Upload
others
View
1
Download
0
Embed Size (px)
Citation preview
BA-ritgerð
Í félagsráðgjöf
Kvíði á meðal ungs fólks Áhrif samfélagsmiðla
Tanja Karen Salmon
Leiðbeinandi: Sigrún Harðardóttir Júní 2015
Kvíði á meðal ungs fólks
Áhrif samfélagsmiðla
Tanja Karen Salmon
030591-‐2249
Lokaverkefni til BA-‐gráðu í félagsráðgjöf
Leiðbeinandi: Sigrún Harðardóttir
Félagsráðgjafardeild
Félagsvísindasvið Háskóla Íslands
Júní 2015
Kvíði á meðal ungs fólks
Ritgerð þessi er lokaverkefni til BA gráðu í félagsráðgjöf og er óheimilt að afrita ritgerðina á nokkurn hátt nema með leyfi rétthafa. © Tanja Karen Salmon, 2015 Prentun: Frum Reykjavík, Ísland, 2015
3
Útdráttur
Þessi ritgerð er lokaverkefni til B.A.-‐prófs í félagsráðgjöf við Háskóla Íslands.
Viðfangsefni ritgerðarinnar er kvíði á meðal ungs fólks. Fjallað er um kvíða og áhrif hans
ásamt því að skoða hvaða áhrif samfélagsmiðlar hafa á líðan ungmenna og hvort þeir ýti
undir kvíða hjá þeim. Rætt er um helstu forvarnarleiðir í lífi unglinga sem geta bætt
sjálfsmynd þeirra og líðan. Nokkur meðferðarúrræði, sem eru í boði fyrir þá sem upplifa
kvíða, verða talin upp og starf félagsráðgjafa með þessum einstaklingum er sérstaklega
skoðað. Markmið ritgerðarinnar er að svara eftirfarandi spurningum: Hvaða áhrif hefur
kvíði á ungt fólk? Ýta samfélagsmiðlar undir kvíða hjá ungmennum? Hvaða forvarnir eru
til staðar til þess að fyrirbyggja kvíða hjá ungmennum? Niðurstöður sýna að kvíði getur
haft áhrif á sjálfsmynd og þroska ungmenna. Í kjölfarið geta þau upplifað sig einangruð
og öðruvísi en annað fólk, þau geta einnig fundið fyrir erfiðum líkamlegum einkennum
sem lætur þeim líða illa. Samfélagsmiðlar geta ýtt undir kvíða hjá ungmennum vegna
þess að þau bera sig saman við aðra og eiga það til að upplifa sig og líf sitt ekki jafn
fullnægjandi og annarra. Mikilvægi stuðnings frá foreldrum og skóla, góðir vinir og virkt
forvarnarstarf getur skipti miklu máli í þroska og aðlögun ungmenna og komið í veg fyrir
þróun kvíða á meðal þeirra.
Lykilhugtök:
Kvíði, sjálfsmynd, ungmenni, samfélagsmiðlar, forvarnir og úrræði.
4
Formáli
Ritgerð þessi er 12 ECTS-‐eininga lokaverkefni til BA-‐gráðu í félagsráðgjöf við
félagsráðgjafardeild Háskóla Íslands. Ég vil þakka leiðbeinanda mínum, Sigrúnu
Harðardóttur, fyrir góða og faglega leiðsögn við vinnslu ritgerðarinnar. Einnig vil ég
þakka móður minni, Ólöfu Guðmundsdóttur Salmon, fyrir prófarkalestur og góðan
stuðning.
5
Efnisyfirlit
Útdráttur ..................................................................................................................... 3 Formáli ........................................................................................................................ 4 Efnisyfirlit .................................................................................................................... 5 Inngangur .................................................................................................................... 7 1. Kenningar ................................................................................................................ 8
1.1 Vistfræðikenning Bronfenbrenner ........................................................................... 8 1.2 Kenning Erikson um sjálfsmynd ............................................................................... 9 1.3 Kenning Albert Bandura um trú á eigin getu ......................................................... 10
2. Kvíði ...................................................................................................................... 13
2.1 Hvað er kvíði? ........................................................................................................ 13 2.2 Líkamleg einkenni kvíða ......................................................................................... 13 2.3 Kvíði á meðal ungmenna ....................................................................................... 14
3. Tegundir kvíðaraskana ........................................................................................... 16
1. Almenn kvíðaröskun (e. Generalized Anxiety Disorder) .......................................... 16 2. Félagsfælni (e. Social Anxiety) ................................................................................. 16 3. Felmturöskun (e. Panic Disorder) ............................................................................ 17 4. Þráhyggju-‐ og árátturöskun (e. Obsessive-‐Compulsive Disorder) ........................... 17 5. Áfallastreituröskun (e. Post-‐Traumatic Stress Disorder) ......................................... 17
4. Samfélagsmiðlar .................................................................................................... 19
4.1 Áhrif samfélagsmiðla á ungmenni ......................................................................... 19 4.2 Áhrif samfélagsmiðla á kvíða ................................................................................. 21
4.2.1 Kvíðaröskun vegna áhrifa samfélagsmiðla (e. social media anxiety disorder) ........................................................................................................ 22
5. Staðan nú til dags – samfélagsumræðan ................................................................ 24 6. Forvarnir ................................................................................................................ 27
6.1 Foreldrar ................................................................................................................ 27 6.2 Skólinn og kennarar ............................................................................................... 27 6.3 Vinahópar .............................................................................................................. 28 6.4 Íþróttir og hreyfing ................................................................................................ 28
7. Úrræði við kvíða á meðal ungmenna ...................................................................... 30
7.1 Hugræn atferlismeðferð ........................................................................................ 30
7.1.1 Coping Cat ...................................................................................................... 30
6
7.1.2 Friends for life ................................................................................................ 31
7.2 Gjörhygli ................................................................................................................ 31 7.3 BUGL ...................................................................................................................... 32
8. Starf félagsráðgjafa ................................................................................................ 34
8.1 Greiningarlíkan Hrefnu Ólafsdóttur ....................................................................... 34 8.2 Unglingasmiðjur ..................................................................................................... 35
9. Niðurstöður og lokaorð .......................................................................................... 37 Heimildaskrá ............................................................................................................. 41
7
Inngangur
Kvíði er skilgreindur sem áhyggjufull tilfinning yfir einhverju sem er að gerast eða gæti gerst í
framtíðinni. Of stór hluti ungmenna lendir í að upplifa kvíða og er það mikið áhyggjuefni. Þær
miklu breytingar sem verða á líkama og tilfinningalífi unglings vekja oft upp kvíða hjá honum.
Unglingurinn á það til að mikla fyrir sér hlutina og finna áþreifanlega fyrir því hversu erfitt
hann á með að stjórna tilfinningum sínum og geðsveiflum (Sigurjón Björnsson, 1993).
Höfundur þessarar ritgerðar hefur mikinn áhuga á sálarlífi ungmenna og þeim áhrifum sem
kvíði getur haft á þau. Þar sem Internetnotkun hefur færst mikið í aukana á undanförnum
árum og samfélagsmiðlar eru orðnir vinsælir á meðal ungmenna er áhugavert að skoða
tengsl á milli notkunar samfélagsmiðla og þess hvort þau upplifi kvíða í kjölfarið.
Þær rannsóknarspurningar sem settar voru fram við upphaf skrifa voru: Hvaða áhrif
hefur kvíði á ungt fólk? Ýta samfélagsmiðlar undir kvíða hjá ungmennum? Hvaða forvarnir
eru til staðar til þess að fyrirbyggja kvíða hjá ungmennum? Þar sem hér er um
heimildaritgerð að ræða var rannsóknarspurningunum svarað með fjölbreyttri heimildaleit.
Leitast var við að skoða málefnið með því að styðjast við íslenskar og erlendar heimildir,
útgefið efni, bækur, skýrslur og greinar.
Tilgangur þessarar ritgerðar er að varpa ljósi á kvíða meðal ungs fólks. Í fyrsta kafla
verður fjallað um kenningar sem tengjast helstu þroskaverkefnum ungmenna, ef þessi
þroskaverkefni takast ekki nægilega vel kunna að koma upp neikvæðar tilfinningar eins og
kvíði. Í öðrum kafla verða skoðaðar helstu orsakir og afleiðingar kvíðans. Í þriðja kafla verður
gerð grein fyrir fimm mismunandi tegundum kvíðaraskana. Í kafla fjögur er fjallað um hvaða
áhrif samfélagsmiðlar hafa á ungmennin. Í fimmta kafla er staðan nú til dags tekin fyrir og
hver samfélagsumræðan er varðandi áhrif samfélagsmiðla á kvíða. Í sjötta kafla er fjallað um
helstu forvarnir í lífi unglinganna. Í kafla sjö er farið yfir hvaða úrræði eru í boði til þess að
meðhöndla kvíðann. Í kafla átta er skoðað starf félagsráðgjafa með unglingum sem eiga við
geðræn vandkvæði að stríða. Í kafla níu verða niðurstöður settar fram, þær ræddar í ljósi
kenninga og ályktanir dregnar af þeim.
8
1. Kenningar
1.1 Vistfræðikenning Bronfenbrenner
Sálfræðingurinn Urie Bronfenbrenner setti fram kenningu um þróun einstaklings út frá
heildrænu samhengi. Hann lagði áherslu á áhrif hins víða félagslega kerfis í umhverfi
einstaklingsins. Bronfenbrenner byggði kenningu sína á vistfræði og í henni skýrir hann
samspil einstaklings og umhverfis í þroskaferlinu. Vistfræðikenningin byggir á samspili
félagslegra áhrifa í lífi og líðan einstaklinga og þeirrar víxlverkunar sem á sér stað þegar þeir
taka sjálfir þátt í eigin þroska út frá tengslum sínum við umhverfið. Ef vel tekst til í þessu ferli,
sem einkennist af gagnvirkum samskiptum, getur það verið ákveðinn drifkraftur í
þroskaferlinu og viðkomandi öðlast betri vitsmunalega, líkamlega og sálfélagslega færni.
Með þessi samverkandi tengsl áhættuþátta og verndandi þátta í huga þróaði
Bronfenbrenner kenningu sína. Hún varpar ljósi á flókin tengsl einstaklings og umhverfisþátta
sem hafa áhrif á þroska ungmenna. Kenningin byggist á fimm stigum þar sem gert er ráð fyrir
að þroskaferlið eigi sér stað. Stigin eru nærkerfi (e. microsystem), miðkerfi (e. mesosystem),
stofnanakerfi (e. exosystem), heildarkerfi (e. macrosystem) og lífkerfi (e. chronosystem)
(Bronfenbrenner, 1979).
Nærkerfið tilheyrir nánasta umhverfi barnsins, einstaklingum og stofnunum sem eru
hluti af hversdagslífi þess og barnið er í nánum tengslum við. Kerfið vísar til foreldra,
systkina, skólafélaga og kennara. Hver einstaklingur er í nokkrum nærkerfum á sama tíma og
þegar hann eldist fjölgar þeim. Á fyrstu árum ævinnar er barnið mest með fjölskyldu sinni en
þegar skólaganga hefst þarf það að læra að fara á milli þessara kerfa. Þegar unglingsárin
ganga í garð hefur einstaklingurinn lært að færast á milli ólíkra kerfa og getur hann tilheyrt
vinahópum sem og öðru fólki með þátttöku sinni í tómstundum. Nærkerfið byggir á áhrifum
athafna, hlutverka og samskipta í þroska einstaklingsins á hverjum vettvangi fyrir sig og til
þess að kerfin stuðli að jákvæðri aðlögun í þroska þurfa samskiptin innan þeirra að
einkennast af góðum tengslum, hvatningu, leiðsögn og hlýju (Bronfenbrenner, 1979).
Samskipti á milli nærkerfanna felast í næsta kerfi sem kallast millikerfið. Vettvangur
og áframhaldandi þroski ræðst af því að flæði á milli nærkerfanna sé óhindrað.
Bronfenbrenner nefnir mikilvægi þess að gott samband sé á milli kerfanna og bendir á að
stuðla þurfi að tengslum á milli foreldra og vina barna þeirra. Á unglingsárum getur dregið úr
samskiptum við foreldra og tengsl við vini og félaga orðið meiri. Ef tengsl við vinina verða
9
ráðandi án jákvæðra tengsla við foreldra getur það aukið líkur á hegðunarvanda unglinga
(Bronfenbrenner, 1979).
Stofnanakerfið á við um ýmsar stofnanir sem barnið er ekki í beinum tengslum við en
á þeim vettvangi geta aðstæður eða atburðir haft óbein áhrif á þroska barnsins. Því tilheyrir
meðal annars vinnustaður foreldra og félagslegt net þeirra við vini og ættingja. Ef foreldrar
eru félagslega einangraðir getur það haft áhrif á félagsþroska barnsins. Einnig getur þétt
félagslegt net í kringum foreldrana ýtt undir aukinn félagsþroska hjá barninu
(Bronfenbrenner, 1979).
