Carole Delga e sos engatjaments per la lenga e la cultura occitanas Defendre la nòstra cultura aquò’s tanben defendre la nòstra identitat dins un mond globalisat que, del temps que perd sas raices, perd son sens de l’autonomia. La nòva region dubrís la via a l’Eurò-region per sa quita existéncia, balha còs e coerencia a Euròpa del Sud. Votar per Carole Delga, dins la continuitat de la politica volguda per Martin Malvy, aquò’s primordial per l’avenidor de la lenga e de la cultura occitanas. Carole Delga designarà un elegit delegat per la cultura occitana e un per la cultura catalana, afortirà l’AMASSADA, consèlh de desvolopament de la cultura occitana per una democracia participativa e desvoloparà l’Ofici public de la lenga occitana, sostengut pels ministèris de l’Educacion Nacionala e de la Cultura. Aital l’ensenhament de la lenga e de la cultura occitanas serà melhor afortit dins aqueste encastre institucional e mai ajudat financiariament. Caldrà tanben rendre duradís lo dispositiu de las borsas d’estudis ENSENHAR, sosténer la dubertura de seccions bilingüas publicas, de Calandretas e de Bressoles. De mai lo projècte de dubertura d’un collègi Calandreta a Tolosa pel Consèlh despartamental de Garona-Nauta serà sostengut tant coma la creacion de licèus occitans a Tolosa e Montpelhièr que completaràn aqueste dispositiu. La nòstra cultura valorada, vivificada, autentificada serà una clau del desvolopament e de la modernisacion del torisme que serà aital adaptat a la nòstra istòria, als nòstres biaises de viure e al nòstre patrimòni. Lo festenal inter-regional ESTIVADA de Rodés, TOTAL FESTUM, lo teatre Inter-regional Occitan TIO, la creacion e la difusion d’espectacles vius en occitan, e totas las manifestacions occitanas sul nòstre territòri seràn particulariament sostenguts. Caldrà balhar a la lenga e a la cultura occitanas lor plaça vertadièra a travèrs d’emissions especificas a la television, a la ràdiò del servici public, e tanben dins las ràdiòs associativas ( Ràdiò Occitània, ràdiò Lengadòc, ràdiò País) Haute-Garonne, Guy David

Aveyron, Stéphane Bérard et Chloé Couffin

Liste PS PRG MRC GE