Ging-Sou nyei waac, eix-leiz se sui nyei ga’naaiv. Diuv naaiv joux waac nyei eix-leiz yiem Gikc waac caux Hipv^lu waac eix-leiz se gorngv sui nyei ga’naaiv, se maiv zeiz mbuo Iu-Mienh zanc-zanc hopv wuov nyei diuv. Loz-hnoi Janx-Iu longc a’ngunc biouv zoux daaih, ninh mbuo dorh a’ngunc biouv mingh opv zuoqc daaih, aengx dorh mingh njapc fai zaax ninh nyei wuom cuotv daaih hopv, ninh mbuo heuc “a’ngunc diuv.” Naaiv se a’ngunc biouv nyei wuom benx daaih, se maiv hnangv mbuo buatc mienh zanc-zanc hopv wuov nyungc diuv. Naaiv a’ngunc diuv yaac maiv haih zoux hoic mienh, se benx mv an bingv nyei biouv-wuom caux cingh wuom fai wuom-baec hnangv. Dongh Ging-Sou gorngv taux za’gengh diuv wuov deix waac, se benx hatc mbuo maiv horpc hopv fai longc nyei dorngx. Ging-Sou zorqv nyungc zeiv bun mbuo mangc dongh hopv diuv nyei mienh wuov deix zuqc dingc zuiz yaac buangh sic camv. Ging-Sou gorngv, hopv diuv fai diuv nquin nyei mienh se maiv zeiz mienh guai mienh. Ninh ganh maiv hiuv duqv zoux hoic ninh ganh, congh mengh sou gorngv, diuv se bun dongh buangh zuqc sic fai butv baengc daaih aav lamh daic aqv wuov nyungc mienh hopv, hopv liuz haih la’kuqv ninh mbuo nyei kouv naanc nzengc, mv baac gunv sic nyei mienh caux hungh diex maiv horpc zuqc hopv diuv (Congh Mengh Sou 31:4-7). P. Porv Mengh Taux Hopv Diuv Nyei Mienh (Matv^taai 15:10-20; Maako 7:14-23; Gong-Zoh 15:20). Dongh oix hopv diuv nyei mienh dorh naaiv deix Ging-Sou nyei waac daaih dengv ninh mbuo nyei buonc, ninh mbuo mbienv Yesu nyei waac daaih gorngv, “nyanc bieqc nzuih nyei ga’naaiv nyungc-nyungc se nyanc duqv nyei maiv haih zoux bun mienh maaih uix.


Mv baac ninh mbuo maiv bieqc hnyouv Yesu gorngv nyei waac, Yesu gorngv naaiv deix waac se weic laaix Faa^li^si Mienh gorngv nqemx Ninh nyei sai-gorx mbuo oix nyanc hnaangx yaac maiv ei jienv ninh mbuo nyei leiz nzaaux buoz nyei uix ndaangc, Yesu cingx daaih gorngv, nyanc bieqc nzuih nyei ga’naaiv, mv haih zoux bun mienh maaih uix. Se maiv zeiz gorngv buov in, hopv diuv, nyanc sipv jiex mienv nyei ga’naaiv nyei jauv.Yesu gorngv naaiv deix waac se laaix Faa^li^si Mienh ngopv Yesu nyei sai-gorx mbuo bun Yesu muangx, ninh mbuo gorngv, “Yesu nyei sai-gorx oix nyanc hnaangx yaac maiv ei jienv ninh mbuo nyei eih douh nzaaux buoz ndaang cingx daaih nyanc hnaangx” (Matv^taai 15:1-9; Maako 7:1-4). Maaih uix nyei eix-leiz se benx hoic mienh nyei buonh sin nyei ga’naaiv, fai hoic mienh nyei jauv. Maiv gunv zoux hoic mienh fai hoic zuqc ganh nyei buonh sin se benx maaih uix fai maiv cing-nzengc nyei jauv. Se gorngv saamx mangc ninh nyei eix-leiz nor, ndouv zinh nyei jauv se benx mauv nyaanh nyei jauv fai mauv ga’naaiv nyei jauv, buov in, hopv diuv se bieqc nzuih nyei ga’naaiv yaac zoux bun mienh, fai bun mbuo ganh benx baengc, naaiv yaac hoic mienh nyei jauv, yaac benx maaih uix nyei ga’naaiv. Nyanc nziaamv caux nyanc orv-nyiemz nyei jauv yaac benx maiv cing-nzengc nyei jauv, Tin-Hungh gorngv, nziaamv se benx maengc nyei gorn, mbuo maiv horpc zuqc nyanc nziaamv (Tin Deic Douh 9:1-4). Yiem Gong-Zoh Sou gorngv, mbuo oix zuqc gec, “Maiv dungx nyanc ziec jiex miuc-mienv ziouc maaih uix nyei ga’naaiv, maiv dungx zoux maiv luonx horngc nyei sic, maiv dungx nyanc naeqc jaang daic nyei saeng-kuv orv, yaac maiv dungx nyanc nziaamv”(Gong-Zoh 15:20) Q. Zangv Cing-Nzengc Nyei Jauv Weic zangv cing-nzengc nyei jauv se benx yietc nyungc longc jienv haic nyei leiz yiem Giduc nyei congh mengh leiz, mbuo Giduc Mienh mouz dauh maiv gunv gox lunx, maiv gunv m’jangc mienh fai m’sieqv mienh, oix zuqc zangv cing-nzengc nyei jauv yiem Jiu bang caux ganh nyei cai-doix gu’nyuoz. Sienx Yesu nyei mienh dauh dauh yaac zoux muoz-doic, juangc dauh Die, Tin-Hungh, yaac benx juangc biauv yiem nyei mienh. Hnangv naaic, mbuo cingx daaih maiv horpc zuqc zoux maiv lunx horngc nyei sic nziaauc sieqv, nziaauc dorn, hienx auv, hienx nqox nyei jauv, maiv dungx weic naaiv nyungc sic


zoux dorngc, fai ziqc zuiz mbuo nyei gorx-youz doic. Ging-Sou gorngv, “Tin-Hungh nyei eix se hnangv naaiv. Ninh oix meih mbuo zoux cing-nzengc, simv nqoi nziaauc sieqv nziaauc dorn nyei sic. Dauh dauh mienh oix zuqc hiuv duqv cing-nzengc nyei za'eix longc auv, taaih auv. Maiv dungx sueih ganh nyei hnyouv hanc zoux, hnangv maiv sienx Tin-Hungh wuov deix mienh zoux nor. Hnangv naaic, yiem naaiv deix sic, haaix dauh maiv dungx zoux dorngc fai ziqc zuiz ninh nyei gorx-youz. Naaiv deix waac zinh ndaangc yie mbuox jiex meih mbuo, yaac hniev-hniev nyei kuinx meih mbuo, weic zuqc haaix dauh zoux naaiv deix sic, wuov dauh ziouc zuqc Tin-Hungh dingc zuiz aqv. Tin-Hungh heuc mbuo daaih maiv zeiz weic zoux maiv cing-nzengc nyei. Ninh oix mbuo zoux cing-nzengc nyei. Hnangv naaic, haaix dauh nqemh naaiv deix njaaux nyei waac, wuov dauh maiv zeiz nqemh baamh mienh se nqemh Tin-Hungh, dongh ceix Singx Lingh bun meih mbuo wuov dauh.” (1 Te^saa^lo^ni^gaa 4:3-8). “Dauh dauh oix zuqc taaih dorng jaa nyei leiz, kungx longc ganh nyei auv nqox juangc coux bueix weic zuqc Tin-Hungh oix dingc yietc zungv nziaauc sieqv nziaauc dorn hienx auv hienx nqox nyei mienh nyei zuiz.” (Hipv^lu 13:4). “Ih zanc yie oix gorngv dongh zinh ndaangc meih mbuo fiev naaic wuov deix jauv-louc. M'jangc dorn maiv longc auv se longx nyei. Mv baac weic zuqc maaih hienx nyei sic camv, dauh dauh m'jangc dorn cingx daaih oix zuqc maaih ninh ganh nyei auv. Dauh dauh m'sieqv dorn oix zuqc maaih ninh ganh nyei nqox. Maiv dungx laanh zaanc laanh. Nqox oix zuqc nyunc ei ninh nyei auv, auv yaac oix zuqc nyunc ei ninh nyei nqox. Weic zuqc auv ganh maiv maaih leiz gunv ganh nyei sin, se ninh nyei nqox gunv. Fih hnangv nyei, nqox ganh yaac maiv maaih leiz gunv ganh nyei sin, se ninh nyei auv gunv. Maiv dungx laanh zaanc laanh maiv juangc coux bueix, cuotv liuz i hmuangv dongh hnyouv dingc maiv juangc bueix i ziex hnoi weic longc ziangh hoc daux gaux. Jiex liuz naaiv deix. ziangh hoc oix zuqc aengx juangc coux bueix. Nzauh heix ganh gunv maiv duqv ganh ziouc zuqc Saadaan nduov meih baamz zuiz. (1 Ko^lin^to 7:1-5). Weic zangv cing-nzengc nyei jauv, Ging-Sou gorngv, “Hnangv naaic, yiem naaiv deix sic, haaix dauh maiv dungx zoux dorngc fai ziqc zuiz ninh nyei gorx-youz. Naaiv deix waac zinh ndaangc yie mbuox jiex meih mbuo, yaac hniev-hniev


nyei kuinx meih mbuo, weic zuqc haaix dauh zoux naaiv deix sic, wuov dauh ziouc zuqc Tin-Hungh dingc zuiz aqv.” (1 Te^saa^lo^ni^kaa 3:6). Tin-Hungh nyei lingc gorngv, “Maiv dungx mueic jieqv mienh nyei jaa-dingh. Maiv dungx mueic jieqv mienh nyei auv, mienh nyei nqox, mienh nyei nouh gauv nouh beiz, mienh nyei ngongh fai lorh fai ninh maaih nyei haaix nyungc ga’naaiv.” (Cuotv I^yipv 20:17). Weic zangv cing-nzengc nyei jauv, Ziouv Yesu gorngv, “Haaix dauh buatc dauh m'sieqv dorn yaac haiz hanc, se dorngx yiem hnyouv hienx liuz aqv. Hnangv naaic, se gorngv meih nyei mbiaauc bung m'zing nduov meih zoux zuiz, oix zuqc gueix guangc. Meih nyei sin waaic fangx corc gauh longx jiex meih nyei ziangh sin zuqc ndortv deic nyuoqc. Gorngv hnangv meih nyei mbiaauc jieqv buoz bun meih baamz zuiz, oix zuqc hngaqv guangc. Zoqc jieqv buoz corc gauh longx meih nyei ziangh sin zuqc ndortv deic nyuoqc.” (Matv^taai 5:28-30). Weic zangv cing-nzengc nyei jauv, yiem mbuo Giduc Mienh gu’nyuoz, mbuo maiv horpc zuqc ceux buang-liouh nyei sic, yaac maiv horpc zuqc gorngv haaix nyungc pa’li paix laaix nyei waac, se hnangv, kanv tien, gorngv waac-zaanc, caux maiv lomh longc nyei haaix nyungc waac. Dauh dauh Giduc Mienh oix zuqc hiuv duqv gunv goux ganh nyei buonh sin caux ganh nyei hmuangv doic, yaac oix zuqc zangv dorng-jaa nyei leiz. Maiv dungx sueih ganh nyei hnyouv hanc zoux maiv cing-nzengc nyei sic. Ging-Sou gorngv, haaix nyungc maiv cing-nzengc se maiv haih duqv bieqc Tin-Hungh nyei guoqv.(1 Ko^lin^to 6:9-11). Mienh leih auv, leih nqox nyei jauv se weic laaix cai-doix laanh maiv ziepc zuoqc bun laanh nyei jauv, Yesu nuqv nzuonx Tin-Hungh zeix lungh zeix ndau nyei ziangh hoc bun mienh mangc, dongh Tin-Hungh zeix daaih nyei ziangh hoc, mienh maiv leih auv leih nqox, mienh leih auv leih nqox nyei ziangh hoc se yiem Moses nyei lungh ndiev, se laaix mienh hnyouv ngaengc, laanh maiv mbuoqc laanh, laanh maiv ziouc laanh oix leih doic, Tin-Hungh cingx daaih mbuox Mose mbuox nqox oix zuqc bun zeiv leih cai sou ninh nyei auv, bun cing ninh nyei auv benx bungx nqox nyei mienh mi’aqv, se maiv zeiz gorngv Tin-Hungh bun leiz mienh guangc auv, guangc nqox, fai leih auv, leih nqox. Mv baac dongh mienh oix leih auv, leih nqox wuov deix nor, ninh mbuo dorh naaiv joux waac daaih longc, dongh gorngv “bun zeiv leih cai sou auv liuz, ziouc heuc auv mingh aqv.”


Da’faam Ginc Dorng Jaa Nyei Leiz-Fingx A. Cai-Doix Nyei Leiz-Fingx Dorng jaa nyei jauv se Tin-Hungh orn daaih, loz-hnoi Tin-Hungh zeix lungh zeix ndau, zeix Aa^ndam wuov zanc Tin-Hungh yaac gorngv, “Nduqc laanh mienh ganh yiem hnangv se maiv horpc. Yie aengx oix zeix dauh daaih puix ninh, caux ninh zoux doic tengx ninh.” (Tin Deic Douh 2:18). Tin-Hungh bun Aa^ndam bueix m’njormh ndo nyei, ziouc zorqv diuh Aa^ndam nyei la’saengx mbungv cuotv daaih. Tin-Hungh aengx zoux benx dauh m’sieqv dorn daaih bun Aa^ndam longc zoux auv, Tin-Hungh dorh mingh taux Aa^ndam wuov, Aa^ndam ziouc gorngv, “Dongh naaiv aqv. Mbungv yaac yie nyei mbungv benx daaih. Orv yaac yie nyei orv benx daaih. Oix zuqc tengx ninh cuotv mbuox heuc m'sieqv dorn, weic zuqc ninh yiem m'jangc dorn cuotv daaih.” Weic naaiv m'jangc dorn dorng jaa, leih ninh nyei diex maac, caux jienv ninh nyei auv benx yietc dauh mi'aqv. Naaiv dauh m'jangc dorn caux ninh nyei auv laengh gaengv nyei yiem mv baac laanh maiv nyaiv laanh.(Tin Deic Douh 2:23-25). Cai-doix se Tin-Hungh gapv daaih, dorng jaa nyei jauv se Tin-Hungh liepc daaih, loz hnoi Tin-Hungh ganh tengx mbuo baamh mienh orn jaa daaih. Weic naaiv, Tin-Hungh maiv iqv congh mbuo baamh mienh haiv dauh leih cai-doix. Tin-Hungh gorngv, “Yie nouz haic leih cai-doix nyei jauv, yaac nzorng haic mienh zeix ganh nyei auv.” Nernh Jiex nyei Ziouv hnangv naaiv nor gorngv. Weic naaiv meih mbuo oix zuqc faix fim gunv jienv meih ganh nyei hnyouv. Maiv dungx maiv ziepc zuoqc nyei zoux (Maa^laa^ki 2:16). Ziouv Yesu yaac fih hnangv nyei njaaux gorngv, maiv dungx leih auv leih nqox. Ninh gorngv, leih auv leih nqox nyei jauv se laaix mienh nyei hnyouv hlo, mauv hienx auv, hienx nqox nyei jauv cingx daaih leih hnangv. Yesu gorngv, “Haaix dauh leih ninh nyei auv oix zuqc fiev zeiv leih cai sou bun jienv ninh. Mv baac ih zanc yie mbuox meih mbuo, haaix dauh leih ninh nyei auv yaac maiv zeiz laaix ninh nyei auv hienx nqox, wuov dauh auv aengx longc ganh dauh zoux nqox, wuov dauh auv ziouc hienx nqox mi'aqv. Ninh nyei loz-nqox hoic ninh zoux hienx nqox nyei mienh. Haaix dauh longc wuov dauh auv-leih yaac hienx auv aqv” (Matv^taai 5:31-32).


Yesu yaac aengx gorngv, se gorngv haaix dauh longc mienh nyei auv-leih se ninh yaac benx hienx auv nyei mienh aqv, haiv dauh leih ninh nyei auv se hoic ninh nyei auv benx hienx nqox nyei mienh. Giduc Mienh maiv horpc zuqc leih auv leih nqox nyei jauv (Matv^taai 19:1-10; Maako 10:1-12), Baulo fin-saeng yaac fih hnangv nyei njaaux mienh, maiv dungx leih auv leih nqox (1 Ko^lin^to 7:10-11).Ging-Sou gorngv, heuc i hmuangv laanh oix zuqc nyunc ei laanh, laanh maiv dungx zoux zaanc laanh (1 Ko^lin^to 7:1-5). Se gorngv mbuo laanh zoux zaanc laanh yaac laanh maiv nyunc ei laanh nor, mbuo ziouc zuqc Saa^dan nduov mbuo baamz zuiz aqv. Auv nqox gu’nyuoz Tin-Hungh funx se benx cing-nzeng nyei, mv baac Tin-Hungh oix siemv dongh hienx auv hienx nqox nyei mienh (Hipv^lu 13:4). Weic zuqc hienx auv hienx nqox nyei jauv se maiv zeiz Tin-Hungh nyei za’eix. B. Nqox Nyei Leiz-Fingx Dongh Tin-Hungh zeix Haa^waa wuov zanc, Tin-Hungh zoux bun Aa^ndam m’njormh mingh ziouc zorqv diuh Aa^ndam nyei la’saengx mbungv cuotv daaih, Tin-Hungh ziouc aengx zoux benx dauh m’sieqv dorn daaih, aengx dorh naaic dauh m’sieqv dorn mingh jiu bun Aa^ndam. Aa^ndam ziouc gorngv, “Dongh naaiv aqv. Mbungv yaac yie nyei bungv benx daaih. Orv yaac yie nyei orv benx daaih, oix zuqc tengx ninh cuotv mbuox heuc m’sieqv dorn.”( Tin-Deic Douh 2:23) Yiem naaic daaih, m’jangc dorn zipv duqv auv daaih, ziouc maaih hnamv auv nyei hnyouv, weic zuqc auv se nqox nyei la’saengx mbungv benx daaih, m’sieqv dorn se yiem m’jangc dorn nyei buonh sin cuotv daaih. Weic naaiv, auv oix zuqc taaih ganh nyei nqox, yaac oix zuqc mbuoqc ganh nyei nqox. Hnangv Ging-Sou gorngv nor, “Meih mbuo zoux auv nyei mienh aah! Meih mbuo oix zuqc mbuoqc ganh nyei nqox hnangv meih mbuo mbuoqc Ziouv Yesu wuov nor. Weic zuqc nqox zoux auv nyei m'nqorngv hnangv Giduc zoux jiu-baang nyei m'nqorngv wuov nor. Jiu-baang zoux Giduc nyei sin, Giduc yaac zoux jiu-baang nyei Njoux Ziouv. Jiu-baang hnangv haaix nor mbuoqc Giduc, auv yaac oix zuqc hnangv wuov nor yiem maanc sic mbuoqc ninh nyei nqox.” (E^fe^so 5:22-24). Ging-Sou yaac fih hnangv nyei borqv jienv gorngv, “Zoux auv nyei mienh aah! Oix zuqc mbuoqc ganh nyei nqox. Hnangv naaiv zoux se puix sienx Yesu nyei mienh.” (Ko^lo^si 3:18).