Heildarkerfið umlykur öll kerfin. Það snýst um hvernig menningarleg, efnahagsleg og
félagsleg áhrif í samfélaginu geta haft áhrif á þroska barna með óbeinum hætti. Þessir þættir
innan heildarkerfisins hafa áhrif á aðstæður og þroska í nærkerfum og þess vegna er
mikilvægt að taka það með inn í myndina ásamt stéttarstöðu og menningu hvers og eins
(Bronfenbrenner, 1979). Lífkerfið snýst um þau áhrif sem verða þegar ákveðin
skammtímabreyting eða atvik verður í umhverfi og lífi barnsins, og hefur áhrif á þroska þess.
Sem dæmi er hægt að nefna þær innri og ytri breytingar sem fylgja auknum þroska á
unglingsárum (Bronfenbrenner, 1994).
Því meiri færni og styrk sem ungmenni búa yfir á unglingsárum þeim mun meiri líkur
eru á að vel gangi. Í þessu samhengi eru færnin og styrkurinn falin í félagslegum og
tilfinningalegum þáttum í félagsfærni og persónulegum viðbrögðum við álagi. Þetta byggist á
þeim skilningi að öll börn geti orðið fyrir félagslegu og tilfinningalegu álagi á þroskaferlinu en
áhrif atburða sem gerast í daglegu lífi ráðist af því hversu tíðir og alvarlegir streituþættir séu í
umhverfinu og af þeirri færni sem einstaklingur búi yfir til þess að takast á við neikvæðar
afleiðingar streitu. (Guðrún Kristinsdóttir, 2000).
1.2 Kenning Erikson um sjálfsmynd
Sálfræðingurinn Erik H. Erikson var einn virtasti fræðimaður 20. aldar á sviði sálar-‐ og
uppeldisfræði. Hann setti fram kenningu um sálfélagslegan þroska sem spannar þroskaferli
mannsins alla ævi. Erikson skipti ævinni niður í átta skeið þar sem gert er ráð fyrir að
einstaklingurinn eigi virkan þátt í eigin þroska með því að reyna að skilja og samþætta
daglega reynslu sína (Erikson, 1963).
10
Hvert skeið einkennist af ákveðnum átökum sem einstaklingurinn fer í gegnum með
sterkara sjálf og fastmótaðri sjálfsmynd, svo lengi sem honum tekst að komast farsællega frá
þeim. Ef hann staðnar á ákveðnu skeiði getur reynst erfitt að komast á það næsta þar sem
ekki er búið að leysa að fullu úr þeim verkefnum sem voru á fyrra skeiði. Forsenda þroska,
geðheilbrigðis og hamingju er að leiða öll átökin hjá sér á réttum tíma á hverju skeiði (Jón
Björnsson, 1993). Erikson taldi leitina að sjálfum sér vera eitt mikilvægasta verkefni
unglingsáranna (Aldís Unnur Guðmundsdóttir, 2007). Á þessum árum er unglingurinn gjarnan
að velta því fyrir sér hver hann er og hver staða hans er innan samfélagsins. Persónueinkenni
unglingsins, ný viðhorf og heimssýn hans myndast á þessu þroskastigi (Beckett og Taylor,
2010).
1.3 Kenning Albert Bandura um trú á eigin getu
Albert Bandura setti fram félagsnámskenningu sína árið 1986. Þar fjallaði hann meðal annars
um mikilvægi þess að hafa trú á eigin getu. Trú á eigin getu er ekki mæling á hæfni
einstaklingsins heldur trú á því að hafa nógu góða hæfni til að geta ákveðið að framkvæma
aðgerðir við mismunandi aðstæður og ná þeim markmiðum sem eru mikilvæg. Trú á eigin
getu hefur þar af leiðandi áhrif á sjálfsmynd einstaklings og hvað hann getur afrekað.
Bandura talaði um að trú á eigin getu væri eiginleiki þar sem koma þyrfti á reglu
vitsmunalegra, félagslegra, tilfinningalegra og hegðunartengdra þátta. Þessi möguleiki sem
hver og einn býr yfir til að geta nýtt sér trú á eigin getu felst í því að nota þessa þætti á
skipulegan hátt til að vinna að hinum ýmsu markmiðum. Lítill hvati eða áhugi til að takast á
við þá hluti sem taldir eru erfiðir eða óhugsandi kemur til af skorti á trú á eigin getu. Bandura
taldi að trú á eigin getu byggði á fjórum stoðum; eigin reynslu, herminámi, sannfæringu
annarra og líkamlegri og tilfinningalegri líðan. Þær hafa áhrif á hegðun og frammistöðu fólks
og það veltur á þeim hvaða sýn það hefur á eigin getu (Bandura, 1997).
Eigin reynsla er fyrsta stoðin, hún er sterkust og byggist á þeim tilraunum sem
einstaklingar gera til að stjórna umhverfi sínu. Þegar vel gengur styrkist trúin á eigin getu og
öfugt ef illa gengur. Best er að brjóta flókin og erfið markmið niður í undirmarkmið til þess að
auka líkur á velgengni sem leiðir til að markmiði verði náð. Mat einstaklingsins á því hvernig
tekst til er tengt þeim hugmyndum um útkomu sem hann hefur fyrirfram. Gott samræmi á
milli væntinga og útkomu styrkir trúna á eigin getu (Bandura, 1997).
11
Næst sterkasta stoðin er herminám. Einstaklingar nota upplýsingar um hvernig til
tekst hjá öðrum til þess að búa til væntingar um það hvernig til tekst hjá þeim sjálfum. Þetta
helst í hendur við hversu líkur fyrirmyndum sínum einstaklingurinn telur sig vera. Trúin á
eigin getu eykst ef fyrirmyndum tekst vel til. Samt sem áður er mjög áhrifaríkt ef illa gengur í
upphafi en haldið er áfram að reyna og markmiðið næst á endanum, því þá samsamar
viðkomandi sig við fyrirmyndina. Bandura telur að fjögur atriði hafi áhrif á herminámið, þau
eru athygli, minni, framkvæmd og áhugi. Það er mikilvægt að fá góða leiðsögn um
framkvæmd og mat á því hvernig gengur, sem og að veita því sem er að gerast athygli
(Bandura, 1997).
Þriðja stoðin er sannfæring annarra. Hrós er mikilvægt en það verður að vera gert á
réttan hátt. Best er að hrósa fyrst fyrir það sem vel er gert, koma síðan með uppbyggilega
gagnrýni um það sem mætti betur fara en enda síðan á því að hrósa fyrir framkvæmdina. Það
skiptir máli fyrir einstaklinginn að aðrir trúi á það sem hann getur og skilji við hann með
jákvæða upplifun af afskiptum umhverfisins (Bandura, 1997).
Fjórða og jafnframt síðasta stoðin fjallar um líkamlega og tilfinningalega líðan. Því
betur sem fólk lærir að láta sér líða vel því meiri líkur eru á að þeim takist að byggja upp trú á
eigin getu. Félagsnámskenning Bandura gengur út frá því að uppfylla þurfi líkamlegar þarfir
til þess að hafa góðan grunn að góðri líðan, síðan bætist aðrar þarfir við líkt og þörf fyrir
öryggi, kærleika, sjálfsvirðingu og lífsfyllingu (Bandura, 1997).
Þeir einstaklingar, sem eru með litla trú á eigin getu, eru líklegri til þess að koma sér
undan því að takast á við ákveðnar aðstæður vegna þess að þeir treysta sér ekki til þess að
komast heilir á húfi í gegnum aðstæðurnar og ákveða þess vegna frekar að forðast þær. Í
þessum tilvikum eru einstaklingar gjarnir á að einblína á galla sína og eru lengi að jafna sig ef
þeim mistekst. Hins vegar eru þeir einstaklingar sem hafa sterka trú á eigin getu líklegri til
þess að taka að sér erfið og krefjandi verkefni og leysa þau. Þessir einstaklingar ætla sér að
ná þeim markmiðum sem þeir hafa sett sér. Bandura taldi að trú á eigin getu hefði áhrif á
þroska og sálfélagslega virkni fólks í gegnum allt lífsskeiðið (Bandura, 1997).
Eins og þessar kenningar gefa til kynna geta þroskaverkefni ungmenna verið erfið og
það er margt sem þarf að hafa í huga svo þau hafi ekki neikvæð áhrif á líðan þeirra.
Mikilvægt er að reyna að komast í gegnum þessi verkefni á farsælan hátt til þess að reyna að
12
forðast tilfinningaflækjur eins og kvíða. Í næsta kafla verður kvíði ræddur nánar sem og
hvaða áhrif hann getur haft á ungmenni.
13
2. Kvíði
2.1 Hvað er kvíði?
Kvíði er eðlislægt viðbragð líkamans sem virkjast þegar einstaklingur finnur fyrir að velferð
hans er í hættu (Sóley Dröfn Davíðsdóttir, 2014). Kvíði er ákveðin tilfinning sem hjálpar
einstaklingum að bregðast við ógnum og forðast hættur (Birket-‐Smith, 1952/2010). Hann
getur birst með ýmsu móti og haft áhrif á tilfinningar, hugsanir, atferli og lífeðlislega
starfsemi (Aldís Unnur Guðmundsdóttir, 2007). Kvíði bætir frammistöðu fólks upp að vissu
marki og ýtir undir vandvirkni og góðan undirbúning í erfiðum aðstæðum. Kvíðaviðbragðið
fer af stað nánast ósjálfrátt í sumum aðstæðum, heilinn á það til að gera ekki greinarmun á
því hvers eðlis hættan er og þar af leiðandi getur einstaklingur kveikt á kvíðaviðbragðinu
einungis með því að hugsa um að hann sé í hættu staddur (Kvíðameðferðarstöðin, e.d.-‐a).
Frammistaða fólks er bundin við magn kvíðans, ef hann fer yfir ákveðið stig veldur hann því
að frammistaðan versnar og á endanum getur einstaklingur orðið óvinnufær (Sheehan,
1996/1997).
Fólk finnur stöðugt fyrir ýmiss konar áreiti í daglegu lífi og er afar móttækilegt fyrir því
þegar það er þreytt og undir miklu álagi. Þá er mjög freistandi að grípa til skammtímalausna
til þess að draga úr streitu og vanlíðan sem fylgir áreitinu. Vanlíðan er oft á tíðum óljós, bæði
sálræn og líkamleg. Margir leita sér hjálpar og óska eftir skjótum lausnum og lækningu. Í
opinberum tölum hefur komið fram að lyfjaneysla hefur farið hratt vaxandi, einkum neysla
þunglyndis-‐ og kvíðastillandi lyfja. Ástæðan gæti hugsanlega verið þetta mikla áreiti
(Álfheiður Steinþórsdóttir og Guðfinna Eydal, 2010).
2.2 Líkamleg einkenni kvíða
Þegar fólk glímir við kvíða hefur það líkamleg einkenni í för með sér. Þegar kvíðaviðbragð
verður losnar samstundis um orku í líkamanum, undirstúka heilans kemur viðbragðinu af
stað með því að virkja drifkerfi sjálfvirka taugakerfisins sem hefur bein áhrif á vöðva og
líffæri. Þegar þetta gerist finnur einstaklingur fyrir líkamlegum einkennum, eins og auknum
hjartslætti og hærri blóðþrýstingi. Drifkerfið örvar einnig nýrnahettumerg sem losar
adrenalín og noradrenalín út í blóðið (Sóley Dröfn Davíðsdóttir, 2014). Adrenalínið hefur
örvandi áhrif á hjartslátt og veldur örari öndun, útvíkkun á loftvegi og hægir einnig á
meltingunni. Noradrenalínið stuðlar hins vegar að losun sykurs úr lifrinni, eykur súrefnisflæði
14
til heilans og hefur áhrif á möndluna. Mandlan er staðsett í heilanum, hún stýrir athygli og
viðbrögðum mannsins. Undirstúkan örvar einnig heiladingulinn sem losar um hormónið
ACTH sem örvar nýrnahettubörkinn og gerir það að verkum að ýmis hormón sem stjórna
blóðsykurmagni og ýmsum snefilefnum leysast úr læðingi. Eitt þessara hormóna sem leysist
út er kortisól, það örvar losun og niðurbrot glýkógens, sem staðsett er í lifur og vöðvum
líkamans, í glúkósa. Þetta stuðlar að aukinni orku, betra minni til skamms tíma, hærri
sársaukaþröskuldi og hömlun á bólgum (Nolen-‐Hoeksema, Fredrickson, Loftus og Wagenaar,
2009).
