Upload
others
View
0
Download
0
Embed Size (px)
Citation preview
Ecetaa Esuzu Mungu Ma Letaa Mini Risi
I LU EYINIALE EYI RA
#1 NEW YORK TIMES BEST SELLING AUTHOR
I LU EYINI
Ale Eyi Ra
Ecetaa Esuzu
Mungu ma Letaa mini risi
Driwala woro ‘ba mba tani ci. Azitaa Amerika ma Driwala buku ni eli 1976 dri risi, buku ‘di ma esele azini nezu, enzezu, azini afa aci bakasi ri ayupi ri awazu rukusa agu buku ‘di sipiri dri kokori azitaa koko vini ogu afa agu buku sipi ri ma ondua niri. Ika le afa azini ayu buku ‘di ma alea (lu asisile amvitaa ni risi), le mi esu rukusa okoru agu buku sipi ri dri ‘[email protected] ri vu. Awa’difo mini driwala agu buku sipi ri dri inzizu risi.
Ekile ecele ‘bo rile, E’yo Alari ni ‘diyi ‘ba enze eyi woro engazu Bibilia omvele Amplified® Bible (AMP) ri ma alea. Driwala buku sizu ri ‘Copyright © 1954, 1962, 1965, 1987 ongulumu omvele ‘Lockman Foundation’ ri dri. ‘Ba Ayu Rukusa si.
E’yo Alari alama ni ‘bazu ‘ NKJV’ ‘diyi ‘ba e’du yi engazu Opi Yakobo ma Wura O’di ri dri ria. Driwala buku ni omvele ‘Copyright © 1979, 1980, 1982 ri Ongulumu ‘Thomas Nelson, Inc’ ri drisi.
E’yo Ala sizu ‘ KJV’ ‘diyi ‘ba e’du eyi engazu Bibilia Opi Yakobo ma Wura dri ria.
Ongulumu ‘ Buku FaithWords
Hachette ri driNzila 237 ‘Park Avenue’ dri riaNew York, NY 10017www.Faithwords.com
‘Ba ofu eri of Amerika-aOko‘ba si eri: Emba Iri, Eli 2003 si‘Ba fe dika: Emba Mudri si, Eli 2007 si
14 13 12 11 10FaithWords ni esele Ongulumu Buku ‘Hachette, ri dri
‘FaithWords’ eyi ru azini alama Ongulumu ‘Hachette‘dri ri‘Ba e’yo nzepi ‘Hachette’ ni ‘diyi vu ‘ba esele si buku sipi ‘diyi e’yo nzezu omutaa yini ci. Mini lezu e’yo esuzu angiri, imuu www.hachettespeakersbureau.com or call (866) 376-6591.Agu buku ‘di ofupi ri so pa ‘website’ ‘di ma dria ku (kaniku e’yo alenia ‘diyi si) ‘ba buku ofupi ri dri risi ku
ISBN 978-0-446-69205-2
LCCN 2002115636
E’dotaa
1 Mungu Le Mi Ra!
2 Ma Kililiru Ya?
3 Letaa Eri Agi Ni
4 Letaa, Aletaa, azini Aitaa
5 Driwala Ori Alea ri
6 Letaa Ni Caa Amve
7 Mungu Ni Nga Mi Oja Ra
Mi Amaa Edri O’dini
›šE’yo Alea ‘Diyi
vii
1
9
19
27
35
41
47
51
Afa mani ai kini ‘ba leki ndeni agaa afa azi ‘diyi ri ecetaa
Mungu ma letaa ni ru ecezu agiru ekile ‘ba alualu si rile
ri i. Ma ai vataa ‘diri pari ndetaa oazu Kristiani ru rini pa
sozu ri i. Ale ni “onitaa dri niri” ku letaa Mungu niri si; ale
ecetaa Erima letaa niri ama asia i. Orindi Alari ni lu ‘diri fee
ni a’dule, azini Eri nga ede ‘dini ama asi droo letaa Mungu
dria, ine letaa Mungu driri edri ama dria, vini mi ai ecetaa
geriko E’yo Mungu dri risi Ezitaa si.
Aizu kini Mungu le Wudrikuru Ndulu cazu Yesu ni fezu
drazu ‘ba alualu ma ezataa siri were okpo kokoru. Te ‘dari
vii
E’dotaa
›š
E’dotaa
aizu kini Mungu le mi tuu ani eco Yesu ma ti epezu drazu
misi azini mi a’dule si ika ovu ndra lu ‘ba alu angu ma dria
a’dule ri eco ovuzu were ewaru.
Eli karakara ovuzu Kristiani asi ni fuzu mgboo ri ru,ma emu
Mungu ma letaa vaa ra. Mungu ece mani aza si, geriko Orindi
Alari drisi, Erima letaa maniri wura ‘ba vele risi. Ecetaa alu
‘da oja mama edri pi vini mama acitaa Eri be ri.
Ma ai afa mini laa buku ‘di ma alea ri nga mini e’yo o’di netaa
azini vazu letaa Mungu niri si. Ma ai eri nga abiri o’di ni fee
mini ecetaa mi siri esuzu. Ma ai mi buku ‘di lazu e’yere, eri
ayuzu afa onitaa aza kozu ri ru, azini asi drozu e’yo alari
‘diyi dria azini egataa mini nga esu pegi drilea ri ma alea
‘diyi.
Afe buku ‘diri mi dri ru maza fuu, mani nizu kini ma orodri
koko Mungu azini afa ci ecetaa ru azini vataa mani esu E’yo
Eri dri risi ri Aza Erini risi.
viii
I LU EYINI Ale Eyi Ra›š
“Mungu ni angu lezu tu risi efe ima mva elipiliru ri ma ti,
ani ‘ba eri aipira ri ngani muu drazu ko kanisi eri nga edri
‘dani’daniri esu i.”
— YOANA 3:16 NKJV
1
Mungu le aku ni, ani fe amani ovuzu eri ma anzi ru. Le ni
amani afa yi ‘yezu odekua yi le ku; Le ama ‘ye afa eyi ekile
Erima mvii azini zii yi le. Le ama ma sopa Erima dria, atiru
Erima rua, le Eri i, vini ama fee Ma le ama. Le ama ale Erima
rua azini ca eri Vu sawa amani afa lele ‘diyi lezu risi. Le agi
‘ba ama alualu be. Ama kalafe angiri ‘diyi Yoana 3:16 ni ega
Mungu Le Mi Ra!
1
›š
geri walaru tu ‘diyisi. “O, ee, ani ra Yesu dra wudrikuru si,”
ama ‘yo, te “wudrikuru ni” ovuni lu ‘ba kalafe Yesu ni drazu
eyisi ri efikokoru ‘dini ku. Dra ama alualu ni. Dra mi si!
Ika te ovu ‘baru angu ma dria a’dule, Eri ta dra mi si ra. Eri
ta muu ocoko woro Eri ni taa misi ri alea si. Mungu le mi tu.
Le mi letaa ‘dani’dani risi (Ine Jeremia 31:3).
O’du alu mani mutukari nzuria, Mungu ‘yo mani “Joyce, mi
‘ba mani lele ndeni ri.” Ari’bo emu coti kini, “Onyirutu, ‘dari
ovuni afu ni ku ya? Mini ega risi mi a’di i ya?” Ani ma ega
e’yo, O, le ma ma ega e’yo ‘dale ku.
Egazu kini ama ‘ba agbari ru, azini kini ama feta, talenta azini
okpo osutaa ru ‘diyi beri ni muu orata amadri ‘ba ada niri ni
onzi. Te e’yo ada ri kini ama alualu ri ‘ba aluru, Ata o’ba eri
ndu. Mungu le afa ndundu ‘diyi, ani le ama amaa afa azini
onzi ama be ri ku aka ovu ‘ba azi amani nile ra ‘dile ku ria.
Mani e’yo egazu afa Mungu ni ‘yole ma asia ri madria, Ane
Ilu Eyini Ale Eyi Ra
2
zamva pasopi dukani pati aka ‘apple’ ru ‘diyi odrozu amboru
ri alea ni. Ne angu eyi alea si vini mu alu erima mile ni e’dapi
ala ndeni ri e’duzu. Ava e’yo Mungu ni ecele mani kini ma
‘ba Erini lele tu ndeni ri ma efi. Ma ‘ba agbariru ni. ‘Da e’da
ni kililiru ku, te ine, Mungu ni ama alualu ni ‘dale. Ovuni
kini Eri ‘yo mi ‘ba azi kililiru ni, ani ‘ba azi ‘diyi ovuni kililiru
ku ‘dini ku. Eri ‘yo kini ama woro ‘ba agbariru ni. ‘Diri E’yo
ma alea, vini E’yo ‘diri ama alualu ni woro. Mi ‘ba Mungu ni
lele tu ri i.
Sawa ‘dasi, abi E’yo Mungu ni le lu maniri ku a’dusikuniri
ma etumuru ‘ba e’yo lizu drinia onzi ‘bo riru egata ala ru
‘diyi egazu ma dria risi. Ogogo o’du eri ma vutia azi ma vile
Bibilia Ongo 17:8 ni, vini ‘dale eri angu ne ma andratia: “emba
mata ekile ‘ba lele tu ndeni ri ru; mi ozi ma endrilendri mima
opi yi dri ria” (NKJV). A kini, “Wawu, adaru ‘dari Mungu
i. ma ‘ba Mungu ni lele tu ndeni ri i.” Fe mani ru amazu ‘ba
agbari riru sawa alualu mani e’yo egazu drinia ria. Ini ndra
Mungu le mima amaru ‘ba agbari riru, orodri ru, ajeru, azini
lele tu riru ri raya?
