Kn Ms r k 2 - WordPress.com...Giry e 11 Yy mbo m r mbo Lêle tu Yy n ori mbo belle mbo kul suro tk . Amr deem tr . Yy m r o sîklu, k6riŋ kr u dee mbo m r mbo olonm n oru ludŋ tusul

Kana Masarak

Kitab 2

Post-syllabaire en langue massalit

Massalit postprimer

1

Kana masarak

Kitab 2

Association SIL

B.P. 4214

N’Djaména

République du Tchad

2011

Langue: massalit, parlée dans la préfecture d’Assoungha à l’est du

Tchad, et au Soudan, surtout dans l’Etat fédéral du Darfour

occidental.

Traduction du titre: La langue massalit, Livre 2

Genre: matériel didactique

Language: Massalit, spoken in the Assoungha préfecture in

Eastern Chad and in Sudan, mainly in the Federal State of

West Darfur.

Translation of the title: Massalit language, Book 2

Genre: didactic materials

Illustrations: Juma Adam Yaya, Mubarak Barka Ismail,

Souleymane Abakar, SIL International Illustrations

2ème édition expeŕimentale, 500 exemplaires

2nd experimental edition, 500 copies

© 2010, 2011 Association SIL Tchad

2

Kana ndâŋin

Kitabta kana masarak nî ndâŋa wi sininta nal9na ilam

wândaŋina. Wândaŋina-ilim, kitab daraŋi gîlaŋ na tu ndîŋar-

kodo, kitab daraŋi mbarlaŋa tu mândaŋina. Mândaŋini-ilim, jo

kâddur tîran kana nandakacirnu mucuŋa. In ken ka kâddusar

mbo kimin̰ mbeli mbo kimin̰ kâli mbo ûyom wagiye. Kitab igu

mîndiŋari-gim nîyembo ndâynjarisin-kodo mîndiŋara. In ken

mîkala-gu nîyembo amba kalla ye, ka kooy nîyembo gudura kul

giraye igeti. Ka masara mbo masara yanda mbo kooy nîyo kul

giraye kana masaraka wo igeti.

Ka kana kitab mbarlaŋa gu wo katab nena wi dûkum

Brejin nuŋ Tiregin nuŋ Gaga nuŋ hille Hadjer Hadid nuŋ Adré

nuŋ ye. Hâgudu ka kana wi nendeleŋa wi mbo norgola wi mbo

nunduŋa wi mbo dûkum Brejin nuŋ Tiregin nuŋ munazama SIL

nuŋ ye. Mirsi îniŋa:

• Juma Ibrahim Harun (Mestere, hille Derende)

• Juma Adam Yaya (Ichbere, hille Dôroti Alamarga)

• Abderazik Mahamad Ahmad (Mestere, hille Turju)

• Ilyas Dahiya Ismail (Murne, hille Tulus)

• Matar Mahamad Sileman (Kariye, hille Jiri-jirib)

• Ishak Kamis Mahamad (Mestere, hille Tirti)

• Abdalla Mahamad Ibrahim (Kuŋga, hille Kasarus)

• Mubarak Barka Ismail (Mestere, hille Tirti)

• Eunice Kua (Association SIL Tchad)

• Angela Prinz (Association SIL Tchad)

Suran̰ nena wi Juma Adam Yaya nuŋ Mubarak Barka Ismail nuŋ

Souleymane Abakar nuŋ SIL International Illustrations nuŋ ye.

3

Avant-Propos

Ce livre est une collection de textes écrits par des Massalit du Tchad et du

Soudan, tous résidant actuellement au Tchad dans les camps des réfugiés

de Brédjing, Tréguine et Gaga ainsi qu'à Hadjar Hadid et à Adré.

Les noms de ceux qui ont choisi, édité et saisi ces textes se trouvent à la

page 3. Les illustrations ont été fournies par Juma Adam Yaya, Mubarak

Barka Ismail, Souleymane Abakar et SIL International Illustrations. Les

éditeurs massalit résident actuellement dans les camps de Brédjing et

Tréguine à l'Est du Tchad.

Ce livre est destiné aux classes de post-alphabétisation dans lesquelles

seront abordées la lecture, la discussion, l'orthographe et l'écriture

créative. Une édition incluant des exercises est également prévue.

Foreword

This book is a collection of texts written by Massalit authors from

Chad and Sudan, all currently residing in Chad, in the Bredjing,

Treguine and Gaga refugee camps and in Hadjer Hadid and Adré.

Texts were selected, edited and typed by: (see list of names on page 3).

Illustrations were provided by Juma Adam Yaya, Mubarak Barka

Ismail, Souleymane Abakar and SIL International Illustrations. The

Massalit editors currently reside in the Bredjing and Treguine refugee

camps in eastern Chad.

This book is intended for use in postprimer classes that include

reading, discussion, spelling and creative writing. An edition with

exercises is planned.

4

Giraye 1

Kana makatar to

Gendegu toŋo andede, waldaman̰ mbeŋa kar,

“Tîŋ maye” irnen, “Ŋgur kayoŋ?” arnen, i du

“Tîŋ maye” irnen, njebo bûrtim naŋ, tîrimbilko

nundun̰uŋ, salamko ken, hâgudu sûro ludaŋ kul,

ajab rînaŋ le ara.

Juma Adam Ibrahim (Mestere, hille Kâskidik)

5

Giraye 2

Tusmaye

Âmin madrasam ko arede, Abakar mbo mama ta

mbo waren, mîdirana. “Juma” irnen, “Ya” arnen,

“Kusul” irnen awusula. “Ŋgur lok gareyoŋ?”

irnen, ama du, “Madrasa molok are” arnen.

“Mate, jir̂e mîni ‘Tusmayo ane’ tîrnaŋa, maka

min̰an!” irnen, ko min̰ana. Le toŋo aka.

Juma Adam Ibrahim (Mestere, hille Kâskidik)

6

Giraye 3

Ajab ârnaŋa

Gendegu sûg mo aye-gim, binije mbeŋa kul,

hâgudu njiŋanta mbara kul, sûg mo aka-gim,

binije mbeŋa rekeceŋ rûse awuse-gu, til̂o koy

oronnde. Njiŋan til̂e gi mbo mîyarce mbo chayo

maŋana. Hâgudu si ̂andeni-gu, jubayta du kar

njiŋan tu gu ula! Ajab rînaŋ le hillem ara.

