Upload
phungduong
View
242
Download
0
Embed Size (px)
Citation preview
Jukung WaktuSakindit Puisi Bahasa Banjar
Abdurrahman El Husaini 1
1. Sanja Kuning2. Wasi Kuning3. Baras Kuning4. Laung Kuning5. Ringgi Hati6. Lunta Hati7. Padaringan Dua8. Jalabia9. Ziarah10. Titian11. Kambang Barenteng12. Bapalas Bidan13. Bapidara14. Banyu Mata Doa15. Badinding Ari16. Maantarakan Bulan17. Basasuluh18. Balarangan19. Karacak Nasib 120. Karacak Nasib 221. Batapung Tawar22. Bahalarat23. Tonyoy Tunjung24. Tangkujuh25. Dandaman26. Kalah Tagah27. Sakataraan28. Saparinduan29. Asam Putaran30. Sakitsa Palitaan31. Warisan32. Bawara Tuli33. Gigiran34. Takulibi35. Saruan36. Mangidam37. Manjujul Rami38. Maaci Cakah39. Pasanaruahabah40. Luwaw41. Tampias
2
42. Zikir Ambun43. Mambari Supan 44. Habar Banua45. Laip46. Rumah Lanting47. Raja Sahari48. Langit Basulam Cahaya Mataari49. Ajal50. Halulung Caramin Rangat51. Cah!52. Mandulang Cahaya53. Zikir Hinak54. Zikir Hati55. Tahajud 156. Tahajud 257. Tahajud 358. xXx59. Hapuk Liur60. Hapus Liur61. Malam Ari Raya 162. Malam Ari Raya 263. Malam Ari Raya 364. Malam Ari Raya 465. Ripulusi di Lapak Catur66. Kada Tahu di Supan67. Puasa68. Buntat69. Kada Babuku Ruas70. Jukung Waktu71. Pasputu Hirang Putih Ukuran 4x6 cm Basalaman Mancium Tangan di Balakang
manjunggingi Burit72. Mataari Wan Bulan73. Liur Baungan74. Wadak Umur75. Ripu76. Garunum Hancaw77. Mangganapakan Itungan78. (Pantun) Cakah79. Bagaduh80. Guplah!81. Babarasih
3
82. Wisa Aruh Sastra83. Inguh Aruh Sastra 84. Doa85. Kidas86. Ziarah Zikir87. Panawar Kalumpanan88. Pasan Kalaras89. Katulahan90. Lurung Takdir91. Panganten Hanyar 192. Panganten Hanyar 293. Hakunlah?94. Kijil95. Karindangan96. Bakaracak97. Tagas98. Labar99. Tikas Tiwas
100. Paribahasanya101. Balambika102. Balahindang103.Takibar Sumangat104.Mun105.Jalan nang panghabisan
Hagan:
4
Caramin Mata hatiku ; Anita
Harta Barana Intan Jumantanku ; Otsmanovsky Walyatalattov & Kenzo Romadhonovitch
5
Sanja Kuning
Sanja kuning luruh
Mangawai- ngawai minta gani’i turun ka lanting
Maitungi ilung nang larut
Malarutkan hajad udik batamu muara
Mahapusakan rasa dandaman
Wayah sumalam
Basampuk urat
Basampuk buku
Saurat
Sabuku
Hinip simpun dalam kalambu sanja kuning nang bagantung di tihang langit
Ranai sabakasan!
Sanja kuning luruh
Alaman tarang
Manarang saribu suluh
Imbah ngitu bulik bagasut
Ditagur bang magrib
6
Wasi Kuning
Wasi lah wasi si raja wasi
Laki bini
Kulantakakan di mata hagi
Hagan tawing halat badan awak diri badanku
Muyang cakah
Datu takabur
Intah sumbung
Daham jadi makanan hati
Allah Taala jua nang manyudahi
Wasi kuning simpun bapatak dalam hati
Pacangan tapakai jua wayah kapalipitan
7
Baras Kuning
Baras kuning
Kuning manguning bakasai janar
Mangukur sumangat ading bastari
Lamah limambut pambawaan diri
Di cupu kuningan mangurung awak
Wayah dikiyau datang bacungul
Baras kuning bamandi salawat
Nang lamah bulu daham baparak
8
Laung Kuning
Laung kuning
Laung iman
Laung nang basulam lawan banang amas salawat pamuyangan
Balilit wibawa
Tagah satagahtagahnya
Bapuruk dikjaya
Hantap sahantaphantapnya
Di kapala anak sultan anak pangiran
Laung kuning
Laung iman
Laung nang basulam lawan banang amas salawat padatuan
Mataari kurup
Bulan kurup
Jadi sabuku
Taluruk biji mata
Urang banyak
Urang halus
Urang gaib
Tacangangi taitihi taliati
Sibayik rupa si bayik hati
Lihum takarium kahada sing panatan
9
Duduk di karita kancana nang ditarik kuda sambrani
Balimpas malimpas dalam karasmin laluhur
Nang raminya kahada sakira
Kadada hahurupannya
10
Ringgi Hati
Bakawan paluh diri
Salawat wan zikir
Kujurai isuk ari kalamari
Jari ampah ka tabah
Tabah ampah ka kilan
Kilan ampah ka hasta
Hasta ampah satumbang batis
Satumbang batis ampah ka satumbang badiri
Lumus tangah dua kali
Limbah jadi
Kupasang di sungai hidup
Manunggu kalu pang ada rajaki nang mau tasangkut
Hagan pamakanku harihari
Cukup kahada cukup
Musti dicukupiakan
Sahibar mancukupi ihtiar haja
Di ringgi hati nginih
11
Lunta Hati
Lunta hati
Jadi pang jadi hudah katuntungannya
Hapus tuntung satuntungtungtungnya
Amalan paninggalan aruah nini datu
Pacangan ditimbai di batang banyu idup
Camapa dimapa mambawa laku
Supaya daham balalakun
Lakunnya dimintu jua
Kahada sing ubahan tumatan bahari
Bayik laku bayik budi pakarti
Baingkut baumpat babuat bakajal barikit di lunta hati
12
Padaringan Dua
Padaringan dua alahai sayang
Kawa juakah mambagi hati
Manjaga timbangan
Sama barat
Sama rata
Sama rasa
Kada sing timpangan
Padaringan dua alahai sayang
Sayang disayang
Mangasai miyang
Lawan pangrasa
Barasa rasa
Mahapusakan rasa
Barasa rasa
Mahapusakan liur
Taliur liur sampuk kapunggur
Han
Hampai jua wayahnya
Kawayah sarabanya kandur
13
: banyu sapah pacangan kaparudahan jua bukah larinya
Jalabia
Bawara kahada bawara
Kusambit sambit
Paputingan hahimpilan tatakan
Kupulun mambulat mambulaning
Bapupur lawan galapung baras
Tutukkan babinian bujang nang baluman datang rigat
Di lasung ulahan aruah nini datu
Limbah kutimangtimang
Kusanga kubulakbalik
Kubangkit kusurungi panaspanas
Wayah liur manyurung
Bakawan kupi wan bakawan ruku
Talah sasangan
kuripingnya gin nyaman
kuripingnya gin langis
14
Ziarah
Mancium bau awak kuitan
Talu ampat puluh dapa tumatan babuncuan sir hinak andika
Kaingatan juakah titik paluh sidin nang mangganalakan?
Kaganangan juakah ingui tangis sidin nang maharagu maranakakan?