‘Ba eyima asia ‘ba ma le eyi lele ri ci. Mungu o’ba ama ‘dale
Mungu Le Mi Ra!
3
Ilu Eyini Ale Eyi Ra
‘Ba karakara ai kini Mungu le wudrikuru vini le Yesu ni ra, te
eri sawa ewaru ni eyi aizu Mungu le eyi eyima ngulupi ra. Te
E’yo ni emba kini Mungu le ama angiri erini Yesu ni lele rile:
“Ata le Mva ni tu vini ece Erini afa woro Erini ‘yele ri ra. Azini
Eri nga ece Erini (lezu Erini nezu) afa angiri vini ‘diyi drilea ri,
ani mi nga osu vini gaa talisi azini osutaa si” (YOANA 5:20).
Mungu kini ‘dia, “Ma afa woro angiri ‘diyi ede Yesu vusi, vini
afa angiri ‘dini ndeni ‘diyi Yesu vusi, ani mi osu beni” (‘ba
buku ‘diyi ma amvita). Mungu le ama osu e’yo angiri ‘diyi si
afa amani lele azini ayiko fepi ‘diyi edeta si.
Ama buku ala ‘diyi laa, te ama sawa worosi afa Mungu ni le
ede amani ‘diyi avi lu i ku, te tunisi geriko amavu siri si. Le
ama ma ne azi angiri Erini edele geriko Yesu driri si ‘diyi azini
ama ai kini le vini afa angiri ndeni ‘diyi edele geriko amavu
risi: “Agu sawa worosi ma aipi ra ri, nga muu afa mani edele
‘diyi edee; vini eri nga afa ‘diyi ndepi ra ‘diyi edee ra a’dusiku
ma muu ma Atii vu ” (YOANA 14:12). Mungu ni afa karakara
4
‘diyi edee ‘ba eyini o’duvu o’duvu a’dusiku le eyi ra, te econi
nezu alua ni ku. O’du alualusi etu ka efuu, eri efuu mini azini
mani. Fuu wura ndundu ‘diyi e’da ndriza amani ayiko fezu.
Angu Mungu ni o’bale amani ‘diri onyiru tu. Eri pari amani
oazu vini ayiko zuzu ri i. e’dotaa l kini Mungu fee ‘baa ni pari
vini ‘yo erini lonyi nyaku dri ‘diyi woro ayuzu azi Mungu
azini ‘baa driri ni.
Ozoo ka emuu ayi eridri risi, eri ‘di mini. Sii ka emuu, eri
emuu mini. Aci mi vele ‘diyi opini eyi fee ni, vini eri mi one
asi kokoru.
Ayo Amviza 7:9 kini, “Le emi ma nii, egaa, azini vaa ra kini
Opi Mungu eminiri, Eri Mungu ni, Mungu aita be, ecara iniri
tambapi ra azini letaa vini aza iniri e’dapi ‘ba Eri lepi vini
Ayo Eri vele tambapi ‘diyi ni a’bianzi a’bianzi elifu elifu vu
ri i.” ndepi ra vini ezata yi pie, tea ma eco ni ‘dari edezu ku.
Mungu Le Mi Ra!
5
Vini emi eco ni Mungu ni atrizu emi lezu ku. Letaa ovuni afa
azi Mungu ni edele ri i ku; eri erima ngulupi i.
Ika egaa mi ‘ba alu ebi ovupi onzi tuu Mungu ni ecozu eri
lezu ri i, mi enzoru tuu. ‘Bile azi ali tuu Mungu ni cazu alenia
vaa vini mi e’duzu amve ku ni yo. Erima otitaa mi okunazu
ri ci. Ku mi ma ezataa yi lu mini Eri zizu asi adasi i risi ku, te
Eri eyi avi vini ofu ree ekile pari etuni efuzu ri ni ovuzu etuni
‘dezu ri be rile. (Ongo 103:10-14 AMP).
Mi eco ‘yozu, “Ma esu Yesu ni asi maniri ma alea, vini ale Eri
ra.” Tedi azi mi i, mi ai Mungu le mi ra ri ngopi ya?
Letaa Mungu ni ‘dani ‘dani, afa azi kokoru ri eri o’duko ewa
kokoru ni, te eri vini e’yo e’dozuri Eri ni ‘baa mi edria mini
afa woro azi ‘diyi vazu ri i. Ma air a eri e’dotaa atitaa woro
niri ama edria ri.
E’yo azini yo afa azi mini onii vini geriko mini onitaa esuzu
Ilu Eyini Ale Eyi Ra
6
azini inda afa Mungu vele ‘diyi, ika e’yo ada kini le mi aje
kokoru vini asi alusi ri ai ku, enga ni zoo aci mini eri be ria
ku. Ama eesu Mungu vu aita si, te vini aita ni azi nga letaa
si (‘Ba Galatia ‘diyi niri 5:6). Ani pelu ama Mungu ma letaa
esuu ra ka ama eco ni afa azini esuzu ku.
Letaa Mungu veleri fee ama oazu ori kokoru (Yohana Aluzu
ri 4:18), eri okporu edri ayiko esuzu vini asisile amadri ri
esuzu. Mi nga Eri ma letaa mini ri esu ra ya? Ovuni oziza ru
ku; mi eco eri jezu azi mini muke ‘diyi si ku . . . afa mini eco
edele ri ru esuzu, esuzu, azini esuzu.
Mungu Le Mi Ra!
7
“Aletaa ‘dale ri fee ni owoko kaniku ole ni ‘ba kaniku fee ni
drinza amani ku, Mungu ma letaa ‘ba edaa ama asia geriko
Orindi Ala ‘bani fele amani risi. Amani nga ovuzu okpo ako
alea ria [okpo kokoru ama aza kozu ceniceni], sawa ‘yeke ria
Kristo dra ra (pari ‘ba) mungu kokoru dria. Sawa ‘disi eri afa
neleku ni ‘ba azini ima edri fezu katetro ovu ‘ba kililiru ni ra
ti, te eco ovu enzizaru azini ndrizaru azini ‘ba afa fepiri vini
‘ba azi eco aizu drazu ra. Tedi Mungu e’da azini ece Eri [ma]
letaa tetro amani ovuzu eza’ba ni ra ti, Kristo (Kristo, trile
odu siri) dra ama si.
2Aca Kililiru ra ya?
9
›š
Ani, ekile juru’do ‘ba ni ama ta mbazu ‘bo rile (‘bazu
ezataa kokoru, ‘bazu muke, azini ejizu agi kililiru Mungu
be) Kristo ma ari si, Eri nga ama pa owoko Mungu dri
ria ngopi. Ama ni ovuzu ari’bo ru ria Mungu `ni agi ‘ba
dika geriko ari Eri ma mva dri si, eri angiri agaa [adaru],
juru’do ama ni agi ‘bazu dika risi, ama nga ru pa ra
(epazu okpo ezataa niria o’du alualusi) Eri ma [egataa
dra ma alea).”
—‘BA ROMAA ‘DIYI NIRI 5:5-10
Ama karakara ai kini Mungu le ama ra aka e’yo
Aca Kililiru ra ya?
onzi ede ku ria. ‘Ba karakara le ki eyima ngulupi tuu ku, ani
eyi e’yo li kini Mungu econi vini eyi lezu ku endi. Te Bibilia
‘yo “Ba ada tokoa mini asi drozu drinia ri a’du afa ni ya?”
(Ongo 8:4). Ama lu afa Mungu ni o’bale ‘diyi, azini le ama
ra a’dusiku le ama ra. Eri letaa ni (Ine Yohana Aluzu ri 4:16).
10
Mungu le ama a’dusiku le ni!
Le mi ra, mi mi ‘ba opele ra ri. efi niri mi misi vini ndu. ‘Ba
le mi ovu ma le ku, vini le ma ovu mi le ku. Vini mi nga ovu
onyuzaru ika mi edri ayu ru o’bizu ‘ba azi ‘diyi be azini abala
‘bazu eyi be ria. Afa woro eri ni edele ri ari’bo ni drileba fezu
kini mi ovuni nga muke tuu ku. E’yo ada ri, eri Mungu be, le
ni kini mi “ovu muke tuu.” Yesu ebi ovu “muke tuu” mi ma
paria. Ofee mi ezataa eyi vini ‘du dririma ta sipi mini ri ra.
Bibilia kini ka mi le drazu misi ra, eri angiri ngopi, ari ni di
mi ta mbazu ‘bo ria, Eri nga mi le ngopi ya(‘Ba Romaa ‘diyi
5:8-9)? Adanisi le mi caa ecozu mi ezataa o’du alualu dri ‘diyi
‘duzu azini mi ta mbazu ojizaru onzi woro alea.
‘Dia ecetaa azini ma ni egaa geri Mungu ama ezataa azini
okpo ako yi nezu ri i. mi egaa zamva were ogogo eli be na
kaniku su, sawa worosi ima andrii ni nee azi akua ‘diyi ‘ye ria.
Le andrinituuani ‘duubaketi were yiiniri azini bongo were
Ilu Eyini Ale Eyi Ra
11
vini muu e’daa dirisa dri pari fizu ri andratia. Ini dirisa adaru
kilili, vini ‘du karatasi afa inizu ri ru vini ini dirisa ndee ri.
Adaru, dirisa ma dria alama nduni azini karatasi inizu ri fura
yi sabuni kafuto be, vini zamva ‘di ayu andri ma bongo ala
ndeni afa inizu ri i. Nga efi ‘yozu erima o’duko were risi kini,
“Mama, Mama, ma oji mi vele dirisa ra. Ma ede azi onyiru ni
mini ra. Mama, ale mi ra.”