Koris somta nî 2010 (Dûkum Tiregin)

7

Giraye 4

Mba nomon̰e

Abbagu sûg mo aka-gim, hâbuto ŋundu arka.

Mba tomon̰en, “Aronti” ru ana. Njiŋanta mbeŋa

baka yen, toŋo ko njiŋanta rok ken are-gu, hâbi

ilu kaŋgi ron tula. “Hay! Hâbi ama kîbin le aka

gi ŋgur yoŋ?” arnen. Ti du “Garnden, ndîŋ

arona” tirnen. Ama du aŋon̰innden, ti du

toŋon̰innden, gulto mena. Ka n̰urim amba waya,

ndâsirnu le aka.

Koris somta nî 2010 (Dûkum Brejin)

8

Giraye 5

Kima mbo baba ta mbo

Kima madrasam ko galamko nindiyan lor̂u toŋo

tara. Baba ta du “Hay kima! Ŋgo ru lor̂iyoŋ?” in

tirnen. “Ama galamko nindiyan âworiye” tirnen.

Baba ta du sûg mo ko galamko ron nar tûn̰a.

Ŋon̰in kul madrasam ko gâr ken katab ken le

tara.

Jimiye Harun Yaya (Bede, hille Arara)

9

Giraye 6

Mûco mbo dîri mbo

Lêle tu, Fatime leru nucun n̰uŋ dîru ciŋge sam

tayin, dîri îya tirnen, Musawo muturagko n̰û,

“Dîru rucaŋ!” tirnen, turcaŋa. Dîri gi du kûri

tiyen, Musawo kâdin̰o timina. In ken Musa koy

kûri tiyen, ti du Fatimewo rucaŋ le târiŋa.

Souleymane Abakar (Adré)

10

Giraye 7

Wasi taŋu tin̰e

Lêle tu Mâryam sûg mo ko tareg, kima ta kibirit

mbo saride, wasu taŋu tînibina. Kima tu kûde

tinden, ka kar lay îndiŋara. Mamunta tin̰ana.

Mâryamko indila tara. Kimo tin̰anden ŋon̰in tela.

Mâryamta kimin̰ mbo wasarŋa tiyen, away

ru indede. Ka gember nar Mâryamko taŋu nda

edela toŋon̰ina.


11

Giraye 8

Asta ta dabaro

Asta âsurtu fîlta nû tena. Lêle tu ko taraŋgu

raku, kuran le tara. Ili molok ta-kede, fîlta ude

ûka. Astawo gun̰eti tuya, saŋ ko tudaŋndiyen, 9

away ru tindede, Ahmat kar sîkal ko ludaŋ tela.

Uburuŋa ko n̰egeteŋ nda tanara.

Asta kurnaŋ fîlta baka kul naŋ Ahmatko

tûn̰a. Ahmat du “Maŋ mûco jek kalla le, ama

mboro mbulti” tirnen, kûron ela.


12

Giraye 9

Maama mbo teke mbo

Lêle tu maama teko “Ka micicirnin, ŋga gîlaŋ

madaldim ko fîjilta tinjiŋantiyoŋ?” tirnen

icicirna. Maama gi teke gu sel le taka. Kayin,

“Ama madaldim mûnje ara molok ânjuro gim

anunarte” ru tun̰uŋa. Tun̰uŋa-kunuŋ, maama gu

tani tiyen, larniŋ tindede, teke gi kar sîkal le

madaldim ko fîjilta njiŋan tununara. Maamag

turnaŋig gani n̰erem tûka. Ajab rînaŋ tela. Ili

molok teke mbo ticicirninde.

Îsob (Yunnan, 600 Sâyyidna Îsawo ma un̰an-kede),


13

Giraye 10

Munjukula mbo kimin̰ mbo

Lel̂e tu munjukula mbo kimin̰ mbo âyŋge til̂iŋe

mbo sey inda-gu, kimin̰ “Ayo sik̂al, hay aye

tâjiŋa!” in ir̂naŋa. In ir̂naŋa-gu, munjukula ŋgo

tire, “Wa kimin̰ mbeŋ, aye ili yaŋ” in tîrnaŋa. In

tîrnaŋa-gu, kima tu ŋgo tire, “Kik̂i ayo tik̂ala.

Dan̰o jiŝe menti” in tir̂naŋa. In tir̂naŋa-gu,

munjukula dole koniŋ, si ̂in seynu ŋgo tire, “Wa

kimin̰ mbeŋ, aye tu koy ili yaŋga!” tîrnaŋa cen

ela.

Adam Abdalla Ismail

(Kariye, hille Gûndo)

14

Giraye 11

Yaya mbo amara mbo

Lêle tu Yaya n̰ori mbo belle mbo kul suro taka.

Amara deem tara. Yaya amaro sîkalu, kâriŋ karu

dee mbo amara mbo olonam n̰oru ludaŋ tusula.

Amara gi kami dol kû, dakalo tôdila,

dakala gi du joro tena. Yaya kar n̰ori mbo koch

tindilina. Tindilina-gim dakala gi kurnaŋ târiŋa.

Dee du kooy kâriŋ hillem waka.

Ka hille molok tîŋar “Hay! Dee wi ŋgo ru

eleleŋ de warayoŋ? Mandamina mîkali” ru

wayin, Yaya taren bûrtim îdirana. Kana nûka gu

kooy tindila, ka ko amaro ndamin narku uya.


15

Giraye 12

Kobolok mo ka as na nîŋa salata

Ka as lo kobolok mo indede “N̰ugu n̰ani” ru nda

wanara. Kaŋgi kâddi înig “Sallo mena-kodo

min̰anni” tirnen. Salatam usula, in̂je du n̰ugim

tara. Kaŋgi tu du, ge ̂usula-gu, “Înje n̰ugim tara”

tirnen. Jir̂e in̂i kaŋgalaŋa gi “Kûreyan! Sallo

amindigeg tûronti” tîrnaŋa. Sallo nindige gi du

“Ama murkuti yoŋ? Salatam sey sey nûreteg”

tir̂naŋa. Salata îniŋa en̰̂ina. Înje du n̰ugu tin̰ana

ela.

Sara Ibrahim Isak (Kariye, hille Faŋan̰ta)

16

Giraye 13

Lukkurdi diniya wâci ta

kul taka-kunuŋ inde, kamba ta gu rayo toro rayo

toro in ken le tara.

Kamba gi du kus n̰eremko away in ru tara.

“Hay! Maŋ ŋgo âmin away ru gareyoŋ?” tirnen.