Þegar kvíðatengd upplifun er liðin hjá dregur sefkerfi sjálfvirka taugakerfisins úr
drifkerfinu þannig að jafnvægi næst á ný. Kvíðaviðbragðið hefur hjálpað manninum að
komast af í aldanna rás. Án viðbragðsins hefði maðurinn oftar orðið villidýrum að bráð,
dottið fram af björgum eða lokast inni. Frummanninum gat stafað mikil hætta af óþekktum
ættbálkum og það gat reynst honum erfitt að bjarga sér ef hann kallaði yfir sig reiði og
höfnun frá sínum eigin ættbálki. Það kemur þess vegna ekki á óvart að fólk leitist við að falla
öðrum í geð og forðast átök (Sóley Dröfn Davíðsdóttir, 2014).
2.3 Kvíði á meðal ungmenna
Ungt fólk eða unglingar eru skilgreindir sem ungir einstaklingar á aldrinum þrettán til nítján
ára. Í þessari ritgerð er ýmist rætt um ungt fólk, ungmenni eða unglinga. Kvíði þeirra getur
verið nokkuð breytilegur eftir aldri. Í miðbernsku er kvíðinn oft bundinn við nám og
félagslegar aðstæður. Algengt er að ungt fólk finni fyrir kvíða yfir því að ná ekki að leysa
verkefni nógu vel og finnist frammistaða sín ekki nógu góð. Að finna fyrir gagnrýni,
ásökunum, óvinsældum, hræðslu við að koma fram og því að einangrast eru algengir kvillar
hjá þeim sem finna fyrir kvíða á þessum árum. Margar af þessum kvíðatengdu tilfinningum
sem koma í ljós í miðbernsku eiga það til að fylgja einstaklingum fram eftir unglingsárum
þeirra. Samt sem áður geta áherslurnar breyst og yfirleitt verður unglingurinn frekar kvíðinn
yfir útliti sínu og framkomu. Þær miklu breytingar sem verða á líkama og tilfinningalífi
unglingsins vekja oft upp kvíða. Unglingurinn á það til að mikla fyrir sér hlutina og finna
áþreifanlega fyrir því hversu erfitt hann á með að stjórna tilfinningum sínum og geðsveiflum.
Seinni hluti unglingsáranna er oft á tíðum rólegri og áhyggjur varðandi líkamsútlit hætta að
vera í forgangi. Hins vegar getur félagslegur kvíði orðið algengari og alvarlegri, einkum vegna
samskipta við hitt kynið og kvíða fyrir aukinni ábyrgð og skyldum (Sigurjón Björnsson, 1993).
15
Kvíði er talinn vera algengasta geðröskunin. Rannsókn Costello, Mustillo, Erkanli,
Keeler og Angold (2003) bendir til þess að við 16 ára aldur hafi 12,1% stúlkna og 7,7%
drengja greinst með kvíðaröskun. Algengi kvíðaraskana á meðal ungmenna er um 10-‐15%
hér á landi (UNICEF, 2011). Kvíði kemur fram á mismunandi vegu á mismunandi stigum í
þroska einstaklings. Kvíðinn getur verið augljós eða falinn en hann hefur oftast í för með sér
undirliggjandi neikvæðar tilfinningar hjá ungu fólki. Ungmenni með kvíðaraskanir eru
viðkvæmari en aðrir þegar kemur að því að ráða við tilfinningar sínar. Þau eru síður í stakk
búin að takast á við kvíðann og sýna viðbrögð sem ekki eru viðeigandi vegna þess að þau eru
hrædd við þá ógn sem þau standa frammi fyrir (Fitzpatrick, 2015).
16
3. Tegundir kvíðaraskana
Þegar einstaklingar upplifa tíð líkamleg eða andleg einkenni kvíða sem eiga sér enga
viðeigandi orsök er líklegt að sá hinn sami sé með kvíðaröskun. Kvíðaraskanir eru skilgreindar
á eftirfarandi hátt: „Stöðugur órökrænn kvíði og ótti sem stundum breytist í hræðslukast,
ásamt einkennum um truflanir í ósjálfráða taugakerfinu sem geta haft áhrif á aðra andlega
starfsemi líkt og truflanir á einbeitingu, athygli, minni og dómgreind“ (Sheehan, 1996/1997).
Hér á eftir verður fimm gerðum slíkra kvíðaraskana lýst.
1. Almenn kvíðaröskun (e. Generalized Anxiety Disorder)
Almenn kvíðaröskun á sér stað þegar kvíðinn er orðinn varanlegur, manneskjan hefur
áhyggjur af flest öllu og finnst óþægilegt að takast á við eitthvað nýtt (Fitzpatrick, 2015).
Almenn kvíðaröskun er algengasta röskunin. Í kjölfar hennar upplifa einstaklingar miklar
viðvarandi áhyggjur sem eiga sér enga sérstaka orsök. Fólk sem upplifir almenna kvíðaröskun
virðist ekki ná að losa sig undan áhyggjum sínum þó að það sé meðvitað um að kvíðinn er
meiri en tilefni er til. Það á oft erfitt með að ná slökun og glímir við svefnvandamál. Þeir sem
að upplifa almenna kvíðaröskun eiga alltaf von á því að eitthvað slæmt gerist og geta þar af
leiðandi haft miklar áhyggjur af alls kyns hlutum, allt frá heilsu og fjármálum til öryggis og
vinnu. Það er oft erfitt að átta sig á því hvað það er sem viðkomandi hefur áhyggjur af, bara
það að takast á við daglegt líf getur verið of mikið og valdið miklum kvíða (Guðrún
Oddsdóttir, 2004).
2. Félagsfælni (e. Social Anxiety)
Félagsfælni er þegar kvíðaeinkenni koma aðallega upp í samfélagslegum aðstæðum og í
kringum annað fólk. Unglingar eru oft á tíðum feimnir og eiga það til að finnast óþægilegt að
vera í félagslegum aðstæðum en þegar einstaklingur er farinn að glíma við félagsfælni er lífið
farið að snúast um að forðast slíkar aðstæður og þar af leiðandi byrjar hann að einangra sig.
Líkamleg einkenni félagsfælni eru skjálfti, aukinn hjartsláttur, sviti, svimi, roði og síðast en
ekki síst sú sterka tilfinning að vilja komast úr ákveðnum aðstæðum. Þessir erfiðleikar gera
það að verkum að unglingarnir missa af hlutum og ná ekki að upplifa sömu lífsreynslu og
aðrir. Þeir geta orðið afar einangraðir og einmana (Fitzpatrick, 2015).
17
3. Felmturöskun (e. Panic Disorder)
Felmturöskun er hugtak sem notað er yfir svokölluð ofsakvíðaköst og þegar köstin hafa það
mikil áhrif á líf fólks að það er hætt að ná að starfa eðlilega og lifa venjulegu lífi.
Ofsakvíðaköstin eru breytileg eftir einstaklingum en hafa samt sem áður ákveðin sameiginleg
einkenni sem koma í ljós. Ofsakvíðaköstin koma skyndilega og eru oft ófyrirsjáanleg.
Líkamleg einkenni ofsakvíðakasts eru aukinn hjartsláttur, erfiður og þungur andardráttur,
svimi og að einstaklingar upplifa sig í aðstæðum þar sem þeir ná ekki að stjórna sjálfum sér.
Ofsakvíðaköstin geta verið erfið og fólk sem þjáist af þessari röskun forðast aðstæður þar
sem það heldur að kastið gæti mögulega átt sér stað (Fitzpatrick, 2015).
4. Þráhyggju-‐ og árátturöskun (e. Obsessive-‐Compulsive Disorder)
Þráhyggju-‐ og árátturöskun gerir einstaklingi afar erfitt fyrir vegna þess að hann nær ekki að
stjórna hugsunum sínum né hvötum. Stöðugar truflandi hugsanir og ímyndanir taka yfir, sem
erfitt er að stjórna þó að einstaklingurinn átti sig á að þær séu órökréttar. Einnig endurtaka
þessir einstaklingar sig mikið, þeim finnst eins og þeir verði að gera hluti í ákveðinni röð
ákveðið oft til þess að losa sig undan kvíðanum. Margir ungir krakkar þora ekki að segja
neinum frá þessum köstum, halda oft á tíðum að þeir séu að missa geðheilsuna og gera þar
af leiðandi margt til þess að reyna að fela röskunina. Sumir einstaklingar vilja fá hjálp frá
sínum nánustu og biðja þeir stundum aðra um að athuga ákveðna hluti fyrir sig. Sumir
foreldrar dragast inn í þessa röskun með börnum sínum í þeim tilgangi að reyna að hjálpa
þeim (Fitzpatrick, 2015).
5. Áfallastreituröskun (e. Post-‐Traumatic Stress Disorder)
Fólk sem gengur í gegnum erfiða lífsreynslu og alvarleg áföll, þar sem lífi eða velferð þess er
ógnað, getur þróað með sér alvarlega kvíðaröskun sem kallast áfallastreituröskun. Í kjölfar
áfallsins upplifir fólk ákveðin einkenni sem hafa áhrif á líðan þess. Það upplifir mikinn dofa og
vanmátt, finnur fyrir mikilli einangrun og finnst eins og það nái ekki að tengjast sínum
nánustu eins og áður. Einstaklingar geta setið kyrrir og starað út í loftið tímunum saman eftir
að áfallið hefur átt sér stað (Nolen-‐Hoeksema, Fredrickson, Loftus og Wagenaar, 2009).
Fólk reynir að forðast allt sem tengist áfallinu; tilfinningar, hugsanir, ákveðna staði eða
athafnir. Það upplifir atburðinn ítrekað með mismunandi hætti og á það til að þora ekki að
fara að sofa vegna þess að það er hrætt við að fá martraðir. Algengt er að einstaklingar
18
komist í uppnám þegar eitthvað minnir á atburðinn og það getur reynst erfitt að ná fram
jákvæðum tilfinningum. Samt sem áður finna þeir oft fyrir líkamlegri spennu, pirringi, reiði
eða erfiðleikum með einbeitingu (Kvíðameðferðarstöðin, e.d.-‐b).
Eins og fram hefur komið skiptir miklu máli að þroski gangi vel fyrir sig svo að hægt sé að
forðast neikvæðar tilfinningar eins og kvíða. Það er margt sem kann að hafa áhrif á kvíða og
einn af þeim áhrifaþáttum geta verið samfélagsmiðlar. Í næsta kafla verða samfélagsmiðlar
skilgreindir og gerð grein fyrir hvaða áhrif þeir geta haft á ungmenni.
19
4. Samfélagsmiðlar
Samfélagsmiðlar eru skilgreindir sem heimasíður og tölvuforrit þar sem fólk getur átt í
samskiptum eða deilt upplýsingum um sig á Internetinu, úr farsíma eða tölvu. Facebook er
skilgreind sem heimasíða þar sem þú getur sýnt upplýsingar um þig og haft samband við vini
þína og vandamenn. Þegar talað verður um þá síðu í þessari ritgerð verður vísað til hennar
sem Facebook. Facebook er mjög vinsæll samfélagsmiðill um allan heim og þess vegna
verður mikið fjallað um heimasíðuna hér á eftir. Like er skilgreint á þann hátt að til þess að
að láta vita að þér líki við eitthvað á samfélagsmiðilssíðu eins og Facebook, er gjarnan ýtt á
takka þar sem stendur „Líkar við“ eða á ensku „Like“. Hér verður notast við enska orðið like.
4.1 Áhrif samfélagsmiðla á ungmenni
Samfélagsmiðlar gegna víðtæku hlutverki í daglegu lífi ungs fólks. Alveg frá því að ungmennin
vakna og þar til þau sofna á kvöldin lifa þau að miklu leyti í heimi sem byggist á Internetinu.