Maiv daan mbuoqc naaiv hnangv, Ging-Sou yaac aengx gorngv, “Meih mbuo zoux auv nyei mienh yaac fih hnangv nyei oix zuqc mbuoqc ganh nyei nqox. Hnangv naaic, haaix dauh nqox maiv gaengh sienx Tin-Hungh nyei doz, ninh nyei auv zoux nyei sic ziouc bun ninh oix sienx, liemh maiv zuqc kuinx yietc joux. Weic zuqc nqox buatc yiem auv zoux nyei nyungc-nyungc sic taaih nqox yaac cing-nzengc nyei. Meih mbuo zorng nzueic maiv dungx kungx zorng beih zangc, gitv mba'biei-mbinz, zorng jiem zorng nyaanh, zuqv ciouh dunc nyei lui-houx. Daaux nzuonx oix zuqc zorng gu'nyuoz hnyouv, se oix zuqc hnyouv suonc hnyouv ndaauv. Naaiv se zorng nzueic yaac yietc liuz maiv haih zitc. Ei Tin-Hungh mangc yaac jaaix haic. Zinh ndaangc gan longx Tin-Hungh, sienx kaux ninh wuov deix m'sieqv dorn hnangv naaiv nor zorng nzueic. Ninh mbuo mbuoqc ganh nyei nqox gunv, hnangv Saalaa muangx Apc^laa^ham nor, heuc Apc^laa^ham zoux ninh nyei ziouv. Se gorngv meih mbuo zoux horpc yaac maiv gamh nziex haaix nyungc, meih mbuo ziouc zoux ninh nyei sieqv.” (1 Bide 3:1-6). Nqox nyei leiz-fingx se, se gorngv haaix dauh nqox ziangh horngh, zoux kuv sic, goux longx auv-jueiv hmuangv doic nyei mienh wuov deix, auv oix zuqc taaih ganh nyei nqox, yaac oix zuqc mbuoqc ninh. Mbuoqc nqox taaih nqox nyei jauv se, maiv zeiz gorngv nqox heuc mbuo mingh maaiz diuv, maaiz yangh in, fai heuc mbuo mingh hienx nqox, fai zoux haaix nyungc waaic nyei jauv, mbuo yaac oix zuqc muangx, oix zuqc mbuoqc ninh. Mbuoqc nqox nyei jauv se dongh nqox dorh mbuo hmuangv doic yangh horpc nyei jauv, fai njaaux mbuo mingh horpc nyei jauv hnangv. Zorqv nyungc zeiv, se gorngv mbuo benx sienx Yesu nyei mienh, taux leiz-baaix hnoi, mbuo oix zuqc mingh zoux leiz-baaix aqv, mv baac mbuo nyei nqox oix mbuo mingh maaiz in bun ninh buov, maaiz diuv bun ninh hopv, fai oix mbuo caux ninh mingh ndouv zinh, maiv bun mbuo mingh zoux leiz-baaix, yiem naaiv nyungc jauv nor, mbuo maiv haih taaih ninh, yaac maiv haih mbuoqc ninh. C. Auv Nyei Leiz-Fingx Auv nyei leiz-fingx se nqox oix zuqc hnamv auv, yaac oix zuqc zoux longx bun auv, laengc jeiv nyei mbuo Giduc Mienh horpc zuqc laanh zoux longx bun laanh, laanh horpc zuqc hnamv laanh, maiv


gunv maiv zeiz auv nqox mbuo zungv horpc zuqc laanh hnamv laanh. Mv baac mbuo corc maaih deix Yesu mienh yaac mborqv auv mborqv nqox nyei, mbuo maiv ei Tin-Hungh njaaux nyei waac zoux. Weic naaiv cingx daaih maaih ziex nyungc waaic sic cuotv yiem mbuo Giduc Mienh nyei hmuangv zong gu’nyuoz. Se gorngv mbuo maaih Tin-Hungh nyei waac njaaux mbuo, mbuo corc maiv oix zoux horpc nyei jauv wuov nyungc, maaih haaix nyungc aengx haih tengx mbuo zoux longx duqv? Cuotv liuz Tin-Hungh nyei waac mbuo zungv maiv muangx wuov nyungc, aengx maaih haaix nyungc waac bun mbuo faaux duqv muangx? Mbuo Giduc Mienh horpc zuqc laanh zoux longx bun laanh, hnangv Tin-Hungh nyei waac njaaux mbuo zoux nor. Ging-Sou duqv njaaux gorngv dongh zoux nqox nyei dauh dauh mienh. “Fih hnangv nyei oix zuqc hnamv ganh nyei auv hnangv hnamv ganh nor. Haaix dauh hnamv ganh nyei auv ziouc hnamv ninh ganh aqv” (E^fe^so 5:28). Mbuo dauh dauh mienh yaac maiv mborqv jiex ganh nyei buonh sin, mv baac kungx oix goux longx nyei hnangv, se gorngv mbuo nyei buonh sin maaih dorngx mun nor, mbuo ziouc oix longc hnyouv nyei lorz ndie daaih zorc, weic oix bun longx siepv. Yaac fih hnangv nyei, Ging-Sou njaaux mbuo gorngv, nqox oix zuqc hnamv ganh nyei auv, yaac oix zuqc goux longx ninh, maiv dungx hemx ninh, mborqv ninh, zioux ninh, weic zuqc auv se benx buonc mbuo ganh nyei sin, Giduc mienh cin-maanc maiv dungx mborqv auv, maiv dungx daix auv. Dongh hnamv auv nyei mienh, duqv zinh nyaanh nyei ziangh hoc, caux maaih nyanc, maaih hopv, maaih longc nyei haaix nyungc ga’naaiv, ziouc oix zuqc bun nqox longc, liemh fu’jueiv hmuangv doic dauh dauh yaac fih hnangv nyei oix zuqc goux ninh mbuo. Aengx maaih waac gorngv, “Zoux nqox nyei mienh aah! Oix zuqc hnamv ganh nyei auv hnangv Giduc hnamv jiu-baang, yaac weic jiu-baang siev ninh ganh nyei maengc.” (E^fe^so 5:25). Hnangv naaic se gorngv auv qiemx zuqc longc haaix nyungc, nqox yaac horpc zuqc siev jienv qaqv, guangc jienv ziangh hoc mingh lorz bun auv, dongh ninh qiemx zuqc longc nyei ga’naaiv. Nqox se horpc zuqc zoux gong yungz hmuangv doic, yaac maiv dungx korh fiqv zoux gong lorz nyanc nyei ziangh hoc nyei qaqv. Weic oix zuqc hnamv taux hmuangv doic qiemx zuqc nyei jauv, zoux nqox, fai zoux die nyei mienh oix zuqc ziux goux ganh nyei hmuangv doic, yaac hnamv ninh mbuo.


Se gorngv nqox hnamv auv, hnangv Giduc hnamv Jiu-Baang nor, wuov buonc mienh ziouc maaih orn-lorqc aqv, yietc dingc maiv buangh hiuang-orqv nyei sic, kungx maaih njien-youh baengh orn nyei jauv hnangv. Ging-Sou yaac gorngv, nqox se zoux m’nqorngv, m’nqorngv nyei eix-leiz se oix zuqc maaih hnyouv guaax taux hmuangv doic auv-jueiv, hnangv haaix nor, qiemx zuqc haaix nyungc, yaac oix zuqc liuc leiz ziux goux hmuangv doic qiemx zuqc nyei jauv, nyanc hopv jauv fai ndorm zinh nziouv hmuangx nzaic zingh nyei nyungc-nyungc jauv. Zoux nqox fai zoux die nyei mienh oix zuqc liuc leiz ziux goux ganh nyei hmuangv doic. E^fe^so 5:25-33 gorngv, “Zoux nqox nyei mienh aah! Oix zuqc hnamv ganh nyei auv hnangv Giduc hnamv jiu-baang, yaac weic jiu-baang siev ninh Nyei Maengc weic bun jiu-baang cing-nzengc daaih. Ninh longc wuom yaac longc ninh nyei doz nzaaux jiu-baang weic zorqv jiu-baang fungx bun ninh ganh, benx njang-laangc nyei jiu-baang, maiv laih hlopv, maiv nyauc, maiv waaic fangx, mv baac cing-nzengc nyei, maiv lamh daanh dorngx nyei jiu-baang. Fih hnangv nyei, nqox oix zuqc hnamv ganh nyei auv hnangv hnamv ganh nyei sin nor. Haaix dauh hnamv ganh nyei auv ziouc hnamv ninh ganh aqv. Maiv maaih haaix dauh nzorng ganh nyei sin, zungv uix longx yaac goux jienv hnangv Giduc goux jiu-baang wuov nor. Weic zuqc mbuo dauh dauh zoux Giduc nyei sin nyei yietc nyungc. Hnangv Ging-Sou fiev jienv gorngv naaiv joux waac, “Weic naaiv m'jangc dorn dorng jaa, leih ninh nyei diex maac, caux jienv ninh nyei auv benx yietc dauh mi'aqv.” Yiem naaiv deix waac gu'nyuoz maaih diuh hlo haic nyei zien leiz ih zanc mbiaangx yaangh cuotv daaih aqv. Ei yie ganh mengh baeqc nor, naaiv deix waac gorngv zuqc Giduc caux jiu-baang. Mv baac naaiv deix waac yaac gorngv zuqc meih mbuo. Meih mbuo dauh dauh zoux nqox nyei mienh oix zuqc hnamv ganh nyei auv hnangv hnamv ganh nor. Auv yaac oix zuqc taaih ganh nyei nqox. Yiem Ko^lo^si 3:19 “Zoux nqox nyei mienh aah! Oix zuqc hnamv ganh nyei auv, yaac maiv dungx zoux doqc ninh mbuo.” Yiem 1 Bide 3: 7 “Meih mbuo zoux nqox nyei mienh yaac oix zuqc fih hnangv nyei hiuv duqv korh lienh ganh nyei auv, weic zuqc m'sieqv dorn gauh mau m'jangc dorn. Yaac oix zuqc taaih auv


weic zuqc ninh mbuo caux meih mbuo fih hnangv nyei duqv Tin-Hungh ceix bun nyei en, se duqv nzipc yietc liuz nyei maengc. Oix zuqc hnangv naaiv nor zoux weic maiv bun haaix nyungc laanh meih mbuo daux gaux nyei waac.” Yiem 1 Ti^mo^tai 5:8 “Se gorngv haaix dauh maiv goux ganh nyei cien-ceqv, lengc jeiv goux ganh nyei hmuangv doic, wuov dauh se ngaengc zien doz aqv. Ninh zungv gauh waaic jiex maiv sienx Yesu nyei mienh.” Liuc leiz ziux goux hmuangv doic auv-jueiv se benx jienv haic nyei gong, maiv gunv mbuo benx haaix nyungc mienh, zoux mienh gox dorh jiu-baang fai benx jiu-baang nyei mienh yaac fih hnangv nyei, mbuo m’daaih zoux beiv zeiv dorh hmuangv doic, mbuo yaac oix zuqc maaih kuv nyungc zeiv fai longx nyei nyungc zeiv bun mbuo nyei fu’jueiv, hmuangv doic. 1 Ti^mo^tai 3:1-13 “ Naaiv joux waac se za'gengh zien nyei. “Haaix dauh maaih hnyouv oix zoux jiu-baang nyei mienh gox, wuov dauh oix zoux nyei se longx haic nyei gong.” 2 Jiu-baang nyei mienh gox oix zuqc zoux maiv maaih dorngx daanh nyei mienh, longc nduqc dauh auv, haih zanv ganh, gunv duqv ganh, zoux dorh leiz nyei mienh, maaih hnyouv zipv kaeqv, yaac haih njaaux mienh. 3 Ninh maiv hengx hopv diuv, maiv zoux ciouv mborqv mienh, hnyouv suonc nyei, maiv oix caux mienh nzaeng jaax, yaac maiv mauv nyaanh. 4 Oix zuqc haih gunv duqv longx ganh nyei hmuangv doic, njaaux ganh nyei fu'jueiv taaih ninh, muangx ninh nyei waac. 5 Haaix dauh mienh maiv haih gunv duqv ganh nyei hmuangv doic ninh hnangv haaix nor haih goux Tin-Hungh nyei jiu-baang? 6 Siang-sienx nyei mienh maiv horpc zuqc zoux jiu-baang nyei mienh gox. Nzauh heix ninh haih ceng-hlo ziouc zuqc dingc zuiz hnangv mienv nyei hungh zuqc dingc zuiz wuov nor. 7 Zoux mienh gox nyei mienh oix zuqc dongh jiu-baang ga'nyiec nyei mienh funx mengh hoc longx nyei mienh, ninh ziouc maiv zuqc mienh daanh yaac maiv zuqc mienv nyei hungh zaeng koux hlopv ninh. 8 Jiu-baang nyei borng-buoz mienh fih hnangv nyei oix zuqc maaih mengh dauh longx nyei, gorngv nyei waac haih kaux duqv wuonv nyei, maiv hengx hopv diuv, yaac maiv mauv baeqc zoih. 9 Ninh mbuo oix zuqc sienx wuonv Tin-Hungh bun mbiaangx yaangh cuotv daaih nyei doz, bun ganh nyei hnyouv maiv lamh guaix ganh. 10 Haaix dauh oix


zoux borng-buoz mienh oix zuqc seix ninh mbuo ndaangc. Buatc ninh mbuo maiv maaih dorngx daanh nor, gunv paaiv ninh mbuo zoux naaiv nyungc gong aqv. 11 Ninh mbuo nyei auv yaac fih hnangv nyei oix zuqc maaih mengh dauh longx, maiv gorngv waac-huv, haih zanv duqv ganh, yiem maanc sic yaac zoux hnyouv zingx nyei mienh. 12 Borng-buoz mienh oix zuqc longc nduqc dauh auv hnangv, yaac haih gunv duqv longx ganh nyei fu'jueiv caux biauv zong mienh. 13 Ninh mbuo zoux duqv gong longx ziouc duqv mienh taaih yaac yietc zei sienx longx, bungx laangc nyei zunh Giduc Yesu nyei doz. E^fe^so 6:4 “Zoux die nyei mienh aah! Maiv dungx cuoqv meih mbuo nyei fu'jueiv qiex jiez. Oix zuqc ei Ziouv Yesu nyei leiz dorh longx fu'jueiv, njaaux ninh mbuo muangx waac.” Ko^lo^si 3:21 “ Zoux die nyei mienh aah! Maiv dungx cuoqv meih mbuo nyei fu’jueiv. Nzauh heix ninh mbuo nyei hnyouv namx.” Ging-Sou aengx njaaux gorngv, “Meih mbuo zoux nqox nyei mienh yaac oix zuqc fih hnangv nyei hiuv duqv korh lienh ganh nyei auv, weic zuqc m’sieqv dorn gauh mau m’juangc dorn. Yaac oix zuqc taaih auv, weic zuqc ninh caux meih mbuo fih hnangv nyei duqv Tin-Hungh ceix bun nyei en, se duqv nzipc yietc liuz nyei maengc. Oix zuqc hnangv naaiv nor zoux weic maiv bun haaix nyungc laanh meih mbuo nyei daux gaux waac” (1 Bide 3:7). Oix zuqc hiuv duqv korh lienh auv nyei eix-leiz, se oix zuqc bieqc hnyouv auv nyei jauv, weic zuqc m’sieqv dorn nyei buonh sin se gauh mau m’jangc dorn, weic naaiv Tin-Hungh cingx daaih njaaux taux zoux nqox nyei mienh oix zuqc hnamv ganh nyei auv. Ziux naaiv joux waac njaaux nor, nqox gengh oix zuqc hnamv ganh nyei auv, yaac oix zuqc ziux goux ninh, weic zuqc ninh maiv ndongc m’jangc dorn henv. Nqox maiv horpc zuqc aapv auv zoux hniev haic jiex ndaangc qaqv nyei gong, mangc haaix nyungc gong hniev maiv dungx hoic auv zoux, haaix nyungc gong heng yaac hungh hec nor, cingx daaih bun auv zoux wuov nyungc gong. Se gorngv gong aqc, gong hniev nyei dorngx nor, nqox ganh oix zuqc mingh zoux, maiv gunv nqox gauh maaih lingc, fai maaih leiz jiex ndaangc auv yaac baac, nqox maiv horpc zuqc hoic auv fai aapv auv zoux hniev nyei gong. Weic zuqc Tin-Hungh maiv duqv zeix m’sieqv dorn daaih tengx m’jangc dorn zoux nouh, Tin-Hungh zeix m’sieqv dorn daaih weic tengx m’jangc dorn caux mbienz


m’jangc dorn hnangv, m’sieqv dorn fai auv se benx mbuo nyei mbienz-doic mienh hnangv, se maiv zeiz zoux mbuo nyei bou fai zoux mbuo nyei nouh. Dongh Tin-Hungh oix zeix Haa^waa wuov zanc, Tin-Hungh hnangv naaiv nor gorngv, “Nduqc laanh mienh ganh yiem hnangv se maiv horpc. Yie aengx oix zeix dauh daaih puix ninh, caux ninh zoux doic tengx ninh.” (Tin-Deic Douh 2:18), “Ziouv Tin-Hungh ziouc bun wuov dauh mienh bueix m'njormh ndo nyei. M'njormh wuov zanc, ninh zorqv diuh wuov dauh mienh nyei la'saengx mbungv aengx bun orv ziangh ndipc mi'aqv. Ziouv Tin-Hungh longc yiem m'jangc dorn zorqv cuotv wuov diuh la'saengx mbungv zoux benx dauh m'sieqv dorn, aengx dorh daaih taux m'jangc dorn wuov. Wuov dauh m'jangc dorn ziouc gorngv, “Dongh naaiv aqv. Mbungv yaac yie nyei mbungv benx daaih. Orv yaac yie nyei orv benx daaih. Oix zuqc tengx ninh cuotv mbuox heuc m'sieqv dorn, weic zuqc ninh yiem m'jangc dorn cuotv daaih.” Weic naaiv m'jangc dorn dorng jaa, leih ninh nyei diex maac, caux jienv ninh nyei auv benx yietc dauh mi'aqv. Naaiv dauh m'jangc dorn caux ninh nyei auv laengh gaengv nyei yiem mv baac laanh maiv nyaiv laanh.” (Tin-Deic Douh 2:21-25). Tin-Hungh yaac maiv longc m’jangc dorn nyei zaux-bienv mbungv fai camv-zuih mbungv zeix m’sieqv dorn, mv baac Tin-Hungh longc m’jangc dorn nyei la’saengx mbungv zeix m’sieqv dorn daaih. Naaiv bun cing m’sieqv dorn caux m’jangc dorn se fih mbaengc nyei, yaac weic benx m’jangc dorn nyei mbatc-nziu-gorn, se weic bun m’jangc dorn hnamv, se maiv zeix weic tengx m’jangc dorn zoux nouh. Weic naaiv, “Meih mbuo zoux nqox nyei mienh yaac oix zuqc fih hnangv nyei hiuv duqv korh lienh ganh nyei auv, weic zuqc m'sieqv dorn gauh mau m'jangc dorn. Yaac oix zuqc taaih auv weic zuqc ninh mbuo caux meih mbuo fih hnangv nyei duqv Tin-Hungh ceix bun nyei en, se duqv nzipc yietc liuz nyei maengc. Oix zuqc hnangv naaiv nor zoux weic maiv bun haaix nyungc laanh meih mbuo daux gaux nyei waac.” (1 Bide 3:7). Ei jienv naaiv douc Ging-Sou njaaux nyei waac, se gorngv mbuo zoux nqox nyei mienh maiv zoux longx bun mbuo nyei auv nor, zuov mbuo qiemx zuqc Tin-Hungh tengx mbuo nyei ziangh hoc, mbuo tov Tin-Hungh, Tin-Hungh yaac maiv muangx mbuo nyei daux gaux waac aqv, se gorngv mbuo oix longc Tin-Hungh tengx mbuo, fai oix duqv


Tin-Hungh dau mbuo nyei daux gaux waac nor, mbuo oix zuqc hiuv duqv korh lienh mbuo nyei auv, Tin-Hungh cingx daaih korh lienh mbuo zipv mbuo nyei daux gaux waac. Korh lienh auv nyei jauv se beiv hnangv loz-hnoi mbuo Iu-Mienh yiem mbong zangc yangh jauv mingh zoux gong nor, maaih ziex nzunc mbuo m’jangc dorn maaih deix kungx-buoz baeqc-zaux nyei mingh hnangv, yietc nyungc yaac maiv tengx mbuo nyei auv dorh, camv-zoqc bun ninh ganh nyiex hnangv. Mbuo Iu-Mienh loz-hnoi yiem mbong zangc nyei ziangh hoc, maiv hiuv duqv Tin-Hungh wuov zanc, mingh liangx, mingh ndeic zoux gong nzuonx, m’sieqv dorn maaih deix zorqv gu’nguaaz daaih nyiex jienv nza’hmien maengx, aengx zorqv zaangh, fai normh ziu daaih nyiex jienv nqa’haav maengx nzuonx, mv baac nqox maiv gunv maiv tengx yietc nyungc auv, maiv gunv auv ndongc haaix kouv yaac baac, nqox maiv maaih hnyouv hnamv taux gorngv oix zuqc korh lienh auv. Maiv daan mbuoqc naaiv hnangv, corc maaih gu’nguaaz yoc hopv nyox, aengx maaih jaa-dingh nyungc-nyungc gong yaac oix zuqc zoux, dongh naaiv deix gong yaac hniev haic aqv, mv baac nqox corc maiv guen maiv sic nyei yiem hnangv. Zoux nqox nyei mienh horpc zuqc hiuv duqv korh lienh ganh nyei auv, yaac hnamv auv, dongh auv zoux maiv hingh, zoux maiv duqv nyei dorngx, nqox horpc zuqc tengx jienv zoux, nqox zoux m’nqorngv nyei mienh oix zuqc haih hnamv. Aengx maaih nyungc longc jienv nyei gong, zoux nqox nyei mienh horpc zuqc hiuv, se gorngv lorz duqv zinh nyaanh nyei ziangh hoc, maiv dungx dorh mingh zaaux henh mbienx jauv, yaac maiv dungx kungx longc weic ganh nyei nza’hmien-buonc hnangv. Nqox oix zuqc hiuv duqv auv caux fu’jueiv nqiemx zuqc longc nyei jauv, se gorngv haaix zanc lorz duqv zinh nyaanh daaih nor, oix zuqc bun zoux buo gouv daaih longc, da’yietv gouv mbuo oix zuqc bun nzuonx Tin-Hungh, da’yietc gouv mbuo longc weic maaiz nyanc maaiz hopv caux goux jorm naamx nyei jauv, da’faam gouv mbuo longc weic maaiz hmuangv doic nyei lui houx lo haaix. Naaiv se gorngv taux mbuo Giduc Mienh nyei jaa-dingh jauv, caux leiz-fingx jauv, se gorngv mbuo ei jienv Tin-Hungh njaaux mbuo nyei waac zoux nor, mbuo ziouc oix maaih kuv-jaa-dingh, kuv hmuangv doic, Tin-Hungh yaac oix ceix fuqv bun mbuo. Aengx maaih nyungc longc jienv nyei jauv, se gorngv haaix zanc nqox lorz duqv zinh nyaanh daaih nyei ziangh hoc, se maiv horpc zuqc kungx dorh mingh maaiz