Ti du “Kaŋgi tu kar ‘Asee awulti’ tirnen.

Musuruna, anurana le taka. Ama lenju are”

tirnen. “Kaŋgi ilu gosiŋoŋ?” tirnen. “Lala

awosiŋnde” rînaŋ tela.

Alfadil Isak Ismail (Terbebe, hille Abbune)

17

Giraye 14

Dar mbe

Ama mba sona ye, dar

mbo aŋon̰e.

Dar mbe ti tindam

ûwan̰ mbo baban̰

mbo un̰ana yen,

in ken aŋon̰e.

Ama kana mîniŋa kana masarak wo aŋon̰e.

Ŋgâri ta jam aŋon̰eye? Kana dar mîni taŋa yen

aŋon̰e.

Kana numan̰e yen aŋon̰e.

Ama dar mbo aŋon̰e.

Ŋgâri ta jam aŋon̰eye? Kallaa kâddur tenen

aŋon̰e. Saa taŋa kallaa yen aŋon̰e.

Ama aŋuno koy kanaa kallaa wo ninnde kulusu,

kanaa bîyee wo îya ru, dar mbe ta jam

dargo age.

Abakar Yakub Ismail (Kariye, hille Melebide)

18

Giraye 15

Hugura jera

Malko nendan hugura jîkalti.

Giraye nendan hugura jîkalti.

Ka mbindiru ginendan hugura jîkalti.

Mbun̰ana wi habbal ge-ken hugura jîkalti.

Hâbuto ke ndînjaru in̰a gosendan hugura jîkalti.

Gani no nendan hugura jîkalti.

Mûco ndoŋon̰-kede gulan hugura jîkalti.

Kidimem nanire-ken hugura jîkalti.

Katir Harun Ismail (Murne, hille Noye)

19

Giraye 16

Hâbuto njuŋa mûronti

Malak Jibiril Mula kumo tim̂ana-gim ajab rînaŋ,

tîrkarna.

He, kuma molok njuŋa rebe ye. Rebe kumo

tarme.

Rebe molok njuŋa du wasi ye. Wasi rebo sîlla

tûsunji.

Wasi molok njuŋa du saa ye. Saa wasu wayawe.

Saa molok njuŋa du âbiyari ye. Âbiyar so êneri.

Âbiyar molok njuŋa du âguri ye. Âguri âbiyar

tinje.

20

Âguri molok njuŋa du kaŋgi ye. Kaŋgi âguri

taren koy nanjaŋ tik̂e.

Kaŋgi molok njuŋa du tanii ye. Tanii kaŋgu

okokore.

Tanii molok njuŋa du kûrim nik̂iya ye. Kaŋgi

tin̂iki ken tanii er̂inde.

Sale Abdal-Jalil (Murne, hille Tunfuga)

21

Giraye 17

Kana nândakacira

Sûg mo kûde

Noroke mbo nda oroke mbo

Norokeg: Sukkar kora ŋganna mbo ye?

Nda orokeg: Kora selteŋta iti mbo ye.

Norokeg: Koran̰ mbara annde, hâgudu sayo

furŋgu kelesko ken.

Nda orokeg: Kalla ye mbit̂i.

Norokeg: Assu mbir̂naŋa, afo de mîdiran.

(Norokeg gani tum taka.)

Norokeg: Kinde tajir, ama birinjalta umuro

annde, ŋganna mbo ye?

Nda orokeg: Umura selteŋta mbara mbo ye.

Norokeg: Selteŋta mbara kâddur ye.

Nda orokeg: Kâddur yande.

Norokeg: Hay! Hâgudu fiĵilta noŋ alinjii noŋ

annde.

Nda orokeg: Kalla ye mbit̂i.

Norokeg: Iwi baka ye, rok ken.

22

Nda orokeg: Rok nda ana.

Norokeg: Kalla ye. Ama aye, si ̂seyn.

HaFs Adam (Jinene)

23

Giraye 18

Kana nândakacira

Kadija mbo Tôma mbo

Kadija mbo Tôma mbo ko Halime mbo Katir mbo

warka.

Kadija: Amboro mbo Tom̂a mbo lûtim maka.

Ama lûtim saŋ ayosenden.

Tôma: Ama yon ânjura kul mara.

Kadija: Ama gir̂andu kul ko wasu nar, fu ken,

suto awona-gim sûnu anende.

Halime: Ama sûnu ân̰a, su tena min̰ana. Katir

tîkala.

Katir : He, in̰ana âkala yagu amboro âmbinde.

Kadija Omar Mahamad (Kariye, hille Seretiye)

24

Giraye 19

Njeba

Âmin lêle 12 aye 3 ida 2010

Mirsi Mula taŋa mbo ândaŋinti.

Baba mbe, Adam Abdalla Adam.

Ama kima na lo, Brejin kana masarak gâru ke

andaye. Mîdiran-kede kâddur de muŋuna. Ki

kooy kunduman̰en kindoŋ? Mi gim nîyembo

kallaa me. Biŷo menende. Kâddunjur mîniŋa kul

girayam gani tum ambanaŋ igen, in ken kano

katab ken kanda anjebena. Kûrim âmbibinan

kalla mbo de aka arni. Nenee mbeŋa kooy de

salam ken. Tîlo koy ayn̰eŋo anende. Mula kalla

mbo ambodoron. Ama kima kîni Mahamat Adam

Abdalla.


25

Giraye 20

In̂jela mbo înje kâddi mbo

Lêle tu înjela kiye tayer-kunuŋ, in̂je kâddi ilim 9

tinden raku tena-kunuŋ “Wa ûwa” tirnen, “Ya”

tirnen, “Konjo rak nda anara njiŋanan ŋgo yoŋ?”

tirnen. “Kalla ye, kima mbe” tirnen, ili taka.

Hâgudu sey tinda-gu, tu du înjela tara-

kunuŋ, hâkkoy ilim 9 tinden raku “Wa ûwa”

tirnen, “Ya” tirnen, “In de kûjo sî to kâk! in kon

ela, n̰erek! in ken kâsiŋ tindede, n̰efet! in lâmin

nda anara njiŋanan ŋgo yoŋ?” tirnen. “Hay?

Maŋ ŋga ta kima loŋ?” in ru turburaŋa.

