Upload
others
View
8
Download
0
Embed Size (px)
Citation preview
Respublikanın ümumtəhsil məktəblərinin
2-ci sinifləri üçün “Həyat bilgisi” dərslik komplekti
Müəlliflər: Aybəniz İbrahimova
Gülər Mehdiyeva
Saməddin İbrahimov
Bakı: Aspoliqraf, 2014.
RƏY
2
Rəy aşağıdakı meyarlar əsasında formalaşmışdır:
1. Məzmunun işlənməsi baxımından;
2. Dil və yazı üslubu baxımından;
3. Dizayn və bədii tərtibat baxımından;
4. Tapşırıqların elmi-metodiki uyğunluğu baxımından;
5. “Müəllim üçün metodik vəsait”in (MMV-nin) məzmunun işlənməsi
baxımından.
1. Məzmunun işlənməsi baxımından
Dərslik komplekti dərslikdən və müəllim üçün metodik vəsaitdən ibarətdir.
Dərslik “Biz şagirdik”, “Biz təbiətin övladıyıq”, “Biz vətəndaşıq” bölmələri üzrə
25 mövzunu əhatə edir.
Bununla yanaşı, bəzi iradlar olduğu kimi qalıb. Həmçinin, maketdə yeni
qüsurlara da rast gəlinir. Bunlar aşağıdakılardır:
Təhsil Nazirliyi tərəfindən təsdiq olunmuş tədris planına görə, 2-ci sinifdə
“Həyat bilgisi” fənninə həftədə 1 saat ayrılıb. İl ərzində fənnin tədrisinə ümumilikdə
32 saat vaxt verilir. Ona görə də müvafiq dərslik komplektindəki materiallar da 32
saata uyğun olmalıdır. Komplektdə 25 mövzu ilə bağlı material var. MMV-nin
14-15-ci səhifələrində verilmiş “İllik planlaşdırma” cədvəlində isə 36 həftə nəzərdə
tutulur. Planlaşdırmaya görə sonuncu KSQ-ni 7-ci həftədə keçirmək nəzərdə tutulur.
Halbuki “Ümumi təhsil məktəblərində məktəbdaxili qiymətləndirmənin aparılmasına
dair Müvəqqəti Təlimat”ın 4.4-cü bəndinə görə, kiçik summativ qiymətləndirmə hər
tədris vahidinin sonunda, altı həftədən gec olmayaraq keçirilməlidir.
Dərsliyin əvvəlki nəşrlərində verilmiş mövzulardan (30) beşinin ixtisar edilməsi
(və ya başqa mövzulara birləşdirilməsi) düzgün deyil. Əgər dərs saatları artırılırsa,
onda mövzular bu formada ixtisar oluna bilməz.
“Ümumtəhsil sistemində dərslik siyasəti” sənədinin 3.2-ci maddəsi dərsliklərin
birmənalı olaraq kurikuluma uyğun olması şərtini qoyur. Lakin dərslik komplektində
bir sıra alt standartlar ya reallaşdırılmamış və ya qismən reallaşdırılmışdır.
Məsələn:
1.1.1. Varlıq və hadisələri xarakterik əlamətlərinə görə qruplaşdırır.
Şagirdin bu alt standart çərçivəsində qazanacağı bilik və bacarıqlar “Təbiət və
biz” məzmun xəttinin birinci istiqamətinə aid olduğundan, fizika, astronomiya və
kimya yönümlüdür. Yəni onun burada əldə etdiyi ilkin nailiyyətlər həm də gələcəkdə
3
bu fənlər üzrə öyrənəcəyi bilik və bacarıqlar üçün təməl təşkil edir. Məsələn, şagird
bu səviyyədə varlıqların bərk, maye və qaz halında olduğunu və heç olmasa, həmin
qrupların hər birinə aid varlıqlardan bir neçəsinin adını bilməli, ətrafındakı təbii və
süni maddələri fərqləndirməlidir. Dərslikdə dəfələrlə cisim, maddə, maye, qaz
anlayışlarından istifadə edilir, suyun bir haldan digərinə keçməsi haqqında danışılır,
lakin, bütün bunlar üçün əsas təşkil edən məlumatlar isə verilmir.
“Fənn üzrə məzmun standartlarının reallaşdırılması cədvəli”nə (MMV. səh. 8,
10) əsasən, bu alt standartda nəzərdə tutulan bilik və bacarıqlar 10-cu (“Yer kürəsi”)
və 16-cı (“Fəsillər”) mövzular çərçivəsində reallaşdırılır. Halbuki, elə mövzuların
adından da görünür ki, bu dərslərin 1.1.1. alt standartının qruplaşdırma anlayışı ilə
heç bir əlaqəsi yoxdur.
1.1.2. Varlıq və hadisələri öyrənmək üçün müvafiq avadanlıqlardan sərbəst
istifadə edir.
Bu bacarıqlar şagirdin hərtərəfli inkişafı, eləcə də gələcəkdə fizika, kimya və
astronomiya fənlərini dərindən mənimsəməsi üçün böyük önəm daşıyan bacarıqlardır.
