МАХН-МҮАН-ын Шударга Ёс Эвсэл-ийн бүлгийн төлөөлөгч Д.Батбаярын санаачлагаар Улаанбаатар хотын Захирагчийн ажлын албатай хамтран “Эелдэг үйлчилгээний хэрэгцээ шаардлага ба түүнийг хэвшүүлэх нь сургалт зохион байгууллаа.  Сургалт нь нийслэлийн худалдаа үйлчилгээний газруудын ажилтнуудын харилцааны соёл, үйлчлүүлэгчдийн сэтгэл ханамжид нөлөөлөх ур чадварыг дээшлүүлэх, үйлчилгээний соёлд мэргэшүүлэх зорилготой. Сургалтанд дүүргүүдийн худалдаа үйлчилгээний салбарын ажилтан ажиллагсад хамрагдсан. Сургалтыг Японы үйлчилгээний  соёлын сургалтын U-no Activa Corporation байгууллагын захирал, Чүо их сургуулийн худалдааны факультетын зочин багш Хигашитани Юка удирдан явуулсан. Үйлчлүүлэгчийн сэтгэл ханамжийг чухалчлах шалтгаан,  Японы найрсаг үйлчилгээ хэрхэн жуулчдыг татаж байгааг танилцуулсан.Үйлчилгээний байгууллагаас нэг үйлчлүүлэгч сэтгэл дундуур гарахад цааш нь 10 хүнд дамжуулдаг. Энэ нь тухайн байгууллагын бизнест хэрхэн сөрөг нөлөө үзүүлдэг болохыг жишээ баримттайгаар тайлбарласан.Мөн Японы үйлчилгээний салбарт ажиллаж буй ажилтаны зочдыг угтан авах үдэн гаргах, замчлах, эд зүйл өгөх соёлын талаар видео бичлэг үзүүлж биечлэн харуулсан. Японы үйлчилгээний соёлын сургалт нь бодол санаагаа үйлчилгээгээр дамжуулан илэрхийлэх арга ухааны нэг хэлбэр гэж дэлхий нийтэд хүлээн зөвшөөрөгдсөн байдаг. Энэ соёлыг суралцсан байгууллагууд, өндөр түвшний соёлтой үйлчилгээг хэрэглэгчдэд  үзүүлж, иргэдийн сэтгэлийг татан, үнэнч үйлчлүүлэгчдийг бий болгон ашиг орлогоо нэмэгдүүлдэг болохыг онцолсон.