“Ama Wasaral Kayla Kamisa tusaŋgi kogu

wari ta kima gi lo ama ye” ru tir̂naŋa-gu,

“Wasaral Kayla Kamisa tusaŋgi kogu wari taŋ

26

kimin̰ in murkuturi mbo nun̰eyer-kunuŋ mboro

ŋgo ken in nililo mbun̰anayoŋ?” tirnen ela.

Harun Idriss Yakub (Ichbere, hille Doŋgeta)

27

Giraye 21

Kun̰o mbo kun̰oo nuruci mbo

Lel̂e tu kun̰o kawaa taŋa wo “Ama âmin kaŋgi to

n̰ugu in̰anti noŋ andire” tirnen. Kawaa taŋa du,

“Maŋ murkuti loŋ?” irnen. Ti du “Murkuti yande.

Mula haywa tira-ken, an̰anti” tirnen. Sey inda-

gu, ka kun̰oo nuruci wi wara-kunuŋ, malanjo sey

indenig, kaŋgi tu kun̰o nuruci mana tiŷa. Lamin

racu, saam uluna.

Kun̰o tu in nirni gi kar

raku n̰an kil̂ le kawaa taŋam ko

“Ama arndiyoŋ? Kaŋgi to n̰ugu

raku an̰ana. Gi de yandoŋ”

tirnen. “Ili yan, maŋ koy

n̰erirniti” irnen. Ti du “Ŋgo ken

an̰erirnitiyoŋ?” tirnen. “Ili yan

minde-ken mîkal” irnen.

Sey inda-gu “Hâkkoy aka

boko an̰anni” ru tayeg, ruciŋ

indede taka. Tiŋgirima mbo ŋgij! in nîbin ula.

28

Inden ter̂inden, îkalag, “Nib̂in ulayeka kosiŋ mi

mirde tenag keseroŋ” rînaŋ, ajab ajab risin ela.

Mahamad Babikir (Hadjer Hadid)

29

Giraye 22

Sî mbo âwiye mbo

Âwiye tuŋuno koy sû tarkan tin̰anto ndide

tamalanje-ken tarkinda-ken, le lândir ke tinda-

gu, lêle tu, kiye taye-gu, sî til̂e liyan tiyede,

waram âwiye mbo id̂irana. Âwiye gi toŋon̰ina-

kunuŋ, sû rik̂arnu ŋgo tire, “Hay sî! Ama mboro

aŋuno koy mbinnde ayeg, maŋ ŋgur jeyn

mid̂irandayoŋ?” tirnen.

Sî gi du kuran wâl! in tin̂inarin inda-gu,

ŋâwre du tara-kunuŋ “Hay! Ki ŋgâri kigegiye?”

tirnen. Fek koy irnden, ŋâwre ti âwiyo lin, sû naŋ

nin̰ante lo tarbala de kûre tigen, âwiye du “Alle

de an̰annde, gi ŋgâri ye anayoŋ!” tirnen.

Inda-gu, sî indenig ka morom niye kar

30

warka-kunuŋ, “Hay âwiyo, hay âwiyo!” ir̂naŋa-

kunuŋ, kâriŋ mirin melle ka wo esela. Sî gi du

n̰arisin ko kawaa taŋ tarka ajab ir̂naŋa. “Hâgu,

maŋ til̂e gin̰an” ru indila, celcelo de “Haywa

haywa” tirnen ela.

Mahamad Babikir (Hadjer Hadid)

31

Giraye 23

Ceke

Cekee inta ŋgâru nda igegiyoŋ? Bero nda

igegiye. Ŋgâri ta jam nda igegiye? Bere ti

ndokokornito îya ru ceke nda igegiye. Hâgudu

ceke inta berem wandayan ondomon̰en

wandaciye. Hâgudu rayinan koy awun mbenin

bero nusulteye. Hâgudu ceke inta, rebo kîman

koyoŋan̰ ken de to baro kulal ser ken koyoŋan̰

mo nîbin igegiye. Hâgudu ceke inta wo suba

reben̰ sâlni înibinin ondomon̰en igegiye. Bero ne-

ken ceke ndaŋ-ndaŋ ta ye.

Norgoree Kitab 2 nî

32

Giraye 24

Ereŋgi

Ereŋgi ti sede wara ta ye. Tiro

guro nige warkan wayaweye.

Yagunuŋ warkan nîyembo

tin̰aride, beri mbo rayesin

nendelenju wayaweye. Hâgudu maraŋan̰ koy

sajuran̰ mbo ruciŋ nîbin wayaweye. Hâgudu n̰ugi

ereŋgi ta, tiro in̰a-ken jekkoy numan̰e yen, ka

kooy ŋon̰o in̰aye. Hâgudu kâmii taŋa ndaŋ-ndaŋ

tayen, bânu igegiye. Ŋgâri ta jam bânu tiro

igegiye? Tiro kaŋgi tiyana mbo guro mbo juri

tûka mbo oseye. Hâgudu bara to koy hâbuto

igegiye.

Yagu hassa ereŋgu wayawe-ken, hâkuma

îya tire. Ŋgo ru îya tire? Sede baka ûtiyeka îya

tiraye.

Juma Ibrahim Harun (Mestere, hille Derende), Abderazik

Mahamad Ahmad (Mestere, hille Turju), Juma Adam Yaya

(Ichbere, hille Dôroti Alamarga)

33

Giraye 25

Ibirik

Ibirikko tiro ŋgâri mbo igegiye? Tiro tibag mbo

igegiye. Ibirikko ka alle na wardi mbo ige-gu

njoldoŋ uriye. Tiro ŋgâri ta jam igegiye? Tiro saa

loyn uddu ken salata igegiye. Hâgudu koro lukan

hâbuto in̰egiye. Ibirik ti nîyembo ndaŋ-ndaŋ te!

In ken ti gani kâddur mo tin̂dinasi. In ken tiro ka

jekkoy oŋon̰eye.




34

Giraye 26

Oda

Odo tiro, ŋgâri mbo igegiye? Odo tiro, wardu

kultuŋ, tubta ludaŋ, ganu njiraŋ, agu kûllaŋ,

hâgudu wardu kultuŋ, loyko

loyko tûbta ndunju im̂egiye.

Kîman cukaŋgu ken, dusuŋo

noŋ baraŋ mbara ken,

hâgudu dole ida nduŋ, reben̰ mbo ôrociceye.

Hâgudu kûde kooy norcoŋ, fîttu ken urseye.

Hâgudu sule dol koy, dûduk mbo wardi mbo

kultuŋ onorceye.