Onların formalaşdırılması üçün nəzərdə tutulan avadanlıqlar isə adətən 2-ci sinif
şagirdinin müstəqil şəkildə istifadə edə biləcəyi sadə avadanlıqlardır. Məsələn, adi
gözlə görünməyən və ya yaxşı görünməyən varlıqları müşahidə etmək üçün lupa və
məktəbli mikroskopu, uzaqdakı varlıqları müşahidə etmək üçün durbin, göy
cisimlərini müşahidə etmək üçün məktəbli teleskopu, mayelərin həcmini ölçmək
üçün menzurka, varlıqların kütləsini ölçmək üçün tərəzi və s.
“Fənn üzrə məzmun standartlarının reallaşdırılması cədvəli”nə (MMV. səh. 8)
görə bu standart “Gün rejimi” (D. səh. 8-9) və “Temperatur və onun ölçülməsi”
(D. səh. 38-39) mövzuları çərçivəsində reallaşdırılır. Lakin buradakı
“avadanlıqlar”dan saat və termometrdən 2-ci sinif şagirdinin kurikulumda qeyd
olunduğu kimi, “sərbəst istifadə etməsi” hələ mümkün deyil. Belə ki, şagird 2-ci
sinfin 8-ci həftəsində dəqiqələri və saniyələri hələ öyrənməmiş olur. İkincisi də,
içində təhlükəli (zəhərli) maddə civə olan şüşə termometrdən 7 yaşlı şagirdin sərbəst
istifadəsi məqsədəmüvafiq hesab edilmir. Deməli, bu standartda nəzərdə tutulmuş
bilik və bacarıqların formalaşdırılacağını gözləmək qeyri-mümkündür.
1.4.1. Ətraf mühiti çirkləndirən mənbələri ayırd edir.
“Fənn üzrə məzmun standartlarının reallaşdırılması cədvəli”nə (MMV. səh.8)
görə bu alt standartda nəzərdə tutulan bilik və bacarıqlar 13-cü mövzunun tədrisi
çərçivəsində formalaşdırılır. Lakin bu mövzunun mətnində alt standartın mahiyyəti
ilə bağlı məlumat demək olar ki, yoxdur. Mövzuda şəkillərdən ikisinin (zavod və
4
tüstüləyən yük avtomobili) bu məsələyə aidiyyəti var. Bunların da hər ikisi havanı
çirkləndirən mənbələrdir. Torpağı və suyu çirkləndirən mənbələr haqqında isə
məlumatlar yoxdur. Axı ətraf mühit yalnız havadan ibarət deyil. “Müəllim üçün
metodik vəsait”də də bu barədə məlumat verilmir.
2.3.2. Azərbaycan Respublikasının Dövlət gerbini təsvir edir.
Dərslikdə bununla bağlı verilmiş 25-ci mövzu (“Dövlətimiz və dövlət
rəmzlərimiz”) alt standartda formalaşdırılması nəzərdə tutulan bilik və bacarıqlarla
uyğun gəlmir. Belə ki, alt standartda söhbət şagirdin Dövlət gerbini yalnız təsvir
etməsindən gedir. Lakin həm dərslikdə, həm də metodik vəsaitdə (səh. 82) əsas
diqqət rəmzlər və gerbdəki elementlərin “ifadə etdiyi mənalara” yönəldilib. Hətta
dərsin məqsədlərindən biri kimi, “Dövlət gerbinin elementlərinin mənasının izah
edilməsi” tövsiyə edilib. Halbuki, bu “məna”ların heç bir rəsmi əsası yoxdur.
Qanunları şərh vermək hüququ olan qurumların bu haqda heç bir şərhi olmadığı üçün,
proqramda bunun nəzərdə tutulması qəbuledilməzdir.
Azərbaycan Respublikasının Dövlət gerbi haqqında Əsasnamənin 2-ci bəndində
göstərilənlər isə yalnız bunlardır: “Azərbaycan Respublikasının Dövlət gerbi palıd
budaqlarından və sünbüllərdən ibarət qövsün üzərində yerləşən şərq qalxanının
təsvirindən ibarətdir. Qalxanın üstündə Azərbaycan Respublikası Dövlət bayrağının
rəngləri fonunda səkkizguşəli ulduz, ulduzun mərkəzində alov təsviri vardır.
Azərbaycan Respublikası Dövlət gerbinin rəngli təsvirində ulduz ağ, alov
qırmızı, palıd budaqları yaşıl, sünbüllər sarı rəngdədir. Qalxanın və ulduzun
sağanaqları, habelə qalxanın düymələri və palıd qozaları qızılıdır”.
2.4.2. Məktəbdəki və evdəki vəzifələrinin icrasını şəxsi inkişafı ilə
əlaqələndirir.