Wayah siang malam diniari baisukan
Batawing kambang amal jariah
Baatap ambun doa anak pacucuan
Sanyaan maliuk manaluk sampak lacit ampah ka urat ka darah daging
Saban waktu
Tatap dikaji didoaakan
Dihadapan dua buting tihang nang mancugut nginih
Banyu mata lilih kada kasandangan
15
Titian
Titi batiti di titian iman
Nang tuha paung bibit kayunya
Kutiti di rapun malam
Tumatan subarang sungai lacit tambus ka subarang
Kubuliki kutuguli saban waktu
Kahada sing muyakkan
Kahada sing dulakkan
Nanar
Titir
Hampai
Awak badan diriku kahada badaya lagi
Talingkun
Talingkur
Di tilam umur
Babulik mangananak
16
Kambang Barenteng
Kambang barenteng
Kakambangan bamacammacam rupa
Nang malarak di sanja jumahat
Kuputik kurentengrenteng jadi sarenteng
Kususunsusun jadi sasusun
Di hijir gadang nang sigar
Nyaman ditating
Nyaman diliat
Harum dicium
Harum jua nang mancium
Kambang barenteng
Diandak di buncu mambuncu higa mahiga
Madingur harumnya saisi idung
Nang datang
Nang didatangi
Sama rasa
Sama haja
17
Tahiut dadingurannya
Kambang barenteng
Kambang sataman
Kambang sakaki
Pamakai urang bahari
Bujurbujur mamasang niat
Wayah marenteng
Wayah maandak dibuncu hati
: Bismillah kata bamula
2011
18
Bapalas Bidan
Kada karasaan
Ari sampuk ka ari
Tali pusat panggal pananda jadi
Tungkat panggalah umur bamulai balacuk
Sabuting waktu dah talimpati talimpua
Tanda syukur musti digawi
Bubur habang
Pananda pamanis idup
Bubur putih
Pananda pambarasih hati
Doa salamat
Pananda palindung diri
Salamat datang si jantung hati
Panjang umur murah rajaki
2011
19
Bapidara
Bakasai raja salawat wan doa panawar dingin
Bapupur janar wan kapur
Di dahi
Di pipi
Di awak
Di tangan
Di batis
Sagala datunya panyakit wan muyangnya urang halus
Huuuuss! Lakasi bajauh
Allahummasollialasyaidinamuhammad waalaalisyaidinamuhammad
20
Banyu Mata Doa Hagan : Mama di Mulawarman
Hampian bulik
Doa diulun mainguy di higa lawang
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
Ujan turun satumat
Umpat maantarakan karita nang pahabisan
Muha hampian dingin
Mangganggam sunyi
Doa diulun anak bini
Mainguy di higa lawang
ALLAAHUMMAGHFIRLAHA WARHAMHA WAAFIHI WA’FUANHA
21
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
Balalu ada sanja luruh di tanah kaabadian
Isak kami mangarimut doa hagan pian saurangan
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
ALLAAHUMMAGHFIRLAHA WARHAMHA WAAFIHI WA’FUANHA
Banjarmasin-Martapura Sanja Minggu 15/05/11
22
Badinding Ari
Badinding ari alahai sayang
Di dalam tanah
Manimbang awak
Manimbang badan
Baik
Buruk
Kada kawa baungal
2011
23
Maantarakan Bulan
Maantarakan bulan
Bulanlah bulan si panghulu bulan
Hibak langgar hibak masigit
Babarasih awak
Babarasih hati
Maantarakan bulan
Bulanlah bulan si panghulu bulan
Tuntungtuntung sampak ka lumus
Lumus miyang
Lumus rigat
Nangkaya babulik kakanakanak
Putih barasih
Mancarunung kahada sing tualan
24
25
Basasuluh
Basasuluh
Manyusur ulu
Manyisir ilir
Lipit ka sala manyala
Darat wan laut tapaluh liir
Lipit ka higa mahiga
Mancarii si bauntung batuah
Baiman si parajakian
Hagan kawan
Sakalambu sapaguringan
Samuak saliur
Sakincing sapadapuran
Basasuluh
Suluh suluh
Taparukuy jua ayungannya
Sampuk buku
Sampuk urat
Babilang ngaran
Babilang ari
Babilang bulan
26
Basasuluh
Suluh suluh
Suluh iman
Suluh agama
Itu nang iyanya
Basasuluh
Suluh suluh
Daham hampai tasalah suluh
27
Balarangan
Simpun pang simpun manyambunyiakan laku
Si baik rupa si baik laku
Sadapa pantangan
Nang disadai di atas salayan
Daham hampai pagat hinggan di situ
Bayik pang bayik mambawa diri
Si bayik hati
Si palihuman
Si pangurihingan
Sahasta pantangan
Nang diharumi di kukus dupa
Daham hampai basusut hinggan di situ
Balarangan
Bapamantang
Manunggu
Sarubung batajak
Mamagat si tali larangan
28
Kacarak Nasib 1
Karacak nasib
Ayungannya hampai jua
Parjalanan saribu rakaat di sia
Tamandak satumat
Mancium bau harumnya kambang dhuha
Diulun tanganga mancangangi kubah nang sing bagusan naya
Karacak nasib
Ayungannya hampai jua
Parjalanan saribu rakaat di sia
Bamandak satumat
Mancium bau harum dhuha
Pucuk baisukan malarak supan
Diajak sinar mataari
Islamic Centre Samarinda baisukan minggu
28/03/10
29
Karacak Nasib 2
Karacak nasib
Taputar takuliling
Ayungannya hampai jua di sia
Mambasuh hati
Lawan banyu ujan nang guguran
Di talang kubah amas nginih
Jakarta Masigit Kubah Amas 2010
30
Batapung Tawar
Batapung tawar
Tawar tawar
Manyingkai
Umbayang hirang
Suntup sabakasan
Tasisa
Carunung
Mahawar kadap
Cpb2 2011
31
Bahalarat
Gunung lakatan
Bakasai janar
Bapucuk hinti
Papikat badan
Papikat diri
Daham tajuramba pulang wayah batiti
Cpb2 2011
32
Tonyoi Tunjung
Bawang putih
Bawang habang
Basapupu sakali di rapun rimbun
Janar laus tipakkan tumat sarai
Lunyut sakenceng dihiris-hiris
Iwak bakunyung di banyu panas
Nasi baras gunung guliat-guliat minta limbuhi
Puruk cahu, 030211
33
Tangkujuh
Bakas ujan labat malam tadi
Lubak-lubak babanyuan
Basasar manyusur kartak
Bagamat mamintangi pintangan nang tanyaman saikit
Balampu mataari baisukan
Mandusur baampah bulik
Lantaran lalihuman kurihing anak bini
Ngangal mahadangi di muhara lawang
Pitung musim katam kahada sing cungulan
:Limbah badapat
Bapagut
Baragap
Tangkujuh karing bagasut
Dihisap banyu mata kami
: Tajak wan sapida until tuha tasandar di higa rumah
Takarium takang
Dandaman talingkun di tilam waktu
Cpb2 0511
34
Dandaman
Pinang
Sirih
Kapur
Wan
Gambir
Barabut
Mancari
Rasa
Di
Panginangan
Hatiku
Parudahan
Bilut
Minta
Kucuri
Cpb2, 0511
35
Kalah Tagah
Kalah tagah
Kalah bulu
Sunyi suhung
Ranai hinip
Kahada sing burinikan
Padahal baisukan sawat
Bilang liwar galunya
Nangkaya hayam handak maucir hintalu
Cpb2 052011
36
Sakataraan:Hagan Ben wan bunda Bulkis
Hintalu badadar
Tadadar
Lucut tapaluh di dalam rinjing
Manggah mukuh
Bukah
Manyasahi pinggir
Limbah basampuk
Taparukui
Kula - kulanya jua
Saparinduan
Lahai
Sakalinya
Han
!
200211
37
Saparinduan:Hagan Bunda Bulkis wan Ben
Bulan sasalawan
Kujuk-kujuk
Maminanduwi
Humbayang saurang
Kancur jariangau tasasat di dalam tangguk
Isuk ari baisukan
Patuk watas kabun aruah datu nini
Bakitar ampah ka mataari tinggalam
Sakalinya bacu’ur
Tahantam kula-kulanya jua
Untung
Baluman
Tapancuk
Pisang mantah
:Mati jaku baik pitih jua pada kaur
200511
38
Asam Putaran
Asam putaran masak di puhun
Gugur sabuku subuh jumahat
Mata lading
Manyusur urat
Mangulilingi awak
Limbah tasampuk
Diputar
Lalu dibalah ampat
Dimakan baimit hagan puliran
Kasihan lawan liur nang titikan
Wayah lawas manunggu
Satahun sakali
Taputar kampung
Mancari’i rapunnya nang kada pati adaan lagi
: Daham hampai anak cucu mandangar kisahnya haja lah
200511
39
Sakitsa Palitaan :virsi putlut pikah 200511
Latat
karak idung
(Kutalipun kadada nang maangkat)
Nyanyar panjanak
Gahar-gahar
Bagagap mancari baburukan kain
Hagan sumbunya
(minyak gas dah sing ngalihannya mancarinya
Larang ha pulang)
40
Warisan :virsi minyak ngalih wan larang 200511
Tapakai
Jua
Paampihannya
Sapida until
Paninggalan
Aruah
Abah
Nginih
Asa kada baurat batulang lagi maninjak
:urang maka am kalusuran bamutur larang
41
Bawara Tuli
(Tuli bawara
Bawara tuli)
Lampu pajah
Kutalipun ranai nang maangkat
Humbayang bulan bakambang guyang
Gugur mandabuk di palataran rumah
Kusimpuni kusimpan lilip-lilip
Hagan suluh
Wayah lampu pajah pulang kaina
:Di kumplik subarang saumur janang
Kahada suah sing pajahan
Kutalipun baasa
kalututan nang maangkat
(Bawara tulikah?
