Upload
kepajunkera
View
6.505
Download
2
Embed Size (px)
DESCRIPTION
Una Pequeña Historia de La Trikitixa Euskera
Citation preview
KEPA JUNKERA & SORGINAK
TRIKITIXAREN HISTORIA TXIKI BAT
DEVIL’S MUSIC
Infernuko Hauspoa-rena zabaldua dago munduan. Mississippi ibaiak itsasoratu aurretik egiten duen
bihurgunearen bi aldetara baziren joan den mendearen hirugarren hamarkadan Juke Joints izenez
ezagutzen ziren taberna zulo negargarri batzuk. Kotoia biltzen lan egiten zuten beltzek leku hits
horietan garatu zen bluesa eta musika horri Devil’s Music (deabruaren musika) deitzen zioten elizan
Gospela (Jainkoaren musika) kantatzen zuten beltz zintzo eta sinestunek.
Trikitixa ere gurean susmopeko musika izan da edo errezelo horrekin jaio zen behinik behin, jendea
eta bereziki gazteak bekatura bultzatzen zituela uste izan baitzen.
Trikitixaren etorreraz bi teoria daude. Batzuek 1850 eta 1860 bitartean Norteko Trenaren zati batean,
Beasaindik Altsura bitartekoan, tunel eta zubiak egitera Italiako Piamontetik etorri ziren langileek
ekarri zutela uste dute. Beste batzuek trikitixa Bilboko portutik sartu zela diote. Lehen teoriaren
bultzagile nagusia “Trikitixa” liburaren egile den Agirre Franco donostiarra da. Berak dioenez, italiar
langile horiek Alpeetan tunelak eta zubiak egiten bereganatutako esperientziarekin batean hainbeste
maite zuten instrumentua ekarri zuten eta zaila ikusten duela dio Bilboko portutik sartzea, trikitixak
ez baitu apenas sustrairik botatzen kostaldean eta gutxiago portuen inguruan, baina bai barrualdean.
Berak dioenez, Europa erdialdean (Alemania hegoaldean, Austrian eta oro har Alpeen inguruan)
zabaldu zen soinu txikia, itsasotik urrun zeuden lurraldeetan alegia eta zaila egiten zaio Euskal Herrira
portuetatik sartu zela pentsatzea.
Soinu Txikia erakusten duen lehen argazkia 1890koa da eta Altsasun eginda dago.
Bizkaiko herri musika ikertu duen Aingeru Berguices eta beste batzuentzat ezagutzen diren trikitilari
zaharrenak bizkaitarrak dira eta soinu txikiak saltzen zituen lehen denda ere, Zengotita, Bilbon
zegoen eta badirudi handik zabaltzen den Gipuzkoara.
Eztabaida honek ez du bi lurraldeen arteko lehia etengabea pizteko baizik balio.
Dauden datuen arabera eta trikitixaren historia lerro batzuetara biltzekotan, esan daiteke lehen
loraldia Bizkaian ematen dela, baina 36ko Gerrak erabat zapuzten duela loraldi hori eta gerra
amaitzean Gipuzkoan berpizten dela generoa eta Elgetaren itzalari esker lurralde honetan garatzen
direla trikitiaren figurarik handienak.
Bizkaian Franco hil arte itxoin behar izan zuten berpizkundea ezagutzeko eta ordua itzuli ziren
agertoki handietara Rufino Arrola, Fasio Arandia edo, pandero-jotzaile famatuena aipatzeko,
Maurizia Aldeiturriaga bera. Rufinok 58 urte zituen ordurako eta Fasiok 62, baina sekulako kemena
eta garrotea erakutsi zuten hala ere plazaz plaza eta lehiaketaz lehiaketa.
Kepa Junkera trikitixarekin estreinatzen denean (1980an 15 urte zituen) bi erreferente nagusi
aurkituko ditu: bata Iurretakoa zen, han biltzen baitziren Bizkaiko trikitilariak urtero omenaldiak
egiteko. Han ezagutu zituen Fasio, Rufino Arrola, Maurizia eta Leon Bilbao albokaria. Ez zuten
teknikoki trikitixa jantzia egiten, baina bai nortasun handikoa. Bigarren erreferentea Gipuzkoakoa
zen. Hauek dagoeneko teknika oso garatua zuten eta grabazio asko zituzten, gainera, eta hori
abantaila bat izan zen Errekaldeko gaztearentzat.
Junkerak, beraz, 15 urterekin trikitixa deskubritu zuenean bi polo nagusi aurkitu zituen. “Berehala
ikusi nuen Bizkaian trikitixa jotzeko modua pertsonalagoa zela, trikitilari bakoitzaren izaeraren
araberakoa. Gipuzkoan, aldiz, hobeto ezagutzen zuten instrumentua eta teknika aldetik
aurreratuagoak zeuden. Bizkaiko trikitilarietatik Fasio izan zen gehien liluratu ninduena. Bera zen
melodikoena. Rufinok, berriz, indarra zuen eta erritmoa. Bi erreferentzia horien artean, Iurretan
biltzen zirenen eta gipuzkoarren artean eta bien eragina ezinbestekoa izan nuen neure bidea egiten
hasteko”, dio trikitilariak.
Kepa Junkera 1986ko Trikitilari Txapelketaren hasi zen bere bidearen berri ematen. Bizkaitar bakarra
zen eta berak egindako piezekin aurkeztu zen. Urte batzuk baziren pieza berriak egiten ari zela.
Junkera, Zabaleta eta Motriku ezagunak ziren dagoeneko Bizkaian eta beren jarraitzaileak zituzten.
“86ko txapelketan publiko berri bat agertu zen eta horrek egin zuen posible ni bide berri bat
markatzen hastea. Aukera ikusi eta aurrera egitea erabaki nuen, nahiz eta banekien ikasteko asko
nuela oraindik. Egiten ari nintzenaren berri emateko balio izan zidan txapelketak. Ez nuen nire
idoloekin lehiatzeko inongo asmorik. Motriku eta biok bilbotarrak ginen, ez ginen euskaldun zaharrak
eta ile luzearekin agertu ginen jendaurrera eta horrek egonezin bat eragin zuen jende batengan.
Gipuzkoako eskolaren, nire maisu handienen eskolaren, ateak ireki zizkidan niri txapelketak”, dio
trikitilariak.
Sotanak eta trikornioak
Joan den mendearen lehen hamarkadan (egiten ari diren ikerketa batzuen arabera lehenagoa ere
bai) Bizkaian soinu txikiak ezagutu zuen zabalkundearekin batean kontrako gurutzada bat jarri zuten
martxan apaizek pulpituetatik. Kirikiñok, euskaraz hainbat kronika idatzi zituen idazle eta kazetariak
1914ko lekukotasuna utzi zigun idatzirik. Urriko bigarren igandean Urkiola gainean egiten zen
erromeriaz ari da: “gazte aldra asko joan ohi dira bidean soinu joten, dultzaina, pandero, atabal,
auspo soinu eta honelakoekaz, ikotika eta ujuka, zoro-zororik”.
Azkuek ere, apaiza izaki, gisako ale batzuk utzi zituen eta, bitxiagoa dena, baita Toribio Etxeberria
eibartar sozialistak ere. Erromerietan kantatzen ziren koplen gordintasunaz kexatzen ziren.
Edanarekin eta dantzarekin, antza, gazte jendeak ahaztu egiten zituen aurreiritziak eta, apaizek beren
sermoietan errepikatzen zutenez, “emakumeak gizonezkoen besoetara oldartzen dira”. Hortik
datorkio soinu txikiari fama txarra eta hortik jarri zizkioten izenak ere, Infernuko Hauspoa, Txerren
Hauspoa y beste hainbat.
Apaizek bazuten motiborik dantzak zituen arriskuez zerbait jakiteko, aitortza egitera zetozen gazteek
kontatzen baitzien horren berri. Hortik dantzari oro har eta bereziki “dantza lotua”ri 60ko
hamarkadara arte egin zieten gerra. Maurizia Aldeiturriagak kontatu ohi zuen bere senarra,
Benantzio Bernaola “Karakol” trikitilaria, aitortza egitera joan eta pasadobleren bat jo izana aitortzen
zuen bakoitzean barkazioa ukatuko ziola egiten omen zion mehatxu.
Auntxa trikitilariaren amak gutun anonimoak jaso zituen eta semeak bere arima galduko zuela
lehenik eta berak ere berea esaten omen zion igorleak. Auntxa gaztek erromeriaren batetik etxera
etortzen zenean ama negarrez aurkitzen omen zuen.
Jabier Abasolo “Tiliño”k, 1974tik aurrera Bizkaiko trikitilari zaharrei omenaldiak antolatzen aritu
zenak, kontatu zigunez, Guardia Zibilak ere hartu zuen parte gurutzada horretan, nahiz eta beste
arrazoi batzuk izango zituen tarteko, eta isunak jartzen omen zizkien Arratiako trikitilariei eta inoiz
edo behin soinu txikiaren hauspoa zulatzera ere irisi omen ziren. Isunak jarri ahal izateko salatzaileak
behar ziren, txibatoak alegia.
Dantza lotuaren aurkako gerra horrek egoera barregarri asko ekarri zituen. Azkarate gainetik gertu
dagoen Madariaga auzoa, esate baterako, Azkoitia eta Elgoibarren arteko mugan dago. Azkoitian
dantza lotua debekatuta zegoenez, herriko aguazila joaten zen ikuskari gisa eta dantzan ari ziren
bikoteak korrika eta barrezka Elgoibarko lurretara joaten ziren, han legezkoa baitzen dantza lotua.
Antzeko egoerak bizi izaten zituzten Aizpurutxon ere, Azkoitia eta Zumarragaren artean dagoen
auzoan. Urola bailaran, kontatzen dutenez, baltseo txikia asmatu zuten, dantza soltea eta lotua
konbinatzen zituen modalitatea, dantza sueltoan ari zirela, koplak kantatzeko unea iristean zenean,
bikoteak besarkatu egiten baitziren.
Eliza trikitixaren kontrako jazarpen modu horiek bideratzen ari zen bitartean, agintariek baztertu egin
zuten soinu txikia ekitaldi ofizialetatik eta festetatik kanpo utziz. Beren instrumentu kutuna txistua
zen. Euskal festetan txistulariak kaikuarekin jantzita joaten ziren eta trikitilariak brusarekin, genero
bakoitzaren maila soziala agerian uzteko edo.
Aigeru Berguicesek aurkitu du Bakioko festetako egitarau bat, 1905ekoa, honako hau dioena: “Al
terminar las regatas (…) dará comienzo la animada romería campestre (…). Se prohíben los pianos de
manubrio, para que no haya nastes”. Badirudi soinu txikiak ‘naste’ edo ‘nahaste’ak ekartzen zituela.
Kepa Perez Urrazak, Zeberioko herri musika aztertzen hainbat lan egindakoak, garbi du soinu txikia
askatzailea izan zela garaiko gazteentzat. Trikitixa Elkarteko webgunean aurki daitekeen hiztegi baten
arabera, sotana eta trikitixa bateraezinak dira. Apaiz langileak egon dira, apaiz diputatuak,
parlamentariak, konspiratzaileak eta bertsolariak, baina ez da ezagutzen apaiz trikitilaririk.
Ez du suerte hoberik izan trikitixak zeruetako zaindariekin ere. 70eko hamarkada hasieran trikitilari
talde batek Arrateko Ama beren zaindari izendatzea erabaki zuten. Haren oinetan soinu txiki bat utzi
zuten, emari gisa. Ez zuen astebete iraun. Ez da inoiz jakin nork eraman zuen.
GERO ETA IZEN-DEITURA GEHIAGO
Trikitixaren historia laburra da, baina izen mitikoz betea dago. Aingeru Berguicesen esanetan, Juan
Bautista Uriagereka (1862) eta Agustin Elortegi (1863), Mungiako Markaide auzoan jaiotakoak, dira
Bizkaiko lehen izen propioak. Orain egiten ari diren ikerketa batzuek, ordea, bi mendeen mugan bizi
izan ziren trikitilari gehiagoren izenak aterako dituzte argitara. Trikitixa Elkarteko webgunean ageri
denez, Gregorio Abaro da ezagutzen dugun trikitilari beteranoena. Bermeotarra zen, 1869an jaioa.
Agirre Francoren arabera, Gipuzkoan lehen trikitilarien erreferentzia idatziak 1900ekoak dira. Idatzi
horietan Ormaiztegiko Itsua agertzen da, eztei eta jaietan soinu txikia joz bizi zena, nahiz eta beste
askotan herriko geltokian bidaiariei dirua eskatzen egoten zen. Harekin batean Pedro Urteaga ere
agertzen da, Zumarragako Altzola baserriko semea. Bikote horren ondotik Jose Korta “Pastor” dator,
“Mollo” eta Martin Aranzeta. 1918an trikitixaren historian mitikoa bihurtuko zen gizon bat agertzen
da, Gelatxo, urte horretan bi pandero-jotzailerekin batean Elgoibarko Trikitixa osatu zuelako. Bi
pandero-jotzaileak emakumeak ziren.
1920an Zumarragako Elizkaleko San Juan suari buruzko kronika batean Kanpazar trikitilaria agertzen
da. Berak eta Joxe Oria pandero-jotzaileak osatu zuten Euskal Herriko lehen trikitixa bikote
egonkorra. Garaitsu horretakoa da Itsasakorta ere eta 1920tik aurrera izen-deiturak dituzten
trikitilarien nomina izugarri handitzen da.
Berguicesek, ordea, Bizkaia aurreratu zela uste du eta lurralde horretan trikitixak ezagutu zuen
zabalkunde goiztiarraren frogatzat Bilboko Dendarien kalean ireki zuten Zengotita denda aipatzen
du. Denda ez ezik tailerra ere bazen eta soinu txikiak egiten ere aritu ziren hor, kopuru handirik egin
ez bazuten ere. Kepa Junkerak berak badu Rodriguez anaiek Artxandako tailerrean 1920 aldera
egindako sinu txiki bat. Europako modak Bilbora iristen ziren eta handik zabaltzen ziren Euskal
Herrira. La Casillan egiten zen erromeriak, esate baterako, izen handia zuen urte horietan”, kontatu
digu Kepa Perez Urrazak, horretan eta beste gai askotan Berguicesi jarraiki.
Kepa Perez Urrazak deskubritu duen daturik interesgarriena trikitixari buruzko lehen erreferentzia
idatzia da. “Juan Carlos Guerra historialariaren lan batean aurkitu nuen eta Urkiolako erromeriari
buruz ari dela ‘un novisimo acordeón’ aipatzen du. 1889koa da testua. Bitxia da trikitixaren lehen
erreferentzia grafikoa ere urte horretakoa izatea. Irudia Altsasun hartua da eta trikitixa bat erakusten
du. Badago 1905ko Bakioko festa egitarau bat ere, Aingeru Berguicesek aurkitua, trikitixarekin
erromeria iragartzen duena. Datu hauek trikitixak berehalako zabalkundea izan zuela erakusten dute
eta susmoa dugu foku nagusia Bilbo izan zela. Bertako dendak erakusten du inguru honetan
zaletasun izugarria zegoela. Gipuzkoan garai horretan gisako zaletasunik izan balitz, Donostian
dendaren bat zabalduko zuten”.
Hasierako abantaila hori dela-eta deituko diote beharbada Nafarroako Huitzin trikitixari “bizkai-
dantza”. Hala kontatzen du behintzat Orixek.
36ko Gerrak hondatu zuen, ordea, trikitiaren loraldia Bizkaian eta Franco hil ondoren ematen den
kultur pizkundearekin itzuliko dira hainbat figura garrantzitsu plazetara. Jose Jabier Abasolo “Tiliño”
1974an hasi zen Iurretan trikitilari zaharrei omenaldiak egiten. Fasio Arandia, Rufino Arrola eta
Maurizia Aldeiturriaga garaitsu horretan hasi zien Euskal Herrian barrena jotzen.
“Dantzarien federazioak eratu ziren, Durangoko Azoka, Ez Dok Amairu… eta giro horretan herri
musikak ere (trikitixaz gainera albokak, dultzainak eta txalapartak) piztualdia izan zeun. Trikitilarien
omenaldiak antolatzen hasi ginen eta lehen omendua Serafin Aranzeta izan zen, Oromiñokoa,
Iurretako auzo batekoa alegia. Kamineroa zen eta 1926an diskoa grabatu zion Bilbon La Voz de su
Amo etxeak. Orduan ikusi genuen trikitilari beterano gehiago ere bazeudela eta horitako asko ez
genituela ezagutu ere egiten, baserrietan gordeta bizi zirelako. Baserriz baserri ibili ginen trikitilarien
bila”, dio.
Tomas Arrizabalaga “Sitze”, Rufino Arrola, Basilio Txiki (Undagoitia), Salba Ugarte, Luis Bilbao,
Modesto Solozabal, Frutos Aulestialde, Fasio Arandia edo Maurizia bera mendearen lehen urteetan
jaiotakoak dira, baina “Tiliño”k ezagutu zuen lehenago jaiotakorik ere. Natxituako Juanita eta Felisa
Bermeosolok 90 urte baino gehiago zituzten omenaldiak egiten hasi zirenean. Zaratamon Anton
Agirre izeneko trikitilari bat aurkitu zuten 100 urte inguru zituena, baina berarekin harremanetan
jartzeko pausoak ematen hasi eta hil egin zen. Hil ondoko omenaldia egin zioten. Juan Etxebarrik ere
100 urte inguru zituen garai horretan eta Santa Ageda eskean ateratzen zen bere soinu txikiarekin.
Trikitilari hauetako asko gerra egindakoak ziren eta baziren frentera soinu txikia bizkarrean hartuta
joandakoak ere.
Kepa Junkerak Iurretako Jai Batzordeak antolatzen zituen omenaldi horietako batean estreinatu zuen
soinu txikia. Beti Alai dantza taldearekin joan zen alboka jotzera eta atsedenaldi labur batean beste
batek utzitako soinuarekin atera eta aho zabalik utzi zituen entzuleak. Tiliñok badu 79ko argazki bat
eta han dantza taldeko trikitilari gisa agertzen da Errekaldekoa. Melena luzea darama. 14 bat urte
izango zituen.
“88tik aurrera, dagoeneko 24 urte zituela, Bizkaiko erromeria gehienetara eta Gipuzkoako askotara
agertzen hasi zen Kepa Junkera. Urte batzuetan Euskal Herria behin eta berriz zeharkatu zuela esan
daiteke. Erromeria horietan errepertorio klasikoa jotzen zuen, oso errepertorio zabala”, dio Tiliñok.
Bizkaiko emakume pandero-jotzaileen zerrenda ere ez da makala. Aipatu ditugun Bermeosolo
ahizpez gainera, Romualda Zuloaga (Galdakao), Leona Ziarreta (1888, Zeanuri), Felisa Lekue (1878,
Dima), Frantziska Larrinaga (1861, Dima), Paula Elorrieta (1901, Arratia), Kattalin Urigoitia (1860,
Elexabeitia), Tomasa Etxebarria (1889, Zollo) edo Andresa Ibarrondo (1906, Erandio Goikoa) aipa
ditzakegu eta, noski, Maurizia Aldeiturriaga (1904, Zeberio).
Mauriziaren garaikoa da Gipuzkoan Primi Erostarbe (1907, Araoz). Manuel Sudupe “Gelatxo
Zaharra”k bere emazte Pantxika Zubizarretarekin jotzen zuen. Haren ahizpa bi ere, Martzelina eta
Juliana, pandero-jotzaileak ziren eta Maria Barrena (Araoz) ere. Maria Larrañagak, Etxesakortaren
arrebak ere jotzen zuen panderoa.
Emakume pandero-jotzaileen zerrenda honetan aipatu beharrekoa da Mikaera Zunzunegi, 1923an
Zumarragan jaioa, urte batzuetan Elgeta mitikoaren ondoan jo zuelako eta haren andregaia izan
zelako. Hala kontatzen du Antxiñe Mendizabalek “Zumarragako Trikitixa” liburuan. Esan dezagun
bidenabar Mikaelaren familian pandero-jotzaile ez zena trikitilaria zela. Bere aita, Joxe Antonio
Zunzunegi, maila dezentea zuen trikitilaria zen, Gelatxoren ondoan jotzen baitzuen. Eta bere anaia
Juan Marik ere soinu txikia jotzen zuen eta ahizpa Maritxuk panderoa.
Zumarragako Trikitixako Joxe Oriaren amak ere, Frantziska Antonia Irizarrek, panderoa jotzen zuen.
Begi bistakoa da panderoa soinu txikiaren aurrekoa dela. Albokari lagundua zen aurretik eta bakarka
ere bazekien erromeria bat antolatzen, panderoa eskuan hartu eta kantuan eginez alegia. Kontatzen
da garaiko pandero-jotzaile emakumezkoek panderoaren larruan beren senargaiaren profila
zirriborratzen zutela.
EUSKARAREN MAPA
Harrigarria da soinu txikia kanpotarra izanik, zeinen azkar egokitu zen gure lurrera eta zeinen erraz
zabaldu zen ia euskal geografia osora. Urte batzuk lehenago gauza bera gertatu zen Alpeen itzalean
dauden eskualdeetan: bertakoak ziren instrumentuak baztertu eta bertakotu egin zen. Beraz, ondorio
bat atera behar da: soinu txikiak bazituela aurrekoek, albokak eta dultzainak esate baterako, ez
zituzten dohain batzuk, hala nola “hots armonikoagoa eta ñabardurak agertzeko gaitasuna”, Agirre
Francoren hitzak erabiltzearren.
Baina badago soinu txikiaren inguruan bigarren datu bat harrigarria egiten zaiguna: trikitixaren
hedapenak euskararen maparekin bat egiten du. Hain egiten du bat trikitixak euskararekin non
belaunaldi berrientzat soinu txikia gure hizkuntzarekin uztarturik agertzen den.
Joxe Mari Iriondok 1962an abiarazi zuen “Gure erromeriak” irratsaioa Loiola Irratian. Donostiako
Herri Irratiak “Saski-Naski” jarri zuen martxan 1964ean. Esteban Larrañagak “Sutondoko erromeriak”
programarekin hasi zen garaitsu horretan Arrate Irratian. Zenbaiten iritziz, goizean, arratsaldean eta
gauean trikitilariei egindako grabazioak ematen zituzten irrati horretan, baina ez dirudi inor kexatzen
zenik. Larrañagaren nahiz Iriondoren irratsaioetan trikitilari belaunaldi baten piezak grabatu ziren.
Irratsaio horiek guztiak, ordea, euskara hutsean ematen ziren. 60ko hamarkadan oso arrunta zen
Gipuzkoa, Bizkaia edo Nafarroa atlantiarreko mendi bideetan barrena leihatilak jaitsita zeramatzaten
Land Roverretatik trikitixa entzutea.
1964ean Loiola Irratia itxita egon zen, gobernadoreak hala aginduta. Entzuleren batek abisua eman
zuelako gertatzen ziren debeku horiek, zenbait pieza ez baitziren frankisten gustuko.
Maixa Lizarribarek Euskadi Irratian eta Jabi Navarrok Egin Irratian irratsaio bana gidatu zuten 1996tik
aurrera, hauek ere euskaraz noski.
LEHEN GRABAZIOAK
Trikitixarekin grabatutako lehen diskoa 1924ekoa da. Joxe Oria pandero-jotzailea eta Jose Lete
“Etxesakorta” trikitilariak osatutako bikotea izan zen protagonista. Oriak 24 urte zituen orduan eta
Etxesakortak 19. Donostiako Columbia etxean egin zen grabaketa.
Bi urte geroago Serafin Aranzetak grabatu zuen trikitixaren historiako bigarren diskoa. Iurretako
kamineroa lanean ari zen, trikitilariak berak kontatu ohi zuenez, La Voz de su Amo grabaketa
etxekoak auto batean agertu eta ea disko bat grabatu nahi al zuen galdetu ziotenean. Eskorga eta
aitzurrak errepide bazterrean utzi eta autoan sartzeko agindu zioten. Ez zioten arropak aldatzeko
astirik ere eman. Arrebari deitu eta biak joan ziren, bata soinuarekin eta bestea panderoarekin.
Bilbora iritsi eta Coliseo Albiara sartu zituzten eta han oso denbora gutxian grabatu zuten diskoa.
Jose Oriak beste disko bat grabatu zuen berehala Columbia etxean, baina oraingoan Legazpiko Errota
trikitilaria eraman zuen soinuarekin. Hirugarren diskoa ere grabatu zuen Egiguren trikitilariarekin.
Baina ez dakigu bi disko hauen data segururik; 36ko Gerraren aurrekoak direla bakarrik dakigu.
Gerra aurretik grabatu ziren disko gehiagoa ere: Etxesakorta eta Manuel Sudupe “Gelatxo”k
arbelezko diskoak grabatu zituzten Regal etxearekin. Zaldibarko Trikitixak ere grabazioak egin zituen.
1963tik aurrera hasi zen Joxe Mari Iriondo Loiola Irratian grabazioak egiten eta irrati horretatik igaro
ziren Gipuzkoako trikitilari onenak. Jose Mari Iriondo soldaduska bukatu berritan itzuli zen bere
irratiko egitekoetara eta irratian lanean ari zen batean Sakabi eta Egañazki agertu omen ziren pieza
batzuk grabatzea zenbat kostatuko ote zitzaien galdezka. Izatekotan ere irratiak berak ordaindu
beharko liekeela erantzun omen zien Joxe Mari Iriondok. Horrela hasi ziren trikitilariek irratira egin
zituzten bisitak. Maltzeta, Zendoia eta Egurrola aita-semeak igaro ziren, Epelde, Arbe, Epelarre,
Bitarte eta Zabaleta ondoren.
Joxe Mari Iriondo egiteko horretan hasi aurretik Bergara jesulaguna grabaketa batzuk egina omen
zen: Migel Sagastume eta Gillermo Aldalur “Pikua” esate baterako grabatzen izanak ziren, biak ala
biak akordeoiarekin. Kandido Beristainek ere pieza batzuk grabatu zituen, akordeoiarekin eta soinu
txikiarekin.
1970etik aurrera hasi ziren Edigsa, Herri Gogoa, IZ eta beste zenbait etxe modu normalizatuago
batean diskoak grabatzen.
ELGETA, MITO BAT
Jacinto Rivas “Elgeta” (1905-1964) da, zalantzarik gabe, mito bihurtzeko biografia aproposena izan
zuen trikitilaria. Donostian jaio zen, inklusa batean abandonatu zuten gurasoek txikia zela eta
Bergarako Intxuzabal baserrira eraman zuten adopzioan. Baserri hori Elgetatik gertuago dagoelako,
“Elgeta” esaten zioten edo “Intxuzabal”. Bi belaunaldiren maisua izan zen gerra ondoan gutxienez
Gipuzkoan. Sakabi gerra aurretik hasi zen berarekin ikasten. Eleuterio Tapia, Epelarre, Auntxa, Arbe,
Kataolaza, Urkiolegi, Zabaleta, Erribera, Zialtzeta, Laja eta beste hainbat ibili zien berarekin ikasten
eta guztiek eragin ezinbestekoa izan zuela uste dute soinu txikiak Gipuzkoan izan zuen bilakabidean.
Sakabik, esate baterako, “beragatik izan ez balitz, ez zegokeen hemen trikitixarik”, esan ohi zuen.
Bere irakaskuntza Bizkairaino iritsi zen, orain Gernikan bizi den Munitibarko Julian Larrinagak ere
berarekin ikasi baitzuen jotzen.