Notkun samfélagsmiðla er orðin almenn meðal ungmenna nú á dögum. Allar vefsíður sem
gefa kost á félagslegum samskiptum eru taldar til samfélagsmiðla. Þar á meðal eru
tengslanetssíður eins og Facebook og Twitter, þar sem fólk getur átt í samskiptum eða deilt
upplýsingum um sig, myndbandssíður eins og Youtube, þar sem fólk getur sett inn eða
skoðað alls konar myndbönd, og síðast en ekki síst blogg eða dagbókarfærslur þar sem fólk
heldur reglulega skrá yfir hugsanir, skoðanir eða reynslu sína og setur á Internetið fyrir aðra
til að lesa. Áfram mætti lengi telja en síður sem þessar hafa færst í vöxt á undanförnum
árum og eru orðnar algengar nú til dags (O’Keeffe og Pearson, 2011). Árið 2010 voru
notendur Facebook yfir 500 milljónir manna. Í dag eru notendur Facebook orðnir fleiri en
einn milljarður. Það þýðir að einn af hverjum sjö jarðarbúum notar samfélagsmiðilinn
(Nielsen, 2014). Rannsóknir hafa sýnt að þátttaka á ýmiss konar samfélagsmiðlum gagnast unglingum
á ákveðinn hátt. Hún eflir samskipti, félagsleg tengsl og tæknilega kunnáttu þeirra. Vefsíður
samfélagsmiðla eins og Facebook bjóða daglega upp á mörg tækifæri til þess að tengjast
vinum, skólafélögum og fólki með sameiginleg áhugasvið (O’Keeffe og Pearson, 2011). Á
þennan hátt geta unglingar lært að auka félagsleg samskipti við jafnaldra sína í gegnum
samfélagsmiðla. Samfélagsmiðlar bjóða einnig upp á stað þar sem unglingar geta ræktað nýja
vináttu, sem færir þeim aðgang að breiðara tengslaneti og félagslegum tækifærum. Það má
20
því segja að kostir þess að ungt fólk noti samfélagsmiðla séu meðal annars þeir að það geti
öðlast aukið félagslegt sjálfstraust, aflað sér víðtækari félagslegs stuðnings og lært meira
varðandi margmiðlun. Samfélagsmiðlar auka færni unglinganna í félagslegum samskiptum,
sem hjálpar þeim að sigla í gegnum það tæknilega samfélag sem við lifum í. Samfélagsmiðlar
hafa einnig áhrif á hugsanir ungs fólks þar sem þeir gefa unglingunum innsýn í nýja heima og
nýjar víddir með ofgnótt af upplýsingum sem þeir hefðu ef til vill ekki kynnst eða veitt
athygli, nema vegna notkunar á samfélagsmiðlunum. Eitt af því mikilvægasta sem
samfélagsmiðlar gera fyrir ungt fólk er að þeir halda þeim upplýstum um mál líðandi stundar.
Í þessu felst að oft eru til dæmis myndbönd um rétta breytni eða eitthvað sem er til
fyrirmyndar sýnd á samfélagsmiðlunum sem hvetja ungmennin á góðan hátt. Með þessu
móti eru þau oftar en ekki þátttakendur í ferli þar sem þau geta sagt sína skoðun og þar með
haft áhrif á mál sem eru þeim hugleikin (Bhavana, 2014).
Það eru samt sem áður margir sem halda því fram að samfélagsmiðlar hafi gert meiri
skaða heldur en gagn, sérstaklega gagnvart unglingum. Samfélagsmiðlar eru í eðli sínu hvorki
jákvæðir né neikvæðir, það er því mjög ákjósanlegt að unglingar stundi samfélagsmiðlana
samhliða því að stunda íþróttir og hvers kyns önnur áhugamál til þess að halda
samfélagsmiðlanotkun sinni í hófi. Samfélagsmiðlar geta haft neikvæð áhrif á það hvernig
ungar stúlkur og drengir mæla sjálfsmynd sína og það hversu myndarleg eða sæt þau eru
miðað við þær fyrirmyndir sem finna má á Internetinu. Útlit fallega fólksins á vefnum, sem
oftar en ekki er búið að lagfæra í þar til gerðum myndvinnsluforritum, á það til að fá
unglingana til að vera óánægða með eigið útlit. Þessir brengluðu staðlar hafa því neikvæð
áhrif á sjálfsmynd unglinganna sem reyna að finna mátt sinn og megin í þessum heimi. Þau
eiga það til að trúa því að þau verði að vera grönn til þess að vera flokkuð í þann hóp sem
þykir líkamlega fallegur (Bhavana, 2014). Notkun samfélagsmiðla getur jafnframt falið í sér
hættur sökum þess að unglingar hafa takmarkaðan þroska til að taka ákvarðanir um eigið líf.
Þau eru oftar en ekki viðkvæm gagnvart hópþrýstingi frá jafningjum sínum og eru þar með í
ákveðinni hættu þegar þau fara að prófa sig áfram og þræða Internetið (O’Keeffe og
Pearson, 2011).
Nýlegar rannsóknir benda til þess að unglingar tjái sig oft á neikvæðan hátt í gegnum
samfélagsmiðla með því að leggja aðra í einelti og stunda klíkumyndun. Þessi hegðun gerir
það að verkum að vandamál eins og til dæmis rafrænt einelti verða til (O’Keeffe og Pearson,
2011). Rafrænt einelti felur í sér tilfinningalegan skaða og opinbera niðurlægingu fyrir
21
fórnarlambið. Það getur komið fram í mismunandi myndum, til dæmis þegar niðrandi
prentuðu slúðri um þolanda er dreift, búnar eru til vefsíður sem eru sérstaklega ætlaðar til
þess að niðurlægja viðkomandi og stunduð er dreifing mynda og myndbanda sem sýna
þolanda í niðurlægjandi eða einhverjum óviðeigandi aðstæðum. Síðast en ekki síst eru dæmi
þess að gerendur hafi búið til heimasíður í nafni þolenda sem eru sérstaklega ætlaðar til að
gera lítið úr þeim. (Hinduja og Patchini, 2011). Rafrænt einelti er því miður algengt og hver sá
eða sú sem tekur þátt í samfélagsmiðlum getur orðið fyrir því. Eineltið getur haft í för með
sér djúpstæð sálfræðileg vandamál, þar með talið þunglyndi, kvíðaröskun og alvarlega
einangrun (O’Keeffe og Pearson, 2011).
4.2 Áhrif samfélagsmiðla á kvíða
Eins og fram hefur komið hafa samfélagsmiðlar sannarlega breytt samskiptum fólks nú til
dags. Þeir sem nota samfélagsmiðil, eins og til dæmis Facebook, geta verið í sambandi við
tugi og hundruð af svokölluðum „vinum“ á hverjum degi. Þessi stóri hópur vina á Facebook
er þó að megninu til fólk sem þeir hitta sjaldan eða aldrei. Aukin notkun samfélagsmiðla
hefur hvatt vísindamenn til þess að kanna hvort áhrif þeirra séu jákvæð eða neikvæð. Eitt af
því sem lögð er áhersla á að skoða er hvort samfélagsmiðlarnir hafi áhrif á andlega heilsu
fólks (Maldonado, 2014).
Marissa Maldonado er viðurkenndur fræðimaður á sviði sálfræði og heilsueflingar og
skrifaði grein um áhrif samfélagsmiðla á kvíða fólks. Í þeirri grein sagði hún frá því að notkun
samfélagsmiðla, og þá sérstaklega Facebook, gæti aukið streitu, kallað fram kvíða og
minnkað sjálfstraust hjá fólki. Notkunin gæti jafnvel valdið því að einstaklingur þróaði með
sér geðröskun. Samfélagsmiðlar bjóða upp á stað þar sem fólk getur skapað þá persónu og
þá mynd af sér sem það vill að heimurinn sjái. Fyrir suma getur þetta leitt til ákveðinnar
þráhyggju sem getur haft áhrif á sjálfsmynd einstaklingsins (Maldonado, 2014).
Einnig kemur fram í grein Maldonado að notkun Facebook ýtir undir kvíða þar sem
samfélagsmiðillinn býður upp á stöðuga uppfærslu upplýsinga. Þetta hvetur fólk til þess að
vera alltaf að athuga stöðuna og fréttastraumana til að fullvissa sig um að það sé ekki að
missa af neinu, hvort sem það er í tölvunni eða í farsímanum. Þessi stöðuga uppfærsla býður
upp á það að fólk beri sig saman við aðra og getur leitt til þess að sumir upplifi líf sitt
viðburðasnauðara og jafnvel fátæklegra en annarra. Í kjölfarið líta sumir á sig og sinn
persónuleika sem ófullnægjandi í samanburði við aðra á samfélagsmiðlinum. Þessar
22
stanslausu áhyggjur valda langvarandi streitu og kvíða sem getur leitt til
heilsufarsvandamála, þar á meðal geðraskana (Maldonado, 2014).
Samkvæmt félagsfærnilíkani Caplan eru einstaklingar sem kjósa að stunda samskipti
sín í gegnum Internetið í meiri hættu á að upplifa neikvæðar tilfinningar en aðrir.
Einstaklingar sem nota Facebook í meira mæli en aðrir þróa með sér ákveðna tengingu við
síðuna og þá sérstaklega þegar þeir nota hana til þess að forðast sínar eigin neikvæðu
tilfinningar. Það er því frekar líklegt að fólk sem upplifir mikinn einmanaleika og kvíða, upplifi
sig meira tengt öðru fólki þegar það fer inn á Facebook til að skoða nýjustu fréttastraumana
eða þegar það fær skilaboð eða athugasemdir frá vinum sínum í gegnum samfélagsmiðilinn
(Ryan, Chester, Reece og Xenos, 2014).
Samkvæmt grein Maldonado eru að sjálfsögðu kostir við samfélagsmiðlana en samt
sem áður er mjög mikilvægt að hafa neikvæðu áhrifin í huga í því skyni að hjálpa öðrum. Fólk
sem er viðkvæmt eða glímir við geðræn vandamál eins og kvíðaröskun eða þunglyndi á ekki
að þurfa að ganga í gegnum það að fyrirliggjandi vandamál versni vegna notkunar á
samfélagsmiðlum. Þeir sem glíma við ofangreind vandamál vilja samt oftar en ekki halda
áfram að nýta sér kosti samfélagsmiðlanna. Samkvæmt grein Maldonado er ein besta leiðin
til þess að halda þessum vandamálum í lágmarki að stilla notkun á samfélagsmiðlum í hóf
(Maldonado, 2014).
4.2.1 Kvíðaröskun vegna áhrifa samfélagsmiðla (e. social media anxiety disorder)
Fólk sem upplifir kvíða vegna samfélagsmiðla getur þróað með sér kvíðaröskun í kjölfarið.
Kvíðaröskunin sem orsakast af áhrifum samfélagsmiðla er heilkenni sem tengist félagsfælni.
Þegar þátttaka á samfélagsmiðlum hefur áhrif á andlega og líkamlega líðan einstaklings þjáist
hann af þessari röskun. Röskunin á við þegar fólk finnur fyrir kvíða og upplifir ákveðna
tilfinningalega þvingun þegar það er í tengslum við samfélagsmiðla. Það er hægt að skilgreina
þessa röskun á marga vegu. Ef að einstaklingar geta ekki náð að klára kvöldmatinn án þess að
skoða símann sinn til þess að athuga ákveðnar uppfærslur og skilaboð eða geta ekki farið út
úr húsi án þess að athuga uppfærslurnar og skilaboðin geta þeir verið með kvíðaröskun
vegna áhrifa samfélagsmiðla. Einnig getur kvíðaröskunin verið til staðar ef þeim finnst erfitt
að fara út úr húsi án þess að hafa hleðslutæki fyrir síma eða tölvu meðferðis, upplifa
kvíðatilfinningu af því að síminn geti orðið batteríslaus bráðlega og þeir geti í kjölfarið ekki
stundað samfélagsmiðlana. Önnur svokölluð einkenni þessarar ákveðnu kvíðaröskunar eru
23
þau að einstaklingar vilja eyða út innleggi eða mynd vegna þess að þeir fá ekki nógu mörg
like eða nógu margar athugasemdir. Í þeim tilfellum eru þeir stöðugt að uppfæra nýjustu
fréttastrauma og uppfærslur á samfélagsmiðlunum. Fyrir utan þessi einkenni þá er almennt
séð ekki litið á það sem andlega heilbrigt að dvelja stöðugt innan veggja samfélagsmiðlanna.
Kvíðaröskun sem kemur vegna áhrifa samfélagsmiðla er ekki viðurkennd sem
heilsufarsvandamál en hún getur samt sem áður verið mjög átakanleg fyrir einstaklinga sem
upplifa þessar kvíðvænlegu tilfinningar í kjölfar notkunar samfélagsmiðils. Það getur verið
ákveðin áskorun að komast yfir röskunina, sérstaklega ef viðkomandi hefur notað
samfélagsmiðla í langan tíma (Social media anxiety prominent in younger generation, 2013).
24
5. Staðan nú til dags – samfélagsumræðan
Samfélagsmiðlar eru valdamiklir í lífi marga unglinga eins og staðan er nú á dögum. Stofnunin
Anchor Society sér um að veita ráðgjöf, kennslu og heimaverkefni til þess að hjálpa börnum
og unglingum. Unglingar leita þangað, deila sínum leyndarmálum og leita ráða um
viðfangsefni og áskoranir sem þeir standa frammi fyrir. Síðastliðið ár hafa flestallar
unglingsstúlkur sem leita til stofnunarinnar haft eitt sameiginlegt vandamál sem er að þær
upplifa kvíða vegna notkunar samfélagsmiðla. Einn ráðgjafi stofnunarinnar sagði: „Þetta er
eins og tvíeggjað sverð, þær elska samfélagsmiðlana, þær þurfa á þeim að halda, þær myndu
aldrei losa sig við þá en samt sem áður kveljast þær á sama tíma. Þetta er afar ógnvekjandi
veruleiki“ (lausleg þýðing höfundar, Kostanich, 2015).