42
Tuli bawarakah?)
200511
Gigiran
Wayah takipik
Wayah takajut
Kasitnya rusak
Tapulilit
Tapuntal
Taputar
Paribasanya
Disitu situ jua
Taliur
Mambuliki
210511
43
Takulibi
Taangkat bibir manalu kilan
Kulibi takang
Mawada gih urang
Angkuh ampun saurang haja nang pambayik paiya pambungas palangkarnya
Padahal paputingan hahimpalan sasimbitanya jua
Tagal ah mun hudah parigal
Dimapa pang lagi
Mun limaw masam bapadah manis
Mun rambutan lumuan bapadah kuyakkan
Mun kasturi bapira bapadah purna
Taangkat bibir manalu kilan
Kulibi takang
Mawada gih urang
210511
44
Saruan01:
Bapupur bacalak bagincu iya banar burung pangantin
02:
Bacincin amas pirak sarapun jari tangan
Bagalang hinggan siku
Bakalung rangkap talu
Bagiwang intan jumantan mata biyuku
03:
Batapih babaju basalawar saribuan sahari
04:
Maangkut makanan minuman lindung kucing baduduk
05:
Ribuan buruk batungging di dalam amplup
210511
45
Mangidam
Jaruk tarap
Jaruk tigaron
Garih haruan
Wadipapuyu
Pakasam sapat
Gangan asam kupala baung
Gangan humbut
Gangan kalakay
Sambal acan
Sambal binjay
Bakuciyak bahalulung
Di lampau halus di tangah pahumaan
Mangiraw liur liur
Nang handak basi
210511
46
Manjujul Rami
Baisukan sawat dah tulakan maagahi galumbang
Pada-padanya baricau
Pas hampai
Laut pasang manyusur buncu pantai
Mataari parak sapanggalah
Baramian mambuang mambarasihi pikiran nang sabak samun
Garahakkan kahada tahu diurang
Bulikan humbayang mataari manungkat pananjak pukah
Pas hampai
Mataari parak tinggalam di higa rumah
Mahancap basilih babarasih
Limbah ngitu
Kalapahan taguring mati di pasahapan
Maigau
Takarium
Bapandir
Saurangan
Cpb2-Batakan-Cpb2, 240511
47
Maaci Cakah
Saikat
Satuyuk
Satimbum
Sapat
Papuyu
Sanggiringan
Baikat
Batuyuk
Batimbun
Bahapat
Babulu
Bakulilingan
Maikat
Manuyuk
Manimbun
48
Sapat
Papuyu
Sanggiringan
Taikat
Tatatuyuk
Tatimbun
Sakulilingan
:Ujar habar banyak baiwak
Saikung-ikung kahada mawadi
Ujar habar banyak nang handak
Saikung-ikung kadada nang jadi *)
Cah!
240511
*) pantun Banjar
49
Pasanaruahabah
Takindit
Sakindit
Baisian
Sakinditannya
Haraguyiakan daham hampai
Pagatan
Tahambur
Tapisah
Tali lalaran kulawarga kita nginih
Lantaran marga nang sajumpilit
Kahada usah gin basikut bacakut papadaan
Takindit
Sakindit
50
Baisian
Sakinditannya
240511
Luwaw
Muntung-muntung barabut tungap
Manguya pira kasturi nang hudah bangking di puhun
Carucupan iya banar lundu maagahi tahi
Kahada sing puasan
Kahada sing kanyangan
Muntung-muntung barabut tungap
Manguya hintalu nang hudah tambuk di kataraan
Bantat kada hakun jadi anak
Karicitan iya banar pipit maagahi banih
Taliur-liur
Tabatuk-batuk
Kahada sing ampihan
Kahada sing muyakkan
250511
51
Tampias
Mun hudah nasibnya
Kamana haja bataduh batabun
Tatap basah jua kana kacipratan tampiasnya
Mun baluman digarisakan
Kamana haja maampahkan awak
Tatap kahada pacangan kacipratan tampiasnya
Budas baujung ngangal banar ai
Ujan labat
Ujan panas
Ujan ribut
Mahadangi banyu ujan ditampur angin
Tampias mambaali awak
Mandisap sabukuan awak
Gitir-gitir manyandang dinginnya
52
270511
Zikir Ambun
Subahanallah
Baisukan sawat
Kakambangan
Dadaunan
Kakayuan
Rarumputan
Guliatan
Ulun timpungasi
Lawan
Kaagakan
Kalangkaran
AmpunNya
Sambil manunggu
Mataari baisukan
Maambili ulun
Bulik ka kayangan
53
Mamandii bubuhan bidadari
Subahanallah
270511
Mambari Supan
Mambari muar. Tatukuy tatatudung karing. Ganal harap pada kacak. Rajaki nang hudah dalam tangan dibairakan ka higa. Gagap gagap. Tagagap piring puang. Hawar hawar. Tahawar mangkuk tatilungkup. Kais kais. Takais mija badabu. Kikih kikih. Takikih sala lantai. Rinjing wan kincing badabu bagandang lawa. Hinip ranai manalu minggu kada sing garakan.
Mambari maras. Tatukuy tatudung puang. Dapur kahada sing kukusan. Bakas badauran ari sumalam masih haja mandingur baunya. Sabak samun. Lempra sana sini. Pada- padanya manurutakan hati. Hati nang sarik masih barikit inguhnya. Saikung ka ulu. Saikung ka ilir. Sama karas. Sama bujur. Sama salah. Kadada nang mau balamah. Kadada nang mau mangalah.
:Mambari supan. Tatudung puang. Tatudung karing. Basaung barabut tuha. Kubukan. Sinduk. Sukrinjing. Wancuh. Katipiran tahambur di higa pambanyuan. Tasindukut kada wani mahalat.
270511
54
Habar Banua
Kalas dalam kulkas
Kananakan
Kahada sing sapatuan
Kahada sing saragaman
Balajar mambaca
Balajar bahitung
Cita-cita bubuhannya mambaku
Kada sing lunuhannya
Padahal lampu hudah malanu kali pajahnya ari ini
: Di tv kulihat urang-urang babagi gulaan
300511
55
Laip
Liur
Liwar
Lilihannya
Limau
Lingis
Linyak
Limir
Limpua hudah
Lamak manisnya
Lamah
Lintuhut
Liut
Manyahan
Lanjung
Nafsu
56
300511
Rumah Lanting :Hagan Gt. Marhusin
Rumah lanting
Rumah puisi
Rumah mimpi
Baatap halalang
Badinding kajang
Balantai paring
Rumah lanting
Rumah puisi
Rumah mimpi
Wadah diyaku makan guring bahira bakamih barnanak babuah
Rumah lanting
Rumah puisi
Rumah mimpi
57
Banyak nang bailang mangaku kula sakampung
Rumah lanting
Rumah puisi
Rumah mimpi
Duduk satikar
Guring sabantal
Makan sakincing
Rumah lanting
Rumah puisi
Rumah mimpi
Gusang disalukut api camburu kata-kata
Rumah lanting
Rumah puisi
Rumah mimpi
Larut dihanyutakan baah kata-kata
Rumah lanting
Rumah puisi
Rumah mimpi
Banyak banar nang datang mainjam mimpi
Rumah lanting. Rumah puisi. Rumah mimpi. Wadah kula mamanjaakan diri.