Ayia letaru ri kini, “O, afa mini ede ‘dari onyiru. Awa’difo
azakoma si.” Vutinia, indikindi mva ‘di ni afa azi ‘yezu pari
azinia ria, ede onzoroko ‘diri te. Vutinia, nga eri ma zii ni asi
mbaza fee azakoma zizu vini eri edezu geriko kilili risi.
‘Diri afa Mungu ni ede amani ri i. Eri afa woro ‘ye amani kili-
liru aka eri le ra ria vini eri ama omve Erima azi si (‘Ba Romaa
‘diyi niri 8:28). Ika ‘ye ala ndeni ini geriko ‘yezu ri ra, ‘dari
afa woro Mungu ni le mivu ri i. Eco ra azini eri nga mi aza
ko zozu ra ika muu drile Eri zizu ria. Eri nga oja Erima wura
si engazu kutaa alea cazu kutaa. (Waraga Irizu ‘ba Korintoa
‘diyi niri 3:18). Eri Mungu ni ti epe ri e’yo Mungu niri nze
Aca Kililiru ra ya?
12
“[eri o’duko Mungu vele ri olu], Mungu fee Erini Orindi
wereru no o’bizaru ku te fetaa asi kokoru ri Orindi Mungu
niri! Ata le Mva ni vini fee (alee erisi, owi) afa woro eri ma
dria” (Yohana 3:34-35).
O’du alu mani nyiri ‘di lazu ria, ma owu ayikosi mani egazu
Mungu fee ni Erima Orindi o’biza kokoru risi. Fee amani lu
‘di ma esele were azini ‘da ma esele were ru ‘dini ku. Eri afa
fee azini ede fudri ci agaa mini eco zi, oraa no egaa ri ra (‘Ba
Efezoa ‘diyi niri 3:20).
Ayo Amviza 7:6-7 alea, Mungu kini, “Mi i ria, mi ezata koko-
ru azini ‘ba kalaa ‘ba eyi Mungu mi vele Opi dri; Mungu mi
vele Opi opee emi ovuzu ‘ba agbari ‘diyi ru Erini ‘ba angu
dria ‘diyi ma eselea. Opi ‘ba ni Erima letaa mima dria azini
opee mi emini ovuzu
Ilu Eyini Ale Eyi Ra
13
Kalafesi angiri agaa ‘ba azi ‘diyi ra risi ku, emi kalafe were
‘ba woro eselea.” ‘Da ria fa azi ovuzu ani ayikosi ni. Mungu
kini, “A ‘ba Ma letaa mi dria, azini mi alaru. Ayo mini mi ‘ba
opele ra ni. Ma ope mi, mi ovuzu muke azini ndeni risi ku, te
a’dusiku niri ale mi ra.” Ini afa Mungu ni le mima ‘yee andru
risi ri ray a? le mi ma ai letaa Eri vele ri. Mi asi afa onzi woro
midria ri oluzu Mungu niri si; a’dusikuniri mi ovuni Mungu
osutaa ru ku. Nii afa woro mi dria ri ra vini ezataa alualu
mini ede Erini emuzu agi ‘bazu mi be ri pie
.
E’yo ewaru ndepi woro ria ma pari ni eyi lezu ku ri i. Ama ai
ni Mungu le ama ra, no ‘ba azi le ama ra ri ku. Ama ora, Eco
ki ngoniru ya? Ma onzokoru ‘dile! Ika ai mi ‘ba onzi ni, mi
nga e’yo ‘ye onziru. Mi eco ni zozu wura mini ‘ba misi mima
asia ri ma drilea ku.
E’yo ewaru ma driri, ale ni oku ma ngulupi ku, azini ma vele
sawa pari ‘diyi ayu ma ngulupi ojazu Afa mani orale ri ru.
Aca Kililiru ra ya?
14
Ma ora ma e’yo nze tuu, ani ma o’bi ovuu ndi. Te mani ovuzu
ndi ria, ma eca onyuzaru azini ayiko kokoru, vini ‘ba woro le
nii ma ovu ndi a’du si ya ri. ‘Daa ma egaa kini, e’yo mani ma
ti amboru. Iku ma a’dule! Ale o’bi ovuu ndi.
Ma eco mini eli mani ‘du e’yo mani ebi ece mini mani muzu
alenia si ‘dinile ‘diyi ma kalafe eyi luzu ku, vini ma tini nga
kiri ma ji e’yo onzi alea si. ‘Ba karakara e’yo nzepi tuu ‘diyi
‘du wa’di ovupi ndi azini oapi a’duleru ‘diyi. ‘Da ri lu vini
mi e’yo nze angiri ngopi ya ri e’da agaa, azini sitani ni mi
egaa ani asi kokoru. Eri azi nga okpo si mini ru amazu ‘ba
onziru vini e’yo lizu mi dria onzi.
Mungu le mi ovu driwala e’yo lizu onzi alea risi, te ile aitaa
pi asi mbaza pie ovuzu driwala be. Ini omgbo mini ru amazu
ezataa be ri eco afa azi alu mini edele kaniku mini edele
onziri ri ofee ra ri ra ya? Aizu kini Mungu le mi ra esude mi
ede afa azi onzi ni ra ri eco ovu ewaru.
Sitani ni mi enza egataa mini ‘diyi ma onzi ngoni ya ri drisi.
Ilu Eyini Ale Eyi Ra
15
“Sawa ‘disi mi ede eri ‘bo,” eri ‘yo. “mini egale risi mi a’di
i ya? Mungu ngani mu tusu cozu mi dria ku, le mi ma ede
muke agaa. Mi eco ovu ‘ba azi ma ndremazi ru ku curu’do.
Nga ni mi ezitaa yi ma ti omvizu ku. Mi eco afa azi kilili ni
edezu ku.”
‘Da ri sawa mini asi mbaza esuzu pa sozu azini ‘yozu, “Ata,
ma ede onzi, vini ma ai mivu trutaa ri i.” I nze e’yo vile sitani
ni. Mi egaa eri kini Yesu ofe mima ezataa yi ‘bo azini ‘ba tru
mi ra vini ‘ba li e’yo onzi midria ku. Curu’do, imu drile vini
izu ayiko. Mi alee Mungu si vini mi drilebaru ‘ba azi ‘diyi ni.
Te azinisi mi ora, ma e’yo alu azaza ‘diyi ‘ye dika dika azini
dika. Ma vini oku e’yo ora ‘dale endi, kpere mani egataa
‘duzu e’yo liza onzi ma dria ri atrizu. Ika amataa e’yo onzi
lizu mi dria e’yo onzi mini edele risi ria tri ‘bo, eri nga mi aza
ko mini eri atrizu ra.
E’yo onzi azini e’yo onzi liza ni mi ‘baa vaa azini ayiko
kokoru kpere mini ecazu aruru. Eri okpo ako fee mini azini
eri fee ‘dezu ezataa alea ri eca ewakokoru. Eri ‘ba asi mbaza
ri ‘du Mungu ma fetaa trutaa niri esuzu azini e’yo Lizu onzi
Aca Kililiru ra ya?
16
ku. Le mi ma nga azi aita si vini mi ma gaa e’yo onzi si..
Ariboo ninga ‘yo, “mini ‘yo risi emuni nga mi ama onzi e’yo
‘da si ku? A’di ma e’yo si ya, le mima amaru onzi sawa werea
si ra. E’yo mini ‘ye ‘dari afa azi onzini.” Afa woro mini ‘yo ri,
“Yo, agasi. Anga ni mu ru amazu onzi aluaniku.” Sawa oko
mini afa ‘di ‘yezu ri eco adri mini ewaru, te eri nga mu eca
ewakokoru ra.
Izaia 53 ma alea, alaa kini yesu ni ndra onzi ama dri ri ‘duzo
‘boria, a’i vini e’yo onzi ra (‘da ma alea e’yo onzi liza endi).
Sitani leni mima a’aa ayuzaru e’yo onzi liza kokoru ku. A’di
e’yo si ya? A’dusiku nisi eka ovu e’yo onzi liza be, mi eco ni
letaa Mungu ni ada ri ma aji esu ku. E’yo onzi liza ni mi awa
Mungu be azini mi eco ni Eri ci ri ma aji esuku. Eri mima ava
Mungu ni ri nze ra azini eri ‘baa mi dria.
Mi acii ayuzaru e’yo onzi liza si azini mi ai kini Mungu ka
‘yo ima aza ca mi akuzu vini mima ezataa si ra, ai eri adaru.
Le mi ra, azini Eri ma aza azini trutaa eyi fetaa mini ri i. Mi
ai eyi adrusi!
Ilu Eyini Ale Eyi Ra
17
“Azini ani ra (va ra, ega ra, amaa, netaa si azini e’yo ‘yele
‘bo risi) azini ai ra (mi obi erima vuti azini i’ba aitaa
alenia vini mi atiru drinia) letaa Mungu ni ‘bale amaniri
i. Mungu ni letaa ni, vini agu ovuupi muupi drile letaa be
ri ni oaa vini muu drile Mungu ma alea, Mungu ni vini
oaa eri ma alea .”
—Waraga aluzu YOANA ni sii ni ri 4:16
3Letaa Eri Agii Ni
Mi eco e’yo nii drilea Mungu ma letaa dria ngoniru ya? Ka
tro mi lee ngopi ra ti, eka eri ma letaa dria e’yo nii ku, eri nga
19
›š
ovu mini orodri kokoru. Mi ega nga e’yo mi ru ama ngoniru
ya ri ma dria ‘ba azi ni ka i ma letaa ambooru ni e’da mini ria.