35

Giraye 27

Ûsee

Ûsee intawo indiseŋin îŋarin ko koyoŋ orgolin,

hâgudu ômin ko nditaŋ nar fokon̰iŋ kon in̰aye.

Hâgudu rogol su ken in̰aye. Hâgudu ûsee inta

billo ken ŋgâsin sôgu ken, tamiya ken in̰aye.

Hâgudu ûsee inta wo ndîŋ ron njiŋanta ulisiye.

Matar Mahamad Sileman (Kaniye, hille Jiri-jirib)

36

Giraye 28

Yây

Yây, ti sede wara ta ye. Yây ti malta tayawe, mal

nîjiri ilu kiĉh kûn̰u fûrtaŋ kûn̰un̰aŋa laŋan tilisi.

Hâgudu sedem ti de fayt nin̰arigiye. Bere mbo

koy wanarkicende. Hâgudu bûrti tîŋa ilu sininta

ûtuk mbo koy tâlasirende. Hâgudu ti n̰ugi ta mbo

konjii taŋa mbo isa taŋa mbo ka Sitan tayawe

ilam dawe tûkasi.

Ishak Kamis Mahamad (Mestere, hille Tirti)

37

Giraye 29

Munjukula mbo ŋâwre mbo

Lel̂e tu gani duwa tindede, munjukula kurnaŋ

“Aka jagiye molok moŋgeta mbo juwafata mbo

nabasiŋa yan koy, awula anara sûg mo anaŋa

arona, faŋgan̰i baka arkan, juju mbo boro kirima

mbo anara an̰ana, hâgudu kirimo aŋana, in

anni” ru ko saŋan toyosenden, le ganim mo de

nderesin kâbiŋem loynu kul toŋo tareg, bûrtim

talandiri noŋ, ŋâwre ano lamin, târ âya ru ken

tinden, ko raku “Anaŋa,

înjo yan koy ân̰u-ken

tinjiŋanni” ru lamin kul

kâbiŋem lôn kul tayin,

ti du munjukula taŋa

moŋgeta mbo juwafata

mbo kooy n̰an, dole

kambure sari tigen,

munjukula du “Ŋgâri ye

in nigeg?” rînaŋ, “Anjura âkalni” ru, tunjurig

38

lâmin fâsiŋ le wâc! in târiŋa, munjukula kâbiŋu

tîkalag, habii taŋa kooy kisasin nda ndan̰an tela.

Ajab rînaŋ “Ŋgo anti?” ru n̰uŋ tindika,

“Haddiye” ru le in̂im taka.

Abubakar Aduma Adam (Bede, hille Koŋga Haraza)

39

Giraye 30

Majirin mbo in̂je mbo

Majirin tu tuŋuno koy n̰âlkut ke tindede,

gikawaa taŋa le gani gâru ige gim wa-ken,

dummo tanarkiceyek. Lêle tu koy “Mate” irnen in

de n̰âlkut ke tin̂jarinden, ndâsirnu le waka.

Ti tindirka kurnaŋ taye-gu, in̂je mbo bûrtim

id̂irana. Majirin kumo kul bâŋ ken “Acumaŋte”

ru tenig, in̂je du tik̂ala-kunuŋ, kano ŋaŋar, kâriŋ

tirom 9rij! in taya. Ti du kuran kâriŋ melle sel

lor̂u “Hâyya hâyya!” ru fit̂ koy ken, tik̂al-kede

n̰aride taka-kunuŋ, gâr nindige in̂ig gâr nindige

tindede, taka-kunuŋ, rûs ken kusul, “Hâyya

40

hâyya” ru tigen, gâr nindige gi du “Maŋ ŋgâri ye

in riyayoŋ?” tirnen, “Înjo bûrtim raku bâŋ ana

anduraye” tirnen.

“Ama mboro aŋuno koy ‘Dummo de giran!’

ru mbindirin, kûjo njuŋa ra gu sik̂al. Kimin̰ mbo

gê giraye genan akar tandoŋ? Âmin na kede

dummo reŋan ya” tirnen, celcelo de “Kalla ye,

kalla ye, haywa” tirnen ela. Dummo tirenji-kede

de kik̂e gâru ken kosiŋ njuŋa kû gâru nendena gu

niŷembo assu tîrnaŋa.


41

Giraye 31

Âwiye mbo nâsibi mbo

Lel̂e tu, âwiye hillem

kusaŋko kar saŋga dee nim̂

lay, dakalo kul taye-gu, ka

hille mana tîŋar rucu waye-gu, nâsibi ŋundi, ti

ka wo selu âwiyo rayo taye-gu, âwiye mbo

dakala mbo agum îliŋana. Nâsibi gi, ti koy tara-

kunuŋ, agum ti koy til̂iŋana-kunuŋ, âwiye gu

laminu sule bir̂! in tarca, âwiye n̰arisin taka.

Ka dummo tela ila wanarka, in ken “Ŋgo

ken agum liŋ̂anayoŋ?” irnen. Ti du “Liŋ̂an âwiyo

sule racu ayori-gu taka” tirnen. Ajab ajab risin,

nâsibu assu assu risin, dakalo kul hillem waka.

Nâsibi in̂im taye-gu, dakalo kâddu raku, ti

du kuran “Âwiye ye” ru, dakala gu n̰uŋ kul

tiŋ̂ara-kunuŋ, “Hay ka, âwiyo awodila! Hay ka,

âwiyo awodila!” tirnen, dakala du saŋgam ko

taya.

Ka kinaŋ bûtasi kul wara. “Ŋgara yoŋ?”

42

irnen. Ti du “Âwiye hassa kûde tindede kar

awodila andulun̰aŋ, kâriŋ taka.” Ka jo ik̂ala-

kunuŋ, “Igi dakala ye” irnen, ti du “Lala, âwiye

ye” tirnen. Ka du “Ano tamo kosiŋ” le taŋ in̂iŋam

waka. Ti du lân tibiya.

Nâsibi gi ti du kunuŋ iyen, sey tinda-gu koy

“Mm mm âwiye jek lirra ye, mm mm âwiye jek

lirra ye” ru de tuŋuna. Ajab ajab risin ela.

Charif Adam Abakar (Ichbere, hille Ndita)

43

Giraye 32

Kima tiliji

Hawwa “Kima mbeg ân̰i kiliju bere tûka, ŋgo

antiyoŋ koy awosende” tirnen. Kadije du

“Amboro doktor tam lel̂e ilim dawo kûn̰i to

ambindila. Mbindili-ken gena sîkal.” “Aywa

andindil.”