Bu alt standartın kurikuluma daxil edilməsində başlıca məqsəd şagirdin
məktəbdə və evdə yerinə yetirdiyi vəzifələrə, gördüyü işlərə lazımsız, vaxtını alan
işlər, böyüklərin amirlik istəyi kimi deyil, şəxsi bilik və bacarıqlarının inkişafına
kömək edən, fiziki sağlamlığını möhkəmləndirən, mənəvi dünyasını zənginləşdirən
vacib proseslər kimi baxmasına yardımçı olmaqdır.
“Müəllim üçün metodik vəsait”in 9-cu səhifəsindəki cədvələ görə bu alt standart
“Yenidən məktəbə” (D. səh. 6-7) və “Ailədə” (D. səh. 12-13) mövzuları çərçivəsində
reallaşdırılır. Lakin nə onların mətnlərində, nə də tövsiyələrdə bu barədə məlumat
verilmir. Burada söhbət ancaq ailədə və məktəbdə görülən işlərdən gedir.
4.1.2. Sağlam həyat tərzi haqqında mülahizələrini şərh edir.
5
Dərslikdə və müəllim üçün metodik vəsaitdə “sağlamlıq” və “sağlam həyat
tərzi” anlayışları fərqləndirilmədiyindən, bu alt standartın düzgün və sistemli
formalaşdırılması üçün heç bir məlumat və tövsiyə verilməyib. Belə ki, insanın fiziki
sağlamlığı təkcə onun xəstə olmaması ilə ölçülmür, həm də onun psixoloji, mənəvi və
sosial durumunun qaydasında olması ilə müəyyən olunur (məsələn, fiziki cəhətdən
sağlam olan şəxs tüfeyli həyat tərzi də keçirə bilər).
Sağlam həyat tərzi ilə bağlı yuxarı sinif şagirdlərindən fərqli olaraq, ibtidai sinif
pilləsi şagirdlərinin əməl edəcəyi qaydalar da elə çox deyil və hər kəsə məlumdur:
hər gün müəyyən edilmiş eyni vaxtda yatmaq
(21.00-dan gec olmayaraq) və oyanmaq (7.00-dan gec olmayaraq);
səhər gimnastikası ilə müntəzəm məşğul olmaq;
təyin edilmiş vaxtlarda qida qəbul etmək;
şəxsi gigiyena qaydalarına riayət etmək;
məktəbdən evə gəldikdən sonra dincəlmək (yatmaq), daha sonra ev
tapşırıqlarını yerinə yetirmək;
havası dəyişilmiş otaqda işləmək və yatmaq.
4.2.2. Ətrafda həyat üçün təhlükəli olan yer və obyektləri (gəzinti qadağan
olunan yerlər, elektrik və qaz qurğuları) tanıyır.
“Fənn üzrə məzmun standartlarının reallaşdırılması cədvəli”nə (MMV. səh.11)
görə bu alt standartda nəzərdə tutulan bilik və bacarıqlar 9-cu mövzu (“Təhlükələrdən
qorunmağı hamı bacarmalıdır”) çərçivəsində reallaşdırılır. Lakin dərsliyin 22, 23-cü
səhifələrindəki müvafiq mətndə bu alt standarta aid olan yalnız bir dənə tikinti
meydançası şəkli və aşağıdakı cümlələr var: “Həyətlərdə qaz və işıq qurğularının,
yaxınlığında gəzmək və oynamaq da həyat üçün təhlükəli ola bilər. Məsələn
tikinti işləri gedən yerlərdə də oynamamalısan”.
“Müəllim üçün metodik vəsait”dəki resurslar isə bunlardır: “Dərslik, qayçı,
bıçaq, çəkic, indikator, mismar, şəkillər, respirator, əlehqaz”.
Alt standartda nəzərdə tutulan bilik və bacarıqları bu “resurslar”la
formalaşdırmaq mümkün deyil. Şagird gəzinti qadağan olunan yerləri, elektrik və qaz
qurğularını tanımaq üçün heç olmasa onların şəkillərini görməlidir. Kənd yerlərində
uşaqların çay kənarında, yarğanların qaşında və s. təhlükəli yerlərdə oynamamaqları
qeyd edilməlidir.
“Nəticə və ümumiləşdirmə”də yazılanlar (MMV. səh. 37) isə bunlardır:
“Müəllim dərsi yekunlaşdırır. Bildirir ki, həyatımızı məişət avadanlıqlarsız
6
təsəvvür etmək mümkün deyil. Ona görə də bu avadanlıqlardan istifadə
qaydalarını hamı bilməlidir. Sağlamlığını qorumaq istəyən hər kəs məişət
avadanlıqları ilə qaydalara uyğun davranmalıdır...”
Bütün bu “nəticə”lər 4.2.2. alt standartına aid deyil.
4.2.3. Zəruri yol hərəkət qaydalarını (piyada keçid nişanları olan və olmayan
yerlərdə) izah və icra edir.