58
Rumah lanting. Rumah puisi. Rumah mimpi. Wadah kakawanan bautang sunyi.
Rumah lanting. Rumah puisi. Rumah mimpi. Wadah dingsanak maanyun nyanyi.
Rumah lanting. Rumah puisi. Rumah mimpi. Wadah kita manyahan hati.
Rumah lanting. Rumah puisi. Rumah mimpi. Wadah kami manyandang kulibi.
Rumah lanting. Rumah puisi. Rumah mimpi. Rumah panyair mangukur sumangat
mangukur mimpi.
300511
Raja Sahari
Raja sahari
Bungas bingking langkarnya kahada sakira
Bagaul di bulan
Cahayanya luruh di ranjang pangantin
Ranjang malam
Ranjang raja
Ranjang baisukan
Ranjang raja
Ranjang siang
Ranjang raja
Ranjang sanja59
Ranjang raja
Ribuan kata haur daur manyusun kalimat :
Surga dunia
300511
Langit Basulam Cahaya Mataari
Langit basulam cahaya mataari
Angatnya
Manciumi bibir pantai wan sungai
Manjilati pucuk mamucuk kakayuan wan papuhunan
Liwar ungahnya
Liwar himungnya
Manggatar manggitir sabukuan rapun
Marasai nyamannya
Luluy luntur miyangan di awak
Alahai bacaramin di banyu sungai nang barasih baning
Takarium saurangannya paampihanya
60
Liwar ungahnya
Liwar himungnya
Mancangangi nang mancarunung
Mabuk kapayang
Langit basulam cahaya mataari
Basasar bagamat balandung
010611
Ajal
Makan kada makan
Asa baluman makan
Mun balum managuk nasi
Padahal untuk talah manalu buku
140611
61
Halulung Caramin Rangat
“Maantar bulan
Langgar wan masigit kahabisan shaf
Kahimungan
Kananakan sumbahyang bagayaan
Salawat baadu lawan kuciakan
Saur-saur
Liur basi bagarakan
62
Tuju ampah ka panangahan
Langgar wan masigit
Sasain basimpun
Bukaan
Di langgar
Banyak nang kada puasanya
Salikur
Manutung
Suluh
Balatatan luang idung
Langgar wan masijit manyaraput
Nangkaya samut digantar sarang
Nangkaya wanyi diguyang dipuai sarang
Kangangalihan mancari shaf hagan sumbahyang tangah malam
Tasiup-siup
Dijaramba lailatur qadar
Malam hari raya
Langar wan masigit
Sasain simpun
Urang-urang taluruk ka kartak
Pawai batakbiran
63
Takbir wan tahmid
Baadu lawan bunyi latupan
Batangah malaman lacit parak ka subuh
Sumbahyang hari raya malincau subuh” caramin rangat bahalulung sing hangkuyan.
090811
Cah!(Tagarak urang bangun sakalinya
Kada mayu tangannya mangatuk manggandah lawang
Tamamayi urang tuli sakalinya
Kada mayu muntungnya manyaraki
Taagaki urang badiut sakalinya
Kada mayu pukunya manyaingi)
Cuba daham pati manggaduhi gawi urang
Kada pacangan tagarak urang guring lagi tuwa
Kada pacangan tamamayi urang tuli lagi tuwa
64
Kada pacangan taagaki urang baduit lagi tuwa
Gawi git saurang haja nang iyanya
Mun hudah tapakai git urang dalam pagar
Nang bangun
Nang tuli
Nang baduit
Pacangan basasar baparak
Basampuk ruas
Basampuk buku
Duduk satikar
Sapanginangan
Saparudahan
Cpb2 Malam arba, 10/08/11
Mandulang Cahaya
Mandulang cahaya
Sunyi gumut bakaraut basasar takapinggir
Batajak bapiruhut di padang kadap babuncuan malam
Mandulang cahaya pukau kamilau silau salau
Barikit taikat tajarat hantap di sala- salanya babuncuan garunum galu karimut muntung malam
Mandulang cahaya
65
Guyang batang awak linggangan
Balinggang balingguk
Baputar bapusing ampah ka carunung mata hagi tuah awak
Mandulang cahaya
Hati hati bacalimut gatah iman
Mancakuti muha bulan
Nang cungul batampai sakali itungannya di hadapan lawang pusingan mataari nginih
Ulun kasayi limut lipit lacit kapipikangan hati diulun sadarah sadaging
Mandulang cahaya
Cahaya didulang
Dilinggangan awak
Baharap banar lawan nang ampunnya
Kawa takacak carunungnya pulang tahun dihadap
Panjang umur
Murah rajaki
Sigar waras
Lapang hinak
Mandulang cahaya
Basuluh palitaan ilahi
Malam jumahat, 12/08/11
66
Zikir Hinak
Zikir hinak
Tajarat
Tapasung
Dalam
Kurungan
Hidayah
Allah Taala
67
Siang malam kada sing lapasan
Malam sabtu 12 ramadhan 1432 H
Zikir Hati
Zikir hati
Bajalulut
Bajarikit
Lawan gatah
Hidayah
Allah Taala
Siang malam kada sing lingkahan
68
Malam sabtu12 ramadhan1432 H
Tahajud 1
Kisir-kisir
Guliat-guliat
Pasahapan
Kaungahan
Minta
Ciumi
69
Tahajud 2
Dua talu kali tabangun
Budas manimpungasi si utuh mining wara
70
Tahajud 3
Takuhum balak kusung
Maka mangguplah
Balak anam
Balak lima
Balak ampat
Balak talu
71
Balak dua
Wan
Balak asa
Barabut jalan
Macari ratus
xXx
intuy-intuy
gin
kahada
72
Hapuk Liur
Taunjai
Hati
Nang
Dandaman
73
Hapus Liur
Taunjuni
Iwak
kayang
74
Malam Ari Raya 1
Bulik ka rumah
Mambuka tatudung
Piring
Wancuh
Wan
75
Wadah nasi
Tatangis
Batakbiran:
AllahhuAkbar AllahhuAkbar AllahhuAkbar
LailahaillahwallahhuAkbar
AllahhuAkbar Walillahhilhamd
Malam Ari Raya 2
Ladum-ladum
Bunyi latupan
Batakbiran:
AllahhuAkbar AllahhuAkbar AllahhuAkbar
LailahaillahwallahhuAkbar
76
AllahhuAkbar Walillahhilhamd
Malam Ari Raya 3
Batajak
Bandira
Kamanangan
Di adapan
77
Rumah
Malam Ari Raya 4
Manahuri
Bijian
Baras
Lawan
Pamakan
78
Ari
Satahun
Ripulusi di Lapak Catur
Linjang-linjang
Ratu wan mantri
Di lapak hirang wan putih
Talajuk
Kuda
79
Bidak
Lawan parang bacabut
Di higa binting
:Apang mun haraga maharaga
Di lapak catur kahada kasimbahan kasandangan lagi larangnya
Apang mun hukum wan kaadilan
Di banua lapak catur nginih
Hudah talalu talanjur
Bagana di pikalu duit
Bujur banar
Banar bujur
Takambuh di udunan nang kada hakun kamir
Kada Tahu Disupan
Ratik
Maka
Bapadah
Hundang
80
Puasa
Mancicing rasa haus dihulun manyasahi talapak talaga Al Kautsar Hampian, Ya Allah
Titikan paluh
Mambaali baju iman
81
Nangkaya inikah rasanya haus di karungkungan urang nang kahada sing bisian
Ngitu gin sakali samastawa jua pun
Manggah mukuh rasa lapar dihulun maagahi kincing padapuran Hampian, Ya Allah
Lamah lintuhut
Tagah karas urat iman
Nangkaya inikah rasanya lapar di parut urang nang mbah anu makan mbah anu kahada
Ngini gin kahada balalawasan jua pun
Rasa lapar
Rasa haus
Rasa kanyang
Rasa bagah
Hinip simpun di parigal Hampian, Ya Allah
Ulun kada bisian daya upaya napa napa
Sarabanya Hampian injami wara
Buntat
Barabah
82
Batiharap
Batilantang
Batungging
Bulik
Baundur
Burit
Bapadah
Bisul
Babangat
Burit
Balancat
(Padahal
Takutan
Basuntik)
Kahada Babuku Ruas
Surung
83
Sintak
Sintak
Surung
Tasurung
Tasintak
Ayungannya
Tabilalak
Undur
Mara
Taundur
Tamara
Uban tahambur
Bajalan babayanya kawa
Paputingannya
Bagaru kupala
Gatar
Gitir
Manggatar
Mangitir
Titir
Tapaluh liir
Manggalahi
Pinggir
84
Suap
Tapal
Tasuap
Tatapal
Manyuap
Manapal
Parut buris iya banar buntal
Sunyi
Suhung
Disambur tadung
Ranai
Garutuk
Kahada bapiduduk
Sabak
Samun
Katuju banar mangalamun
Manggah
Mukuh
Kalapahan
85
Manggagar karuh
Kur sumangat!