ganh nyei ga’naaiv longc nzengc, auv caux fu’jueiv yietc nyungc yaac maiv duqv, hnangv naaiv zoux se maiv horpc. Weic zuqc meih mbuo i hmuangv se benx yietc norm sin, meih mbuo i dauh yaac zoux cai-doic, haaix zanc, haaix dauh zipv duqv zinh nyaanh fai zornc duqv zinh nyaanh yaac horpc zuqc bun nqoi bun yuonh mingh. Maaih mienh zoux kuv mangc nyei jauv, fai oix mingh haaix ndau nziaauc, horpc zuqc lomh nzoih mingh, maiv dungx kungx nqox ganh mingh fai auv ganh mingh hnangv, se gorngv maaih fu’jueiv nyei mienh oix zuqc dorh jienv fu’jueiv mingh, maiv dungx guangc jienv fu’jueiv ganh yiem biauv hnangv. Hnangv naaiv, se gorngv duqv mingh haaix, yaac oix zuqc lomh nzoih mingh, maaih haaix nyungc kuv mangc, lomh nzoih duqv buatc, maaih haaix nyungc njien-youh lomh nzoih njien-youh a’hneiv, se gorngv buangh zuqc nzauh nyei jauv fai naanc zingh nyei jauv yaac oix zuqc lomh nzoih ndaam-dorng. Mv baac nqox oix zuqc zipv gauh camv auv, weic zuqc m’jangc dorn se zoux m’nqorngv, yaac zoux biauv-ziouv, maaih haaix nyungc sic oix zuqc nqox ndaam-dorng gauh camv. Ging-Sou gorngv, maiv hnamv auv maiv taaih auv nyei mienh, daux gaux nyei waac Tin-Hungh maiv zipv maiv muangx, weic zuqc Tin-Hungh buatc nqox maiv hnamv auv. Zeiz nyei, weic zuqc Tin-Hungh zeix m’sieqv dorn daaih, bun qaqv bun lingc gauh zoqc deix m’jangc dorn, bun m’sieqv dorn yiem m’jangc dorn nyei lingc ga’ndiev, weic naaiv Tin-Hungh cingx daaih gorngv mbuox zoux nqox nyei mienh, m’jangc dorn, oix zuqc hnamv auv, korh lienh auv, taaih auv, zoux longx bun auv (E^fe^so 5:25; Ko^lo^si 3:19; 1 Bide 3:7), cih maanc maiv dungx la’kuqv Tin-Hungh mbuox mbuo nyei waac. D. Dorng Jaa Nyei Leiz-Fingx Haaix dauh duqv auv ziangh horngh se longx haic aqv, ninh se duqv zipv Tin-Hungh ceix bun nyei fuqv (Congh Mengh Sou 18:22), Baulo fin-saeng duqv fiev fienx daaih bun Ti^mo^tai gorngv, “Weic naaiv yie oix lunx wuov deix auv-guaav aengx longc nqox, yungz fu’jueiv, zaangv longx jaa, bun mbuo nyei win-wangv maiv maaih dorngx daanh (1 Ti^mo^tai 5:14). Ei naaiv deix Ging-Sou njaaux nyei waac, mbuo hiuv duqv dorng jaa nyei jauv gengh horpc Ziouv nyei eix nyei. Weic zuqc dorng jaa nyei jauv se Tin-Hungh ganh mbenc daaih (Tin-Deic Douh 2:18), Tin-Hungh oix bun mbuo dorng jaa zoux mienh


seix, yaac zaangv longx jaa-dingh se horpc Ziouv nyei za’eix nyei, mv baac se gorngv dorng jaa daaih yaac maiv zaangv jaa-dingh, aengx mingh ceux buang-liouh sic nor, Tin-Hungh oix dingc zuiz (Hipv^lu 13:4). Dorng jaa nyei dauh dauh mienh , nqox caux auv oix zuqc maaih horpc fim dongh eix nyei juangc yiem juangc nyanc, laanh oix zuqc bieqc hnyouv laanh, nqox oix zuqc bieqc hnyouv auv (1 Bide 3:7), naaiv nyungc jauv se gengh horpc haic, weic zuqc Tin-Hungh zeix mbuo baamh mienh daaih, yaac maaih m’jangc m’sieqv, bun mbuo haih maaih auv maaih nqox gapv jienv benx cai-doix, se benx longx haic nyei jauv, maiv daan mbuoqc naaiv hnangv, Tin-Hungh corc aengx buang waac mbuo baamh mienh gorngv, “Oix zuqc ziangh naamh yungz nyouz hiaangx daaih buangv lungh ndiev gunv nzengc nyungc-nyungc Tin-Hungh zeix daaih nyei ga’naaiv.” (Tin-Deic Douh 1:26-28). Dorng jaa nyei jauv se oix zuqc maaih gitv huon ndaangc, cingx haih funx benx cai-doix, ei mbuo Giduc Mienh nyei leiz-fingx, se gorngv haaix dauh maiv gitv huon gapv benx cai-doix, hienx ndaangc nor, se maiv horpc aqv, yaac dorngc Tin-Hungh nyei cing-nzengc leiz mi’aqv. Se gorngv haaix dauh dorn caux sieqv buangh zuqc doic yaac naamh congh nyouz nyunc oix dorng jaa nor, oix zuqc mingh mbuox jiu-baang fin-saeng fai jiu-baang mienh gox tengx gitv huon mbenc hnaangx gapv benx cai-doix ndaangc, liuz cingx daaih maaih leiz juangc coux bueix. Tin-Hungh maiv iqv congh mbuo haaix dauh baamh mienh ceux buang-liouh nyei jauv, fai nziaauc sieqv, nziaauc dorn, hienx auv, hienx nqox nyei jauv (Hipv^lu 13:4). Weic zaangv cing-nzengc nyei jauv, cingx daaih mbuo dauh dauh oix zuqc dorng jaa yaac oix zuqc maaih ganh nyei auv, ganh nyei nqox, dorng jaa nyei dauh dauh mienh oix zuqc zunv hnyouv, yaac ziepc zuoqv hnyouv bun ganh nyei cai-doix, laanh yaac oix zuqc nyunc ei laanh. Ging-Sou njaaux taux zaangv cing-nzengc nyei jauv se hnangv naaiv, “Mv baac weic zuqc maaih hienx nyei sic camv, dauh dauh m'jangc dorn cingx daaih oix zuqc maaih ninh ganh nyei auv. Dauh dauh m'sieqv dorn oix zuqc maaih ninh ganh nyei nqox. Maiv dungx laanh zaanc laanh. Nqox oix zuqc nyunc ei ninh nyei auv, auv yaac oix zuqc nyunc ei ninh nyei nqox. Weic zuqc auv ganh maiv maaih leiz gunv ganh nyei sin, se ninh nyei nqox gunv. Fih hnangv nyei, nqox ganh yaac maiv maaih leiz gunv ganh nyei sin, se ninh nyei auv gunv. Maiv dungx laanh


zaanc laanh maiv juangc coux bueix, cuotv liuz i hmuangv dongh hnyouv dingc maiv juangc bueix i ziex hnoi weic longc ziangh hoc daux gaux. Jiex liuz naaiv deix ziangh hoc oix zuqc aengx juangc coux bueix. Nzauh heix ganh gunv maiv duqv ganh ziouc zuqc Saadaan nduov meih baamz zuiz” (1 Ko^lin^to 7:2-5). Weic maiv oix bun maaih hienx auv hienx nqox nyei sic, Ging-Sou cingx daaih gorngv heuc dorng jaa nyei mienh dauh dauh laanh oix zuqc nyunc ei laanh, “Nqox oix zuqc nyunc ei ninh nyei auv, auv yaac oix zuqc nyunc ei ninh nyei nqox. Weic zuqc auv ganh maiv maaih leiz gunv ganh nyei sin, se ninh nyei nqox gunv. Fih hnangv nyei, nqox ganh yaac maiv maaih leiz gunv ganh nyei sin, se ninh nyei auv gunv. Maiv dungx laanh zaanc laanh maiv juangc coux bueix, cuotv liuz i hmuangv dongh hnyouv dingc maiv juangc bueix i ziex hnoi weic longc ziangh hoc daux gaux. Jiex liuz naaiv deix ziangh hoc oix zuqc aengx juangc coux bueix. Nzauh heix ganh gunv maiv duqv ganh ziouc zuqc Saadaan nduov meih baamz zuiz” (1 Ko^lin^to 7:3-5). Naaiv gengh zien nyei, se gorngv haaix dauh dorng jaa nyei mienh maiv ei jienv naaiv deix njaaux nyei waac zoux nor, wuov dauh ziouc maaih sic cuotv yiem ninh nyei cai-doix aqv. E. Ndaauh Sorng Gitv Nyeic Nyei Jauv Dorng jaa se maiv zeiz zoux a’nziaauc, oix longc yoc longc, oix guangc yoc guangc, zoux cai-doic nyei jauv, se dingc ziangx daaih juangc yiem weic yietc liuz yietc seix taux daic cingx bun nqoi doic, m’sieqv dorn zoux jienv auv, ziouc maaih diuh leiz gunv jienv, oix zuqc mbuoqc nqox (E^fe^so 5:22), nqox yaac oix zuqc hnamv ganh nyei auv (E^fe^so 5:25), weic zuqc mbuo lomh nzoih taaih Giduc nyei mienh (E^fe^so 5:21). Dorng jaa nyei dauh dauh mienh se maaih dorng jaa nyei leiz gunv jienv mbuo nyei, se gorngv haaix dauh dorng liuz jaa aengx mingh ceux buang-liouh nyei sic, wuov dauh ziouc dorngc dorng jaa nyei leiz, yaac zuqc ndaam mengh benx hienx auv hienx nqoi nyei mienh, mv daan mbuoqc naaiv hnangv, nqa’haav yaac zuqc Tin-Hungh dingc zuiz (Hipv^lu 13:4). Hnangv naaiv, se gorngv nqox auv corc ziangh jienv nyei ziangh hoc, mbuo maiv maaih leiz aengx mingh lorz ganh dauh, mv baac se gorngv nqox fai auv daic mingh nor, mbuo ziouc maiv zuqc dorng jaa nyei leiz gunv mbuo aqv,


mbuo oix longc haaix dauh zoux auv, zoux nqox yaac duqv, mv baac oix zuqc longc lomh nzoih sienx Giduc nyei mienh hnangv, Ging-Sou yaac hnangv naaiv nor gorngv, “Se gorngv nqox corc ziangh jienv nyei ziangh hoc, auv maaih dorng jaa nyei leiz ndoh jienv. Mv baac nqox daic mi'aqv nor, auv maiv zuqc dorng jaa nyei leiz ndoh aqv. Sueih binc longc haaix dauh zoux nqox yaac duqv, da'faanh sienx Ziouv Yesu nyei mienh hnangv. Mv baac ei yie mangc, se gorngv ninh maiv longc nqox nor, ninh gauh maaih njien-youh. Yie yaac hnamv daaih yie maaih Tin-Hungh nyei Singx Lingh. (1 Ko^lin^to 7:39-40). Ei jienv naaiv deix Ging-Sou nyei waac nor, se gorngv nqox daic mi’aqv nor, naaic dauh m’sieqv dorn ziouc maiv zuqc dorng jaa nyei leiz gunv ninh aqv, ninh se aengx benx danh sin mienh mi’aqv, naaic dauh auv-guaav ziouc benx bungx nqox nyei mienh mi’aqv, hnangv naaic, se gorngv ninh oix caux haaix dauh m’jangc dorn dorng jaa gitv huon yaac duqv, daanh faanh sienx Yesu nyei mienh hnangv. Sienx Yesu nyei m’sieqv dorn horpc zuqc longc sienx Yesu nyei m’jangc dorn hnangv, sienx Yesu nyei m’juangc dorn yaac fih hnangv nyei, oix longc auv, oix zuqc lorz sienx Yesu nyei m’sieqv dorn longc, Giduc Mienh maiv horpc longc maiv sienx nyei mienh, fai caux maiv sienx nyei mienh dorng jaa. Ging-Sou gorngv, “Sienx nyei mienh caux maiv sienx nyei mienh maiv dungx jiu doic. Kuv sic caux waaic sic, hnangv haaix nor haih jiu tong? Njang caux hmuangx hnangv haaix nor haih juangc yiem? Giduc caux Mbe^liân hnangv haaix nor haih da’goih? Sienx nyei mienh caux maiv sienx nyei mienx maaih haaix nyungc juangc jienv nyei buonc? Tin-Hungh nyei singx dinc caux miuc-mienv hnangv haaix nor haih doix dongh? Weic zuqc yie mbuo zoux ziangh jienv nyei Tin-Hungh nyei singx dinc” ( 2 Ko^lin^to 6:14-16). Hnangv naaiv, maaih yietc nyungc jauv bun mbuo hiuv duqv taux hnangv haaix nor zoux duqv horpc Tin-Hungh nyei hnyouv, se sienx Yesu nyei mienh ndaauh sorng gitv puix nyei jauv, fai lorz cai-doix nyei jauv, se oix zuqc lorz lomh nzoih sienx Yesu nyei mienh, longc lomh nzoih sienx Yesu nyei mienh se benx yietc nyungc jauv zoux horpc Tin-Hungh nyei hnyouv. Se gorngv haaix dauh hnamv taux oix dorng jaa, ninh oix ndaauh sorng gitv nyeic, dorn fai sieqv, ninh ganh oix zuqc daux gaux jouh Tin-Hungh bun ninh haih lorz duqv dongh horpc Tin-Hungh nyei za’eix nyei mienh.


Se gorngv maaih haaix dauh hoh saeng sieqv dorn i dauh oix dorng jaa gitv huon zoux cing-jaa, mv baac yaac maiv hiuv duqv zoux horpc Tin-Hungh nyei hnyouv nor, gamh nziex ninh mbuo yiem seix zaangc maiv haih zipv maiv duqv Tin-Hungh nyei fuqv. Maiv dungx bun haaix dauh dorn fai sieqv caux doix bueix fai juangc jienv yiem ndaangc, dongh maiv gaengh gitv huon nyei ziangh hoc, yaac maiv dungx hnamv caux doic yiem ndaangc seix mangc gaax, haih caux doic duqv fai maiv duqv. Zoux naaiv nyungc sic, se dorngc nziaauc dorn, nziaauc sieqv nyei leiz mi’aqv. Tin-Hungh funx naaiv nyungc sic se benx zuiz. Sienx Yesu nyei mienh oix zuqc zaangv cing-nzengc nyei jauv yiem mbuo ndaauh sorng gitv nyeic nyei ziangh hoc, maiv dungx ei mbuo nyei hnyouv hienx ndaangc nqa’haav cingx daaih longc, hnangv naaiv nor zoux se maiv horpc, Ging-Sou gorngv, “Tin-Hungh nyei eix se hnangv naaiv. Ninh oix meih mbuo zoux cing-nzengc, simv nqoi nziaauc sieqv nziaauc dorn nyei sic”(1 Te^saa^lo^ni^gaa 4:3). Sienx Yesu nyei mienh ndaauh sorng, fai lorz cai-doix, se weic hnamv benx cing-nzengc nyei jauv, dorng jaa zoux mienh seix yiem naaiv seix zaangc, maiv zeiz gorngv dorh daaih seix mangc ndaangc. Mbuo oix zuqc bungx hnyouv bun Tin-Hungh, yiem naaiv seix zaangc ndaauh sorng gitv nyeic nyei jauv se gengh longc jienv haic, oix zuqc daux gaux tov Tin-Hungh tengx mbuo mbenc cai-doix, lorz cai-doix horpc nyei, tov bun yietc liuz kungx buangh longx nyei jauv hnangv, yaac tengx mbuo haih duqv zoux horpc Tin-Hungh. Sieqv-dorn hoh saeng haih duqv benx cai-doix se Tin-Hungh ganh tengx dingc daaih ginv daaih, bun ninh mbuo zoux cai-doix, ninh mbuo hnamv nyei jauv, caux zoux nyei sic, dongh diuc hnyouv, fai maiv dongh Tin-Hungh yaac hiuv nyei lorqc. Mv baac Tin-Hungh yaac maiv nqoi nzuih bun ninh mbuo weic seix ndaangc, nqa’haav cingx daaih gitv huon, seix mangc nyei sic, eix-leiz se maiv bungx hnyouv, fai maiv sienx Tin-Hungh Ninh mbenc ziangx bun mbuo nyei jauv, caux Ninh ceix en nyei fuqv. Yiem Tin-Hungh wuov daaih, se yietc zungv longx nyei, dunh yunh nyei hnangv, weic zuqc Tin-Hungh zoux Ziouv yaac zeix maanc muotc cuotv, Tin-Hungh yaac oix bun longx jiex nyei ga’naaiv mbuo, se gorngv mbuo tov Ninh, yaac bungx hnyouv bun Ninh tengx mbuo liuc leiz mbuo nyei jauv nor.


Ging-Sou hnangv naaiv gorngv, “Biauv caux jaa-dingh ga’naaiv se domh mienh mbenc daaih bun, mv baac auv guai, auv ziangh horngh se Tin-Hungh ceix bun mbuo.” (Congh Mengh Sou 19:14). Haaix dauh lorz duqv auv, yaac lorz duqv longx nyei ga’naaiv, Tin-Hungh yaac ceix fuqv bun ninh ( Congh Mengh Sou 18:22). Yiem naaiv deix Ging-Sou nyei waac mbuox mbuo, auv ziangh horngh nyei se Tin-Hungh ceix bun nyei fuqv, fai benx Tin-Hungh nyei fuqv, se gorngv haaix dauh hoh saeng oix duqv auv ziangh horngh, fai oix longc auv ziangh horngh, ninh oix zuqc zoux horpc Tin-Hungh, yiem seix zangc, ninh oix zuqc zaangv cing-nzengc nyei jauv, yaac muangx Tin-Hungh nyei waac, tov Tin-Hungh tengx ninh lorz, ninh ziouc oix duqv auv zinagh horngh. M’sieqv dorn yaac fih hnangv nyei, se gorngv oix duqv nqox ziangh horngh nor, ganh oix zuqc muangx Tin-Hungh nyei waac, yaac goux longx ganh nyei buonh sin, maiv dungx zoux laanc zinc, fai zoux ganh zaanc. Dorng jaa nyei jauv se dingc ziangx hnyouv juangc yiem taux daic nyei hnoi, m’sieqv dorn zoux jienv auv, se maaih yietc diuh zoux auv nyei leiz gunv jienv, se oix zuqc mbuoqc nqox, mv baac se kungx dongh nqox ziangh jienv nyei ziangh hoc hnangv (E^fe^so 5:22; Ko^lo^si 3:18), se gorngv nqox daic mi’aqv nor, auv ziouc maiv zuqc dorng jaa nyei leiz gunv aqv (Lomaa 7:1-6). Hnangv naaiv, se gorngv nqox daic mi’aqv, auv oix longc haaix dauh zoux nqox yaac duqv, danh fanh longc lomh nzoih sienx Yesu nyei mienh hnangv, yiem 1 Ko^lin^to 7:39 Baulo fin-saeng hnangv naaiv nor njaaux. “Se gorngv nqox corc ziangh jienv nyei ziangh hoc, auv maaih dorng jaa nyei leiz ndoh jienv. Mv baac nqox daic mi’aqv nor, auv maiv zuqc dorng jaa nyei leiz ndoh aqv. Sueih binc longc haaix dauh zoux nqox yaac duqv, da’faanh sienx Ziouv Yesu nyei mienh hnangv.” Sienx Yesu nyei m’sieqv dorn, horpc zuqc longc sienx Yesu nyei m’jangc dorn hnangv. Sienx Yesu nyei m’jangc dorn, yaac horpc zuqc lorz sienx Yesu nyei m’sieqv dorn daaih zoux cai-doix. Baulo fin-saeng gorngv, “Sienx nyei mienh caux maiv sienx nyei mienh maiv dungx jiu doic. Kuv sic caux waaic sic, hnangv haaix nor haih jiu tong? Njang caux hmuangx hnangv haaix nor haih juangc yiem? Giduc caux Mbe^liân hnangv haaix nor haih da’goih? Sienx nyei mienh caux maiv sienx nyei mienh maaih haaix nyungc juangc jienv nyei buonc? Tin-Hungh nyei singx dinc caux miuc-mienv hnangv haaix nor haih doix


dongh? Weic zuqc yie mbuo zoux ziangh jienv nyei Tin-Hungh nyei singx dinc.”(2 Ko^lin^to 6:14-16). Hnangv naaiv, mbuo oix zuqc bieqc hnyouv gorngv, sienx Yesu nyei mienh ndaauh sorng gitv nyeic (fai lorz cai-doix) nyei jauv se oix zuqc lorz lomh nzoih sienx Tin-Hungh nyei mienh hnangv. Se gorngv mbuo oix zoux horpc Tin-Hungh nyei hnyouv nor, mbuo kungx oix zuqc longc lomh nzoih sienx kaux Tin-Hungh nyei mienh, auv nqox yaac laanh oix zuqc mbuoqc laanh. Se gorngv mbuo sienx Yesu nyei mienh, maaih haaix dauh dorn fai sieqv oix ndaauh sorng gitv nyeic nor, ninh ganh oix zuqc daux gaux tov Tin-Hungh tengx ninh haih lorz duqv horpc Tin-Hungh nyei za’eix. Se gorngv haaix dauh sienx Yesu nyei mienh, dorn sieqv oix dorng jaa mv baac, maiv hiuv duqv zoux horpc fai maiv oix zoux horpc Tin-Hungh nyei hnyouv nor, ninh mbuo dorng jaa daaih yaac maiv haih duqv zipv Tin-Hungh nyei fuqv. Maiv dungx bun dorn caux sieqv juangc jienv yiem ndaangc, fai caux doic juangc jienv yiem ndaangc seix mangc gaax, haih caux duqv doic njiec fai maiv duqv, hnangv naaiv nor zoux se maiv horpc, naaiv se dorngc nziaauc sieqv nziaauc dorn nyei leiz mi’aqv. Zoux naaiv nyungc sic se Tin-Hungh maiv a’hneiv aqv, nqa’haav dorng-jaa gitv huon liuz yaac maiv haih duqv zipv Tin-Hungh nyei en aqv. Sienx Yesu mienh ndaauh sorng gitv nyeic, se weic hnamv benx cing-nzengc mienh, zoux mienh seix yiem naaiv seix zaangc, maiv zeiz gorngv mbuo dorh daaih seix mangc ndaangc, mbuo oix zuqc bungx hnyouv Tin-Hungh. F. Tin-Hungh Liepc Dorng Jaa Nyei Jauv:

Da’yietv nyungc se Tin-Hungh oix maaih mienh hiaangx daaih buangv nzengc lungh ndiev. (Tin-Deic Douh 1:26-28). Da’nyeic nyungc se kungx Aa^ndaam ganh yiem hnangv Tin-Hungh buatc maiv horpc, weic zuqc mv maaih mienh tengx Aa^ndaam. Tin-Hungh tengx Aa^ndaam orn jaa weic oix bun maaih mienh tengx ninh, mbienz ninh, caux ninh zoux doic (Tin-Deic Douh 2:2-18-25 = Genesis 2:18-25). Weic naaiv Tin-Hungh gapv daaih nyei cai-doix mienh maiv dungx aengx caeqv doic( Matv^taai 19:4-6; Maako 10:6-9 ).