“Kimo kun̰im tiyen tiliji-ken, saa yoŋ bibi

yoŋ n̰û-ken taŋen. Bibu calliko ken, aturun mbo

aŋgo mbo, hâgudu sukkarko loyna-kodo n̰û-ken

taŋen. Kimo bibu nûnji-ken laŋo tîlasin. Îya tiran

koy lebe lebe nûnju. Jômbiri tuŋuna tusulndan,

wala fariŋ tilijin koy kul hakkim mo naŋ. Bibi gi

mbo Milandaras (ORS) hakkim ta gi mbo kooy

sawa ye.”

44

“Kalla ye jarbu ken, âkalti,” ru ko jarbu

tena.

Jômbiri kaŋ ŋun îdirana. “Bibu ken jarbu

gena, tela sul telnde?” tirnen.

Ti du, “Jek kalla ye, dawe gu, alle

mosenden, kimin̰ tabko mandaŋirniye. Hâgu

mosiŋa. In migeti.”


45

Giraye 33

Ûwata alle na

Ka alle na, ûwata,

madaldim ko, ganu

rogol, ân̰ari ndisaŋ, sa

njokode, undurnaŋin n̰iŋ̂

enin, nditaŋ nar wiwitko

cokol, toŋo nar, ân̰iru

wiwit mbo rîn ndîŋ, fit̂te

mbo koŋŋon, ndîŋ bun̰ugko ken, fafarko nar,

ân̰iru ndîŋu, hâgudu cako nar, tûkuyo san, toron

binu nuntan, kubukko ken waciye.

Mi hâgu hasilko tîŋgu âmbiyan koy saŋan

binu menndiye. Mi ka hassa na wi, Mula

ambundununara. Ka gudura nene tîŋar, hasilko

amba wanarin sûg mo njiŋanta kul ko ron nar,

binije nunte gim manaŋ-ken tuntanin nar maci.

Mi ka alle na mbo wâru kâddu mene.

Wâkit ilim inko jabur nige kûyere. In ninda-gim,

hassa mbo alle mbo wâru menegiye. Kana gu

46

landir mîkalan nîyembo wâru kâddu mene.

Hâgudu minta molok ûji mana wi nîyembo

ununarti.

Adam Diŋgila Sharara (Kariye, hille Faŋan̰ta)

47

Giraye 34

Makatar malta nî

Jamanmo sî mbo leri mbo înje mbo makatar mo

wayin, lerig ârbiye ta neno kaXu ken gani tam

tun̰uŋa. Hâgu sî gi riyalta kaXu ten-kede tun̰uŋa.

Înje gi du gîrista tûn̰a, tu nda walandirnden,

hâgudu gani usurtem waka. Leri ti n̰uŋ fek koy

tirnde. Sî gi du tîŋar le târiŋa. Ârbiye ta nene gi

du înje gu riyalta taŋa nda talan-kede tayin, înje

gi kâriŋ tûrcuŋa.

In ken ili molok leri ti kaXu nena lo ârbiye

tare-ken tin̰arinde. Sî gi du kaXu nenda lo ârbiye

taren tîkalan tin̰ari. Înje gi du gîrista nda

walandirnda lo ârbiye tare-ken n̰ari tûrci.

Lukkura gi Burkina Faso ukkurna. Kana masaraka mbo

noŋgolon̰iŋa gi Souleymane Abakar (Adré)

48

Giraye 35

Adiŋgije mbo gokorŋgi mbo

Sene tu, hille kâddi yeka masikko

majirinta gâr ige gu kâddu tenen,

kâddu tene-gim, majirinta wi

sîŋgee wasi taŋa eneri ila sîŋgee

kâddur ûka. Sîŋgee kâddur ûka-kunuŋ, sininta

nene ye. Ilam gokorŋgi karu layu, agu kûllaŋu,

kimin̰ lun̰an, sey kusaŋ tû-ken, waram ko

adiŋgije nîŋ kimin̰ kîbin nar, kimin̰ taŋa ila wo

nindin̰o taye-gu, lêle tu adiŋgije wândasirna.

Adiŋgije wândasirna-kunuŋ, jo ndamo

hillem wara. Ka du masik mo inde. Adiŋgije

bûrtu de kîbin karu masik mo usula. Kaŋgi kâddi

ŋgo tire, “Adiŋgije sininta ene hillem waynde.

Nûka tinden hillem waya. Kûkun̰an keseren de

sey, ŋgâru entiyan enin mîkal” ru tirnen.

Ka kogu de ne sero inda-gu, koku sîŋgee

majirinta nîŋa ila malaŋu sîkalu, agu gokorŋgi

taci ilu raku, sîŋgee fît ken racan, gokorŋgu

49

narku, kimin̰ taŋa mbo kooy ndor yan, le waram

wâlana. Ka hille taŋa lêle ilu dîniyo ajab ir̂naŋa.


50

Giraye 36

Lukkurdi sede wara taŋa

Sede wara taŋa maamaje mbo jeri mbo alin̰ mbo

gukije mbo lan̰ mbo tir̂an, kâddi îni ir̂ijim ninda-

gim koku, “Kâddi mîni” irnen, “Nam” tirnen. “Ka

âwiye kira wi mbo ŋâwre kira wi mbo uŋuno koy

kimin̰ mîniŋa injiŋe. Mi kana gi ta kawo

moŋon̰indiye” irnen.

Kâddi wara ta gi kooy sede ninda wo

kuruŋu, ajalko kenu, “Lêle inna gim mid̂iranti”

tirnen, id̂irana. Id̂irana-gim, ŋgo tire, “Ŋgâri

kanda tûkoŋ?” tirnen. “Kimin̰ mîniŋa yi wo

uŋuno koy ka wi amba injiŋe. Kimin̰ injiŋe gi ta

ganim minta wo nîyembo away ambindirnen,

maŋ kâddi mîni len mara” ru irnen.

Kimin̰ kâniŋa ninjiŋe wi wo kâddi înig

tir̂karna-gu, âwiye koro lamin kurnaŋ, ŋgo tire,

“Mi hâbuto kânu mûkun̰endiye, yagu ki kara

wâcu ndili. Wâcu kindilin, wâci ka wo liya ba

telan, kaŋgi in hâbuto kaŋgi to nûkun̰aŋte kûye.”