Jukung Waktu
Jukung waktu
86
Manggaluyur hilir-mudik lalu-lalang malayari sasungaian umur dih ulun
Ya Allah ya Tuhanku
Ya Allah Nang Maha Pamurah
Ya Allah Nang Maha Panyayang
Ya Allah Nang Maha Marajai
Ya Allah Nang Maha Suci
Ya Allah Nang Maha Mambari Kasalamatan
Ya Allah Nang Maha Mambari Kaamanan
Ya Allah Yang Maha Mamalihara
Ya Allah Yang Maha Kawa Mangalahakan
Ya Allah Nang Maha Parkasa
Ya Allah Nang Maha Baisian Sagala Kabasaran
Ya Allah Nang Maha Manciptaakan
Ya Allah Nang Maha Malapasakan
Ya Allah Nang Maha Mancipta Rupa Mahluk
Ya Allah Nang Maha Pangampun
Ya Allah Nang Maha Gagah
Ya Allah Nang Maha Mambari
Ya Allah Nang Maha Pambari Razaki
Ya Allah Nang Maha Pambuka Lawang Rahmat
Ya Allah Yang Maha Mangatahui
Ya Allah Nang Maha Manyampitakan Razaki
Ya Allah Nang Maha Malapangakan Razaki
Ya Allah Nang Maha Marandahakan Darajat
87
Ya Allah Nang Maha Maninggiakan Darajat
Ya Allah Nang Maha Mamuliaakan
Ya Allah Nang Maha Manghinaakan
Ya Allah Nang Maha Mandangar
Ya Allah Nang Maha Malihat
Ya Allah Nang Maha Manatapakan Hukum
Ya Allah Nang Maha Adil
Ya Allah Nang Maha Panyantun
Ya Allah Nang Maha Waspada
Ya Allah Nang Maha Panyabar
Ya Allah Nang Maha Agung
Ya Allah Nang Maha Pangampun
Ya Allah Nang Maha Batarimakasih
Ya Allah Nang Maha Tinggi
Ya Allah Nang Maha Basar
Ya Allah Nang Maha Mamalihara
Ya Allah Nang Maha Mambari Makan
Ya Allah Nang Maha Manghitung
Ya Allah Nang Maha Baisian Kabasaran
Ya Allah Nang Maha Mulia
Ya Allah Nang Maha Mangawasi
YA Allah Nang Maha Mangabulakan
Ya Allah Nang Maha Luas
Ya Allah Nang Maha Bijaksana
Ya Allah Nang Maha Mangasihi
88
Ya Allah Nang Maha Mulia
Ya Allah Nang Maha Mambangkitakan
Ya Allah Nang Maha Manyaksiakan
Ya Allah Nang Maha Banar
Ya Allah Nang Maha Maurusi
Ya Allah Nang Maha Kuat
Ya Allah Nang Maha Kokoh
Ya Allah Nang Maha Malindungi
Ya Allah Nang Maha Tarpuji
Ya Allah Nang Maha Manghitung
Ya Allah Nang Maha Mamulai
Ya Allah Nang Maha Mangambaliakan
Ya Allah Nang Maha Manghidupakan
Ya Allah Nang Maha Mamatiakan
Ya Allah Nang Maha Hidup
Ya Allah Nang Maha Bardiri Saurangan
Ya Allah Nang Maha Manamuakan
Ya Allah Nang Maha Baisian Kamuliaan
Ya Allah Nang Maha Esa
Ya Allah Nang Maha Manjadi Wadah Maminta
Ya Allah Nang Maha Kuasa
Ya Allah Nang Maha Barkuasa
Ya Allah Nang Maha Mandahului
Ya Allah Nang Maha Mangakhiri
Ya Allah Nang Maha Panambaian
89
Ya Allah Nang Maha Panghabisan
Ya Allah Nang Maha Zhohir KakuasaanNYa
Ya Allah Nang Maha Kahada Kalihatan DzatNya
Ya Allah Nang Maha Manguasai
Ya Allah Nang Maha Tinggi
Ya Allah Nang Maha Baik
Ya Allah Nang Maha Panarima Taubat
Ya Allah Nang Maha Mambari Siksaan
Ya Allah Nang Maha Pamaaf
Ya Allah Nang Maha Balas Kasihan
Ya Allah Nang Maha Baisian Kerajaan
Ya Allah Nang Maha Baisian Kaagungan wan Kamuliaan
Ya Allah Nang Maha Adil
Ya Allah Nang Maha Mangumpulakan
Ya Allah Nang Maha Kuasa
Ya Allah Nang Maha Mambari Kajayaan
Ya Allah Nang Maha Mampartahanakan
Ya Allah Nang Maha Maulah Bahaya
Ya Allah Nang Maha Mambari Manfaat
Ya Allah Nang Maha Manjadiakan Cahaya
Ya Allah Nang Maha Pambari Petunjuk
Ya Allah Nang Maha Manciptaakan
Ya Allah Nang Maha Kakal
Ya Allah Nang Maha Kakal Abadi
Ya Allah Nang Maha Pintar
90
Ya Allah Nang Maha Panyabar
Wayah isya bakiyau diulun basandar di darmaga iman
Wayah subuh mangawai diulun manggigil manyusun taubat
Wayah luhur mangariau diulun singgah maminum banyu ampunan Hampian
Wayah ashar basaru diulun marapat manjarat hakikat
Wayah magrib maambili diulun bamalam di lanting ma’rifat
Jukung waktu
Manggaluyur hilir-mudik lalu-lalang malayari sasungaian umur dihulun Ya Allah
Wayah ulun basaksi bahawasanya kadada Tuhan lain salaian Hampian Ya Allah wan
Nabi Muhammad ngitu bujur-bujur utusan Hampian Ya Allah
Wayah sumbahyang dihulun ngini banar-banar manyambah Hampian wara Ya Allah
Wayah puasa dihulun ngini marasai jua padih laparnya urang nang kada baisian Ya Allah
Wayah zakat dihulun ngini hagan mambarasi harta barana barian Hampian Ya Allah
Wayah haji dihulun ngini hagan mahapus rigat daki dusa-dusa diri dihulun jua Ya Allah
Jukung waktu
Manggaluyur hilir-mudik lalu-lalang malayari sasungaian umur dih ulun ngini Ya Allah
Wayah ulun yakin wan parcaya lawan Zat Hampian
91
Wayah ulun yakin wan parcaya lawan malaikat-malaikat Hampian
Wayah ulun yakin wan parcaya lawan kitab-kitab Hampian
Wayah ulun yakin wan parcaya lawan rasul-rasul Hampian
Wayah ulun yakin wan parcaya lawan kiamat ngitu pasti tajadi
Wayah ulun yakin wan parcaya lawan apa-apa nang Hampian takdirakan lawan diri dih ulun
Jukung waktu
Manggaluyur hilir- mudik lalu lalang malayari sasungaian umur dih ulun
Tuntunakan ampah ka darmaga rahmat wan ampunan Hampian samata
Ya Allah Ya Rahman Ya Rahim Ya Malik Ya Quddus Ya Salaam Ya Muhaimin
Ya Aziiz Ya Jabbar Ya Mutakabbir Ya Kholiq Ya Baari Ya Mushowwir Ya Ghaffaar
Ya Qohhaar Ya Rozzaaq Ya Fattaah Ya Alim Ya Qaabidl Ya Baashit Ya Khaafidl
Ya Raafi’ Ya Mu”izz Ya mudzill Ya Samii’ Ya Bashiir Ya Hakam Ya ‘Adl Ya Lathiif
Ya Khabiir Ya Haliim Ya Adhiim YaGhafuur Ya Syakuur Ya Aliyy Ya Kabiir
Ya Hafiidh Ya Muqiit Ya Hasiib Ya Jaliil Ya Kariim Ya Raqiib Ya Mujiib Ya Waasi’
Ya Hakiim Ya Waduud Ya Majiid Ya Baa’its Ya Syahiid Ya Haqq Ya Wakiil
Ya Qowiyy Ya Matiin Ya Waliy Ya Hamiid Ya Muhsyiy Ya Mubdi Ya Mu’iid
Ya Muhyii Ya Mumiit Ya Hayyu Ya Qayyum Ya Waajid Ya Maajid Ya Wahiid
92
Ya Shamad Ya Qaadir Ya Muqtadir Ya Muqaddim Ya Muakhkhir Ya Awwal Ya Akhir
Ya Adzhohir Ya Bhathin Ya Waaly Ya Muta’all Ya Barru Ya Tawwab Ya Muntaqim
Ya Affuw Ya Rauuf Ya MaalikulMulki Ya Dzuljalaaliwalikraam Ya Muqsit Ya Jaami’
Ya Ghaniy Ya Mughnii Ya Mani’ Ya Adhdhaaru Ya Naafi’u Ya Nuur Ya Haadii
Ya Badii’u Ya Baaqii Ya Waarits Ya Rashiid Ya Ashshabuur
Jukung waktu
Manggaluyur hilir- mudik lalu- lalang malayari sasungaian umur dih ulun
Singgahakan wan batakakan di palabuhan Hampiyan Ya Allah
Amin.