Unglingarnir hafa viðurkennt að þeir hafa litla sjálfsstjórn þegar kemur að því að láta
farsímann sinn vera og segja að þeir þrífist á samfélagsmiðlunum. Einn af unglingunum sagði:
„Samfélagsmiðlarnir láta mér líða illa oft á tíðum, mér líður eins og ég sé ekki að lifa nógu
fullnægjandi lífi“ og annar unglingur sagði einnig: „Það er mjög auðvelt að bera saman
hversu mörg like ég fæ miðað við það hversu mörg like vinir mínir fá. Ef þeir fá fleiri like en ég
velti ég því gjarnan fyrir mér af hverju það sé“ (lausleg þýðing höfundar, Kostanich, 2015).
Ráðgjafar stofnunarinnar halda því fram að það sé mikil pressa nú til dags á unglinga
um að vera fallegir og vinsælir, sérstaklega í þessum sýndarheimi þar sem allir fylgjast með
og segja sínar skoðanir. Ungmennin sjá og halda að þau séu partur af ákveðnum heimi sem
er í raun ekki til. Í staðinn fyrir að taka þátt í lífinu sitja unglingarnir fyrir framan tölvuskjá eða
símaskjá og virða fyrir sér heiminn. Það gerir samfélagsmiðlana flókna, þeir valda
unglingunum alvarlegum vandamálum, eins og kvíða, þegar kemur að því að eiga í
mannlegum samskiptum við fólk. Ráðgjafarnir telja að hræðslan við það að missa af
ákveðnum atriðum, ótraust vináttutengsl og þessi stöðugi samanburður við aðra séu þau
áhrif sem samfélagsmiðlarnir hafi á kvíða hjá unglingunum. Ráðgjafarnir vilja meina að
unglingarnir séu að verða félagslega einangraðir af því að þeir fái að þrífast í heimi
samfélagsmiðla. Þeir ráðleggja foreldrum að bíða eins lengi og þeir geta með að gefa börnum
sínum farsíma og segja einnig að mikilvægt sé að hafa daglega tíma án Internets. Jafnframt
benda ráðgjafar á mikilvægi þess að foreldrar séu meðvitaðir um hvað er að gerast á
samfélagsmiðlunum til þess að þeir geti gripið inn í ef eitthvað alvarlegt gerist (Kostanich,
2015).
25
Árið 2014 tók fréttamaður viðtöl við sex unglinga frá New York og Los Angeles.
Unglingarnir töldu í fyrstu að Facebook og aðrir samfélagsmiðlar ykju ekki kvíða hjá þeim.
Þegar samtalið fór að snúast um mikilvægi þess að fá aðra til þess að líka við myndina sína og
um hræðsluna við það að missa af ákveðnum hlutum áttuðu þeir sig á að þessa tilfinningu
könnuðust þeir allir við. Ein stelpa úr hópnum sagði frá því að vinkona hennar hefði skipt um
forsíðumynd af sér inn á Facebook og myndin hefði ekki fengið tvö hundruð like eins og
gerist vanalega þegar hún skiptir. Henni leið alls ekki vel í kjölfarið og var að fara yfir um, eins
og vinkona hennar orðaði það. Unglingarnir sögðu að því fleiri like sem maður fengi því meiri
virðingu hlyti maður. Komið hefur í ljós að like hafa leitt til þess að unglingarnir upplifa
ákveðna athygli og viðurkenningu út frá þeim. Því má líkja við keppni þar sem mikilvægast er
að fá sem flest like. Viðkomandi fær fleiri like ef hann á fleiri vini inná sínum samfélagsmiðli
og hann verður að halda áfram að uppfæra síðuna til þess að ná sér í fleiri vini. Unglingarnir
festast í ákveðnum vítahring og hann ýtir undir kvíða hjá þeim (Wallace, 2014).
Í febrúar 2015 var haldinn morgunverðarfundur hjá Advania um áhrif samfélagsmiðla
á börn og unglinga hér á landi. Á fundinum kom fram að like skipta miklu máli í lífi unglinga
þar sem félagslíf þeirra fer að miklu leyti fram á Internetinu. Sumir unglingar hafa jafnvel
fleiri en einn aðgang á hverjum samfélagsmiðli til þess að geta oftar sett like á sínar eigin
myndir. Í mörgum tilfellum eru vinsældir unglinga miðaðar út frá því hversu mörg like þau fá.
Á fundinum var talað um mikilvægi þess að foreldrar þyrftu að bregðast við þar sem hætta
væri á að Internetið og like tækju yfir sjálfsmynd barnsins. Með þessu áframhaldi væru þau
sífellt að bera sig saman við aðra. Algengt er að fólk búi sér til eins konar gerviheim eða
glansmynd af lífi sínu inn á samfélagsmiðlum og þegar fólki finnist það ekki standast
samanburðinn upplifi það neikvæðar tilfinningar. Þá voru á fundinum nefnd fjölmörg dæmi
um að unglingar glímdu við mikla streitu sökum allra samfélagsmiðlanna. Áreitið sem fylgir
þeim er gríðarlegt, sérstaklega þegar síminn klingir viðstöðulaust. Ef þetta fer yfir ákveðin
mörk getur áreitið leitt til kvíða og ákveðinnar áráttu við að þurfa alltaf að bregðast við
hljóðinu í símanum. Í lok fundar var aftur komið inn á mikilvægi þess að foreldrar létu þessi
mál sig varða, kynntu sér hlutina og ræddu við börnin. Það þyrfti að láta þau leggja niður
snjalltækin endrum og eins og kenna þeim skil á netheimum og raunheimi (Sunna Karen
Sigurþórsdóttir, 2015).
26
Eins og sjá má geta samfélagsmiðlar ýtt undir kvíða hjá ungmennum og er því mikilvægt
að þau hafi í daglegu lífi aðgang að upplýsingum og fræðslu til að varna því að þau upplifi
neikvæðar tilfinningar eins og kvíða og einnig til þess að byggja upp betri sjálfsmynd sem
gæti hjálpað þeim í tengslum við hann.
27
6. Forvarnir
Á undanförnum árum hefur áhersla aukist á að fyrirbyggja vandamál hjá unglingum með því
að beita forvarnarstefnu með hag þeirra að leiðarljósi. Hegðun unglinga er margþætt og
flókin og þess vegna er góð forvörn mikilvæg í lífi þeirra (Catalano, Berglund, Ryan, Lonczak
og Hawkins, 2004). Foreldrar, kennarar, vinir og íþróttir eru góð dæmi um áhrifaþætti í lífi
fólks og geta talist til forvarna þegar kemur að kvíða. Þessir þættir geta styrkt sjálfsmynd
unglinganna og hjálpað þeim að stíga skref í átt að góðri andlegri heilsu.
6.1 Foreldrar
Samkvæmt vistfræðikenningu Bronfenbrenner er fjölskyldan í nærkerfi einstaklingsins og eru
foreldrar því áhrifamikill þáttur í lífi hvers og eins. Nærkerfið byggir á áhrifum athafna,
hlutverka og samskipta í þroska einstaklingsins á hverjum vettvangi fyrir sig og til þess að
kerfin stuðli að jákvæðri aðlögun í þroska þurfa samskiptin innan þeirra að einkennast af
góðum tengslum, hvatningu, leiðsögn og hlýju (Bronfenbrenner, 1979).
Rannsóknir hafa sýnt fram á að unglingar sem eru í nánum tengslum við foreldra sína
eru ólíklegri til að eiga við félagsleg eða sálræn vandamál að stríða (Bryndís Björk
Ásgeirsdóttir, Hera Hallbera Björnsdóttir, Inga Dóra Sigfúsdóttir, Jón Sigfússon og Stefán
Hrafn Jónsson, 2003). Foreldrar gegna mikilvægu hlutverki í lífi unglinga þar sem ungmennin
eru brothættar verur og hafa mikla þörf fyrir sterkan tilfinningalegan bakhjarl. Á þessum
árum þarfnast þau viðmælanda, áhorfanda og þátttakanda sem sýnir þeim stuðning á þessu
mótunartímabili sem getur einkennst af óvissu og uppreisn (Hrafnhildur Ragnarsdóttir,
1993).
6.2 Skólinn og kennarar
Rannsóknir hafa almennt sýnt fram á að skólinn er afar mikilvægur vettvangur í lífi unglinga,
þar verja þeir miklum tíma á mótandi aldursskeiði. Í skólanum stunda unglingar nám sitt,
taka við nýrri þekkingu og verða fyrir áhrifum frá kennurum sínum. Skólinn spilar stórt
hlutverk og hefur mótandi og oft varanleg áhrif á framtíð einstaklinga. Tengsl unglinganna
við skólann, líðan þeirra í skólanum og skuldbinding við námið eru mikilvægir þættir í
sjálfsmynd þeirra og líðan (Álfgeir Logi Kristjánsson, Hrefna Pálsdóttir, Inga Dóra Sigfúsdóttir,
Jón Sigfússon og Margrét Lilja Guðmundsdóttir, 2010).
28
Í aðalnámskrá grunnskóla kemur fram að skólarnir skuli vinna að forvörnum og
heilsueflingu þar sem andleg, líkamleg og félagsleg vellíðan nemenda sé höfð að leiðarljósi. Í
skólum þarf að skapa jákvætt andrúmsloft og heilsueflandi umhverfi þar sem þroski og
heilbrigði barnanna er í fyrirrúmi. Sjálfsmynd, andleg vellíðan, góð samskipti og skilningur á
eigin tilfinningum og annarra eru nokkrir af þeim þáttum sem lögð er áhersla á þegar kemur
að heilbrigði í skólum (Aðalnámskrá grunnskóla, 2011).
6.3 Vinahópar
Samkvæmt kenningu Erikson eru unglingsárin sá tími þar sem unglingurinn reiðir sig meira á
vinina, álit þeirra og skoðanir en áður. Ef unglingnum tekst vel til með þessi nýju verkefni
unglingsáranna hefur hann samkvæmt kenningunni náð að móta sterka og góða sjálfsmynd
(Erikson, 1963). Vináttan skipar stóran sess þegar kemur að sálarlífinu og mannlegum
samskiptum. Vinir og aðrir jafnaldrar eru mikilvægir mótunaraðilar þar sem ungmenni
tileinka sér margvíslega færni í hópi og verða fyrir áhrifum sem geta mótað þau til lífstíðar.
Vinátta getur fullnægt ákveðnum innri þörfum, skapað nánd, myndað andlegan stuðning og
hjálpað til við ákveðin verkefni. Það er einnig mikilvægt að vera viðurkenndur í
félagahópnum, það virðist þroska aðra hæfileika og veita annars konar öryggis-‐ og hópkennd
en vináttusambönd gera. Þar þroskast leiðtogahæfileikar, félagslyndi og ákveðni (Aldís Unnur
Guðmundsdóttir, 2007).
Eins og kom fram fyrr í ritgerðinni taldi Bronfenbrenner mikilvægt að gott samband
væri á milli foreldra og vina unglinga vegna þess að á unglingsárum gæti dregið úr
samskiptum við foreldra og tengsl við vini og félaga orðið meiri. Ef tengsl við vinina yrðu
ráðandi án jákvæðra tengsla við foreldra gæti það aukið líkur á hegðunarvanda unglinganna.
(Bronfenbrenner, 1979).
6.4 Íþróttir og hreyfing
Það hefur sýnt sig og sannað að líkamleg hreyfing skilar margvíslegum ávinningi. Líkamleg
hreyfing stuðlar að jafnaðargeði, heilbrigði, aukinni sjálfsánægju og betri sjálfsmynd.
Hreyfing getur einnig hjálpað einstaklingum sem berjast við geðsjúkdóma á borð við
langvarandi þunglyndi og kvíða (Kirkcaldy, Shephard og Siefen, 2002). Rannsóknir hafa sýnt
fram á mikilvægi hreyfingar og íþróttaiðkunar fyrir líðan og heilsu ungs fólks. Þess vegna eru
ungmenni sem iðka íþróttir líklegri til þess að tileinka sér heilbrigðan lífsstíl og í kjölfar þess
29
líður þeim betur andlega. Það virðist því skipta miklu máli að hvetja unglinga til
íþróttaiðkunar (Álfgeir Logi Kristjánsson o.fl., 2010).