Eka nii ra kini ‘ba le mi ra, eri mini asi mbaza fee. Mungu le
mi ra, vini le mini letaa nde ri e’da. Eri ama alu alu ai fizo ali,
truruzu enyia ogogo ani ovuzu erima agii ru. Le ama ma ai I
afa woro amani edele ri ma alea indi. Le mu o’yo Eribe ekile
agii muke ‘di pini ‘yele ri le.
Mi agii adaru Mungu be ni ci ya? Lu mini mi ‘bazo Kristiani
ru ri efini adrini mi ayiko angiri ru ecizu Mungu be ri ma
alea ‘dini ku.
Ma andra Kristiani ni eli karakara de nga esu acitaa asi driasi
ri Mungu be ku ru. A mu kanisaa sabatu si vini ma ede azii
azi ofetaa kokoru ni werea ni ‘dale ra, te Mungu ovuu ni
mama edri ma agandu alea ku. Ma ru amaa afa azi kokoru
vini aga ni tre ku. Sawa ‘disi, Eri afa ma ni e’yo egazu drinia
o’bitisi kayio vini asizu enisi ri i. Ama ru emu tuwalu etu
zuu. Afa azi mani le ma vele Mungu ni agapi te azii ngazu
vini ayiko fezu ni yo. ‘Bile azi Mungu ni ‘baa ma alea ni ci-
angu mgbooru Mungu ni lu eco ofii niri i. Afa azi mi ni ecozu
nzuzu vuti nisi noku mini lele ma ofii pari ‘da ni yo.
Ilu Eyini Ale Eyi Ra
20
Mi ma asisile agii emini Mungu be ri ngoni ya? Mi ngonde
Eri vini afa Erini le ‘diyi ‘bazo oko afa azi ‘diyi ma drilea ya?
Mi eco ‘yo ekile Paulo ni ‘ye rile ra ya: “Erima alea ama o’aa
vini acii vini ama ma oataa be. (‘Yetaa ojio niri 17:28)?
Mungu lemi ra vini ‘du mi ‘ba opele ra ri ru. O’ba mi oazu Eri
be. ‘Diri afa amboo ndeni Erini lele vini afa kilili Erini le edri
midri ri ni ri i. Eri oyokolo luu mi asia odu alu alu e’dopi risi,
“? Mi efu ngonia, ale mi ra.” Eka e’bi ‘dari eri Erini luria mini
ku, mi nga e’do eri vini ai ra ya?
Ma agii azi etumu lu kini Ata ni aciria aku ‘ba Amerika dri
‘diyi eselea si eyini engazu o’biti si ria. Mu de alea woro
ngonde ru emuzu vini e’yo nzezu eyini. E’du Erima ngulupi
ni kome mesa ma tia vini ri vaa. Aguu ngaki oruu, emuki vini
goki vule; emuki, vini goki vile. Muki drilea ‘yozu Mungu ni,
“Ndoo nga. Mi oa nga ‘daa lu werea ru, Mungu. Aka lu ‘di
de ‘bo, ma mu e’yo nze mi be ra. Ma nga mu oa mi be ndoo,
Mungu. Ndoo, Mungu. Ndoo, Mungu.”O’du ‘da ma asiza
Letaa Eri Agi ni
21
eca ra. Mungu ku aku ‘da e’dataa candi ru ni be a’dusiku niri
‘ba azi emupi e’yo nzepi Eri be o’du ‘dasi ni yo. Ba dria baru
ima azi okporu ‘diyi ngazu ani eyima sawa Mungu ni yo.
Mima ‘baa azi tuu Mungu ni ku. Eka sawa esu ezizu vini tezu
Eribe ku, efinisi azii midria tuu. E’du sawa luzu Munguni ile
Eri ngopi ya ri. Afa dria cici ‘diyi ka agaa ‘bo, afa azi ci ngapi
mupi acepi ni yo te Mungu i. Eri ‘dale! Vini eka adri agini
Eribe ku, eri nga mu ovuu were vuvule ru alu ni e’dozu. Ma
ati e’bi ngalu dra o’diru, ma vini ayikosi luzo kini ai Yesu ni
Etopi ru ogogo eli naa esu denga dra ku ru. Tetro ma ati ni
muzo Mungu vu ra ti, te ni edri oazu ayiko ndetaa Mungu ni
risi ri esu ku. E’bi lu oa ima ngulupi ni. Mi ma caa kpere edri
mivu rini asizu vini gazu orataa si tre ria ra kaka ku a’dusiku
mini eri ezazu woro afa efile kokoru risi. Sawa eri fetaa
orodriru engapi Mungu vu ri i, ani le mama ovu milesi afa
amani amadri ri ayuzu risi. Enenga, aka eri ayu ‘bo, angani
eri esuzu vule dika ku. Sawa Mungu beri orodri osutaru ni
eji, te afa karakara ‘diyi ayiko fee aje oru risi.
Ilu Eyini Ale Eyi Ra
22
Ma ai mi eli azi ‘bazu kalaa azini iku lu Mungu ma le mi i. Eri
ma letaa ni mi ngulupi woro ri ni, asianzu, ayiko azini okpo
edri niri eji. Mima oa eyere azini mi ede e’yo Erima mva le.
Mi oni e’yo Eri a’di i yari ma dria vini inii Eri dika dika.
Buku Yohana okori 4:16 kini, “Azini ani ra (avaa, ega,
amaa ra, e’yo onezasi azini e’yo nde ‘yezu sawa ezuu risi)
azini aizu risi (vuti ni bizu azini aitaa ‘bazu vini pa sozu
drinia) letaa Mungu niri amani orodriru”
Mi ecoru amaa ‘ba ‘bani lele ku riru o’bitisi drio drio. Kani mi
okpo yo, azini inii ra o’du ‘diyi woro nga ovu mini onunua
be. Mi eco e’yo ‘diyi oja mini e’yo okpo fepi ‘diyi nzezu risi
azini aitaa si. I ‘yo o’duko orusi, “Mungu le ma tuu. Ma
Erima mile efi ni, azini erima otitaa mani alaru ni ci.” Ika e’yo
nze Mungu ma dria azini e’yo Erini ri ma dria aga mini e’yo
nzezu mima ocoko azini mi ru amaa ngonia risi, mi eco o’du
mi dri ‘diyi woro ojazu te. Malaika eyi e’yo Mungu ni eri i,
ovuni e’yo amani onuzu ‘diyi ku.
Mi nze eyo mi ngulupi si azini mi ma nira kini letaa
Letaa Eri Agi ni
23
‘ba ce mi agai letaa Mungu ni risi. Bibilia kini Mungu si
mima e’da Erima dri agelea ‘bo (Buku Isaya 49:16)
Ma eco lu Eri ne oru ‘dale ‘yozu, ine, ine ‘da i? O, eyi onyiru
ku ya? Ale lu eyi tuu. Ine nga lu anzi mani ‘diyi, ma dri
agalea eyi ‘da. Eri mi be ci mi egazu ‘dani ‘da kini I le mi ra
azini Eri ovu eli si oazu mi be.
Mi ega e’yo awadifo fezu Mungu ni azini mi ma ezo mi
oataa ru emuzu Eri be ri. Sawa azini si mi le e’yo mini ‘diyi
ku ja azini kumuti sizu were, Mungu ni awa’difo fezu Erini
vini ‘yozu geri Erini ovuzu alataru risi. Mio vu eyere azini ile
Mungu i. Buku Yohana 4:16-17 okori kini, “Mungu ni letaa
ni azini ‘ba oapi vini muupi drilea letaa azini Mungu siri,
vini Mungu ni oa azini muu drilea eyi ma alea. ‘Di ma alea
(ti ecitaa azini emutaa Eri be ri) letaa e’da woro azini kililiru
ama be ra, ani ama eco ovuzu asi ‘baza be o’du e’yo lizu risi”
Mi ni nizu ra Mungu le ra ri fe mi asi ‘ba Erima dria azini
alee Erima aitaa si. Tusu coza woro ni emu ra fezu Mungu
Ilu Eyini Ale Eyi Ra
24
ni mi lezu: aitaa angiri agapi, ezataa ndezu, asianzu mi ma
asia, atitaa, idri mali Erima feta, azini ayiko yi be. Eri emu
mini fezu Mungu ma le mi risi. Sawa azini si ama e’yo ‘di
oja azini ega, muke, le mama le Mungu ni. Ma ai oko risi le
mima fe Mungu ma le mi i. Ma aini mi eco mi ma letaa ece
Mungu niri ku kpere mini fezu ma le mi i. Bibilia kini, ale Eri
a’dusiku le ama oko ( Buku Yohana okori 4:19)
Ma eco ‘yo mi eci mi Mungu be, te mi nga e’yo nde ‘ye
ngoniru ya? Sawa Mungu ni ‘yozu mama eci ru Eri be risi, ari
ogua ma vele ri ma dria azini akini, “Mungu di a’duni?” ‘Da
di muke! Ani ni oku ru ecizu Mungu be ku a’dusiku, sawa
‘da alea, ani ni le ma ngopi ya ri ku, azini ava ni oku le mama
te ima agii azini agii asi kokoru ri ku.
I’du pa amve azini mi e’do. Ife Mungu ni drileba, azini Eri
nga mi imba geriko ru emuzu Eri be risi. Ma econi mini
geriko azi ru emuzu Mungu be ri fezu ku. Ale ni mima adri
e’yo alu, eri, vini naa be ‘dini ku. Ale Orindi Alatararu ri ma
ce mima dri ni. Mungu le mi ma oa apizaru i be…a’dusikuni,
Bibilia kini, Eri mima akuni
Letaa Eri Agi ni
25
Ilu Eyini Ale Eyi Ra
“Aka ovu Yesu ma alea, agale edeza kani edezu kuri ‘ye ni
afa azi alua ni ku, te lu aitaa engale vini okpo fezu ra azini
ecezu ra vini azii ngapi letaasi siri i.”