93
Pasputu Hirang Putih Ukuran 4x6 cmBasalaman Mancium Tangan
di Balakang Manjunggingi Burit
Bah
Iya
Pang
!
94
Mataari Wan Bulan
Matari batato di muha
Bulan batindik di talinga
Mataari batato di panggulu
Bulan batindik di alis
Mataari batato di awak
Bulan batindik di idung
Mataari batato di dada
Bulan batindik di ilat
Mataari batato di tangan
Bulan batindik di bibir
Mataari batato di parut
Bulan batindik di pusat
Mataari batato di sabukuan batis
Bulan batindik di bawah parut
95
Mataari badatang wan bulan
Bulan kisir-kisir kamiyangan
Mataari kawin wan bulan di ranjang bulan
Bulan kadap diragap garaha
Mataari kawin wan bulan di ranjang mataari
Mataari kurup dipagut garaha
Mataari wan bulan baranak babuah di pucuk umur
Sisigan buhannya bainguy di rapun wayah
Wayah samalam manimbai taruh
Taruh anum baburuk takatuha
Manyasal datang badudi
96
Liur Baungan
Mambari supan babanaran
Kupiah haji wan bulang baciuman di tangah kartak
Liir
Ganyir
Mandingur lacit ka buncu banua
Lantaran panting dicucuk dihajukan kasitu kamari
Kada tahu mana buntut mana kupala
97
Wadak Umur
Handapnya umur kada kawa dikilan
Panjangnya umur kada kawa didapa
Saumur jagungkah
Ingkuti hakikat
Saumur janangkah
Cakuti ma’rifat
Sabuku
Saruas
Dihiris lanik-lanik
Diulah wadak
Kasaiakan kagarak hati andika
98
Ripu
Buah tahun. Buah jarang. Sabukuannya. Masak di rapun. Babanyuan.Mamabari kapingin. Tagal andakan di dahan ujung. Bapinyangat ha pulang. Kaluang gin kada wani baparak. Isuk ari. Isuk kamarian. Bahimat manukui. Mahadang gugurnya. Ripu ilat talumu liur nang liwar manyurungnya. Kada dapat buahnya. Kulit atawa bijinya gin barang. Sahibar mahapusakan liur. Hapuk! Liur hapus. Ampih baliuran. Mamusut ka parut. Takarium saurangan. Kahimungan. Mahadangi ari satahun. Mancium dingurnya. Tarasai lagi hapuk nyamannya.
99
Garunum Hancaw
“Puasa basasar baparak ampah ka ari raya. Salikuran. Bahari urang manutung ubur di higa atawa di hadapan rumah. Langgar wan masigit mangguriyak lawan manusia nang handak manamuni lailatur qadar. Wayah ini urang bapawai maarak dauh wan tanglung kaliling kuta. Dilumbaakan ha pulang jar. Hadiahnya ratusan juta”, garunum hatap daun nang parak jabuk ngitu di rumah bahari nang hudah rumbisan.
“Puasa basasar baparak ampah ka ari raya. Salikuran. Bahari urang manutung ubur di higa atawa di hadapan rumah. Langgar wan masigit mangguriyak lawan manusia nang handak manamuni lailatur qadar. Wayah ini urang bapawai maarak dauh wan tanglung kaliling kuta. Dilumbaakan ha pulang jar. Hadiahnya ratusan juta. Hiiih! Bahari dada latupan. Wayahini ubui lahai. Suaranya manyalak iya banar kutang malihat iblis”, sambar tawing wan lantai nang parak paculan pasaknya ngituh.
“ Dasar bujur babanaran jar bubuhan ikam jua sakalinya. Cuba mun duit nang sadayaw hagan hadiah wan nukar latupan ngitu ditukarakan ka baras. Kulihan barapa gantang? Limbah ngitu bagiakan atawa
100
bariakan lawan urang nang kadada. Nang mun handak nukar baras balangsar dada talapuh liir hampai kapapikangan basahnya mancariakan duitnya. Himung kada sakira tu pang bubuhannya. Kada mubajir. Kada mambuang-buang duit. Ada jua manfaatnya hagan urang banyak. Iya kaluku?” ujar kai wan nini nang ampun rumah. Batuk mangikil takuhul–kuhul manungap saluangan. Tungap sakananya.
“ Tagal ah kada intuy-intuy jua bubuhannya ngitu. Gawi gitnya saurang jua ai nang iyanya. Makanya aku kada handak umpat gawi urang nang kaya urang babungulan ngitu. Jar habar mancari duit sing ngalihan. Haraga di pasar sasain balarang. Duit sambatannya haja banyak. Limbah ditukarakan ka barang sajumpilit wara. Maka kawa haja manukar latupan. Sing nyamanan manyucul manyalukut duit”, cuit cabak manalinga di hatap rumah.
Cpb2, malam sanayan, 220811
Mangganapakan Itungan
Ganap
Ganjil
Ganjil
Ganap
Kuiting-itung ganap ganjilnya. Kususur pungkalanya. Baasa manyusur. Basusur jari. Basusur kilan. Basusur hasta. Basusur dapa. Kubilang-bilang ganjil ganapnya. Kujalujur pintangannya. Baasa manjalujur. Babilang ari. Babilang minggu. Babilang tahun. Lumus satahun. Lacit katahun.
101
Ganjil
Ganap
Ganap
Ganjil
Kuputiki gaganjilannya. Nang sibit. Nang batual. Nang simpak. Nang himpal. Nang pirut. Nang pikut. Kutajak ampah ka higa. Kukair ampah ka pinggir. Kukaih ampah ka balakang. Kupilihi gaganapannya. Nang purna. Nang baik. Nang bagus. Nang bungas. Nang langkar. Nang baik rupa. Nang baik tadah. Nang baik tiring. Nang mancarunung. Nang kada sing dulakkan digaliming. Nang kada sing muyakkan dijanaki. Nang kada mambari muar diitihi. Kusimpunakan ampah ka tangah. Kupilih hagan undasnya.
Ganap
Ganjil
Ganjil
Ganap
Ganjil
Ganap
Ganap
Ganjil
Ganap ganjil. Ganjil ganap. Ngitu kada panting. Ngitu kada parlu. Nang panting bungas. Nang parlu langkar. Nang panting mancurunung. Nang panting bagirap. Ganap ganjil. Ganjil ganap. Ngitu kada panting. Ngitu kada parlu. Nang sibit. Nang batual. Nang simpak. Nang himpal.