“Müəllim üçün metodik vəsait”in 9-cu səhifəsindəki cədvələ görə, bu alt standart
3-cü mövzu (“Yolda və nəqliyyatda”) çərçivəsində reallaşdırılır. Lakin dərsliyin
10-11-ci səhifələrindəki müvafiq mətndə ancaq piyada keçid nişanları olan və yol
hərəkətinin tənzimləndiyi yerlərlə (keçidlər, işıqforlar, keçid zolaqları) bağlı bilgilər
verilir. Alt standartın bəlkə də bundan daha vacib olan ikinci hissəsi piyada keçid
nişanları olmayan, hərəkətin tənzimlənmədiyi yerlərlə bağlı isə heç bir bilgi verilmir.
Halbuki, ölkənin yaşayış məntəqələrindəki yolların çox az bir hissəsində yol hərəkəti
tənzimlənir. Ona görə də alt standartın ikinci hissəsi ilə bağlı bilik və bacarıqların
aşılanması əslində daha böyük həyati əhəmiyyət daşıyır. Şagirdin belə yolları keçən
zaman əməl edəcəyi qaydaların “ixtisar”a salınması qəbuledilməzdir və onları
gündəlik həyatlarında istifadə edəcəkləri vacib bilik və bacarıqlardan məhrum edir.
Digər bir məsələ, dərslik komplektində fəndaxili və fənlərarası inteqrasiyanın
olmamasıdır. Mövzuların tədris vahidlərində “sistemləşdirib qruplaşdırılmasında”
psixoloji, məzmun və məntiqi ardıcıllıq prinsiplərinə əməl edilməmişdir.
Dərslikdə səhifə 8-9-da “Gün rejimi” ilə bağlı verilmiş saat şəkillərində
dəqiqələrin göstərilməsi fənlərarası inteqrasiya qaydalarına əməl edilmədiyini
göstərir. Belə ki, dəqiqə anlayışı riyaziyyat fənnində tədris ilinin ortalarında öyrədilir.
Dərslik komplektinin qüsurlarından biri də şagirdlərin həvəslə hazırlaşdığı,
bütün məktəblərdə təntənəli şəkildə keçirilən bayramlar haqqında məlumat
verilməməsidir. Halbuki, bəzi alt standartları (Məsələn, 3.1.1 və 3.4.1) mövsümilik
prinsipi çərçivəsində Yeni il, 8 Mart qadınlar bayramı, Novruz bayramı ilə əlaqəli
şəkildə reallaşdırmaq daha faydalı olar.
2. Dil və yazı üslubu baxımından
Dərslik komplektində mövzu adlarında sual və nida işarələrindən istifadə
edilməyib. Halbuki, ibtidai sinif dərsliklərində bu mühüm əhəmiyyət kəsb edir.
Məsələn, “Sağlamlıq nədir” (D. səh.16), “Yoluxucu xəstəliklərdən necə qorunmalı”
(D. səh.20) başlıqlarının sonunda “?” işarəsinin qoyulması məqsədəuyğundur.
7
Dərslikdə sual və tapşırıqlar bölməsini göstərmək üçün (həm də dizayn elementi
kimi) şərti işarədən istifadə olunduğu bildirilir. Lakin bütün dərslik boyu bu şərti
işarə durğu işarəsini (sual işarəsini) əvəz edir. Ona görə də heç bir sual cümləsinin
sonunda sual işarəsi (?) yoxdur. Halbuki, şagirdlərdən sual cümləsinin sonunda sual
işarəsi qoymaq tələb olunur. Digər tərəfdən həmin şərti işarənin tapşırıqlara hansı
məntiqlə aid edildiyi də bilinmir.
Səhifə 6-7. Burada, mətnin yarısı (səh.6) müəllifin dilindən, digər yarısı (səh.7)
isə şagirdin dilindən verilib. Bu, pedaqoji və dərslik yaradıcılığı praktikası
baxımından düzgün deyil.
Səhifə 9. “Gün rejimi” mövzusunda aparılan “düzəliş”lər zamanı dərsliyin
əvvəlki variantında olan “14.00–17.00” və “17.00–19.00” məlumatları
silinmədiyindən qarışıqlıq yaranıb. Əvvəlki saat göstəricilərində heç bir yazılı izahat
olmadığı halda, “düzəliş”lərdə “istirahət saatları”, “ev tapşırıqlarının yerinə
yetirilməsi”, “oyunlar” və “şam yeməyi” kimi izahatlar var. Bu isə unifikasiya
prinsipinin pozulmasıdır. Burada, “19.00–21.00” saatlarında şagirdin televizora
baxması da düzgün hesab edilmir.
Səhifə 15. “Xəstələrə “Allah şəfa versin!” deməliyik” tövsiyəsi dərsliklərin
dünyəviliyi prinsipinə uyğun deyil. Bunun əvəzinə “Keçmiş olsun!”, “Yastığınız
yüngül olsun!” və s. kimi ifadələrdən istifadə etmək daha məqsədəuyğundur.
Səhifə 19. Mətndə yalnız mövsümə uyğun geyinməkdən söhbət gedir. Halbuki,
hava şəraitinə uyğun geyinmək ondan daha aktualdır.
