Upload
zander-van-der-westhuizen
View
225
Download
8
Embed Size (px)
DESCRIPTION
Dr Ferdie Clasen preek uit Psalm 111 met die tema: Kerk is soos kuier - afsluiting
Citation preview
1
Skriflesing: Psalm 111
Tygerpoort: 17 Junie 2012
Inleiding
Soos alle ander groepe van mense, het christene ook
bepaalde gewoontes.
Ons het mos die hele eerste kwartaal van hierdie jaar
lank en diep met mekaar gesels oor drie van die
gewoontes.
Toe het ons vir mekaar gesê, christene lees gereeld die
Bybel, ons gesels graag saam met ander christenvriende
oor ons geloof, en omdat ons so baie ontvang het, hou
ons daarvan om te gee.
En nou het ons die afgelope kwartaal gesels oor die een
gewoonte wat almal van ons baie gereeld nakom, en dis
om erediens te hou.
Waarom hou ons erediens?
Aan die hand van die kuier-metafoor het ons nagedink
oor alles wat in die erediens gebeur.
2
Maar agter alles wat ons doen lê daar natuurlik ‘n baie
belangrike vraag, en dit is: hoekom hou ons gereeld
erediens en hoekom doen ons in die erediens wat ons
doen?
Op die vraag is daar mos nou waarskynlik baie
antwoorde; een van die antwoorde is dat ons gereeld
erediens toe kom gewoon omdat dit ons help om ‘n
klomp belangrike goed te onthou.
Dit help ons veral om nie te vergeet wat die Here alles vir
ons gedoen het nie.
Hierdie ding van vergeet is mos nou maar nog altyd deel
van ons menswees.
Ook die gelowiges van die Ou Testament het gesukkel
om al die dinge wat die Here vir hulle gedoen het te
onthou.
Daarom het die Here van die vroegste tye af vir mense
tekens gegee wat hulle moes help om te onthou.
3
Hy weet van ons kort geheue, daarom sê vers 4 van die
psalm wat ons saam gelees het, die Here sorg self dat sy
magtige dade nie vergeet word nie.
Hy self help ons om te onthou.
In die tyd van die Ou Testament het Hy byvoorbeeld vir
hulle die teken van die besnydenis en die teken van die
pasga gegee.
Hy het ook vir hulle Psalm 111 gegee.
Psalm 111 help om te onthou …
Hierdie psalm moes die Israeliete help om veral 3 baie
belangrike dinge te onthou.
Dit moes hulle help om te onthou dat God alles gemaak
het wat bestaan.
Daarom lees ons byvoorbeeld in vers 2 “die werke van
die Here is groot”, en in vers 3 “sy dade is vol majesteit
en luister”.
Die Psalm moes hulle ook help om te onthou dat God
hulle vrygemaak het.
4
As die digter in vers 5 sê die Here voed dié wat Hom
dien, dan verwys hy waarskynlik na die tyd in die
woestyn toe die Here vir die volk manna en kwartels
gegee het om van te lewe.
In die volgende vers verwys hy heel duidelik na die intog
in die beloofde land as hy sê dat die Here aan hulle die
land van ander nasies gegee het.
En in vers 9 sê hy dit nog ‘n keer: “die Here het vryheid
vir sy volk bewerk”.
Die punt is duidelik: God wil hê die Israeliete moet onthou
dat Hy hulle gemaak het, maar hulle moet ook onthou dat
Hy hulle vrygemaak het.
Die derde ding waarmee Psalm 111 hulle moes help,
was om te onthou dat God hulle nooit sal los nie; dat Hy
altyd by hulle sal wees.
Hy het in ‘n verhouding met hulle getree, en hierdie
verhouding sal Hy nooit verbreek nie.
5
Die Bybelskrywers noem hierdie verhouding tussen ons
en God ‘n verbond en nou praat die digter van hierdie
verbond as hy in vers 3 sê die Here se trou staan vir
altyd vas.
En as hy in vers 5 sê Hy hou sy verbond altyd in stand.
En as hy weer in vers 9 sê die Here het sy verbond vir
altyd ingestel.
As ons dalk soms vergeet van die Here en alles wat Hy
vir ons gedoen het, dan kan ons verseker weet dat die
Here ons nooit sal vergeet nie.
Die erediens help ons om te onthou …
Soos Psalm 111, wil die erediens ons ook help om ‘n
klomp goed te onthou.
En ons moet dit onthou omdat die erdiens nie eindig
wanneer ons uit hierdie gebou uitstap nie.
Nee, as ons hier uitstap dan moet ons dit wat ons hier
gedoen het, aanhou doen in die gewone, alledaagse
lewe wat ons elke dag van die week leef.
6
Kom ons gaan kuier gou weer vir ‘n paar oomblikke in
elke vertrek en dan sê ons vir mekaar hoe ons dit wat
ons hier in die erediens doen, ook in die lewe daar buite
moet gaan doen.