—BUKU ‘BA GALATIA ‘DIYI 5:6
4Letaa, Alee, azini Aitaa
Ama abari eyi sawa ayu lezu aitaa esuzu. Ani ra kini aitaa
kokoru eri ewaru amani Mungu ni ayiko fezu (ine Buku
Ebrei11:6), ama di azi nga vini aitaa esuzu dika. Te aitaa asi
ma alea, azini mi eri esu mini oazu letaa ru ecizu Mungu
27
›š
be risi azini e’yo Erini ri erizu risi. Eri emu e’yo eceza Mungu
vu risi. Ma econi mini aitaa emba ku, te ma eco azitaa aitaa
niri embara azini fezu abiri aitaa niri ni mi ndezu tuu ani mi
nga e’yo ciri ‘ye eri esuzu beni. Aitaa eri dri fupi amve azini
esu Mungu vu ri.
Iku e’yo mini okpo tuu lezu aitaa esuzu azini Mungu ni
ayiko fezuri ja, azini mi e’do sawa woro azini okpo ‘diyi ayu
mungu be, Eri lezu azini letaa esuzu.
“Amani aci aitaa niri aci ria [ama edri ama ni ri tamba azini
ngulupi oce e’yo amani amani ayiko fepi kaniku aitaa enzitaa
fepi oataa ‘ba adani Mungu be risi azini afa ‘bua ‘diyi, alee
si azini asindriza alatararu risi, ani ama aci] ovuni netaa si
kaniku e’dataa si ku” (Buku Irizu ‘Ba Koronitoa ‘diyi niri 5:7).
Sawa ma ni E’yo Ala ‘di lazu okorisi, ma etumu Mungu ni
e’yo edriru ‘diyi nze ma asia. Ma aci aitaa niri o’bi acizu. Afa
alu alu ma edria ‘diyi, ale aci aitaa si. Azini geriko ‘di kini ma
nga lu eco muu aitaa ma alea afa mani ai oataa amani Mungu
be ri ma dria risi. Iku azini mi ega nga e’yo ‘da madria. Izi
mi ceni mi ru etumu oataa mi vele Mungu be ri dria ngoni
ya risi. ‘Ba aipi i ovu ni kililiru Mungu ma milea kuri econi
Ilu Eyini Ale Eyi Ra
28
aci aitaa alea ku. Owitaa Yesu Kristo ma drataa si ri ‘ba ama
kililiru Mungu be (Waraga Irizu sile ‘ba Koronitoa ‘diyi
niri 5:21). Ama kililiru e’yo amani ede kaniku amani muu
ede ‘diyi si ku; eri e’yo Yesu ni edele risi. ‘Ba aipi i ‘ba okpo
kokoru e’depi te azini Mungu ni le kuri econi aci aitaa alea
ku.
Waraga sile ‘ba Galatia ‘diyi niri 5:6 ‘diyi niri kini, aitaa ni
azi nga letaa si. ‘Ba karakara ega kini E’yo Ala ‘di ma efi kini
eyi ka eco ‘bazi ‘diyi le ra eyima aitaa ni azinga eyini ra azini
eco afa eyini le Mungu vu ri esu ra. Tetro Mungu ni lezu ama
ma aci letaa ma alea ra ti, eri ewaru pe lu ama ru ku Mungu
ni ama lezu raka. Eri ewa kokoru: ama econi afa amavu
yori fezu ku. Ma o’bi eli kakawu alea aci letaa si ‘ba eyi pie
a’dusiku niri eri Mungu ma ayotaa ni, te ma a’de palevusi
kpere mani letaa Mungu ni fele mani afa azi kokoru ri esuzu.
Aka ma etumu cika, ma eco fuzu amve letaa ada ri fezu ‘ba
azi ‘diyi ni dika dika. I ka te Mungu le mi ngopi yari nii ra,
Letaa, Alezu, azini Aitaa
29
mi econi ta ocoko esuzu tuu afa mini lele ‘diyi esuzu risi ku.
Afa fepi ‘ba yini afa esuzu kuri ai ki tua Mungu le eyi ra ri ku
azini le afa eyini lele ‘diyi fe ra azini tusu co eyima dria ri ku.
Mi eco nze,”Ale ta ‘da ai ra te ngoniru ya? Mi letaa Mungu ni
be mi ma alea, azini le lu mi e’do eri vaa Mungu ka e’da mini
‘bo ria. Bibilia kini “Ale eri a’dusiku ni eri ni ama le oko risi
(Yohana okori 4:19). Eri ta ovu mbazaru mi ni Mungu ni lezu
ika te nii le mi oko ri ku ria.
Eri di woro vaa mi alea, mi ma asia. Eri alea daa! Mungu le
mi ra! Mi osutaru! Mi onyiru! Mi ndrizaru! Mi feta be! Mi
orodriru! Mi taliru! Mungu le mi ra! ‘Ba azi nyaku ‘di madria
eco pi mi le Mungu ni mi leri leni alua ni yo. I ka e’yo dro
letaa Mungu vu ‘dima dria dika dika, mi nga aitaa mini ri
ofuu ra azini mi nga edri Mungu ni le mini ri oa ra.
‘Ba azi ndu mini lele ni yo te Mungu i, te eri nga ‘ba azi ‘di
Ilu Eyini Ale Eyi Ra
30
‘baa mima edria. E’yo adari ‘ba azi ni katro ovu yo te emi
Mungu be, mi ta ovu alaru. Mungu ni nga ovu mi agi ala
ndeni ri i. Eri nga ovu agii ni mini alu ni ka ovu yo ria. Eri
nga ovu mi andri kaniku mi ati yo ri i. Eri mi afa woro mini
lele ‘diyi. Mi ede ezataa Mungu ni zizu afa yi edezu mini ku;
izi Eri ovuzu angiri edri mini ria. Izi Erini gazu mi alea woro
Erima ngulupi si (Waraga Paulo ni sii ‘ba Efesoa ‘diyi ni ria
3:16, 19)
Mungu le mi ra azini le afa mini lele ‘diyi fezu ra azini afa
mima asi ni lele ‘diyi. I ka asi mini ‘ba Eri madria ra, Eri
nga mini afa eyi fe geriko azini sawa Erini risi. Mungu ‘yo
Abrahamu ma tia i nga tusu co eri madria ra azini ‘ba azi
‘diyi nga drileba esu eri si. ‘Da afa Mungu ni le ‘ye mini ri i,te
le mi ai eri! Mi ma fe aitaa mini i azini mi ma ai ecara Mungu
ni sole ‘diyi, a’dusikuni eyi mini!!!
Aitaa eyi a’di ‘di azi rua ni ‘diyi be
Waraga sile ‘ba Efesoa ‘diyi niri 2:8 kini,”Eri lu asi ndriza aje
kokoru (Mungu ma asi ndriza Ta sipiku) ani erini mi etozu
ri.” I ni i ’yeni afazi aluani ku mi etozu ri ra ya?”.
Letaa, Alezu, azini Aitaa
31
Ama abari tunisi eza’baru ndeni ‘diyi sawa Yesu ni ama
pazurisi, azini eri ma fetaa pataa ovuni e’yo onyiru amani
‘ye risi ku kaniku ama okpo e’yo alaru ‘diyi edezu risi ku.
Eri andra e’yo alusi: Mungu le ama tuu ani fee mvi elipiliru
ri ani ‘ba eri aipi ra ‘diyi ma jani dri ku te ma esu edri dani
daniri. (ine Yohana 3:16)
Asi ndriza ‘ba eco eri omve mungu ma atitaa Erini ima okpo
ayuzu afa mini lele ‘diyi fezu. Trotro Mungu le, asi ndriza si,
fe mini aitaa capirisi mi pazu, vini Eri ma letaa si, fee mini
aitaa afa mini le ‘diyi aizu. Mi eco le ‘ba mini lele tuu ‘diyi
ma ai Kristo ni, te e’yo adaru ri mi econi ‘ba azi fe Mungu ni
lezu ku. Mi eco ezi vini Mungu ni zi ma nga azi, te mi econi
e’yo ‘diyi fezu ru edezu mi ngulupi si ku.
Azi rua ni ‘diyi eyi fe ama asi ni fuu mgbooru, a’dusiku niri
ale afa azi Mungu ni ‘yele niri ‘ye ama i. Ama azi nga azini
ama esu orodri muke ni alenia ku. Bibilia kini Mungu otu
ima ngulupi, gaa e’yo amani risi, azini nde amara kpere
amani ru mazu fuu Eri ma dri okporu ri ma alea (Waraga
Aluzu Petro ni 5:5).
Ilu Eyini Ale Eyi Ra
32
Aitaa erini su mi pazu ri ka caa ra mi epazo ezataa midri ri
ma alea woro ra, aitaa alu alu mi alea ‘diri afa cici mini lele
edri midri ri ma alea woro ri ma azako ni. Letaa Mungu niri
ka ovu edri midri ma alea ci, mi eco e’do asi ‘bazu erisi ra.
Mi eco e’do acii aitaa si vini angu neza si ku ra. Mi nga nii mi
asia kini Mungu ede ecara Erini sole rile.