G. Tin-Hungh Gapv Daaih Nyei Cai-Doix: Yesu dau, “Meih mbuo maiv doqc jiex naaiv douc Ging-Sou fai? ‘Zinh ndaangc Tin-Hungh zeix lungh zeix ndau wuov zanc, ninh zeix mienh daaih benx m’jangc m’sieqv.” Tin-Hungh yaac gorngv, ‘Weic naaiv m’jangc dorn dorng jaa, leih ninh nyei diex maac, caux jienv ninh nyei auv benx yietc dauh mi’aqv. Ninh mbuo ziouc maiv zeiz i dauh aqv. Benx yietc dauh hnangv. Hnangv naaic, Tin-Hungh gapv daaih nyei cai-doix, mienh maiv dungx caeqv nqoi.” (Matv^taai 19:4-6). 1. Tin-Hungh Maiv Iv Congh Mienh Leih Cai-Doix (Maa^laa^ki 2:14-16): a. Tin-Hungh nzorng haic mienh leih cai nyei jauv 16ys. b. Tin-Hungh gapv daaih nyei cai-doix mienh maiv dungx caeqv nqoi (Matv^taai 19:6; 1 Ko^lin^to 7:10-11). 2. Leih Cai-Doix Nyei Sic Se Hnangv Naaiv: a. Ceux buang-liouh jauv (sic). b. I hmuangv laanh maiv hnamv laanh nyei jauv. c. Nzaeng zinh nyaanh nyei jauv. d. Weic fu’jueiv caux hmuangv doic nyei jauv maaih sic. 3. Dorng Jaa Nyei Leiz: a. Hnamv oix zuqc liuc leiz ziux goux = Love takes responsibility to care for. b. Hnamv oix zuqc liuc leiz taan bun njiec=Love takes responsibility to provide for. c. Hnamv oix zuqc maaih taaih ginx nyei jauv = Love shows respect. d. Hnamv oix zuqc maaih ziepc zuoqv hnyouv = Love is honorable. 4. Nqox Nyei Gong: a. Zoux beiv dorh hmuangv doic. b. Ziux goux hmuangv doic. c. Oix zuqc nzie hmuangv doic. d. Nqox oix zuqc hnamv ganh nyei auv. 5. Auv Nyei Gong: a. Auv se nqox nyei borng-buoz mienh = Wife is husband's helper. b. Auv se nqox nyei mbienz-doic mienh = Wife is husband's companionship. c. Auv oix zuqc mbuoqc nqox = Wife is submits to husband. d. Auv oix zuqc taaih nqox = Wife must respect her husband.


H. Auv Nqox Oix Zuqc Laanh Hnamv Laanh: Mienh naaic Yesu. “Haaix diuh leiz-latc gauh longc jienv jiex?”Yesu dau. “Hnamv Tin-Hungh yaac hnamv mienh se gauh jienv jiex. Maiv maaih haaix diuh leiz-latc gauh longc jienv jiex naaiv deix i diuh leiz.” Matv^taai 22:36-40 Ninh ziouc naaic gaax Yesu. “Fin-saeng aac, yietc zungv Leiz-Latc, haaix diuh gauh longc jienv jiex?” Yesu dau,“Oix zuqc longc nzengc hnyouv, longc nzengc za’eix, longc nzengc cong-mengh hnamv Ziouv, meih nyei Tin-Hungh.” Naaiv se hlo jiex, gauh longc jienv jiex nyei leiz aqv. Da’nyeic diuh yaac fih hnangv nyei, “Oix zuqc hnamv mienh hnangv hnamv ganh nor.” Mose nyei Leiz-Latc caux zuangx Douh Waac Mienh njaaux nyei yietc zungv longc naaiv deix i diuh leiz zoux gorn.” Yesu aengx gorngv, “Meih mbuo oix mienh hnangv haaix nor zoux bun meih mbuo, meih mbuo yaac oix zuqc hnangv wuov nor zoux bun mienh.” (Lugaa 6:31). Laanh hnamv laanh nyei jauv yiem Gikc Waac se maaih buo joux waac longc jienv haic. Da’yietv joux waac se gorngv, “Eros” naaiv joux waac nyei eix-leiz se gorngv taux cai-doix nyei hnamv. Naaiv nyungc hnamv se laanh hnamv laanh, laanh mbuoqc laanh, laanh yaac nyunc ei laanh (1 Ko^lin^to 7:1-5). Yiem Gikc waac, “Eros” eix-leiz se dongh bun mienh nyei hnyouv hnamv taux oix dorng jaa, fai maaih hnyouv hnamv oix dorng jaa nyei jauv, se maaih hnyouv hnamv taux oix zoux auv, zoux nqox nyei jauv, fai hnamv oix maaih fu’jueiv nyei jauv. Naaiv nyungc jauv se Tin-Hungh bun mbuo daaih weic douc buonv haih hiaangx daaih buangv lungh ndiev (Tin-Deic Douh 1:27-28). Se gorngv Tin-Hungh mv bun naaiv nyungc hnamv mbuo nor, mbuo baamh mienh maiv haih hiaangx daaih buangh lungh ndiev. Cai-doic nyei hnamv se ganh nyungc, maiv hnangv hnamv fu’jueiv, hnamv mienh, hnamv muoz-doic nyei jauv. Ging-sou yaac gorngv, cai-doix oix zuqc laanh hnamv laanh, laanh oix zuqc nyunc ei laanh. Se gorngv, laanh maiv nyunc ei laanh nor, ziouc maaih maiv cing-nzengc nyei sic cuotv aqv (1 Ko^lin^to 7:3-5). Yiem naaiv nyungc jauv Ziouv Yesu gorngv, mienh maiv maaih leiz, leih auv, leih nqox. Mienh leih auv, leih nqox se laaix maaih hienx nyei jauv. Hnangv naaiv, se gorngv haiv dauh leih auv, leih nqox se zoux bun dongh yiem njiec wuov dauh maiv cing-nzengc, weic zuqc ninh nyei nqox zoux hoic ninh benx hienx nqox nyei mienh (Matv^taai 5:31-32).


Cai-doix laanh hnamv laanh se longc jienv haic. Se gorngv fu’jueiv buatc diex maac laanh hnamv laanh nor, muoz doic yaac oix laanh hnamv laanh fih hnangv nyei. Ninh nyei hnyouv yaac nqaai, hiuv duqv diex maac laanh hnamv laanh, yaac oix hnamv ninh mbuo fu’jueiv. Se gorngv fu’jueiv buatc domh mienh, diex maac kungx nzaengc jaax, mborqv jaax hnangv nor, fu’jueiv yaac oix zuotc jienv, ei jienv diex maac nyei nyungc zeiv nzaengc jaax, mborqv jaax. Yiem 1 Ko^lin^to 7:3-5 gorngv, “Maiv dungx laanh zaanc laanh. Nqox oix zuqc nyunc ei ninh nyei auv, auv yaac oix zuqc nyunc ei ninh nyei nqox. Weic zuqc auv ganh maiv maaih leiz gunv ganh nyei sin, se ninh nyei nqox gunv. Fih hnangv nyei, nqox ganh yaac maiv maaih leiz gunv ganh nyei sin, se ninh nyei auv gunv. Maiv dungx laanh zaanc laanh maiv juangc coux bueix, cuotv liuz I hmuangv dongh hnyouv dingc maiv juangc bueix I ziex hnoi weic longc ziangh hoc daux gaux. Jiex liuz naaiv deix ziangh hoc oix zuqc aengx juangc coux bueix. Nzauh heix ganh gunv maiv duqv ganh ziouc zuqc Saadaan nduov meih baamz zuiz.” Da’nyeic joux Gikc waac gorngv hnamv, se heuc “Phileo” ninh nyei eix-leiz se dongh mbuo hnamv hmuangv doic, hnamv mienh, hnamv muoz wuov nyungc hnamv. Naaiv nyungc hnamv ninh mbuo heuc muoz doic nyei hnamv. Hnangv mbuo hnamv mienh muoz cien-ceqv nyei jauv, mbuo mienh gorngv gorx-youz doic nyei hnamv. Naaiv nyungc hnamv se laanh korh lienh laanh, laanh hnamv laanh, laanh tengx laanh nyei jauv. Da’faam joux hnamv yiem Gikc waac se, heuc “Agape” eix-leiz se hnangv Tin-Hungh hnamv mbuo baamh mienh wuov nyungc hnamv. Naaiv nyungc hnamv Tin-Hungh oix mbuo dauh dauh mienh maaih naaiv nyungc hnamv. Naaiv nyungc hnamv se mbuo maiv douh duqv mienh nyei haaix nyungc ga’naaiv. Naaiv nyungc hnamv se maaih hnyouv korh lienh mienh,mienh mv hnamv mbuo mv baac mbuo yaac hnamv mienh fih hnangv nyei. Naaiv nyungc hnamv se yiem Ging-sou (1 Ko^lin^to 13:4-8; Yo^han 3:16; Yo^han 15:12-13; Yo^han 13:34-35; 1 Yo^han 4:7-12). Ziouv Yesu gorngv heuc laanh hnamv laanh wuov nyungc hnamv se dongh naaiv “Agape” nyei hnamv. Naaiv nyungc hnamv se maiv douh ganh duqv longx, maiv ceng-hlo, maiv zoux maux, maiv mueic jieqv mienh nyei haaix nyungc. Naaiv nyungc hnamv se maaih hnyouv korh lienh mienh, maaih hnyouv oix zoux


longx bun mienh, maaih hnyouv oix tengx mienh. Se gorngv mbuo nyei cai-doix maaih naaiv nyungc “agape” nyei hnamv nor mbuo maaih horpc fim dongh eix nyei jauv camv faaux. Mbuo yaac mv maaih la’nyauv nyei jauv camv. Se hnangv yiem 1 Ko^lin^to 13:4-8, Baulo fin-saeng gorngv nor, se gorngv mbuo hnamv mienh nor: 1. Mbuo ziouc zoux duqv hnyouv ndaauv bun mienh. 2. Mbuo yaac zoux longx bun mienh. 3. Mbuo yaac maiv mueic jieqv mienh nyei ga’naaiv. 4. Mbuo yaac maiv ceng-hlo. 5. Mbuo yaac maiv zoux maux. 6. Mbuo yaac maiv zoux maiv zieqv leiz nyei jauv. 7. Mbuo yaac maiv douh ganh duqv longx. 8. Mbuo yaac maiv qiex jiez siepv. 9. Mbuo yaac maiv jangx mienh zoux dorngc nyei sic. 10. Mbuo yaac maiv a’hneiv waaic nyei sic. 11. Mbuo ziouc diev duqv nyungc-nyungc sic. 12. Mbuo yaac zanc-zanc maaih noic. I. Ging-Sou Njaaux Taux Cai-Doix Horh Norh Nyei Jauv: Ging-Sou zanc-zanc njaaux taux cai-doix horh norh horh kix nyei jauv. Ging-Sou gorngv, se gorngv auv hnamv nqox nor oix zuqc mbuoqc nqox, yaac taaih nqox, yaac muangx nqox, yaac zoux cing-nzaengc bun nqox. Ging-Sou njaaux taux nqox gorngv, se gorngv nqox hnamv auv oix zuqc korh lienh auv, oix zuqc taaih auv, oix zuqc zoux longx bun auv. Ging-Sou yaac gorngv waac-beiv, se gorngv nqox hnamv auv oix zuqc hnangv Giduc hnamv Jiu Baang nor. Auv hnamv nqox yaac oix zuqc hnangv Jiu Baang hnamv Gidic nor, mbuoqc ganh nyei nqox. (E^fe^so 5:21-31; Ko^lo^si 3:19-20). “Meih mbuo oix zuqc laanh mbuoqc laanh, laanh hnamv laanh weic zuqc meih mbuo lomh nzoih taaih Giduc nyei mienh.” (E^fe^so 5:21). Congh Mengh Sou 14:1 gorngv, “Congh mengh nyei m’sieqv dorn ceix ninh nyei biauv faaux. Hngongx nyei m’sieqv dorn, se longc ninh ganh nyei buoz caeqv ninh ganh nyei biauv waaic.” Cai-doix horpc fim nyei jauv se longc jienv haic bun mbuo Giduc mienh nyei biauv zong. Da’ yietv nyungc longc jienv nyei jauv se, se gorngv mbuo cai-doix mv horpc fim nor, mbuo daux gaux Tin-Hungh mv zipv mbuo nyei waac (1 Bide 3:7).


Yesu gorngv, se gorngv mbuo maaih hnyouv oix fongc horc ga’naaiv bun Tin-Hungh, mv baac mbuo nyei hnyouv corc nouz jienv, nzorng jienv mienh nyei nor, Tin-Hungh mv zipv mbuo nyei ga’naaiv aqv. Mbuo oix zuqc mingh caux wuov dauh zoux horpc ndaangc cingx daaih haih fongc horc ga’naaiv bun Tin-Hungh (Matv^taai 5:21-24). Da’nyeic nyungc longc jienv nyei jauv se, se gorngv mbuo domh mienh haiv zanc yaac mborqv jaax, nzaeng jaax nor, mbuo nyei fu’jueiv yaac oix zuotc jienv mborqv jaax nzaeng jaax. Mbuo njaaux ninh mbuo zoux longx nyei jauv, ninh mbuo yaac mv muangx mbuo. Weic naaiv mbuo zoux die, zoux maa nyei mienh oix zuqc horc fim dongh eix dongh diuc hnyouv laanh oix zuqc zoux longx bun laanh, laanh yaac oix zuqc hnamv laanh. Weic zuqc mbuo yietc zungv se zoux Tin-Hungh hnamv haic nyei naamh nyuoz oix zuqc zuotc ninh nyei nyungc zoux. Yiem mbuo zoux nyei nyungc-nyungc sic oix zuqc hnamv mienh hnangv Giduc hnamv mbuo nor, weic mbuo siev maengc, hnangv zorqv ndaang nyei ga’naaiv fongc fongc ziec bun Tin-Hungh nor.” (E^fe^so 5:1-2). Hnangv naaiv, “Muo oix zuqc laanh mbuoqc laanh weic zuqc mbuo lomh nzoih taaih Giduc nyei mienh. Zoux auv nyei mienh oix zuqc mbuoqc ganh nyei nqox hnangv mbuoqc Ziouv Yesu wuov nor. Zoux nqox nyei mienh yaac oix zuqc hnamv ganh nyei auv hnangv Giduc hnamv jiu-baang wuov nor. (E^fe^so 5:21-22,25). Da’faam nyungc longc jienv nyei jauv yiem cai-doix gu’nyuoz se oix zuqc maaih hnyouv nyiemc ganh zoux fai. “Oix zuqc zanc-zanc nyiemc ganh zoux faix, longc suonc hnyouv, longc noic, zoux hnyouv ndaauv, laanh hnamv laanh. Oix zuqc longc hnyouv laanh caux laanh baengh orn nyei yiem weic beu jienv Singx Lingh ceix bun nyei horpc fim dongh eix nyei hnyouv.” (E^fe^so 4:2-3).“Oix zuqc guangc nqoi ganh nyei loz-maengc, dongh zinh ndaangc mbuo mv gaengh sienx Tin-Hungh wuov nyungc maengc. Wuov nyungc loz-maengc se kungx nduov mbuo ei ganh nyei hnyouv nyunc zoux, manc-manc ziouc waaic nzengc mi ‘ aqv. (E^fe^so 4:22). Weic naaiv, “Maiv dungx bun mbuo nyei nzuih gorngv cuotv maiv benx nyei waac. Oix zuqc gorngv haih tengx mienh nyei waac hnangv, dongh haih ceix mienh puix ninh mbuo qiemx zuqc nyei wuov nyungc waac, bun muangx nyei mienh duqv longx. Yaac maiv dungx bun Tin-Hungh nyei Singx Lingh nzauh. Tin-Hungh bun Singx Lingh mbuo, se hnangv nqaapv jienv yienx nor, zuov Tin-Hungh zuoqc mbuo nzuonx nyei hnoi-nyieqc taux.