51

In ir̂naŋa-gu, kâddi wara ta gi nuŋ sede tuu

wi nuŋ kooy tir̂an wâci to ganu inndidana. “Wâci

to ganu nos gi ŋgayoŋ?” ir̂naŋa-gu, tir̂an ninda

wi kooy wâci to ganu nos gi kûyen, kana gi

ûranan koy tûkindiyen, kâddi îni gi ajalko uyom

tena le wârcana.


52

Giraye 37

Ŋâwre mbo maama mbo

Lel̂e tu ŋâwre maamam ko ŋgo tire,

“Maama, maŋ du do ne, ama du

margu ane. Ka, modorona mâŋgacin”

in tirnen. Maama gi ŋgo tire, “Ŋâwre, kana na gi

kalla ye. Haddiye, modorona mâŋgacin” in

tirnen. In ken odorona.

Odorona ilim, de maama ta gi

kun̰u tenere. Sey inda-gu, ŋâwre suro

taka. Lel̂e ilu, de gi tun̰ana. Ŋâwre gi ko

fariŋ de taŋa kul, margi taŋa gonjor mo

kayiŋ, dakalo lamin kul, margi ta gu ŋgâcu

tiyen, de gi du n̰ari tûrcin, hillem wara.

Ŋâwre gi ŋgo tire, “Maama, sîkal, margi

mbe tun̰ana!” In tirnen, maama gi du ŋgo tire,

“Hay ka! Margi ŋgo ken tun̰oŋ?”

In ru, maama gi ko ka hille taŋa toron, ŋgo

tire, “Ŋâwre margi ta tun̰ana tire. Kana igi gani

ta yoŋ?” Ka wi ŋgo ire, “Margi tun̰ano aŋgit

53

mîkalnde. Kare, margu bût mucuŋa, do du bût

mucuŋa, dakalo mabasiŋi” tirnen. Tira-gi nuŋ

ena-gu, dakala dem taka! Ŋâwre ŋgo tire, “Kalla

ye, gosin sey manarkiye.”

In tirnen, ka hille taŋa du dakalo ûn̰a.

Dakala gi koy boko kâddi tûka. In ken sey inda-

gu, ŋâwre du suro taka.

Kus-kodo n̰erem dakalo wardu kûjo molok

kuram kayiŋ, dakalo ken̰eŋ rayo kul hillem naru

înim wara. Wara ilim, maama asee tûku tindede,

n̰elle lo ŋâwre gi maamo ŋgo tire, “Hay maama,

dakala asee tin̰ani” tirnen. Ti du tosiŋ-kede

hamuda mbo dakala ta gu ri9̂l tuya ela.

Adam Abdalla Ismail (Kariye, hille Gûndo)

54

Giraye 38

Fuguran mbo maliyin̰ mbo

Fuguran mbo maliyin̰ mbo âsurum tir̂an usen,

maliyin̰ wi inda-ken, “Ama malta inna ane. Dee

mbeŋa inna ye. Ama saŋga mbem dee inna ane.”

Inko inko ru ûre.

Fuguran gi inde wâl de tin̂inarin use. Lêle

tu fuguran gi ŋgo tire, “Hay ka wi” tirnen,

“Nam” irnen. “Ki kare, inde minda molo do do

mena sultanko manaŋa mun̰i” tirnen. Maliyin̰ wi

du “Haywa, kare do do mena manaŋa mun̰i”

irnen. “Kalla ye, ŋgarnam manaŋtiyoŋ?” irnen,

ajalko ena. Ajalko ken, ajal ili tara. Maliyin̰ wi

kaŋgi yagunuŋ saŋga ta molo do do in ken

in̂diŋara.

In̂diŋara,

fuguran gi du

înim kokoru koy

tenennde. Halas,

taŋi înim koku

55

bis kimin̰ tenen, bis taŋa kimin̰ ila wo tu kîbinu,

mukulam lôn kul tiŋ̂ara. Kul karu “Make!”

tirnen. Maliyin̰ wi du dee in̂iŋa wo kulu

wâŋgacin, “Make! Mi do do min̂diŋara” irnen.

“Fuguran gi hâbuto koy tenende, manaŋ-ken

tin̂diŋarndan, sultan tiro tenteg tenin, mela

marni,” in ru sultan mo kulu waka.

“Baba, mara” irnen. “Kare kunduman̰oŋ?”

tirnen. “He” irnen. “Ŋgo kiroŋ?” tirnen. “Mi do

do ken nda manara” irnen. “Ŋgara yoŋ?” tirnen.

“Wi ye” irnen. “Kalla ye, dee awula” tîrnaŋa.

Fuguran gi “Habi nenda gi dawo koy

tûnusende. Ama toŋo hâbuto koy anenden. Bis gu

wo ne kîbin nda anara” tirnen. “Halas, kanaŋa

kûjim lôni, juce wayan koy tinjiŋen” tir̂naŋa ela.


56

Giraye 39

Mûco gulusa mbo kib̂in neya mbo

Mûco gultiyan gilaŋko dee mbo tiĉe mbo sey ken,

hâgudu njiŋanta koy baka raku, mûco gulan koy

ken, gib̂into koy ndâyŋar, ba goyetiyoŋ, ba

hâbuto sûgmo naŋ ndînju roketiyoŋ, hâbi yagu

ndânjaŋo gete-gu kosiŋ-kodo kallal

nandadarede, kûri nda tako ba rakan, nik̂arnin,

“Haywa” tira-ken, baba no înim gâyinin ta-ken

ûronin, “Mûn̰ti” ira-ken, le tâlandirin, maŋ kara

gu nulte gi mbo gikawa na mbo sûg mo ko n̰ugi

awa mbo, hâgudu boro

kirima mbo kul n̰erem

tû-ken kara gi ta taŋim

ka-ken, gikawa gi hâbuto

kanaŋa wi wo naŋ,

munjukulo “Kusa” rînaŋ-

kodo “Gido ka” tir̂naŋin

tarin, hâbutoo ila n̰û-

kodo “Mi tara dan̰a

57

taranni gim mareye” tir̂naŋin, “Kalla ye” rînaŋ,

ko kara gu gikawa tam tenjebenin warin

kandasirnin kûcaŋan le kâlanin, jo ŋganna ŋun

ûn̰uteyan efelin, rôgol masik mo tir̂an, dee

mbara yoŋ kaŋ yoŋ, tiĉe du aya yoŋ, ba âday

yoŋ, hâgudu njiŋanta koy, ûtuk ûtukata gani

ûtuk yoŋ nduŋ, ka wo sallu nindige gu njiŋanta

ûn̰-ken fato tenin, luko toŋ, âri yoŋ tiban njiŋesin

wârcanin, mbelejta du kâli mbo sarisin, le

wârcanin, hâgu maŋ ko salam kesin, kutuba

ndaŋan lân kar dôm no kedel lay, kimin̰ lun̰o

kîndineseye.