Hitz batean esateko, trikitixaren lehen profesionala izan zen. Gerra aurretik peoi gisa lan egina zen
Eibarko tailer zenbaitetan, baina lana bukatu orduko despedida eta erromerietan jotzen zuen. Petra
edo Petratxarri izeneko madame baten etxean “piano-jotzaile” ere izan zela kontatzen dute,
Errepublikaren garaian Eibarren emakume horrek kudeatzen zuen burdel txikian alegia, herria
kosmopolita samarra baitzen sasoi hartan.
Elgetaren biografiaren lehen zatia Eibarri oso lotua egon zen. Herri horretan ikasi zuen trikitixa jotzen
ere, Migel Sagastume “Urkiko Aztia”ren aitak erakutsi baitzion. Diogun bidenabar Migel Sagastume
La Habanako Orquesta Tropicanako soinu-jotzaile profesional gisa kontratatu zutela 19 urte
zituenean. Euskaldun batek kudeatzen zuen orkestra eta amak lagunduta joan zen mutila La
Habanara. Elgetaren ibilbidea xumeagoa izan zen. Gerra ondoren bizileku finkorik gabe ibili zen,
baserriz baserri soinua erakusten. Bere kontratuan egunero bost ogerleko, hiru puru eta mantenua
eskatzen zituen. Ez zuen elizarik zapaltzen. Gau-txoria zen eta lo zailekoa. Orduak ematen zituen bere
gelan karta-jokoan bakarkakoak egiten. Eguerdi aldera altxatzen zen (ez zen ordutegi hori oso ohikoa
baserrietan) eta hasten zen ikaslearekin lanean.
Gerra garaian boluntario joan zen Bilboko frentean gotortze-lanak egitera eta kartzela zigorra bete
behar izan zuen Santoñan eta Cadizen, baina zigorra laburra izango zen, 1942eko argazki batean ageri
baita bere bi ikasle, Auntxa eta Sakabi, ondoan dituela.
Ez zen inoiz ezkondu. Harreman sentimentalik ezagutu zitzaion, ordea. Azkena Urretxuko Mikaela
Zunzunegirekin izan zuen. Neska honek panderoarekin lagundu zion bolada batez eta harremana
hautsi izanak sekulako eragina izan zuen trikitilariarengan. Sakabik bere etxea eskaini zion bertara
erretira zedin, baina ez zuen nahi izan. Trikitixa girotik aldendu zen, Donostiara joan eta han-
hemenka lo eginez nolabaiteko bizimodua eramaten hasi zen. Batzuek erruki-etxean lo egiten zuela
zioten, beste batzuek tren-bagoi zahar batera erretiratzen zela. Bere ikasle ohi batzuek Parte
Zaharreko tabernatan ikusten zuten jotzen eta dirua eskatzen. Pepe Yantzik pieza batzuk grabatu
zizkion azken etapa horretan. Iker Goenagak, gazte belaunaldiko haren miresleak, agertzen duenez,
pieza horitako batean bost aldiz aldatzen du tonuz eta beste batean inprobisazioak egiten ditu. Antza
denez, Elgetak bi oktaba erantsi zizkion bere soinuaren teklatuari Martzelino Larrinagaren
laguntzarekin.
Elgeta gaurko artistaren prototipoa dela esan daiteke, ukitu erromantiko batzuk baditu ere,
bizimodua artearen alde sakrifikatu baitzuen eta musika beste heldulekurik gabe bizitzera iritsi
baitzen. Are gehiago, artista modernoa izanik, baserri giroan bizi izan zen, gerra ondoko baserri giro
itxian, eta horrek areagotu egiten du bere bizitzaren paradoxa.
BI KASU MUTURREKO
Kasu bitxiz betea dago trikitixaren historia. Joan den mendeko Bizkaiko bi figura ezagunenak Rufino
Arrola eta Bonifazio Arandia “Fasio” dira eta biak ala biak dira bereziak. Biak jaio ziren urte berean,
1909an, Rufino Mungiako Andrakas auzoan eta Fasio Igorren, eta biak utzi behar izan zuten gaztetan
trikitixa arrazoi ezberdinak tarteko eta adinean aurrera zihoanean hartu zuten berriro eskuetan soinu
txikia, Arrolak 58 urterekin eta Fasiok 62rekin eta adina gorabehera gelditu gabe ibili ziren ondorengo
urteetan. Rufinok, esate baterako, hogei bat txapelketetan hartu zuen parte (egun berean bi lekutan
txapela irabazi zuela kontatu ohi da) eta Fasiok hirukote mitikoa osatu zuen Leon Bilbao eta Maurizia
Aldeiturriagarekin eta Bizkaia alderik alde zeharkatu zuen behin eta berriz.
Rufino Arrolak mutikotan ikasi zuen soinu txikia jotzen. Hamalau urte zituela erromerietan jotzen
zuen, baina nerabea zela utzi gin behar izan zuen soinua, lanak horretara behartuta seguru asko, eta
ez zuen berriro eskuetan hartu 58 urte bete zituen arte. Xabier Amurizak trikitilariari eskaini zion
liburuan kontatzen duenez, auzoko festetan jotzera etorri zen trikitilariari begira egon omen zen
luzaz arratsalde batean. Ez dakigu bere baitarako zer gogoeta egin zituen. Etxera joan zen eta
biharamunean motoa hartu eta semeari Donostiara zihoala esan zion. Larrinaga-Guerrini batekin
itzuli zen handik. Errementaria zen. Aingura eta burdinak alde batera utzi eta soinuarekin hasi zen eta
1996ra bitartean ez zuen atsedenik hartu.
Bonifazio Arandia “Fasio”ren kasua antzekoa da. Hamahiru urterako plazan jotzen ari zen, baina gerra
iritsi zen eta etxean gordeta zituen bi trikitixak lapurtu egin zizkioten. Jubilatzeko sasoia gainean
zuenean hartu zuen berriro soinu txikia. Maurizarekin eta Leon Bilbaorekin hirukotea osatu eta plazaz
plaza hasi aurretik, ordea, Igorreko futbol taldearekin ibili ziren hara eta hona autobusean giroa
berotzen. Xabier Payak eta Fredi Paiak Mauriziari eskaini zioten liburuan kontatzen dutenez,
1968rako bazebiltzan elkarrekin Arratie izeneko taldea animatzen. Dindirri eta Andra Mari dantza
taldeekin ere kolaboratzen zuten eta astean behin Atxondoko Mendigoikoa jatetxean jotzen zuten.
MAURIZIA, AHOTS BAT DENON GOGOAN
Asko izan dira mende eta erdiko historian trikitixa bikoteetan kide izan diren emakumeak, baina
horietatik hogei bat igaro dira jendearen memoriara eta nabarmenena Maurizia Aldeiturriaga izan
da, 13 urterekin panderoa jotzen eta kantuan hasi eta eskola bat sortzera iritsi baitzen, agertoki
gainean erakusten zuen nortasunari esker.
Zeberion jaio zen 1904ean familia panderozale batean. Aitak jotzen zuen panderoa, anaia zaharrenak
eta osaba Kalixtok, amaren anaia batek, ere bai. Hau izan erakutsi ziona. Neskatoa zela igande
arratsaldeak bere gelan sartuta igarotzen omen zituen Mauriziak panderoa jotzen. Garai horretan
hori nonbait ikasteko modu arrunta zen. Xabi Paya eta Fredi Paiak “Aupa Maurizia” liburuan beste
kasu bat ere aipatzen dute: Plentziako Manu Ugarte pandero-jotzailea. Honek etxetik ur bila iturrira
bidaltzen zutenean balde-ipurdia joz ikasi omen zuen mutikotan.
Agurtzane Intxaurragak Bidegileak sailak pandero-jotzaileari eskaini zion alean kontatzen duenez, 9
urterekin atera zen etxetik Maurizia neskame joateko, baina hiru urterako berriro etxean zen
Zeberion bertan hari fabrikan lan egiteko. 13 urterekin hasi zen panderoa plazan jotzen Jokin Goiti
“Joakintxu” trikitilariari lagunduz. 17rekin ezagutu zuen Benantzio Bernaola “Karakol” eta harekin
hasiko da panderoa jotzen eta harekin ezkonduko da zazpi urte geroago.
“Karakol” Arteakoa zen eta ahuntzak zaintzen ari zen bitartean ikasi zuen soinu txikia jotzen.
Geroago, Vasconia enpresan lan egiten zuenean Pedro Artiñano “Aldai” trikitilariaren lagun egin zen
eta honek lagundu zion bere zaletasuna bideratzen. Bere anaiak ere, “Juan Lodia”k, trikitixa jotzen
zuen, nahiz eta, ezkerra izaki, baxuak eskubiarekin eta melodikoak ezkerrarekin jotzen zituen.
Kotatzen dutenez, Benantzio Bernaola “Karakol” soinu txikia joz sartu zen herrira soldaduska bukatu
eta itzuli zenean.
Lehen aipatu dugun Pedro Artiñano “Aldai” hori Bizkaiko onena zen hotsak ziren garai hartan.
Igandetan Bilboko La Casillan jotzen zuen. Leku horretan hiru talde osatzen ziren. Lehen taldean
txotisak eta tangoak dantzatzen ziren, bigarren taldean San Frantzisko eta inguruko kaleetan lan
egiten zuten emakumeak biltzen ziren eta hirugarrenean euskal neskameak eta inguruko herrietatik
hiriburura etortzen ziren mutil gazteak. Hirugarren talde horretan jotzen zuen Pedro Artiñanok.
Baina itzul gaitezen Arteara. 20 edo 30eko hamarkadetan Arteako erromeria arratsaldeko hiruetan
hasten zen, gazteak elizan arrosarioa errezatu eta ateratzen zirenean. Zeberiotik Arteara oinez joaten
zen Maurizia panderoa joz. Bere lagun neska bat ekarri ohi zuen berarekin, hura ere panderoarekin.
Pedro Egia “Popon” egoten zitzaien itxoiten plazan trikitixarekin eta lehen pieza honek jo ohi zuen.
Egia esan, “Popon” ez zen “Karakol”n teloneroa baizik, erromeria horietan benetako protagonista
Benantzio Bernaola “Karakol” baitzen eta, noski, Maurizia ere bai.
Erromeria hura ezagutu zutenek diotenez, fandangoetan bakarrik laguntzen ziola Mauriziak
“Karakol”i, gainontzeko errepertorioa bakarrik jotzen baitzuen. Atsedenaldietan Leon Bilbao igotzen
zen agertokira bere albokarekin eta honi ere Mauriziak laguntzen zion, bere kantatzeko modua oso
ondo lotzen baitzitzaion albokari.
Baina garaiko gazteei alboka modatik pasatako instrumentua iruditzen zitzaien. Trikitixak askoz ere
indar gehiago zuen, polifonia eta hiritik zetozen aire berriak jotzeko balio zuen, pasadobleak esate
baterako.
Edozein modutan ere, Arteako plaza horretan hasi zen hezurmamitzen gerora euskal herri musikan
hain famatu bihurtuko zen hirukotea.
Maurizia eta “Karakol” ezkondu egin ziren, baina jotzen jarraitu zuten. Zornotzako Karmen eguneko
erromerian bikote hau izaten zen jotzen, Urkiolako San Antonio egunekoan, Durangoko San Fausto
egunean edo Dimako San Pedro egunean ere bai. Hitzordu garrantzitsu horietaz gainera beste
hainbat herri eta auzotan jotzen zuten. Erromeria horietan gazteek orduak egiten zituzten dantzan.
Kontatzen dutenez, Garaiko San Migel ermitaren inguruak ureztatu egiten zituzten goizean goizetik
erromeria egunean, baina lurra lehortu egiten zen eta arratsalderako dantzan ari zirenek hainbesteko
hautsa harrotzen zuten, non ezin zuten elkar ezagutu.
Mauriziak eta bere senarrak haurra izan zuten, baina etenaldi laburra egin zuen pandero-jotzaileak,
haur txikia besoetan zutela joaten baitziren plazarik plaza.
Gerra izan zen Mauriziaren bizitzako gertakaririk dramatikoena. Zeanuriko baserria utzi eta bere
amarengana itzuli zen, Zeberiora, 8 urteko semearekin. Baina Francoren tropak gerturatu zirelarik,
Somorrostrora ihes egin zuten, han bizi baitzen osaba Kalixto, eta handik Kantabriara ondoren. Bien
bitartean bere senarra preso hartu zuten, Iparraldera ihes egitekotan zenean.
Gerrak iraun zuen hiru urteetan inor ez zen trikitixarekin gogoratu. Senarra etxera itzuli zenean ezin
izan zuen Vasconia enpresan zuen bere lanean hasi, separatisten bandoan ibili zelako. Predi Paia eta
Xabier Payak liburuan kontatzen dutenez, 1949an hasi zen berriro Maurizia panderoa jotzen, bere
senarrari lagunduz. Txarribodetan eta inguruko auzoetako festetan hasi zen lehenik eta erromeriak
berpizten hasi ahala erromerietan ondoren. Eta 1964 inguruan gehitu zitzaion Leon Bilbao, historia
egin zuen hirukotea osatzeko.
“Karakol” hil zenean “Fasio” Arandiak hartuko zuen hirukotean haren lekua eta hau hiltzean Basilio
Undagoitia sartuko zen. Bien bitartean famatu egin zen Maurizia, euskal kulturaren
berpizkundearekin bat eginez, behin eta berriz zeharkatu baitzuen Euskal Herri osoa. Hogei urtez ibili
zen Maurizia gelditu gabe. Bere urrezko aroa izan zela esan daiteke. Arreta handiz prestatzen zituen
ekitaldiak. Baserritar jantziekin janzten zen. Pare bat ordu aurretik ateratzeko prest egoten zen. Beti
garaiz iristen zen jo behar zuen lekura eta agertokira igo aurretik erritual txiki bat errepikatu ohi
zuen: egunkari orri batzuk lurrean jarri eta su ematen zien, panderoaren larrua berotu eta
tenkatzeko.
Kontatzen dutenez, behin Zeberioko Ermitabarrin jo behar zuen Pedro Aratiño “Aldai”rekin, baina
hau ez zen garaiz iritsi eta bera bakarrik hasi zen erromeria animatzen, soinu-jotzaileari itxaron gabe.
Agertokia betetzen zuen bere presentziarekin eta sekulako indarra transmititzen zuen. Mauriziak
ahots lodia zuen eta tonu horrekin hasten zen beti koplak kantatzen eta goikoarekin bukatzen zuen.
Berak Leon Bilbaoren alboka imitatzen zuela errepikatzen zuen. Eta hala uste dute Xabier Payak eta
Fredi Paiak ere, kadentzietan eta kopla bukaeretan albokaren eredua erabiltzen zuela.
Gazte batzuek desafinatu egiten zuela esaten zuten. Helduek, ordea, ezetz erantzuten zieten. Garbi
dagoena zera da, bere ahotsak antzinako oihartzunak zituela eta indar basatia transmititzen zuela.
60ko hamarkadan hurbildu zitzaizkion musikari gazteak liluratuta utzi zituen. Garaiko diskoetan
grabaturik geratu zen haren ahotsa: Kortaturen lehen diskoan, Iker Goenagaren “Txikitxuterik”
lanean, Kepa Junkeraren “Nondik jo Maurizia?”n, Urgabe taldearen “Agur Maurizia”n, Imuntzoren
disko batean edo Xabi Aburuzaren “Bizkaiko trikitixa”n. Lau disko utzi zituen eta horietan bere
protagonismoa nabarmenagoa da: “Herri musika sorta. 15 Arratia”, 1977ko “Herriko musika”,
Beltranen “Euskal Herriko musika tresnak” eta 1987ko “Maurizia, Leon eta Fasio eta Basilio”.
Si bemolean kantatzen zuen, ozen eta indartsu. Gerra aurreko erromerietan modu horretan
kantatzen zuten gazte jendea dantzara erakartzeko. Bere emanaldiek orduak irauten zuten. Panderoa
jo eta kantuan eginez itzultzen zen etxera askotan eta oheratzen zelarik, orduak igarotzen zituen lo
hartu ezinik eguneko irudiei errepasoa ematen.
Joan den mendeko lehen zatian emakume pandero-jotzaileen nomina luzea da. Baina guztien artean
Maurizia izan da gazte belaunaldien artean mirespenik gehien eragin duena. Bere ibilbidearen zati
handi bat Euskal Rock Radikalaren garaikidea izan zen eta mugimendu horretako aitaponteko
zenbaitek, hala nola Josu Zabalak edo Fermin Muguruzak, laudorio handi samarrak bota zizkioten eta
“beste garai bateko punk” gisa definitzera iritsi ziren, esan nahi baitzuten Maurizia ere punk bat izan
zela, avant la lettre izan bazen ere.
1940 eta 1960 artean apalaldi handia bizi izan zuen trikitixak. Euskarak ez zuen inolako prestigiorik
eta 1960 bitartean Mauriziak gazteleraz kantatzen zituen kopla asko. Euskadi Irratiari 85ean
emandako elkarrizketa batean oso garbi aitortzen zuen berak ez zekiela gazteleraz hitz egiten. Antza
denez, Bizkaian nahikoa zabalduta zegoen ohitura zen. Paya anaiek beren liburuan Getxoko bertsolari
batena kontatzen dute. Asensio Bidaurrazaga zen bere izena, euskaraz egiten zuen bertsotan
lagunartean, baina gazteleraz plazan. Maurizia euskaraz kantatzera igarotzen 60ko hamarkadan eta
hori egien ahal izateko kopla zaharrak erabiltzen hasi zen.
Gerra ondoko bi hamarkada horietan zehar soinu-jotzaileak ere soinu txikia baztertu eta handia
jotzera pasatu ziren eta garaiko musika genero ezberdinetako errepertorioa bereganatzen hasi ziren:
runbak, habanerak eta rantxerak. 1970 inguruan, berriz, alderantzizko jarrerak hasi ziren gailentzen:
soinu handia jotzen ikasitako akordeoilariak txikira pasatu ziren. Euskal Herriko mailako txapelketak
ere berriro martxan jarri ziren. Final bakoitzeko diskoa argitaratzen zuten eta irratiek nahiz ETBk
trikitixa gizarteratzen lagundu zuten.
Euskal Herriko lehen Trikitixa Txapelketa 1970ean egin zen Donostiako Trinidade plazan Euskal Jaien
egitarauaren barruan eta trikitixa gizartean zeinen sustraitua zegoen erakutsi zuen. Jende aldetik izan
zuen arrakastak txunditu egin zituen asko. Sarrera guztiak agortu ziren eta zaleak kontra pilatzen hasi
zirelarik, sarrerako burdin-sarea botatzera iritsi ziren. Bi mila lagun baino gehiago sartu ziren
ikuskizunera eta beste hainbat geratu zen sartu ezinik.
80ko hamarkadan finalak Belodromora eraman ziren eta 8.000 lagun biltzera iritsi ziren. Hamarkada
horretan jarri ziren abian trikitixa eskolak ere. Martin Aginagalde 300 ikasletik gora edukitzera iritsi
zen, zortzi eskoletan banatuta. Eskola horiek sekulako oinarria eman zioten trikitixari.
ROMAN URRAZA ETA KONTXA URRATZA, Keparen aitona eta ama
Kontxa Urraza (Kepa Junkeraren ama): “Neuk ikasteko aukerarik izan ez nuenez, seme-alabak
bultzatu ditut musika ikastera”
Kepa Junkerak askotan esana du jotzeko teknikari dagokionean, Gipuzkoako maisuekin dituela
zorrak, baina bere piezek transmititzen duten erritmoa eta indarra umetatik edan zuela. Ama, Kontxa
Urraza, Txilibrinen dantza bikotea izan zen. Txilibrinek, (Silvestre Elezkano) Igorren 1912an jaiotako
albokari, koplari eta dantzariak, dantzaren eta herri musikaren bultzagile nekaezina izan zen gerra
ondoan. Kepak gordetzen dituen umetako irudien artean bada bat garrantzia handikoa: Errekaldeko
Goya kaleko beren etxeko sukaldean ama ari da dantzan.
-Zu eta senarra etxe berean jaio zineten. Zuena eskailera bereko maitasuna izan zela esan daiteke.
Biok ezkaratza berekoak gara, Goya kaleko 7. zenbakikoak. Bera behean bizi zen eta ni lehen
solairuan. Pena da gaur hemen ez egotea. Egun batzuk ospitalean dago bronkitis batekin. Umetatik
ezagutzen genuen elkar. Pedrok Belgikan eman zituen urte batzuk, gerratik ihesi joandako umeetako
bat izan zen. Gerora ere harreman estua izan zuen hartu zuen familiarekin. Pare bat aldiz izan ginen
haien etxean eta haiek ere bai hemen, gure etxean. Asko maite zuten. Azkena etorri zirenean Pedro
haientzat seme bat bezala zela esan zidaten eta ni alaba bat eta gure seme-alabak berentzako
bilobak izango zirela.
-Trikitixarekiko lotura zure aitaren aldetik dator. Roman Urrazak panderoa jotzen zuen.
Gure aita Zollokoa da eta ni Miravallesen jaio nintzen. Aitak euskara hitz egiten zuen, baina ama
Santaderkoa izaki, galdu egin genuen euskara. Aitak, esan bezala, panderoa jotzen zuen. Salba Ugarte
trikitilariren adiskide mina zen eta Txilibrinena ere bai. Azken hau Basurtoko Beti Alai dantza
taldearen sortzaileetako bat izan zen eta hor hasi nintzen ni dantzak ikasten. Txilibrin bere aldetik
jota txapelketetan parte hartzen hasi zen eta niri galdetu zidan ea nahi zuen bere bikote izatea. Urte
askotan izan nintzen bere dantza bikotea.
-Baina Beti Alain hasi aurretik ere zuk dantzan egingo zenuen.
Bai, bai. Etxean denok erromeria zaleak ginen eta ia igandero antolatzen genuen festaren bat
mendian. Adiskide batek baserria zuen San Roke ermitaren ondoan, Pagasarrira bidean, eta han
familia osoak elkartzen ginen. Salba Ugarte trikitilaria ere Errekaldeberrin bizi zen, gure etxearen
aurrez aurre. Orozkokoa zen. Gure aitak eta berak umetatik ezagutzen zuten elkar. Beti jende artean
jotzen zuen bikotea osatzen zuten, koadrilako trikitilariak zirela esango nuke. Ez dut uste sekula
agertoki bat edo kiosko bat zapalduko zutenik. Santa Lutziako erromeriara joten ginen, baina familia
giroan beti, janari poltsak eta umeak zintzilik genituela. Leku horietan, noski, dantzan egiten genuen,
baina modu formalagoan dantzak ikasten Beti Alain hasi nintzen. Eta Txilibrinekin jotak dantzatzea
luxu handi bat izan zen niretzat. Ni baino zaharragoa zen, adin tarte handia genuen. Bera zen taldean
dantzak erakusten zituena. Egia esan, beste hainbat taldetan ere ibiltzen zen dantzak erakusten, garai
horretan talde gehiago sortu baitzituzten Bilboko auzoetan.
-Zergatik aukeratu zintuen dantza bikote bezala?
Nabarmentzen nintzelako izango zen. Jota dantzatzen zuenean hari begira egotea gozamena zen.
Lehiaketa askotara joan nintzen berarekin. Gero gure ama hil zen eta Maite Ugartek ordezkatu
ninduen, Salba Ugarteren alabak. Ez genuen beti jota dantzatzen. Behin Guridiren “Euskal estanpak”
muntatu zuten Ayala antzokian eta gogoan dut emanaldi horretan ere parte hartu nuela.
-Kepak kontatzen du artean umea zela igande arratsalde batean bere aitona eta Salba Ugarte
menditik jaitsi eta auzoko taberna batean sartu zirela. Han trikitixa jotzen hasi zirela eta bera kaletik
egon zela harriturik entzuten.
Eszena hori askotan errepikatzen zen. Igandetan joaten ginen baserri horretatik jaisten ginen edo San
Roke ermitatik eta gure aitak ez zekien panderorik gabe ezer ospatzen. Familiakoak etxera
erretiratzen ginen eta haiek tabernara joaten ziren jotzera. Hori zen ohitura.
-Pedro eta zu ezkondu zinetenean non jarri zineten bizitzen, bere etxean edo zurean?
Nirean, nire aita alargun zegoelako. Oraindik pisua han dugu Errekalden, baina Zeberiora etorri gara
alabarekin bizitzera, Bilbo nekagarria egiten zaigulako.
-Kepak urte batzuk eman zituen Zumaian ere.
Han itsasargiaren ondoan dauden bi txaletak egin zituztenean bera zen enkargatua eta San Juan
iturriaren ondoko etxebizitza batean eman genituen hiru urte. Kepak bi urte eta erdi zituen eta
Mariak sei hilabete. Txalet horiek enpresako nagusientzat ziren, Retolazarentzat bat eta
Asumendirentzat bestea. Bi txaletak bukatu ondoren behean etxebizitzak ere egin zituzten. Txalet
horiek egiteko, dena den, sekulako lanak hartu zituzten. Odisea bat izan zen hura. Obrarako
materialak igotzeko Talaimendiko zelaietatik barrera garraiatu behar izan zituzten. Pena da Pedro
hemen ez egotea. Izugarri gustatzen zaio lan horiei buruz berriketan egitea. Niri Zumaia asko
gustatzen zait. Txortenaren familiaren etxean eman genituen hiru urte horiek eta harreman oso
estua izan genuen. Geroztik askotan itzuli ginen oporretan Zumaiara. Telebistako erreportajeetan
herri hori agertzen denean hunkitu egiten naiz.
-Zenbat seme-alaba dituzue?
Hiru. Kepa da zaharrena, Maria dator ondoren eta Asier da txikiena.
-Gehienetan txikienak ateratzen dira artista.
Mariak ere akordeoi ikasketak egin zituen eta magisterio musikala egin zuen ondoren. Niri izugarri
gustatzen zait musika. Beharbada Kepak entzungo balu, barre egingo luke, baina niri musika asko
gustatzen zait.
-Kepak aitortzen du zuregandik datorkiola zaletasuna. Zuk dantzarekin egin zenuena berak soinu
txikiarekin egin nahi izan zuela esaten duela uste dut.
Hori egia da, halaxe esaten du. Bera autodidakta da trikitixan. Orain eskolak daude, baina orduan ez
zegoen horrelakorik. Etxean sartu, kaseteak hartu eta zatika ikasten zituen. Pieza bat ikasten
zuenean, berak jo eta nik dantza egiten nuen eta ondo zegoen edo ez esaten nion, nolabait esateko,
onespena ematen nion. Ni beti izan naiz dantza asko egitekoa. Kepa trikitixarekin hasi baino lehen
ere nik dantza asko egin nuen. Pedro, berriz, ez da dantzarakoa. Plazan musika zegoenean nik
jertseak berari utzi eta dantzara joaten nintzen, dantzan ari zen jendearen artean sartu eta
edonorekin egiten nuen.
- Peciña izeneko irakasle batengana ere bidali zenuen Kepa akordeoia ikastera.
Zortzi edo 9 urte izango zituen. Bigarren eskuko akordeoi bat erosi genion, txiki bat, ez baitzuen
handiarekin jotzeko indarrik. Solfeoa eta akordeoia ikasten hasi zen. Baina ez zitzaion askorik
gustatzen. Ni bere ondoan esertzen nintzen, presioa egiteko, baina protestatu egiten zuen eta utzi
egingo zuela esaten zuen askotan. Partitura bati begira jotzea ez zaiola inoiz gustatu esango nuke.
Egun batean utzi egingo zuela esan zidan eta sekulako disgustua eman zidan. Irakaslearengana joan
nintzen eta gaitasun handiko mutikoa zela esan zidan eta bere bidea aurkituko zuela, lasai egoteko.
Institutuan oso nota onak ateratzen zituen, matrikulak ere bai.
-Nolakoa da Kepa? Egoskorra al da, borondate handikoa?