Oix zuqc guangc im nyei hnyouv, maiv dungx nouz mienh, maiv dungx qiex jiez, maiv dungx nauz-nauc nyei nzaeng jaax, maiv dungx gorngv doqc mienh. Yaac oix zuqc guangc nzengc nyungc-nyungc nzorng mienh nyei sic. Daaux nzuonx, laanh oix zuqc zoux longx bun laanh, laanh korh lienh laanh, yaac oix zuqc guangc laanh zoux dorngc laanh nyei sic hnangv Tin-Hungh longc Giduc guangc mbuo nyei zuiz wuov nor.” (E^fe^so 4:29-32). Da’feix nyungc cai-doix horpc fim nyei jauv se oix zuqc maaih guangc zuiz nyei jauv, laanh oix zuqc guangc bun laanh dongh mbuo zoux dorngc nyei jauv. Maiv gunv mienh baac-baac zoux fai capv-bouc zoux dorngc nyei jauv. Se gorngv mbuo gorngv guangc mienh zoux dorngc nyei jauv, mbuo duqv laengz liuz fai dingc liuz, laengz guangc nor, mbuo gengh oix zuqc guangc. Guangc zuiz bun mienh nyei jauv se mv zeiz nzuih gorngv hnangv, mv baac oix zuqc za’gengh zoux. Se gorngv mbuo guangc mienh nyei zuiz nor, jiex liuz maaih haaix nyungc mbuo mv aengx paan daaih gorngv aqv. Mbuo mienh mv maaih horpc fim se laaix mbuo mv maaih guangc zuiz nyei jauv. Maiv gunv i hmuangv gu’nyuoz fai caux deic-bung mienh yaac fih hnangv nyei. Maaih deix ziangh hoc mienh zoux dorngc mbuo nyei jauv jiex daaih duqv nyic ziepc, faah ziepc hnyaangx aqv mv baac aengx mingh ndaam porng wetv daaih wuov gorngv, hnangv naaiv se mv zeiz Tin-Hungh nyei mienh. Ziouv Yesu gorngv, “Se gorngv mienh dorngc meih mbuo, meih mbuo yaac guangc bun ninh mbuo nor, meih mbuo nyei tin-dorngh Diex yaac guangc meih mbuo nyei zuiz. Mv baac mienh dorngc meih mbuo, meih mbuo yaac maiv guangc nor, meih mbuo nyei Zangc Diex yaac maiv guangc meih mbuo nyei zuiz.” (Matv^taai 6:14-15). Guangc zuiz nyei jauv se mv zeiz gorngv guangc nzunc aeqv gaux aqv. Se yietc seix mienh oix zuqc guangc. Bide aengx daaih naaic gaax Yesu. “Ziouv aac, se gorngv yie nyei gorx-youz zanc-zanc dorngc yie, yie oix zuqc guangc mbu’ziex nzunc bun ninh? Siec nzunc gaux aqv?”Yesu dau, “Yie maiv zeiz gorngv guangc siec nzunc hnangv. Oix zuqc guangc siec nzunc nyei cietv ziepc. Weic zuqc Tin-Hngh zoux Ziouv gunv mienh se hnangv naaiv. Maaih dauh hungh diex oix caux ninh nyei bou funx zaeqv. Funx jienv zaeqv wuov zanc, mienh dorh dauh bou bieqc daaih. Wuov dauh bou qiemx hungh diex ziex baeqv waanc norm zinh, yaac


maiv maaih nyaanh jaauv. Hungh diex ziouc heuc mienh dorh wuov dauh bou mingh maaic bun mienh zoux nouh. Liemh ninh nyei auv-jueiv caux ninh maaih nyei yietc zungv ga’naaiv dorh mingh maaic nzengc daaih jaauv sung zaeqv. “Wuov dauh bou ziouc gueic njiec hungh diex nyei nza’hmien njiec qaqv tov. Tov ziouv sie yie, zuov yie lorz duqv daaih, yie gengh oix zuqc jaauv taux sung nzengc.’ Hungh diex korh lienh haic wuov dauh bou ziouc guangc nzengc ninh nyei zaeqv, bungx ninh nzuonx mi’aqv. Naaic dauh bou cuotv mingh yaac buangh zuqc dauh zoux bou doic. Naaiv dauh bou qiemx ninh i ziex norm zinh hnangv, mv baac ninh liemh zeih goh jienv naaiv dauh nyei jaang yaac gorngv, ‘Gaanv jaauv meih qiemx yie nyei zaeqv.’ Wuov dauh zoux bou doic ziouc gueic njiec qaqv tov ninh. ‘Tov meih sie yie, yie gengh jaauv nyei lorqc.’ Mv baac wuov dauh bou maiv kuangv, yaac dorh ninh mingh wuonx jienv loh zuov ninh jaauv sung zaeqv. Aengx maaih deix lomh nzoih zoux bou doic buatc naaiv deix sic cuotv, haiz hnyouv maiv longx yietc deix ziouc mingh mbuox nzengc hungh diex. Hungh diex ziouc heuc wuov dauh bou bieqc daaih. Ninh gorngv, ‘Meih naaic dauh waaic haic nyei nouh gauv aah! Weic zuqc meih tov yie hnangv, yie ziouc guangc nzengc yietc zungv meih qiemx yie nyei zaeqv. Meih horpc zuqc korh lienh meih nyei zoux bou doic hnangv yie korh lienh meih nor saa.’ Hungh diex qiex jiez! Haic ziouc heuc gunv loh nyei jien dorh naaiv dauh bou mingh zeix taux ninh jaauv sung zaeqv.”Yesu aengx gorngv setv mueiz waac. “Se gorngv meih mbuo mouz dauh mienh maiv longc hnyouv guangc gorx-youz zoux dorngc meih mbuo nyei sic, yie nyei tin-dorngh Diex yaac fih hnangv nyei maiv guangc bun meih mbuo.” (Matv^taai 18:21-35). J. Leih Cai-Doix Nyei Leiz Yiem naaiv seix zaangc ndaauh sorng gitv nyeic nyei jauv se gengh jienv haic, oix zuqc daux gaux tov Tin-Hungh tengx mbuo mbenc cai-doix horpc nyei, tov bun yietc liuz kungx buangh longx nyei jauv hnangv, haih duqv zoux horpc Tin-Hungh. Dorn caux sieqv haih duqv benx cai-doix se Tin-Hungh ganh ginv daaih bun ninh mbuo, ninh mbuo haaix dauh nyei hnyouv hnangv haaix nor, dongh diuc hnyouv fai maiv dongh diuc hnyouv nyei jauv, Tin-Hungh yaac hiuv nyei.


Mbuo Giduc Mienh, gitv liuz huon, dorng liuz jaa aengx haih leih duqv doic nyei fai? Se gorngv leih nor, oix zuqc hnangv haaix nor zoux? Ging-Sou gorngv maaih norm hnoi nor, “Maaih deix Faa^li^si Mienh daaih seix Yesu ziouc naaic, “Maiv gunv nqox weic haaix nyungc gorn-baengx leih ninh nyei auv, se horpc mbuo nyei leiz fai?” Yesu dau, “Meih mbuo maiv doqc jiex naaiv douc Ging-Sou fai? ‘Zinh ndaangc Tin-Hungh zeix lungh zeix ndau wuov zanc, ninh zeix cuotv mienh daaih benx m'jangc m'sieqv.’ Tin-Hungh yaac gorngv, ‘Weic naaiv m'jangc dorn dorng jaa, leih ninh nyei diex maac, caux jienv ninh nyei auv benx yietc dauh mi'aqv.’ Ninh mbuo ziouc maiv zeiz i dauh aqv. Benx yietc dauh hnangv. Hnangv naaic, Tin-Hungh gapv daaih nyei cai-doix, mienh maiv dungx caeqv nqoi.” Faa^li^si Mienh aengx naaic Yesu, “Wuov nyungc, Mose weic haaix diuc mbuox nqox bun zeiv leih cai sou ninh nyei auv ziouc heuc auv mingh aqv?” Yesu dau, “Se laaix meih mbuo hnyouv ngaengc haic Mose cingx daaih bun meih mbuo haih leih duqv meih mbuo nyei auv. Mv baac zinh ndaangc, zeix lungh zeix ndau wuov zanc, maiv zeiz hnangv naaic nor. Yie mbuox meih mbuo, haaix dauh leih ninh nyei auv, yaac maiv zeiz laaix ninh nyei auv hienx nqox nor, aengx mingh longc siang-auv, ninh se hienx auv hnangv.” (Matv^taai 19:3-9). Hnangv naaiv, mbuo hiuv duqv leih auv, leih nqox nyei jauv se maiv zeiz Tin-Hungh nyei za’eix, Yesu yaac maiv iv congh mienh leih auv leih nqox nyei jauv. Mienh leih auv, leih nqox nyei jauv se weic laaix cai-doix laanh maiv ziepc zuoqc hnyouv bun laanh nyei jauv, Yesu nuqv nzuonx Tin-Hungh zeix lungh zeix ndau nyei ziangh hoc bun mienh mangc, dongh Tin-Hungh zeix daaih nyei ziangh hoc, maiv maaih leih auv leih nqox nyei jauv, mienh leih auv leih nqox nyei ziangh hoc se yiem Moses nyei lungh ndiev, se laaix mienh hnyouv ngaengc, laanh maiv mbuoqc laanh, laanh maiv ziouc laanh oix leih doic, Tin-Hungh cingx daaih mbuox Mose mbuox nqox oix zuqc bun zeiv leih cai sou ninh nyei auv, bun cing ninh nyei auv benx bungx nqox nyei mienh mi’aqv, se maiv zeiz gorngv Tin-Hungh bun leiz mienh guangc auv, guangc nqox, fai leih auv, leih nqox. Mv baac dongh mienh oix leih auv, leih nqox wuov deix nor, ninh mbuo dorh naaiv joux waac daaih longc, dongh gorngv “bun zeiv leih cai sou auv liuz, ziouc heuc auv mingh aqv.


Yesu fih hnangv nyei borqv jienv gorngv, “Haaix dauh leih auv, yaac maiv zeiz laaix ninh nyei auv hienx nqox nor, aengx mingh longc siang-auv, ninh se hienx auv nyei mienh hnangv.” (Matv^taai 19:9). Ei jienv Yesu gorngv nyei waac nor, dongh oix leih auv, leih nqox nyei mienh se weic oix mingh hienx ganh dauh m’sieqv dorn fai m’jangc dorn hnangv, maiv zei aeqv, ninh maiv horpc zuqc leih ninh nyei auv fai ninh nyei nqox. Ziouv Yesu aengx gorngv, “Haaix dauh leih ninh nyei auv oix zuqc fiev zeiv leih cai sou bun jienv ninh.’ Mv baac ih zanc yie mbuox meih mbuo, haaix dauh leih ninh nyei auv yaac maiv zeiz laaix ninh nyei auv hienx nqox, wuov dauh auv aengx longc ganh dauh zoux nqox, wuov dauh auv ziouc hienx nqox mi'aqv. Ninh nyei loz-nqox hoic ninh zoux hienx nqox nyei mienh. Haaix dauh longc wuov dauh auv-leih yaac hienx auv aqv.” (Matv^taai 5:31-32). Ei Mose fiev nyei leiz-latc sou njaaux nyei jauv nor, se gorngv haaix dauh auv fai nqox maiv ziepc zuoqc hnyouv bun ninh nyei nqox fai auv, mingh hienx ganh dauh, yaac maiv laengz guangc ninh zoux waaic nyei jauv nor, dongh ninh nyei auv fai nqox maiv zoux waaic wuov dauh ziouc maaih leiz leih duqv ninh nyei auv fai nqox aqv, mv baac oix zuqc bun zeiv leih cai sou ninh nyei auv. Mv baac Ziouv Yesu aengx gorngv, “Mv baac ih zanc yie mbuox meih mbuo, haaix dauh leih ninh nyei auv yaac maiv zeiz laaix ninh nyei auv hienx nqox, wuov dauh auv aengx longc ganh dauh zoux nqox, wuov dauh auv ziouc hienx nqox mi'aqv. Ninh nyei loz-nqox hoic ninh zoux hienx nqox nyei mienh. Haaix dauh longc wuov dauh auv-leih yaac hienx auv aqv.” (Matv^taai 5:31-32). Ei jienv Ziouv Yesu njaaux nyei waac nor, se gorngv maiv zeiz auv fai nqox mingh hienx ganh dauh mienh nor, haaix dauh leih ninh nyei auv fai nqox se ninh zoux hoic ninh nyei auv fai nqox benx hienx auv hienx nqox nyei mienh, naaiv se dorngc hienx auv hienx nqox nyei leiz. Weic zuqc dongh oix leih wuov dauh zoux hoic dongh maiv oix leih wuov dauh benx hienx auv hienx nqox nyei mienh, hnangv naaiv zoux yietc zungv yaac zoux dorngc aqv.Hnangv naaic, se gorngv haaix dauh m’sieqv dorn fai m’jangc dorn, guangc ninh nyei nqox fai ninh nyei auv mingh, aengx mingh longc ganh dauh siang-nqox fai siang-auv, wuov dauh ziouc dorngc hienx nqox hienx auv nyei leih aqv. Se gorngv dorngc hienx auv, hienx nqox nyei leiz nor, ziouc maiv duqv


siouc Tin-Hungh nyei guoqv nyei buonc (Hipv^lu 13:4; 1 Ko^lin^to 6:9-11; Laauc Yaangh 21:27). Se gorngv haaix dauh m’jangc dorn fai m’sieqv dorn guangc ninh nyei auv fai nqox mingh, aengx mingh longc ganh dauh siang-auv fai siang-nqox nor, ninh yaac zoux dorngc hienx auv hienx nqox nyei leiz. Hnangv naaic, leih auv leih nqox nyei jauv, se maaih camv-nyungc nyei, mv baac longc jienv nyei jauv se maaih yietc nyungc hnangv, se gorngv nqox fai auv mingh hienx sieqv hienx auv fai hienx dorn hienx nqox nor, dongh maiv zoux wuov dauh ziouc maaih leiz leih duqv dongh zoux waaic wuov dauh aqv. Mv baac, ninh ganh se maiv haih aengx longc ganh dauh siang-auv fai siang-nqox, se gorngv ninh longc nor, ninh se zoux dorngc hienx auv hienx nqox nyei leiz. Maaih nduqc nyungc jauv hnangv, bun ninh maiv dorngc hienx auv hienx nqox nyei leiz se, ninh oix zuqc aengx longc ninh nyei loz-auv fai loz-nqox, ninh cingx daaih maiv dorngc hienx auv hienx nqox nyei leiz. Baulo fin-saeng gorngv, Ziouv hatc maiv bun mienh leih auv leih nqox nyei jauv, ninh gorngv, “Yie aengx maaih joux waac hatc dorng jaa nyei mienh. Naaiv deix waac maiv zeiz yie ganh gorngv nyei waac, se Ziouv hatc nyei waac. Auv maiv dungx leih guangc nqox. Mv baac se gorngv leih nor, ninh oix zuqc daan sin yiem. Maiv zei aeqv, oix zuqc aengx longc loz-nqox. Nqox yaac maiv dungx leih guangc ninh nyei auv.”( 1 Ko^lin^to 7:10-11). Aengx maaih yietc nyungc jauv haih leih duqv cai-doix, se hnangv longc ga’nyiec maengx mienh, dongh maiv zeiz sienx Giduc nyei mienh, wuov dauh maiv laengz sienx mv baac oix longc, laengz caux sienx wuov dauh yiem. Mv baac nqa’haav ninh ziouc maiv oix caux sienx wuov dauh yiem, yaac maiv bun sienx wuov dauh mingh zoux leiz-baaix lorz Tin-Hungh, yaac laaix naaiv nyungc jauv zoux bun dongh sienx wuov dauh maaih sic camv nor, sueih binc ninh mingh aqv, sienx wuov dauh ziouc maiv zuqc diev jienv yiem. Baulo fin-saeng hnangv naaiv nor gorngv, “Se gorngv maaih Giduc Mienh m'sieqv dorn, ninh nyei nqox yaac maiv sienx, mv baac nqox laengz caux ninh yiem, ninh maiv dungx leih ninh nyei nqox aqv. Nqox maiv sienx mv baac weic zuqc ninh nyei auv sienx, Tin-Hungh ziouc zipv ninh nyei nqox. Auv maiv sienx mv baac weic zuqc nqox sienx, Tin-Hungh ziouc zipv ninh nyei auv. Maiv zei aeqv, ninh mbuo nyei fu'jueiv se hnangv maiv sienx nyei mienh nyei fu'jueiv


nor, mv baac ih zanc benx Tin-Hungh nyei. Maiv gunv auv fai nqox, se gorngv maiv sienx Yesu wuov dauh oix leih sienx nyei wuov dauh, sueih ninh mingh aqv. Buangh zuqc naaiv nyungc sic nor aeqv, sienx Yesu wuov dauh auv fai nqox ziouc maiv zuqc aapv ganh diev jienv yiem, weic zuqc Tin-Hungh heuc mbuo baengh orn nyei yiem.” (1 Ko^lin^to 7:13-15) “Se gorngv mienh longc jienv auv, nqa'haav haiz maiv horpc hnyouv ninh nyei auv weic zuqc buatc ninh nyei auv zoux sic maiv ziangh horngh, nqox ziouc fiev leih cai sou bun jienv ninh yaac heuc ninh cuotv biauv mingh aqv. Se gorngv auv cuotv biauv mingh aengx longc ganh dauh nqox, da'nyeic dauh nqox yaac maiv hnamv ninh aengx fiev leih cai sou bun ninh ziouc heuc ninh mingh mi'aqv, fai da'nyeic dauh nqox daic mi'aqv, daauh dauh nqox, dongh zunc ninh biaux wuov dauh, aengx longc ninh zoux auv maiv duqv aqv, weic zuqc wuov dauh auv maaih uix. Ziux Ziouv mangc, naaiv se gamh nziev haic, youx haic nyei sic. Maiv dungx bun Ziouv, meih mbuo nyei Tin-Hungh, jiu bun meih mbuo nzipc nyei deic-bung zuqc maaih zuiz.” (Nzamc Leiz-Latc 24:1-4) Nzutv zunv waac taux leih cai nyei jauv. Ei mbuo duqv hoqc jiex daaih nyei Ging-Sou waac gorngv taux leih cai nyei jauv, se kungx maaih i nyungc jauv bun mienh haih leih duqv cai-doix hnangv: (1) Nyungc se hnangv cai-doix maaih dauh maiv ziepc zuoqv hnyouv, se hnangv auv fai nqox mingh hienx auv fai hienx nqox zoux waaic sic, yaac maiv muangx haaix dauh horh kuinx sai njaaux nyei waac, ninh yaac maiv maaih hnyouv zoux longx nyei jauv nor, dongh yiem longx nyanc longx zoux horpc wuov dauh maiv maaih baengh orn hnyouv nor, ninh maaih leiz haih leih duqv dongh zoux waaic sic wuov dauh nyei (Nzamc Leiz-Latc 24:1-4; Matv^taai 5:31-32; Matv^taai 19:3-6). (2) Nyungc se hnangv maaih dauh sienx Ziouv nyei mienh maaih dauh maiv sienx Ziouv nyei mienh longc doic daaih, mv baac nqa’haav dongh maiv sienx wuov dauh maiv oix longc sienx wuov dauh, ninh oix guangc fai oix biaux, fai oix leih, yaac maiv oix caux sienx wuov dauh yiem aqv nor, dongh sienx wuov dauh sueih ninh mingh aqv (1 Ko^lin^to 7:13-15; E^saa^laa 10:11-19).


Da’feix Ginc Hmuangv Doic Nyei Leiz-Fingx A. Hmuangv Doic Nyei Leiz Hmuangv doic nyei leiz se laanh oix zuqc mbuoqc laanh, weic zuqc mbuo lomh nzoih benx Giduc nyei mienh. Ging-Sou gorngv, “Weic zuqc meih mbuo zoux Tin-Hungh hnamv haic nyei naamh nyouz oix zuqc zuotc ninh nyei nyungc zoux. Meih mbuo zoux nyungc-nyungc sic oix zuqc hnamv mienh hnangv Giduc hnamv mbuo, weic mbuo siev maengc, hnangv zorqv ndaang nyei ga'naaiv fongc horc ziec bun Tin-Hungh nor.” (E^fe^so 5:1-2). Giduc Mienh nyei hmuangv doic oix zuqc laanh hnamv laanh, se gorngv mbuo laanh maiv hnamv laanh nor, mbuo ziouc maiv puix duqv benx Giduc Mienh, weic zuqc Ging-Sou njaaux mbuo laanh oix zuqc hnamv laanh, hnangv Giduc hnamv mbuo nor. Tin-Hungh liepc dorng jaa nyei jauv daaih, weic bun dorn caux sieqv gapv zunv benx cai-doix, se maiv zeiz kungx bun gapv zunv daaih juangc yiem, weic maaih njien-youh a’hneiv doic nyei jauv hnangv, mv baac Tin-Hungh buang waac bun dorn caux sieqv gorngv, “Meih mbuo oix zuqc maaih fu'jueiv hiaangx daaih buangv lungh ndiev yaac gunv duqv mbuoqc lungh ndiev nyei ga'naaiv.Oix zuqc gunv yiem koiv nyei mbiauz, yiem ndaamh lungh nyei norqc, caux nyungc-nyungc maaih maengc, nyorng ndau-beih nyei ga'naaiv.” (Tin-Deic Douh 1:28). Yiem naaiv douc Ging-Sou nyei waac, bun mbuo hiuv duqv gorngv, Tin-Hungh nyei mouz deic bun dorn caux sieqv gapv daaih benx cai benx doix se weic oix maaih hoz baan mienh yiem lungh ndiev. Weic naaiv, Tin-Hungh cingx daaih buang waac bun dorn caux sieqv gorngv, meih mbuo oix zuqc ziangh naamh yungz nyouz hiaangx daaih buangv lungh ndiev, duqv zoux die, zoux maa, maaih dorn, maaih sieqv orn jaa benx houz, benx ziou, benx fouv, doic jiex doic mingh, hiaaux daaih buangv lungh ndiev, yaac tengx Tin-Hungh ziux goux, Ninh zeix daaih nyei ga’naaiv. Ziangh naamh yungz nyouz nyei jauv se tengx Tin-Hungh nyei gong nqoi jangv cuotv, buangv lungh ndiev, yaac njang-laangc Tin-Hungh nyei mengh, weic naaiv mbuo Giduc Mienh cingx daaih oix zuqc zoux kuv sic yiem seix zangc.