Þessa áhrifaþætti hér að ofan er hægt að nýta til góðs þegar kemur að forvörnum. Ef
þessar forvarnir eru ekki til staðar er líklegra að ungmennin þrói slakari sjálfsmynd og séu þar
af leiðandi í meiri hættu á að glíma við neikvæðar tilfinningar eins og kvíða. Þeir einstaklingar
sem þróa með sér kvíða, þurfa oftar en ekki hjálp til þess að vinna úr honum. Í næsta kafla
verður fjallað um nokkur meðferðarúrræði sem eru í boði fyrir ungt fólk með kvíða.
30
7. Úrræði við kvíða á meðal ungmenna
7.1 Hugræn atferlismeðferð
Hugræn atferlismeðferð er eitt algengasta meðferðarúrræðið sem beitt er á fólk með
kvíðaraskanir. Markmið meðferðarinnar er að breyta því hugsanamynstri sem veldur
óæskilegum tilfinningum og læra að skipta þeim út fyrir gagnlegri og hagnýtari hugsanir
(Martin, 2013). Hugræn atferlismeðferð er talin vera mjög gott meðferðarúrræði fyrir
unglinga af því að hún er einföld og auðvelt fyrir þá að skilja um hvað meðferðin snýst. Í
meðferðinni setja ungmennin sér markmið og læra að ná meiri stjórn á hugsunum sínum
sem leiðir til þess að þeim líður betur. Einn helsti kostur hugrænnar atferlismeðferðar er að
hún virkar frekar fljótt. Flestar rannsóknir hafa sýnt fram á að 10-‐20 skipti skila oft góðum
árangri og er hver meðferðartími oftast miðaður við klukkustund í senn. Hugræn
atferlismeðferð getur bæði verið einstaklings-‐ og hópmeðferð. Hópmeðferðin hefur þann
kost í för með sér að þá koma unglingar sem glíma við sama vandamál saman og þar af
leiðandi getur hún dregið úr þeirri tilfinningu að þeir upplifi sig einangraða og öðruvísi en
aðrir (Fitzpatrick, 2015). Það eru til þó nokkrar útfærslur á hugrænni atferlismeðferð sem eru
sérstaklega ætlaðar ungmennum. Meðal þeirra eru Coping Cat og Friends for life.
7.1.1 Coping Cat
Á síðasta áratug hafa mismunandi útfærslur af hugrænni atferlismeðferð vegna kvíðaraskana
verið þróaðar og prófaðar áfram. Sú fyrsta sem þróuð var fyrir börn og unglinga er Coping
Cat-‐meðferðin. Hún felur í sér þrjú meginmarkmið fyrir skjólstæðingana. Fyrsta markmiðið er
að læra að þekkja, upplifa og höndla kvíðann. Því næst lærir einstaklingurinn að draga úr
kvíðanum. Þriðja og síðasta markmiðið snýst um að öðlast stjórn á erfiðum og krefjandi
verkefnum sem hann þarf að fást við og ná tökum á. Coping Cat-‐meðferðin samanstendur af
16-‐20 skiptum. Fyrri hlutinn inniheldur átta fundi sem snúast um að þjálfa ákveðna kunnáttu
þar sem einstaklingi er kennt að þekkja líkamleg einkenni kvíðans. Í þessum hluta lærir hann
að taka þá áskorun að draga úr kvíðamiðuðum hugsunum og þróa áætlun til þess að kljást
við ástandið. Síðast en ekki síst lærir hann að treysta á eigin frammistöðu og ná betri andlegri
líðan á uppbyggjandi hátt. Seinni hlutinn samanstendur af 8-‐12 fundum þar sem unglingurinn
er þjálfaður í að beita þeirri færni sem hann hefur lært í gegnum fyrri hluta meðferðarinnar
(March og Morris, 2004).
31
Meðferðin býður einnig upp á aðferðir eins og hlutverkaleiki og slökunarþjálfun
ásamt fleiri leiðum til þess að ná tökum á kvíðanum. Coping Cat-‐meðferðin hefur reynst vera
jafn árangursrík fyrir stelpur og stráka. Í langflestum tilfellum virðist Coping Cat-‐meðferðin
skila góðum árangri og hefur hún haft góð áhrif á geðheilsu barna og unglinga (March og
Morris, 2004).
7.1.2 Friends for life
Friends for life byggir á hugmyndafræði hugrænnar atferlismeðferðar og reynir að koma í
veg fyrir kvíða hjá börnum og unglingum með því að byggja upp tilfinningalegt þol þeirra.
Meðferðin miðar að því að draga úr tíðni sálfræðilegra vandamála og einangrun með því að
kenna ungmennum hvernig hægt er að takast á við kvíða og ná að stjórna honum. Friends for
life er samfélagsmiðuð hugræn atferlismeðferð sem byggist á traustu og fræðilegu líkani þar
sem áhersla er lögð á vitsmunalegar, lífeðlislegar og hegðunartengdar aðferðir sem hafa
áhrif á kvíða og hvernig best er að meðhöndla hann.
Markmið meðferðarinnar er meðal annars að auka getu þátttakenda til að þekkja og
stjórna eigin hegðun, tilfinningum og hugsunum. Meðferðin miðar að því að byggja þá upp,
hjálpa þeim að mynda heilbrigð og gefandi tengsl við aðra og ná að viðhalda þeim.
Meðferðin sýnir þeim ákveðnar aðferðir sem þeir geta notað til þess að taka góðar
ákvarðanir í sínu lífi og hjálpar þeim að þróa hæfni til þess að meðhöndla sína andlegu líðan
(Friends for life, 2007).
7.2 Gjörhygli
Gjörhygli er eiginleiki sem allir búa yfir en í mismiklum mæli. Hver og einn getur þjálfað upp
þessa hæfni. Gjörhygli er nálgun sem fjallar um athygli og hvernig eigi að beita henni á
ákveðinn hátt. Einbeita á sér að því að beina athyglinni að líðandi stund. Með öðrum orðum
þá er huganum beint að því sem er að gerast hér og nú og ekki verið víðs fjarri í huganum.
Ekki er verið með hugann við neitt sem er liðið, gæti átt sér stað í framtíðinni eða við það
sem er ógert. Án fyrirfram gefinna skoðana eða fordóma á að sættast við það sem
viðkomandi finnur, hugsar, skynjar, heyrir eða sér nákvæmlega á því augnabliki hverju sinni
(Gjörhygli, e.d.).
32
Gjörhygli er ákveðin nálgun sem getur hjálpað þeim sem upplifa kvíða. Hún hjálpar
ungmennum að beina athyglinni alfarið á eitt augnablik í einu og dvelja í líðandi stund.
Ungmenni sem þjást af alvarlegum kvíðaröskunum geta átt í erfiðleikum með að tileinka sér
þessa tækni sökum þess að þau ná ekki að slaka nógu vel á. Samt sem áður hafa margir á
endanum náð tökum á að meðhöndla þessa tækni með hjálp frá kennara sem að sýnir þeim
skilning, er hvetjandi og hefur góða reynslu. Það er mikill ávinningur sem fylgir þessari nálgun
fyrir þá sem ná tökum á henni. Hún getur veitt unglingum vellíðan af því að þeir upplifa að
þeir geti gert eitthvað fyrir sig og séu að hjálpa sjálfum sér (Fitzpatrick, 2015).
Greeson (2009) skoðaði tengsl á milli gjörhygli og andlegrar heilsu. Samkvæmt
niðurstöðum hans eru ákveðnar vísbendingar um að aukin athygli og næmi á hvert augnablik
geti leitt til betri aðlögunarviðbragða við kvíða og stuðlað að vellíðan hjá fólki.
7.3 BUGL
Barna-‐ og unglingageðdeild Landspítalans (BUGL) er deild sem sér um greiningu og meðferð
á geðröskun barna og unglinga. Þar vinna fagaðilar sem sérhæfa sig í ákveðinni greiningu og
meðferð á geðrænum vandkvæðum með það að leiðarljósi að auka lífsgæði einstaklingsins
og fjölskyldu hans. BUGL er fyrir einstaklinga upp að 18 ára aldri. Mikil áhersla er lögð á góð
samskipti og gott samstarf við foreldra eða forráðamenn skjólstæðinganna. Deildin er í
samstarfi við aðrar deildir og stofnanir sem veita börnum, unglingum og fjölskyldum þeirra
þjónustu. Auk þess veitir deildin ákveðna fræðslu og ráðgjöf til foreldra og fagaðila sem þurfa
á upplýsingum og hjálp að halda (Landspítali, 2014).
Starfsfólk BUGL kemur úr mörgum fagstéttum og meðal annars vinna læknar,
sálfræðingar og félagsráðgjafar á deildinni. Þeir vinna saman í þverfaglegum teymum til þess
að veita bestu þjónustu sem völ er á. Sú þjónusta sem nærsamfélagið veitir börnum og
unglingum með geðraskanir flokkast í grunnþjónustu, ítarþjónustu og sérþjónustu. Þjónusta
BUGL flokkast undir sérþjónustu þar sem deildin sinnir afar flóknum tilfellum. Á deildinni eru
tvenns konar úrræði í boði, göngudeild og legudeild. Fyrst og fremst er reynt að gefa
viðkomandi kost á að lifa áfram í sínu daglega umhverfi og sækja þá þjónustu til
göngudeildar BUGL sem hann þarfnast, þar er unnið að greiningu og meðferð ásamt fræðslu,
þjálfun og ráðgjöf fyrir einstaklinginn og fjölskyldu hans. Þegar þörfin verður meiri og
sérhæfð meðferð er talin besti kosturinn eru einstaklingar lagðir inn á legudeild barna eða
33
unglinga. Legudeildin er fyrir þá sem þurfa á tímabundinni innlögn að halda vegna geðræns
vanda. Deildin er í nánu samstarfi við margar stofnanir í grunn-‐, ítar-‐ eða sérþjónustu og
halda utan um mál barna og unglinga. Að lokinni meðferð á göngudeild eða legudeild BUGL
taka þessir þjónustuaðilar við umönnun og eftirfylgni einstaklingsins (Landspítali, 2014).
Ef grunur vaknar um geðræn vandkvæði hjá barni eða unglingi er hægt að setja af
stað ákveðið ferli sem leiðir til þess að sá hinn sami fær tilvísun á BUGL. Fyrst er gerð
frumgreining áður en viðkomandi er vísað þangað. Þar þurfa upplýsingar um vandann og
niðurstöður athugana á þroskastöðu barnsins eða unglingsins að koma fram. Samt sem áður
þurfa forráðamenn fyrst að leita eftir þjónustu innan sveitarfélagsins sem þeir búa í, tala við
heilsugæslu, félagsþjónustu eða sálfræðiþjónustu í skóla einstaklingsins. Sérfræðingar meta
vandann út frá tengslum viðkomandi við fjölskyldu, umhverfi og skóla. Ef vandinn er metinn
á þann hátt að viðkomandi þurfi sérhæfða þjónustu er það á ábyrgð sérfræðinganna að vísa
á BUGL. Helstu ástæður tilvísana á BUGL eru vegna hegðunar-‐, geð-‐ og þroskaraskana
(Landspítali, 2014).
Á göngudeild BUGL er unnin ítarleg greiningarvinna þar sem vandinn er skilgreindur.
Að henni lokinni er boðið upp á viðeigandi meðferðarúrræði. Höfð er samvinna við fjölskyldu
um viðeigandi stuðning, tilvísanda og þá einstaklinga sem tilheyra nærumhverfi barnsins.
Fjölskylduvinnu er fléttað saman við allar meðferðir á BUGL. Ef talin er þörf á sérhæfðari
fjölskyldumeðferð er ávallt reynt að veita hana. Sú meðferð byggist á að kortleggja og greina
þann sálfélagslega samskiptavanda innan fjölskyldunnar sem tengist oft geð-‐ og
hegðunarröskunum. Fjölskyldan fær einnig stuðning til þess að þekkja og nýta sér þá
styrkleika sem hún býr yfir til þess að vinna í sameiningu að því að bæta líðan innan
fjölskyldunnar og hjá þeim fjölskyldumeðlimi sem dvelur á BUGL (Landspítali, 2014).
Meðferðarúrræðin sem hafa verið talin upp í þessum kafla eiga að geta hjálpað
einstaklingum með kvíðaraskanir. Félagsráðgjafar vinna einnig með börnum og unglingum
sem glíma við erfiðleika af þessum toga. Þeir vinna með einstaklingnum út frá heildarsýn og
hjálpa honum með vandamál sín í ljósi félagslegs tengslanets hans.