Ez dakit nolakoa den. Gauza batzuetan asko nabarmentzen zuela gogoratzen dut Indautxuko eskolan,
esate baterako, bazituen irakasle batzuk zoriontzen zutenak, erredakzioan esate baterako hamarreko
nota ateratzen zuelako.
-Kepa trikitixaren moldeak apurtzen hasi zenean, zer iruditu zitzaizun zuri?
Ikasketetan oso nota onak ateratzen zituenez, nik musika ikasketa akademikoak egitea nahi nuen.
Behin, dentistarengana eraman nuen batean, nire kezkak kontatuko nizkion eta gogoan dut lasai
egoteko esan zidala, trikitixa horrenbeste gustatzen bazitzaion eta horrekin zoriontsu bazen, horrekin
dirua irabazten asmatuko zuela. Izugarria da zenbat ordu igarotzen zituen etxean kaseteak jarri eta
kendu. Ez da sinestekoa. Gogoan dut egun batean Salba gure etxean zegoela eta Kepari jotzen entzun
zionean esan zuela: kopiatu egin dit. Salbak oso pieza gutxi jotzen zituen, baina indar izugarriarekin
jotzen zituen eta oso hots berezia ateratzen zion soinu txikiari. Oso azkar ohartu nintzen Kepak bere
bidea egingo zuela. Lehiaketetara joan aurretik ikusten zen hori eta hasi eta gero askoz ere
nabarmenago.
-Zuk bere piezekin dantza egiten zenuen. Kepak dio bere pieza trikitixa zirela bazekiela, zuk haiekin
dantza egiteko gai zinelako.
Hori horrela da. Orain 82 urte ditut eta dantza egiteari utzita nago, baina lehen semearen piezekin
ere dantzan egindakoa naiz. Gertatzen dena zera da, trikitixari sekulako astindua eman ziola. Badira
egin dituen pieza batzuk oso-oso gustukoak ditudanak. Horietako bat da “Uriondo”, egunak emango
nituzke entzuten bat ere aspertu gabe. Kepa Perez Urraza suhiak dio Uriondo Zeberio inguruko leku
bat dela eta hortik datorrela gure abizena.
-Eta beste biak, alaba eta semea?
Mariak musika ikasketak egin zituen, Psikologia ikasi zuen gero eta irakasle ikasketak ondoren. Urteak
eman ditu eskoletan musika irakasten, baina oso lan gogorra zela esaten zuen eta utzi egin zuen. Nik
musika ikastera behartu ditut hiruak. Diogun animatu egin ditudala. Baina txikienarekin ezin izan dut.
Irakasle ezberdinekin saiatu nintzen, baina alferrik izan zen. Asier ingeniari teknikoa da ikasketaz eta
horretan egiten du lan. Beste modu batera esateko, uste dut neuri gustatuko izango zitzaidala musika
ikasketak egitea eta, ezin izan nuenez, seme-alabekin saiatu naizela.
IZEN HANDIAK
ZUMARRAGAKO TRIKITIXA
Gauza askotan izan zen aitzindaria Zumarragako Trikitixa. Trikitixa baserri girotik kalera jaitsi zutenak
izan zirela esan ohi da, diskoa grabatu zuten lehenak eta gerra aurretik zetorren modari jarraiki
kopletan gaztelera erabiltzen hasi izana leporatzen zaie. Joxe Oriaren ama ere pandero-jotzailea zen.
Frantziska Antonio Irizar Zumarragako Olarte baserrikoa zen. Antxiñe Mendizabalek bere
“Zumarragako Trikitixa” liburuan jaso zuenez, baserriko zenbait lan egiteko emakumeak auzolanean
biltzen zirenean bera omen zen giroa jartzen zuena. Atsedenaldietan Frantziska Antoniak panderoa jo
eta kantatu eta beste emakumeek dantzan egiten zuten.
Semeak, Joxe Oriak, amaren zaletasuna heredatu zuen. 1920ko kronika batean Kanpazarrekin
bikotea osatuz agertzen da eta ondoko urteetan beste hainbat trikitilarirekin. 1924an grabatu zen
trikitixaren historiako lehen diskoan bere izena agertzen da Etxesakorta trikitilariari laguntzen.
Horrela jaio zen Zumarragako Trikitixa.
Zumarragako Elizkalen bazegoen taberna bat igande goizetan, aurrez aurre zegoen parrokiako
sermoiak irauten zuen bitartean eliztarrez betetzen zena eta berriro organoa jotzen hasten zenean
denak korrika joaten omen ziren elizara. Taberna horretan zuen bere egoitza Zumarragako Trikitixak.
Gainean bizi ziren oriatarrak eta Joxeren amak ohetik jarraitzen zituen semeak panderoarekin egiten
zituen aurrerapenak, erromeria batetik itzuli eta egunari amaiera emateko hor sartzeko ohitura
baitzuen. Joxe Oria izen baten jabe egin zen. Garaiko kronistek (Antxiñe Mendizabalek lekuko batzuk
bildu ditu) animatzaile peto-petoa zela nabarmentzen dute eta sekulako pikardia zuela ere bai.
“Ayer me dijiste que hoy/ hoy me dirás que mañana/ y mañana me dirás/ que de lo dicho no hay
nada”, zioen gazteleraz kantatzen zuen kopla batean. Gaztelerazko beste adibide bat: “Dicen que
casar/ yo también me casaría/ si la vida del casado/ fuera como el primer día”. Eta hirugarren bat:
“Debajo del delantal/ tienes el txitxilimurdi/ y un poco más abajo/ qui tolis pecata mundi”.
Etxesakortak 23 zituenean Euskal Herria utzi eta erbestera joan behar izan zuen, “aipatu ezin diren
arrazoiak tarteko”, kronikaren batek dioen bezala. Antza denez, neska bat haurdun utzi zuen eta
garaiko gizarte itxiak biei ezarri zien zigorra. Zumarragako taberna batean egin zioten trikitilariari
agurra eta Joxe Oriak beste trikitilari batzuekin jarraitu zuen panderoa jotzen eta koplak kantatzen,
Errostarekin, Gorrizekin edo Karlos Egigurenekin.
Hurrengo trikitilari horietako batek ere arazoak izan zituen. Felipe Mondragon “Errosta” legazpiarra
zen eta Patricio Echeverrian egiten zuen lan. Nagusiak oso garbi esan zion aukeratu egin behar zuela,
edo lana edo trikitixa. Soinu txikiarekin zituen konpromisoak alde batera utzi eta lanean finago hasi
behar izan zuen.
Joxe Oriari aitortu behar zaio bera izan zela lehena trikitilari batekin bikote egonkorrak osatzen.
Aurretik kantatu eta panderoa joz erromeria egiten zuten emakume pandero-jotzaileak zeuden edo
trikitixa bakarrik jotzen zutenak. Baina bikote bezala modu egonkorrean lanean hasi zirenak
Zumarragako Trikitixakoak izan ziren. Eta ondoko urteetan ere Sakabi etorri arte itxoin beharko da
panderoaren eta soinu txikiaren arteko lotura hori sendotzeko.
Gerra aurretik hiru disko zituen grabaturik Joxe Oriak, Etxesakortarekin bat, esan dugun bezala,
Errostarekin bigarrena eta Egigurenekin hirugarrena. Garai horretakoak dira ondoko kopla ezagun
hauek: “Al entrar en Zumarraga/ ha nacido una laguna/ donde se bañan las guapas/ porque fea no
hay ninguna”.
Joxe Oria abertzalea zen eta nabari egiten zitzaion jarrera hori bere diskoetako kopla batzuetan. Bere
hirugarren diskoan, Egigurenekin batean grabatu zuenean, arazoak izan zituen zentsurarekin. Gerra
garaian Amayur batailoiko kide izan zen.
Aipatu ditugunez gainera, Elorrioko Benigno Berezibar “Kanpazar”ekin jo zuen panderoa, Azkoitiko
Kandiko Beristainekin, Antzuzolako Alejandro Telleria “Gorriz”ekin eta herri bereko Joxemiel
Ormazabalekin.
Azken honekin izan zuen harremana oso garrantzitsua izan zen, belaunaldi berriarekiko lotura egin
baituen Zumarragako Trikitixak berari esker. Trikitilari hau izan zen Joxe Oriaren ilobari, Joxe
Urteagari, soinu txikia jotzen erakutsi ziona eta Urteaga ezinbesteko figura izan zen ondorengo
urteetan. Joxe Oria 1940an hil zen, baina hil aurretik bere iloba oholtzaren gainean jotzen ikusteko
zoria izan zuen. Hamar urte geroago Urtega familiako lau anaiek Zumarragako Trikitixa birsortu eta
urrezko arora eraman zuten. 1957an Columbiarekin grabatu zuten berriro. Disko horretan sartu
zituzten Eusebio tabernako alabari eskainitako kopla famatuak: “Kalebarrendik hasita/ Elizkaleraino/
ez dago neska politagorik/ Eusebioren alaba baino”, zioena esaterako. Diskoa kaleratu zenerako
Eusebioren alaba, Gurutze, ezkonduta zegoen eta senarrak afari batera gonbidatu zituen trikitilari
taldekoak.
Gerra ondoko urteak ziren eta Guardia Zibila beti gainean zuten. Taberna batean jotzen zutenean
norbait atean uzten zuten begirale eta hark abisu ematen zien noiz zetozen. Kizkitzako erromerian
pasadobleak jotzera behartu zituen Benemeritak.
Antxiñe Mendizabalek gisa horretako hainbat gertakari bildu ditu bere liburuan. Orduak ematen
zituzten gelditu gabe jotzen eta inoiz edo behin Joxe Urteagari laguntza ematen zioten jotzeari utzi
gabe pixa egin zezan.
Joxe Urteagaren irakasle izandako trikitilaria ere, Josemiel Ormazabal, pertsonaia famatua izan zen
herrian. Isabel jatetxearen eta Golden dantzalekuaren jabea zen. Diskoteka horretara jotzera joten
ziren orkestrek biribilketarekin bukatu behar izaten zituzten beren emanaldiak. 1959an anaietako
batek, Inaxiok, taldea utzi zuenean, Joxemiel Ormazabal Zumarragako Trikitixan sartu zen.
SAKABI, HANDIENETAKO BAT
Faustino Azpiazuri bere izen artistiskoa jaio zen baserritik datorkio, beste askori bezalaxe. Sakabi
baserria Izarraizko maldaren kontra ezkutaturik dago, gaur Aittola Berri jatetxea dagoen lekutik
gertu, Madariagatik Lasturrera doan errepidearen inguruan. Eskualdean izen handia zuen petrikilo
baten seme gazteena zen. Hain zen famatua non Azkoitiko sendagile bat (Artzuaga) beregana joan
baitzen bere semeetako bat gaixorik jarri zenean, nahiz eta aurretik bere kontra salaketak jarria zen.
Salaketa horien erruz kartzela ere ezagutua omen zen.
Faustino Azpiazu “Sakabi” 1916an jaio zen. Hamar urte zituela aitarekin joan zen Pentekoste egunez
Izarraitzen egiten zen erromeriara eta txundituta geratu zen soinu txikiaren hotsarekin. Bere osaba
Anton Baltzolarekin ikasi zituen lehen notak eta Madarixa Txikiarekin (Jose Manuel Aranbarri) jarraitu
zuen. Igande goizetan zazpietako mezatara joaten zen Madariaga auzora eta ondoren trikitilariak
bere etxean ematen zion eskola. Madarixa Txikiak auzo horretan jotzen zuen igande arratsaldetako
erromerian. Trikitilari hori izan zen Faustinoren aitari Elgeta gomendatu ziona. Sakabik 16 urte
bakarrik zituen baina dagoeneko ikusia zuen Elgeta urte zaharretan Elgoibarren jotzen eta liluratuta
utzi zuen. Elgeta, ordea, Eibarren bizi zen eta bidaia odisea txiki bat zen: ordu eta erdiko bidea
baserritik Azkarate gainera. Azkoititik 8etan abiatzen zen autobusa hartzen zuen han eta han joaten
zen Elgoibarreraino ea handik trenez egiten zuen Eibar artekoa. Elgetak eskola bikoitza ematen zion,
bazkal aurretik bata eta ondoren bestea. Arratsaldeko seietan hartzen zuen itzulerako trena Elgoibar
aldera, baina hemen autobusik ez zuenez, oinez egin behar izaten zituen Azkarate gainera dauden
zortzi kilometroak eta ondoren oinez jarraitzen zuen beste ordu eta erdiko bidea Sakabiraino.
Dozena bat aldiz bakarrik egin zuen joan-etorri hau, gerra etorri baitzen eta gerrak eten baitzuen
irakaslearen eta ikaslearen arteko harremana. Elgeta boluntario joan zen frentera Francoren kontra
borroka egiteko eta ikaslea berriz, 20 urte bakarrik zituenez, baserrian geratu zen eta soldadutzara
deitu zioten. Extremaduran eta Madrilen egin zuen gerra, bitan zauritu zuten eta horietako batean
etxetik eramandako trikitixa galdu zuen. Bando aurkarietan egin zuten gerra, baina ez ziren luzaz
egon elkartu gabe, 1940an berriro soinua erakusten hasi baitzitzaion Elgeta Sakabiri. Oraingo
honetan Elgeta bera izan zen ikasleari etxera joan zitzaiona. Sakabin egin zuen egonaldia izango zen
seguru asko Elgetak gerra ondoren baserriz baserri egin zuen ibilbide luzearen lehen etapa. Elgeta
dozena bat ikasle izatera iritsi zen, baina Sakabi izan zuen kutunena.
Sakabik Egañazpi pandero-jotzailearekin (Jose Mari Urbieta) osatu zuen bikotea. Bikote egonkorra
izan zen, 30 urte iraun baitzuen. Esklusibotasun kontratu bat izan zutela esan daiteke. Urte askotan
Egañazpiren Lanbrettaren gainean joten ziren erromerietara. Egañazpik Zestoako Egiguren
tornutegian egiten zuen lan. Erromerietan galdutako orduak berreskuratu behar izaten zituen eta,
kontatzen zuenez, izan zituen 16 ordu lan egindako egunak ere.
1957an ezagutu zuen Sakabik Laja Izarraizko maldan egiten zen Korostiteko erromerian. Hamahiru
urte bakarrik zituen Lajak, baina soinua jotzen nabarmendu egiten omen zen. Iñigo Aranberrik
“Sakabi. Soinu txikiaren handitasuna” liburuan kontatzen duenez, Sakabik Elgetari zera esan omen
zion: “Hobe diagu erretiratu. Mutiko hau ikusgarria zetorrek”. Urte batzuk geroago elkarrekin
askotan joko zuten.
Sakabik obsesioa zuen musikarekin. Larri baina solfeoa ikastera iritsi zen. Jose Mari Altuna “Puccini”
Azpeitiko bandako zuzendariarekin ikasten aritu zen. Lajak ere irakasle bera aukeratu zuen. Biek
sekulako ahalegina egin zuten soinu txikia duinago egiteko.
Sakabik jotzen zituen erromeriak izendatuz Gipuzkoako mapa zirriborra daiteke: Madariaga,
Martirieta, Komunsoro, Zurruntzola, Errezil, Bidania, Goiaz, Santa Engrazia, Erdoizta, Iturriotz, Aia San
Pedro, Urteta, Laurkain, Orio, Aginaga, Usurbil… . Bere estiloa dotorea zen, landua, oso teknikoa.
Aipatu ditugun erromeria horietako askotan goizetik hasten zen jotzen eta gauean edo goizaldean
bukatzen zuen.
1970ean Sakabik eta Egañazpik irabazi zuten Trikitilarien Lehen Txapelketa, gerra aurretik txapelketa
batzuk egin baziren ere. Irailaren 13an izan zen finala, arratsaldeko seietan. “Ez dago sarrerarik”
kartela jarri zuten. Bi mila lagun bildu ziren Donostian. Horietako gehienak Urola bailarakoak ziren,
sei bikote iritsi baitziren azken saiora eta guztiak bailara horretakoak baitziren: Zendoia anaiak,
Egurrola anaiak, Epelde anaiak, Illaramendi eta Imanol Iturbide, Laja eta Berastegi eta Sakabi eta
Egañazpi. Azken hauek eraman zuten txapela, baina soinu-jotzaile onenaren saria Lajak. Garaiko
egunkariek boikota egin zioten txapelketari.
Hurrengo urtean bigarren txapelketa jokatu zen eta Sakabik nahiago izan zuen ez parte hartzea. 60
urterekin erretiratu zen. Arazoak zituen erreumarekin. Plazak utzi aurretik “Sakabi-Egañazpi
trikitilariak” diskoa grabatu zuten.
Sakabik arrastoa utzi zuen bere ikasleengan. Horien artean nabarmentzekoa da Imuntzo (Juan Ramon
Azpitarte). Bere jotzeko modua, Sakabiren estiloa alegia, Elgetak markatu omen zuen. Baina bada
pasadizo bat 50eko hamarkadakoa askotan aipatzen dena: lehiaketa bat antolatu omen zuten.
Sakabik ez zuen gogorik izena emateko. Bere maisuak, Elgetak, eman zion izena eta Elgetaren
aurretik geratu zen.
GELATXOTARRAK, AITA-SEMEAK
Manuel Sodupe “Gelatxo Zaharra” (1888) izan zen gaurdaino iraun duen leinua inauguratu zuena.
Bere emazte Juliana Esnaola panderoarekin zuela Bizkaia eta Gipuzkoako erromeria gehienetan jo
zuen eta, askoren ustetan, gerra aurreko trikitilari onena izan zen, bai jotzeko zuen maisutasun
teknikoarengatik eta baita pieza berriak sortzeko zuen adurragatik, garai hartan trikitilari gehienak
oso errepertorio urriarekin ibiltzen baitziren. Gaur egun ere haren piezak jotzen jarraitzen dute
trikitilariak.
Gelatxo Zaharrak errepertorio propioa sortu zuen eta artista familia bat osatu zuen. Haren hiru
semeak, Lorentzo, Jose eta Pedro, trikitilariak eta dantzariak izan ziren. Ezagunena Pedro (1928) da,
“Gelatxo Gaztea”. Soinu handia jo zuen, baina soinu txikirako ere balio zuten piezak sortu zituen. 56
urtetan zehar Euskal Herria zeharkatu du eta horietatik 50 banda baten laguntzarekin. Banda mota
hori izendatzeko “jazzbana” hitza erabili zuten, perkusioko instrumentuaren markagatik. Bateria,
saxoa eta soinu handiak osatzen zuten.
Instrumentu horien garraioak ematen zien burukominik. Batzuetan aldez aurretik fakturatu eta
trenez bidaltzen zituzten jo behar zuten lekura, baina beste askotan astoaren gainean jarri eta iristen
ziren helmugara.
Manuel Soduperen (Gelatxo Zaharra) hiru alabak dantzari onak ziren eta lehiaketetan parte hartzen
zuten. 1953an hil zen. Elgoibarko San Lorentzo auzoan dago haren jaiotetxea, Agarre baserria.
Argazki bat atera nahi ziotela eta atarira eraman zuten. Argazkiak atera eta biribilketa bat joz zihoan
etxera. Gaizki sentitu zen eta handik gutxira hil zen. Hamarkada batean zehar Elgetarekin eta Sakabi
artean gaztearekin batean trikitixaren historiako hirukote maitatuena osatu zuen.
MALTZETA, PROFESIONAL BAT
Trikitixak izan duen lehen profesionaletako bat izan zen, soinu txikia jo eta erakustetik bizi izan
baitzen. Azkoitiko Forjas Juaristiko langilea izan zen eta langile baten ordutegia eta trikitilari batena
elkartzen saiatu zen urteetan, baina luzarora ezinezkoa zela ikusi zuen. Lana utzi eta hogei bat urtez
gutxienez soinutik bizitzea lortu zuen. Gipuzkoan erromeriek ezagutu zuten garairik oparoena bizi
izan zuen, 50 eta 60ko hamarkadak alegia. Trikitilarien rankig-ean lehen postuetan egon zen
Sakabirekin batean Laja agertu zen arte. 1966an ezkondu eta berriro fabrikan lanean hastea erabaki
zuen, Azkoitiko Zubillaga Fundizioak enpresan oraingoan. Baina istripu larri bat izan zuen eta lana
utzi behar izan zuen.
Urte askoan Azkoitiko Altzibar auzoan bizi izan zen, Landakanda baserritik edo Zabaletik gertu.
Umansoro edo Imuntzo baserria ere ez zuen urruti. Zirkulu hori pixka bat gehiago zabalduz gero, izen
ezagun gehiago agertuko lirateke, Zendoia, Epelde, Izer edo Zabaleta. Trikitixaren historian eman den
trikitilari eta pandero-jotzaile pilaketa handienaz ari gara hitz egiten.
Juan Luis Zabala kazetari eta idazleak “Maltzeta, soinu bete bihotz” liburuan kontatzen duenez, bere
anaia Justo eta alaba txikia Mamen lagun hartuta askotan igotzen zela jaiotetxera, Maltzeta Etxetxo
baserrira, bere Renault 4 zaharrean eta, baserria erorita zegoenez, horma eroriei begira jarri eta
“Hamabost hamasei urte” pieza jotzen zuela. Bistan denez, nostalgia ariketa bat zen hori.
Juanito Garate “Maltzeta” Azkoitiko Urrategi auzoko baserri horretan jaio zen 1924an. Inguruan ditu
Goenatxo, Euzkitze eta Uitte baserriak. Azken baserri honetatik trikitilari ezagunak atera dira,
Euzkitze ezaguna da Xabier Perez “Euzkitze”ren amaren aita bertakoa zelako eta Goenatxo ere askok
ezagutuko dute Juan Jose Unanue harri-jasotzailea bertakoa delako.
Maltzeta sorginkeriaz betetako baserria da. Aurreko bi belaunaldik dultzaina jotzen zuten.
Trikitilariak berak kontatzen zuenez, aitak kutxa batean musika instrumentu ezberdinak gordetzen
zituen, biolina, gitarra eta flauta batzuk ere bai tartean, panderoekin eta dultzainekin batean noski.
Kutxa horretan ez omen zuten egundo trikitixarik ikusi, nahiz eta aitak behin eta berriz gaztetan
dultzaina jotzen hasi aurretik soinu txikia jotzen zuela aitortu. Semeak gogoratzen zuenez, igandetan
mezatatik etxera itzuli, salda beroa baso bat ardorekin hartu eta bere gelako balkoian esertzen zen
aurrean zituen mendiei begira eta samurtasun handiz jotzen omen zuen. Etxean aitari entzundako
pieza batzuk berak soinu txikiarekin jotzen zituen eta 1981ean, 60 urte zituela, grabatu zuen bere
lehen diskoan haren biribilketa bat sartu zuen.
Juan Mari Beltranek lau dultzaina-jotzaile aurkitu zituen Maltzeta Etxetxo goitizena zeramatenak.
Trikitilariaren hiru osabek ezteietan jotzen zuten dultzaina talde egonkor bat osatu zuten. Koadroa
osatzeko, aitonaren anaia bat, Lorentzo Garate, bertsolaria izan zen.
Gaztetan Gelatxo Zaharrari (Manuel) zion mirespenak suspertu zuen bere bokazioa. Inguruko
erromerietan jotzen zuen eta etxe inguruan egiten zuten ikatza salduz irabazitako diruarekin erosi
zuen beren lehen soinu txikia. Erostera joan zenean Madarixa Txikia trikitilariak lagundu zion.
Larrinaga-Guerrini fabrikatik ekarri zuen etxera lehen soinua eta Madarixa Txikia hasi zitzaion
erakusten. Madarixa Txikia Azkoitian bizi zen. Igandetan Maltzetaraino igotzen zen eta han izaten
zuen zain Juanito eta baita gerora trikitilari izango zen Eugenio Alberdi “Zabaleta” ere. Biak, Maltzeta
eta Zabaleta 18 urterako hasi ziren jendaurrean jotzen inguruko erromerietan, Irukurutzetan, Pol-
Polen, Elosuan, Zarguaten, Urrategin edo Aizpurutxon.
Juanito Garate “Maltzeta”k soldadutza egitera joan eta Orioko trikitilari gazte bat ezagutu zuen
Elgetarekin ikasitakoa. Etxera itzuli zenean haren bidez egin zuen Elgetaren ezaupidea eta maisuak
bost aste pasatu zituen Maltzeta Etxetxon.
Maltzetak ere erromerien garairik onena ezagutu zuen, 50 eta 60ko hamarkadetakoa. Urrezko garai
hori dantzalekuak irekitzen hasi zirenean hasi zen moteltzen. Errezilen, esate baterako, lau erromeria
egiten ziren igandero: herriko plazan, Benta Berrin, Zurruntzolan eta Leten. Aian beste lau egiten
ziren: Urdanetan, Altzolan, Aia Behean eta San Pedron. Elosuan, Irukurutzetan, Gorlan edo Oletan
erromeriak egiten ziren. Aipatu ditugun leku hauetako batzuetan urteko festa nagusiak egiten
zirenean trikitilariak egunak egin behar izaten zituen bertan. Altzolan, esate baterako, zazpi eguneko
egonaldia egiten zuen Maltzetak. Leku horietako askotan urtero trikitilari bera eramaten zuen.
Maltzetak, esate baterako, 35 urte jarraian jo zuen Zumarragako Agiñetan.
50eko hamarkadara arte pandero-jotzailerik gabe ibiltzen ziren. Gerora Izer, Landakanda, Iturbide,
Bidani, Egañazpi, Egurrola edo bere alaba Mamenek lagunduta ibili zen. Bere alaba jotzen hasi
zenean sekulako jakin-mina piztu zuen, “hanka eta buru” jotzen zuelako. Horrela jo zuen nonbait
1980ko txapelketaren finalean. Joseba Tapia joan omen zitzaion ea bere alabak lagunduko zion
panderoarekin txapelketa horretan eta Maltzetak oraindik gazteegia zela erantzun omen zion, baina
hobeto pentsatzen jarrita, Josebarentzat ona bazen berarentzat ere ona izango zela eta horrela
erabaki omen zuen alabarekin ateratzea.
Badago garaiko gobernadore zibilarekin lotutako pasadizo bat ere. Pedro Manuel Aristegi Irunen
jaiotako UCDko militantea zen. Inaugurazio ekitaldiren batean Mamen panderoarekin ikusi eta
liluratuta geratu zen nonbait. Mirespen gutunak bidali zituen, diskoak bidali zizkion opari eta
telefonoz berarekin hitz egitera iritsi zen. Bere senargaia soldadutzatik libratuko zuela agindu zion,
baina Iraken enbaxadore zela atentatu batean hil zuten.
Hamasei urte arte aitarekin jotzen jarraitu zuen Mamenek eta trikitilariak grabatu zituen hiru
diskoetan agertzen da bere izena. Horietako bat IZn grabatsa da eta beste biak Elkarren.
1983an Azkoitia utzi eta Hondarribira joan ziren bizitzera eta han trikitixa eskola bat zabaldu zuen
Mamenek. Aitak klase batzuk eman zituen eskola horretan. Eskola horretako ikasle ospetsuen artean
Amets Arzallus bertsolaria ageri da, bere arreba Itsaso trikitixa ikasten ibili zenean panderoarekin
laguntzen baitzion.
Maltzeta 2006an hil zen 82 urte zituenean.
AUNTXAREN IBILERAK
Antonio Aranaga “Auntxa” Urrestillako Kalebarren kalean jaio zen 1910ean. Bere belaunaldian
trikitilari gutxi dira kalean jaiotakoak eta horietako bat da Auntxa. Gerra ondoan erretegi bat jarri
zuen eta bere semeek daramaten haren martxa gaur egun. Goitizena aitonarengandik datorkio.
Apustu bat egin omen zuen tabernatan lehen ziren mostradore altu horietako batera jauzi batekin
baietz igo eta bi aldiz igo omen zen.