Yiem Singx Nzung Sou gorngv, “Fu’jueiv se Tin-Hungh nyei fuqv, Tin-Hungh ceix bun nyei zingh nyeic, fu’jueiv se yiem Tin-Hungh wuov daaih,” (Singx Nzung 127:3). B. Diex Maac Nyei Leiz-Fingx Zoux die zoux maa nyei dauh dauh mienh, oix zuqc hnamv fu’jueiv taux daauh, oix zuqc goux longx ninh mbuo. Goux fu’jueiv, oix zuqc longc hnyouv mangc longx, maiv horpc zuqc la’guaih guangc jienv fu’jueiv hnangv guangc maiv longc jienv nyei ga’naaiv nor, diex maac oix zuqc hnamv fu’jueiv, oix zuqc korh lienh fu’jueiv, yaac oix zuqc ei Ziouv nyei leiz njaaux ninh mbuo. Njaaux fu’jueiv nyei jauv oix zuqc longc longx nyei jauv caux longx nyei waac njaaux, maiv horpc zuqc gorngv waac-zaanc fai hemx waac doqc, fai zioux ninh mbuo. Weic zuqc fu’jueiv se Tin-Hungh nyei fuqv, Tin-Hungh nyei en-zingh bun mbuo daaih, oix zuqc njaaux ninh mbuo tengx jienv diex maac zoux nyungc-nyungc gong, dongh ninh mbuo haih zoux duqv nyei dorngx, maiv dungx aapv fai hoic fu’jueiv zoux hniev haic nyei gong, nziex haih hoic zuqc ninh mbuo nyei buonh sin. Fu’jueiv, oix zuqc bangc-faix njaaux, zuov ninh hlo daaih, ninh ziouc maiv mingh pien aqv, Congh Mengh fin-saeng hnangv naaiv nor gorngv, “Njaaux fu’jueiv gan ninh horpc zuqc yangh nyei jauv, zuov ninh gox daaih ninh ziouc maiv leih nqoi.” (Congh Mengh Sou 22:6). Maaih mienh camv nyei kungx gorngv, fu’jueiv faix haic mv haih njaaux maiv mengh baeqc, oix zuqc zuov taux benx domh mienh caux mbuo fih lomh fih mbaengc aqv cingx daaih njaaux, zuov fu’jueiv hlo daaih mv haih gorngv fu’jueiv maiv muangx aqv, maiv haih noic maiv duqv fu’jueiv muangx ninh mbuo gorngv nyei waac, ziouc longc manh leiz hemx aapv, zioux, mborqv fu’jueiv, ziouc caux fu’jueiv daav cuotv win daaih, maaih ziex dor mienh laaix naaiv nyungc jauv caux fu’jueiv benx win-jaa. Die maa oix zuqc gunv njaaux fu’jueiv, oix zuqc njaaux fu’jueiv jienh cinx gong-bou jauv, weic maiv oix bun fu’jueiv haih benx mienh lueic mienh. Se gorngv maaih fu’jueiv camv, oix zuqc hnamv fih ndongc, maaih haaix nyungc longx nyei ga’naaiv oix zuqc bun baengh, gong-bou jauv yaac oix zuqc njaaux fu’jueiv zoux fih hnangv, oix zuqc njaaux fu’jueiv, muoz-doic oix zuqc laanh hnamv laanh, oix zuqc bun nqoi hnamv nyei hnyouv dauh dauh fu’jueiv fih hnangv nyei, bun dauh


dauh duqv zipv fih hnangv nzengc, maiv gunv dorn fai sieqv, yietc zungv yaac benx mbuo ganh nyei nziaamv-fei, yaac benx Tin-Hungh nyei fuqv. Hnamv fu’jueiv nyei jauv se maiv zeiz gorngv, fu’jueiv oix longc haaix nyungc, maiv gunv horpc zuqc longc fai maiv horpc zuqc longc nyei jauv ziouc oix zuqc bun aqv, fai fu’jueiv ceuv haaix nyungc mbuo ziouc oix zuqc ei nzengc, se maiv zeiz hnangv naaic. Hnamv fu’jueiv nyei eix-leiz se, ziux goux ninh mbuo, dorh longx ninh mbuo, maiv dungx kuei fu’jueiv, maiv dungx zioux fu’jueiv, maiv dungx hemx waac-doqc fai zoux cun zoux doqc bun ninh mbuo, maaih nyanc, maaih hopv, maaih lui-houx zuqc oix zuqc bun baengh, maaih zinh maaih nyaanh longc oix zuqc bun fih mbuoqc. Maaih ziex dor mbuo Iu-Mienh, m’jangc dorn, maaih zinh maaih nyaanh nzaeng jienv ganh longc hnangv, maiv liuc leiz ziux goux hmuangv doic auv-jueiv, auv caux fu’jueiv lui-houx mv maaih zuqv, hnaangx mv maaih nyanc, yaac maiv gunv, hnangv naaiv zoux se maiv horpc. Ging-Sou gorngv, “Se gorngv haaix dauh maiv goux ganh nyei cien-ceqv, lengc jeiv goux ganh nyei hmuangv doic, wuov dauh se ngaengc zien doz aqv. Ninh zungv gauh waaic jiex maiv sienx Yesu nyei mienh.” (1 Ti^mo^tai 5:8). Ziux goux hmuangv doic nyei jauv se longc jienv haic yiem mbuo Giduc Mienh gu’nyuoz, se gorngv mbuo maiv gunv goux jaa-dingh caux hmuangv doic nor, mbuo yaac maiv haih fuh sux Tin-Hungh. Mbuo fuh sux Tin-Hungh nyei jauv se, da’yietv bouc oix zuqc ziux goux ganh nyei hmuangv doic, se gorngv mbuo maiv ziux goux mbuo nyei hmuangv doic, mbuo yaac maiv puix fuh sux Tin-Hungh (1 Ti^mo^tai 3:1-13; Tidatc 1:5-9). Zoux die zoux maa nyei mienh, maaih fu’jueiv oix zuqc njaaux fu’jueiv yiem seix zangc oix zuqc zoux horpc, oix zuqc zoux kuv sic, maiv dungx zoux pa’li pa’laaix nyei jauv, oix zuqc njaaux ninh mbuo tengx jienv zoux gong, yiem ndorm zinh nziouv hmuangx bieqc cuotv, ndorm muongz nyei gong-bou jauv. Zoux diex maac nyei mienh oix zuqc njaaux fu’jueiv, weic tengx ninh mbuo yiem seix zangc haih hiuv duqv zoux horpc nyei jauv, cuotv liuz naaiv buoqv jauv, corc oix zuqc longc hnyouv njaaux Ziouv Yesu nyei leiz-fingx, oix zuqc njaaux ninh mbuo haih longc Ging-Sou nyei leiz zoux gorn-ndoqv tengx ninh mbuo nyei maengc. Mbuo Giduc Mienh njaaux fu’jueiv, oix zuqc longc Ging-Sou zoux gorn-ndoqv, se gorngv mbuo njaaux ninh mbuo hiuv duqv Tin-Hungh, taaih Tin-Hungh


nor, ninh mbuo ziouc hiuv duqv tongx nimc mbuo domh mienh diex maac aqv. Ging-Sou njaaux taux mbuo njaaux fu’jueiv nyei jauv se hnangv naaiv, “Zoux die nyei mienh aah! Maiv dungx cuoqv meih mbuo nyei fu'jueiv qiex jiez. Oix zuqc ei Ziouv Yesu nyei leiz dorh longx fu'jueiv, njaaux ninh mbuo muangx waac.”(E^fe^so 6:4). “Zoux die nyei mienh aah! Maiv dungx cuoqv meih mbuo nyei fu’jueiv. Nzauh heix ninh mbuo nyei hnyouv namx.” (Ko^lo^si 3:21). Yiem naaiv deix i kang Ging-Sou njaaux mbuo zoux die nyei mienh maiv dungx cuoqv mbuo nyei fu’jueiv, mv baac oix zuqc ei Ziouv nyei leiz dorh longx ninh mbuo, yaac njaaux ninh mbuo muangx waac, eix-leiz se, se gorngv mbuo kungx cuoqv ninh mbuo qiex jiez mbuo hnangv nor, mbuo njaaux nyei jauv, gorngv nyei waac, ninh mbuo ziouc maiv muangx mbuo aqv. Yiem Congh Mengh Sou yaac gorngv, “Fu’jueiv oix zuqc bangh faix njaaux, zuov ninh hlo daaih ninh ziouc maiv la’kuqv njaaux ninh nyei waac.” (Congh Mengh 22:6). Oix zuqc njaaux fu’jueiv hiuv taux ninh ganh nyei ziangh maengc yiem seix zangc hnangv haaix nor, bun ninh yietc liuz yietc seix jangx jienv taux ninh daic. Zoux die zoux maa nyei mienh oix zuqc ziux goux njaaux fu’jueiv yangh horpc nyei jauv, yiem ndorm zinh nziouv hmuangx bieqc cuotv, nyungc-nyungc jauv, yaac oix zuqc njaaux ninh mbuo hiuv duqv sienx Yesu nyei leiz-fingx hnangv haaix nor. Diex maac oix zuqc hnoi-hnoi gunv njaaux fu’jueiv nyei jauv horpc nyei, maaih dauh baav mienh njaaux fu’jueiv nyei jauv, se kungx oix mborqv oix hemx fu’jueiv hnangv, maaih deix yoc korh lienh haic fu’jueiv, hnamv fu’jueiv jiex ndaangc mingh, maaih deix yoc diev jienv sueih binc fu’jueiv zoux haaix nyungc yaac baac, maiv gorngv maiv hemx, maiv gunv fu’jueiv zoux maiv zuqc longc nyei jauv yaac maiv njaaux, naaiv deix yietc zungv zoux daaih yaac maiv horpc, se gorngv mbuo sueih fu’jueiv oix zoux haaix nyungc duqv nor, gamh nziex ninh hlo daaih ziouc maiv muangx meih nyei waac aqv. Njaaux fu’jueiv horpc nyei jauv se, buatc fu’jueiv zoux daaih mv zuqc nyei dorngx, diex maac oix zuqc njaaux oix zuqc gorngv-hemx, gengh haaix dauh fu’jueiv m’normh baqc laqc hoz cung nor, oix zuqc maaih deix mborqv njaaux nyei jauv, mv baac maiv dungx mborqv jiex jaax, maaih deix mienh maiv oix njaaux fu’jueiv, zuov taux fu’jueiv gorngv mv muangx nyei ziangh hoc nor mborqv aqv, maaih ziex dor mienh zorqv fu’jueiv


mborqv waaic nzengc, maaih deix corc mborqv daic yaac maaih nyei, se gorngv meih hnangv naaic zoux nor se maiv horpc. Njaaux fu’jueiv nyei jauv se maiv dungx zuov taux meih qiex jiez, se gorngv meih zuov taux qiex jiez nor, nziex meih haih mborqv fu’jueiv, se gorngv hnangv naaic zoux se maiv horpc yietc deix, maaih deix mienh njaaux fu’jueiv, oix zuov taux buatc fu’jueiv zoux maiv benx aqv, yaac haiz qiex jiez camv aqv, cingx daaih njiec buoz mborqv fu’jueiv, se hnamv yietc nzunc hnangv oix bun ninh dingh njiec zoux waaic nyei jauv. Hnangv naaiv hnamv, zoux naaic nyungc sic se maiv funx longx nyei jauv, yaac maiv funx gorngv naaic se njaaux fu’jueiv. Se gorngv haaix dauh hnangv naaic hnamv nor gengh hnamv dorngc aqv, se gorngv meih hnangv naaic zoux nor, nziex meih haih mborqv waaic fu’jueiv nyei sin, se gorngv hnangv meih oix bun meih nyei fu’jueiv ziangh horngh muangx meih nyei waac nor, meih mbuo zoux die zoux maac nyei mienh oix zuqc dongh diuc hnyouv, yaac dongh norm mouz deic njaaux fu’jueiv. Njaaux fu’jueiv muangx waac nyei jauv yaac maiv zeiz gorngv, mborqv njaaux yietc nzunc hnangv ziouc muangx waac aqv. Njaaux fu’jueiv, hatc fu’jueiv nyei jauv se weic bun fu’jueiv ziangh horngh muangx waac, weic oix bun ninh hlo daaih nyei ziangh hoc benx kuv mienh, diex maac cingx daaih oix zuqc njaaux horpc dorh horpc ei njaaux fu’jueiv nyei leiz, se gorngv mbuo njaaux fu’jueiv nyei ziangh hoc, mbuo zoux qiex jiez nor, fu’jueiv hlo daaih yaac oix zuotc jienv zoux qiex jiez bun ninh mbuo nyei fu’jueiv caux ganh dauh mienh. Njaaux fu’jueiv nyei jauv se weic oix bun fu’jueiv ziangh horngh benx kuv mienh, se gorngv fu’jueiv maiv muangx waac, ziouc oix zuqc maaih deix baav mborqv njaaux nyei jauv, mv baac maiv dungx pa’laqc mborqv jiex ndaangc, nziex haih mborqv waaic fu’jueiv nyei sin. Njaaux fu’jueiv, mborqv fu’jueiv nyei jauv, se weic oix bun ninh hlo daaih nyei ziangh hoc benx kuv mienh, hnangv naaic diex maac cingx daaih horpc zuqc njaaux fu’jueiv yiem dongh qiex maiv jiez nyei ziangh hoc, mv baac se gorngv doix zuqc maaih dauh baav fu’jueiv m’normh pa’laqc hoz haic nor, ziouc oix zuqc maaih deix mborqv njaaux nyei jauv hatc ninh, mv baac oix zuqc dongh maiv maaih qiex jiez hnyouv nyei ziangh hoc. Ging-Sou gorngv taux mborqv njaaux fu’jueiv nyei jauv se hnangv naaiv, “Hngongx nyei jauv se yiem jienv fu’jueiv nyei hnyouv gu’nyuoz, se gorngv meih longc biaav-bin mborqv


ninh nor, ziouc zunc nqoi hngongx nyei jauv yiem meih nyei fu’jueiv nyei hnyouv cuotv mingh.” (Congh Mengh 22:15). Mborqv njaaux fu’jueiv, yiem horpc nyei jauv se maiv dorngc, tengx fu’jueiv benx kuv mienh, yaac tengx ninh mbuo haih hiuv duqv haaix nyungc horpc zuqc zoux haaix nyungc maiv horpc zuqc zoux, haaix nyungc zoux duqv, haaix nyungc zoux mv duqv nyei jauv. Ging-Sou yaac gorngv, “Meih oix zuqc mborqv njaaux fu’jueiv, maiv dungx guangc. Meih longc biaav fitv ninh, ninh se maiv daic. Se gorngv meih longc biaauv fitv ninh, meih ziouc njoux ninh nyei maengc maiv zuqc mingh yiem yiemh gen.” (Congh Mengh 23:13-14). Maiv daan mbuoqc naaiv hnangv, Ging-Sou yaac aengx gorngv, “Haaix dauh nyienz jienv maiv longc biaav mborqv njaaux ninh nyei dorn, wuov dauh se maiv hnamv ninh nyei dorn. Haaix dauh hnamv ninh nyei dorn se jienh mborqv njaaux.” (Congh Mengh 13:24). Fu’jueiv ziangh horngh se oix zuqc maaih kuv nyungc zeiv bun fu’jueiv mangc, ninh mbuo cingx maaih dorngx zuotc, diex maac se dongh da’yietv dauh fin-saeng, yaac zoux da’yietv norm nyungc zeiv bun fu’jueiv zuotc nyei mienh, fu’jueiv buatc diex maac kungx zoux longx nyei sic hnangv nor, fu’jueiv hlo daaih yaac oix zuotc jienv zoux longx, mv baac se gorngv diex maac nyei nyungc zeiv maiv benx, fu’jueiv buatc hnangv naaic nor, ninh ziouc zoux gan jienv waaic nyei jauv mingh. Diex maac se dongh fu’jueiv longc nyei nyungc zeiv, longc nyei leiz, gorngv nyei waac, diex maac gorngv nyei waac oix zuqc cing-nzengc yaac oix zuqc zien, maiv horpc zuqc gorngv-baeqc nduov fu’jueiv, diex maac gorngv nyei waac oix zuqc maaih eix-leiz hnangv nzauv nor, weic bun fu’jueiv maaih nyungc zeiv zuotc, yaac haih duqv dorh daaih longc mingh wuov ndaangc hingv ninh mbuo nyei seix. Se gorngv fu’jueiv buatc domh mienh diex maac, maaih kuv nyungc zeiv, zoux longx nyei jauv nor, ninh mbuo yaac oix gan jienv zoux longx, se gorngv fu’jueiv buatc diex maac hnamv Tin-Hungh, hnamv mienh, ndorm muongz doqc Ging-Sou daux gaux, mingh zoux leiz-baaix lo haaix nor, fu’jueiv yaac oix zuotc jienv hoqc hnamv Tin-Hungh. Se gorngv diex maac maaih hnamv nyei hnyouv nor, fu’jueiv yaac hoqc hiuv, maaih hnamv mienh nyei hnyouv, yaac maaih hnyouv nitv jienv domh mienh zoux nyei sic fih hnangv nyei, se gorngv ninh mbuo buatc diex maac hnoi-hnoi doqc Ging-Sou, yaac jienh mingh zoux leiz-


baaix, maiv dangx yietc nzunc, ninh mbuo ziouc buangv hnyouv oix mingh ei jienv zoux nyungc-nyungc. Mv baac se gorngv ninh mbuo buatc domh mienh diex maac kungx nzaeng jaax mborqv jaax, hopv diuv, buov in, gorngv-baeqv hnangv, yaac maiv mingh zoux leiz-baaix nor, fu’jueiv yaac maiv hoqc zoux longx nyei jauv aqv. Se gorngv mbuo ganh domh mienh diex maac maiv maaih hnyouv oix zoux longx nyei jauv nor, mbuo maiv zuqc hnamv gorngv, mbuo nyei fu’jueiv benx kuv mienh, mbuo laanh laanh mienh zoux die zoux maa nyei mienh, oix buatc mbuo nyei fu’jueiv ziangh horngh hnamv Tin-Hungh, gan longx Tin-Hungh nor, mbuo ganh oix zuqc jiex gorn hoqc hnamv Tin-Hungh, nitv fatv Tin-Hungh, bun mbuo nyei fu’jueiv cingx daaih maaih dorngx zuotc. Diex maac oix zuqc mbenc ziangx maaih gorn-ndoqv nyei jauv weic tengx ceix ganh nyei fu’jueiv nyei maengc, njaaux fu’jueiv nyei jauv se mbuo zoux die zoux maa mienh nyei gong, oix zuqc beu jienv gunv jienv nyungc-nyungc sic, dongh diex maac hnamv jienv oix buatc fu’jueiv haih maaih longx nyei jauv cuotv yiem ninh mbuo nyei maengc wuov, se diex maac oix zuqc njiec qaqv, njiec ziangh hoc, caux zinh nyaanh ceix fu’jueiv nyei maengc. Da’hmz Ginc Njaaux Fu’jueiv Nyei Leiz-Fingx A. Tin-Hungh Paaiv Mbuo Zoux Gong Dorh Hmuangv Doic Loz-hnoi Tin-Hungh mbuox I^saa^laaên mienh oix zuqc njaaux ninh mbuo nyei fu’jueiv gan Tin-Hungh nyei leiz wuov zanc Tin-Hungh ganh hnangv naaiv nor gorngv,“O I^saa^laaên Mienh aac, muangx longx oc. Mbuo nyei Ziouv, Tin-Hungh, se nduqc dauh Ziouv hnangv. Oix zuqc longc nzengc hnyouv, longc nzengc za’eix, longc nzengc qaqv hnamv Ziouv, meih mbuo nyei Tin-Hungh. Yie ih hnoi jiu bun meih mbuo naaiv deix leiz oix zuqc longc hnyouv jangx jienv. Oix zuqc jienh njaaux meih mbuo nyei fu’jueiv hiuv duqv naaiv deix leiz. Maiv gunv yiem biauv fai yiem ndaam jauv zangc, bueix njiec fai jiez sin, zungv oix zuqc zorqv naaiv deix leiz kou jienv meih mbuo nyei buoz yaac nyatv jienv meih mbuo nyei biorngh zoux jangx-hoc. Yaac oix zuqc fiev jienv meih mbuo nyei biauv nyei gaengh caa caux meih mbuo nyei laatc gaengh.(Nzamc Leiz-Latc 6:4-7). Yiem naaiv douc Ging-Sou njaaux mbuo zoux die zoux maa nyei mienh oix zuqc njaaux mbuo nyei fu’jueiv taux Tin-Hungh nyei leiz, bun ninh mbuo hlo daaih haih gan


longx Tin-Hungh: (1) mbuo oix zuqc njaaux fu’jueiv hnamv Tin-Hungh muangx Tin-Hungh nyei waac; (2) mbuo oix zuqc njaaux fu’jueiv gan Tin-Hungh nyei leiz; (3) mbuo oix zuqc njaaux fu’jueiv maiv dungx la’kuqv Tin-Hungh. Mv daan mbuoqc naaiv hnangv, maaih ziex norm dorngx Ging-Sou gorngv zoux die zoux maa nyei mienh oix zuqc ei Ziouv Yesu nyei leiz dorh longx ganh nyei fu’jueiv, yaac njaaux ninh mbuo muangx waac (E^fe^so 6:4). Zoux die zoux maa nyei mienh yaac maiv dungx cuoqv fu’jueiv, fai zoux bun fu’jueiv hnyouv namx (Ko^lo^si 3:21). Tin-Hungh paaiv mbuo zoux gong dorh jiu bang, dorh hmuangv doic yangh fai gan Tin-Hungh nyei leiz, mv baac se gorngv mbuo maiv zoux mbuo nyei gong nor, mbuo ziouc maaih sic yiem mbuo nyei jiu baang hmuangv doic aqv. Yiem zoux bieiv mienh nyei leiz wuov douc Ging-Sou gorngv, haiv dauh maiv haih goux ganh nyei hmuangv doic longx nor, ninh mv puix duqv zoux bieiv dorh Tin-Hungh nyei jiu baang (1 Ti^mo^tai 3:4-5,12). Hnangv naaic, bun mbuo hiuv duqv gorngv njaaux fu’jueiv, dorh fu’jueiv nyei jauv gengh longc jienv haic yiem mbuo nyei maengc. Se gorngv mbuo hnamv Tin-Hungh nyei, yaac maaih hnyouv oix fuh sux Tin-Hungh nyei, mv baac mbuo nyei fu’jueiv maiv benx nor, mbuo yaac mv puix duqv zoux Tin-Hungh nyei gong. Mbuo fuh sux Tin-Hungh fai zoux Tin-Hungh nyei gong se da’yietv nyungc njaaux mbuo ganh nyei fu’jueiv muangx waac gan longx Tin-Hungh nyei leiz, ziux goux ganh nyei hmuangv doic (1 T^mo^tai 5:8). Giduc mienh nyei biauv zong hmuangv doic se laanh oix zuqc hnamv laanh. Weic zuqc mbuo lomh nzoih zoux Tin-Hungh hnamv haic nyei naamh nyuoz, mbuo yaac oix zuqc zuotc ninh nyei nyungc zoux. Mbuo zoux nyei nyungc-nyungc sic oix zuqc hnamv mienh hnangv Giduc hnamv mbuo nor (E^fe^so 5:1-2). Giduc Mienh nyei hmuangx doic oix zuqc dongh diuc hnyouv yaac oix zuqc horpc fim dongh eix laanh mbuoqc laanh weic zuqc mbuo lomh nzoih taaih Giduc Yesu nyei mienh (E^fe^so 5:21). B. Njaaux Fu’jueiv Yangh Horpc Nyei Jauv Fu’jueiv se oix zuqc bangh faix njaaux, njaaux ninh mbuo yangh horpc nyei jauv, zuov ninh mbuo hlo daaih ziouc maiv haih la’kuqv ninh mbuo yangh nyei jauv (Congh Mengh 22:6). Maiv dungx simv jienv maiv hatc njaaux meih mbuo nyei fu’jueiv yiem faix nyei ziangh hoc(Congh Mengh Sou 23:13-14).