34
8. Starf félagsráðgjafa
Félagsráðgjafar vinna með einstaklingum til þess að hjálpa þeim að finna lausnir og benda
þeim á réttindi sín. Helsta markmið félagsráðgjafa er að hjálpa einstaklingum til sjálfshjálpar,
að bæta líf sitt og leysa þau vandamál sem eru til staðar. Þegar félagsráðgjafar vinna með
fólki sem á við geðræn vandamál að stríða, greina þeir vandkvæði út frá ákveðinni
hugmyndafræði og kenningum þar sem heildarsýn er höfð að leiðarljósi. Greining
félagsráðgjafa á geðrænum vandkvæðum er byggð upp á sálfélagslegu mati þar sem yfirsýn
og eðli sálfræðilegs vanda skjólstæðingsins er metið út frá fjölskyldu viðkomandi, skóla,
félagslegum og andlegum þroska sem getur haft áhrif á líðan hans (Sadock og Sadock, 2003).
8.1 Greiningarlíkan Hrefnu Ólafsdóttur
Í greiningarlíkani Hrefnu Ólafsdóttur félagsráðgjafa (2006) eru góðar og mikilvægar
upplýsingar fyrir þá sem sinna börnum og unglingum sem eiga við sálfélagsleg eða geðræn
vandkvæði að stríða. Líkanið er byggt upp á heildarsýn félagsráðgjafar sem Hrefna telur afar
mikilvægt við greiningu á geðrænum vandkvæðum. Upplýsingarnar úr líkaninu nýtast vel
sem grunnur að skipulagi meðferðar þar sem ákveðnir þættir eru skoðaðir.
Samkvæmt greiningarlíkaninu er byrjað á því að greina persónuleika einstaklingsins til
þess að sjá hvar vandinn liggur. Á þessu stigi er lífsskeið ungmennisins tekið fyrir. Þroskaferli,
tengslamyndun og sálfélagslegir styrkleikar eða veikleikar eru kannaðir sem og hvort einhver
áföll hafi átt sér stað. Einnig er skoðað hvort viðkomandi hafi orðið fyrir ákveðnum
áhrifaþáttum eða sérstökum vandamálum sem hafa haft áhrif á líf hans. Síðast en ekki síst er
skilningur barnsins eða unglingsins á vandanum metinn og athugað hvaða væntingar
einstaklingurinn hefur til þess að vinna úr honum.
Því næst er persónuleiki foreldranna skoðaður. Farið er yfir lífsskeið þeirra ásamt því að
skoða sálfélagslega styrkleika og veikleika. Tekið er til greina hver sjálfsmynd, þroski og
félagsleg virkni þeirra er og athugað hvort einhver geðræn vandkvæði, áföll, áhættuþættir
eða sérstök vandamál séu til staðar. Gerð er grein fyrir hver þeirra afstaða er til vandans og
vilji og væntingar þeirra til þess að vinna úr honum. Að lokum er tekið mið af því hvaða
reynslu þau búa yfir þegar kemur að stuðningi og meðferð á geðrænum vandkvæðum.
Því næst er fjölskyldukerfið skoðað. Það spilar stórt og mikilvægt hlutverk í ferlinu. Þar er
margt tekið til greina eins og efnahagsleg staða fjölskyldunnar, lífsskeið hennar,
35
uppeldishugmyndir, hlutverk og skipulag innan hennar. Tengsl og samskipti á milli
fjölskyldumeðlima og við stórfjölskylduna eru metin og í ljósi þessa er félagslegt umhverfi
fjölskyldunnar skoðað þar sem álag og félagslegt gildi hennar er metið. Tekið er til greina
hver hugmyndafræði og afstaða hennar er sem og hvaða úrræði standa til boða.
Hrefna telur að líkanið nýtist sem aukið skipulag og víkkun á greiningu samhliða öðrum
greiningum en komi samt sem áður ekki í staðinn fyrir aðra greiningarvinnu á sérhæfðum
stofnunum, eins og sálfræðigreiningu eða sjúkdómsgreiningu. Starf félagsráðgjafans við
greiningu og meðferð vegna geðrænna vandkvæða ungmenna og fjölskyldna þeirra leggur
áherslu á að horfa á vanda skjólstæðings í samhengi við umhverfi hans (Hrefna Ólafsdóttir,
2006).
8.2 Unglingasmiðjur
Stígur og Tröð eru unglingasmiðjur sem starfræktar eru í Reykjavík. Unglingasmiðjurnar voru
báðar settar upp til þess að auka fyrirbyggjandi starf meðal unglinga í Reykjavík. Starfsemi
þessara tveggja smiðja byggist upp á sömu hugmyndafræði og meðferðarúrræði þeirra eru
mjög áþekk. Félagsráðgjafi sinnir forstöðumannsstarfi í báðum smiðjunum (Þjónustumiðstöð
Breiðholts, 2009).
Markmið smiðjanna er að bæta líðan ungmenna sem þangað koma, auka
félagsþroska og draga úr einangrun þeirra. Vera unglinganna í smiðjunum styrkir hópkennd
þeirra og hefur jákvæð áhrif á samskipti þeirra við aðra. Áhersla er lögð á að kenna þeim
virðingu og umburðarlyndi ásamt því að efla sjálfstraust þeirra og jákvæða sjálfsmynd.
Unglingarnir sem leita þangað eru oft félagslega einangraðir og einmana og það hefur
neikvæð áhrif á sjálfsmynd þeirra og líðan. Þeir sýna gjarnan einkenni þunglyndis og kvíða
ásamt því að félagsfærni þeirra er afar slök (Velferðarsvið Reykjavíkurborgar, 2008).
Í starfi unglingasmiðjanna er lögð áhersla á styrkjandi og hvetjandi vinnu, bæði hjá
einstaklingum og hópum. Einnig er stuðlað að samstarfi við foreldra og ráðgjafa viðkomandi
unglings og síðast en ekki síst teymisvinnu starfsfólks innan smiðjunnar og að allir þekki
hugmyndafræðilegan bakgrunn hennar. Það er hluti af starfi félagsráðgjafa að benda
unglingum á smiðjurnar. Það eru yfirleitt félagsráðgjafar sem sjá um að vísa unglingum
þangað en helstu ástæður þess eru meðal annars félagsleg einangrun, sálrænar greiningar og
36
tilfinningalegir erfiðleikar eins og vanvirkni, þunglyndi og kvíði (Þjónustumiðstöð Breiðholts,
2009).
Líkt og komið hefur fram hér getur kvíði haft áhrif á ungmenni og samfélagsmiðlar
geta haft áhrif á líf þeirra og líðan. Góðar forvarnir geta verið mikilvægar og úrræðin sem eru
í boði eiga að geta hjálpað. Félagsráðgjafar vinna gott starf með börnum og unglingum sem
upplifa kvíða og reyna eftir bestu getu að veita þeim hjálp með hag þeirra að leiðarljósi. Í
næsta kafla verður leitast við að svara þeim rannsóknarspurningum sem settar voru fram í
upphafi ritgerðar. Síðan verða niðurstöður ræddar í ljósi kenninga og ályktanir dregnar af
þeim.
37
9. Niðurstöður og lokaorð
Hér hefur verið fjallað um kvíða á meðal ungmenna og hvort og hvaða áhrif samfélagsmiðlar
hafi á hann. Fyrsta rannsóknarspurningin sem sett var fram í þessu samhengi var: Hvaða áhrif
hefur kvíði á ungt fólk? Niðurstöður sýna að kvíði getur verið afar hamlandi og lýjandi þegar
til lengri tíma er litið. Að lifa með kvíða getur tekið á fyrir hvern sem er og ekki síst ungmenni.
Unglingar hafa ekki sama þroska og fullorðið fólk og þess vegna getur kvíðinn reynst þeim
erfiður. Þeir geta átt í erfiðleikum með þær neikvæðu tilfinningar sem kunna að fylgja honum
og átt erfitt með að átta sig á því hvað er að gerast í huga þeirra og líkama vegna þess að þeir
ná ekki að stjórna hugsunum sínum og átta sig heldur ekki á hvaðan þær koma. Kvíðanum
geta fylgt erfið líkamleg einkenni sem láta þeim líða illa og hann getur einnig haft áhrif á
sjálfsmynd þeirra og þroska sem gerir það að verkum að þeir eiga á hættu að upplifa sig
einangraða og öðruvísi en aðrir. Unglingsárin geta verið erfið þar sem einstaklingar eru í
mikilli leit að sjálfum sér, það að bæta kvíðatengdum tilfinningum eða kvíðaröskun við slíkt
ferli getur reynst afar flókið. Samkvæmt kenningu Erikson um sjálfsmynd fara allir í gegnum
ákveðin skeið á lífsleiðinni. Hvert skeið einkennist af ákveðnum átökum sem einstaklingurinn
fer í gegnum og kemur út með sterkara sjálf og fastmótaðri sjálfsmynd, svo lengi sem honum
tekst að komast farsællega frá þeim verkefnum. Unglingar ættu þá að eiga í minni
erfiðleikum með neikvæðar tilfinningar eins og kvíða ef þeim tekst að ljúka hverju skeiði á
farsælan hátt vegna þess að forsenda þroska, geðheilbrigðis og hamingju er að leiða öll átök
hjá sér á réttum tíma á hverju skeiði fyrir sig (Jón Björnsson, 1993).
Næsta spurning sem leitað var svara við var: Ýta samfélagsmiðlar undir kvíða hjá
ungmennum? Niðurstöður sýna að samfélagsmiðlar geta vegið þungt þegar kemur að kvíða
ungmenna og þá sérstaklega þar sem þessi áhrifaþáttur hefur orðið mun umfangsmeiri á
undanförnum árum. Það eiga nánast allir unglingar farsíma nú til dags og þeir stunda flest
allir helstu samfélagsmiðla. Það er mikil pressa sem getur fylgt þeirri staðalímynd sem vilji er
til að aðrir sjái og einnig því að vera jafn vinsæll á samfélagsmiðlum og aðrir. Ungmennin
bera sig saman við aðra á samfélagsmiðlum og eiga það til að upplifa sig og líf sitt ekki jafn
fullnægjandi og annarra. Fólk á öllum aldri getur upplifað þessa svokölluðu pressu sem fylgir
því að líta vel út á samfélagsmiðlum en þegar einstaklingar hafa ekki náð fullum þroska og
nógu góðum skilningi á því hvað skiptir máli í lífinu getur þessi áhrifaþáttur heltekið líf þeirra.
Það eina sem virðist skipta máli er að fá viðurkenningu frá öðrum og láta lífið líta út fyrir að
38
vera spennandi, þrátt fyrir þann raunveruleika sem fyrirfinnst utan tölvu-‐ eða símaskjásins.
Ungmennin missa ef til vill af hlutum sem eru að gerast í núinu vegna þess að þau eru of
upptekin á samfélagsmiðlum eða við að uppfæra mynd inni á honum.
Segja má að tiltölulega auðvelt sé að láta líf sitt líta vel út á samfélagsmiðli en á sama
tíma er hreinlega verið að missa af ákveðnum þáttum í lífinu og ákveðnum hlutum sem
skipta máli, svo sem samskiptum við fólk, samræðum, samverustundum, vinskap,
áhugamálum og hreyfingu. Þetta eru allt hlutir sem mikilvægt er að rækta þar sem þeir skipta
gífurlega miklu máli þegar kemur að jákvæðum tilfinningum og vellíðan. Það á ekki að skipta
höfuðmáli hvað mörg like fást á uppfærslu eða mynd á samfélagsmiðlum eða hvað öðrum
finnst um líf manns á samfélagsmiðlum. Slík hegðun getur ýtt undir að sjálfsmynd
unglinganna verði slök og í kjölfarið þurfa þeir að takast á við tilfinningar eins og depurð og
kvíða. Vissulega getur notkun samfélagsmiðla verið ánægjuleg upp að vissu marki en er langt
frá því að vera það sem lífið á að snúast um. Að sama skapi fylgir mikið áreiti
samfélagsmiðlum og ungmenni geta upplifað kvíðatengdar tilfinningar vegna þess að þurfa
stanslaust að svara kallinu og vera virkir inn á miðlunum svo þeir missi ekki af neinu og verði
ekki útundan. Með vellíðan unglinganna í fyrirrúmi væri best að kenna þeim að stilla notkun
sinni á samfélagsmiðlum í hóf. Kenna þyrfti þeim að að tileinka sér og meta þá mikilvægu
hluti sem skipta máli og þá gætu þeir jafnframt haft samfélagsmiðlana inn í myndinni sér til
skemmtunar. Það er að sjálfsögðu margt annað sem getur ýtt undir og haft áhrif á kvíða en
þetta getur verið stór áhrifaþáttur. Þess vegna er mikilvægt að hjálpa ungmennum að læra á
hann og hvernig best er að lifa með honum án þess að hann hafi neikvæð áhrif á þau.