Antonio Aranaga “Auntxa”k Azpeitiko Guibert-en erosi zuen bere lehen soinu txikia 8 ogerlekotan.
Erosi aurretik, ordea, tarte luzeak egiten omen zituen erakusleihoan zegoen instrumentuari begira.
Bere kontura hasi zen ikasten, baina ez zuela behar adina aurreratzen ikusita, Azkoitiko Kandido
Beristainengana jo zuen, gerra aurreko trikitilaririk handienetako batengana. Kandidok hiru aldiz
irabazia zuen Euskal Jaietako lehen saria, 33an Donostiakoa, 34an Errenteriakoa eta 35ean
Bergarakoa. Kandido Beristainek hiruzpalau instrumentu jotzen zituen herriko bandan eta solfeoa
zekien. Sei hilabete eman zituen Auntxa gazteak berarekin eta Zestoako Antton Baltzolaren ikaslea
izan zen ondoren eta Elgetarekin ikasi zuen azkenik. Klaseak aurrez aurre ematen ziren orduan
ikaslearen etxean gehienetan gela itxi batean sartuta eta orduak iraun zezaketen. Auntxak
gramofono bat ere erosi zuen eta han entzuten zituen garaiko disko bakanak. Etxesakortaren,
Gelatxoren edo Kanpazarren piezak ziren. Pieza horiek buruz ikasten zituen, baina bere kabuz
asmatutako batzuk tartekatzen hasi zen.
1941ean igorlerik gabeko gutun bat jaso zuen amak semearen jokabidearen ardura berari egotziz.
Joxe Mari Iriondori Auntxak kontatu zionez, etxera itzuli zen batean ama negarrez aurkitu zuen eta
trikitixa uzteko eskatu zion, arimak gehiago balio zuelako soinu txikiarekin irabazten zuen diruak
baino. Landetako erromeriak ezagutu zuen arrakastaren ondorioz idatziko zioten gutuna amari.
Inazio Bereziartuak taberna bat zuen Azpeitiko Landeta auzoan eta tabernaren kontra zuen zelaian
erromeria bat antolatzeko proposamena egin zion trikitilariari eta biltzen zen dirua berarentzat
izango zela agindu zion. Auntxari oso eskura zetorkion Landeta, Urrestillatik gertu dagoelako eta
baietza eman zion.
Arratsaldeko lauetan hasten zen erromeria eta afal ordura arte irauten zuen eta ordu horretan
trikitilaria taberna barrura joaten zen jotzen jarraitzeko. Gazte jende izugarria hasi zen biltzen
taberna ondoko zelai horretan. Sei edo zazpi igandetan egin zen erromeria, amari gutuna iritsi
zitzaion arte. Amaren erreguei jaramon egin eta utzi egin zion Landetan jotzeari eta bertan behera
geratu zen erromeria hori. Gutunak lortu egin zuen bere helburua.
Baina ordurako Auntxak izen bat zuen eta beste hainbat erromeriatatik eta ezkontza-despedidetatik
deitzen jarraitu zioten. Hamahiru urterekin Zestoako bainuetxean jotzen jarduna zen, udaldia
bukatzean San Migeletan udatiarrentzat egiten zituzten gala handietako batean. Udatiarrek eman
zizkizoten txanponek halako poza eman zioten, non etxera iritsi eta ama esnatu baitzuen erakusteko.
Hamalau urtetik aurrera inguruetako baserrietan egiten ziren ezkontza-despedidetan jotzera
eramaten zuten. Festa horiek baserriko ganbaran egiten ziren eta ehun bat lagun bildu ohi ziren
bizpahiru egun elkarrekin emateko. Diruarekin ordaintzen zioten, baina batzuetan generoa ere
ematen zioten. Baserriko ogia, babarrunak, arrautzak edo oilaskoren batekin itzultzen zen etxera eta
hori eskertu egiten zen gerra ondoko gose urte haietan.
50ko hamarkadatik aurrera galtzen joan ziren ezkontza-despedidak eta trikitilari baten presentzia
eskatzen zuten eztei tradizionalak, baina erromeriek puri-purian jarraitzen zuten. Urrestilla, Oñatz,
Nuarbe, Aratz-erreka, Arriaran, Matxinbenta, Ezkio, Urki, Santamaña, Kizkitza, Beizama, Bidania,
Goiatz, Errezil, Iturriotz, Zurruntzola, Benta Berri, Etumeta, Erdoizta, Elosiaga, Putzumenta, Pagotxeta
eta beste hainbat erromerietan jotzen zuen Auntxak. Nafarroan eta Iparraldean ere hitzordu jakinak
zituen.
Dena den, garai hartako ibilerek ez dute gaurkoen antzik bat ere. Iturriotzen esate baterako, San Jose
eguneko erromeriaz gainera bertako gazteek urtean sei bat aldiz zikiro-jana antolatzen zuten.
Iturriotzera joateko, ordea, balentria izugarriak egin behar izaten zituen. Urrestillatik Errezilera
bizikletaz joaten zen. Han zazpietako meza entzun eta oinez igotzen zen Zelatunera eta handik egiten
zuen Iturriotzerainoko bidea. Bi ordu eta erdiko bidea egiten zuen soinu txikia bizkarrean zuela. Joxe
Mari Iriondori (“Urrestilako trikitixa” libururako) egindako adierazpenen arabera, erromeria egun
batean fabrikan baino hiru aldiz gehiago irabazten zuen. Zelatungo erromeria batean hiru mila pezeta
garbi gelditu zitzaizkion, pandero-jotzailearekini eta kobratzaileekin kontuak egin eta gero. Bazeuden
erromeria bereziak ere, Zumarragan Santa Luzia egunean egiten zena esate baterako. Urte askoan
Elgeta, Sakabi eta Auntxa, gerra ondoko hiru trikitilari handienak, bildu ziren herriko plazan egun
horretako erromeria egiteko. Goizean, arratsaldean eta gauean jotzen zuten bi egunetan. Auntxak
esan ohi zuen hiru ordu segidan jotzeko gai zirela piezarik errepikatu gabe. Baina ez zuten
errepertorioa inprobisatzen. Hilabete aurretik Auntxaren erretegian bildu ohi ziren emanaldia
prestatzeko. Plaza horretan bertan beste izkina batean akordeoilari bat izaten zen jotzen, baina hark
apenas jenderik biltzen zuen.
Zumarragako Trikitixa eta Urrestillako Trikitixa (Auntxa eta Iturbide) dira Iparraldean plazak jakinak
izan zituzten lehenak. Meritu hori ezin zaie ukatu. Hogeita hamar urtez joan zen Auntxa Hazparne,
Baiona, Ezpeleta edo Donibane Garaziko festetan jotzera. Behin batean Baionako Euskal Jaietan auto
desestali bat jarri zioten antolatzaileek hiriburuko kaleak zeharkatzeko. Auntxak bere ibilbide luzean
ezagutu zuen glamour handiko emanaldi bakarra izan zela esan daiteke.
Nafarroako hainbat herritan ere urtez urte jotakoa zen Auntxa. Iruñean, Leitzan, Lesakan, Bakaikoan,
Elizondon, Lizarran edo Kortesen jo ohi zuen. Gehienetan motoan egiten zuen bidaia. Iruñera, esate
baterako, 40 urte jarraian joan zen koadrilarekin. Urtean zehar dirua gordetzen omen zuten
sanferminak behar bezala ospatzeko. Entzierro batean zezenak behinola eman zion sustoa aipatu ohi
zuen.
Beste trikitilari askok ez bezala, ez zuen nahi izan bere seme-alabek soinuaren bidea har zezaten.
Etxetik kanpo egunak igarotzea oso gogorra zela esan ohi zien, ia lo egin gabe ibiltzen baitziren eta
etxera iritsitakoak lanera fabrikara joan behar. Azpeitiko Agirre Anaien mueble fabrikan lan egiten
zuen. Joxe Mari Iriondori aitortu zuenez, 1950ean bi lanen kontabilitatea eraman zuen eta
trikitixarekin gehiago irabazi zuen fabrikan lan eginda baino. Etxeko erretegiak ere gero eta lan
gehiago ematen zion, ordea, eta fabrika utzi egin behar izan zuen eta baita trikitixa ere bolada luze
batan. Hogei urte eman zituen trikitixa utzita. Semeak nagusitu ahala, hauen eskuetan uzten hasi zen
jatetxearen kudeaketa eta ekin zion berriro jotzeari.
Iturbiderekin batean LP bat grabatu zuen IZ etxean 1975ean eta beste hainbatetan kolaboratu zuen,
Erde Records etxe alemanak 1991ean atera zuen diskoan, horietan artean.
Kepa Junkerak tarteka bisitak egiten zizkion, soinu txikia ikasten ari ziren beste ikasle hainbatek
bezalaxe, eta trikitilari beteranoak bere diskoetako batean parte hartu zuen.
Mendizale porrokatua zen. Azpeitiko Lagun Onak taldeak antolatzen zituen 12 orduko ibilaldi
neurtuetan hartzen zuen parte. Auntxak 71 urterekin bukatu zuen ibilaldi horietako bat. Azpeititik
ateratzen ziren, Izarraitzera igo eta handik Lasaora jaisten ziren, Aizarnara igo, handik Etumetara
joan, Erniora igo eta Urrakitik bueltan itzultzen ziren Azpeitira. Azken urteetan Urrestillatik
Donostiarako bidea ere bost bat aldiz egina zen.
Gerra ondoan herriko erreketeek trikitixa bahitu zioten eta soinu txiki hori galdutzat eman zuen urte
askoan. Errekete horietako batek, ordea, egindakoarekin damututa beharbada, gutuna idatzi zion
soinua Madrilen zegoela esanez. Auntxak ez zion jaramonik egin, baina handik hilabete batzuetara
fardela jaso zuten etxean barruan soinu txikia zuela. Bilboko Zengotitan erositako soinua zen.
Auntxak eskertu egin nahi izan zion bidaltzaileari egindakoa eta hamaiketakoa eskaini zion etxeko
erretegian. Soinu horren ezbeharrak, hala ere, ez ziren horrenbestez bukatu, semeak Bartzelonara
egin zuen bidaia batean autotik lapurtu baitzioten.
Auntxa 2001eko Santa Lutzia egunean hil zen. Bere semeek Jose Mari Iriondori (“Urrestillako
trikitixa” libururako) kontatu ziotenez, azken uneetan ere behatzak atsedenik gabe mugitzen zituen,
Zumarragako erromeriak gogoratzen ari balitz bezala.
LAJAREN TXAPELAK
Iñaki Garmendia “Laja”ren kasuak badu antzekotasunik Andoni Egaña bertsolariarenarekin, biek
txapelak pilatuz joan baitziren txapelketaz txapelketa, gehiago ez aurkeztea erabaki zuten arte. Gaiaz
galdetu eta zalantzak ditu Iñaki Garmendia “Laja”k, kontuak ateratzen saiatzen da eta ez daki seguru
zortzi edo bederatzi izan ziren Donostiako finaletan ateratakoak.
Laja soinu-jotzaile goiztiarra izan zen. Kontatzen dutenez, Sakabik 1957an ezagutu zuen, mutikoak 13
urte zituenean (44an jaiotakoa da), Izarraitz mendiaren maldan egiten zen Korostietako erromerian
jotzen eta Elgetari esan omen zion: “Mutil hau ona zetorrek, hobe diagu erretiratu”.
Iñaki Garmendia “Laja”k ez du kontu horren berririk. “Ni Sakabiren atzetik nenbilen. Berak soinua
jotzen erakustea nahi nuen, baina ez zuela astirik esaten zidan, fabrikan egiten zuen lan eta
erromeriek jaten zioten geratzen zitzaion denbora libre apurra. Elgetarekin hitz egin zuen eta esan
zion bazeukala gazte bat ikasteko amorratzen zegoena. Elgeta Tolosako Erruki-etxean zegoen eta
Lajara etorri zen. Nik 15 bat urte izango nituen. Autobusean egin zuen bidaia eta gogoratzen naiz
nola etorri zen gure amarekin batean herritik baserrira astoaren gainean soinu txikia eta bere
arropen fardela zituela. Uste dut ni izan nintzela bere azken ikaslea. Lau bat hilabete emango zituen
gurean. Hemendik Donostiara joan zen. Baserri tabernan eta beste batzuetan ikusten zuten soinua jo
eta dirua eskatzen. Elgeta gure etxera etorri zenerako nik pare bat urte baneramatzan Korostietako
erromerian jotzen”, hasi da kontatzen.
Aitarengandik zetorkion zaletasuna Lajari. Berak trikitixa jotzen zuen eta bi anaia bertsolariak zituen,
auzotik herrira bidean zeuden bi tabernetan, Azanekoan eta Pikuanekoan, kantatzen egoten zirenak.
Baina bertsolaritzaren historiara pasatu zen familiako bertsolaria Iñakiren aitona zen, Txirrita
handiarekin bertso batzuk trukatu zituelako. Itxura denez, aitona txerrikume taldearekin zihoan San
Andresetan feriara eta Txirritarekin egin zuen topo. Honek “Asko pisatzen al dira? Galdetu omen zion
eta trikitilariaren aitonak “bai, denak zu bezalakoak balira”, erantzun omen zion. Puntu motzeko
jardun labur horren ondoren bertsoetara pasatu omen ziren eta liburuetan jasota omen dago saioa.
Iñakiren arreba zaharrenak ere oso ondo jotzen omen zuen soinu txikia. “Ni baino egokiagoa zen
jotzen. Elgeta gurean egon zenean guk behean jotzen genuen pieza arrebak goian kantatu egiten
zuen. Oso belarri fina zuen. Eta Elgetak esaten zidan hobe zukeela niri erakusten jardun ordez
arrebari erakusten hasi balitz”, gogoratu du.
Ez zen Elgeta izan Lajak eduki duen irakasle bakarra, Azpeitiko bandako zuzendariarekin ere, Jose
Mari Altunarekin, musika ikasten ibilia baita.
“Hiru negu ikasi nuen berarekin, neguan izaten baita lanik gutxien baserrietan. Beste gauza batzuen
artean solfeoa erakutsi zidan. Ordurako ezkontzetan jotzen hasita nengoen. Arzak jatetxera ere joan
ohi nintzen, baina ikuskariak etortzen ziren musikari txartelik ba al genuen galdetzera eta etxera joan
behar izaten genuen. Txartela ateratzea erabaki nuen, eztei egunetako emanaldiak galtzen ari
nintzelako. Jose Mari Altunarekin hiru negutan ikasten jardun eta Donostiako Kontserbatoriora joan
nintzen azterketa egitera. Epaimahaian Bello Portu eta Frantzisko Escudero zeuden Madrilgo
ministerioko ordezkari batzuekin batean. Azterketako ariketetako bat partitura bat hartu eta
trikitixarekin pieza ateratzea zen. Tonuek ere ez zetozen bat, nire soinua si bemolekoa zen eta
partitura la-koa, baina moldatu nintzen. Segidan prestatuta neraman pieza bat jo behar nuen eta
‘Marcha turca’ jo nien eta harrituta utzi nituen”, gogoratu du.
Trikitixaren historiako adituek diotenez, Elgeta eta Sakabi izan ziren gerra ondoko figura nagusiak eta
Lajak maila bat gehiago erantsi zion. Lajak berak ez die garrantzirik ematen esamesa horiei. “Beti
errazagoa da maila bat gora igotzea zure aurrekoak oso onak izan direnean. Nik oso ondo ezagutzen
nuen Sakabiren jotzeko era. Harena asimilatu eta neuretik zerbait jartzen saiatu nintzen”, dio.
Euskal Herriko Trikitixa Txapelketaren lehen finala jokatu zenean Sakabi eta Egañazpiri eman zieten
txapela, baina trikitilari onenaren saria Lajarentzat izan zen eta pandero-jotzaile onenarena Imanol
Iturbiderentzat.
Laja pandero-jotzaile askorekin ibilia da, Berastegirekin urte askoan, Etxeberritxorekin ondoren,
Zabalerekin gero, Imanol Iturbiderekin ere bai eta Landakandarekin eman du azken etapa luzea.
Txapelketaren historian txapelik gehien eskuratu duen trikitilaria izango da Laja. Kontuak ateratzen
jardun eta zortzi edo bederatzi izango direla dio. Badu Martin Aginagalderekin partekatutako bat
ere, puntutara berdinduta geratu zirelako. Hurrengo urtean bigarren geratu zen Martinen ondoren
(bigarren geratu zen aldi bakarra izan zen), beste guztietan txapelarekin itzuli baitzen etxera.
Iturbiderekin Herri Gogoan grabatu zuen diskoarekin abiatu zuen bere diskografia, Landakandarekin
beste bost grabatu zituen eta bere azken diskoa “Azken jazzbana” (saxoa eta bateriarekin) izenekoa
izan da. Horietaz gain, txapelketako piezen bildumak ditu.
Kepa Junkera gaztetxoa zela, artean Beti Alai dantza taldean soinu handia jotzen zuenean, ezagutu
zuen Lajak. “Bizkaiko herri askotara joaten ginen soinua jotzera, Ibarrangelura, Elantxobera, Lagara
edo Laidara. Kepa Junkerak eta Zabaletak soinu handia jotzen zuten orduan eta guri begira egoten
ziren jotzen ari ginen bitartean. Geroago, uda pasatzera Zumaiara etortzen zen Keparen familia eta
gogoan dut nola etortzen zen Aristerrazura, Martin eta biok jotzen ari ginela, gu ikustera. Oso gazte
azkarra zen. Gure jarraitzaile bat zen orduan eta artista handi bat da gaur. Ez du trikitixa guk bezala
jotzen, ez da lau orduko erromeriak egiteko prestatzen gu bezala. Bera ezberdina da, beste mundu
batekoa. Konpasa eramaten du, guk bezala, baina bere irudimenak ez du mugarik. Lehen, Bizkaian
eta Gipuzkoan erromerietan jotzen ibili zirenean eta lehen diskoa atera zutenean, “Kepa, Zabaleta
eta Motriku” disko eder hura, gure bidetik ibili zen, Zabaletak jotzen zuen oinarrizko doinua eta berak
apaingarriak egiten zituen, gogoak ematen zion guztia egiten zuen, inoiz bat errepikatu gabe, gainera.
Inprobisazioaren maisu bat da. Ez zuen suerterik izan txapelketarekin, ez zuen txapel bakar bat ere
atera, baina hori ere bere mesederako izan zela esango nuke, bere bidetik aurrera egiten lagundu
baitzion. Edozein modutan ere oso pieza onak eraman zituen txapelketara eta urteak igaro direlarik,
gaur haren piezak eskatzen dizkigute ikasleek, Tapiarenak baino gehiago”, dio.
Ea Keparen piezarik inoiz jo al duen galdetu diot. “Behin jo nituen –eratzuten du-. Jaialdi bat antolatu
zuten Tolosan. Kepa eta Motriku joatekoak ziren, baina azken orduan zerbait gertatu zitzaien eta ez
ziren agertu. Aurkezleak, uste dut Joxe Mari Iriondo zela, ea norbait ausartuko zen Keparen piezaren
bat jotzera galdetu zuen eta ale batzuk jo nituen eta arrakasta dezentea izan nuen. Bai trikitilari
gazteen artean bai zaletu gazteen artean Kepak onespen handia izan du”.
Azken aldi honetan Lajak harreman gehiago izan du Motrikurekin. Oraindik orain Aristerrazun jo
zuten elkarrekin. “Jendeak bikote zelebrea egiten genuela komentatzen zuen, hark euskaraz
kantatzen baitzuen euskara ondo menderatu gabe eta nik berarekin gazteleraz hitz egiten bainuen,
ondo jakin gabe eta, hala ere, elkar ondo ulertzen genuen. Tarteka bere emaztearen baserrian
elkartzen gara, Zornotzan. Landakandak behin esan zion berak erretiroa hartu nahi zuela eta ea
ordezkatuko al zuen. Sekulako ilusioa egin zion eta gure lehen erromeria oso serio prestatu zuen,
hain serio non piezak sobratu zitzaizkigun. Daukan lanagatik ezin dio denbora gehiegi eman trikitixari,
baina tarteka jotzeak ilusio handia egiten dio. Asko gozatzen du panderoarekin”, dio.
Azpeitian San Jose egunez egiten den trikitixa jaialdiaren ondoren Pastorkua jatetxean afaltzera bildu
ziren eta elkarrekin jo zutela gogarazten diot. “Belaunaldi ezberdinetako jendeak elkarrekin jotzea
polita izango zela erabaki zuten eta bazter batean ni Landakandarekin eta bera Motrikurekin
kointziditu genuen eta jotzen hasi ginenean egia da jakin-min handia piztu zela eta bideoak eta
argazkiak atera zizkigutela”, gogoratu du.
Lajak egunero jotzen du, ordutegi jakinik ez badu ere. “Pieza berriren bat ikasi edo zaharrak
errepasatzen aritzen naiz”. Bi etxebizitzako txalet berri batean bizi da, lehen baserria eta orain
jatetxea den Lajatik gertu. Bere eskuetatik gaur lehen lerroan jotzen ari diren trikitilari dezente igaro
dira, Imuntzo, Lurdes Alkorta, Izer edo Agurtzane Elustsondo, batzuk aipatzeko.
Trikitixa erakusten jarraitzen du. Bere ikasleen artean 12 urteko gaztetxoak eta 60 bat pieza jotzeko
gai diren jubilatuak ditu. Ikasleek piezak bideoan grabatzen dizkiote. Berak mantsoago jotzen ditu
ikasleari lana errazteko. Badaude etxera joan eta hurrengo asterako pieza atera eta jotzeko gai
direnak. “Orain herri eta auzo bakoitzean daude trikitixa eskolak. Niregana datozenak kapritxo hori
dutelako etortzen dira”.
Bi seme ditu trikitixa jotzen dutenak. Horietako batek lagundu egin ohi dio Atxondoko Mendigoiko
jatetxera ezkontzaren batean jotzera doazenean. Jatetxe horretan platerak zerbitzatzeko ere trikitixa
jo ohi da. “Dozena bat neska ateratzen dira ilaran platerak eskuetan dituztela eta gu jotzen ari garen
bitartean zerbitzatzen dituzte mahaietan”.
EPELDEREN IRRIBARREA
Badaude misterioz betetako irribarreak, Monalisarenak bezala. Baina badaude irribarre gardenak eta
alaiak ere, Tomas Soraluze “Epelde”rena, esate baterako. Honi gutxitan ezabatzen zaio irribarrea
ezpainetatik eta gutxiago soinu txikia eskuetan duela jotzen ari denean.
Azkoitiko Martirieta auzoko Epelde baserrian jaio zen. Herritik gora doan errepidean azken
baserritako bat da. Trikitilari Elkarteak egunen batean trikitixaren berri emateko ibilbide bat antolatu
beharko balu, Azkoitiko auzo hau aukeratu beharko luke. Herritik abiatu eta Martirietarako ermitara
igotzea trikitixaren iraganean murgiltzea bezala da. Auzoan dauden 30 baserrietatik gehienek badute
harremanen bat soinu txikiarekin edo dultzainarekin. Behetik hasi eta lehen baserria Imunsoro da
(Imuntzo), trikitilari baten jaiotetxea. Hirugarrenean Egurrola jaio zen, Tomas Soraluzeren aitarekin,
Epelde Zaharrarekin, jotzen zuen pandero-jotzailea. Errepidearen gora dago Zendoia ere, izen
horretako anaien sorlekua. Berehala dago Muno, Epelde Zaharraren etxea eta gorago dago Montte,
Euskal Herriko dultzainero familia ugarienetako baten sehaska.
Honek ez du esan nahi gainontzeko baserrietan trikitilaririk ez zenik. Sustetan, Irisarrin edo Urteagan
baziren trikitilariak, plazan jotzera iritsi ez baziren ere. Kortan edo Etxetxon dultzaineroak ziren. Baina
Tomas Soraluze “Epelde”k berehala zuzentzen dit, horiek lehengo kontuak zirela esanez, orain dela
horrelakorik alegia.
“Nik aitari askotan esaten nion benetako Epelde ni nintzela, bera Munon jaio baitzen eta Epeldera
ezkondu. Hain zuzen ere, bere inguruko guztiek Muno esaten zioten”, dio Tomas Soraluzek.
Txapelketak hasi zirenean biak aurkeztu omen ziren behin, aita Egurrolarekin eta bera anaia
Luzianorekin eta antolatzaileek, nahasketarik egon ez zedin, aitari Epelde Zaharra eta berari Epelde
deitzen hasi ziren.
Xabier Gantzarainek, Artelekuko gaurko zuzendariak, liburu bat eskaini zion Epelde Zaharrari,
“Epelde. Mende baten soinua”, eta liburu horretan bere harridura agertzen du trikitixaren inguruan
Azkoitiko herriak joan den mendearen lehen hamarkadetan bizi izan zuen loraldiaren aurrean.
Garaiko kultura fenomenorik interesgarrienetako bat dela uste du eta are harrigarriagoa dela loraldi
hori dio alderdi integrista eta katoliko bat agintean zegoen bitartean eman zelako.
Tomas Soraluzeren aitonak dultzaina jotzen zuen eta bertsolaria zen. Itxura denez, aita-semeak
elkarrekin joaten ziren Zumarragako feriara eta aitak bertsotan egiten zuen lehenik eta semeak
jartzen zuen festa ondoren.
Mendearen bigarren zatian trikitixak hartzen dio gaina dultzainari. Martirietatik igarotzen ziren
garaiko trikitilari onenak: Etxesakorta, Beltziur, Kantera, Gorriz edo Kanpazar. Epelde Zaharrak
bigarren eskuko trikitixa bat erosi zuen Azpeitian 16 urte zituenean eta berri bat Donostiako
Larrinagan 18 urte egin zituenean. Bigarren soinu txikia erosi eta gerra etorri zen arte inguruko
erromeria askotan jo zuen Epelde Zaharrak, Aizpurutxon esate baterako. Bakarrik jotzen zuen, baina
badaezpada pandero bat eraman ohi zuen, norbaitek jo nahi bazuen, uzteko.
Haren semea, Tomas, 1945ean jaio zen eta bere kontura ikasi zuen soinua jotzen, etxean, inoren
laguntzarik gabe. Aitak etxean oso gutxi jotzen bazuen ere, seme zaharrenari erakusten saiatu zen,
baina honek ez zuen aurrerapenik egiten. Orduan hartu zuen Tomasek soinua eskuen artean eta nola
moldatzen ikustean aitak “hi honetarako jaio haiz”, esan omen zion.
“Entzutearen poderioz ikasi dut dakidana. Maltzeta, Laja edo Sakabi sarritan etortzen ziren
Martirietara”, dio.
Epeldetarren leinuak jarraitzen, Tomasek bi iloba baititu lehieketetan oso goian ibili direnak.
Epeldek txapelketetan hartu du parte eta pandero-jotzaile ezberdinak izan ditu ondoan, nahiz eta
hogeita hamar bat urte egin dituen Imanol Iturbiderekin. “Baditugu hamahiru egun segidan jotako
boladak ere eta hainbeste ordu elkarrekin partekatzen dituzunean konpenetrazio handia ematen da.
33 urterekin hasi eta 56 bete nituen arte soinua jotzera bakarrik dedikatu nintzen eta modu
horretako ibilera asko egin nituen. Gure lan ordutegia goizeko hamaikak aldean hasten zen askotan
eta goizaldera arte jotzen genuen. Erromeria zenean ere hiruzpalau ordu jo behar izaten genituen”,
dio.
Zer edaten zenuten martxa horri eutsi ahal izateko?, galdetu diot. Iturbidek garagardoa edaten zuen
eta berak edari fuerteagoak, erantzuten dit.
Imanol Iturbiderekin grabatu zuen lehen diskoa eta beste hiru grabatu zituen ondoren Anjel
Larrañagarekin.