Hatc njaaux meih nyei dorn, dongh corc maaih lamh hnamv nyei ziangh hoc(Congh Mengh 19:18). Hatc njaaux meih nyei dorn nor, ninh ziouc oix bun meih maaih baengh orn (Congh Mengh 29:17). Haiv dauh mienh hnamv ninh nyei dorn nor, ninh faix fim nyei hatc njaaux ninh (Congh Mengh 13:24). Longc biaa hatc njaaux meih nyei dorn–jueiv se haih zunc cuotv hngongx nyei jauv(Congh Mengh 22:15).

C. Zoux Die Zoux Maa Mienh Nyei Gong-Ginc Zoux diex maac nyei mienh oix zuqc ei Ziouv Yesu nyei leiz dorh longx ganh nyei fu’jueiv yaac njaaux ninh mbuo muangx waac (E^fe^so 6:4). Zoux die zoux maa nyei mienh maiv dungx cuoqv fu’jienv qiex jiez (Ko^lo^si 3:21). Fu’jueiv oix zuqc bangh faix njaaux, se gorngv maiv bangh faix njaaux nor, zuov ninh hlo daaih maiv benx mbuo ganh oix zuqc ndaam-dorng ninh mbuo zoux nyei sic(1 Saa^muên l 3:11-14). Zoux die zoux maa nyei mienh oix zuqc ndorm muonz jienh njaaux mbuo nyei fu’jueiv, Tin-Hungh gorngv, “Oix zuqc jienh njaaux meih mbuo nyei fu’jueiv hiuv duqv naaiv deix leiz. Maiv gunv yiem biauv fai yiem jauv zangc, bueix njiec fai jiez sin, zungv oix zuqc buih jienv yiem.”(Nzamc Leiz-Latc 6:7). Mbuo Giduc Mienh njaaux fu’jueiv nyei jauv se oix zuqc ei Ziouv Yesu nyei leiz njaaux. Njaaux Tin-Hungh nyei jauv bun ninh mbuo hiuv, dorh ninh mbuo mingh lorz Tin-Hungh nyei jauv. Njaaux fu’jueiv nyei jauv se oix zuqc maaih biauv zong nyei leiz gunv njaaux fu’jueiv, fu’jueiv cingx daaih haih muangx , haih ei jienv zoux. Se gorngv mbuo oix fu’jueiv muangx mbuo nyei waac, mbuo oix zuqc longc ziangh hoc caux ninh mbuo. Njaaux fu’jueiv nyei jauv se maiv fih hnangv, mbuo Dong Naamh AA nyei mienh njaaux fu’jueiv, gauh camv jiex se hemx mborqv, mv baac yiem Fai Bung Maengx nyei mienh gauh camv jiex se longc waac njaaux hnangv, mborqv nyei jauv se gauh zoqc, se gorngv mborqv maiv horpc nor, haih mborqv waaic fu’jueiv nyei sin caux haih zoux bun fu’jueiv hngongx. I. Fu’jueiv Maiv Muangx Waac Nyei Jauv 1.Domh mienh mv maaih biauv zong nyei leiz gunv njaaux fu’jueiv nyei jauv. 2.Domh mienh maiv liuc leiz ziux goux fu’jueiv . 3.Domh mienh maiv longc ziangh hoc caux fu’jueiv jiu tong. 4.Domh mienh maiv njaaux fu’jueiv.


5.Domh mienh ganh maiv maaih horpc fim nyei jauv. 6.Domh mienh sueih fu’jueiv ei ninh nyei hnyouv zoux. 7.Domh mienh maiv gunv njaaux fu’jueiv nyei jauv . 8.Domh mienh maiv zoux kuv nyungc zeiv bun fu’jueiv zuotc. 9.Fu’jueiv yiem zuqc mienh waaic mienh nyei dorngx caux zuqc waaic nyei doic.

II. Hmuangv Doic Oix Zuqc Maaih Biux Mengh Hnamv Nyei Jauv Se gorngv domh mienh oix fu’jueiv muangx waac, domh mienh oix zuqc maaih biux mengh hnamv nyei jauv bun fu’jueiv. Domh mienh oix zuqc longc Ziangh hoc caux fu’jueiv jiu tong, yaac zoux doic. Domh mienh oix zuqc ndorn muonz daux gaux weic fu’jueiv. Die caux maa ganh yaac oix zuqc maaih biux mengh hnamv nyei jauv zoux nyungc zeiv bun fu’jueiv zuotc.

III. FU’JUEIV EI JIENV NINH MBUO YIEM NYEI DORNGX HLO DAAIH Se gorngv fu’jueiv yiem laanh hnamv laanh nyei dorngx, ninh mbuo ziouc hoqc hnamv mienh. Se gorngv fu’jueiv yiem laanh nzorng laaih nyei dorngx, ninh mbuo ziouc hoqc nzorng mienh. Se gorngv fu’jueiv yiem maaih baengh orn nyei dorngx, ninh mbuo ziouc hoqc baengh orn nyei yiem. Se gorngv fu’jueiv yiem ceux lunc nyei dorngx, ninh mbuo ziouc hoqc ceux lunc. Se gorngv fu’jueiv yiem longc noic nyei dorngx, ninh mbuo ziouc hoqc longc noic. Se gorngv fu’jueiv yiem qiex beqv nyei dorngx, ninh mbuo ziouc hoqc zoux qiex beqv. Se gorngv fu’jueiv yiem laanh taaih laanh nyei dorngx, ninh mbuo ziouc hoqc taaih dieh dauh. Se gorngv fu’jueiv yiem gorngv doqc mienh nyei dorngx, ninh mbuo ziouc hoqc gorngv doqc mienh. Se gorngv fu’jueiv yiem baengh fim nyei dorngx, ninh mbuo ziouc hoqc zoux baengh fim. Se gorngv fu’jueiv yiem hnamv Tin-Hungh nyei dorngx, ninh mbuo ziouc hoqc hnamv Tin-Hungh. Se gorngv fu’jueiv yiem laanh mbuoqc laanh nyei dorngx, ninh mbuo ziouc hoqc mbuoqc domh mienh. Se gorngv fu’jueiv yiem laanh ceng laanh nyei dorngx, ninh mbuo ziouc hoqc ceng dieh dauh. Se gorngv fu’jueiv yiem nzaeng jaax nyei dorngx, ninh mbuo ziouc hoqc nzaeng jaax. Se gorngv fu’jueiv yiem laanh a’hneiv laanh nyei dorngx, ninh mbuo ziouc hoqc a’hneiv dieh dauh. Se gorngv fu’jueiv yiem laqc ngopv nyei dorngx, ninh mbuo ziouc hoqc laqc ngopv. Se gorngv fu’jueiv yiem hnamv Yesu nyei dorngx, ninh mbuo ziouc hoqc hnamv Yesu


Da’luoqc Ginc Hmuangv Doic Nyei Gong-Ginc A. Nqox Caux Auv Nyei Gong E^fe^so 5:21-6:4 Nqox oix zuqc hnamv ganh nyei auv hnangv Giduc hnamv Jiu-baang nor. Auv oix zuqc mbuoqc ganh nyei nqox hnangv jiu-bang mbuoqc Giduc nor. Fu’jueiv oix zuqc muangx diex maac nyei waac. Diex maac maiv dungx cuoqv fu’jueiv qiex jiexz. Oix zuqc ei Ziouv Yesu nyei leiz dorh longx fu’jueiv, njaaux ninh mbuo muangx waac. B. Hnangv Haiv Nor Njaaux Fu’Jueiv

Fu’jueiv oix zuqc yiem faix nyei ziangh hoc njaaux, zuov ninh hlo daaih nyei ziangh hoc, ninh ziouc maiv la’kuqv mbuo njaaux ninh nyei waac (Congh Mengh Sou 22:6). Dongh mbuo hiuv nyei, caux buatc jiex nyei jauv, mbuo oix zuqc njaaux bun mbuo nyei fu’jueiv hiuv duqv (Yoên 1:1-3). C. Mborqv Njaaux Nyei Jauv: Fu’jueiv yiem cuotv seix daaih mingh lorz juqv hnyaangx nyei ziangh hoc, oix zuqc maaih hatc njaaux caux mborqv njaaux yiem buonh sin nyei jauv. Oix zuqc maaih longc waac njaaux, yaac oix zuqc maaih mborqv njaaux nyei jauv. D. Longc Waac Njaaux Nyei Jauv: Fu’jueiv yiem juqv hnyaangx mingh lorz ziepc hnyaangx nyei ziangh hoc, oix zuqc longc waac hatc njaaux ninh mbuo gauh camv. Oix zuqc maaih longc waac njaaux, yaac oix zuqc maaih zorqv zuiz nyei jauv. E. Longc Qiemx Zuqc Nyei Jauv Caux Orn Hnyouv Nyei Waac: Fu’jueiv yiem ziepc hnyaangx mingh lorz ziepc hmz hnyaangx nyei ziangh hoc, oix zuqc longc dongh ninh mbuo qiemx zuqc nyei jauv njaaux. Se gorngv ninh mbuo muangx waac nor, ninh mbuo qiemx zuqc longc haaix nyungc ziouc oix zuqc bun ninh mbuo. F. Longc Jiu Tong Jauv Caux Orn Hnyouv Nyei Waac Fu’jueiv yiem ziepc hmz hnyaangx mingh lorz nyic ziepc hnyaangx nyei ziangh hoc, oix zuqc longc ziangh hoc caux ninh mbuo jiu tong, orn ninh mbuo nyei hnyouv. Oix zuqc njaaux ninh mbuo hiuv duqv deic-bung doz-leiz caux leiz-fingx nyei jauv.


G. Dorngc Leiz-Fingx Nyei Jauv Maaih mienh longc ziangh hoc dimv mangc auv-nqox mborqv jaax nyei jauv. Ninh mbuo gorngv lorz duqv buatc maaih hnangv naaiv. Zoux doqc bun cai-doix nyei jauv se norm-norm 18 buon ziangh hoc yiem naaiv lungh ndiev maaih m’sieqv dorn zuqc nqox fai jaah zeih nqox mborqv. Dongh mborqv auv, mborqv nqox nyei jauv se maaih deix zoux bun sin zangc caux hnyouv zangc waaic. Se gorngv maiv maaih haiv dauh mingh tengx caeqv nor, maaih deix zungv zuqc mborqv daic. Mborqv mienh, zoux ciouv nyei jauv se hoqc daaih zoux nyei sic. Dongh wuov deix fu’jueiv duqv buatc fai duqv maaih hmuangv doic mborqv jaax yiem ninh mbuo nyei biauv nor ninh mbuo nzengc-nzengc yaac horqc fai zuotc jienv hnangv naaic zoux bun ninh mbuo nyei cai-doix, fai dongh caux ninh mbuo yiem nyei mienh aqv. Maaih jauv haih tengx duqv mborqv auv mborqv nqox nyei mienh nyei. Meih oix zuqc mingh lorz orn hnyouv nyei mienh fai horh kuinx nyei mienh tengx caangh laangh. Horh kuinx nyei mienh naaic dauh haih tengx njaaux taux hnangv haaix nor zoux haih gunv duqv ganh nyei buonh sin caux ga’qiex nyei jauv njiec, ninh haih lorz jauv daaih tengx meih bun ga’qiex fiu aeqv maiv zuqc mborqv mienh. Maaih dauh mienh auv nor, duqv i hnyaangx jiex daaih aqv, ninh zuqc ninh nyei nqox mborqv ninh duqv i buo nzunc aqv. Mv baac ninh corc hnamv haic ninh nyei nqox. Dongh ninh nyei nqox qiex jiex nyei ziangh hoc, ninh gengh gamh nziex haic ninh nyei nqox. Ninh oix ninh nyei nqox dingh maiv mborqv ninh, mv baac ninh gamh nziex maiv lorz mienh daaih tengx ninh. Ninh gamh nziex maiv guangc nqox weic zuqc maiv oix bun ninh nyei die maa mienh muoz zuqc nyaiv. Ninh oix zuqc hnangv haaix nor zoux? Ninh haih heuc tengx mienh nyei mienh daaih tengx ninh nyei: Yiem Meiv Guoqv Se Maaih Njoux Maengc Nyei Dorngx Nyei 1. Jien-zaah baeng (Police): 911 or (510) 233-1214 2. Njoux maengc gorn (National Domestic Violence Hotline): 1-800-799-7233 3. Tengx m’sieqv dorn nyei gorn zangc (Women Refuge): (510) 547-4663 4. Njoux maengc nyei dorngx (A Safe Place): (510) 536-7233 5. Tengx m’juangc dorn (The Peniel Mission or Men’s shelter) (510) 452-3758


Zoux doqc bun fu’jueiv nyei jauv se maaih hnangv naaiv. Zoux doqc bun fu’jueiv nyei sin: cuotv liuz maiv zeiz ca’bouc zoux zuqc mun nor, da’faanh zoux bun fu’jueiv nyei sin mun, se hnangv: mborqv, ngatc,ndiqv, zorqv dorh mingh ziemx wuom-mbueix, mborqv gu’kuotv butv mbiuz, mborqv buoz-zaux nauv, fai dongh haaix nyungc zoux liuz bun fu’jueiv butv mbiuz fai maaih naanx fai maaih hanh nor se dorngc leiz aqv. Ziouc oix zuqc mingh taux nyaangh muonh siemv dingc zuiz aqv, maiv gunv yiem domh ziuh fai fiuv ziuh yaac fih hnangv nyei. Yiem 1948 wuov norm hnyaangx zuangx lungh ndiev mienh liepc daaih nyei leiz-fingx, “baamh mienh horpc leiz jauv nyei leiz-fingx” (Human Right Laws). Gorngv, se gorngv haaix dauh zoux cunv zoux doqc bun mienh nor, ziouc oix zuqc dingc zuiz. Yiem naaiv deix zuangx guoqv nyei leiz-fingx, da’faam diuh gorngv, “dauh dauh mienh maaih leiz ziangh seix zangc, yaac maaih leiz gunv goux ninh nyei ziangh maengc nyei (Every one has right to life, liberty and security of person), da’hmz diuh gorngv, “mv maaih haaix dauh maaih leiz haih zoux cunv, zoux doqc bun ganh dauh mienh, mborqv mienh, dingc zuiz mienh, dongh maiv zoux dorngc nyei jauv (No one shall be subjected to torture or to cruel, inhuman or degrading treatment or punishment). Zioux, zoux bun fu’jueiv nyei hnyouv waaic: Longc waac-zaanc, waac-laih-hopv hemx fu’jueiv. Baac-baac zioux weic oix bun fu’jueiv maiv lamh kaux dorngx, bun fu’jueiv sienx gorngv ninh se maiv maaih banh zeic, maiv maaih jaah zinh nyei mienh. Caa hienx fu’jueiv nyei jauv: Naaiv se piun fai muoqv fu’jueiv nyei nyorx, fai fu’jueiv nyei qamh gorn, fai longc ga’naaiv baqv fu’jueiv nyei qamh gorn fai lamh mbueiz dorngx. maiv gunv maiv taanx fu’jueiv: Maiv bun lai-hnaangx gaux nyanc, maiv bun lui-houx gaux zuqv, maiv maaih biauv bun fu’jueiv yiem, maiv maaih mienh goux mangc fu’jueiv fai liuc leiz fu’jueiv nyei buonh sin qiemx zuqc nyei jauv. Domh mienh maiv liuc leiz ziux goux fu’jueiv, fu’jueiv maiv maaih ga’naaiv nyanc bun ninh haih hlo.Maiv bun fu’jueiv haih hlo: Maiv bun dongh fu’jueiv qiemx zuqc nyanc nyei lai hnaangx tengx ninh mbuo haih hlo. Bun fu’jueiv ngorc, naaiv deix leiz liepc daaih tengx fu’jueiv weic zuqc fu’jueiv maiv haih tengx duqv ninh mbuo ganh. Dongh zoux dorngc doz-leiz caux leiz-fingx nyei jauv se maaih hnangv naaiv:


H. Zoux Bun Fu’Jueiv Nyei Jauv: Mborqv, zong, buov, fai zoux bun fu’jueiv mun. Zorqv fu’jueiv dorh mingh wuonx, zoux doqc hoic, caa hienx fu’jueiv. Bun fu’jueiv ganh yiem biauv, fai yiem cie mv maaih domh mienh goux mangc. Maiv bun lui-houx caux ga’naaiv-nyanc gaux meih nyei fu’jueiv. Zoux hiuang-orqv-sic hoic fai mun meih nyei fu’jueiv. Maiv ziux goux mangc meih nyei fu’jueiv taux doqc sou nyei jauv. Maiv liuc leiz fungx fu’jueiv mingh horqc dorngh doqc sou. Bun gauh gox nyei fu’jueiv caa hienx fai zoux mun bun fu’jueiv lunx. I. Zoux Bun Cai-Doix Nyei Jauv: Mborqv, zong, fai zoux mun bun cai-doix fai caux meih juangc yiem nyei mienh. Houv waac oix zoux mun bun cai-doix fai caux meih juangc yiem nyei mienh. Wuonx hoic cai-doix fai dongh caux meih juangc yiem nyei mienh. Aapv meih nyei cai-doix fai caux meih juangc yiem nyei mienh bun meih saeng, fai caa. Domh mienh oix zuqc njaaux fu’jueiv, njaaux ninh mbuo maiv dungx caux maiv hiuv duqv nyei mienh gorngv waac. Maiv dungx gan, maiv dungx caux, maiv dungx muangx maiv buatc jiex, caux maiv hiuv duqv nyei mienh. Njaaux ninh mbuo buangh zuqc sic fai mienh zorqv ninh mbuo nor, oix zuqc hnangv haaix nor haih siepv-siepv nyei lorz mienh tengx ninh mbuo. (Eix-leiz se: njiex qaqv heuc fai nauc mbui nyei taux mienh haiz ninh mbuo ziouc daaih mangc, daaih tengx aqv). Se gorngv ninh mbuo buangh zuqc mienh zoux haaix nyungc bun ninh mbuo nor, mbuox fu’jueiv oix zuqc ganv mbuox bun domh mienh hiuv, mbuox hmuangv doic nyei mienh, fai mbuox dongh goux ninh mbuo nyei mienh fai ninh mbuo hiuv duqv nyei mienh, dongh haih tengx ninh mbuo wuov deix hiuv. Maiv daan mbuoqc naaiv hnangv, zoux diex maac nyei mienh corc oix zuqc njaaux jienv fu’jueiv mingh, weic tengx ninh mbuo yiem seix zaangc haih zoux duqv horpc, cuotv liuz naaiv deix jauv, mbuo corc oix zuqc longc hnyouv njaaux taux Ziouv Yesu nyei leiz-fingx, njaaux ninh mbuo longc Ging-Sou nyei leiz zoux gorn-ndoqv dorh ninh mbuo nyei maengc. Se gorngv haaix dauh ei jienv naaiv nyungc jauv njaaux fu’jueiv, wuov dauh oix duqv zipv Tin-Hungh nyei fuqv, yiem ninh mbuo