Bibilia omvele ‘Amplified’ ria, aitaa eri “mini edri midri ‘ba
a’da niri atizu (Mungu) dria alee vini asi ‘baza woro Eri dri
okpo, ondua vini muke ma alea” (Kolosia 1:4). Mini fezu
Mungu ni mi lezu rile, mi nga ‘dale ri ‘ye ra. Mi agii Mungu
ma alea ri ka zoo ali agaa, aitaa midri ni nga zoo angiri agaa.
mi nga nee Munguni e’yo osutaaru ‘diyi ede mi alea si vini
mi vusi, vini mini endi, te eri woro e’do ecetaa Erima letaa
ni risi. Mungu le mi ra! Le mima ovu Erisi aitaa kokoru ku.
Letaa, Alezu, azini Aitaa
33
“Letaa ma alea ori yo [ori yo], te ‘ba mbapi ‘bo ri (woro,
kililiru) letaa ni ori oja jotile alea risi vini eri ori cici ‘diyi
ofuu woro! Ori ni egataa dririma niri ejii, vini agu ori beri
caa ni nga letaa mbapi ‘bori ma alea ku [zoo ni nga letaa
kililiri ma alea ku]
—YOHANA ALUZURI 4:18
5Driwala Ori Alea Ri
Ama eco cazu sawa asi ama ni muzo aitaa ‘be kilili ria, alezu
Mungu vini asi ‘bazu kini le ama ra. Coti rru, ariboo ni afa azi
ma ti epee ama be a’di ‘dizu. E’yo ru ‘yepi edri ama niri ma
35
›š
alea ‘diyi—e’yo onzi ‘yerupi amani ‘diyi—eco ama aitaa obi
ekile afa azi yo rile. ‘Ba azi esuki dri gaza angiri ku eyini atizu
kini Mungu le eyi ra kpere e’yo azi yi fee ekile Mungu ‘ye ni
eyi kule.
Aniari’boo ni ecaa ori vini e’yo onzi liza be mi awazu afa nga
pi mi aza kopi rari vu risite - Mungu ma letaa ni. “Muke, ‘diri
te a’duni?” Eri ‘yo. “Ma ega ndra Mungu le mi ra. Afa onzi
‘diyi ki ‘yeru mini a’du ma e’yo si ya? Mi ede afa azi onzi ni
ra. Mungu aza mini ‘bo.”
Eri ma ewa kokoru sawa o’bitaa vini drileonzi, sawa enapi
onzi vini openduru ria, mini alee avizu Mungu ma alea risi.
Mungu ‘yeni sawa driasi afa eyi geriko vini sawa ama ni ega
ma ‘yeru risi ku. Eri ma otutaa ama drilea ndeni. Le ama oja
angiri agaa Erini e’yo amani adrizu ri. Eri sawa worosi edri
suza niri ayu ama jizu kpere amani alezu Erisi adule. Sawa
‘diyi ma alea, ama eco ni vaa a’di e’yo ni ru ‘ye nia riku vini
ama eco e’dezu obetaa egazu kini Mungu leni ama ku ria lea
ra. Bibilia ‘yo kini le ama ma ai ki afa azini ama esele cozo
Driwala Ori Alea Ri
36
letaa Mungu ni ‘bani esu Kristo Yesu ma alea ri ku (Waraga
Paulo ni sii ‘ba Romaa ‘diyi niri; 8:35-39). Afa kilili ndeni
amani eco ‘ye aka e’yo ewaru ni esu ri oyuzu o’duko oru si
kini, “Mungu, ani ra ile ma ra, vini ma aira ‘di ni nga azi nga
mani ovuzu alatararu.”
Sawa azi si Mungu ni tee ama ayuzu kpere amani egazu kini
eri ‘di vuvuleru tuu. Mi eco Lazoro ni egazu ra ya? Eri ndra
azoru te Yesu te kpere erini drazu ra kaka denga esu muni
nga eri vini familia ma aza kozu ku ru. Marita lu Yesu ni kini
eri vuvuleru tuu, te nii afa Erini ‘ye ri ra. Econi azi nga sawa
amani ‘bale ri si ku, te ngani ovuu vuvuleru tuu ku. Eka e’yo
ewaru ni esu edri miniri ma alea, mi enga aitaa mi vele ri. Ife
ori azini abaza ma ogu letaa Mungu niri mivu si te ku.
Waraga Yohana ni sii aluzu 4:18 ria, eri nyiri azi taliru okpo
be angiri ni: “letaa kililiri ni ori droo amve” (NKJV). Adroo
asi vini adroo asi E’yo Ala ‘da ma dria, o’bizu eri nizu vini
o’du alu ava efini ra, letaa kililiri ni ori droo amve, vini
Mungu ni letaa kililiru ‘da i. Azini ika nii ra letaa ‘da kililiru
Ilu Eyini Ale Eyi Ra
37
mini ngoni ya ri, mi econi nga fee ori ni mi ocezu ni ku. Tetro
mini ori amazu ra ti, mi nga mu Mungu be drile a’dusikuni
ini ra kini eri sawa woro mi be.
Eri ewaru mini edetaa orizu eka nii ra kini Mungu le mi ra.
Mi ayuzaru afa ci ri o’bizu a’dusikuniri Mungu ma letaa vini
aitaa adrini mima ‘yetaa si ku. Mi eco ni e’dezu ku eka mi atii
Mungu ma rua ria. Geri mini muzu e’dezu ri lu ika mi atii
misi ceni ri. Afa eco ki ru ojaa ta mini ‘ye otile ri le ku, te eyi
nga ru oja kilili ika mi mile ‘baa Mungu ma dria ria. Ika nii ra
kini Mungu le mi ra, mi econi ori e’detaa, gataa, afa ako, e’yo
agaa pi ‘bo, ewu drilea kaniku afa azi nduni orii ku.
Mungu ma letaa eri amboo ecopi afa woro a’buzu ra ri i. Mini
egaa Mungu alu alu mi etopi vini ayupi ‘diri nga mu fee ru
amazu kile ‘ba e’depi ra ‘dile ya? Eri nga mi ku azakoma
kokoru ya? Sitani ni ar’ibo ama ma orindi ni ri i. eri oguo
vini enzo ‘bani, te Yesu le amama ovu vini esu edri ma ayiko.
(Yohana 10:10).
Bibilia ‘Amplified’ ru ri ma alea ama laa: “Ori letaa alea yo
Driwala Ori Alea Ri
38
[ori yo], te mba ra (woro, kililiru) letaa ni ori oja jotile alea risi
amve vini eri ori were were ‘diyi ofu te! Ori ni orataa dririma
driri eji, azini [ani] ‘ba ori be ri ca ni nga letaa mbapi ‘bo ri
dri ria ku [zoo ni nga letaa kililiru woro ria alea ku]” (Yohana
Aluzuri 4:18).
Mungu ni ma azakozu vazu kini Erima letaa ni ori droo
amve ‘bo ria, le mama ‘ba onitaa ‘diri ‘yetaa alea. Ama ebi ‘ye
ori mutakari dri risi. Ama ora afa odu erepi ri eza i te, azini
ama vu robia azini jezu yo. Ani amu drile mutukari nzuzu,
asi’baza be kini eco ni ru andizu ndundu ku.
Ma amaa Mungu emba ma asi o’biti azinisi e’yo ‘diyi si:
‘Joyce, lu i’du o’du ‘diri ma lezu, vini ifee Ma le mi i. Le mi
ede afa azi ndu ni ku. Le mi o’bi ovuzu oku aitaa be angiriru
ni ku. Afa le mi ede ri lu pa sozu Ma letaa alea.”
Ani, ma ongo ngo ria, ongo yi ede Mungu ni, vini ovu sawa
onyiru ni be. Vutinia rru, ma eri o’duko ma agupi veleri pari
mutukari tambazu ria, dakika kalisu dri tau erini muzu azi
Ilu Eyini Ale Eyi Ra
39
ngazu ‘bo ria! Nzi jotile vini kini “Ma esu drio mutukari ma
gia oko ri ni azi gazu ku. Ama ‘ye muu eri ‘du vini eri edezu.
” Ma opi jotile vini ma e’do guu. ‘Da ri a fa azi mani eco edele
oku ‘dinile ku ri i, vini ma ede eri egata ma dri risi ku. Efuu
lu ceni. A’dusiku afee Mungu ni ma lezu, ma eco guzu e’yo
ewaru ri ma agandua. Pa soza letaa Mungu dri ria ri jotile
nzi aitaa ni efuzu ori ma paria. Ma e’do lu guu, ‘dari aitaa ni.
Aguu a’dusiku ali vaa ma alea ani ra kini Mungu le ama ra,
vini eri nga afa fee amani ra.
Abraham guu aita si ra. Mungu ni emuzu eri dri vini luzu
erini eri nga mva esu, Abraham guu ra! Ni ra e’yo oku risi
geri azi ni yo erini azini Sara ni mva esuzu, te ai Mungu ni ra,
vini erima ayiko gaa tretre gutaa ru.
Ma aira aka azi nga ‘dale eri jotile nzi Mungu ni ama aza
kozu geriko osutaru ‘diyi si. A’di ni oku e’yo egaa guzu sawa
eyini ovuzu e’yo ewaru ri alea ni ya? Bibilia kini Mungu ni
ri ‘bua azini eri guu Erima ari’bo yi si. Mungu ka eri ede ra,
ama eco ra. Imu drile vini vini iguu aitaa si. Drinia si, Mungu
le mi ra. Mungu ka ovu mi be, a’di ni nga ovu onzi mini ni
ya?
Driwala Ori Alea Ri
40
Ilu Eyini Ale Eyi Ra
41
“Azini ayotaa ‘diri (azi, ayotaa, atritaa) ama esu eri vu:
kini agu Mungu ni leepi ra ri ma le vini ima adrii ni [‘ba
aitaa beri] endi.”