Tomas Soraluzeren jaiotetxean, Epelde baserrian, gaur ez da inor bizi, baina zaharberritu egin zuten
eta han biltzen dira tarteka familiakoak, bost senide baitira, hiru anaia eta bost arreba. Badaude
guztiak bilduta panderoa jotzen agertzen diren argazkiak ere. Horietako bat Laja jatetxean egina da.
Tomas ezkongabea da. “Irudipena dut ez dudala astirik hartu ezkontzeko”, justifikatzen da. Bere
gaztaroa dantza lotua zela-eta, auzoko apaizarekin izan zituzten tira-birek markatu zuten.
Hamasei urte zituenean auzolanean Azkoititik Martirietako elizara egin zuten sei kilometroko
errepidea irekitzen aritu zen. Dena eskuz egin behar izan zuten eta ezer kobratu gabe. Errepideko
lanak gidatzen Don Esteban apaiza, Tomasen osaba bat eta Montte dultzaineroa aritu ziren. Don
Estebani buruzko zenbait pasadizo bildu ditugu Zendoiari buruzko biografia laburrean, baina Epeldek
ere oso gertutik bizi izan zituen apaiz horrekiko gorabeherak.
“Errepidea bukatu genuenean auzokoek apaizari moto bat erosi behar zitzaiola erabaki zuten eta
Vespa bat ekarri zioten gora eta behera ibil zedin. Garai hartan gazte jende asko zegoen Martirietan
eta erromeria bat antolatzeko asmoarekin lanean hasi ginen talde bat. Don Estebanek elizan egin
zuen sermoietako batean nigatik ere epelak esan zituen. Erromeria batean zer egiten genuen
xehetasun guztiekin esplikatu zuen pulpitutik, gurasoak beldurtzeko asmoarekin. Eta egia esan, ez
genuen ezer larririk egiten”, goratu du.
Apaizaren eta gazteen arteko konponezinak gogortuz joan ziren eta apaizak igande goiz batean,
8etako mezatan, iragarri zuen auzoa utzi egingo zuela. Gazteek ez zuten ordu horretan mezatatik
irten eta tabernara joateko ohiturarik, baina egun horretan, gertakariak merezi zuela eta tabernara
joan ziren ospatzera.
Epeldek txapelketetan ezagutu zuen Junkera eta geroztik mirespenez begiratu izan diote elkarri.
ZENDOIA ETA MARTIRIETAKO KONTUAK
Tomas Zubizarreta 1930ean jaio zen Martirietako Zendoia baserrian. Laxaro Azkunek trikitilariaz
Durangoko Azokan aurkeztuko duen liburuan “firu-firu bailara” erabiltzen dutela dio Martirieta auzoa
izendatzeko.
Tomas Zubizarreta “Zendoia”k Martirietako erromerian jo zuen lehen aldiz jendaurrean 17 urte
zituenean, bere osaba baten ordez, eta erromeria horretako trikitilari ofiziala izan zen mendi erdiz.
Zendoiak bere jaiotetxean jarraitzen du bizitzen eta, 84 urte dituenez, plazetatik erretiratu bada ere,
familia giroan jotzen jarraitzen du tarteka. Laxaro Azkunek trikitilariaren bizitzako gorabehera
nagusienak bildu ditu liburuan eta horrekin batera pasadizo jakingarri asko ere bai. Liburuan “dantza
lotua”ri buruzko atal oso bat sartu du eta hortik par bat pasarte hartuko ditugu.
Azkoitiko udal batzak dantza mota hori legeztatzea erabaki zuen 1955ean, inguruko herrietan ere
erabaki hori hartua zutelako. Azkoitiko parrokoak, ordea, udal batza elizatik kaleratzea erabaki zuen
eta alkatearen bi umeri jaunartzea ukatu zien, modurik inozoenean aldarera gerturatu ziren batean.
Alkateak ezagutzen zituen ate guztietan jo zuen laguntza eske. Burgosko artzapezpikuarekin hitz
egitera iritsi zen, baina hiru urte igaro behar izan zuten berriro elizan sartzen utzi zioten arte.
Dantza lotuaren kontrako debekua kendu zuten herrian, baina ez auzo batzuetan. Martirietan,
esaterako, don Esteban apaizak gazteak izutu nahian jarraitu zuen bere sermoietan. Hamar urte
geroago, 1965ean, bertako hiru bikotek apaiza xaxatzea erabaki zuten. Epelde trikitilariren etxean
entrenatu zuten bezperan “baltseo txikia”. Dantza molde hori lotuaren eta sueltoaren arteko
erdibidea zen, koplak kantatzeko orduan bikoteek besarkatuta egiten baitzuten dantzan. Iritsi zen
igandea, Epelde hasi zen jotzen auzoko tabernan eta hiru bikote horiek “baltseo txikia” egin zuten.
Apaiza enteratu zen eta arratsaldean tabernara agertu zen. Eta hiru bikoteek don Estebanen aurrean
“baltseo txikia” egitera ausartu ziren. Hiru neskak elizako kongregaziotik bota egin zituen.
Apaizaren eta gazteen arteko giroa gaiztotuz joan zen eta don Estebanek bere kargua utzi egiten
zuela jakinarazi zuen egunean, gazteak mezatatik atera eta tabernara joan ziren ospatzera, lehen
esan dugun bezala.
Azkuneren liburuak bere garaiko trikitilari eta pandero-jotzaileen lekukotasunak bildu ditu. Liburuko
orrietan agertzen dira Laja, Epelde, Egurrola, “Sakristaua”, Manuel Iturbide, Luis Alberdi “Zabale”,
Manolo Arrizabalaga “Izer” eta beste zenbaiten esanak.
ERRITMOA ESKUETAN
LANDAKANDA
50eko hamarkadako pandero jotzaileen artean Pedro Arruabarrena nabarmentzen da. 1960a hil zen
Tolosako Zeru Txiki tabernan Elgetaren ondoan panderoa jotzen ari zela. Garaiko trikitilari handienen
erritmoa markatu zuen. Elgetarekin ibili zen, noski, baina baita Migel Sagastumerekin edo
Gelatxorekin ere Gipuzkoako eta Durango aldeko erromerietan. Iruran 1925ean jaioa zen, Eibarren
lan egin zuen igeltsero eta ofizio horretan ere bere artearen froga batzuk utzi zituen, Bar Txokoko
terrazoa esate baterako, taberna behin eta berriz berritu badute ere, zorua bere horretan utzi
baitute. Arruabarrena ikustekoa omen zen panderoarekin. Eskuekin, ukondoarekin eta hankekin
jotzen zuen. Hari begira ikasi zuen Jose Ramon Zubizarreta “Landakanda”k. Miel Anjel Elustondok
“Landakanda”z idatzi zuen liburuan protagonistak kontatzen duenez, panderoa da trikitilariaren
erritmoa markatzen duena, panderoa da agintzen duena. 1982ko txapelketaren finalean aretora
sartu eta Landakandak dantzari bat ikusi omen zuen epaileen artean eta Lajari esan omen zion
mantsoxeagoa joko zuela, “ofizioz dantzari izandakoei erromerietan polikiago jotzea gustatzen
baitzaie. Agertokira igo aurretik saio txiki bat egin genuen. Lajari kosta egin zitzaion pixka bat, baina
berehala sartu zen nire pausoan. Askori kontrakoa iruditzen zaie, baina trikitixan panderoak agintzen
du”, zioen.
Baina ez da pandero-jotzailearen kezka bakarra. Elkarrizketa horretan bertan kontatzen du ura
bakarrik edaten duela eta ez txanpaina edo garagardoa gustatzen ez zaizkiolako, oso hotzak
ateratzen dituztelako baizik eta edari hotzak eztarria urratzen diolako.
Kontatzen dute halaber Egañazpik edariren bat eskatzen zuen bakoitzean “Epela egon dadila”, esaten
zuela eta Sakabik eransten zuela: "Irakin berria bada, hobe”. Eta hala ere arazoak izaten zituela
eztarriarekin. Landakandak uste du kantuan egiten duten guztiek zaintzen dutela eztarria Sebastian
Lizasok izan ezik, honi txanpan hotzak mesede egiten baitio.
Elkarrizketa horretan bertan Landandak dio norbaitek behin esan ziola edan gabe kantatzeko gai
bazen, artista bat zela.
Jose Ramon Zubizarreta Azkoitiko Kukuerri auzoan jaio zen, errota ere bazen baserri batean.
Arruabarrena zuzenean ikusi aurretik, 12 urterekin hasi zen panderoa jotzen Joxe Oria imitatuz,
Zumarragako Trikitixako pandero jotzailea askotan agertzen baitzen Radio San Sebastian-en, garaiko
irrati bakarrean. Hamar senidetatik gazteena zen. Etxean inork ez zuen panderoa jotzen, baina
lehengusuak zituen Izer baserrian jotzen zutenak. Errotan lanean ari zela, itxarotea egokitzen
zitzaionean harmailetan eseri eta panderoa jotzen zuen.
Hogeita sei urterekin ezkondu eta erretiratzea erabaki zuen. Hamahiru urte eman zituen jo gabe.
Egun batean, ordea, Maltzeta agertu zitzaion omenaldi baterako pandero jotzaile bat behar zuela
esanez eta hasi zen berriro. Bien bitartean trikitixa bere bidetik zihoan. Ordurako Egañazpi
Elgetarekin eta Sakabirekin zebilen panderoa jotzen. Erromeriak gainbehera hasita zeuden, baina
jaialdi handiak antolatzen ziren. Bikote bakoitzak 6.000 pezeta kobratzen zituen garaiak ziren. Diru-
sarrera hori garrantzitsua zen, batez ere bi emanaldiko egunak ere tartean izaten zituztelako. Bere
emaztearen baimenarekin, beraz, agertokietara itzuli zen.
Lajarekin hasi zen jotzen. “Laja eta Landakanda” diskoa etorri zen berehala. Madrilen grabatu zuten
eta “Mendien edertasuna” bezalako piezak sartu zituzten bertan, Azpillagaren koplekin. Pieza horrek,
esate baterako, sekulako arrakasta izan zuen. 1977an gaude. Hurrengo txapela partekatu zuten
Martinekin, enpate egin baitzuten puntuetara. Martin Egañazpirekin zen eta Laja Landakandarekin.
Biokoteak 20 uteko ibilbidea hasi zuen. Landakandak Kepa Junkerarekin ere jo zuen, Motriku
soldadutza egiten egon zen bitartean.
ITURBIDETARRAK
Imanol Arregi “Iturbide” ebakuntza izan berria dago eta makuluen laguntzarekin atera da etxeko
atera. Iturbide Loiolako Santutegitik gertu dago, muino baten gainean eta handik Izarraitz aurrez
aurre ikusten da. Makuluekin badabil ere, begiradan agertoki gainean erakusten zuen distira bera
igartzen zaio, pandero-jotzaile baten lanaren zati handi bat alaitasuna transmititzea baita.
“Pandero-jotzaile on batek hiru egiteko ditu: kantuan egin behar du, panderoarekin erritmoa
markatu eta dagoen lekuan festa jartzen jakin –dio- eta hirugarren egiteko horretan nabarmendu
naizela esango nuke”.
Patxi Arregiren seme zaharrena da. Hark sortu zuen Iturbidetarren pandero-jotzaileen leinua.
Errekarten jaio zen Patxi, baina santutegi ondoan zegoen etxe hori Foru Aldundiak Garate Anaiaren
museo bihurtu zuenean bertan bizi zirenak 500 metrotara zegoen Iturbide baserrira aldatu ziren.
Panderoa jo duten hiru belaunaldiri eman dio izena baserri horrek. Patxik, panderoaz gainera flauta
eta trikitixa jotzen zituen. Otola trikitilariak berarekin ikasi omen zuen.
Iturbidetarrek joan den mendeak eman zituen trikitilari ezagun guztiekin jo zuten panderoa: Gelatxo
Zaharra, Madarixa Txikia, Auntxa, Sakabi, Laja, Otola, Bitarte, Eleuterio eta Juan Tapia, Mardu,
Txankarta, Martin Aginagalde, Tomas Zubizarreta “Zendoia”, Tomas Soraluze “Epelde” eta beste
hainbat aurki daitezke zerrenda horretan.
Pandero-jotzaile familiaren burua Patxi izan zela esaten bada ere, badago aurrekari bat Maria Joxepa
izenekoa, panderoa jotzen zuena. “Aitonaren izeba zen. 95 urterekin hil zen, nik 17 nituenean.
Gaztetan jotzen omen zuen, baina nik ez nuen ikusi. Maria Joxepak urteak egiten zituen bakoitzean
Sakabi gonbidatzen zuten Iturbidera, baina gure etxean ez zen panderorik eta ez zuten jotzen,
bigarren mailako instrumentutzat zutelako. Nik edade dezente nuenean hasi zen aita jotzen.
Gelatxorekin eta Etxesakortarekin jo zuen. Azken honekin bikote oso ona egiten zuela esaten zuten,
trikitilariak ere ahots oso ona zuelako”, kontatu du.
Zumarragako Trikitixaren bigarren diskoan ere kolaboratu zuen Patxik. 1930ean egin zuten
grabaketa, baina ez zen kalera atera zentsurak galarazi baitzuen. Antza denez, koplak
“abertzaleegiak” ziren.
Migel Arregi da lehen belaunaldiko bigarren figura. Egutegiarekin lotura berezia zuen: urteak egin
zituen egun batean ezkondu zen eta hil ere 90 urte egin zituen egunean hil zen. Auntxa, Txankarta
eta Epelde Zaharrarekin asko jotakoa da. Anaien artean onena Patxi zela esan ohi zuen eta iloben
artean Imanol.
Boni Arregi “Iturbide”, urte askoan Otolaren bikote izandakoa eta Joxe Mari Arregi “Iturbide” dira
belaunaldia osatzen dutenak. Joxe Marik Sakabi, Arbe eta Hijinio Zabaletarekin jo zuen. Arbek esaten
omen zuen sekula santa ez ziola Jose Mariri nekearen keinurik sumatu aurpegian jotzen ari zen
bitartean.
Imanol Arregi Zubizarreta “Iturbide”, beraz, familiako bigarren belaunaldidkoa da. 1935ean jaio zen
Iturbiden eta garaiko trikitilari handi guztiekin jo du. Sakabi, Auntxa, Laja, Martin, Epelde, Miren
Etxaniz, Pikua, Migel Sagastume, Bitarte, Zabaleta eta Zendoia dira berarekin ibilitako trikitilarien
zerrendan. Loiola Irratian grabazioak egiten hasi zirenean, trikitilariren bat etorri eta pandero-
jotzailea behar zutenean, Iturbidera jotzen zuten Imanolen bila.
Imanol Iturbide familiako gorabeherak aipatzen hasten denean, hala ere, osaba Migelekiko lotura
berezi bat sumatzen zaio. Osaba hori artista handi bat izan zela uste du. “Jubilatu zenetik 80 urte
bete zituen artean egunero etortzen zen Iturbidera. Nik harreman berezia nuen berarekin. Baina 80
urte bete zituenean erabat tristatu zen, ez zen gauza izan urtebetetzea ospatzeko ere. Oso gizon alaia
izandakoa zen, baina animoak erori egin zitzaizkion. Azken aldiz barre egin zuenean neuk eraginda
izan zen. Indar handiko pandero-jotzailea zen jendaurrean. Panderoak apurtu egiten zituen. Ez zuen
ulertzen ni norabait nindoanean pandero bakarrarekin jotea. Dantzari amorratua zen. Nik ikusi dut
bastoiarekin ibili ezinda, andreari lepotik helduta dantza zegoen lekuren batera iritsi eta dantzan
egiten. Andrea azkar asko uzten zuen eta beste batzuekin alde egiten zuen. Umore oneko persona
zen. Dantzan zebilenean bikotez aldatzea gustatzen zitzaioan eta emakume askok ezkongabea izango
zela pentsatzen zuten eta galdetu ere egiten zioten. Baina panderoa ere jotzeko gauza ez zela geratu
zen. Niri sekulako pena ematen zidan”, dio Imanolek.
Imanolek dioenez, kasualitatez hasi zen panderoa jotzen. “Osaba Joxe Mari gaixotu zen batean Sakabi
etorri zitzaidan bila. Ni ez nintzen mutiko bat, 28 urte nituen eta etxetik irteteko amorratzen nengoen
beti, juergarako prest. Goiza Zarauzko kaleetan barrena jotzen ibili ginen eta nik sekulako lotsak
pasatu nituen. Baina bazkaritan trago batzuk egin nituen eta arratsaldean nirekin zebiltzan
trikitilariak ziren lotsatzen zirenak. Gauean jotzen jarraitzen banuen, 50 ogerleko gehiago emango
zizkidatela esan zidaten antolatzaileek, baina nik konpromisoak nituela erantzun nien. Nire
konpromiso bakarra dantzarako gogoa zen”, gogoratu du.
Imanol Itrubidek sinesten du kasualitateetan. 1970ean lehen Trikitixa Txapelketa antolatu zutenean
Joxe Mari Iriondo etorri zitzaion hurrengo igandean txapelketara joan behar zuela esanez. “Nik ez
nuen panderorik ere etxean. Saioan bertan Egañazpik utzi zidan”, dio. Aiako Errota trikitilariari
lagundu zion eta pandero-jotzaile onenaren saria eman zioten.
Sari horri esker Bartzelonara joteko zoria ere izan zuen, Enrike Zelaiak disko bat grabatu baitzuen han
Alemaniako diko etxe batentzat. “Zortzi egun eman genituen Bartzelonan erregeak bezala. Han ikusi
nuen nire bizian lehen aldiz bost izarreko hotel bat, ate automatikoak, eskailera mekanikoak eta
beste hainbat gauza. Han ikusi nuen lehen eta azken aldiz Ursula Andress. Eta, gainera, mila pezetako
propina eman zidaten. Osaba Migelek Elosuko baserri batetik ekarritako panderoarekin joan nintzen.
Orduan panderoari ez genion inolako garrantziarik ematen”, dio.
Imanolek beti kendu dio garrantzia bere lanari. Askotan esaten du panderoa trikitixaren apaingari bat
baizik ez dela. Kontatzen dutenez, behin Lajarekin Amezketako erromeria batean jotzen ari zirela,
pandero-jotzaileak trikitilariari esan omen zion jotzeari utziko ziola, ea dantzan ari zirenak ohartzen
ziren. Pieza erdiz-erdi zegoenean isildu omen zen Imanolen panderoa eta jendeak dantzan jarraitu
omen zuen. Horrekin panderoa sobran dagoen gauza bat dela frogatu nahi izan zuen.
Baina Tomas Soraluze Epelde elkarrizketa entzuten ari da eta ez datorrela bat dio. “Ni pieza bat
propio Imanolentzat egitera iritsita nago. Elkarrekin hainbeste ordu pasa eta gero, elkarren berri oso
ondo dakigu. Badaude elkarrizketa modura egiten ditugun pasarteak. Berak panderoarekin gauza
batzuk egiten ditu eta nik soinuarekin erantzuten diot”, dio eta panderoarekin bere kideak egiten
dituen erredoble batzuk imitatzen ditu ahotsarekin.
Baina Imanolek bereari eusten dio. “Niri hasiera batean sekulako lotsa ematen zidan neure
grabazioak entzuteak, bai panderoagatik eta bai ahotsagatik. Denborarekin zerbait ohitu egin naiz eta
ohartu naiz ni bezain txarrak gehiago ere badaudela”, dio.
Imanol Iturbide lorazina izan da lanbidez eta urte askoan Azpeitiko Udalarentzat egin zuen lan.
“Baina beti izaten zen zaila lana trikitixaren konpromisoekin uztartzea. Gogoan dut behin nola ibili
ginen hiru egun segidan zapatarik erantsi gabe, bakean uzten zizkiguten ordu apurrak autoan lo
egiteko erabiltzen baikenituen. Goizeko zazpietan etxera gentozenean autoari gurpila zulatu
zitzaigun eta larri-larri iritsi nintzen goizeko zortzietarako Azpeitira. Hogei bat mutil nituen zain
lanean hasteko”, gogoratu du.
Osaba Migel, noski, baina Joxe Oria ere asko miretsi izan du, baina bera ere tarteka miretsia sentitu
izan da. Motrikuk behin esan zion panderoarekin jarraitu bazuen, berari esker izan zela.
Etxean ez du grabaziorik, ez argazkirik gordetzen.
Bi seme eta alaba ditu. Hauek ez, baina baditu trikitixaren bidetik abiatu diren ilobak.
Josu Arrizabalaga “Izer”: “88ko finalean jendeak gaitzetsi zituen piezak dira gaur gazteek
txapelketara eramaten dituztenak”
Bere aitona (Joxe Arrizabalaga) eta bere aita (Manuel) trikitilariak ziren eta bi urte zituenerako
pandero txiki batekin egiten zuen jolas etxean. Mutikoa zela hasi zen bere aitaren soinu txikia
ezkutuan jotzen, Lajarengana bidali zuten arte. Lajaren eskuetatik pasatu zen. Gaur Izer eta
Alabierrek urtean ehun bat erromeria egiten dituzte. Cuarrogados Lasao enpresan ari zen lanean, itxi
zuten arte. Helduentzako trikitixa eskolak emateko aukera aztertzen ari da, baina poliki-poliki hartu
nahi ditu erabakiak. Josu Arrizabalaga “Izer” 1980an jaio zen eta 8 urte zituen Kepa Junkera 88ko
finalera aurkeztu zenean. Hain umea izanik ere, oso garbi gogoratzen ditu orduko gorabehera batzuk
eta bere emanaldiak trikitizaleen artean eragin zuen txokea.
-Zaila ematen du zuk hain urte gutxi izanda, final horretako kontuak gogoan izatea.
Finalean egon nintzen eta niri gauza asko argitu zitzaizkidan. Txapelketa hura trikitixak bizi zuen
egoeraren laburtzapen moduko bat izan zen. Aitak Junkera ezagutzen zuen, jaialdietan eta
lehiaketetan elkarrekin joak zirelako, eta behin eta berriz errepikatzen zuen Junkera eta Tapia
markatik kanpokoak zirela eta mirespen berezia zion bizkaitarrari. Nik buelta asko eman nizkion
txapelketa horri. Martin Aginagalde trikitixa eskolak zabaltzen hasi zenetik gazteok eskoletan ikasi
dugu jotzen eta teknika maila altua lortu dugu askok: konpasak oso zehatz eramaten ditugu, notak,
baxuak… politikoki zuzena den trikitixa egiten dugula esango nuke. Akatsik gabe jotzearen edo
zuzentasunaren obsesio hau trikitilari batzuek bizi duten konplexutik dator. Bai Lajak eta bai
Martinek, bi adibide jartzearren, musika ikasten saiatu ziren soinu txikia duinago egitearren edo.
Akordeoiaren zeloak zituzten eta trikitixaren baliabide urriek ematen zieten min. Akordeoi musika
entzuten zuten asko eta beren erakusteko moduan nabari da hori. Nabaria da beren jotzeko modua
zaharragoena baino landuagoa zela. Zortzi urterako modu lauso samar batean bada ere banekien
egoera horren berri eta Tapiak eta Junkerak maila koska bat gorago igo zutela ikusi nuen edo
beharbada bi koska igo zituztela kolpetik, eman zuten pausoak sekulako astinaldia eragin baitzuen.
Trikitixaren panoramika osoa laburbildu zuen txapelketak eta jokoan zeuden jarrerak oso agerian utzi
zituen: bazeuden eskola tradizionaleko trikitilari oso onak, hor zegoen Imuntzo ere, txapelketan
hamar ateratzera joan zen, notarik altuena alegia, oso ondo prestatuta. Imuntzok azkar eta garbi
jotzen zuen, bere piezak bikainak ziren… sekulako papera egin zuen, eskola zaharrekoak baino maila
bat gorago zegoela frogatu zuen. Zabale ere hantxe egon zen, gaur egungo txapelduna, baina
heldutasun puntu bat falta zitzaion artean. Eta bi munstro hauek agertu ziren, Tapia eta Junkera.
Hauek beste orbita batekoak ziren. Beste musika genero batzuk ere entzuten zituzten, trikitixa
bakarrik ez. Batek entzuten duen musika lixeriatzen du, metabolizatzen du. Eta bi hauek besteek
baino kultura musikal handikoa zuten. Dohain izugarriko trikitilariak ziren, oso bereziak eta erraldoi
baten pausoa eman zuten. Orain, Junkera hainbeste ezagutzen dugularik, bere pieza bat entzun eta
ez digu arretarik erakartzen, bere musikara ohitu egin gara, baina aipatzen ari naizen testuinguruan
ez da sinestekoa zer eragin izan zuen. Behin baino gehiagotan pentsatu izan dut egun hartan
epaimahaikoei egokitu zitzaien papeletaz eta beldurtzeko modukoa da.
-Egun horretan trikitixaren baitan bizirik zeuden jarrera guztien agerpen moduko bat eman zela
diozu.
Bai, niretzako hala izan zen. Trikitixaren historiari buruzko klase batera joatea bezala izan zen
niretzat. Jauregi zegoen han, Laura Apeztegia zegoen han, beste bat aipatzeko. Izugarri ondo jotzen
zuen, baina oso modu tradizionalean. Imuntzo eta Zabale ere han ziren eta beren formazioak beste
maila bat zuela erakutsi zuten. Eta gero beste bi extralurtar hauek agertu ziren.
-Nola definituko zenuke Junkeraren estiloa? Trikitixari etorkizun libreago bat ireki al zion?
Junkerak ez zuen guk gainean genuen kortserik. Nik, esate baterako, ez dut ezagutu besterik etxean
eta nire inguruan. Etxetik ateratzen naiz eta Epelderekin egiten dut topo edo Egurrolarekin. Ez dut
eduki mundu horretatik ateratzeko aukerarik. Urteak eman ditut astero Otolarekin afari bat eginez;
ostiralero Auntxari bisita egitera joaten nintzaion, hura niretzat aitona bezala baitzen. Sakabirekin
askotan egoten nintzen. Hil zen egunaren bezperan ere berarekin egon nintzen. Trikitixaren maisu
handi guztiak nire inguruan izan ditut. Nik ez dut esango Junkerak edo Motrikuk ez dutenik sustrairik
eduki, baina harreman ezberdina izan dute trikitixarekin. Laja eta Landakandaren erromerietara
etortzen ziren, egia da. Gure aitak kontatzen zuen ikusi duela Kepa Junkera Lajaren piezak erraztasun
izugarriarekin jotzen. Orain bere bidean hain urrutira joanda dagoela, kostatu egingo zitzaion pieza
horiek bere horretan jotzea, baina lehen egiten zuen. Gogoan dut behin Saizar sagardotegian
Imuntzoren disko baten aurkezpena egin zela. Trikitilari asko zegoen. Junkera bazter batean zegoen,
baina inor ez zitzaion gerturatzen agurtzera. Nik ez nuen orduan orain dudan harremanik berarekin,
baina pena eman zidan nola baztertzen zuten ikusteak. Badago jende bat Kepak ez dakiela jotzen
uste duena. Ekitaldi horretan bertan pieza bat jotzeko eskatu zioten Imuntzorekin batean. Agertoki
gainean mikroak probatzen ari zela pieza bat jotzen hasi zen estilo tradizionalean. Oso segundo gutxi
izan ziren, baina denok harrituta berari begira geratzea lortu zuen. Hamar segundo izango ziren
gehienez, baina aho zabalik utzi gintuen. Soinua jotzeko gaitasun ikusgarria du eta, gainera, musika
egiten daki, soinu txikiari lagunduko dioten instrumentu ezberdinak koordinatzen. Diskoz disko
frogatu du gaitasun hori. Ona izan ez balitz, ez zen dagoen lekuan egongo. Noski, ez zait gustatzen
egiten duen guztia. Ez zait gustatzen Tapiak egiten duen guztia ere. Oraindik Junkera kritikatzen duen
jendea baldin badago, pentsa zer izango zen 88an. Talka bat izan zen jende horrentzat, buruz buruko
talka bat. Beste batzuentzat errebelazio bat izan zen bezalaxe. Eta horren froga da gaurko gazteak
haren piezekin joaten direla txapelketara. 88an gaitzetsi ziren piezak dira gaur txapelketan entzuten
direnak. Eta okerrena da 30 urte igaro direla, 30 urte igaro dira eta ez gara gai izan pieza horiek
gainditzeko. Haiek egin zutena errepikatzen duten musikariak eta taldeak ditugu gaur.