Þriðja rannsóknarspurningin var: Hvaða forvarnir eru til staðar til þess að fyrirbyggja
kvíða hjá ungmennum? Í ritgerðinni kom í ljós að góð samskipti við foreldra, vellíðan í
skólanum, góðir vinir og íþróttaiðkun geta verið áhrifamiklar forvarnir í lífi unglinga þegar
kemur að því að efla sjálfsmynd og minnka erfiðar tilfinningar eins og kvíða. Fyrir utan allar
þær forvarnir sem voru taldar upp er brýnt að ítreka mikilvægi þess að eiga mikil og góð
samskipti við sína nánustu. Það hlýtur að vera af hinu góða að eiga möguleika á því að geta
opnað sig um tilfinningar sínar og eiga góða að sem eru manni til halds og trausts. Þar með
sagt er ákjósanlegt að foreldrar og forráðamenn setji ákveðin mörk sem stuðla að auknu
andlegu heilbrigði með því til dæmis að beina unglingunum inn á brautir hvað varðar
áhugamál, hreyfingu og vinskap. Í vistfræðikenningu Bronfenbrenner kemur fram að tengsl á
39
milli vina unglings og foreldra hans séu mikilvæg þar sem þarna sé um tvö nærkerfi
einstaklings að ræða og vettvangur fyrir góðan þroska ráðist af því að gott flæði sé á milli
kerfanna. Á unglingsárum getur dregið úr samskiptum við foreldra og tengsl við vini og félaga
geta orðið meiri. Ef tengsl við vinina verða ráðandi án jákvæðra tengsla við foreldra getur
það aukið líkur á hegðunarvanda unglings og að hann gangi í gegnum erfiðar tilfinningar á
þessum árum (Bronfenbrenner, 1979).
Eins er mikilvægt að leggja áherslu á að hafa skipulagðar samverustundir með
fjölskyldunni þar sem fólk hefur stund milli stríða til þess að ræða og fara yfir málin. Ástæða
þess er að öllum er hollt að eiga uppbyggileg samskipti við nánasta fólkið í lífi sínu og hafa
ákveðnar fyrirmyndir til þess að líta upp til. Í kenningu Bandura um trú á eigin getu kemur
fram að einstaklingur hefur meiri trú á sjálfum sér ef hann hefur góða fyrirmynd. Bandura
taldi trú á sjálfum sér byggjast á fjórum stoðum, ein af þeim væri herminám. Herminámið
snýst um hvernig einstaklingar búa til væntingar um það hvernig til tekst hjá þeim sjálfum í
ljósi þess hvernig til tekst hjá fyrirmynd þeirra. Samkvæmt þessu er mikilvægt fyrir unglinga
að eiga góðar fyrirmyndir sem þeir geta hermt eftir og eiga þá í minni hættu á að týnast og
upplifa kvíða eða aðrar neikvæðar tilfinningar sem geta fylgt þeim breytingum og þeim
þrýstingi sem unglingsárin hafa í för með sér (Bandura, 1997).
Þegar litið er til þeirrar staðreyndar að áhyggjur og kvíði eyða ekki út vandamálum
morgundagsins heldur taka af manni þann frið sem dagurinn í dag hefur upp á að bjóða,
virðist þetta vera afar auðvelt. Að tileinka sér þennan sannleika getur fært fólk einu skrefi
nær í átt að betri líðan og þegar öllu er á botninn hvolft er það hamingjan sem skiptir mestu
máli.
40
____________________________________
Nafn höfundar
41
Heimildaskrá
Aðalnámskrá grunnskóla: Almennur hluti /2011.
Aldís Unnur Guðmundsdóttir. (2007). Þroskasálfræði: lengi býr að fyrstu gerð. Reykjavík: Mál og menning.
Álfgeir Logi Kristjánsson, Hrefna Pálsdóttir, Inga Dóra Sigfúsdóttir, Jón Sigfússon og Margrét Lilja Guðmundsdóttir. (2010). Menntun, menning, tómstundir, íþróttaiðkun og framtíðarsýn ungmenna í framhaldsskólum á Íslandi: Samanburður rannsókna frá 2004, 2007 og 2010. Reykjavík: Rannsóknir og greining.
Álfheiður Steinþórsdóttir og Guðfinna Eydal. (2010). Sálfræði einkalífsins (2. útgáfa). Reykjavík: Almenna bókafélagið.
Bandura, A. (1997). Self-‐efficacy: The exercise of control. New York: W.H. Freeman.
Beckett, C. og Taylor, H. (2010). Human growth and development (2. útgáfa). London: Sage Publications Ink.
Bhavana, S. (2014). Impact of Media and its Effects on Youth. Indian journal of applied research, 4(1), 140-‐142.
Birket-‐Smith, M. (2010). Kvíði og kvíðaraskanir (María Sveinsdóttir þýddi). Garðabær: Pfizer á Íslandi. (frumútgáfa 1952).
Bronfenbrenner, U. (1979). The ecology of human development: Experiments by design and nature. Cambridge: Harvard University Press.
Bronfenbrenner, U. (1994). Ecological models of human development. Í M. Gauvain og M. Cole (ritstjórar), Readings on the development of children (2. útgáfa) (bls. 37-‐43). New York: Freeman.
Bryndís Björk Ásgeirsdóttir, Hera Hallbera Björnsdóttir, Inga Dóra Sigfúsdóttir, Jón Sigfússon og Stefán Hrafn Jónsson. (2003). Menntun, menning, tómstundir og íþróttaiðkun íslenskra unglinga: Rannsóknir meðal nemenda í 9. og 10. bekk grunnskóla vorin 1997, 2000, 2003. Reykjavík: Rannsóknir og greining.
Catalano, R. F., Berglund, M. L., Ryan, J. A. M., Lonczak, H. S. og Hawkins, J. D. (2004). Positive youth development in the United States: Research findings on evaluations of positive youth development programs. The Annals of the American Academy of Political and Social Science, 591, 98-‐124.
Costello, E.J., Mustillo, S., Erkanli, A., Keeler, G. og Angold A. (2003). Prevalence and development of psychiatric disorders in childhood and adolescence. Archives of General Psychiatry, 60(8), 837-‐44.
42
Erikson, E. H. (1963). Childhood and society. New York: Norton & Company.
Fitzpatrick, C. (2015). A short introduction to helping young people manage anxiety. London og Philadelphia: Jessica Kingsley.
Friends for life. (2007). Evidence Base Abstracts. Sótt af http://www.interactive-‐connections.co.uk/FRIENDS%20Abstracts%20%20Booklet.pdf
Gjörhygli. (e.d.). Hvað er gjörhygli? Sótt af http://www.gjorhygli.is/page/29348/
Greeson, J. M. (2009). Mindfulness Research Update: 2008. Complementary Health Practice Review, 14(1), 10-‐18.
Guðrún Kristinsdóttir. (2000). Tíu ára börn standa vel að vígi. Athugun á færni, áhyggjum og lausnum barna. Uppeldi og menntun, 9(1), 77-‐95.
Guðrún Oddsdóttir. (2004). Hvað er almenn kvíðaröskun? Sótt af: http://www.persona.is/index.php?action=articles&method=display&aid=10&pid=11
Hinduja, S. og Patchini, J. W. (2011). High-‐tech cruelty [rafræn útgáfa]. Educational Leadership, 68(5), 48-‐52.
Hrafnhildur Ragnarsdóttir. (1993). Sjálfsmynd unglingsins. Í Hörður Þorgilsson og Jakob Smári (ritstjórar), Sálfræðibókin (bls. 62-‐65). Reykjavík: Mál og menning.
Hrefna Ólafsdóttir. (2006). Börn og geðræn vandkvæði. Í Sigrún Júlíusdóttir og Halldór Sig. Guðmundsson (ritstjórar), Heilbrigði og heildarsýn, félagsráðgjöf í heilbrigðisþjónustu (bls. 111-‐127). Reykjavík: Háskólaútgáfan og Rannsóknarsetur í barna-‐ og fjölskylduvernd.
Jón Björnsson. (1993). Hvað er öldrun? Í Hörður Þorgilsson og Jakob Smári (ritstjórar), Sálfræðibókin, (bls. 785-‐786). Reykjavík: Mál og menning.
Kirkcaldy, B. D., Shephard, R. J. og Siefen, R. G. (2002). The relationship between physical activity and self-‐image and problem behaviour among adolescents [rafræn útgáfa. Social Psychiatry and Psychiatric Epidemiology, 37(11), 544-‐550.
Kostanich, K. (2015, 19. febrúar). Social media overload causing anxiety for many teens. Komonews. Sótt af http://www.komonews.com/news/local/Social-‐media-‐overload-‐causing-‐anxiety-‐form-‐many-‐teens-‐292572311.html
Kvíðameðferðarstöðin. (e.d.-‐a). Almennt um kvíða. Sótt af http://www.kms.is/index.php?option=com_content&view=article&id=189&Itemid=623
Kvíðameðferðarstöðin. (e.d.-‐b). Áfallastreituröskun. Sótt af http://www.kms.is/index.php?option=com_content&view=article&id=168&Itemid=626
Landspítali. (2014). BUGL barna-‐ og unglingageðdeild. Sótt af http://www.landspitali.is/lisalib/getfile.aspx?itemid=21788
43
Maldonado, M. (2014). The Anxiety of Facebook. Psych Central. Sótt af http://psychcentral.com/lib/the-‐anxiety-‐of-‐facebook/00019448
March, J. S. og Morris, T. L. (2004). Anxiety disorders in children and adolescents (2. útgáfa). New York: The Guilford Press.
Martin, B. (2013). In-‐Depth: Cognitive Behavioral Therapy. Psych Central. Sótt af http://psychcentral.com/lib/in-‐depth-‐cognitive-‐behavioral-‐therapy/000907
Nielsen. (2014). The U.S. Digital Consumer Report. Sótt af http://www.nielsen.com/us/en/reports/2014/the-‐us-‐digital-‐consumer-‐report.html
Nolen-‐Hoeksema, S., Fredrickson, B. L., Loftus, G. R. og Wagenaar, W. (2009). Stress, Health and Coping. Í J. Clark (ritstjóri), Atkinson & Hilgard’s Introduction to Psychology (15. útgáfa). Hampshire: Cengage Learning EMEA.
O’Keeffe, G. S. og Pearson, K. (2011). Clinical Report -‐ The Impact of Social Media on Children, Adolescents and Families. American Academy of Pediatrics, 127(4), 800-‐804.
Ryan, T., Chester, A., Reece, J. og Xenos, S. (2014). The Uses and abuses of Facebook: A review of Facebook addiction. Journal of Behavioral Addictions, 3(3), 133-‐148.
Sadock, B.J. og Sadock, V.A. (2003). Kaplan and Sadock’s synopsis of psychiatry: Behavioral sciences/clinical psychiatry (9. útgáfa). Philadelphia: Lippincott, William & Wilkins.
Sheehan, E. (1997). Kvíði, fælni og hræðsluköst (Eva Ólafsdóttir þýddi). Reykjavík: Vasaútgáfan. (frumútgáfa 1996).
Sigurjón Björnsson. (1993). Kvíði og fælni. Í Hörður Þorgilsson og Jakob Smári (ritstjórar), Sálfræðibókin (bls. 119-‐120). Reykjavík: Mál og menning.
Social media anxiety prominent in younger generation. (2013). University Wire. Sótt af http://search.proquest.com/docview/1658512168?accountid=135943
Sóley Dröfn Davíðsdóttir. (2014). Náðu tökum á kvíða, fælni og áhyggjum. Reykjavík: Edda útgáfa.
Sunna Karen Sigurþórsdóttir. (2015, 13. febrúar). Læk skiptir máli en getur haft slæmar afleiðingar í för með sér. Vísir.is. Sótt af http://www.visir.is/laek-‐skiptir-‐mali-‐en-‐getur-‐haft-‐slaemar-‐afleidingar-‐i-‐for-‐med-‐ser/article/2015150219482
UNICEF (2011). Staða barna á Íslandi 2011. Sótt af https://www.unicef.is/efni/skyrslur/UNICEF_stada_barna_a_islandi_2011.pdf
Velferðarsvið Reykjavíkurborgar. (2008). Ársskýrsla Velferðarsviðs Reykjavíkurborgar 2008. Reykjavík: Höfundur.
Wallace, K. (2014, 20. nóvember). Teen ‘like’ and ‘FOMO’ anxiety. CNN.com. Sótt 2015 af http://edition.cnn.com/2014/10/16/living/teens-‐on-‐social-‐media-‐like-‐and-‐fomo-‐anxiety-‐digital-‐life/
44
Þjónustumiðstöð Breiðholts. (2009). Unglingasmiðjurnar Stígur og Tröð – Ársskýrsla 2009-‐2010. Reykjavík: Höfundur.