In die voorportaal
Een van die goed wat ons in die voorportaal van die
erediens doen, is om te verklaar dat ons hier bymekaar is
in die Here se teenwoordigheid.
Maar nou weet ons mos die Here is nie net hier in hierdie
gebou as ons saam erediens hou nie.
Nee, die Here is altyd by ons …. ook Maandag en
Dinsdag en Woensdag op kantoor en by die huis en op
die sportveld en in die skool en as ons slaap en as ons
op die pad is.
Die probleem is dat ons partykeer vergeet daarvan en
dan leef ons van Maandag tot Saterdag asof die Here nie
ook daar is nie.
7
Daarom kom ons maar weer elke Sondag erediens toe
sodat ons mekaar kan herinner dat die Here regtig by
ons is en moedig ons mekaar aan om dit ook die res van
die week te onthou.
As ons die Here se teenwoordigheid Sondag in die
erediens ervaar en beleef, maar ons leef in die week asof
Hy nie ook daar is nie, dan het die erediens niks beteken
nie.
Kom ek sê dit meer positief: ons intense belewenis van
die Here se teenwoordigheid hier in die erediens, moet
ons help om die Here se nabyheid ook in die week te
ervaar.
En dit moet ons help om die hele week so te leef dat
ander mense deur ons lewe ook die Here se nabyheid en
sy liefde en sy sorg kan ervaar.
Dis een van die redes hoekom ons Sondag na Sondag
maar weer hier bymekaar kom.
Die erediens help ons om te onthou.
8
In die sitkamer
Een van die goed wat ons in die sitkamer van die
erediens doen, is om saam te bid.
Maar ons saambid hier in die erediens moet ons help om
te onthou dat ons ook gedurende die week kan aanhou
bid.
Meer nog: dat ons gebede nooit hoef op te hou nie.
Ek onthou nog hoedat prof Johan Heyns altyd in die klas
vir ons gesê het: soms moet julle julle oë toemaak en
julle hande vou en bid; maar daarna moet julle in
hemelsnaam weer julle oë oopmaak en julle hande
uitsteek ….. en verder bid.
Want ook ons werk is ‘n gebed.
As ons glo dat die Here altyd by ons is, dan kan ons ook
mos altyd in gesprek wees met Hom.
Ons gebede hou nie op wanneer ons by die kerk se
deure uitstap nie.
Die erediens moet ons help om dit te onthou.
9
In die eetkamer
Een van die goed wat ons in die eetkamer van die
erediens doen, is om ons offers te gee.
Ons het vir mekaar gesê dat ‘n hedendaagse offer dalk
sou kon beteken om met minder klaar te kom sodat
hierdie aarde wat God gemaak het ‘n beter kans het op
oorlewing, want ons verbruikerskultuur maak dat ons die
aarde letterlik opgebruik.
Miskien is dit een van die goed wat ons dalk die
maklikste vergeet wanneer ons by die deure van die
kerkgebou uitstap.
Om hier te bely dat die aarde aan God behoort en dat
ons dit wil oppas, is een ding.
Maar om die belydenis daar buite in ‘n
verbruikersamelewing te gaan uitleef, is nie so maklik
nie.
Om die rede sal ons in die jare wat voorlê maar gereeld
erediens toe moet kom, sodat ons mekaar kan help om
10
te onthou op wie se aarde ons nou eintlik woon en sodat
ons mekaar kan aanmoedig om ons offers te bring.
En ons sal dit op ‘n heel konkrete en op ‘n heel praktiese
manier moet doen.
As ek op ‘n Maandag besig is om al weer iets te koop wat
ek nie regtig nodig het nie, dan moet Sondag se erediens
my daaraan herinner dat ek nou eintlik besig is om met
die aarde te mors.
Ja, dit lyk vir my deel van ‘n groener leefwyse is om
gereeld erediens toe te kom sodat ons mekaar kan help
om te onthou …..
Op die stoep …
Ons sluit vanoggend hierdie kwartaal se reeks af op die
stoep.
Een van die goed wat op die stoep van die erediens
gebeur, is dat die Here ons met sy seën hier wegstuur.
Op ‘n manier is dit een van die wonderlikste momente in
die erediens.
11
Want wat gebeur nou eintlik wanneer die dominee sy
hande uitstrek en die een of ander rympie opsê?
Die wonderlike ding wat dan gebeur, en iets daarvan het
ons ook in Psalm 111 gelees, is dat God as’t ware vir ons
sê: in die week wat voorlê, sal julle dalk plek plek sukkel
om my te onthou, maar moenie bekommerd wees nie, ek
sal julle nooit vergeet nie.
Aan die einde van die erediens onderneem die Here as’t
ware dat Hy saam met ons hier uitstap en dat Hy in die
week wat voorlê elke oomblik by ons en tussen ons saam
met ons en binne-in ons sal wees.
As ons soms die Here vergeet, dan herinner die Here se
seën ons daaraan dat Hy ons altyd sal onthou.
Waar ons ookal is, en wat ons ookal doen.
Amen.