-Zuk Lajarekin ikasi zenuen. Askok trikitixa modernoaren panoraman figura giltzarria dela uste dute.
Figura garrantzitsua dela uste dut. Errepertorio bat jotzen erakutsi baino gehiago instrumentua bera
konprenitzen erakutsi zigun, instrumentuarekin jolas egiten, dituen ahalmenak ikustarazten eta
kontrolatzen. Berak erakutsi zidan trikitixa jotzen erakustea ez dela pieza batzuk ikasaraztea, baizik
eta zerbait sakonagoa dela. Aurretik Sakabik pauso garrantzitsuak eman zituen. Oso kezkatuta ibili
zen soinu txikiari prestigio bat ematearekin eta musika aldetik bere burua janzten saiatu zen.
horregatik bere jotzeko moduaren ezaugarri nagusia gardentasuna dela esango nuke, nota bakoitza
garbi jotzea alegia. Lajak eta Martinek, bi adibide nabarmen aipatzearren, maila bat gorago eraman
zuten trikitixa eta, nolabait esateko, ukitu profesionalago bat eman zioten ofizioari.
-Zure aitak, Manuel Arrizabalaga “Izer”ek, Euskal Herriko txapelketetan hartu zuen parte.
Aitak Junkerarekin kointziditu zuen txapeketa batean Tomas Soraluze “Epelde”ren anaia bat eraman
zuen panderoa jotzeko. Epeldeko anaietako bat aitaren arreba batekin ezkondu zen. Gure aitonak ere
tritikixa jotzen zuen eta, bi seme zituenez, zaharrena baserrirako utzi eta bigarrenari saiatu zen
trikitixa erakusten. Baina gure aitak ez zuen etsi, gauez jotzen zuen soinua, baserriko lanak bukatzen
zituenean eta anaia baino hobea izatea lortu zuen. Azkenean osaba geratu zen baserriarekin eta aita
trikitixarekin. Baditugu bi osaba ere, bikiak, guk “osaba amerikarrak” esaten diegunak, han
denboraldi bat igarotakoak direlako. Biak dira pandero-jotzaileak eta oso onak gainera. Ameriketatik
etortzen zirenean sekulako festak antolatzen zituzten, egunak irauten zuen festak. Landakandaren
oihu klasikoa gure osaba horiek patentatu zuten. Egia esan, trikitilarien familiak gurutzatu egiten dira.
Trikitixa odolean transmititzen den gaixotasuna da. Ez daukat soinua jotzen duen neskaren bat
bilatzea beste irtenbiderik. Aitak kontatzen zuen gazteak zirenean Martirietako trikitilariek Urrategi
bailaran Maltzetak edo Zabaletak jotzen zutena entzuten zutela eta erantzun egiten zietela, bi auzoak
elkarri begira baitaude. Esan beharrik ez dago trafikoak gaur baino zarata gutxiago aterako zuela.
Martirietaz esaten zen baserri bakoitzean trikitixa bat zegoela.
AGURTZANE ETA JON ELUSTONDO: “Tapiaren eta Junkeraren garaitik trikitixak ez duela
aurrerapausorik eman iruditzen zaigu”
Agurtzane Elustondo Trikitilarien elkarteko lehendakaria da gaur eta bere familia izan daiteke gurean
belaunaldien arteko kultura transmisioaren eredu. Esker onez gogoratzen ditu Agurtzanek bere aitak
Legazpitik Azkoitira egiten zituen bidaiak, berak 10 urte bete berri, Lajaren etxera eramaten baitzuen
soinua jotzen erakuts ziezaion. Berak trikitixa jotzen du eta anaiak, Jonek, panderoarekin laguntzen
dio. Bigarren ahizpa bat dute panderoa gustuko duena eta laugarrenak, Nereak, kontra egiteagatik
edo bertso eskola batean eman zuen izena. Gaur nabarmentzen den bertsolaria da.
-Begi bistakoa da familiatik datorkizuela.
AGURTZANE: Aita Gelatxoren baserritik gertu jaiotakoa da, Elgoibarren, eta gaztea zela, itxura denez,
akordeoia jotzen zuen, amak horretan inoiz ikusi ez badu ere. Gure amaren etxean ere bazen trikitixa
zahar bat. Hamar urterekin, beraz, solfeoko irakasleak ea zer instrumentu jo nahi nuen galdetu
zidanean, soinu txikia jo nahi nuela erantzun nion eta errieta egin zidan. Hobeto esanda, amari egin
zion errieta, ea zertan zuen burua esaten zion gaur egun trikitixarekin pentsatzen egoteko. Urteak
igaro dira eta musika eskola horretan trikitixa erakusten dute gaur. Orduan erabaki zuten Lajarekin
hasiko nintzela ikasten. Aitak eramaten ninduen autoan, baina errelebotan lan egiten zuenez, ezin
zuenean bi autobus hartzen nituen, bata Zumarragaraino eta handik beste bat Azkoitira eta geltokitik
Laja baserrira oinez joaten nintzen. Luxu bat izan zen Lajarekin ikastea. Garai hartan puri-purian
zeuden trikitilariak ziren bera eta Martin. Ondoren enpresa ikasketak egin nituen Oñatin eta
Donostian eta Lenbur fundazioko gerentea naiz gaur egun. Gorabeherak izan ditu trikitixarekin, baina
inoiz ez diot jotzeari utzi.
JON: Umetatik eraman gintuzten Lajak eta Martinek jotzen zuten jaialdietara. Hiru zaharrenei trikitixa
maitatzen erakutsi ziguten. Txikienarekin ere saiatu ziren, baina kontrako efektua lortu zuten. Nereak
aspertuta zegoela esan zuen panderoaz eta soinu txikiaz eta bertso eskolan eman zuen izena.
Ingeniaritza ikasketak egin zituen hark. Euskal Herritik kanpo egon da lanean urte batzuk, baina
etxera itzuli orduko bertso saioetan zentratu da eta gozatzen ikusten dut. Agurtzanek eta biok
hasieratik jo dugu elkarrekin. Taldeko pare bat diskotan hartu dugu parte. “Faborez” izenekoa
grabatu genuen lau bikotek eta Goierriko trikitilari guztien artean grabatu genuen “Bizi”.
-86 eta 88ko finaletan izan al zineten?
AGURTZANE: Finalean bakarrik ez, kanporaketa guztietan izan ginen. Nik 11 urte bakarrik nituen
(75ean jaio zen) eta Jonek 13, baina oso ondo gogoratzen ditut garaiko giroa eta Joseba Tapiaren eta
Kepa Junkeraren inguruan eman ziren eztabaidak. Posible da urte batzuk lehenago Lajaren eta
Martinen inguruan ere eztabaidak egotea, baina seguru nago ez zutela halako berotasunik eta
erreminik izango. Bi bando eratu ziren, Tapiaren aldekoak batean eta Junkeraren aldekoak bestean .
Gure ama Zumarragako Agiñeta auzokoa da. San Martin egunean egiten dira han festak. Ez dakit
86an edo 88an izan zen, baina festa batzordeak Tapia kontratatzea erabaki zuen eta sekulako
haserreak sortu ziren auzoan eta egoera baretzeko ostiralean Tapiak jo zuen eta larunbatean
Junkerak.
Forofismo hori nekazari giroko auzo eta herri txikietan eman zen nagusiki. Guk bi trikitilariei
jarraitzen genien.
JON: Hiru bat urtetan zehar Tapiak eta Junkerak Gipuzkoako geografia osoa zapaldu zuten. Leku
askotan biak kontratatzen zituzten. 86an hasi eta 89ra bitartean auzo guztietara iritsi ziren eta
errepertorio zabalarekin ibili ziren gainera. Tapiak, esate baterako, Beatlesen bertsioak egiten zituen,
ingelesez kantatzen zuen eta trikitixa joaz egiten zuen hori, panderoarekin eta erritmo kaxarekin
lagunduta. Junkerak bere piezak gehiago sartzen zituen.
AGURTZANE: Lehenagotik ari ziren errepertorioa berritzen. Lajak, esate baterako, oso estilo
pertsonala zuen. Martiek ere pieza oso landuak jotzen zituen. Tapiak modernotasun aireak ekarri
zituen eta rockaren erritmoak sartu zituen trikitixan. Kepa, Zabaleta eta Motrikuk, berriz, osagarri
inprobisatuak sartzen zituzten eta duoak. Zabaletak jartzen zituen oinarrizko doinuak eta horren
gainean Kepak inprobisatu egiten zuen, nahi zuena egiteko askatasuna hartzen zuen. Keparen joaldi
haiek luxu bat izan ziren. Gaur egun pieza asko daude Kepak orduan indarrean jarri zituen baliabide
eta apaingarriak erabiltzen dituztenak. Eta gero, imitatzaileak ere badaude eta ez dira gutxi. Tapiak
ere baditu imitatzaileak. Ordutik hona trikitixan ezer gutxi berritu den inpresioa dugu.
JON: Inprobisaziorako gaitasunean Kepak ez du parekorik. Tapiaren nahiz Junkeraren merituak
aipatzen hasi eta zerrenda luzeak egin ditzakegu. Tapia izan da kantuan egiten duen trikitilari
bakanetakoa eta estilo oso berea du kantuan ere. Baina Kepak Zabaletarekin egiten zituen duoak
gaindiezinak ziren eta dira gaur ere. Gauza bat da bitxia: aipatu ditugun txapelketa horietan Kepak
Tapiak baino kritika gehiago jaso zituen, baina aski da gaztetxoen lehiaketa batera joatea eta Keparen
piezak askoz ere gehiago entzuten dira Tapiarenak baino. Bere piezak klasiko bihurtu dira.
AGURTZANE: Kepak gutxik bezala ezagutzen du instrumentua eta tonu eta akorde berriak erabili ditu.
Fandangoaren eta arin-arinaren egiturak goitik behera aldatu ditu, erritmoari eutsi badio ere. Pieza
hasiera eta bukaerak eraberritu ditu eta badago jende bat barkatzen ez diona. Ohituraren indarra da.
Beste batzuek, ez zitzaiela gustatzen esan beharrean, ez zekiela jotzen esaten zuten. Nik esan
beharra daukat doinurik zailenak ere Kepak jotzen dituenean errazagoak ematen dutela eta hori
sentimenduarekin jotzen dakielako da. Ezingo da inoiz esan Kepagatik makina bat denik. Jotzen
duena barrutik ateratzen zaio eta talentu berezia du konposiziorako. Gero, agertokian egoten daki,
bere keinuak eta trantzeak ikusgarriak dira. Bere kontra daudenak ez direla asko pentsatu ohi dut
askotan eta horietako batzuk poseagatik daudela kontra eta ez gustatzen ez zaielako.
JON: Kepa Junkearen garrantzia neurtzeko aski da jotzera ateratzen den bakoitzean sortzen duen
ikusminari arreta jartzea. Joan den urteko San Jose eguneko jaialdiaren ondoren afaltzen elkarren
ondoan jarri ziren Kepa eta Laja eta elkarrekin jotzen hasi zirenean jendetza bat gerturatu zitzaien
beren mugikorrekin argazkiak ateratzera. Bazekiten une historikoa zela hura. Oso une berezia izan
zen. Gainera, urteak dira Lajak eta Kepak oso harreman berezia dutela elkarrekin.
-Posible da belaunaldi zaharreko maisuen eta Kepa Junkeraren artean elkarrekiko mirespen bat
egotea ere.
JON: Seguru baietz. Inoiz egon naiz bere Busturiako etxean eta badakit badagoela elkarrekiko
mirespen hori. Maisu zaharrek badakite Kepak eurek susmatu ere egiten ez zituzten eremuetara
eraman duela trikitixa. Mirespen hori errazagoa da kideen artean, bakoitzak bestearena hobeto
apreziatzen duelako.
AGURTZANE: Keparen formazio musikala Lajarena baino mila bider zabalagoa da. Munduko folk
musikari handienekin kolaboratu du eta jazzeko batzuekin ere bai. Eta nazioarteko elitearekin lan
egiteko oso ona izan behar duzu.
JON: Ekoizle bezala ere oso ona da. “Betiko trikitixa” berak atera zuen eta gu guztiontzat
derrigorrezko erreferentzia izan da. Egia da ez dela beste munduko ideia, baina berak eduki zuen eta
berak atera zuen aurrera. Bi trikitilari belaunaldiren piezak biltzen ditu. Arrola, Maltzeta, Auntxa,
Martin, Joseba Tapia eta beste zenbaitek estudioan grabatu zituen eta Sakabiren batzuk ere sartu
zigtuen, dagoeneko erretiraturik zegoelako.
-Hitz egin iezaguzue panderoaz. Instrumentu apala da….
AGURTZANE: Kanpoan jotzen dugunean leku batzuetan ikusmin gehiago pizten du panderoak
trikitixak baino. Niretzat trikitixaren parte garrantzitsua da.
JON: Nik ezagutu nuen Martinek eta Imanol Iturbidek izan zuten harremana. Badute disko bat behin
eta berriz entzun dudana eta entzuten jarraitzen dudana. Motriku, Landakanda eta Leturia ere
ezagutu ditut eta uste dut pandero-jotzaileak ez duela protagonismo gehiegirik bereganatu behar.
Hori bai, giroa ez hozteko ahaleginak eta bi egin behar ditu, baina inor aspertu gabe. Oso lan
konplexua da. Rock banda batean kantariak duen egiteko bertsuak ditu, parekotasunen bat
aipatzeko. Gero, trikitilariaren eta pandero-jotzailearen arteko konpenetrazioa dago. Gutxitan
gertatu zait, baina erritmorako senik ez duen trikitilari batekin panderoa jotzea zigor izugarria da.
JUAN TAPIA (Eleuterio Tapiaren semea): “Junkerak Gipuzkoan egin zuen sarrera ikusgarria
izan zen”
Juan Tapiak 17 edo 18 urte zituen Kepa Junkera ezagutu zuenean. Bere lehen plazetako bat egiten
ari zen bere jaioterrian, Asteasun, eta atsedenaldietako batean Kepa gerturatu zitzaion eta trikitixari
buruz hitz egiten hasi zitzaion eta halako batean ea soinua proba zezakeen galdetu zion. Juanek eman
zion soinua eta Kepa bere malabarismoak egiten hasi zenean erabat txundituta utzi zuen. Geroztik
haren ibilbidea gertutik jarraitzen du.
Juan Tapiatarren familiakoa da. Eleuterio Tapia (1926, Asteasu), Juanen aita, gizon harrigarria izan
zen, trikitilari handia izateaz gainera (Sakabi, Auntxa eta beste batzuekin batean gerra ondoko
belaunaldiko figura behinenetakoa izan zen), herri kiroletan ibili baitzen. Bere semeak, Juanek,
trikitixa erakusten egiten du lan Gipuzkoako musika eskola batzuetan eta aitari buruz ari dela, beren
etxeko sukaldean Perurena, Yurrebaso edo Urtain bezalako figurak nola egoten ziren gogoratzen du.
Eleuterio Tapia segalaria izan zen. Ez zuela sekula apustu bat galdu esaten zuen laineza puntu
batekin. Gisa horretako markak esplikatzeko orduan haren prestakuntza nabarmentzen du semeak,
zehaztasun izugarriarekin prestatzen baitzen. Gainera, garaiz erretiroa hartzen jakin izan zuen.
“Behin eta berriz errepikatzen zigun gauzak ondo egin behar direla edo ez direla egin behar”,
gogoratu du. “Segalariak eta harri-jasotzaileak prestatzen zituen eta lan hori erromeriekin
partekatzen zuen. Ni mutikoa nintzenerako aita famatua zen herri kirolen munduan eta baita
trikitixarenean ere. Egun batzuetan autoen joan-etorria amaierarik gabea zen gure etxeko atarian.
Artean ez zen telefonorik iritsi gure etxera eta abisuak ematera autoz etortzen ziren. Jaunartzeak,
ezkontzak, erromeriak trikitixarekin egiten ziren orduan. Horri herri kiroletakoen bisitak gehitzen
badizkiogu, pentsa!. Kontuan izan garai horretan aitak mutil dezente prestatzen zituela. Ni 63an jaioa
naiz eta hamar bat urte nituela ezagutu nituen etxean Perurena, Urtain eta beste hainbat. Apustu bat
itxi aurretik prestatzaile bezala aita hartzeko hitz egitera etortzen ziren edo besterik gabe zalantzak
argitu edo kontsultak egitera. Gure etxean zegoen etengabeko sartu-irtenarekin normala da
baserriko martxa amak eraman behar izatea. Baserria txikia zen: bost bat behi izaten genituen, bost
bat txahal eta mandoa. Eta gero herri kiroletan izena hartuko zuen mutil batek laguntzen zigun,
Paskualsorok. Soldadutza egin aurretik etorri zen gure etxera eta hogei bat urte eman zituen gurekin.
Segalaria zen eta harri-jasotzailea. Haren laguntzari esker aitak denbora gehiago izan zuen kirolariei
aholkuak eman eta prestaketan laguntzeko eta baita erromerietan jotzeko ere”, gogoratu du.
Tapiatarren leinua Eleuteriorekin hasi zen. “Kontatzen zuenez, 15 urte zituela auzoko baserri batetik
trikitixa bat ekarri zuen eta, gaua bazen ere, ezin izan zuen egon soinuari botoi batzuk jo gabe. Bere
anai-arrebak oheratuta zeuden, baina hotsak entzun zituztenean jaiki eta korrika sukaldera joan
ziren. Hamabost senide ziren eta atera zuten iskanbilarekin aita esnatu zuten, gure aitona alegia, eta
sekulakoak esan omen zizkien, aste barruan ezin zelako soinurik jo. Gure aitak maiz gogoratu ohi
zuen eszena hori”, jarraitu du.
Mindegiako (Asteasun Mutegia esaten diote baserriari Gipuzkoako euskalkian) sukaldean biltzen
ziren anai-arreba horien artean Joseba Tapiaren aita ere bazegoen, Juanito Tapia.
Bere kontura ikasi zuen pieza batzuk jotzen Eleuterio Tapiak. Ondoren herriko organu-
jotzailearengana jo zuen eta inguruko erromerietan jotzen hasi zen, dozena erdi bat pieza bakarrik
bazekizkien ere. Hala kontatzen zien behintzat aitak bere semeei. Trikitixarekin irabazten zuen diru
apurra aitari entregatzen omen zion eta orduan hasi omen zen aita jarreraz aldatzen, diru sarrera bat
zela ikusi zuenean. Elgetarekin hitz egitera iritsi zen eta hau behin baino gehiagotan izan zen
Mindegian Eleuteriori erakusten.
Mindegia Asteasutik Villabonara doan errepide ertzean dago erdi bidean, Zizurkil parean.
Juan Tapiak bere aitarekin hasi zen soinua jotzen ikasten 15 urte zituenean. 17 urterekin egin zuen
bere debuta Asteasun. 18rekin aitarekin batean klaseak ematen hasi zen, Tolosan Isidoro
Larrañagarekin musika eta Donostian delineazioa ikasten jarraitzen zuen bitartean.
Soldadutza egin eta enpresa batean hasi zen lanean, baina berehala ohartu zen berea musika zela
eta, zehatzago esanda, musika irakaskuntza eta trikitixa erakusteko metodologia propioa lantzen hasi
zen. Bere ikasleak partiturekin hasten dira jotzen, zer jotzen ari diren ohartarazteko, zer akorde
erabiltzen dituzten edo akorde horri zer armonia dagokion jakin dezaten, baina bidean aurrera egin
ahala memoria eta entzumena lantzen hasten dira, hori baita modu libreagoan jotzeko aukera
bakarra, berak dioen bezala, “musika sormena baita gauza guztien gainetik”.
Aita 88an hil zen eta erromeriak utzi eta irakaskuntzari heldu zion bete-betean. Asteasu, Usurbil eta
Beasaingo eskoletan ematen ditu klaseak. 8 urtetik hasi eta 60 bitarteko ikasleak ditu. Gehienak
gazteak dira, baina baditu tartean 60tik dora doazenak ere eta pieza batzuk ikasteko asmoarekin
etortzen direnak.
Tapiatarren leinua ez da agortu. Bere iloba batek (bere besoetakoa da) Trikizio taldean jotzen du
trikitixa eta bere alabak ere, Aiorak, trikitixa jotzen du 16 urterekin.
-Zer meritu zituen zure aitak trikitilari bezala?
Ez zuen trikitilari izatea oso benetan hartzen, ez zuen inoiz horretan arima osoa jarri. Baserrian lan
egiten zuen, erromeriak egiten zituen eta trikitixa erakusten zuen, baina bere benetako grina, bere
benetako bokazioa herri kiroletan eta apustuetan zuen. Segalari eta harri-jasotzaile gazteei aholkuak
ematea gustatzen zitzaion. Trikitixa oso erraz uzten zuen kirolagatik eta, hala ere, ona zen soinua
jotzen. Garai horretan trikitilari onak ez ziren asko eta Auntxa, Zialtzeta, Egurrola edo Maltzetarekin
batean garaiko elitean ibili zen. Eleuterio Tapiak izen bat izan zuen. Bere jotzeko modua oso garbia
zen. Esaten zuen osaba Juanito oraindik ere garbiagoa zela jotzen. Aitak gaitasun gehiago zuen
inprobisaziorako eta konposatzen ere bazekien. Osabak pieza bat ikasi eta bere horretan jotzen zuen.
Dena den, aitaren ezaugarririk nabariena jotzeko zuen abiadura zen. Ez dakit seguru nork, baina uste
dut Sakabi izan zela, txapelketa batean galdetu omen zion ea zeinek azkarrago bukatu jokatzen zela
uste al zuen. Berandu hasi zen txapelketetan, 45 urterekin. Urte horretan Lajak irabazi zuen, baina
puntuetan berdindu egin zutela komentatu zen eta aita bera izan zela epaimahaikoengana joan eta
txapela Lajak merezi zuela esan zuena. Abiadura meritutzat hartzen zuten. Erromeria batzuetan
mantso samar joz gero, dantzan ari zirenak kexatu egiten ziren. Orain trikitilari askok errepertorio
finkoarekin joaten dira, baina orduan errepertorioa egokitu egiten zuten, jotzen ari ziren lekuari edo
aurrean zuten publikoari erreparatzen zioten.
-Zer grabazio utzi zituen Eleuteriok?
Disko bat grabatzeko zorian izan zen Landakanda lagun zuela. Bartzelonan grabatzeko proposamena
egin zieten eta piezak prestatzen ari ziren, baina segadorarekin lanean ari zela istripua izan eta
behatza galdu zuen. Bere ordez Laja joan zen. “Tapiatarren trikitixa” diskoa geratzen da. Bertan
Loiola Irratian egin zizkioten pieza batzuk bildu ziren eta txapelketetan jotako batzuk ere bai, baina
nolabaitekoak dira grabazio horiek.
-Noiz ezagutu zenuen zuk Kepa Junkera?
Euskal Herriko txapelketetan hasi aurretik txapelketa txikiago batzuetan ibilita zegoen Kepa. Nik
Gipuzkoan Junkerak eta Zabaletak egin zuen sarrera ezagutu nuen eta ikusgarria izan zen. Hain zen
beste guztietatik ezberdina, hitzik gabe geratzen ginela. Nik Asteasun ezagutu nuen Kepa. Hasi berria
nintzen eta jotzen ari nintzen lekura etorri eta bera ere trikitixarekin ari zela esan zidan eta ea utziko
nion soinua frogatzen. Herriko festak ziren eta seguru asko Bilbotik etorriko ziren emanaldiren bat
egitera, ez dakit. Trikitixa utzi nion eta ariketa batzuk egiten hasi zen, ez zen hasi pieza jakin bat
jotzen, baina nahikoa eta gehiegi izan zen ni zur eta lur uzteko. Berak 17 edo 18 urte izango zituen.
Urteak arituko zela jotzen pentsatu nuen eta ziria sartu zidala. Erromeriako atsedenaldi batean
gertatu zen hori. Hasieran bere agerpenak tartekakoak izan ziren, gero sarriago agertzen hasi zen eta
txapelketan jo zuen aldaba.
-Zer frogatu zuen Junkerak 86ko txapelketan?
Oso gutxik dituzten dohainak zituela. Baina jendeak ez zuen bere estiloa asimilatu. Gogoan dut nola
pieza bati orduan bat ere ohikoa ez zen amaiera bat eman ziola. Jende askok bi eskuak burura
eraman zituen eta hanka sartu zuela esaten hasi ziren, hori ez zela horrela. Entzule gehienek
pentsatzen zuten fandangoaren edo arin-arinaren egitura ezin dela ukitu eta Kepak molde horiek
apurtu egiten zituen. 86ko finalera arte jendeak ez zuen ezagutzen zer egiten ari zen. Zurrumurruak
zeuden, besterik ez. Bilbon bazela gazte bat esaten zuten oso itxura onekoa, baina inork ez zekien
gehiagorik. Eta Kepak txapelketak baliatu zituen lortutako emaitzak ezagutzera emateko. Orain grazia
egiten dit gogoratzeak: nire inguruan bazegoen bat esaten zuena: “Irakasle on bat ondoan jarri eta
gazte hau aterako litzateke aurrera”. Finala iritsi zen eta jendeak ez zuen ulertzen pieza bat eskala
kromatiko batekin buka zitekeenik edo beste inork aurretik erabili gabeko akordeak erabil
zitzakeenik. Baina dena ondo ateratzen zitzaion. Hain zen berritzailea non bere pieza bakoitzak
lekutik kanpo uzten zintuen eta aldi berean liluratuta. Egia esan, izugarri ona zen.
-Baino aditu talde batentzako bakarrik al zen ona?
Hori da arazoa. Beharbada horixe gertatu zen. Nik nire esperientziatik hitz egiten dut. Badakit jende
askok ez zuela ulertu. Bere piezek ez zutela dantzarako balio, esaten zuten eta hori ez da horrela,
begi bistakoa da pieza haiekin dantzan egin zitekeela. Zabaleta eta Motrikurekin erromeriaz
erromeria hasi zenean jendeak dantza egiten zuen bere piezekin. Zabaletak eta Junkerak
erromerietan egiten zutenak ere merezi du komentario bat. Ni ikusita nengoen trikitilari bikoteak
duoak egiten: batek oinarria markatzen du eta besteak lagundu egiten dio beste tonu batetik. Baina
Zabaletak eta Junkerak egiten zutena beste zerbait zen: Zabaletak markatzen zuen melodia eta Kepak
inprobisatu egiten zuen edo, beste era batera esanda, nahi zuena egiten zuen. Normalean bigarren
bueltan (fandangoak gehienetan bi buelta izaten ditu) trikitilariak errepikatu egiten du. Kepak ez zuen
egundo errepikatzen. Batzuk ezin sinetsirik egoten ginen begira. Oso zaila da, bestalde, hainbeste
nota akorde eta armonia errepikatzea ere. Ezinezkoa da hori dena memorian pilaturik eramatea.