Səhifə 24. “Yanğın baş verərkən onu söndürmək üçün bir çox binaların
dəhlizlərində yanğınsöndürmə balonları quraşdırılır” cümləsində “quraşdırılır”
sözünün əvəzinə “qoyulur” və ya “asılır” sözlərindən istifadə olunması daha
məqsədəuyğundur.
Səhifə 30. “Yer kürəsinin çox hissəsini su tutur” cümləsinin “Yer kürəsinin
səthinin çox hissəsini su tutur” kimi verilməsi tövsiyə edilir.
Səhifə 36. Mövzuda “Qırmızı kitab”ın adı çəkilir, lakin buraya daxil olan bitki
və heyvanların adları göstərilmir. Suallarda isə “Qırmızı kitab”a düşən bitki və
heyvanların adları soruşulur.
Səhifə 38-39. Mövzuda müəyyən çatışmamazlıq və səhvlər var:
Mətndə söhbət civəli termometrlərdən gedir, ancaq beş termometr şəklinin dördü
spirtli (qırmızı mayeli), biri isə elektron termometrdir.
Səhifə 39. “Tibbi termometr” adı ilə verilən mayeli termometr tibbi termometr
deyil. Belə ki, tibbi termometrlərdə gümüşü rəngi olan civədən istifadə olunur. Rəngli
8
mayeli (spirtli) termometrlərdən isə havanın və suyun temperaturunu ölçmək üçün
istifadə olunur.
Burada, verilmiş Farenheyt termometri Azərbaycan şagirdi üçün nə bu gün, nə
də gələcəkdə heç bir praktik əhəmiyyət kəsb etməyəcək. Belə ki, ondan yalnız ABŞ,
Kayman adaları və Belizdə1, həm də dar çərçivədə istifadə olunur.
“Tibb termometrinin borusu civə ilə doldurulur” fikri düzgün deyil. Boru
civə ilə dolu olarsa hərəkət edə bilməz. Hazırda dünyanın bir çox ölkələrində civəli
tibb termometrləri qadağan olunub. İndi daha təhlükəsiz elektron və infraqırmızı
termometrlər geniş yayılıb. Mətndə şagirdlərə bu istiqamətdə müəyyən məlumat
verilməsi yaxşı olar.
Səhifə 42. “Yayı insanların istirahət fəsli də adlandırmaq olar” fikri düzgün
verilməmişdir. Belə ki, kənd təsərrüfatı sahəsində çalışan insanlar üçün bu dövr,
əksinə qızğın iş dövrüdür. Həm də insanların böyük bir hissəsi başqa fəsillərdə,
məsələn, qışda istirahət etməyə üstünlük verirlər.
Yenə həmin səhifədə “Heyvanların çoxu qış yuxusuna gedir” fikri düzgün
deyil. Əksinə, onların az bir hissəsi qış yuxusuna gedir.
Səhifə 46. “Sel” anlayışının izahı düzgün deyil. Hər daşqını sel adlandırmaq
olmaz. Selin əmələ gəlməsi üçün fərqli amillərin üst-üstə düşməsi lazımdır. Məsələn,
güclü yağışa məruz qalan dağ yamaclarında, eləcə də başlanğıcını oradan alan
çayların mənbəyində və yatağında sel materialı – aşınmış dağ süxurları yığılıb
mövcud olmalıdır. Çünki sel axınının adətən 50-60 faizi məhz bu süxurlardan ibarət
olur2.
Yenə həmin səhifədə “Masa” sözü “stol”, “eyvan” sözü “balkon” kimi yazılıb.
Səhifə 56. “Müsəlmanların Allaha ibadət etdiyi yer məscid adlanır” fikri
düzgün verilməmişdir. İslam dininə görə insan təmiz olan hər yerdə – evdə, bağda,
meşədə, qatarda Allaha ibadət edə bilər.
Səhifə 67. “Azərbaycanın sərhədlərini Milli Ordumuz qoruyur” fikri düzgün
deyil. Belə ki, sərhədlərimizi Milli Ordu yox, Sərhəd qoşunları qoruyur. Milli Ordu
yalnız ölkəyə təcavüz halında hərəkətə keçir.
“Dərslikləri qiymətləndirmə meyarları”nın 2.4-cü maddəsi bütün dərsliklərdə yeni
söz və terminlərin izahının verilməsi tələbini qoyur. Lakin “Həyat bilgisi 2”də xeyli
yeni söz və terminlərdən istifadə olunmasına baxmayaraq, cəmi 6 sözün izahı
verilmişdir.
1 http://az.wikipedia.org/wiki/Farengeyt_%C5%9Fkalas%C4%B1
2 http://ru.wikipedia.org/wiki/%D0%A1%D0%B5%D0%BB%D1%8C
9
3. Dizayn və bədii tərtibat baxımından
“Ümumi təhsil sistemində dərslik siyasəti” sənədinin 6.11-ci maddəsi
dərsliklərdə tədrislə əlaqəsi olmayan reklamları qadağan edir. Bunun əsas
səbəblərindən biri də dövlət büdcəsi hesabına çox böyük tirajla çap olunan və yarım
milyondan artıq şagirdin istifadə etdiyi dərsliklərdə hansısa özəl müəssisənin
məhsulunu yerləşdirib bazar subyektləri arasında ayrıseçkilik salmamaqdır. Axı
dövlət büdcəsi yalnız dərslikdə reklamı yerləşdirilən müəssisə və firmaların deyil,
həm də onların bazardakı rəqiblərinin ödədiyi vergilər hesabına formalaşır. Lakin
“Həyat bilgisi” dərsliyinin üz qabığının 3-cü səhifəsində kağız firmasının reklamı
verilib.