nyei hmuangv zong, ninh mbuo nyei fu’jueiv oix ziangh horngh muangx waac, weic zuqc njaaux fu’jueiv nyei jauv se benx yietc nyungc Tin-Hungh paaiv bun mbuo dauh dauh sienx Tin-Hungh nyei mienh nyei waac, dongh gorngv oix zuqc njaaux meih mbuo nyei dorn meih mbuo nyei sieqv, maiv gunv bueix jienv fai jiex sin zungv oix zuqc njaaux jienv mingh (Nzamc Leiz-Latc 6:7-9). Eix-leiz se haaix zanc yaac oix zuqc njaaux jienv yiem, bun fu’jueiv haih jangx jienv maiv la’kuqv taux Tin-Hungh nyei leiz. J. Fu’Jueiv Nyei Leiz-Fingx Se gorngv diex maac longc nzengc hnyouv hnamv fu’jueiv, ziux goux ganh nyei fu’jueiv wuov deix, fu’jueiv yaac oix zuqc gengh maaih hnyouv hnamv diex maac, oix zuqc maaih winh diex maac nyei en-zingh nyei jauv. Fu’jueiv taaih gengx diex maac, hiaauc suonc diex maac nyei jauv, se gengh jienv haic nyei leiz. Fu’jueiv taaih gengx hiaaux suonc, tongx nimc diex maac nyei jauv se weic tengx fu’jueiv maaih siouc nyuonh ndaauv yiem naaiv seix zaangc, naaiv se benx Tin-Hungh nyei lingc caux laengz nyei waac bun fu’jueiv. Ging-Sou gorngv, “Fu'jueiv aac, weic zuqc meih mbuo sienx Ziouv Yesu, meih mbuo oix zuqc muangx diex maac nyei waac. Hnangv naaiv zoux se horpc nyei. “Oix zuqc tongx nimc meih mbuo nyei diex maac.” Naaiv se da'yietv diuh lingc maaih laengz nyei waac caux jienv.” (E^fe^so 6:1-2). Weic naaiv, fu’jueiv oix zuqc muangx diex maac gorngv, diex maac njaaux fu’jueiv, ei jienv Tin-Hungh nyei waac, se gorngv haaix dauh fu’jueiv zoux hnyouv ngaengc caux diex maac doix-dekc, wuov dauh fu’jueiv, ziouc maaih sic camv yiem ninh nyei maengc, caux ninh nyei siouc nyuonh yaac maiv ndaauv. Diex maac dorh fu’jueiv nyei ziangh hoc, oix zuqc diev nyungc-nyungc kouv haic nyei jauv, fu’jueiv maaih zei maaih naanc nyei ziangh hoc, diex maac yaac maiv duqv bueix njormh, yaac oix zuqc lorz ziex nyungc jauv daaih tengx zorc fu’jueiv, weic oix bun fu’jueiv longx. Maiv dan naaiv hnangv, corc aengx maaih nyanc hopv nyei jauv oix zuqc liuc leiz ziux goux fu’jueiv, weic oix bun fu’jueiv duqv longx, haaix nyungc longx, ziouc lorz wuov nyungc daaih zoux weic bun fu’jueiv duqv longx. Lai hnaangx, haaix nyungc kuv, yaac hnamv oix lorz daaih liouh jienv bun fu’jueiv nyanc, haaix zanc yaac nzauh jienv mv haih lorz maiv duqv ga’naaiv bun fu’jueiv nyanc


tengx ninh mbuo haih duqv hlo, baengc zingh nyei jauv yaac oix zuqc nzauh, nyanc hopv nyei jauv yaac oix zuqc nzauh. Naaiv deix jauv se yietc zungv weic diex maac hnamv fu’jueiv nyei jauv, weic naaiv fu’jueiv horpc zuqc tongx nimc diex maac weic wuih ninh mbuo nyei en-zingh, dauh dauh fu’jueiv horpc zuqc hiuv duqv winh diex maac nyei en-zingh, zoux longx, goux diex maac, dongh diex maac gox daaih maaih baengc nyei ziangh hoc, mv haih lorz maiv duqv nyanc, lorz maiv duqv hopv nyei ziangh hoc, fu’jueiv oix zuqc liuc leiz ziux goux diex maac. Se gorngv haaix dauh fu’jueiv, maiv hiuv duqv tong nimc ganh nyei diex maac yaac aengc zoux cunv bun diex maac nor, Tin-Hungh jamv wuov dauh nyei siouc nyuonh njiec, weic zuqc ninh maiv taaih ninh nyei diex maac. Fu’jueiv aac, weic zuqc meih mbuo sienx Ziouv Yesu nyei mienh, meih mbuo cingx daaih oix zuqc tong nimc, taaih ginx ganh nyei diex maac, goux ganh nyei hmuangv doic, naaiv se benx Ziouv njaaux mbuo nyei waac caux ninh hatc nyei waac. Fu’jueiv oix zuqc tong nimc, taaih ginx diex maac nyei jauv se maaih hnangv naaiv, Ging-Sou gorngv, “Fu'jueiv aac, weic zuqc meih mbuo sienx Ziouv Yesu, meih mbuo oix zuqc muangx diex maac nyei waac. Hnangv naaiv zoux se horpc nyei. “Oix zuqc tongx nimc meih mbuo nyei diex maac.” Naaiv se da'yietv diuh lingc maaih laengz nyei waac caux jienv. Hnangv naaiv, “Weic bun meih mbuo duqv longx yaac ziangh duqv siouc nyuonh ndaauv yiem naaiv baamh gen.” (E^fe^so 6:1-3). Ei jienv naaiv deix Ging-Sou njaaux nyei waac nor, mbuo hiuv duqv se gorngv haaix dauh fu’jueiv maiv tongx nimc ninh nyei diex maac nor, wuov dauh nyei siouc nyuonh maiv ndaauv, caux ninh yiem naaiv seix zangc yaac maiv duqv longx. “Oix zuqc tongx nimc meih mbuo nyei diex maac.’ Yaac gorngv, ‘Haaix dauh zioux ninh nyei die fai maa, oix zuqc daix wuov dauh guangc.’ (Maako 7:10), Ninh aengx fiev jienv Tin-Hungh nyei lingc gorngv, “Haaix dauh mborqv ninh nyei die fai maa nor oix zuqc daix wuov dauh guangc.”( Cuotv I^yipv 21:15). Fu’jueiv dongh faix nyei ziangh hoc, diex maac oix zuqc uix, oix zuqc goux, oix zuqc dorh, tengx jienv ziex nyungc fu’jienv, taux diex maac gox daaih nyei ziangh hoc zoux maiv duqv gong, fu’jueiv oix zuqc yungz longx, goux longx diex maac, oix zuqc gengh maaih hnyouv hnamv diex maac taux daauh, longc longx nyei hnyouv hiaaux suonc diex maac.


Aengx maaih yietc nyungc, diex maac caux fu’jueiv faix nyei ziangh hoc, fai fu’jueiv caux diex maac, dongh diex maac gox daaih nyei ziangh hoc, aengx maaih waac njaaux gorngv, “Se gorngv haaix dauh maiv goux ganh nyei cien-ceqv, lengc jienv goux ganh nyei hmuangv doic, wuov dauh se ngaengc zien doz aqv. Ninh zungv ganh waaic jiex maiv sienx Yesu nyei mienh.” (1 Ti^mo^tai 5:8). Fu’jueiv oix zuqc muangx diex maac nyei waac, yaac oix zuqc tongx nimc domh mienh diex maac, naaiv se Ziouv nyei leiz-fingx. Ziouv nyei waac gorngv, “Haaix dauh auv-guaav maaih dorn-jueiv fun-faqv, ninh nyei dorn-jueiv fun-faqv da’yietv oix zuqc hoqc ei jienv ninh mbuo sienx nyei jauv zoux, goux ganh nyei hmuangv doic. Hnangv naaic haih winh ninh mbuo ong gux diex maac nyei en-zingh, weic zuqc hnangv naaiv zoux se horpc Tin-Hungh nyei hnyouv.” (1 Ti^mo^tai 5:4). “Se gorngv haaix dauh maiv goux ganh nyei nyei cien-ceqv, lengc jeiv goux ganh nyei hmuangv doic, wuov dauh se ngaengc zien doz aqv. Ninh zungv gauh waaic jiex maiv sienx Yesu nyei mienh.” (1 Ti^mo^tai 5:8). Fu’jueiv nyei leiz-fingx se, dauh dauh zoux fu’jueiv nyei mienh oix zuqc tongx nimc diex maac, yaac oix zuqc ziux goux diex maac. Naaiv se benx Ziouv paaiv mbuo zoux nyei gong, Ziouv nyei waac hnangv naaiv gorngv, “Fu’jueiv aah! Yiem maanc sic oix zuqc muangx diex maac weic zuqc naaiv se zoux horpc Ziouv nyei hnyouv.” (Ko^lo^si 3:20). Fu’jueiv tongx nimc diex maac nyei jauv se benx Ziouv nyei za’eix, se horpc Ziouv nyei hnyouv nyei jauv, weic naaiv Ziouv yaac oix ceix fuqv bun dongh hiaaux suonc diex maac, tongx nimc diex maac nyei mienh, mv baac, se gorngv mbuo ki mbuo nyei diex maac, zoux cun zoux doqc bun ninh mbuo nor, Ziouv ziouc maiv a’hneiv mbuo, yaac maiv ceix fuqv bun mbuo aqv. Ziouv hatc mbuo nyei waac se hnangv naaiv, “Oix zuqc tongx nimc meih mbuo nyei diex maac, meih mbuo cingx daaih ziangh duqv siouc nyuonh ndaauv yiem Ziouv, meih mbuo nyei Tin-Hungh, bun meih mbuo wuov norm deic-bung.” Se gorngv, “Haaix dauh mborqv ninh nyei die fai maa nor, wuov dauh yaac oix zuqc dingc zuiz daix daic.” (Cuotv I^yipv 20:12; Cuotv I^yipv 21:15).


K. Oix Zuqc Njaaux Fu’jueiv Caux Mienh Jiu Tong Nyei Jauv Mienh caux mbuo gorngv waac, oix zuqc longc hnyouv muangx, longc hnyouv zipv mienh nyei waac. Dongh longc hnyouv muangx waac nyei mienh: wuov nyungc mienh se longc sin, longc m’zing, longc nzuih muangx gorngv waac wuov dauh mienh. Oix zuqc taaih ginx mienh gorngv nyei waac: taaih ginx mienh gorngv nyei waac se, mienh gorngv waac nyei ziangh hoc, mbuo oix zuqc muangx mienh gorngv, fai zuov mienh gorngv ziangx mingh, mbuo cingx daaih gorngv mbuo nyei buonc. Se gorngv mbuo gengh muangx mienh gorngv waac nor, dongh mienh gorngv nyei waac mbuo haih jangx duqv nyei. Mbuo haih mbuox mienh gorngv, ninh mbuo gorngv taux haaix nyungc jauv nyei. Ei jienv mienh gorngv nyei waac gorngv, se gorngv mbuo caux fu’jueiv gorngv waac jiu tong doic nor, fu’jueiv oix hiuv duqv mbuo muangx ninh mbuo fai mv muangx, mbuo oix zuqc ei jienv fu’jueiv gorngv mbuox mbuo nyei waac gorngv mbuox fu’jueiv, se gorngv mbuo hnangv naaiv nor zoux nor, se tengx ninh mbuo haih sienx mbuo domh mienh nyei waac, yaac haih bungx hnyouv mbuo domh mienh. Ninh mbuo ziouc sienx mbuo domh mienh gengh maaih hnyouv oix muangx ninh mbuo yaac oix tengx ninh mbuo nyei. Hnangv naaiv ninh mbuo maaih haiv nyungc ziouc oix gorngv mbuox mbuo, yaac oix caux mbuo ninh fatv. Njaaux fu’jueiv nyei jauv se oix zuqc jiex gorn longc “Yie” wuov joux waac ndaangc. Maiv dungx longc “Meih” wuov joux waac. Se gorngv mbuo jiex gorn caux fu’jueiv gorngv meih nor, ninh mbuo kungx haiz mbuo hemx ninh mbuo hnangv, ninh mbuo ziouc maiv oix muangx mbuo gorngv nyei waac aqv. Se gorngv mbuo caux fu’jueiv gorngv waac nyei ziangh hoc, mbuo longc “Yie” wuov joux waac nor, se bun fu’jueiv hiuv duqv mbuo nyei hnyouv hnamv, oix nyei, caux maiv oix nyei jauv. Fu’jueiv muangx haiz maiv nangc mun hnyouv, ninh mbuo gauh oix nqoi hnyouv caux mbuo gorngv waac. Haiv zanc “Yie” haiz mienh gorngv meih caux doic mborqv jaax yie gengh haiz gamh nziex haic. Yie maiv oix meih hnangv naaiv nor zoux. Yie haiz hnyouv maiv longx yietc deix. Yie nzauh heix lauh deix meih maiv haih duqv doqv sou aqv. Yie haiz meih nyei fin-saeng gorngv meih maiv doqc sou duqv i norm leiz-baaix aqv, yie gengh hnyouv maiv longx yietc deix.


Yie nzauh haic meih, hlo daaih mv haih lorz mv duqv gong zoux, lorz mv duqv nyanc. Meih maiv dungx hnangv naaic zoux bun yie nzauh. Dieh hnoi yie nzauh camv nor yie butv m’nqorngv famv nyei baengc. Se gorngv meih hnamv yie nyei nor, meih maiv dungx hnangv naaic zoux bun yie nzauh mingh aqv. Longc “Yie” jiex gorn gorngv nyei waac se gorngv taux: 1. Fu’jueiv zoux nyei eix-leiz. 2. Mbuo nyei hnyouv haiz nyei jauv. 3. Maaih haaix nyungc sic haih cuotv daaih bun ninh mbuo nyei jauv. 4. Se gorngv mbuo hnangv naaiv nor gorngv, hnangv naaiv nor njaaux nor haiz tiuv fu’jueiv nyei hnyouv caux ninh mbuo zoux nyei jauv nyei. L. Mienh Hopv Diuv Buov In Nyei Jauv 1. Weic oix duqv mengh dauh mengh hoc nyei jauv. 2. Weic oix duqv mienh caux ninh mbuo zoux doic. 3. Weic maiv oix bun mienh gorngv ninh mbuo se mv maaih banh zeic nyei mienh. 4. Weic oix maaih njien-youh naauc ngitc nyei jauv. 5. Weic oix seix mangc gaax hnangv haaix nor. 6. Weic oix biaux ndutv gamh nziex nyei jauv, bun ganh daamv hlo. 7. Weic oix biaux ndutv nyauv hnyouv nyei sic, fai nzauh nyei jauv. 8. Weic laaic duqv haih tengx buonh sin maaih qaqv camv. 9. Weic teng zoux sin fong kuv yiem. 10. Weic longc tengx zoux jaev youh nzauh nyei jauv. 11. Weic oix longc mengh dauh 12. Weic tengx la’kuqv nzauh nyei jauv. 13. Weic tengx la’kuqv hnyouv mun nyei jauv. 14. Weic tengx la’kuqv gamh nziez nyei jauv. 15. Weic tengx la’kuqv la’nyauv nyei sic.


M. Giduc Mienh Nyei Leiz-Fingx Giduc Mienh nyei leiz-fingx se gorngv taux Giduc Mienh yiem naaiv seix zangc zoux nyei sic hnangv haaix nor. Giduc Mienh nyei leiz-fingx se njaaux taux Giduc Mienh zoux kuv sic nyei jauv, laanh laanh sienx Yesu nyei mienh horpc zuqc hiuv duqv taaih ginx mienh nyei jauv, hiuv duqv tongx nimc hiaaux laauh ganh nyei diex maac. Weic zuqc ninh mbuo se duqv yungz jiex i nzunc aqv, da’yietv nzunc se benx pou-tong mienh hnangv, da’nyeic nzunc se yiem Singx Lingh ganh siang-yungz jiex daaih, ziouc benx siang-zeix daaih nyei mienh, yaac maaih mbuox heuc Tin-Hungh nyei naamh nyuoz (2 Ko^lin^to 5:17; Yo^han 3:5-9; E^fe^so 5:1). Weic naaiv, Giduc Mienh zoux nyei sic se oix zuqc ganh nyungc, weic zuqc ninh mbuo se maiv zeiz guei naaiv norm baamh gen nyei mienh, ninh mbuo zoux nyei sic caux gorngv nyei joux-joux waac oix zuqc maaih eix-leiz, yaac oix zuqc ganh nyungc. Ziouv Yesu gorngv, ninh mbuo se benx baamh gen nyei nzauv caux baamh gen nyei njang, weic tengx guei baamh gen nyei mienh, dongh ninh mbuo qiemx zuqc nyei jauv (Matv^taai 5:13-16). Mbuo hiuv duqv gorngv nzauv ndongc haaix longc jienv bun mbuo baamh mienh, nzauv tengx mbuo nyei lai hnaangx kuv, maaih mueix, yaac tengx mbuo nyei ga’naaiv maiv waaic, mv daan mbuoqc naaiv, nzauv yaac zoux ndie tengx mbuo nyei buonh sin, tengx zorc mbuo nyei buonh sin baengc, yaac yungz mbuo nyei sin, tengx mbuo hnyouv maiv sie. Weic naaiv Ziouv Yesu cingx daaih dorh mbuo sienx kaux Ninh nyei mienh mingh beiv nzauv, beiv njang caux beiv dang, mbuo Giduc Mienh oix zuqc hnangv nzauv yiem naaiv lungh ndiev seix zangc, weic tengx dongh qiemx zuqc nyei mienh, caux ngorc fai nqaai-nqaatv nyei mienh haih duqv zipv ninh mbuo qiemx zuqc nyei jauv. Weic naaiv, Giduc Mienh cingx daaih oix zuqc zoux kuv sic yiem naaiv seix zangc, weic tengx mienh haih hiuv duqv Tin-Hungh nyei njoux-en. Giduc Mienh zoux kuv sic nyei jauv se beiv hnangv nzauv caux njang nor, nzauv nyei nyungc zeiv caux mueix eix-leiz se beiv taux mbuo zoux nyei sic caux mbuo gorngv nyei waac, se gorngv mbuo zoux kuv sic fai zoux longx nyei jauv nor, dongh maiv sienx nyei mienh buatc mbuo zoux longx nyei sic, ninh mbuo ziouc haiz ngorc, haiz nqaatv taux oix zoux horpc nyei jauv, ninh mbuo ziouc daaih lorz Tin-Hungh aqv, se hnangv mienh nyanc nzauv nzaaih liuz, ziouc oix mingh lorz wuom hopv nor.


Giduc Mienh hnangv njang fai hnangv dang nor, eix-leiz se mbuo zoux nyei kuv sic, tengx mienh haih hiuv duqv fai zieqv duqv zien leiz nyei jauv, zoux longx nyei jauv ndongc haaix maaih lamh longc, ndongc haaix maaih jaah zinh, ndongc haaix jaaix, ninh mbuo ziouc oix daaih lorz Tin-Hungh tengx ninh mbuo, bun ninh mbuo nyei maengc haih duqv longx. Se beiv hnangv hmuangv caux njang nyei jauv ndongc haaix nyei mv fih hnangv, njang tengx mbuo haih mangc duqv buatc nyungc-nyungc, mienh kungx oix njang hnangv, maiv oix hmuangx, hmuangx kungx bun mienh ndiqv zuqc ndorpc, yaac benx gamh nziex nyei dorngx. Mbuo Giduc Mienh horpc zuqc haih zoux kuv nyungc zeiv bun baamh gen nyei mienh zuotc fai mangc. Giduc Mienh oix zuqc zoux kuv nyungc zeiv nyei jauv se hnangv Yesu gorngv nor, “Meih mbuo se hnangv nzauv weic yiem baamh mienh mbu'ndongx. Se gorngv nzauv nyei mueix tuix zaamv mingh, maaih haaix nyungc za'eix bun nzauv aengx haih nzaaih daaih? Naaiv deix nzauv maiv lamh longc aqv. Oix zuqc dox njiec ndau bun mienh caaiv hnangv. “Meih mbuo se hnangv njang weic ziux baamh mienh. Yietc norm zingh yiem wuov mbong-ningv maiv haih bingx maiv mbueiz mienh. Yaac maiv maaih mienh diemv zieqc dang daaih, zorqv tongv nqopv jienv. Dang m'daaih don dang nyei baaih ziux njang yietc biauv mienh. Meih mbuo yaac oix zuqc hnangv dang nor, ziux lungh ndiev mienh. Hnangv naaic, ninh mbuo duqv buatc meih mbuo zoux nyei kuv sic ziouc ceng meih mbuo nyei tin-dorngh Diex (Matv^taai 5:13-16). Baamh gen nyei nzauv se longc jienv haic bun baamh mienh. Nzauv maaih lamh longc nyei jauv se maaih i nyungc jauv: (1) Se bun lai hnaangx kuv, maaih mueix. (2) Zoux ndie tengx mbuo zorc baengc nyei jauv. Hnangv naaiv Yesu cingx daaih dorh mbuo mingh beiv nzauv, Yesu mienh hnangv nzauv nor, se maaih i nyungc eix-leiz: (1) Mbuo caux maiv sienx nyei mienh, mbuo oix zuqc hnangv nzauv nor maaih mueix bun ninh mbuo hiuv duqv Tin-Hungh, se weic mbuo zoux nyei kuv sic, (2) Mbuo caux Tin-Hungh nyei jauv oix zuqc jorm hnyouv yiem Tin-Hungh hnangv nzauv nor maaih mueix, haaix zanc yaac oix nitv jienv Tin-Hungh jorm hnyouv fuh sux Tin-Hungh, maiv naamx hnyouv, maiv zaamv yiem Tin-Hungh nyei nza’hmien (Maako 9:50; Matv^taai 5:16; Lomaa 12:11; Hipv^lu 10:25; Laauc Yaangh 3:14-16). Nzauv nyei mueix se beiv taux mbuo zoux nyei sic, mbuo zoux nyei sic oix zuqc hnangv nzauv nor, maaih mueix.

Documents

Giduc Mienh Nyei Leiz-Fingx - WordPress.com · 2011-02-11 · Giduc Mienh Nyei Leiz-Fingx Biux Mengh Waac ... taaih ginx, zipv kaeqv nyei jauv, leiz-fingx jauv, bieqc cuotv, mingh