Kepak, ondorioz, etengabe inprobisatu egiten zuen. Eta lehen esan dudana, Keparen piezak balio
zuten dantzarako. Kepak ematen zituen erromeria guztietara joaten nintzen eta jendea jo eta ke
ikusten nuen dantzan.
-Baina bakarka jotzen zuenean nola moldatzen zen?
Bakarka jotzen zuenean zailagoa zen. Batzuetan kosta egiten zitzaigun zer jotzen ari zen antzematea
ere. Baina jendeak dantzan egiten zuen, baita Kepak bakarrik jotzen zuenean ere. Berak ez zuen inoiz
erritmoa galtzen, horretan ez dut inolako zalantzarik. Hasieratik zekien zer nahi zuen eta musikari
handi bat dela erakutsi du bere ibilbidean zehar.
-Itzul gaitezen 86ko eta 88ko finaletara. Nola bizi izan zenituen?
Keparekin uste dut bidegabekeria bat egin zela. Epaimahaiak erabaki zuen bere piezak ez zirela behar
bezalakoak izan, baina urte gutxiren buruan klasiko bilakatu ziren eta gazteak lehiaketara pieza
horiekin joaten hasi ziren. Ni nire ikasleekin joaten naiz txapelketara eta Keparen piezak jotzen
zituzten gazteak saritzen ikusi ditut. Jende batek 86ko finalean esan zuen pieza horiek ez zirela
trikitixa eta lelo hori errepikatzen jarraitu dute.
-Joseba Tapia eta Kepa Junkera bateratsu atera ziren jendaurrera. Zer esan dezakezu zure lehengusu
Josebari buruz?
Biak dira handiak eta irudipena dut genioak binaka etortzen direla, batek bestea behar duela
hazteko. Beste eremu batzuetan hala gertatzen da eta baita bizitzan ere. Elkarrengana bildu eta aldi
berean urrunduko balira bezala funtzionatzen dute. Aurrera egiteko elkarren beharra balute bezala
funtzionatzen dute. Pilotaren munduan, esate baterako, Belokik Eugi zuen ondoan, Retegik Galartza,
Olaizolak Irujo. Imuntzo ere sekulako trikitilaria da, baina beste biak nabarmendu dira. Joseba
Tapiaren jotzeko modua gertuagoa dago jendearengandik. Baina Josebarekin ere arazo handiak egon
ziren azken aldiz txapelketan parte hartu zuenean. Gogoan dut finalaren aurretik etxera etorri
zitzaidala eta bere piezak jo zizkidala. Ni gauza berrien zalea naiz, nahiz eta badakidan berri guztiak ez
direla onak. Asko gustatzen zitzaizkidala esan nion, baina publikoarekin arazoak izango zituela eta
halaxe gertatu zen. Aurkeztu zuen arin-arinak mozketa ezusteko bat zuen, parentesi gisako bat, oso
onak ziren akorde batzuk sartzen zituen, baina jendea despistatzeko bidea ematen zuten… Uste dut
berrikuntza horietan bazegoela probokazio nahi bat, publikoarekiko joko bat erabat zilegi dena, baina
gaitzespena sortzeko ere balio lezakeena. Txapelketara doan jende gehiena dantzan asko ibilitakoa
izaten da. Hori da gustua markatzen duena eta jende hori tradizioaren aldekoa izan ohi da. Aipatu
ditugun final horien ondoren epaimahaia trikitilarien lana arautzen hasi zen, jo beharreko piezak jarri
eta arau batzuk markatu zituen eta uste dut horrek mugak jartzen dizkiola trikitilariaren sormenari.
Hain zuen ere orduan hasi zen txapelketen gainbehera.
GAIZKA PEÑAFIEL: “Puntu batera iritsi da non sustraietara itzultzeko premia zuen”
Lezaman jaioa da 1985ean. Gaizka Peñafielek ez du trikitixa bizi izan familiako ondare moduan, ez eta
ere inguruarekiko balore gisa. Txorierrin apenas dagoen trikitilaririk. Baina, hala ere, txikitandik
telebistaz jarraitzen zituen trikitilarien txapelketak eta entzuten zituen diskoak. 8 urterekin hasi zen
herriko dantza taldean txistua jotzen eta 12rekin Zamudioko Bertokon hasi zen, didaktika
planteamendu berriekin lan egiten duen musika eskolan. Han hasi zen trikitixa jotzen eta berehala
jakin zuen hura zela bila zebilen instrumentua. Gaztañagarekin eta Allur anaiekin ikasi zuen.
“Gipuzkoarrak izan dira nire irakasleak. 15 urterako herrialde horretako klasikoen piezak jotzen
nituen. Allur anaiek jotzen erakusteaz gainera gaur musika eskoletan ematen ez den gauza bat eman
zidaten, trikitixaren inguruko kulturaren berri, mundu hori irudikatzeko ezinbestekoak diren
pasadizoak, esamesak, istorioak erakutsi baitzizkidaten. Kultura hori teknika bezain garrantzitsua da
mundu horretan mugitzeko”, dio.
Hamalau urterekin entzun omen zuen lehen aldiz Kepa Junkeraren disko bat. “’Bilbao 00:00H’
argitaratu zuenean, 1999an, gurasoek oparitu zidaten, baina ez nuen hamar minutu ere entzungo. Ez
zidan ezer esaten eta tiraderan sartu nuen. Gaur nire disko kutuna da. Bat aukeratzera behartuko
baninduten, ez nuke zalantzarik izango, baina horrekin gozatzeko belarria landu behar da aurretik. Ni
garai hartan triki-poparekin liluratuta nenbilen. Alaitz eta Maider edo Maixa eta Itziar ziren nire
erreferentziak, haiek ziren nik etorkizunean izan nahi nuenaren eredu. 16 urterekin folk musika
egiten zuen jendea ezagutu nuen, ni baino zaharragoak ziren eta nik baino kultura gehiago zuten
musikan. Junkerak trikitixari buruzko liburu bat bazuela esan zidaten, BBK-k argitaratua, eta bigarren
zatian partiturak zituela. Niretzako aurkikuntza bat izan zen. Bere hogei bat pieza ikasi nituen eta
bere estiloa barneratzen hasi nintzen. Nire lagun batek esaten du Kepa izan dela nire irakasle
birtuala. Bere diskoak entzutearen poderioz, bere errepertorioa jotzearen jotzez, bere estiloaren
osagarriak asimilatzen joan naiz, armoniak batez ere. Trikitixa jotzen dudanean beti galdera bera
egiten didate: “Keparekin ikasi duzu, ezta?”, jarraitu du.
Gaur musika eskola ezberdinetan ematen ditu klaseak, disko bat du argitaraturik, trikitixari buruzko
webgune bat eta musika taldeentzako ikus-entzunezkoak egiten ditu, Esne Beltzarentzat esate
baterako. Ibilbide polita badu ere, Aristerrazun jo zuen eguna bere bizitzako egun gogoangarritzat
dauka.
-Nola uztartzen zenituen 16 urterekin Gipuzkoako trikitilari klasikoen piezak Junkeraren estiloarekin?
Nik adin horretan ematen zidaten guztia jotzen nuen. Trikitixaren munduan badago adin bat,
engantxatzen bazara, dena asimilatzen eta dena jotzen duzuna. Duela egun batzuk egon nintzen
Getarian jokatu zen Trikitilari Gazteen Txapelketako finalean eta makina batzuk direla ohartzen zara.
Hainbesteko gosea eta grina dute, sekulako erraztasunarekin ikasten dutela dena. Estilo guztiak
txandakatzen dituzte. Oso ikuspegi irekia dute. Nire irakasleak ere, Allur anaiak, horrelakoak ziren,
oso irekiak, eta errepertorio zabalarekin ibiltzen ziren. Tapia edo Junkeraren aldeko eta kontrakoen
80ko hamarkadako eztabaida eta istiluak oso urrun gelditzen zitzaizkien. Eztabaida haietatik gelditzen
den gauza bakarra oinarrietan sartu duten arau bat da, piezaren “dantzagarritasuna” neurtzen duena
eta hori txorakeria bat da, zeren solfeoa erakusten duen edozein irakaslek baitaki Keparen piezak
beste edozeinenak bezain fandangoak direla. Beste inork zapaldu gabeko bide bat aurkitu zuen
Kepak. Tapiak ere gauza berriak egin zituen, nahiz eta ez zen Kepa bezain urrun iritsi. 86ko finalean
Tapiak jo zuen fandangoa oraindik ere oso berritzailea iruditzen zait. Baina aldagai asko zituen bere
alde: euskaraz hitz egiten zuen, trikitilari familia batekoa zen eta ez ziren berarekin sartu edo
eskuzabalagoak izan ziren. Kepa erdalduna zen, Errekaldekoa, ez zuen izen handiko irakasle baten
itzalik ere, autodidakta baitzen.
-Zer esan nahi duzu, bi jenio horien ondotik belaunaldi galdu bat etorri zela?
Junkeraren eta Tapiaren ondoren triki-poparen korrontea etorri zen. Beren bidea egin zuten trikitilari
horiek. Baina horien ondoren gure belaunaldia dator, 80ko hamarkadan jaiotakoena, eta guk ez dugu
hanka markarik ere utzi. Ez dut uste gure belaunaldian erreferenterik dagoenik. Ezingo nituzke bost
izen baino gehiago aipatu.
-Zure aurreko belaunaldiko trikitilariek Junkeraren eta Tapiaren etorrerak eragin zuen talkaz mintzo
dira. Zuek ez zenuten horrela bizi izan.
Guk ez dugu inolako arazorik izan estilo tradizionala eta berria txandakatzeko orduan, bietan
berdintsu mugitzen gara. Baina talka haren oihartzunak iritsi zaizkigu. Oraindik tentsioak hor
jarraitzen dute. Lehiakortasun gehiegizko bat dago gure artean, errezeloak ere bai. Uste dut
trikitilariok taldeko irudia gehiago bultzatu beharko genukeela, bertsolariek egiten duten gisan,
adibide bat jartzearren.
-Aipa al ditzakezu Junkerak trikitixari egin dizkion ekarpen batzuk
Keparengan gehien miresten dudana bere ausardia da, gauzak egiteko orduan duen askatasuna. Uste
dut ez diola inori ezer zor eta hortik datorkiola ausardia hori. Irudipen hori daukat. Askatasun horri
esker egin ditu berak nahi zituen gauzak berak nahi zituenean. Ez du trikitixaren munduan izango
duen eraginean pentsatzen, eremu askoz ere zabalagoetan pentsatzen du. Ikuspegi zabal hori
Oskorrirekin bizi izan zuen garaikoa dela uste dut, oso kultura zabala duen taldea baita. Urte askoko
ibilbidea darama, baina sormenerako duen grina ez zaio apaldu. Proiektu batean sartzen da eta
hurrengoarekin pentsatzen ari da eta oharrak idazten ditu. Gauzak aldez aurretik ikusten ditu, igarle
batek bezala. Sortzaile gutxik izaten dute gaitasun hori. Beti ustekabean harrapatzen gaitu. Egia da
bere bitartekoak ere ugariak direla. Hasteko, formazio oso zabala du, nahiz eta autodidakta izan. Ez
da sinestekoa etxean zer disko piloa duen, erotzeko modukoa da. Eta genero guztiak interesatzen
zaizkio. Tartean zarzuela ere aurki dezakezu. Galdetzen diozu ea zarzuelak trikitilari batentzat inolako
interesik izan dezaken eta baduela frogatzeko gai da, gai da gauza oso interesgarriak aurkitu dituela
esateko. Azken urteotan hain teknikoa izateari utzi dio eta melodikoagoa bilakatu da. Gero eta
zailagoa da bere piezak trikitixarekin bakarrik jotzea. Baina ibilbide horretan puntu batera iritsi da
non berriro hasierara itzultzeko premia sentitu duen. Eta inor espero ez zuenean, guztiok kontrakoa
espero genuenean, bilduma gisako ikuskizun batekin agertu zaigu, azken urteotan egiten zenarekin
zerikusirik ez duen zerbaitekin; alderantziz, sustraietara itzuli da eta berriro fandangoak eta arin-
arinak joko ditu. Noski, fandango eta arin-arin horiek bere modura joko ditu, Kepak ez baitu inoiz
pieza bat modu berean jotzen. Denok sartzen ditugu aldaketak pieza batean, baina aldaketa txikiak
izaten dira, baina Kepak egiten duena besterik da, kapaza baita zati bat erabat berria sartzeko, gai
baita tonuz aldatu edo beste trikitilari guztiontzat guztiz arraroak diren tonuak erabiltzeko. Baina
berari erraztasun harrigarri batekin ateratzeko zaizkio. Uste dut soinu txikiak eman dezakeena
ateratzera iritsi dela, mugak ezagutzera alegia. Ezkerreko hamabi botoiekin ezin da egiten duena
baino gehiago egin, bakarrik ari denean bereziki, banda bat atzean duela ari denean errazagoa baitu,
baxu-jotzailea duelako, baina bakarrik ari denean baxuekin egiten dituen gauzak besteontzako
pentsaezinak dira. Nik berritzailetzat dut neure burua, baina Kepa ikustera joaten naizen bakoitzean
belarrondoko bat ematen dit. Ez ditu oinarri handiak behar, doinu bat ematen diozu eta pieza bat
ateratzen dizu.
-Beste batzuek, Tapiak esate baterako, ezingo al zituzten gauza bertsuak egin?
Tapia ere gai da bere estiloan antzeko gauzak egiteko, baina Tapia beharbada latinoagoa da, tex-mex-
etik edan du edo Quebec-eko musikatik eta bere identifikatzen errazagoak diren osagarriak ditu bere
estiloak. Junkerarengan, aldiz, ezin izaten dira erreferentziak aurkitu. Tarteka pentsatu izan dut
erreferentzia horiek berak kolaboratu duen musikariengan aurkituko nituela. Ibili naiz musikari horiek
lanak aztertzen eta ez dut ondorio garbirik atera. Beste guztiok aztarnak uzten ditugu, gure
erreferentzien arrastoak ikus daitezke, eta askotan gure iturriak aitortu egiten ditugu. Keparekin hori
ez da posible, ezin zaio bere iturriak zein diren antzematen. Bere musika pertsonala da erabat, hain
pertsonala non besteek imitatzen duten. Zenbait trikitilari eta zenbait talde haren fotokopiak bezala
dira. Iruditzen zait gaurko musikan jende kamaleoniko asko dagoela, haizearen arabera mugitzen
dena, gaur rocka egingo dute eta ondoren folka, etzi triki-latin edo tex-mexa eta ondoren triki-rocka.
Zilegi da hori egitea, ez dut ezetz esaten, baina komeniko litzaieke noizean behin zerbait haizearen
kontra egitea. Hori da Keparen merituetako bat, haizearen kontra joateko gai izatea. Orain denak
banda bana atzean dutela ateratzen dira agertokira eta berak bakar-bakarrik ateratzea erabaki du eta
horrek berritzaile izatera behartzen zaitu. Orain bi urte esan balidate Kepa bakarrik aterako zela
agertokira, bere trikitiarekin eta panderoarekin eta koplekin, ez nuen sinetsiko, gurean tradizioak
fama txarra baitu, gauza berriak egiteko margen urria uzten baitu tradizioak. Baina seguru nago hain
osagarri gutxirekin ere gauza berriak egiteko gai izango dela. Sakabiren eta Auntxaren piezak joko
ditu berriro, baina ez haiek jotzen zituzten moduan. Horretara jarrita, gai da haiek jotzen zuten
moduan jotzeko, baina horrela ez luke gozatuko, berak pieza horiek hartu eta jolas egitea nahi du,
barruan daraman deabrua ateratzea. Dena den, gauza bat esan behar da: agertokira bakarrik atera
eta hori egiten saiatzea, puenting egitea bezala da, amildegira jauzia egitea bezala. Erromeria bat
bakarka antolatzea normala da, baina soinu txikia eskuen artean hartu eta ikuskizun bat bakarka
egiteko eroturik egon behar da. Hori Kepak bakarrik egin dezake.
JOSE MARI SANTIAGO “MOTRIKU”: “Lehen hamahiru urtetako ibilbidea egiten lagundu
nion”
Errekalde auzokoa, koadrilako laguna, Kepa Junkeraren eta Zabaletaren pandero-jotzailea izan zen
txapelketetan eta lehen grabazioetan. Kepa oso gertutik ezagutzen duen pertsona da. Baina pandero-
jotzaile izatea kasualitate askoren ondorioa izan zela dio.
“Koadrilakoak ginen Kepa, Iñaki Zabaleta eta hiruok. Haiek biek gehiago ezagutzen zuten elkar,
irakasle berarekin ikasten baitzuten akordeoia. 1980an konpartsek antolatu zuten Bilboko lehen Aste
Nagusian Errekaldeko Kezkalariak konpartsan atera ahal izateko hasi nintzen panderoa jotzen
ikasten. Zezen plazatik Arenalera jaitsi ginen. Iñaki Zabaletak Beti Jai Alai dantza taldearekin jo behar
zuen Santiago plazan, Euskal Dantzarien Biltzarrak emanaldi bat antolatu zuelako. Ea lagunduko nion
galdetu zidan eta bi gautan jo nuen berarekin. Horiek izan ziren nire lehen aktuazioak. Egun batzuk
geroago Kepak eta biok Beti Alai taldean sartzea erabaki genuen”, gogoratu du Jose Mari Santiago
“Motriku”k.
Kepa Junkera Beti Alai taldeak Zuberoako dantzak egiteko erabiltzen zuen fanfarrian hasi zen
akordeoia jotzen. “Alboka jotzen hasi zen hasieran. Gogoan dut nola Tiliñok Leon Bilbaoren etxera
eramaten gintuen albokak afinatzera. Pitari argizaria botatzen zion, bere bularretik ile bat atera eta
irekidura neurtzen zuen… bisitan joaten gintzaizkion bakoitzean zeremonia bera errepikatzen zuen.
Egia esan, Kepak bere kontura ikasi zuen alboka jotzen ere. Geroago etorri zen trikitixa. Nik osaba bat
nuen Basaurin, Migel Olabarrieta, baserrian Royal markako soinu txiki bat zuena. Zelestino
Rodriguezek fabrikatutakoa zen. Oso hots txarrekoa zen trikitixa hori. Iñaki bere aldetik Beti Alai
taldeko Larrinagarekin jotzen zuen eta hark Soprani bat erosi zuenean hasi zen Kepa Larrinagarekin
jotzen”, jarraitu du Motrikuk.
Hiruak hasi ziren Beti Alai dantza taldeak emanaldietan egiten zituen atsedenaldietan jotzen,
“dantzariak arropaz aldatzen ziren bitartean”. Baina 15 edo 16 urte zituztenerako hasi ziren Durango
aldera irteten. “Tiliñok deitzen zigun Iurretako edo Durangoko Pilastra auzoko jaietan jotzeko eta
berehala hasi ginen hiruak eskualde horretako erromerietan jotzen, bai Durango inguruan eta baita
Markina aldean ere”, dio.
Euskal Herriko Txapelketaren finalera 82an iritsi zirenerako (urte horretan Kepak Ramos eraman zuen
panderoarekin eta Motrikuk Iñaki Zabaletari lagundu zion) errodajea eginda zeuden. “Eta 86ko
finalera joan ginenean Gipuzkoan ere ezagunak ginen. Iñaki Zabaletak oinarria jotzen zuen eta Kepak
bere inprobisazioak egiten zituen. Gustatu egiten zitzaion. Makina bat zen. 86ko finalean Kepak
hautsak harrotu bazituen, pieza berriekin joan zelako izan zen. Kontuan izan behar da Lajak edo
Martinek besteek egindako piezak jotzen zituztela, Pepe Yantzirenak esate baterako. Uste dut bi
berrikuntza handi eman zirela txapelketa horretan: Keparen pieza berriak eta Tapia eta Leturiaren
duoak. Jende askoren ustez guk irabazi behar genuen txapelketa hori. Kalejira ere puntuatu duten
txapelketa bakarra izan da eta kalejirako kopla bat ahaztu egin zitzaidan kantuan ari nintzela. 30 urte
igaro dira eta oraindik badago jendea final hartako irabazleak guk izan behar genuela gogorazten
didana”, adirezi du.
Motrikuren ustez, 88ko Txapelketaren historia bestelakoa izan zen. “Finala agertokiz aldatu zen.
Ordura arte Anotako Karmelo Baldan egiten zen, 3.500 lagunentzako kabidarekin, eta 88an
Belodromora pasatzean 8.000 lagun sartu ziren. Athletic-en eta Realaren arteko derbia ematen zuen,
jendea bozinak jotzen eta ikusmin izugarriarekin. Gu proposamen askoz ere ausartago batekin joan
ginen eta epai-mahaiak zigortu egin gintuen. Iraultza txiki bat izan zen, arauak apurtzera joan ginen,
denborak esate baterako. Hiru final horiek Keparen ibilbidea markatu zuten eta bide horri eutsi dio
ondoko urteetan. Nik ibilbide horren lehen 13 edo 14 urtetan hartu nuen pate modu aktiboan. Baina
geroztik ere harreman estua izan dut Keparekin, nahiz eta lan kontuak tarteko Euskal Herritik kanpo
hogei urtetik gora eman ditudan”, jarraitu du.
Jose Mari Santiago “Motriku” ingeniaria da. AMCOR multinazionalarena den Lezoko lantegi baten
zuzendari orokorra da. “Enbalajerako osagarriak egiten dituen multinazionala da eta kanpoan egin
ditudan urteetan lantegiak berregituratzen ibili naiz gehienbat. Zuzenari orokorra izan naiz Burgosen,
Bartzelonan, Italian, Norvegian, AEBn eta Hegoamerikan. Enpresaren munduak oso arau estuak ditu.
Trikitixaren arloan beste jende mota bat dago, pentsatzeko beste modu bat. Oso ederra iruditzen zait
mundu batetik bestera igarotzeko aukera izatea”, jarraitu du.
Berriki Lajarekin jo zuen Aristerrazuko erromerian. “Bi hilabete eman genituen hiru orduko erromeria
hori prestatzen. Hogeita hamar bat pieza ziren, gehienak kantatuak. Niretzako eguneratzeko modu
bat izan zen eta amets bat egia bihurtzeko bidea ere bai, Lajarekin jotzea amets bat baitzen niretzat.
Orain beste modu batera disfrutatzen dut trikitixarekin. Aspaldidanik ezagutzen nituen Laja eta
Epelde, baina orain urte eta erdi Euskal Herrira itzuli nintzelarik, adiskidetasuna berritu dugu eta nik
lehen ez nuen konfiantza giroa sortu da gure artean. Niretzako opari bat izan da. Nire emaztea, Pilar,
trikitizale familia batekoa da, Zornotzako Belatxikita auzokoa, eta bizi garen baserrian bildu ohi gara
tarteka”, esan du.
MARTIN AGINAGALDE: “Gazteek oso azkar bereganatu zuten estiloa markatu zuen Kepak”
Junkera eta Motriku Gipuzkoako trikitilariei jarraiki lurralde honetako erromeriak bisitatzen hasi ziren
garaikoa da Martin Aginagaldek Errekaldekoarekin duen harremana. “Gogoan dut Kepa lehen aldiz
txapelketako finalera iritsi zen eguna ere. 1982ko finala izango zen. Eleuterio Tapia bizkaitarren
aurretik geratu zen eta biharamunean pozik zegoela esan zidan ‘gutxienez Bizkaiko gazte horiei
irabazi diet eta’. Ez Lajak eta ez nik ez genuen txapelketa horretan parte hartu. Ni 88an itzuli nintzen
finalean jotzera. Gogoan dut Joseba Tapiak bere osaba Eleuterio Tapiari eskaini zion fandangoa eta
nik neure baitan pentsatu nuen txapelari agur esan behar niola, Eleuterio hil berria baitzen. Josebak
irabazi zuen txapela eta merezimendu osoz gainera. Kepa bigarren geratu zen eta ez dakit gu
hirugarren geratu ginen edo laugarren. Keparen emanaldia izugarri berritzailea izan zen. Gogoan dut
ikusle bat erdiko pasillora atera eta rockaren parodia moduko bat egiten aritu zela dantzan, Keparen
jotzeko moduari barre egin nahian edo eta jendeak txalo jotzen ziola eta Kepari txistu egiten ziotela.
Trikitizale gehiengoaren gustuarekin bat ez zetorren estiloa markatu zuen Kepak, baina hain zuzen
ere estilo hori gelditzeko etorri zen. Kepari txistu jotzetik Keparen estiloa kopiatzera igaro ziren
trikitizaleak, gazteak bereziki. Final horren aurretik eta ondoren Kepa, Zabaleta eta Motriku Bizkaiko
eta Gipuzkoako erromerietan jotzen ibili ziren. Ford Transit furgoneta batean ibiltzen ziren. Eta
oroitzen naiz behin nola esan zidan Kepak ez zuela bere burua urte askoan gauza bera egiten
irudikatzen eta beste gauza batzuk egitera pasatu zen, beste erronka batzuk jarri zizkion bere
buruari”, kontatu digu Martin Aginagaldek.
Trikitixaren historiak tarteka jauziak egiten dituela dirudi eta txapelketak horretarako balio izaten
dute, zabaldutako bide berriak, emandakoa jauziak erakusteko. Lajak teknika landu eta estilo
elaboratu bat ekarri zituen. Eta Martinek ere berrikuntzak ezarri zituen. “Tonu nagusian jotzen aritu
ondoren tonu txikiago batera igarotzen nintzen baxuetan, sol maiorrean afinatutako soinuak
erabiltzen nituen eta soinuaren beraren izaera ere zertxobait aldatu egin nuen, 47 baxu jarri
bainizkion, akordeoiari bezala, instrumentuaren ahalmena gehitzeko. Sol maiorrean afinatutako
trikitixak aukera hobeak eskaintzen ditu kantatzeko orduan eta berehala zabaldu zen eredu hori”,
dio.
Martin Aginagaldek 1979ko txapela irabazi zuen ondoan bere osaba Egañazpi panderoarekin zuela
eta urte askoan trikitixaren figura garrantzitsuenetakoa izan zen Lajarekin batean. Txapela irabazi
zuenerako eskolak ematen hasita zegoen Larraulen, bere jaiotetxean lehenik eta herriko etxebizitza
batean gero. Etxebizitza hori txiki geratu zitzaion eta lehen trikitixa denda eta lehen eskola zabaldu
zituen Villabonan 1882an. Trikitixa jotzen ikasteko metodo baten sortzailea ere izan zen. “Banaka
ikasi genuen trikitixa jotzen, irakaslearekin aurrez aurre eserita, baina ikasle bat baino gehiago biltzen
zituen gela batean metodoak ez zuen funtzionatzen. Ezin gintezkeen ikasle bakoitzari ordubete
eskaintzen hasi. Bartzelonan egiten zen musikari buruzko feria batean organo txiki bat ikusia nuen
tekla bakoitzean zenbaki banarekin. Ideia hain sinple batetik abiatuta hasi nintzen lanean eta joan
nintzen metodo berria hobetzen eta eskola guztietara zabaldu zen”, dio Martin Aginagaldek.
XABIER BERASALUZE “LETURIA”: “Nik mirespen bera diet Tapiari eta Junkerari”
Xabier Berasaluze “Leturia” hogei urte beteak zituenean sartu zen trikitixaren munduan, beste
zenbait instrumenturekin probatu eta gero. Villabonako bere jaiotetxean musika klasikoa etengabe
entzuten zen. Pianoa lau ikasturte ikasi zituen, gitarra hamar urte eta trikitixaren mundura gerturatu
bazen, dantzan egitea gustuko zuelako izan zen, lagunekin erromerietara joaten hasi zelako.
