Upload
latinista-humanista
View
229
Download
6
Embed Size (px)
DESCRIPTION
Carmen horatianum cecinimus, versionem Academiae Vivarium Novum sequenets
Citation preview
EX HORATIĪ CARMINIBVS CARMEN DECIMVM LIBRĪ PRĪMĪ
Rēctius uīuēs, Licinī, neque altum
semper urgendō neque, dum procellās
cautus horrescis, nimium premendō
lītus inīquom.
Auream quisquis mediocritātem
dīligit, tūtus caret obsolētī
sordibus tectī, caret inuidendā
sobrius aulā.
Sæuius uentīs agitātur ingēns
pīnus et celsæ grauiōre cāsū
dēcidunt turrēs feriuntque summōs
fulgura montēs.
Spērat infestīs, metuit secundīs
alteram sortem bene præparātum
pectus; informēs hiemēs redūcit
Iuppiter, īdem
summouet. Nōn, sī male nunc, et ōlim
sīc erit: quondam citharā tacentem
suscitat Mūsam neque semper arcum
tendit Apollō.
Rēbus angustīs animōsus atque
fortis appāre; sapienter īdem
contrahēs uentō nimium secundō
turgida uēla.