Dərsliyin bədii tərtibatında da ciddi qüsurlar var. “Ümumtəhsil sistemində dərslik
siyasəti” sənədinin 3.1-ci maddəsi “illüstrasiyaların yığcam və mövzulara uyğun
olması” tələbini qoyur. Dərslikdə bir çox hallarda bu tələbə əməl olunmayıb. Məsələn,
səhifə 28-31-da şəkillərin yığcamlığı haqqında danışmaq mümkün deyil. Belə ki,
buradakı üç şəkil qoşa səhifənin ümumi sahəsinin 3/4 hissəsini tutur.
Səhifə 9. Məktəb binasının təsvirində binanın üzərində “məktəb”sözü yazılıb.
Heç bir məktəb binasının üzərində “məktəb” sözü yazılmır.
Şagirdin televizora çox yaxın məsafədən baxdığı təsvir edilmişdir. Gigiyenik
baxımdan bu düzgün deyil.
Səhifə 10-11. 2-ci sinif şagirdinin şəhərdə məktəbə tək getməsi (səh.10),
avtobusda, eskalatorda və liftdə təkcə hərəkət etməsi (səh.11) reallığı əks etdirmir və
pedaqoji baxımdan düzgün deyil.
Səhifə 12. Televizorda göstərilən Azərbaycan xəritəsində Naxçıvan Muxtar
Respublikası görünmür.
Səhifə 12-13. “Ailə” mövzusunda ailənin baba, nənə, ata, ana və uşaqlardan
ibarət olduğu bildirilir. Lakin şəkillərin heç birində nənə təsvir olunmayıb.
Səhifə 16-17. Şəkildə məktəbli qız (səh.16) və oğlanın (səh.17) evdə məktəbli
paltarında yemək yeməsi təsvir olunmuşdur. Bu gigiyenik cəhətdən düzgün deyil.
Səhifə 27. Burada, verilən fiziki xəritə deyil, siyasi xəritədir. Ona görə də
şəkilaltı yazı dəyişdirilməlidir.
Səhifə 32. “Yabanı alma” adı ilə təqdim olunan şəkildəki meyvə “mədəni
alma”dır. Ağaca xidmət, məkan və meyvələr (iri, qırmızı) bunu açıq-aydın göstərir.
10
Səhifə 57. Burada, Vilnüsdəki Sinaqoqun3 şəklinin verilməsi məqsədəuyğun
hesab edilmir. Bunun əvəzinə ölkəmizdəki sinaqoqlardan birinin şəklinin verilməsi
daha düzgün olar.
Səhifə 64. Şəkildə əsgərin ata-anası çox yaşlı təsvir olunmuşdur.
Səhifə 67. Azərbaycan Respublikasının xəritəsində ciddi qüsurlar var. Burada,
çox kiçik şəhər (Daşkəsən, Xızı, Culfa) və qəsəbələrin (Ləki, Qıvraq) adları verildiyi
halda, ölkənin faktiki olaraq ikinci sənaye mərkəzi olan Sumqayıtın (eləcə də
Lənkəranın) adının olmaması təəccüb doğurur. Digər tərəfdən isə bir sıra şəhər adları
öz statuslarına uyğun şriftlə verilməyib (Məsələn, Xankəndi).
Səhifə 69. Qalxan şəkli əvəzinə mənası anlaşılmayan dairə şəkli verilib. Digər
tərəfdən Azərbaycan Respublikasının Dövlət Gerbində təsvir olunan “qalxan” deyil,
“şərq qalxanıdır”.
“Ümumtəhsil məktəblərində dərslik siyasəti” sənədinin 6.7-ci maddəsi
dərsliklərin müəyyən texniki və gigiyenik tələblərə cavab verməsi şərtini qoyur.
Bu yaş qrupu üçün kitablarda neqativ şriftlərdən (vıvorotka) istifadəyə icazə
verilmədiyi halda, dərsliyin 5, 25, 47-ci və s. səhifələrində bu üsuldan istifadə edilib.
4. Tapşırıqların elmi-metodiki uyğunluğu baxımından
Dərslikdə verilən tapşırıqların sayı çox azdır. Verilmiş sualların əksəriyyəti isə
pedaqoji baxımdan şagirdlərin yaş səviyyəsinə uyğun tərtib edilməmişdir.