“Soldadutza bukatu arte ez nuen egundo panderorik eskuetan hartu”, dio. Trikitixa ikasten ari zen
Eleuterio Tapiarekin. Hau gaixotu egin zen eta ordezkoa etorri zitzaion klaseak ematera, haren iloba
Joseba Tapia. Hurrengo astean Itsasondon emanaldia zuela esan zidan eta pandero-jotzailerik gabe
zegoela. 1984an zen hori. Hiruzpalau erromerietan lagundu nion”, gogoratu du.
Joseba soldadutzara joan zen eta handik itzuli zenean, 86an, txapelketa bat zegoela esan zion. “Ea
animatuko nintzen galdetu zidan. Ni beti baietz esaten duten horietakoa naiz. Pepe Yantziren pieza
batzuk hartu eta duoak prestatzen aritu ginen, ordurako duoak egiten baikenituen plazetan.
Txapelketa hartako berrikuntzetako bat izan zen. Esan beharra dago, hala ere, gure aurretik
Zumarragako Trikitixak egiten zituela duoak, haiek bi pandero-jotzaileen artean egiten bazituzten
ere”, jarraitu du Leturiak.
1987an lehen diskoa grabatu zuten bai Tapiak eta Leturiak eta bai Kepa, Zabaleta eta Motrikuk ere.
“Elkarreko estudioetan kointziditu genuen. Haiek egunez grabatzen zuten eta guk gauez, nik Kutxan
lan egiten nuelako. Elkarrekin parranda batzuk egitera ere iritsi ginen. Betidanik izan dugu harreman
ona Kepa Junkerarekin. Erromeria eta plazetan ere ikusten genuen elkar. Garai horretan Laja, Martin,
Kepa eta Tapiaren artean banatzen ziren erromeria eta plazak. Askori oso arraroa egiten zaie gure
artean ondo konpontzea, trikitizaleen artean halako lehia bat zegoelako Tapiaren eta Junkeraren
aldekoen artean”, dio.
1986ko txapelaren ondoren Tapia eta Leturia itzulia egitera atera ziren eta Europan eta Ameriketan
barrena emanaldi asko eman zituzten. “Ordura arte Eusko Jaurlaritzak antolatutako ordezkaritza
ofizialen barruan joaten ziren trikitilariak AEBetan jotzera, baina gu beste zubi batzuk eraikitzen hasi
ginen eta folkaren beste hainbat figurarekin harremanetan sartu ginen. Ondoren 88ko txapelketa
etorri zen eta final horrek trikitixaren elitera eraman gintuen bai Kepa eta Motriku eta bai gu.
Musikaren ikuspuntutik begiratuta, Tapia eta Junkera gutxitan ematen diren figurak dira. Nik
banekien Joseba Tapiaren pandero-jotzaile izatea luxu bat zela eta aukera izugarri bat ere bai. Haiek
luzitzen dira eta zuri ere zeure instrumentuarekin luzitzeko aukerak ematen dizkizute. Jazz talde
batean jotzea bezala da, bakoitzak askatasun eremu bat du bere bidea egiteko”, dio.
90eko hamarkadan tex-mex-arekin egin zituzten esperimentuak, bikoteari Mikel Artiega baxua eta
Leiza bateria-jotzailea erantsita. Ondoren rock etapa bati ekin zioten eta horretarako taldean gitarra
bat sartu zuten, Akelarretik zetorren Batis. “Nik umetatik era guztietako musika entzun dut etxean,
klasikoa, garaikidea eta jazza batik bat. Eta oso aberasgarria egin zitzaidan rockaren generoa
ezagutzea. Baina gure jarraitzaile askorentzat aldaketa gogorregia izan zen. Bien bitartean
erromerietako errepertorioa biltzen zuten bi disko grabatu genituen eta segidan beste bi disko rock
erritmoekin eta azken bi disko hauetan hitz askoz ere gogorragoak sartzeko aukera izan genuen.
Kanta horietako batzuk probokazioaren mugan zeuden, Joseba Tapiari betidanik gustatu izan zaion
estiloan. Bidenabar gure inguruan lanean ari ziren rock taldeekin harremanak estutzeko balio izan
zigun etapa horrek”, jarraitu du.
1998an zuzeneko disko bikoitza grabatu zuten trikitixako errepertorioarekin, bidean galdutako
trikitizaleak berriro adiskidetzeko asmoarekin. Joseba Tapiak “Apoaren edertasuna” grabatu zuen
Koldo Izagirrerekin eta beste bat ondoren Bizkaiko koplekin Leturia ondoan zuela. “Quebec-eko
jendearekin harreman estua genuen. Nik zapatak jotzen ikasi nuen Boutine Sourriante taldekoekin
eta, hango taldeen formatua geureganatuz, mandolina, biolina eta pianoa sartu genituen eta diskoa
grabatu ondoren emanaldiak egiten hasi ginen dantzari bat agertokian genuela”, gogoratu du.
Joseba Tapia kantari gisa dabil orain gitarra eskuetan duela. Etapa berri bati ekin dio.
Tapiak eta Leturiak Kepa Junkerarekin izan duten harremana betidanik izan da beroa. “Erromeriaren
baten kointziditzen genuenean afaltzera joaten ginen elkarrekin. Benetako arazoa, ondo pentsatzen
jarrita, epaimahaiak izan zuen 88ko txapelketan, txanpona airera botata erabaki baitzuen ia-ia
txapela nori eman. Junkera oso teknikoa da, baina Tapiak sekulako indarra du eta transmititzen daki.
Gure arteko harreman on horren froga da sari gisa Tapiari eman zioten soinu txikia honek Junkerari
oparitu izana. Nik antzera miretsi izan ditut biak. Biak tradiziotik abiatuta, oso bide ezberdinak ireki
dituzte eta taldekoei beren lana egin dezaten askatasuna eman izan diete. Guk abantaila handi bat
genuen gure alde: trikitixaren maparen erdigunea aurkitzen ginen, euskarazko prentsak eta irratiek
ate guztiak zabaltzen zizkiguten”, dio.
Leturiak behin baino gehiagotan jo izan du Kepa Junkerarekin. “Zabaleta eta Motriku kanpoan ziren
batean deitu zidan Kepak libre al nengoen galdetzeko eta erromeria batzuk egin genituen elkarrekin.
Horrek erakusten du gure arteko harremana nolakoa zen. Gogoan dut baita beste behin Baqueiran
astebetez aritu ginela jotzen elkarrekin, Tapiarekin jotzera joan eta eskiatzeko pistetan erori eta
zangoko zuntzak hautsi zituelako. Kepari deitu nion, zer gertatzen zen kontatu nion; esan nion ez
zutela ordaintzen, baina primeran pasatuko genuela eta berehala animatu zen. Bost izarreko
hotelean, gastu guztiak ordainduta, egon ginen astebetez. Pereirarekin batean diskoa atera berria
zuen eta ‘Bilbao 00:00H’ren proiektuari bueltak ematen hasita zegoen ordurako”, gogoratu du.
Imanol Urkizu: ” Betelun behin jazz-fusio itxurako grabazio bat erakutsi zigun eta orduan hasi zen
Keparen ibilbide berria”
Orion 1962an jaioa, trikitixa biziberritzeko hainbat esperientzia berri martxan jarri zituen belaunaldi
bateko kide da, baina aitortzen du berrikuntzen arloa Kepa izan dutela beti aitzindari.
-Nola hasi zinen? Ni nahiko berandu hasi nintzen trikitixaren munduan panderoa jotzen. Soldaduska amaitzeko zorian
nintzela, pertsona batek ditu zidan telefonoz ea panderoa jotzen ikasiko nukeen galdezka. Nik
atabala lehenagotik jotzen nuen eta gehiegi pentsatu gabe baiezkoa eman nion. Pandero-jolearen
bila zebilena Miren Etxaniz trikitilaria zen eta harekin jarduteko gonbidapena zen hura.
Soldaduska amaitu eta Mirenen etxera agertu nintzen hitz egitera. Lehendabizi panderoa irakatsiko
zidan pandero-jolea behar genuen eta bideo batzuk jarri zizkidaten ea gustuko zein nuen jakiteko.
Imanol Iturbide aukeratu nuen eta hasiera baten ezetz esan zigun, berak ez zuela irakasten, ez zuela
pazientziarik eta ez zuela horretarako balio. Azkenean pertsona baten bitartez konbentzitu genuen
eta baiezkoa eman zigun. Bere etxera joateko esan zidan. Berarengana joan nintzen eta jangelan
geundela panderoa hartzeko agindu eta musika jarri zuen. Kalejira bat jotzen hasi zen bera eta nik ez
nion inondik ere ezer harrapatzen. Geldiago jotzeko eskatu nion baina esan zidan berak geldiago ezin
zuela jo, berari segitzea beste erremediorik ez nuela. Egun hartan ahal nuena egin nuen. Handik
hamabost egunera berriz joan nintzen eta esan zidan berak bezain ondo jotzen nuela eta gehiago ez
zidala erakutsiko, ez nuela bere beharrik eta horrela amaitu ziren nire ikasketak.
Orduan ulertu nuen zergatik ez zuen panderoa jotzen irakatsi nahi, niretzako jotzen onena zen, baina
irakasle moduan ez zuen balio. Handik aurrera bakarrik jarraitu nuen Laja eta Landakandaren
diskoekin. Biniloak etxean jarri eta jota ke aritu nintzen, handik bi hilabetetara kalean lehendabiziko
aldiz jotzera irten nintzen arte.
Nire debuta Arrasateko jaietan egin nuen. Egun hartan Laja eta Landakanda ere han ziren eta
niretzako ahaztezina izan zen . Ramonek (Landakandak) esan zidan: " Hi, arreta gehiegi jartzen diok
panderoan jo behar duanari, utzi jotzen, ez sartu hainbeste gauza eta natural eta sinple jo”.
Gomendio izugarri hori nire ibilbidean zehar praktikara eramaten saiatu naiz eta niretzako oso
positiboa izan da.
-Nola egin zenuen topo Keparekin?
Lehenengo aldiz Arrasateko jai horietan ikusi nuen, ni Mirenekin joan nintzen egunean, Kepa,
Zabaleta eta Motriku ere bertan baitziren. Egun hartan Arrate irratira ere joan ginen grabazio batzuk
egitera eta gero Eibarren trago batzuk hartzen jarraitu genuen, baina ez ginen gehiegi hitz egitera
iritsi. Geroago hasi nintzen Kepa ezagutzen, Martinekin lehen aldiz txapelketara joan nintzenean.
Tapia eta Leturiarekin tratu gehiago nuen, gertukoak zirelako. Besteekin, bizkaitarrak izaki, ez nuen
traturik. Handik oso denbora gutxira Motri lanagatik kanpoan ibiltzen hasi zenean, ni joaten nintzen
haren ordez jotzera Keparekin eta Iñakirekin. Kepa eta Iñaki musikari apartak ziren, nik ordura arte
trikitixa munduan ezagutu nuena baino askoz harago zihoazen bi pertsona. Kepak zehazki ate asko
zabaldu zizkidan eta berari esker musikan asko sakondu eta estilo berriak ezagutu nituen. Gaur egun
ere nire jotzeko moduagatik asko identifikatzen naiz Kepak duen estiloarekin.
-Bitxia izan behar zuen Bizkaitik zetozen …
Gustura etortzen ziren eta jendeak ez zioten garrantzirik ematen beren jatorriari. Keparen benetako
agerpena txapelketan izan zen. Ni Martinekin nindoan, Tapia eta Leturia era bazeuden. Gogoan dut
Martinek aldageletara heltzean esan zidala: “Lasai Imanol, hau menderatuta zegok…” Orduan Kepak
eskala kromatikoa jo zuen gora eta behera eta une horretan Martin zurbildu egin zen, pasatuta
geratu zen, urduri eta ez zen bere onera etorri. Agertoki gainean ere nabaritu nion ez zegoela bere
onean eta laugarren bukatu genuen. Ez zen kapaz izan jotzen zuen bezala jotzeko aldageletan
ikusitakoaren ostean.
Nire ustetan, irabazi beharreko txapelketa zuen hura Kepak, baina epaimahaia oraindik ez zegoen
prestatuta Kepak ekarri zituen berrikuntzak ondo neurtzeko. Tartean J. I. Ansorena zegoen eta hark
bakarrik eman zien hamarra Kepa eta Motrikuri. Garbi dago, hark musikaren beste ikuspegi bat
zeukan eta ondo ikusten zuen zer zegoen. Momentu horretan Kepa bezalakorik ez zegoela ulertu
zuen seguru asko. Gero, epaimahai guztietan bezala, kide bakoitzak puntuazio ezberdina ematen du
eta batuketak erabakitzen du irabazlea.
Nik gaur epaile lanak egiten ditut txapelketetan, baina nire helburua pedagogikoa da. Txapelketak
amaitu eta nire ustez zertan hobetu dezaketen komentatzen diet parte-hartzaileei. Hala ere zaila da,
oraindik badagoelako txapelketen inguruan saltsa gehiegizko bat. Lehen behintzat txapelketen
ondoren aukera gehiago egoten ziren diskoa grabatu edo erromerietan izen bat egiteko…. Baina
orain ez dago aparteko aukerarik. Zorionez parte hartzen dutenak elkarren lagunak dira eta hori oso
onuragarria da. Orain dela urtebete pasatxo txapelketetan dabiltzanekin egon nintzen Orion eta
komentatu nien ea zergatik ez zuten pandero-joleen talde bat osatzen, horrelakorik ez dagoelako
hemen oraindik. Nola diren gauzak, orain horiek dira Keparen proiektuko Sorginak. Hori jakitean
zoriondu egin nituen. Beharrezkoa zen panderoaren munduari bultzada bat ematea.
-Zein ekarpen egin dio Kepak trikitixari?
Gaur egun trikitilari gazteak entzuten badituzu Keparen abestiak jotzen jarraitzen dute eta hala
izango da etorkizunean ere. Musika estiloa, pieza kopurua, asko dira Keparen ekarpenak.
Tradizioaren mugetatik ateratzean onura asko ekarri dizkio ez soilik trikitixari, baita txalapartari eta
panderoari ere. Perkusio mailan ere gauza asko egiten ari da. Beste mundu bat zabaldu du Kepak.
Tapiak ere egin zuen bere garaian, baina nik uste bi gauza ezberdin izan direla. Kepak inork pentsa
ezin zezakeen mundu bat zabaldu dio trikitixari.
Gogoratzen dut “Nondik Jo Maurizia?” abestia txapelketan jo zuenean jendea txistuka hasi zela eta
pasilloan rocka dantzatzen hasi zirela batzuk eta hori ez zela trikitixa esaten zuten. Handik sei
hilabetera, kritikatzen zutenen seme-alaba askok pieza hori jotzen hasi ziren. Ustez tradizioa ez zena
hilabete gutxitan tradizio bilakatu zen. Gaur egun oraindik fandango hori hamaika gaztek jotzen du
txapelketan eta horrek zerbait adierazten du.
-Nazioarteko hedapena ere ez da makala izan.
Egia esan gure instrumentu tradizionalak nazioarte mailan ezagutzera eman dituena Kepa izan dela
eta ez tradizional bezala, baizik eta musika tresna batzuk gehiago bezala. Lan ikaragarria egin du eta
oraindik ere horretan dihardu, ezagutzen ez duten lekuetara joan eta emanaldi arrakastatsuak egiten
dituelako. Horrek zerbait adierazten du. Baina Kepa oso ausarta izan da betidanik. Berak esaten zuen
eszenatokian trikitixa ez zela erromerietan bezala jo behar, berak eserita zegoen publikoarentzako jo
behar zuela. Une batetik aurrera erromerietan aspertu egin zen. Ez zuen agertu nahi izan, baina igarri
egiten zitzaion. Harago joan nahi zuen: fandango bat jotzen hasi eta ikusten zen berak egiten zituen
moldaketak ez zirela jada dantzarako. Aspertzen hasia zen eta beste bide bat jorratu beharra zuen.
-Hori “Triki Up”en atzeman zen.
Gogoratzen dut Betelun ginela jotzen eta Zabaleta eta bioi deitu zigula furgonetara hurbiltzeko.
Orduan esan zigun: “a ver qué os parece esto”. Kasetea jarri eta guretzako sorpresa handia izan zen.
Saxoa entzuten genuen, baina ez Gelatxo eta hauen formazioetan jotzen zen bezala. Jazz-fusion
estiloko saxoa zen. Baxua zegoen. Honek ere erritmo ezberdinak egiten zituen. Keparen argudioak
entzun ondoren konturatu ginen hori zela apurtzeko modu bakarra eta handik aurrera aldaketa
handiak ekartzen hasi zen. Orain entzutean konturatzen zara sasoi hartan Keparen burua non
zebilen, ez zeukala dagoeneko lehengo erroetan. Disko horrek ondo islatzen du momentu hartan
atzeman genuena.
Hala ere, konturatzen ari naiz poliki-poliki oinarrietara bueltatzen ari dela, bai erritmo aldetik eta
baita musikalki ere. Aldaera eta berrikuntzak egiten, baina tradiziora itzuliz berriro ere, bidaia luzea
egin eta etxera itzuli nahiko balu bezala.
XABIER SOLANO: “Nik 10 urte nituen 88ko txapelketara joan nintzenean, baina Keparen estiloak
harritu egin ninduen”
Ereñozun jaio zen 1978an, oso umetan hasi zen trikitixa jotzen eta 12 urterako txapelketan parte
hartzen hasita zegoen. Etzakit taldeko partaide lehenik eta Esne Beltzakoa gero, Fermin Muguruzaren
proiektuetan parte hartu izan du eta munduan zehar soinu txikiarekin asko ibilitako trikitilaria da.
-Nola hasi zinen trikitixa jotzen?
Bederatzi urterekin hasi nintzen trikitixa ikasten, aitak horretara bultzatu ninduelako, nik musika
tresna ezagutu ere ez bainuen egiten. Behin eraman ninduen Aia San Pedrora erromeria bat zen ikus
nezan eta asko gustatu zitzaidan. Hala ere 8-9 urterekin ez dakizu seguru zer nahi duzun eta itsu-
mustuan sartu nintzela esan dezaket trikitixaren munduan. Gero gustua hartu nion.
Sasoi hartan Ereñozun bizi nintzen eta beldur pixka bat ematen zidan handik irten eta Villabonara
joatea, Martin Musika Etxera. Hasieran nire arrebak laguntzen zidan eta ordu beteko klasean nire
ondoan gelditzen zen, eta horren ondorioz, gustatu eta bera ere ikasten hasi zen. Azkonobieta izan
zen nire lehendabiziko trikitixa irakaslea eta geroago Martinekin ibili nintzen.
-Zer metodorekin ikasi zenuen?
Zenbakiz hasi nintzen ikasten, baina urte horretan solfeoa ikasten hasi nintzen Ereñozun bertan
Imanol Kamiorekin. Bera izan zen hastapenetan solfeo, armonia eta musikan aurrera eraman
ninduena. Azken batean trikitixa pobre geratzen da zenbakiekin bakarrik, trikitixa tradizionala edo
ohiko kantutegia asko ikasten da, baina hortik kanpora aurrera pausu bat emateko beharrezkoa da
solfeoa eta armonia pixka bat. Nik beste instrumentu batzuk ikasi ditut besteak beste horiekin
ikasitakoa trikitixan aplikatzeagatik.
-1988ko txapelketa gogoan duzu?
Bai, gogoan dut, ikusi nuen lehendabiziko txapelketa izan zelako Belodromoan. Orduan 10 bat urte
nituen, trikitixarekin hasi berria nintzen, baina asko harritu ninduen egun hartakoak. Osaba eta
izebarekin joan nintzen; gogo izugarria nuen txapelketa ikusteko, nahiz eta ez nuen parte-hartzaile
bakar bat ere ezagutzen. Kepa Junkerak eta Joseba Tapiak harritu ninduten batez ere. Tapia eta
Leturiak zeukaten freskura asko gustatu zitzaidan, baina Kepak erakutsi zuen abilidadea eta ekarri
zituen berrikuntzak paregabeak iruditu zitzaizkidan.
-Zu zeu ere txapelketetan ibilia zara.
Ni 12 urterekin hasi eta 15-16 urtera arte ibili nintzen txapelketetan. Gogoratzen dut hasieran ez
nuela bikoterik eta gertutasunagatik nire bizilagun bati, Jon Mari Beasaini (gaur egun Esne Beltzan
gitarra jotzen duena), komentatu niola. Elkarrekin hasi ginen eta lehendabiziko txapelketan, Garain
jokatu zenean, bigarren gelditu ginen. Handik aurrera txapelketa pila baten aritu ginen, Hernialden,
Zerainen, Oiartzunen, Zarautzen... Arrebaren eta bion artean 24 txapel ditugu etxean.
Behin Italiara ere joan ginen junior mailako Munduko Txapelketa baten parte hartzera. Hara joatea
soilik itzelezkoa izan zen. Bertan herrialde ezberdinetako partaideak zeuden eta irabazi egin genuen.
Oso berezia izan zen guretzako.
-Txapelketetatik kanpo ere oso emankorrak izan zineten orduko trikitilari gazteak.
Txapelketetako ibilbidea bukatzeko zorian zegoenean, 16 bat urterekin, talde bat egin nuen Jon
Marirekin. Honek gitarra joten zuen eta Ander Barrenetxeak bateria. Orduan hasi ginen erromeriak
egiten, ezkontzak... denetik. Handik gutxira Aitor Zabaleta baxu-jotzailea gehitu zen taldera eta
Etzakit sortu genuen. Niri gehiago gustatzen zait talde giro hori, jendea inguruan izatea, denak maila
berdinean egotea eta aurrera egitea. Maketa bat grabatu genuen sasoi horretan, Elkar-ekoei gustatu
egin zitzaien eta lehenengo diskoa grabatu genuen. Nik 17 urte nituen. Guretzako gauza berria zen,
hain gazteak izanik plazak goraino betetzen eta lehenengo lansariak irabaztea. Gogoan gelditu
zaidan garaia izan zen. Triki-pop izenez deitu zuten fenomeno hura, baina nik uste herrietako giroa
izan zela bereizgarria, fandango eta arin-arinak jotzen genituelako eta plaza dantzan jartzen
genuelako. Hori bukatuz joan da; gaur egun erromeri gutxi dago eta agian talde gehiegi plaza
gutxirako.
-Kepa Junkera izan zen aitzindaria munduan zehar trikitixa zabaltzen, baina zuek ere ibili zarete
gerora munduan barrena. Zer suposatzen du trikitixa atzerrira eramateak?
Gaur egun trikitixa munduan zehar eramatea oso gauza polita eta berezia da trikitilari batentzako.
Euskal Herrian oso entzunda dago eta gaur egun lotsagarria da nola jaietan trikitilariak jartzen
dituzten inolako fundamenturik gabe, are gehiago herri honetan soinu txikiak suposatu duen
guztiarekin. Trikitilari horiei espazio eta aukera duinak eman behar zaizkie. Nik uste dut trikitixa
kanpoan gehiago miresten dela hemen baino, hemen ez baita horrenbeste estimatzen. Japonera
zoaz, soinua ikusi eta harrituta gelditzen dira.
-Izugarrizko arrakasta lortzen ari zarete Esne Beltzarekin.
Nik uste Esne Beltzaren sekretua ez dela trikitixa. Gurean instrumentu bat gehiago da. Kepa
Junkeraren edo Joseba Tapiaren kasuan diskoetan eta zuzenekoetan soinua txikia da ardatza. Dena
den, bai haiek eta bai guk beste instrumentuekin izandako harremanean ikasi dugu trikitixaren
aukerak aztertzen. Nik trikitixaren potentziala gerora ezagutu dut, beste instrumentu batzuk ikasiz
eta ikasitakoa aplikatu diot soinu txikiari. Fermin Muguruzarekin eta gisako musikariekin ibiltzeak ere
lagundu dit horretan. Askotan zenbakiekin edo solfeorekin ikasten dugu trikitixa jotzen, errepertorio
bat ikasten dugu, baina ez dugu musika tresna bera ondo ezagutzen. Hori kontuan izan behar du
irakasten duenak.
-Aurreko belaunaldietako trikitilariei miresmena zor al zaie?
Niri pieza bat irakasten zidatenean, norena zen azaltzen zidaten eta trikitilari haren inguruko
pasadizoren bat kontatzen. Eta horrela miretsi egiten dituzu azkenean aurreko belaunaldietakoak.
Gaur egungo gazte batek ez daki nor ziren eta gainera berdin zaie, nahiago dute gaurko kanta bat
ikastea. Niri batzuetan gogorra egiten zait axolagabekeria hori. Baina irakasleak horretarako gaude,
gustuko dutena irakasteko eta tarteka pieza garrantzitsuak tartekatzeko.
“Esne Zopak” grabatu genuenean, esaterako, trikitilari askorengana jo genuen eta primeran hartu
gintuzten. Haiengan ikusten genuen gogoa, kontatzen zizkiguten pasarteak,... oso berezia izan zen
iraganeko mundu horretan barneratzea.
-Zer asmo dituzu atzetik datozen trikitilari gazteei begira?
Nire piezen partitura liburua argitaratuko dut laster, ikasleek ikasteko aukera izan dezaten. Solfeoz
agertuko dira, baina baita zenbakiz ere, oraindik askok eta askok hala ikasten dutelako. Gainera,
ikasle ugarik ez dute profesional bilakatu nahi, gozatzeko jotzen dute trikitixa eta merezi dute
erraztasunak ematea.
SORGINAK SORGINAK SORGINAK SORGINAK
Izenak aldatu dira. Dagoeneko ez dira Romualda edo Mikaela edo Martzelina deitzen. Amets
Ormaetxea, Maria Lasa, Alaitz Eskudero, Leire Etxezarreta, Garazi Otaegi, Eneritz Aulestia eta Irati
Gutierrez dira, baina trikitixaren historiaren hasieran agertzen diren emakume pandero-jotzaileen
leinukoak dira. Emakume haiek garai batean pandero soilaren eta ahotsaren laguntzarekin jartzen
zuten festa behar zen lekuan. Gero hasi ziren trikitilari handien ondoan jotzen. 15 urtetik hasi eta
18ra bitartekoak dira. Oso goiz hasi ziren panderoa edo trikitixa ikasten, bost eta sei urterekin batzuk.
Taldeko hiru partaide Arrasatekoak dira eta gainontzekoak Zizurkil, Zarautz edo Debakoak. Etxean ez
zuten aurrekaririk trikitixa jotzen, baina zale amorratuak guztiek dituzte. Hauetako bik taldean ere
jotzen dute. Maria Lasak Gugaz taldean. Hiru neska eta mutil batek osatzen dute taldea. Alaitz
Eskuderok Ez Den Giro taldean jotzen du. Lau neska dira bertan, bi trikitilari, gitarra eta bateria.
Erromeria taldeak dira eta arrakasta badute.
Guztiek hartzen dute parte txapelketetan, pandero-jotzaile gisa batzuek eta trikitilari gisa besteek.
Maria Lasak, esaterako, bere pieza propioak aurkeztu izan ditu txapelketan. Egunero jotzen dutela
diote. Garazi Otaegik, adibidez, igandetan ere jotzen omen du. Guztiek uste dute festarako
instrumentua dela trikitixa, baina batzuek hori baino zerbait gehiago ote den ere susmatzen dute.
Garazik dio triste dagoen egun batzuetan soinu txikia jotzen hasi eta umorea aldatzen zaiola.
Ilusio handiarekin bizi dute Kepa Junkerarekin burutzen ari diren esperientzia. “Pandereoa jotzeko
beste modu bat da. Erromerietan indarra da jotzeko moduaren oinarria. Keparen ondoan jotzen
dugunean estiloa finagoa da, neurtuagoa, dotoreagoa. Kepak errepikatzen digunez, erritmo sinpleak
eta soilak interesatzen zaizkio, baina ondo joak”, dio Eneritz Aulestiak.