—1 YOHANA 4:21
6Letaa ni Ca Amve
Mi Mungu ma mva opele ‘bo ri i. Eri ‘yo mini Ayo Amviza
7:6 alea kini. Ika e’do e’yo ede ekile mi Erima ma mva opele
ra ri ru, eri nga angu ojaa ra. Mi nga muu dukania gutaa be
cinyaa andratia, orataa be, ‘ba le ma ra. Afa woro ma edria
ri muke. Ma eco tusu coo ‘ba azi ‘diyi dria letaa mani amaa
Mungu dri risi ra. Aka e’do geriko Mungu ni ama opezu
›š
Mi ovu lu ayikosi pari ci mini muzu ria, azini ayiko mi vele ri
nga tusu coo ‘ba azi ‘diyi ni. Ongo 100:2 kini le ama ma “nga
azi Opi ni ayiko si!”
Erima otitaa woro si ri nii ra azini e’do afa ‘ye ekile le ama
ra rile, ama nga wudrikuru nde Yesu ni ra. Letaa ni nga ere
mbele mbele. Mungu ma letaa acipi mi alea si ri nga ovu mile
be ani ecozu ‘ba azi ‘diyi ni awoko fezu ku beni. Erima ma
letaa mi alea ri nga driwala ovuzu ori alea ku ri fee mini,
azini i nga ni ovuzu orisi ku cazu letaa si ‘ba azi ‘diyi vu. I
nga ni ovu ‘ba gataa si ori si ku, kaniku, mi mazu fuu risi ku;
Mungu ma letaa ni nga afa ‘ba azi ‘diyi ni lele ri nee ra azini
o’bi eyi fee ra.
Mungu le mi ai i Erini ‘yozu Eri nga azi angiri agaapi ‘diyi
ede geriko mi vu risi a’dusiku Yesu muu Eri vu. Mi ai adaru
Mungu ni nga mi ayu ri ra ya? Mungu ni nga mini afa mini
Eri aizu ri fee ra? Mi eco ni ovuzu ori si pa ‘bazu amve ku.
Ma eco e’do luzu mini kani aso pa “oni aitaa ni yii alea,” ridria
afa ori ga tretreru riederu paleko si ya ri ku, vini e’da kile
Mungu kini, “Mi emuu drile, Joyce, mi emuu drile. Ma nga
afa amboru ‘diyi ede geriko mi vele risi. Mi emuu drile.” Vini
Ilu Eyini Ale Eyi Ra
42
Ambu erima agandua, azini Mungu adi ni ma sawa azi alu
ni ku.
Ini ma ede ori si ku pa ‘bazu amve azini e’detaa si ku ri ra
ya? Ani ra Mungu le ma ra. Le ma ra, vini nii ra ale Eri ra,
vini Eri ma aza si a’ba edri maniri vaa Erini. Ika ‘da ede ‘bo,
vini ika Mungu ni le ra, azini ika nii ra le mi ra, afa azi ewaru
mini ndele ku ni yo.
Mima asisile adari ka ovu ‘ba azi ‘diyi aza kozu, Mungu ni
nga eyi ma aza ko ra. Le mi vu okpo azi angiri tuu ni ku; le
lu mi ma ovu Mungu be, vini Eri acepi ‘diyi ede ra. Mi eco
egaa ondua Mungu ni fele mini ‘diyi wereru, te sawa azinisi
afa azini ka ovu wereru ndeni, okpo niri ovu angiri ndeni.
I’ba mi edri ekpere ru ku okpo woro ‘bazu mima dria azini
afa mini lele ‘diyi esuzu i ku. Ilu Mungu ni afa were mini lele
vini mbeleru, mi izoo di mima aita afa ‘ba azi ‘diyi ni lele ri
esuzu beni Afa azi mini fee ma ederu ‘ba azini niri, Mungu
Letaa ni Ca Amve
43
ni nga fee ma ederu mini ra. Ika afa azini le ra, mi ovu ori
orataa niri be, ovuni orataa ori niri be ku. Mini fuzu amve
‘ba azi ‘diyi dri ria, Mungu ni eri ai ori rile ‘bo mini lele okuu
edri mini ri ma alea ri ru.
‘Ba woro le ovu mali be, te le ama ma vaa mali ada ri ngo i ya
ri. Ale eri ece ekile okpo Mungu ni afa mini lele alualu emupi
mima drilea ‘diyi ru. Letaa Mungu vele ri nga mini okpo fee
afa ‘ba azi ‘diyi ni lele ri ‘bazu okoru. Mi ora Mungu le mi
capi risi mini ecozu cazu letasi, vini ‘ba azi letaa lepi ku ‘diyi
dri: ‘ba azi onuupi, awa’difo fepi ku ‘diyi dri ya?
‘Ba azi ni lezu ani eri ni mi lezu ri le ni inzitaa angiri ku.
Tedi le ama ma omve okpo Mungu veleri erini fezu amani
‘ba letaa koko’diyi lezu beni. Letaa Mungu dri rapi ama alea
si ri nga ede ra a’dusiku eri ma opendu yi yo. Ama esu aje
kokoru, ama eco fee aje kokoru. Letaa ece ni ku kaniku ku ni
‘ba eyi ku. Eco eli ‘du alu. Eco eli ‘du tau. Eco eli ‘du kaliri dri
tau, te eri orodriru. Yesu ni mi le ria te mi sawa si ya? Letaa
Ilu Eyini Ale Eyi Ra
44
eri eyere, asianzuru, vini ma i fuu. Epi ni i ceni ku, awokoru
kaniku awoko nya ni eri mbele mbele ku. Wura ‘diyi Yesu ni
daa ama dria Erima letaa si ‘diyi, azini ama eco ru ecizu waria
ru woro vini ede ‘dinile suza fezu risi, ‘ba avipi ra abiriru lepi
Mungu ni neepi azi alea wudrikurua ‘diyi ni.
Mungu le mi ra, vini le ‘ba woro mi ageia ‘diyi endi. Le eyi,
etotaa alea kaniku etotaa kokoru, azini le mi ayu afa Erima
letaa razu alenia si ri ru.
Mi ovu orisi pa ‘du amve ku. Mungu ma letaa ni mi ayuria
ori azini e’yo liza onzi risi, azini fee mini okpo ‘ba lezu ri ra.
Mi ovu asi mbaza be Mungu ma letaa erezu araa. Mi eco e’do
agi ‘baza wereru ‘ba pie. I’ba eri mi aziru ovuzu agiru azini
mi ovu tusu cozaru ‘ba eyi dri pari ci mini muzu ria.
Lu ‘ba aizu eri geriko alu letaa e’dazu, tutunisi ‘ba azi
a’duleru kaniku asi fupi mgboru ri. Mi ai ‘ba eyi nyaka ondre
ni ria. Ife ‘ba ma muu mi andri. Izi ‘ba eyi vini iguu cinyaa. Izi
‘ba azini agatisi ka ovu kililiru ria. Ife azakoma ‘yetaa si ekile
Letaa ni Ca Amve
45
‘ba azi mutukari niri ni ovuzu edezaru ri jizu eri vele azia.
I muu ‘ba azi esupi o’diru ri vu azi ma tia azini ine kani mi
eco eri ma aza kozu oataa aku ambo alea risi ra ya ri. Afa
azi Mungu ni le mi ma ede ni ci. Eco ni ovu afa azi amboru
azini ru e‘dapi tuu ni ku, te eri afa azi Eri ni okporu ni. ‘Ba
eyi Mungu ni okporu!
‘Ba mini eco e’yo oluzu lu eyi ni ‘diyi ci. Izi Mungu ni geriko
e’dazu mini cazu amve letaa si, eri nga vini mi emba ra.
Ilu Eyini Ale Eyi Ra
46
“’Di ma alea ri letaa ni: ovuni kini ale Mungu ni ra ‘dini
ku, te kini le ama ra azini epee ima mva ma ti ovuzu ayikoru
(owitaa ofezu) ama ezataa si.”
—YOHANA ALUZU RI 4:10
Letaa ni Ca Amve
7Letaa Mungu Niri Nga Mi Oja Ra
Mungu le ama ra, te ani ni ‘ba karakara vaa letaa erini ama
lezu ri ra ya ri ku. Mungu e’da eri mani geriko ma vile e’yo
dri kulu onitaa ‘di ma dria risi, ani adaru aka ta nii ra, ali
erini ama lezu vaa ‘dale ri, ama ‘yetaa ni ta ovu ndu aga ama
vele sawa woro si ri dri ra.
I dro asi Mungu ma letaa miniri ma dria. ‘Da ria fa ngapi mi
ojapi ri i.
Ika afa azini le mima dria ku, “mini nizu kini”
47
›š
Mungu le mi ra mini Mungu ni teria emuzu azi ngazu mi
alea ri nga mini ayiko fee aci alea. Ika lu oa asi be mgboru
okpo ako mi vele ‘diyi si, mi eco nga ru ojazu ku. Mi egaa nga
Mungu ni azi nga aita si, aita ada ri fe fizu ava liza Mungu
dri ria. (Ebrei 4).
Ma ai ra adaru kini ‘ba karakara buku ‘di lapi ‘diyi ovu kini
agiru eyi si ceniceniru ku. Le lu eyi ku azini eco vini eyi ngu
onzi ceniceniru ra. Ika ovu ‘ba mama buku lapi ri ma azi
ecopi okpo ‘bapi eyi beri, ale mi egaa kini mi eco afa mini
ede onzi ‘diyi nguzu ra, te le mi ma ngu mima ngulupi alua
ni ku. Yesu dra misi Erima letaa amboru risi, azini afa mini
ede weru ndeni ri Erima fetaa orodriru ri esuzu.
