Asal-Usul Tanjung manangis di Halmahera

Dolo-dolo tuh ada kerajaan besar di Pulau Halmahera. Dong pung raja su meninggal dunia balom lama. Akang raja tuh kasi tinggal dia pung istri, anak laki-laki dua orang, deng anak parampuang satu orang. Laki-laki dua tuh dong pung nama Baginda Arif deng Putra Baginda Binaut. Sedangkan yang parampuang tuh dia pung nama Putri Baginda Nuri.

Putra Baginda BInaut ni ada hati ingin par jadi raja. Dia pi bilang par Patih.

Putra Baginda Binaut: “Patih! Beta mesti jadi raja ganti beta pung bapa.”

Patih: “ Beta kurang yakin kalau Tuan yang jadi raja.”

Putra Baginda Binaut: “Kanapa se bilang bagitu par beta? Supaya se tau! Kalau sampai beta yang jadi raja, beta seng akan ganti se pung jabatan tuh deng orang laeng. Beta lai jua akan kasi se jutaan berlian.”

Patih: “ Ao. Yang batul nih Tuan? Jang sampe Tuan Cuma kasi parlente beta sa?”

Putra Baginda Binaut: “ Par apa beta parlente? Beta janji par se Patih. Kalau sampe beta jadi raja, se pung jabatan seng akan beta ganti deng orang laeng. Deng beta janji akan kasi se jutaan berlian. Tapi, se mesti mendukung beta par jadi raja.”

Patih: “Tuan su bilang par Sri Baginda Ratu, Baginda Arif, deng Putri Baginda Nuri? Dong su stuju Tuan par jadi Raja?”

Putra Baginda Binaut: “Adoh. Beta pung mama, Kaka Laki-Laki, deng ade parampuang pasti seng stuju.”

Patih: “Kalo dong seng stuju, katong musti bagemana Tuan?

Putra Baginda Binaut tinggal berpikir. Cara apa ee yang musti beta biking supaya mama, kaka, deng ade mo stuju beta par jadi raja?Kata Putra Baginda Binaut dalam hati.

Akhirnya Putra Baginda Binaut pake pemikiran yang licik. Dia pi bilang par Patih, kalau Patih tuh mesti kumpul para pengawal par tangkap Sri Baginda Ratu, Baginda Arif, deng Putri Baginda Nuri.

Selesai para pengawal tuh tangkap. Dong tiga langsung dapa kasi maso ka penjara bawah tanah. Putri Baginda Nuri jadi marah waktu tau kalau dia pung kaka sandiri yang kasi masuk dong di penjara bawah tanah. Putri Baginda Nuri paleng marah.

Putri Baginda Nuri: “Hih kaka tuh paleng jahat paskali. Masa dia tega kasi maso katong di penjara. Beta paleng binci deng dia Ma.”

Sri Baginda Ratu: ” Sudah, nona jang bagitu. Nona musti bersabar. Orang yang jahat macam bagitu nanti akan dapat hukuman yang setimpal.”

Binaut paleng sanang su bisa kasi masuk dia pung mama deng dia pung sodara-sodara ke penjara. Skarang su seng ada yang bisa halangi dia par jadi raja. Dia bilang par seluruh rakyat kalo Sri Baginda Ratu deng dia pung sodara-sodara su meninggal waktu dong pi balayarHari itu dia langsung pi bilang par para pembesar istana supaya dong lantik dia.

Setelah Putra BAginda Binaut jadi raja. Dia jadi sombong deng tinggi hati. Dia su merasa kalau dia tuh raja yang opaling berkuasa di muka bumi nih. Dia pung rakyat-rakyat smua dapa tindas. Pokoknya, apa yang dia bilang tuh dong musti iko. Kalau sampai dong seng iko, dong nanti dapa kasi maso ke penjara.

Rakyat smua seng ada yang brani malawang dia. Dimana dong lia dia, dong musti hormat par dia. Rakyat smua seng ada yang suka deng dia. Patih lai jua su mulai seng suka deng dong pung raja baru tuh. Tapi Patih seng brani bicara. Patih taku dapa kasi maso ke penjara.

Binaut bilang par dia rakyat kalau dong musti biking istana yang besar dan megah par dia. Rakyat-rakyat yang dapa suru karja tu seng boleh makan deng minum. Selain itu Binaut kasi naik pajak yang biking warga sengsara. Ada pajak tanah, pajak hewan, deng pajak hasil bumi. “Raja Binaut tuh penindas dan penghisap rakyat.” Kata salah seorang warga kepada warga yang lain.

Ada salah satu pelayan istana yang bernama Bijak. Dia su pi melarikan diri ke hutan. Deng dia su biking pasukan tangguh disana. Paling tidak, dong bisa kasi selamat Sri Baginda Ratu deng antua pung ana dua tuh.

“Katong musti pi kasi slamat Sri Baginda Ratu, Baginda arif, deng Putti Baginda Nuri.” Kata bijak par dia pung pasukan.

Waktu itu ada banya pegawai istana yang mau par bergabung deng Bijak. Kalo sampe Bijak bisa lakukan penyelamatan, itu artinya dia pung pasukan bisa lakukan rencana berikutnya par serang istana Raja Binaut.

Dalam sekejap. Dong su bisa kasi slamat sri Baginda Ratu deng dia pung ana dua. Sri Baginda Ratu su dapa lia paleng kurus. Antua pung ana dua lai jua bagitu.

Sri Baginda Ratu: “ Dangke banya nyong. Su mau kasi slamat beta deng beta pung ana-ana. Beta seng tau musti balas budi deng cara apa lai. Beta Cuma bisa minta dangke banya-banya sa dari nyong.”

Bijak: “ Ratu! Bilang dangke sa itu su paling cukup par beta.”

Sri Baginda Ratu: “ Ale paleng bae.”

Bijak: “ Sakarang katong musti serang Raja Binaut pung istana. Katong musti bergegas Ratu.”

Sri Baginda Ratu: “ aduh. Jang lai nyong. Beta seng mau beta pung rakyat tuh meninggal banya.”

Bijak: “ Baiklah Ratu. Katong seng jadi pi ka sana lai.”

Sri Baginda Ratu: “ Ketamakan, kebengisan, iri deng dengki akan kalah deng katong pung doa par Tuhan.”

Seng sangka. Sebuah bencana alam terjadi. Sebuah gunung meletus paleng dahsyat. Lahar panas mengalir ke seluruh penjuru. Istana Raja Binaut menjadi sasaran lahar panas. Ternyata, lahar panas su makang Istana Raja BInaut tuh kasi abis. Raja Binaut su bingung seng tau mau cari perlindungan dimana. Raja Binaut lari pontang-panting. Lahar panas tinggal iko raja Binaut trus.

Raja Binaut berteriak “Tolong! Tolong beta jua!”

Seng lama lai Lahar panas tuh akang su tatempel deng Raja Binaut pung kaki. Dari kaki akang menjalar sampai ka dia pung badang. Dia jadi inga deng dia pung mama.

Raja Binaut bataria lai, “Tolong ee! Tolong beta jua! Mama ee bete minta ampong! Beta janji seng akan bagini lai! Tuhan ee! Kasi ampong beta jua ee!”

Akhirnya, suara Binaut sedikit-demi sedikit menghilang. Binaut pung badang-badang su angos. Dia pung mayat terdampar di pante satu. Dalam sekejap tempat itu su brubah jadi sbuah tanjung. Konon, di tanjung itu tuh paleng sering ada orang dengar suara manangis minta belas kasihan karena tersiksa. Tanjung itu sekarang dong bilang akang deng nama Tanjung Manangis.