102
Nang pirut. Nang pikut. Timbaiakan ampah ka pinggir. Salukut hagan balaman.
Ganap
Ganjil
Ganjil
Ganap
Mangganapakan itungan. Kada pacangan ganap mun kadada gaganjilannya. Kada pacangan ganjil mun kadada gaganapannya. Ganap ganjil. Ganjil ganap. Sama haja itungannya. Saling manutupi kukurangannya. Saling mangganapi itungannya.
CPB 2 malam sanayan, 220811
(Pantun) Cakah
Ka ulu ka ilir mancari upih
Tadapatnya di bawah rapun risi
Ka ulu ka ilir hinggan bapadah sugih
Sajampal bungul kahada baisi
103
Saharian manyusun pakakas
Kahausan maminum teh dingin
Ka situ ka mari bapadah bungas
Saikung-ikung kadada nang kapingin
Baisukan sawat tulak ka pasar
Tulak ka pasar maninjak sapida
Camapa diri baparagah pintar
Mun mambaca wan manulis si kada bisa
Rapun jingah daham di kuntat
Mun dikuntat kaluku kapuhunan
Ujar habar mangaku buntat
Lawan jarum suntik mancicing katakutanan
Tumatan baisukan lacit ka sanja manajak lampau
Di sangui kupi wan gaguduh
Mun diri hudah bapadah jagau
Di jaratnya jaring daham baakai baaduh
Tilam ganal handak dikilim
Mun mangilim daham di kadap
Bulang ganal bapadah alim
Mambaca arab gundul maka bagagap
104
Rujak –rujak manjuluki si nyiur anum
Bini di kampung bajualan bubur
Ka darat ka laut ka ulu ka ilir bapadah anum
Gigi rumpung huban bahambur
Cpb 2 malam arba 240811
Bagaduh
Bagaduh
Kuyang-kuyang
Hantu-hantu
105
Urang-urang
Aku-aku
Bagaduh
Guplah!
Kusurung kupala kadada nang manungap
Kuulur buntut kadada nang mamatuk
Pada kuguplah
106
Ranai hinip sabakasan
Kadakah pilu
Pada bahitung buku sabarataan
Linyakkah
Limirkah
Mun hudah dihakuni
Musti dihakuni
Basahkah
Jimuskah
Mun hudah ditajuni
Musti ditajuni
Han
Mati
Ja
Ku
Kalah mata
Kalah duit
Talinga bagantung
Pipi bagapit
Bagawi kulir
Pancarian sakit
Hutang di warung sasain hangit
Mata mancalung
Awak mangurus
Diguplah panyakit
107
Han
Tiya
Ja
Ku
Kuguplah kalu!
Babarasih
Kurandam
Hudah
Kusabuni
108
Hudah
Kukisik
Hudah
Kukucak
Hudah
Kubilas
Hudah
Kujamur di matari idup
Kurandam baasa
Kusabuni baasa
Kukisik baasa
Kukucak baasa
Kubilas baasa
Kukalantang di mataari tinggalam
Mun batual
Mun batahiumanan
Tu wajar haja
Ngarannya gin kain buruk!
Wisa Aruh Sastra
Lakasi bilak kamus bahasa banjar
Ratusan panyair siup dipupuhi katakata
Puluhan cerpenis laip dicatuki katakata
109
Ribuan panuntun tacagal dibius katakata
Inguh Aruh Sastra 8
Apam
Wan
110
Jaruk tarap
Baragapan
Baangkatan
Dingsanak
Dalam
Parut
Bubuhan
Panyair
Doa
Pahumaan badoa, “ Ya Allah Nang Maha Bijak. Tutupakan hati pagustian dihulun kada handak manjual dihulun saumur janang”.
111
Banih badoa.” Ya Allah Tuhan sakalian alam jagaakan pahumaan- pahumaan wadah kami baranak babuah nang sasain tahun sasain bahandap bakipit nginih tumatan sarakah tamaknya hati manusia. Suburakan tumbuh idup rapun dihulun. Banyakiakan buah dihulun. Lantaran masih ada tangis urang nang kalaparan”.
Baras badoa, “ Ya Allah Nang Maha Rahman Nang Maha Rahim. Barilah patunjuk hagan bubuhan tangkulak wan panjual baras ngituh supaya daham bamain mata maulah haraga awak badan dihulun nginih sasain balarang di pasaran. Lantaran banyak banar urang nang tatangis nang kada pati kawa manahuri haraga dihulun”.
Nasi badoa, “ Ya Allah nang Maha Bijaksana. Daham dibiarkan urang-urang sugih manyia-nyiaakan mamubajirakan badan awak dihulun nginih, nang bila bubuhannya kada habis mamakan dihulun, ulun ditimbai dibuang dibairakan ka wadah ratik, ka bawah rumahan atawa ka piciran”.
Dapur, atang, kincing, wancuh, sukrinjing, cirat, cangkir wan piring tainguy maaminakan!
Kidas
112
Dandaman alahai sayang. Dandam dandaman diyaku bapiruhut taikat tapasung talilit tajarat mati lawan lilihum karium si galuh nang mancarunung di mata hagi, nang liput manutupi aurat, nang kada batal udhu, nang panyumbahyang, nang pamuasa, nang pangaji, nang putih mangkunung, nang pangariuman, nang kada panyarik paronsengan, nang baik budi, nang baik hati, nang babakti lawan kuitan, nang sayang lawan nang anum, nang tunduk patuh maasi lawan nang papadah nang tuha, nang parajakian, nang bauntung, nang batuah, nang panjang umur.
Dandaman diyaku alahai sayang
Dandam dandaman diyaku si alis nang tabal
Dandaman diyaku alaihai diyang
Niat hatiku guring sabantal
Dandaman alaihai sayang. Dandan dandaman diyaku baingkut mati di caramin mata si galuh nang pambarasih, nang panggawi, nang nyaman sadang wan pas di ilat haraguannya, nang sadang timbangan rasa kasih sayangnya, nang kada panyamburuan, nang kada panggarunuman, nang kada parangutan, nang kada pangulibian, nang mau haja bakurang labih.
Dandaman diyaku alahai diyang
Juntai-juntaian si buah rambai
Dandaman diyaku alahai sayang
Maksud hatiku kawa batatai
113
Ziarah zikir
Ziarah waktu
Ziarah sunyi
Ziarah zikir
Manyumpal luang hinak
Liati kubur si panyair nginih pitih-pitih
Itihi kubur si panyair nginih janak-janak
Nisannya mancugut tumatan syair wan pantunnya
Atangnya bengkeng nangkaya gaya bahasanya
Babatuannya abadi wan halus tumatan diksinya
Kakambangannya harum mandingur nangkaya makna bait wan barisnya
Ziarah waktu
Ziarah sunyi
Ziarah zikir
Manambal cawah hinak
114
Panawar Kalumpanan
Kalumpanan lurung bulik
Daun hati dihulun
Lunguy di guncang kumarau landang
Sumalam ada garaha bulan bacungul
Nah baulah kakambangan babuahan luruh guguran
Kada sampat jadi buah
Untung haja ada muha ujan bajanguk baisukan sawat tadi
Mambilas awak dihulun nang hibak lawan dabu daki dusa nginih
Jimus sabukuan
Sakali tabuncalak
Tabunciling mata
Maliat lurung bulik ada di hadapan
Balalu mandusur bulik bapayung doa
Ka rumah nang kada sing lawangan ngituh
Sahibar maandahakan banyu mata banarai
Maumpati garak hati
Manawar kalumpanan
Lawan banyu udhu
115
Pasan Kalaras
Mun awak badanku kaina luruhan
Mancium kaning tanah
Lalu diulah hagan pambungkus gula habang
Daham tangisi kamatianku lah
116
Katulahan
Tapatak
Tapajal
Barikit kada sing garakan
Tasisit
Taikat
Tajarat mati kada sing lunggaran
117
Lurung Takdir
Marasai sakarat sahimpil mimpi
Nang larutan di sasungaian karuh guringku
Panawar dandaman landangku
Diunjai lilihum dihikam nang pangurihingan
Di lindap dibar hatiku
Nang kamuyayangan
Simpun sintuk
Maharit supan
Gitir-gitir manata pandir
Di simpang talu
Nang manamuakan lurung takdir
Kita badua
118
Pangantin Hanyar 1
Paring sampuk buku
Miang manyaraput
Tumatan punggur
Sampak ampah ka pucuk
Manyampuk rabung
Manyasar ruas
Jimus sarapunan
Ujan kahada
Ribut gin kahada
119
Pangantin Hanyar 2
Paring sampuk buku
Kaasikan basimban
Kahada karasaan lagi
Udunan kamir
Talimbak
Maribi
Di ulas hanyar
Mataari baisukan
Mahintip di sala luang jandila
Lihum
Supan
Saurangan
120
Hakunlah?