5. “Müəllim üçün metodik vəsait”in (MMV-nin)
məzmunun işlənməsi baxımından
MMV-də dərsliyin səhifələrinin şəkil formasında verilməsi müəllimə dərsliksiz
işləmə imkanı yaratmaq üçündür. Lakin 47, 51, 71, 77 və 83-cü səhifələrdə dərsliyin
səhifələrinin yarısı kəsilmiş şəkildə verilmişdir.
Məzmun standartlarının reallaşdırılması ilə bağlı komplektdə verilən fənn
kurikulumu hazırda qüvvədə olan fənn kurikulumunun yeni variantı
(http://www.kurikulum.az) ilə uyğun deyil. Çünki komplektdə aşağıdakı alt
standartların heç biri yoxdur:
3 http://www.vilnius.skynet.lt/hramy25.html
11
1.2.1. Coğrafi obyektlərin (dağ, təpə, dərə, düzənlik, çay, göl) yaranma səbəblərini
izah edir.
1.2.2. Üfüqün cəhətlərini təyin edir.
1.3.1. Canlılar aləminə aid olan varlıqları (bitki, heyvan, insan) təsvir edir.
2.1.2. Özünün və yoldaşlarının kollektiv daxilindəki fəaliyyətinə münasibət bildirir.
2.1.3. Ailədə və kollektivdə vəzifələrin əhəmiyyətini izah edir.
2.2.2. Verilmiş şərtlərə uyğun şəxsi büdcəsini tərtib edir.
2.2.3. Milli pulla müvafiq hesablamalar aparır.
Belə olan halda müəllimin bu bilik və bacarıqları hansı resurslarla formalaşdırması
məlum deyil.
Əgər dərsliyin fənn kurikulumunun ilk variantı (Bax: “Ümumtəhsil məktəblərinin I-
IV sinifləri üçün fənn kurikulumları”. Bakı, 2008) ilə hazırlandığı iddia olunursa,
onda başqa problem yaranır. Belə ki, MMV-nin 8-11-ci səhifələrində verilmiş “Fənn
üzrə məzmun standartlarının reallaşma cədvəli”ndən də görünür ki, komplektdə ilk
variantda olan aşağıdakı alt standartlar reallaşdırılmayıb:
1.2.2. Yaşadığı ərazinin sadə coğrafi təsvirini verir.
2.1.2. Özünün və yoldaşlarının kollektiv daxilindəki fəaliyyətinə münasibət bildirir.
2.2.1. Zəruri ehtiyaclarının ödənilməsini təmin edən istehsal sahələrini sadalayır.
2.3.2. Azərbaycan Respublikasının dövlət gerbini təsvir edir.
Rəsmi dövlət sənədi olan fənn kurikulumunun alt standartlarının məzmununa
müdaxilələr edilib. Məsələn, 2.4.1-də “formada” sözü “şəkildə” sözü ilə (səh.18),
2.2.3-də “etdiyini” sözü “etməyi” sözü ilə (səh.20) əvəzlənib.
4.2.3-də “və icra” (səh. 22), 3.1.2-də “tənqidi” (səh. 26), 2.2.4-də “və onlarla müvafiq
hesablamalar aparır” anlayışları ixtisar olunub. Vəsaitdə hər yerdə “alt standart”
anlayışı “standart” anlayışı ilə əvəzlənib. Halbuki, bunlar fərqli anlayışlardır.
25 dərsdən 16-sında bütün dünyada problem çözmə metodu kimi, istifadə
olunan “Beyin həmləsi”nin tətbiqi tövsiyə edilir. “Beyin həmləsi” ilə bağlı 5-ci dərsin
tədqiqat sualı anti-pedaqoji mahiyyət daşıyır: “İnsanlarla mehriban davranmaqda
məqsəd nədir?”. Şagird mehriban olma bacarığına çağdaş insanın yaşam tərzi kimi
yiyələnməlidir, məqsəd kimi deyil.
“Beyin həmləsi” metodu bəzən elə formada tətbiq edilir ki, öz əhəmiyyətini
itirir. Məsələn, 8-ci mövzunun tədrisi zamanı tədqiqat sualı belədir: “Qrip xəstəliyini
nə üçün yoluxucu xəstəlik adlandırırlar?”. Yalnız bir cavabı (İnsanlardan bir-
birinə yoluxduğuna görə) olan bu sualla sinifdə “Beyin həmləsi”ni yaratmaq mümkün
deyil. Lakin sual “Qrip xəstəliyindən necə qorunmaq olar?” formasında qoyulsa
12
şagirdlər fərqli cavablar verər, problemə öz yanaşmalarını bildirər və bütün bu
cavabların içərisindən də metodun tələbinə uyğun olaraq, lazımlıları seçilib
qiymətləndirilər.