58

Giraye 40

Dumbari

Sene tu, arko kumba kar dar Jinenewo todila.

In̂glezi koy Sudan molo wâkit ilim ma ta-kede ye.

Jaman ili arko In̂glezi tayaro koy nunduraŋ

dâwo tarcawen arko tisinden. Arko kumba

nîyembo kâddi ye. Hâkuma tento koy tosenden,

asee tin̰anin ajab ru tinda-gu, kaŋgi tu Dumbari

arko nenjebe ti maktab hâkuma ta gim koku ŋgo

tire, “Ama arko anjebenti” tirnen.

Hâkuma taŋa ka ŋgo ire, “Arko gu hâkuma

koy saŋan turayinden, maŋ ŋgo ken

njebentiyoŋ?” irnen. “Anjebenti” tirnen. “Ŋgâri

mbo njebentiyoŋ?” irnen. “Ama sîŋgee ane.

Sîŋgee ila mbo kenu, muturag in̂i ili mbo lamin

anjebenti” tirnen. “Kalla ye, nunduraŋa njeben”

irnen. “Ey, anjebenti” tirnen. “Halas, bero tesko

âmbi” ru tirnen. “Kalla ye” ru, hâkuma koku

bero margu kâddu in ronu, nar nucun tûn̰a.

Kulu înim koku muturagko dutom eleleŋ

59

aliŋgi to ucuŋo tene. Ili wo kulu, sîŋgee taŋa ila

laŋanu, beru n̰uŋ muturag ilu dole laminu,

muturagko tûrana arko dole turnaŋa. Bere mbo

kiyede kiyede, daha kamilko koku, muturag ilu

dole laminu arko dole fur! in tamina.

Hâkuma koy ârabiyeta mbo rucu teserde.

Lamin n̰elle naŋu muturagko malembo de

diŋgam tendena. Darko le n̰elle dar tum koku

tûsura le tâlandira.

Kaŋgi ilu hâkuma gir̂ista mâyyo nda kenu

nûnju sene naro koy tûnjin n̰o tindirniye. Arko

asee kaŋgi ili yandir-ken asee dar taŋ kooy

tin̰antiyere.


60

Giraye 41

Lukkurdi dan̰a Kadamena ta

Dan̰a Kadamena ta jamanko,

mbeli lo inda ilim waldama ta

tu tinden, waldama ta gi mbo

uŋuni-ken injinjirinde, usi-ken

injinjirende.

Sey inda-gu, id̂a tara dar înim. Îda tara-gu,

lêle tu waldama ta ta daraŋi tûka. Waldama ta

suro tate tûka. “Waldama” tirnen, “Nam” tirnen.

“Âmin ama suro ati” tirnen. “Îda gu?” tirnen,

“He” tirnen. “Gakindiye” ru tirnen. “Ŋgo

mentiyoŋ?” tirnen. “Ka, bûrtu tu menni” tirnen.

“Kalla ye.”

“Ŋgo menti gosoŋ?” tirnen. “He”. “Maŋ

kokoru kedem nene gu gosendoŋ?” tirnen.

“Awose” tirnen.

“Halas, kedem mula maka, sîŋgem

moyona, kurdu meni-ken, kedem ruc. Kedem

ruci-ken, halas ama mboro mbinnde-ken,

61

âwuronto ane” ru tirnen. “Kalla ye” tirnen.

Koku kokori kedem nene ilu kedem molo

nunduraŋ, kedem suraŋ kul, erdim tîŋ, sîŋge

gundo gon̰i ilim yon, sîŋge neteŋ, kûrdu ena.

Halas, kedem ila on̰on̰ona. Waldama tag turuca.

Ti tîle hillem kar kiye tiyen, sey inda-gu

malta indiŋte tûka. Dawiyo malta nanaŋa gi

landir tena. Jî ikana, hâg “Kaŋgi suro nanaŋte

kûyen. Aŋge ŋgur yoŋ? Aŋge ŋgur yoŋ?” irnen.

Warkicinden, halas, “Kake Kadamena nîm”

irnen. Dan̰a Kadamena tindam ko, “Wa

Kadamena” irnen. “Nam” tirnen. “Waldama na

ŋgur yoŋ?” irnen. “Waldama kedem turuca”

tirnen. “Ŋgaram!” irnen. “Ây gundo ây na ilim

kedem turuca.” “Kedem ŋgâri taŋ?” irnen.

“Kedem taŋa” tirnen. Ka dîniyo ajab rînaŋ,

“Mate mîkal” irnen waka.

Waka-gu, waldama tag sîŋgem dole kedem

ruc tinde. “Kedem nuructe gu karki-ken, ti tûsura

suro ta nî. Kedem wo le tûsurndiye, surbi

waŋanti” tirnen. I ajab rînaŋ le wara. Kima nate

62

ili ta da suro taka. I waldama ta ili mbo kedem

îniŋa ila njûru kon n̰an koku azuma îda ta gu

sari usa.


63

ABC Masarak Abécédaire en langue massalit / Massalit Alphabet Chart

a A

arko

â Â

âburandi

b B

bere

c C

ceke

ch Ch

chette

d D

dîri

e E

ereŋgi

ê Ê

sîŋgê

f F

fatarŋgi

g G

gaŋgaŋ

h H

halawa

i I

ibirik

î Î

înje

j J

ju

k K

\

kûnduk

l L

leri

m M

maama

mb Mb

mba

n N

nima

nd Nd

ndara

n̰ N̰

n̰uguri

nj Nj

njakala

ŋ Ŋ

ŋâwre

ŋg Ŋg

ŋgacire

o O

oda

ô Ô

mûcô

r R

râdiye

s S

sî

t T

taŋi

u U

umura

û Û

ûse

w W

wasi

y Y

yây

z Z

zirar

Documents

Kn Ms r k 2 - WordPress.com...Giry e 11 Yy mbo m r mbo Lêle tu Yy n ori mbo belle mbo kul suro tk . Amr deem tr . Yy m r o sîklu, k6riŋ kr u dee mbo m r mbo olonm n oru ludŋ tusul