Ulun
Lamar
Andika
Lawan
Bismilah
121
Kijil
Mamutiki talapak karacak dandaman
Dimanang juakah lurung pintangannya
Mun kada suah lalu tadangar buriniknya
Mun kada suah lalu tahinggur inguhnya
Mun kada suah lalu tadangar habar baritanya
Mun kada suah lalu taliat lubang idung wan bulu matanya
Mun kada suah lalu malimpas humbayangnya
Dimanang juakah lurung pintangannya
Karacak dandaman nang ditunti saumur janang
Mun hudah tadangar buriniknya
Mun hudah tahinggur inguhnya
Mun hudah tadangar habar baritanya
Mun hudah taliat lubang idung wan bulu matanya
Mun hudah malimpas humbayangnya
Ayu lakasi babarasih bamandi-mandi
Tampulu mayang maurai sanja
Maharumi dandaman andika
122
Karindangan
Mataari balandung batandar ampah ka kadap
Ujan sing labatan luruh bagasutan
Balahindang tasangkut di langit sanja
Burung malam mambasuh jambul
Babarasih maagaki diri
Basiap-siap mamuji pujaan
Buak-buak
Kada sing dulakan
Buak-buak
Kada sing muyakan
Buak-buak
Kada sing ampihan
Buak-buak
Sampak samalaman suntuk
Mamuja-muji
Mamuji-muja
Kasampurnaan
Kalangkaran
Bulan tarang
Nang bulat mambulaning
Nang bagantung di langit malam ngitu
Buak-buak
123
Kada tahu di diri
Kada tahu di urang
Mabuk karindangan
Gagilaan saurangan
124
Bakaracak
Nang ngarannya luka tatap ai luka
Biar ditambai
Biar hudah waras
Tatap ada kunatnya
Tatap ada bakasnya
Wayah kaingatan
Wayah kaganangan
Banyu mata lilihan mambaali bantal
125
Tagas!
Diigut layat
Dibuang sayang
Taguk
Habis kisah!
126
Labar
Taunjuni
Iwak lapar
Kada kasisitan
Paampihannya
127
Tikas Tiwas
Sampak
Mandua talu jam
Maaci agak
Bapupur
Bacalak
Bagincu
Bapusing kanan kiwa
Hadapan balakang
Muha kada bungas nangkaya dihurang
Caramin nang ditiwas
128
Paribahasanya
Rajin pacangan uyuh
Himat pacangan kikit
Baduduk sama kipa
Badiri sama panat
Ringan sama dijinjing
Barat sama diupahakan
Han!
129
Balambika
Kada karasaan mun digarumuti sasamaan
Sasain ari sasain baganal
Sasain ari sasain bakaras
Tugul
Hampai baranak babuah
Lacit ka intah ka aning
Bamudal banyu liur wara
Tarasai sanyaan
Titik paluh pamuyangan
Kahada bahirian
Lagi
Lakunnya
130
Balahindang
Cungul sing langkaran
Limbah ujan bajinguk
Habang
Kuning
Hijau
Manggambari langit tuhan
Balancat tunjuk dilumu tatarusan
Takutan kaluku kutung limbah manunjuk muha balahindang
Balahindang
Habang
Kuning
Hijau
Salindang buhan bidadari
Luluian
Di pinggir talaga
Baculup
Sahibar
Babarasih awak
Kalu pang
Ada nasibnya
Balaki
131
Manusia
Balahindang
Bajanguk sapandang
Mahadangi
Mataari
Maurak
Halar
132
Takibar Sumangat
Takipik
Takibar sumangat
Maagahi karuh larut
Padahal hanyar saikit satumat tarasai nyamannya
Sumangat nang hudah takukur
Pucat kalas
Manggitir
Di higa tawing halat
Manunggu
Dihamburi
Lawan
Baras kuning
133
Mun
Mun jukung hudah didampul
Mun pangayuh wan pananjak hudah disiapakan
Mun parang bungkul, kapak wan balayung hudah diasah
Mun baras, gula, kupi, uyah, timbaku wan sagala sangu-manyangu hudah sing langkapan
Ayu kita karubuti gawi ganal nginih
Baramu tahun di hadap
Manajak sarubung hagan aruh banua
Maarak pangantin hanyar
Mun jukung hudah dikayuh
Mun pangayuh wan pananjak hudah diulai
Mun parang bungkul, kapak, balayung hudah diilai
Mun baras, gula, kupi, uyah, timbaku wan sagala sangu-manyangu hudah dimakan
Mun ramuan hudah batuyuk di hadapan idung
Ayu kita karubuti gawi ganal nginih
Manajak sarubung hagan aruh banua
Maangkat batang tarandam
Maangkat batang idung
Anak cucu intah aning juriat tatuha bahari
Supaya daham ditiring subalah mata
134
Jalan Nang Panghabisan
Guplah!
135
Abdurrahman El Husaini, lahir di Puruk Cahu Kalimantan Tengah, 1 Januari 1965. Selain menulis puisi juga menulis essai sastra.Beberapa dari karyanya dipublikasikan di harian Dinamika Berita (sekarang Kalimantan Post), Banjarmasin Post dan Radar Banjarmasin. Sejumlah puisinya telah dibukukan dalam antalogi bersama, seperti Ragam Jejak Tsunami (Balai Bahasa Medan 2005), Taman Banjarbaru (2006), Seribu Sungai Paris Barantai ( 2006), Tarian Cahaya di Bumi Sanggam (2008), Menyampir Bumi Leluhur (2010) dan Konser Kecemasan (2010). Akulah Musi (Dewan Kesenian Palembang, 2011). Menerbitkan antalogi Puisi Bahasa Banjarnya yang I “ Doa Banyu Mata “ (2011). Menerima hadiah
Seni dari gubernur Kalimantan Selatan di bidang puisi (2008). Menerima anugerah Astaprana di bidang seni sastra dari Lembaga Adat Kekerabatan dan Kesultanan Banjar (2011). Pernah menuntut ilmu sampai tamat di STSS1 (Sekolah Tinggi Setelah Strata 1) Universitas Lambung Mangkurat jurusan Pendidikan Bahasa dan Sastra Indonesia dan Daerah.
136
Abdurrahman El Husaini, diranakan di Puruk Cahu Kalimantan Tangah, 1 Januari 1965. Salain manulis puisi jua menulis issai sastra.Babarapa karyanya dipublikasikan di harian Dinamika Berita (Wayah ini Kalimantan Post), Banjarmasin Post dan Radar Banjarmasin. Sajumlah puisinya hudah dibukukan dalam antalogi basamaan, nangkaya Ragam Jejak Tsunami (Balai Bahasa Medan (2005), Taman Banjarbaru (2006), Seribu Sungai Paris Barantai (2006), Tarian Cahaya di Bumi Sanggam (2008), Menyampir Bumi Leluhur (2010) dan Konser Kecemasan (2010). Akulah Musi (Dewan Kesenian Palembang, 2011). Manarbitkan antalugi Puisi Bahasa Banjarnya nang pananbaian “ Doa Banyu Mata “ (2011).
Manarima hadiah Seni matan gubernur Kalimantan Salatan di bidang puisi (2008). Manarima anugerah Astaprana di bidang seni sastra matan Lembaga Adat Kakarabatan wan Kasultanan Banjar (2011). Suah manuntut ilmu hampai tamat di STSS1 (Sakulah Tinggi limbah Strata 1) Universitas Lambung Mangkurat jurusan Pandidikan Bahasa wan Sastra Indonesia wan Dairah.
137