Bibilia kini, “Ekile erini egale eri ma asia rile, ‘dinile eri i”
(E’yo Obeza 23:7). Ika nga kiri ru amaa kililiru ku sawa
worosi, mi ngulupi gazu azini mi ‘ba ‘bani opele ra ri egazu
ku ri, mi eco azi nga e’yo mini egaa risi ku. Eri agbari a’dusiku
i’ba nga mi ma asia Eri agbari a’dusiku i’ba nga mi ma asia
okpo, edri ru ojapi kini Mungu le mi agaa mini nii ri te ri ku.
Ilu Eyini Ale Eyi Ra
48
Mungu le mima eza sawa Eri be o’duvu o’duvu. ‘Da ri afa
ngapi mi ojapi ri. Ika Mungu ni ‘ba oko ru ku, mi Eri ‘ba pari
Erini ngazu ecozu afa azi Erini le ede mini ri ‘yezu ku ria.
Eri sawa zizaru mini ayu Mungu be ri, lu Eri lezu azini fezu
Erini mi lezu ri ni nga fee mini ovuzu okpo, ori kokoru azini
mbazaru.
‘Ba karakara eyi trutaa ai azini le ni sawa fezu agi ‘bazu
Mungu be ku. Le ki agi muke ri ‘baa Eri be ra, te le ni inzitaa
‘baa eyima dria azini adriza muke ekile afa lazu vini ezizu
‘diyi ku. Vini afa yi edezu ‘ba azi ‘diyi niri le inzitaa azini ma
eca adrizaru.
Letaa Mungu niri nga mi ojaa ra. Mini Erima letaa etumu ria
azini eri egazu enyia enyia, mi nga afa mini le ‘diyi esuu ru
oja ria. Mi nga le ovu ekile ‘ba mi lepi (Yesu) ri ru. Mungu ni
nizu vini adriza Eri vele ri ezozu edri ama vele ria ri le ma
ovu afa ama ni ‘bale okoru ‘diyi ma azi.
Mungu ma Letaa ni nga Mi Oja Ra
49
Paulo kini ima asisile okporu ri Kristo ni nizu azini Eri ma
okpo egazu dra alea (‘ba Filipia ‘diyi niri 3:10). Kirikirisi ine
nga Paulo kini le ima ovu asisile be.
I’ba aparaku agi mi vele Mungu be risi ku. Mi eco ovu Mungu
be enyia ekile mini lele rile; ‘di so pa woro omgbo sawa mini
le ‘ba alenia risi.
Bibilia kini ama ojio Mungu dri ‘diyi azini Eri zitaa i vele ri
‘ba wudrikuru vu geriko ama vele risi (Waraga Irizu Paulo
ni sii ‘ba Korintoa ‘diyi niri 5:20). E’yo Bari ‘dari sawa worosi
ma asi eloo azini eri mani egataa o’di ri fee geriko amani
driceza Orindi Ala Mungu vele ri vuti bizu Eri ni azi ngazu
ama alea ria, ama ojazu azini sizu asisile Mungu dri risi.
Mungu ma letaa ‘ba daa ama asia geriko Orindi Alari drisi
(Waraga ‘ba Romaa ‘diyi ni ria 5:5). Mi ai eri, ezu ayiko erisi,
vini ife ma oja mi i!
Ilu Eyini Ale Eyi Ra
50
Mi Esu Edri O’di ni
Ika Yesu omve mima Opi azini Etopi ru ku, ma ai mi ‘yezu
sawa ‘disi. Mi eco ezitaa ‘diri ezi, ika vini ezi asi ada risi, mi
edri o’di ni esu Kristo ma alea ra:
Ata Mungu, ma ai Yesu Kristo ni Mi Mvii i, Etopi angu
niri i. ma ai ra dra patialaza ma dria ma si, vini ‘du ma ma
ezataa eyi woro. Enga dra ma alea risi vini ani, nde dra azini
enyadri ra. Ma ai Yesu ni edriru sawa ‘disi azini ri Mima dri
ada ria. Ale mi i, Yesu. E’du ma ezataa yi, mi eto ma, mi emu
oa ma alea. Ale osi o’diru. Ale ovu mini. Awa’difo mini ma
eto azini ma aza kozu ovuzu edri o’di ma alea mini risi.
Curo’do mi ai Yesu ni oa mi ma asia. Mi ai kini mi ezataa ‘ba
‘du ‘bo, ‘ba ede mi alaru ari Yesu niri si, azini kini mi nga mu
‘bua mi ma sawa angu dria ‘dia ri ka ru de ‘bo ria.
51
52
Mi esu kanisa ala ni muzu Mungu ma E’yo embazu azini mi
e’do zoo Kristo ma alea. Afa azi i ojapi mi alea onitaa E’yo
Mungu driri kokoru ni yo. Yohana 8:31-32 kini, “Ika muu
drile e’yo ma driri be, emi dere ma ma ojio yi adaru; vini emi
nga e’yo ada ri nii ra, vini e’yo ada ri nga mi etoo ra” (KJV).
Ma ai emi Mungu ma E’yo tambazu vini eri sazu ali emi asi
alea, vini e’yo engapi buku Paulo ni si ‘ba Korintoa ‘diyi ni
Irizo ria: 3:18, mini E’yo ‘di lazu ria, mini nga ru oja e’da
Yesu Kristo driri ru.
Kirikirisi isi waraga madri vini ife mama nii mi ai Yesu ni ra
ya ri, azini mi ai buku werea ru ni aje kokoru ani mini geriko
edri o’di Yesu alea ri e’dozu beni.
Letaa si, Joyce
Mi esuu Edri O’di ni …..
53
’BA BUKU ‘DI SIPI RI MA DRIA
JOYCE MEYER eri embapi Bibilia ni wudrikuru si ‘diyi ma
azini. Pari omvele #1 New York Times ni ‘ba buku sipi ala
ndeni ri esuzu ri, si buku ‘bani egataa onyiru ‘diyi fepi ‘diyi
100 ma drilea, alenia endi ri Oku Ori Koko ri i, Ma agati Otii
Mi be, buku familia dri pari a’di omi driri, erima aci oko e’yo
robia siri, azini ‘diyi pie. Emba vini ‘ba elifu elifu ‘diyi erima
o’duku ‘dule ci ‘diyi si vini e’yo edele eri ma ada ‘duzu ci
‘diyi be. Otitaa radio azini tivi Joyce dri Edri Ayiko ni Esuzu
O’du dria si omvele ‘Joyce’s Enjoying Everyday Life® radio
and television’ ‘diyi ‘ba eyi ‘ba wudrikuru si araa, vini eri aci
ree okuza yi ma dricezu. Joyce azini eri ma agupi, Dave, eyi
tipika anzi su zopi ra ‘diyi dri azini si aku Missouri-a, nzila
Louis driria.
Ezitaa Etotaa niri
Mungu lemi ra, ani le oa mi be. Ika nga Yesu ni ai ‘ba mi papiri ru ku, e’yeri sawa ‘disi. Inzi mi asi erini, mi ezi ezitaa ‘di i................................ Ata Mungu ma ai ra ma eza’bani mi drilea. Eku ezata mani foo azini mi oji ma alaru. Ma ai ra kini, mi epe mi mva elipiliru Yesu Kristo ma ti drazu masi. ‘Du ezata mani ri ra, ‘Odu erini drazu patialaza rua ri si. Ma ai ra kini enga draa alea risi ra. Ani afe edri madriri eridri sawa ‘disi. Awa’difo ata mini, mini onzi mani kuzu risi azini edri okopiku risi Amen. Ezita ‘diri si Mungu ai mi ra, oji mi ra, ku ezataa mini eyi woro ra. E’du sawa mi laa Eyo O’diri aita si. Ezi Mungu okpo ‘ipi ni e’yo nzezu mibe e’dri o’di di ma alea. Yoana 3:16 1’Ba korinto ni 15:3,4 ‘Ba Efeso ni 1:14 ‘Ba Efeso ni 2:8,9 1Yoana 1:9 1 Yoana 4:14,15 1Yoana 5:1 1 Yoana 5:12,13 Ezi Mungu ni mi drii cezu kanisa alaa Mungu ma e’yo embazu niri ma alea. Mi e’doo zoo ani Kristo ma alea beni. Mungu ni mibe cii. Eri nga midri cee o’duvusi, sawa dria si. Eri nga mini edri okopikuri fee.
nda Mungu ma Fetaa Mini ri i:Letaa ‘Dani ri i!
Mungu ma okpo azini letaa eri mini ci–andru risi! Vini mi ovu ni o’bi alu ‘diyi ma azini ku. Mungu le mi ekile mi a’dule angu ma dria rile. E’yo ewaru ri, ‘ba karaka ‘diyi le, mi eco eri vaa ku...kaniku ika eri nii mima dri sir a, mi eco eri amaa mima asia ku. Juru’do mi eco ra. O’duko okpo be buku egataa o’di ejipi endi ri nga e’da mini ra:
• Geriko Mungu ma letaa etumuzu mima alea ri• Geriko ecozu osuzu kani mi kililiru Mungu ni ya ri• Geriko mini ecozu ecetaa osutaa ru Mungu ma letaa niri
amazu ri• Geriko mini Mungu ni esuzu tetro e’yo ewaru edri ni ‘diyi
ma eselea si• Geriko Mungu ma letaa ni ngazu mi ojazu ‘dani ‘dani ri
Erima vataa azini ecetaa erima edri ngulupi ojapi ri awaza si, Joyce Meyer eji mini E’yo Alatararu ri azini eyo azi ondua ni ecopi Mungu ma letaa zipi mini ri...azini erima imve ma di mima dria, ‘ba alualu si!