Bəzi dərs nümunələrində dərsin məqsədi və tədqiqat sualı müvafiq alt standarta
uyğun gəlmir. Məsələn, 6-cı mövzuda (səh. 30) formalaşdırılmalı olan alt standart
belədir: “Sağlam həyat tərzi haqqında mülahizələrini şərh edir”. Lakin dərsin
məqsədi (1. Sağlamlığın məqsədini izah edir. 2. İnsanın normal fəaliyyətini onun
sağlamlığı ilə əlaqələndirir) də, onun tədqiqat sualı (Sağlamlıq nədir və ona necə nail
olmaq olar?) da yalnız fiziki sağlamlıq üzərində qurulub. Halbuki, fiziki sağlamlıq
sağlam həyat tərzinin yalnız bir hissəsidir. Deməli, bu dərs nümunəsi ilə nəzərdə
tutulan bilik və bacarıqların formalaşdırılması mümkün deyil.
Metodik vəsaitin digər qüsurlu hissələrindən biri də dərs nümunələrindəki
“Motivasıya”lardır. Buradakı tövsiyələrin bəziləri anlaşılmaz, hətta dərsin məqsədinə
uyğun deyil. Məsələn, səhifə 70-dəki “Motivasiya”da mənəvi keyfiyyətlərlə bağlı
bacarıqları formalaşdırmaq üçün iki qonşu haqqında “hekayə” təqdim edilir. Dalaşıb
küsən qonşulardan biri qohumunu görmək üçün başqa şəhərə getməli olur. Bu vaxt
onun evinə oğrular girir. Qonşu bunu bilsə də, küsülü olduğuna görə polisə xəbər
vermir. Bu isə artıq mənəviyyat məsələsi deyil, cinayətdir. Çünki qanunlara görə
cinayəti bilib gizlədən şəxs də cinayət məsuliyyəti daşıyır.
“Dərslikləri qiymətləndirmə meyarları”nın 2.1.5-ci maddəsi MMV üçün konkret
əlavə vəsaitlərə (elektron resurslar, əyani vəsaitlər, xəritələr, sxemlər və s.)
istiqamətləndirmə şərtini qoyur. Lakin vəsaitdə tövsiyə edilən əsas resurslar dərslik,
iş vərəqləri, şəkillərdir. Burada heç bir elektron resursa istiqamətləndirmə yoxdur.
Səhifə 35. “...hər bir şagirdi aşağıdakı meyar cədvəli ilə qiymətləndirə
bilər” cümləsində fikir düzgün ifadə olunmayıb. Belə ki, qiymətləndirilən şagird
deyil, onun fəaliyyəti, bilik və bacarığıdır. Həm də qiymətləndirmə “meyar cədvəli”
ilə deyil, cədvəldəki meyarlarla aparılır.
Səhifə 40. Təhlükəsizliklə bağlı dövlət xidmətlərinin adları düzgün
verilməmişdir. “Daxili İşlər Nazirliyinin 102 xidməti” əvəzinə “Polis bölməsi (102)”,
“Dövlət Yanğından Mühafizə Xidməti (112)” əvəzinə “Yanğınsöndürmə (112)”
yazılıb.
Səhifə 41. 3-cü tapşırıq düzgün tərtib olunmayıb. Belə çıxır ki, kök və ya arıq
olmaq xəstə olmaq deməkdir, ona görə də belə bədənlərdə sağlam ruh ola bilməz.
Səhifə 52. 2-ci testin sualı düzgün deyil. Belə çıxır ki, mavi rəng ancaq fiziki
xəritələrdə suyu göstərir. Halbuki bu, bütün xəritələr üçün keçərlidir.
13
Səhifə 54. “Kapron qapaq” anlayışı düzgün deyil. Kaprondan sap, parça
alırlar. Qida məhsulları saxlanan qabları və ya onların qapaqlarını isə plastmasın
xüsusi növlərindən hazırlayırlar. Ona görə də “plastmas qapaq” olmalıdır.
Səhifə 55. Temperaturu ilboyu sıfır dərəcədən aşağı olan yerlərin “soyuq
qurşaqlar” adlandırılması düzgün deyil. Belə ki, soyuq qurşaqlar dedikdə, şimal
qütb dairəsindən Yerin şimal qütbünə qədər və cənub qütb dairəsindən Yerin cənub
qütbünə qədər olan ərazilər nəzərdə tutulur. Amma Yer üzərində temperaturu ilboyu
sıfır dərəcədən aşağı olan başqa ərazilər də var. Məsələn, Everestdə temperatur
həmişə sıfır dərəcədən aşağı olur.
Səhifə 60. Zəlzələ ilə bağlı əməl olunmalı qaydalar şəhər evləri (çoxmərtəbəli,
liftli evlər) üçün keçərlidir. Halbuki, kənd evlərində evdən çölə qaçmaq üçün imkan
var. Ona görə də diferensiasiya aparılması tövsiyə edilir.
Səhifə 74. “Əsas dinləri sadalayır” fikri düzgün verilməmişdir. Səmavi və
səmavi olmayan dinlər var. Lakin “əsas” və “qeyri-əsas” dinlər yoxdur.
Səhifə 77. “Hər bir müstəqil dövlətin pul vahidi var” fikri düzgün deyil.
Məsələn, Almaniya, Fransa, İspaniya və digər ölkələr müstəqil dövlətlərdir, lakin
özlərinin ayrıca pul vahidləri yoxdur.